ନନ୍ଦିଘୋଷବ୍ୟୁରୋ: ପରିବା ବଜାରକୁ ଗଲେ ଏବେ ଖାଉଟିଙ୍କୁ ଲାଗୁଛି ଝଟକା। ଦିନକୁ ଦିନ ବଢ଼ି ଚାଲିଛି ପନିପରିବା ଦର। କାର୍ତ୍ତିକ ମାସରେ ନିରାମିଷ ଖାଦ୍ୟ ପ୍ରତି ଲୋକଙ୍କ ଆଗ୍ରହ ବଢ଼ୁଥିବାରୁ ପରିବାର ଚାହିଦା ମଧ୍ୟ ବୃଦ୍ଧି ପାଇଛି। ଏହାର ସିଧାସଳଖ ପ୍ରଭାବ ଏବେ ସାଧାରଣ ଖାଉଟିଙ୍କ ପକେଟ୍ ଉପରେ ପଡ଼ୁଛି।
ତେବେ କେବଳ ଚାହିଦା ବୃଦ୍ଧି ନୁହେଁ, ପନିପରିବା ଦର ବଢ଼ିବା ପଛରେ ରହିଛି ଆହୁରି ଅନେକ କାରଣ। ଓଡ଼ିଶା ଅନେକ ପନିପରିବା ପାଇଁ ଅନ୍ୟ ରାଜ୍ୟ ଉପରେ ନିର୍ଭରଶୀଳ। କିନ୍ତୁ ପଡ଼ୋଶୀ ରାଜ୍ୟଗୁଡ଼ିକରେ ଲଗାଣ ବର୍ଷା ଯୋଗୁଁ ଫସଲ ନଷ୍ଟ ହୋଇଛି। ଫଳରେ ବାହାର ରାଜ୍ୟରୁ ପରିବା ଯୋଗାଣ ପ୍ରଭାବିତ ହୋଇଛି। ଯାହାର ପ୍ରଭାବ ସ୍ଥାନୀୟ ବଜାରରେ ଦେଖିବାକୁ ମିଳୁଛି।
ସେହିପରି ଓଡ଼ିଶାର ବିଭିନ୍ନ ଅଞ୍ଚଳରେ ବନ୍ୟା ମଧ୍ୟ ପରିବା ଚାଷକୁ କ୍ଷତି ପହଞ୍ଚାଇଛି। ଅନେକ ଚାଷୀଙ୍କ ଫସଲ ନଷ୍ଟ ହୋଇଥିବା ବେଳେ କିଛି ଅଞ୍ଚଳରେ ଏଯାଏଁ ଅମଳ ହୋଇପାରିନାହିଁ। ଫଳରେ ବଜାରକୁ ପରିବା ଆସିବାର ପରିମାଣ କମିଛି। ଯୋଗାଣ ହ୍ରାସ ଓ ଚାହିଦା ବୃଦ୍ଧି ଯୋଗୁଁ ବଜାରରେ ଦର ଉପରମୁହାଁ ହୋଇଛି।
ଅନ୍ୟପଟେ ପରିବା ଦର ବୃଦ୍ଧିକୁ ନେଇ ବ୍ୟବସାୟୀ ଓ ଗ୍ରାହକଙ୍କ ମତ ଭିନ୍ନ ରହିଛି। ବ୍ୟବସାୟୀଙ୍କ କହିବା ଅନୁଯାୟୀ, ବଜାରକୁ ପରିବା ଯୋଗାଣ କମ୍ ରହୁଥିବାରୁ ଦର ଅଧିକ ରହୁଛି। ଅନ୍ୟପଟେ କିଛି ଗ୍ରାହକଙ୍କ ମତରେ, ବାହାର ରାଜ୍ୟରୁ ପରିବା ଆସୁଥିବାରୁ ପରିବହନ ଖର୍ଚ୍ଚ ବଢ଼ୁଛି। ଏହା ମଧ୍ୟ ପରିବା ଦର ବୃଦ୍ଧିର ଏକ ପ୍ରମୁଖ କାରଣ।
ତେବେ କାର୍ତ୍ତିକ ମାସରେ ପରିବା ବଜାରର ଏଭଳି ସ୍ଥିତି ସାଧାରଣ ଖାଉଟିଙ୍କ ଚିନ୍ତା ବଢ଼ାଇ ଦେଇଛି। ଦୈନନ୍ଦିନ ରୋଷେଇ ପାଇଁ ଆବଶ୍ୟକ ପରିବା କିଣିବାକୁ ମଧ୍ୟ ଗ୍ରାହକଙ୍କୁ ଅଧିକ ଟଙ୍କା ଖର୍ଚ୍ଚ କରିବାକୁ ପଡ଼ୁଛି। ଏବେ ସମସ୍ତଙ୍କ ଅପେକ୍ଷା, କେବେ କମିବ ପରିବା ଦର ଏବଂ କେବେ ସ୍ୱାଭାବିକ ହେବ ବଜାର ସ୍ଥିତି?
