ନୂଆଦିଲ୍ଲୀ: ଗୁଗଲ୍ ହେଉ କି ଫେସବୁକ୍ । ଡିଜିଟାଲ୍ ଜମାନାରେ ଗୁଗଲ୍ ଓ ଫେସବୁକ ଉପରେ ଅଧିକାଂଶ ନିର୍ଭରଶୀଳ । କହିବାକୁ ଗଲେ ଦିନ ଆରମ୍ଭ ହୁଏ ଫେସବୁକରୁ ରାତି ସରେ ଗୁଗଲରେ । ବିଶ୍ୱର ସବୁଠୁ ଲୋକପ୍ରିୟ ସର୍ଚ୍ଚ ଇଞ୍ଜିନ୍ ଗୁଗଲ୍ ସହ ଲୋକପ୍ରିୟ ସୋସିଆଲ୍ ମିଡିଆ ଫେସବୁକର ବ୍ୟବହାରକାରୀଙ୍କ ସଂଖ୍ୟା ଦିନକୁ ଦିନ ବଢ଼ି ଚାଲିଛି । ବଦଳୁ ଥିବା ଦୁନିଆ ସହ କମ୍ପାନୀ ନୂଆ ନୂଆ ଫିଚର ଆଣୁଛନ୍ତି । ଲୋକଙ୍କ ଦୈନନ୍ଦିନ କାର୍ଯ୍ୟକଳାପକୁ ଟ୍ରାକିଂ କରୁଥିବା ଏହି ୨ କମ୍ପାନୀଙ୍କ ଉପରେ ଫ୍ରାନ୍ସ ନେଇଛି କାର୍ଯ୍ୟାନୁଷ୍ଠାନ ।
କୁକିଜ୍ ପାଇଁ ଏବେ ଏହି ୨ କମ୍ପାନୀଙ୍କୁ ଦେବାକୁ ପଡ଼ିବ ବଡ଼ ପରିମାଣର ଜରିମାନା । ଗୁଗଲ୍ ଓ ଫେସବୁକ୍ ଉପରେ ଅରବ ଟଙ୍କାର ଜରିମାନା ଲଗାଯାଇଛି । ଫ୍ରେଞ୍ଚ୍ ରେଗୁଲେଟର ଉଭୟ କମ୍ପାନୀ ଉପରେ ୨୩୭ ମିଲିଅନ୍ ଡଲାର ଯାହାକି ଭାରତୀୟ ମୁଦ୍ରାରେ ୧୭.୬ ଅରବ ଟଙ୍କାର ଫାଇନ୍ କରିଛନ୍ତି । ଅନଲାଇନ୍ ଟ୍ରାକିଂରୁ ବର୍ତ୍ତିବା ଲାଗି ଆବଶ୍ୟକତା ମୁତାବକ ବିକଳ୍ପ ନଥିବାରୁ ଏହି ୨ ଆମେରିକୀୟ କମ୍ପାନୀଙ୍କୁ ଦୋଷୀ ସାବ୍ୟସ୍ତ କରିଛି ସିଏନ୍ଆଇଏଲ୍ ।
ରିପୋର୍ଟରେ କୁହାଯାଇଛି, ବ୍ୟବହାରକାରୀଙ୍କୁ କୁକିଜ୍ ଗ୍ରହଣ ଲାଗି ବିକଳ୍ପ ଦିଆଯାଇଥିବା ବେଳେ ମନା କରିବା ଲାଗି କୌଣସି ସହଜ ବାଟ ନାହିଁ । କୁକିଜକୁ ମନା କରିବା ଅନେକ ଥର କ୍ଲିକ୍ କରିବାକୁ ପଡ଼ୁଛି । ଆମେରିକା ଅପେକ୍ଷା ୟୁରୋପରେ କଡ଼ା ନିୟମ ରହିଛି । ବ୍ୟବହାରକାରୀଙ୍କ ଉପରେ ନଜର ରଖିବା ଲାଗି ୱେବସାଇଟକୁ ଅନୁମତି ନେବାକୁ ପଡ଼ିଥାଏ ।
ସିଏନ୍ଆଇଏଲ୍ ଅନୁସାରେ, ଫେସବୁକ ଓ ଗୁଗଲର ଫ୍ରେଞ୍ଚ୍ ହୋମପେଜ୍ ଏବଂ ୟୁଟ୍ୟୁବ୍ ବ୍ୟବହାରକାରୀଙ୍କୁ ଅନୁମତି ମାଗୁଛି । ଯାହାକି ଫ୍ରେଞ୍ଚ ତଥ୍ୟ ସୁରକ୍ଷା ନିୟମର ଉଲ୍ଲଂଘନ । ଫ୍ରେଞ୍ଚ୍ ବଞ୍ଚଡଗ୍ ଗୁଗଲ୍ ଉପରେ ୧୫୦ ମିଲିଅନ୍ ୟୁରୋ ଏବଂ ଫେସବୁକ୍ ଉପରେ ୬୦ ମିଲିଅନ୍ ୟୁରୋ ଫାଇନ୍ ଲଗାଇଛି । ଆହୁରି କୁହାଯାଇଛି କମ୍ପାନୀ ୩ ମାସ ମଧ୍ୟରେ ବ୍ୟବହାରକାରୀଙ୍କ ଲାଗି ଏହି ପ୍ରକ୍ରିୟାକୁ ସହଜ ନକଲେ ଦୈନିକ ୮୫ କୋଟି ଟଙ୍କା ଜରିମାନା ବାବଦକୁ ଦେବାକୁ ହେବ ।
