କାମାକ୍ଷାନଗର : ପୂର୍ବ ଶତ୍ରୁତାକୁ କେନ୍ଦ୍ର କରି ଦୁଇ ପରିବାର ମଧ୍ୟରେ ତୀବ୍ର ଗଣ୍ଡଗୋଳ। ଆକ୍ରମଣ ଓ ପ୍ରତିଆକ୍ରମଣରେ ଉଭୟ ପକ୍ଷର ଦୁଇ ଜଣ ଗୁରୁତର ଆହତ ହୋଇଛନ୍ତି । ଉଭୟଙ୍କ ଅବସ୍ଥା ସଙ୍କଟାପନ୍ନ ଥିବାରୁ କଟକ ସ୍ଥାନାନ୍ତର କରାଯାଇଛି । କାମାକ୍ଷାନଗର ଥାନା ନୂଆରେକୁଳା ଗାଁରେ ଦୁଇ ପରିବାର ମଧ୍ୟରେ ପୂର୍ବରୁ ଶତ୍ରୁତା ଲାଗି ରହିଥିଲା । ଗତ ରବିବାର ଦୀପାବଳି ଅବସରରେ ବାଣ ଫୁଟାଇବାକୁ କେନ୍ଦ୍ର କରି ଉଭୟ ପରିବାର ମଧ୍ୟରେ ପୁଣି ଥରେ ବିବାଦ ଉପୁଜିଥିଲା । ତେବେ ଆଜି ଏହି ବିବାଦ ଉଗ୍ରରୂପ ନେଇଥିଲା । ଗାଁର ରାଜେନ୍ଦ୍ର ବେହେରା କାମାକ୍ଷାନଗର ସହରର ତରୁଣ ବଜାର ନିକଟରେ ଠିଆ ହୋଇଥିବା ସମୟରେ ଶେଷଦେବ ବେହେରାଙ୍କ ପୁଅ ଓ ପୁତୁରା ସେଠାରେ ପହଞ୍ଚି ତାଙ୍କୁ ଆକ୍ରମଣ କରିଥିଲେ l ଗୁରୁତର ରାଜେନ୍ଦ୍ରଙ୍କୁ ସ୍ଥାନୀୟ ଲୋକେ ଉଦ୍ଧାର କରି କାମାକ୍ଷାନଗର ମେଡିକାଲରେ ଭର୍ତ୍ତି କରିଥିଲେ । ଏହାର କିଛି ସମୟ ପରେ ରାଜେନ୍ଦ୍ରଙ୍କ ପରିବାର ଲୋକେ ଶେଷଦେବ ବେହେରାଙ୍କୁ ଆକ୍ରମଣ କରିଥିବା ଜଣାପଡ଼ିଛି । ଫଳରେ ଉଭୟ ପକ୍ଷର ଦୁଇ ଜଣ ଗୁରୁତର ଆହତ ହୋଇଛନ୍ତି। ପ୍ରାଥମିକ ଚିକିତ୍ସା ପରେ ଉଭୟଙ୍କୁ ଅଧିକ ଚିକିତ୍ସା ପାଇଁ କଟକ ସ୍ଥାନାନ୍ତର କରାଯାଇଛି । ଘଟଣାକୁ ନେଇ କାମାକ୍ଷାନଗର ପୋଲିସ ତଦନ୍ତ ଆରମ୍ଭ କରିଛି। ତେବେ ଉଭୟ ପରିବାର ସଦସ୍ୟଙ୍କ ପ୍ରତିକ୍ରିୟା ମିଳି ପାରିନାହିଁ l….
