ଭୁବନେଶ୍ବର: ଆଜିଠୁ ଟ୍ବିନସିଟିରେ ଲାଗୁ ହେବ ନାଇଟକର୍ଫ୍ୟୁ । ରାତି 9 ଟାରୁ ସକାଳ ୫ ଯାଏଁ ଲାଗିବ କଟକଣା । ଫେବ୍ରୁଆରୀ 1 ଯାଏଁ ବଳବତ୍ତର ରହିବ । କୋଭିଡ ନିମୟ ଭାଙ୍ଗି ଅମାନିଆ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଚେତାବନୀ ଦେଲେ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ । ସେ କହିଛନ୍ତି, ‘ଟ୍ବିନସିଟିରେ ନିୟୋଜିତ ହେବେ ୨୫ ପ୍ଲାଟୁନ ପୋଲିସ ଫୋର୍ସ ଓ ୧୦୦ ଅଫିସର । ଦୋକାନ, ମଲ, ହୋଟେଲ ମାଲିକଙ୍କ ଦାୟିତ୍ବ କୋଭିଡ ନିୟମ ପାଳନ କରିବା । ନିୟମ ଭଙ୍ଗ ହେଲେ 7 ଦିନ କିମ୍ବା ଅଧିକ ଦିନ ଯାଏଁ ଦୋକାନ ସିଲ ହେବ । ତୃତୀୟ ଲହର ମୁକାବିଲା ପାଇଁ ସମସ୍ତଙ୍କୁ ସଚେତନ ରହିବାକୁ ପଡ଼ିବ । ଏଥିପାଇଁ ଲୋକେ ଆମକୁ ସହଯୋଗ କରିବା ଆବଶ୍ୟକ ।’
ଟି-୨୦ କ୍ରିକେଟରେ ନିୟମ ବଦଳାଇଲା ICC, ଜାଣନ୍ତୁ କ’ଣ ରହିଛି ନୂଆ ନିୟମ…
ଦୁବାଇ: ବଦଳିଲା ଟି-୨୦ କ୍ରିକେଟର ନିୟମ । ଅନ୍ତର୍ଜାତୀୟ କ୍ରିକେଟ ପରିଷଦ ଶୁକ୍ରବାର ଟି-୨୦ ଅନ୍ତର୍ଜାତୀୟ ମ୍ୟାଚରେ ନିୟମ ପରିବର୍ତ୍ତନ କରିଛି । ୧୬ ଜାନୁଆରୀରେ ଓ୍ୱେଷ୍ଟଇଣ୍ଡିଜ୍ ଓ ଆୟର୍ଲାଣ୍ଡ ମଧ୍ୟରେ ଖେଳାଯିବାକୁ ଥିବା ଏକମାତ୍ର ଟି-୨୦ ମ୍ୟାଚରୁ ଏହି ନୂଆ ନିୟମ କାର୍ଯ୍ୟକାରୀ ହେବ ।
ନିୟମ ଅନୁଯାୟୀ, ଉଭୟ ପୁରୁଷ ଓ ମହିଳା ଟି-୨୦ ଅନ୍ତର୍ଜାତୀୟ ମ୍ୟାଚରେ ସ୍ଲୋ-ଓଭର ରେଟ୍ ପାଇଁ ଦଣ୍ଡ ସେହି ମ୍ୟାଚ ମଧ୍ୟରେ ଦିଆଯିବ । ଏହା ସହିତ ଦ୍ୱିପାକ୍ଷିକ ଅନ୍ତର୍ଜାତୀୟ ଟି-୨୦ ସିରିଜର ପ୍ରତ୍ୟେକ ଇନିଂସ ମଧ୍ୟରେ ଅଢ଼େଇ ମିନିଟର ଡ୍ରିଙ୍କ୍ସ ବ୍ରେକ ନେଇ ପାରିବେ। କିନ୍ତୁ ଏଥିପାଇଁ ଟି-୨୦ ସିରିଜ ପୂର୍ବରୁ ଉଭୟ ଦେଶର ବୋର୍ଡ ଏହା ଉପରେ ଆପୋଷ ବୁଝାମଣା କରିବାକୁ ପଡ଼ିବ ।
ICCର ନୂଆ ନିୟମ ଅନୁସାରେ ଯଦି ଏକ ଟିମ୍ ନିର୍ଦ୍ଧାରିତ ସମୟ ପଛରେ ରହିବ ତେବେ ଅବଶିଷ୍ଟ ଓଭରରେ ବୋଲିଂ ଦଳର ଗୋଟିଏ କମ୍ ଖେଳାଳି ୩୦ ଗଜ ବାହାରେ ରହିବେ । ଅର୍ଥାତ ବର୍ତ୍ତମାନ ପାଓ୍ୱାର ପ୍ଲେ ପରେ ୩୦ ଗଜ ବାହାରେ ୫ ଜଣ ଖେଳାଳି ରହୁଥିଲେ । କିନ୍ତୁ ଓଭର ରେଟ୍ ପାଇଁ ପେନାଲ୍ଟି ପାଇବା ପରେ କେବଳ ଚାରି ଜଣ ଫିଲ୍ଡର ବାହାରେ ରହିପାରିବେ ।
ନିଆଁ ଲଗା ପୁଅ: ଘର ଜାଳିଲା, ବାପାଭାଇଙ୍କୁ ମାରିବାକୁ ଗୋଡାଇଲା
ବାଲେଶ୍ବର: ନୀଳଗିରି ଥାନା ଶ୍ୟାମସୁନ୍ଦରପୁର ଅଞ୍ଚଳ ମୁଳାଗଡି ସାହିରେ ମଦ୍ୟପ ପୁଅର ଉନ୍ମତ୍ତକାଣ୍ଡ । ନିଶାସକ୍ତ ଅବସ୍ଥାରେ ଲଗାଇଲା ନିଆ୍ୟ । ବାଇକ୍, ଧାନବସ୍ତା ଏବଂ ଗୁହାଳକୁ ଜାଳିଦେଲା । ଏପରିକି ବାପା ଏବଂ ଭାଇକୁ ଜୀବନରୁ ମାରିଦେବାକୁ ଉଦ୍ୟମ କରିଥିବା ଅଭିଯୋଗ । ନିଶାସକ୍ତ ପୁଅ କବଳରୁ ବାପା ଓ ଭାଇଙ୍କୁ ଉଦ୍ଧାର କରିଛନ୍ତି ଗ୍ରାମବାସୀ । ଅଗ୍ନିଶମ ବାହିନୀ କର୍ମଚାରୀ ଗାଁରେ ପହଞ୍ଚି ନିଆଁକୁ ଆୟତ୍ତ କରିଥିଲେ ।
ସୂଚନାଯୋଗ୍ୟ, ମୂଳାଗଡି ସାହିର ରବୀନ୍ଦ୍ର ପରିଡ଼ାଙ୍କ ପୁଅ ରଞ୍ଜନ ଜମିଜୁମା ଭାଗବଣ୍ଟାକୁ ନେଇ ନିଶାସକ୍ତ ଅବସ୍ଥାରେ ମଧ୍ୟରାତ୍ରିରେ ବାପା ଭାଇଙ୍କ ସହିତ ବଚସା କରିଥିଲେ । ପରେ ଉତ୍ତ୍ୟକ୍ତ ହୋଇ ଘରେ ଥିବା ବାଇକରେ ନିଆଁ ଲଗାଇ ଦେଇଥିଲେ । ବାଇକ୍ଟି ସମ୍ପୂର୍ଣ୍ଣ ଜଳି ଯାଇଛି । ଏତିକିରେ ରବୀନ୍ଦଙ୍କ ଉତ୍ପାତ କମି ନଥିଲା । ଘରେ ଥିବା ଧାନବସ୍ତା ଓ ଗୁହାଳରେ ନିଆଁ ଲଗାଇ ଦେଇଥିଲେ । ଏହାପରେ ବାପା ଓ ଭାଇଙ୍କୁ ଜୀବନରୁ ମାରି ଦେବାକୁ ଉଦ୍ୟମ କରିଥିଲେ । ନୀଳଗିରି ପୋଲିସ ଯୁବକକୁ ଧରି ପ୍ରଥମେ ମେଡିକାଲ ନେିଥିଲେ । ସେଠାରେ ଚିକିତ୍ସା ପରେ ଥାନାରେ ଅଟକ ରଖି ପଚରାଉଚରା କରୁଛି ।
ଛୁଆଙ୍କୁ ଦୁଷ୍କର୍ମ କଲେ ମିଳିବ ଭୟଙ୍କର ସଜ୍ଜା
ନୂଆଦିଲ୍ଲୀ: ଛୁଆଙ୍କ ଦୁଷ୍କର୍ମକାରୀଙ୍କୁ ମିଳିବ ଭୟଙ୍କର ସଜ୍ଜା । ଏନେଇ କଡ଼ା ଆଇନ୍ ଆଣିବାକୁ ଯାଉଛନ୍ତି ଋଷ ସରକାର । ନୂଆ ନିୟମ ପ୍ରକାରେ ଦୋଷୀଙ୍କୁ ଦୁନିଆର ସବୁଠୁ ଥଣ୍ଡା ସ୍ଥାନ ଅର୍ଥାତ୍ ଆର୍କଟିକ୍ ଅଞ୍ଚଳରେ ଆଜୀବନ ବନ୍ଦୀ କରି ରଖାଯିବ । ଋଷ ସଂସଦର ଅଧ୍ୟ କହିଛନ୍ତି, ଛୁଆଙ୍କୁ ଯୌନ ଶୋଷଣ କରୁଥିବା ରାକ୍ଷାସକୁ ଆର୍କଟିକରେ କଠୋର ଶ୍ରମ ଦଣ୍ଡ କଲୋନୀରେ ସଜ୍ଜା କାଟିବାକୁ ପଡ଼ିବ । ଏଥିସହ ସାଇବେରିୟାଇ ଖଣିରେ କାମ କରିବାକୁ ପଡ଼ିବ ।
ସୂଚନା ଅନୁସାରେ, ଗତ ସପ୍ତାହରେ ଋଷରେ ଦୁଇ ଜଣ ବ୍ୟକ୍ତି ଏକ ୫ ବର୍ଷର ଛୁଆକୁ ଅପହରଣ କରି ନେଇ ଦୁଷ୍କର୍ମ କରିଥିଲେ । ଦୁଷ୍କର୍ମ ପରେ ଛୁରି ଭୁଷି ମାରି ଦେଇଥିଲେ । ଏତିକିରେ ମନ ବୁଝି ନଥିଲା ଦୁଷ୍କର୍ମକାରୀଙ୍କର । ବିଭତ୍ସ ହତ୍ୟା ପରେ ଶରୀରକୁ ଖଣ୍ଡ ଖଣ୍ଡ କରି କାଟିବା ପରେ ସୁଟକେସରେ ଭର୍ତ୍ତି କରି ଫିଙ୍ଗି ଦେଇଥିଲେ । ଏବେ ଏହି ମାମଲାରେ ଦୁଷ୍କର୍ମକାରୀଙ୍କୁ ଦୁନିଆର ସବୁଠୁ ଥଣ୍ଡା ଜାଗାରେ ସଜ୍ଜା ମିଳିବ ।
ରିପୋର୍ଟ ଅନୁସାରେ, ଛୁଆକୁ ଅପହରଣ, ଦୁଷ୍କର୍ମଓ ହତ୍ୟା ଅଭିଯୋଗ ୪୪ ବର୍ଷିଅ ଡୋନିସ୍ ଗେରାସିମୋଭ ଓ ୨୪ ବର୍ଷିଅ ବାଦିମ ବେଲ୍ୟାକୋବଙ୍କ ଉପରେ ଲାଗିଛି । ଦୁହେଁ ସମଲିଙ୍ଗୀ ବୋଲି କୁହାଯାଉଛି । ଗତ ସପ୍ତାହରେ କୋଷ୍ଟ୍ରୋମା ଅଞ୍ଚଳରେ ମାଆର ଅଫିସ୍ ନିକଟରେ ଝିଅଟି ଖେଳୁଥିଲା । ସେହି ସମୟରେ ଦୁହେଁ ଝିଅଟକୁ ଅପହରଣ କରି ନେଇ ଦୁଷ୍କର୍ମ ପରେ ହତ୍ୟା କରିଥିଲେ ।
ଜାମ୍ମୁ କାଶ୍ମୀରରେ ଏନକାଉଣ୍ଟର, ସୁରକ୍ଷାକର୍ମୀଙ୍କୁ ଗୁଳିରେ ୩ ଆତଙ୍କୀ ନିପାତ
ଶ୍ରୀନଗର: ଜାମ୍ମୁ କାଶ୍ମୀରରେ ଆଜି ପୁଣି ଏକ ବଡ଼ ଧରଣର ଏନକାଉଣ୍ଟର ହୋଇଛି । ଜାମ୍ମୁ କାଶ୍ମୀରରେ ସୁରକ୍ଷା ବାହିନୀ ଦ୍ୱାରା ଜୈଶ-ଇ-ମହମ୍ମଦର ତିନି ଜଣ ଆତଙ୍କବାଦୀ ନିହତ ହୋଇଛନ୍ତି । ଗୁରୁବାର ବିଳମ୍ବିତ ରାତିରେ ବଡଗାମର ଚାଡୋରା ଅଞ୍ଚଳରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଏହି ଏନକାଉଣ୍ଟର ହୋଇଥିଲା। ସୁରକ୍ଷା ବାହିନୀର ଏନକାଉଣ୍ଟରରେ ୩ ଜଣ ଆତଙ୍କବାଦୀ ନିପାତ ହୋଇଛନ୍ତି । ୩ ଜଣ ଆତଙ୍କବାଦୀଙ୍କ ମୃତ୍ୟୁ ପରେ ଘଟଣାସ୍ଥଳରୁ ଅନେକ ମାରଣାସ୍ତ୍ର ଜବତ କରାଯାଉଛି । ଏହି ଏନକାଉଣ୍ଟର ପରେ ଏବେ ସେହି ଅଞ୍ଚଳରେ ସର୍ଚ୍ଚ ଅପରେସନ୍ ଜୋରଦାର ଜାରି ରହିଛି ।
https://twitter.com/ANI/status/1479332221794226176?s=20
ସୂଚନା ଅନୁଯାୟୀ ଗୁରୁବାର ରାତିରେ ବଡଗାମ ଜିଲ୍ଲାର ଚାଡୋରା ଅଞ୍ଚଳରେ ସୁରକ୍ଷା ବାହିନୀ ସହ ହୋଇଥିବା ଏନକାଉଣ୍ଟରରେ ତିନିଜଣ ଆତଙ୍କବାଦୀ ନିହତ ହୋଇଛନ୍ତି । ଜଣେ ସୁରକ୍ଷା କର୍ମୀଙ୍କ ସୂଚନା ଅନୁଯାୟୀ ସୁରକ୍ଷା ଏଜେନ୍ସିକୁ ଚାଡୋରା ଅଞ୍ଚଳରେ ଆତଙ୍କବାଦୀଙ୍କ ଲୁଚି ରହିଥିବା ସୂଚନା ମିଳିଥିଲା । ଏହି ସୂଚନା ପାଇବା ପରେ ସୁରକ୍ଷା ବାହିନୀ ଏହି ଅଞ୍ଚଳକୁ ଘେରି ରହି ସର୍ଚ୍ଚ ଅପରେସନ ଆରମ୍ଭ କରିଥିଲେ ।
ତେବେ ଏହି ଘଟଣା ପରେ କାଶ୍ମୀର ଆଇଜିପି ବିଜୟ କୁମାର କହିଛନ୍ତି କି ଗୁରୁବାର ବିଳମ୍ବିତ ରାତିରେ ସୁରକ୍ଷାକର୍ମୀଙ୍କ ଗୁଳିରେ ୩ ଜଣ ଆତଙ୍କବାଦୀଙ୍କ ମୃତ୍ୟୁ ହୋଇଛି । ଏନକାଉଣ୍ଟରରେ ମୃତ୍ୟୁ ହୋଇଥିବା ତିନି ଆତଙ୍କବାଦୀଙ୍କ ନିକଟରୁ ୩ଟି AK-57 ରାଇଫଲ ସହ ବହୁ ଅସ୍ତ୍ରଶସ୍ତ୍ର ଜବତ କରାଯାଇଛି। ତେବେ ୨୦୨୨ ଆରମ୍ଭରୁ ଏପର୍ଯ୍ୟନ୍ତ ୧୧ ଜଣ ଆତଙ୍କବାଦୀଙ୍କୁ ସୁରକ୍ଷାକର୍ମୀ ନିପାତ କରିଛି ବୋଲି ବିଜୟ କୁମାର ସୂଚନା ଦେଇଛନ୍ତି ।
ପ୍ରଧାନମନ୍ତ୍ରୀଙ୍କ ସୁରକ୍ଷାରେ ବିଭ୍ରାଟକୁ ନେଇ ତଦନ୍ତକାରୀ ସଂସ୍ଥାଙ୍କୁ ସୁପ୍ରିମକୋର୍ଟଙ୍କ ବଡ଼ ନିର୍ଦ୍ଦେଶ
ନୂଆଦିଲ୍ଲୀ: ବୁଧବାର ପଞ୍ଜାବରେ ପିଏମ୍ ମୋଦିଙ୍କ ସୁରକ୍ଷାରେ ବଡ଼ ବିଭ୍ରାଟକୁ ନେଇ ବଡ଼ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ପ୍ରଧାନମନ୍ତ୍ରୀଙ୍କ ଗସ୍ତ ରେକର୍ଡ ଓ ତଦନ୍ତକାରୀ ସଂସ୍ଥାକୁ ମିଳିଥିବା ତଥ୍ୟକୁ ସୁରକ୍ଷିତ ରଖିବା ଲାଗି ପ୍ରଧାନବିଚାରପତି ଜଷ୍ଟିସ୍ ଏନ୍.ଭି ରମଣା ନିର୍ଦ୍ଦେଶ ଦେଇଛନ୍ତି । ଏଥିସହ ପଞ୍ଜାବ ପୋଲିସ ଅଧିକାରୀ, ଏସପିଜି ଓ ଅନ୍ୟ ଏଜେନ୍ସିଙ୍କୁ ସହଯୋଗ କରିବା ଏବଂ ସମସ୍ତ ରେକର୍ଡକୁ ସିଲ୍ କରିବା ପାଇଁ କହିଛନ୍ତି ସୁପ୍ରିମକୋର୍ଟ ।
ଏକ ସଂଗଠନ ପକ୍ଷରୁ ଦାଏର ଆବେଦନର ଶୁଣାଣି ଆଜି ସୁପ୍ରିମକୋର୍ଟରେ ହୋଇଛି । ପ୍ରଧାନବିଚାରପତି ଏନ୍.ଭି ରମଣା, ଜଷ୍ଟିସ୍ ସୂର୍ଯ୍ୟକାନ୍ତ ଓ ଜଷ୍ଟିସ୍ ହିମା କୋହଲିଙ୍କ ଖଣ୍ଡପୀଠ ମାମଲାର ଶୁଣାଣି କରିଛନ୍ତି । ଆବେଦନକାରୀଙ୍କ ପକ୍ଷରୁ ମନିନ୍ଦର ସିଂହ ଏହାକୁ ଗମ୍ଭୀର ମାମଲା କହି ଯାଞ୍ଚ ଦାବି କରିଥିଲେ ।
ମାମଲାରେ ସୋମବାର ପର୍ଯ୍ୟନ୍ତ କୌଣସି ପଦକ୍ଷେପ ନ ନେବା ଲାଗି ସୁପ୍ରିମକୋର୍ଟ କେନ୍ଦ୍ର ସରକାର ଓ ପଞ୍ଜାବ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ଆସନ୍ତା ୧୦ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ । ପ୍ରଧାନବିଚାରପତି କହିଛନ୍ତି, ଅବହେଳା ପାଇଁ ତଦନ୍ତର ଆବଶ୍ୟକତା ରହିଛି । ସଲିସିଟର ଜେନରାଲ କହିଛନ୍ତି, ମାମଲାରେ ଏନଆଇଏ ମହାନିର୍ଦ୍ଦେଶକଙ୍କୁ ନୋଡାଲ ଅଧିକାରୀ କରିବାକୁ କେନ୍ଦ୍ର ପରାମର୍ଶ ଦେଇଥିଲେ । କିନ୍ତୁ ସୁପ୍ରିମକୋର୍ଟ ଚଣ୍ଡିଗଡ଼ ଡିଜି ଓ ଏନ୍ଆଇଏର ଜଣେ ଅଧିକାରୀଙ୍କୁ ନୋଡାଲ ଅଧିକାରୀ ନିଯୁକ୍ତ କରିଛନ୍ତି ।
ସାଂସଦ ଓ ବିଧାୟକ ପ୍ରାର୍ଥୀ କରି ପାରିବେ ଅଧିକ ଖର୍ଚ୍ଚ
ନୂଆଦିଲ୍ଲୀ: ଏଣିକି ନିର୍ବାଚନରେ ସାଂସଦ ଓ ବିଧାୟକ ଆଗ ଅପେକ୍ଷା କରିପାରିବେ ଅଧିକ ଖର୍ଚ୍ଚ । ନିର୍ବାଚନ ଲଢିବାକୁ ନେଇ ପ୍ରାର୍ଥୀଙ୍କ ଖର୍ଚ୍ଚ ସୀମା ବୃଦ୍ଧି କରାଯାଇଛି । ବଡ଼ ଓ ଛୋଟ ରାଜ୍ୟର ସାଂସଦ ଓ ବିଧାୟକଙ୍କ ପାଇଁ ଭିନ୍ନ ଭିନ୍ନ ଖର୍ଚ୍ଚ ବୃଦ୍ଧି କରାଯାଇଛି ।
ରାଜ୍ୟର ସାଂସଦ ପ୍ରାର୍ଥୀମାନେ ୨୦୧୪ରେ ୭୦ ଲକ୍ଷ ଟଙ୍କା ଖର୍ଚ୍ଚ କରିଥିବା ବେଳେ, ଏବେ ତାହା ୩୫ ପ୍ରତିଶତ ବୃଦ୍ଧି କରାଯାଇଛି । ଯାହାଫଳରେ ସେମାନେ ୯୫ ଲକ୍ଷ ଖର୍ଚ୍ଚ କରିପାରିବେ । ସେହିପରି ଛୋଟ ରାଜ୍ୟର ସାଂସଦ ପ୍ରାର୍ଥୀଙ୍କ କ୍ଷେତ୍ରରେ ୩୮ ପ୍ରତିଶତ ବୃଦ୍ଧି ପରେ ସେମାନେ ୭୫ ଲକ୍ଷ ଟଙ୍କା ଖର୍ଚ୍ଚ କରିପାରିବେ ।
ବିଧାନସଭା କ୍ଷେତ୍ରରେ ବଡ଼ ରାଜ୍ୟର ବିଧାୟକ ପ୍ରାର୍ଥୀମାନେ ୪୦ ଲକ୍ଷ ଖର୍ଚ୍ଚ କରିପାରିବେ । ସେହିପରି ଛୋଟ ରାଜ୍ୟର ପ୍ରାର୍ଥୀ ୨୮ ଲକ୍ଷ ଖର୍ଚ୍ଚ କରିପାରିବେ । ଟଙ୍କା ବୃଦ୍ଧି ଫଳରେ ପ୍ରର୍ଥୀମାନେ ଏଥର ଡିଜିଟାଲ ମାଧ୍ୟମରେ ବୈଠକ କରିପାରିବେ । କରୋନାକୁ ଦୃଷ୍ଟିରେ ରଖି ସାନିଟାଇଜର ଓ ମାସ୍କ କ୍ଷେତ୍ରରେ ମଧ୍ୟ ଖର୍ଚ୍ଚ କରିବେ । ଏହି ଖର୍ଚ୍ଚ ସୀମା ବୃଦ୍ଧି ଆଗକୁ ହେବାକୁ ଥିବା ଉତ୍ତପ୍ରଦେଶ, ଉତ୍ତରାଖଣ୍ଡ, ପଞ୍ଜାବ, ଗୋଆ ଓ ମଣିପୁର ନିର୍ବାଚନରେ ଲାଗୁ ହେବ ।
ନିଟ୍ ପିଜି କାଉନସିଲିଂ ମାମଲାରେ ସୁପ୍ରିମକୋର୍ଟଙ୍କ ରାୟ, କାଏମ ରହିବ ଓବିସି ଓ EWS ସଂରକ୍ଷଣ
ନୂଆଦିଲ୍ଲୀ: ନିଟ୍ ପିଜି କାଉନସେଲିଂ ମାମଲାରେ ସୁପ୍ରିମ ରାୟ । ସୁପ୍ରିମକୋର୍ଟ କାଉନସିଲିଂ ଆରମ୍ଭ କରିବାକୁ କହିଛନ୍ତି । ପୂର୍ବ ଭଳି ଚଳିତବର୍ଷ ଓବିସି ଓ ଆର୍ଥିକ ଦୂର୍ବଳ ଶ୍ରେଣୀ ଛାତ୍ରଙ୍କ ସଂରକ୍ଷଣ ଲାଗୁ ରହିବ ବୋଲି ସର୍ବୋଚ୍ଚ କୋର୍ଟ ରାୟ ଶୁଣାଇଛନ୍ତି । ନିଟ୍ ପିଜି କାଉନସିଲିଂ ଆରମ୍ଭ କରିବାକୁ କେନ୍ଦ୍ର ସରକାର ସୁପ୍ରିମକୋର୍ଟରେ ଆବେଦନ କରିଥିଲେ । ତେବେ ସୁପ୍ରିମକୋର୍ଟ ଶୁକ୍ରବାର ଶୁଣାଣି କରି ନିଟ୍ ପିଜି କାଉନସିଲିଂ ଆରମ୍ଭ କରିବାକୁ କହିଛନ୍ତି ।
Supreme Court allows 27% reservation for Other Backward Class (OBC) and 10% for Economically Weaker Section (EWS) category in the All-India Quota (AIQ) seats for admission in the NEET for all medical seats as existing criteria this year.
— ANI (@ANI) January 7, 2022
ସୁପ୍ରିମ କୋର୍ଟଙ୍କ ଏହି ରାୟ ପରେ ଏହା ସ୍ପଷ୍ଟ ହୋଇଛି କି ୨୦୨୧/୨୨ ଶିକ୍ଷାବର୍ଷ ପାଇଁ ଡାକ୍ତରୀ ଛାତ୍ରଙ୍କୁ ମିଳିବ ସଂରକ୍ଷଣ । ଓବିସି ଛାତ୍ରଙ୍କୁ ୨୭ ପ୍ରତିଶତ ଓ EWS ବା ଆର୍ଥିକ ଦୁର୍ବଳ ଶ୍ରେଣୀ ଛାତ୍ରଙ୍କୁ ୧୦ପ୍ରତିଶତ ସଂରକ୍ଷଣ ମିଳିବ ବୋଲି ରାୟ ଶୁଣାଇଛନ୍ତି ସର୍ବୋଚ୍ଚ କୋର୍ଟ । ସର୍ବ ଭାରତୀୟ କୋଟାରୁ ଓବିସି ଓ EWS ଛାତ୍ର ସଂରକ୍ଷଣ ପାଇବେ ବୋଲି ସର୍ବୋଚ୍ଚ ନ୍ୟାୟାଳୟ ରାୟ ଶୁଣାଇଛନ୍ତି । ପିଜି କାଉନସିଲିଂ ଶୀଘ୍ର ଆରମ୍ଭ କରିବାକୁ କୋର୍ଟ କହିଛି ।
ନିଟ୍ ପିଜି କାଉନସେଲିଂରେ ବିଳମ୍ବ ଯୋଗୁଁ ହଜାର ହଜାର ଡାକ୍ତର ଆନ୍ଦୋଳନ କରିଥିଲେ । ଫେଡେରେସନ୍ ଅଫ୍ ଅଲ ଇଣ୍ଡିଆ ମେଡିକାଲ ଆସୋସିଏସନ୍ ପକ୍ଷରୁ ଦେଶବ୍ୟାପୀ ହରତାଳ ଡାକରା ମଧ୍ୟ ଦିଆଯାଇଥିଲା । ମାତ୍ର ହସ୍ପିଟାଲରେ ରୋଗୀ ସେବା ବାଧାପ୍ରାପ୍ତ ହେବା ଯୋଗୁଁ ଆନ୍ଦୋଳନ ସ୍ଥଗିତ ରଖିଥିଲେ ଡାକ୍ତରୀ ଛାତ୍ର । ତେବେ ଆଜି ସୁପ୍ରିମକୋର୍ଟଙ୍କ ରାୟ ପରେ ଆନ୍ଦୋଳନକାରୀ ଡାକ୍ତରଙ୍କୁ ଆଶ୍ବସ୍ତି ମିଳିଛି ।
ବିଜେପି ଗୁଣ୍ଡାରାଜ ବିରୋଧରେ ପୋଲିସ ଆକ୍ସନ, ୮ ଗିରଫ
ଭଦ୍ରକ: ଭଦ୍ରକ ଜିଲ୍ଲାପାଳଙ୍କ ଅଫିସରେ ବିଜେପି କର୍ମୀଙ୍କ ଗୁଣ୍ଡାଗର୍ଦ୍ଦି ଘଟଣା ପଡ଼ିଲା ମହଙ୍ଗା । ୮ ଜଣଙ୍କୁ ଗିରଫ କଲା ପୋଲିସ ।
ଗତକାଲି ବିଜେପି କର୍ମୀମାନେ ଜିଲ୍ଲାପାଳଙ୍କ ଅଫିସକୁ ଧସେଇ ପଶିବା ସହ ଭଙ୍ଗା ରୁଜା କରିଥିଲେ । ଭିଡିଓ ଫୁଟେଜ ଆଧାରରେ ଘଟଣାର ତଦନ୍ତ କରାଯାଉଥିବା ବେଳେ ୮ ଜଣ ଗିରଫ ହୋଇଛନ୍ତି । ଘଟଣାରେ ସମ୍ପୃକ୍ତ ଅନ୍ୟମାନଙ୍କ ବିରୋଧରେ ଶୀଘ୍ର କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଅତିରିକ୍ତ ଆରକ୍ଷୀ ଅଧୀକ୍ଷକ ।
ପଞ୍ଚାୟତ ନିବାଚନରେ ଓବିସି ସ୍ଥାନ ସଂରକ୍ଷଣ ପ୍ରସଙ୍ଗରେ ବିଜେପି କର୍ମୀମାନେ ଏହି କାଣ୍ଡ ଭିଆଇଥିଲେ । ବରିଷ୍ଠ ନେତାଙ୍କ ଉପସ୍ଥିତିରେ କର୍ମୀମାନେ ଭଙ୍ଗାରୁଜା କରିଥିଲେ ବି କେହି ଅଟକାଇ ନଥିଲେ । ବିଜେପିର ଏମିତି ଗୁଣ୍ଡାରାଜକୁ ସବୁ ମହଲରୁ ନିନ୍ଦା କରାଯାଉଛି । କ୍ଷମତା ଲୋଭରେ ବିଜେପି ନେତାମାନେ ଯେକୌଣସି ସ୍ତରକୁ ଖସି ଯିବାକୁ ପଛାଉ ନାହାନ୍ତି । ସେମାନଙ୍କ ଉପସ୍ଥିତିରେ ଦଳୀୟ କର୍ମୀ ଆଇନକୁ ହାତକୁ ନେଇ ସରକାରୀ ସମ୍ପତ୍ତି ନଷ୍ଟ କରୁଥିଲେ ବି ଏମାନେ କେବଳ ନିରବଦର୍ଶା ସାଜୁଛନ୍ତି ।
ସାଉଥ ସୁପରଷ୍ଟାର ମହେଶ ବାବୁଙ୍କୁ କରୋନା, ଟ୍ୱିଟ କରି ଦେଲେ ଏହି ସୂଚନା
ହାଇଦ୍ରାବାଦ: ସାରା ଦେଶରେ କରୋନା ସଂକ୍ରମଣ ପୁଣି ଥରେ ବୃଦ୍ଧି ପାଇବାରେ ଲାଗିଛି । ନୂଆବର୍ଷପରଠାରୁ କରୋନା ସଂକ୍ରମଣ ବୃଦ୍ଧି ପାଇଛି । ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁସାରେ ଗତ ୨୪ ଘଣ୍ଟାରେ ଦେଶରେ ଏକ ଲକ୍ଷରୁ ଅଧିକ ଆକ୍ରାନ୍ତ ଚିହ୍ନଟ ହୋଇଛନ୍ତି । ବିଗତ କିଛି ଦିନ ମଧ୍ୟରେ ଦେଶରେ ଅନେକ ସେଲିବ୍ରେଟି କରୋନରେ ଆକ୍ରାନ୍ତ ହୋଇଛନ୍ତି । ଏହି ଲିଷ୍ଟରେ ଏବେ ଯୋଡି ହୋଇଛନ୍ତି ସାଉଥ ସୁପରଷ୍ଟାର ମହେଶ ବାବୁ । ମହେଶ ବାବୁ କରୋନାରେ ସଂକ୍ରମଣ ହେବା ନେଇ ଟ୍ୱିଟ କରି ସୂଚନା ଦେଇଛନ୍ତି ।
— Mahesh Babu (@urstrulyMahesh) January 6, 2022
ଗୁରୁବାର ମହେଶ ବାବୁ ଟ୍ୱିଟ କରି କହିଛନ୍ତି କି ’ମୁଁ ମୋର ସମସ୍ତ ଫ୍ୟାନ ଓ ଶୁଭଚିନ୍ତକଙ୍କୁ କହିବାକୁ ଚାହୁଁଛି କି ସମସ୍ତ ସତର୍କତା ଅବଲମ୍ବନ କରିବା ସତ୍ତ୍ୱେ ମୁଁ କରୋନା ସଂକ୍ରମିତ ହୋଇଛି । ମୋ ମଧ୍ୟରେ ସ୍ୱଳ୍ପ ଲକ୍ଷଣ ଦେଖା ଦେଇଛି । ମୁଁ ଏବେ ଘରେ ଆଇସୋଲେସନରେ ରହିଛି ଏବଂ ସମସ୍ତ ମେଡିକାଲ ଗାଇଡ ଲାଇନ୍ସ ପାଳନ କରୁଛି ବୋଲି କହିଛନ୍ତି ମହେଶ ବାବୁ । ଏହା ବ୍ୟତୀତ ମହେଶ ବାବୁ ତାଙ୍କ ସମସ୍ତ ଫ୍ୟାନଙ୍କୁ ସତର୍କ ରହିବାକୁ ନିବେଦନ କରିଛନ୍ତି । ସେ ଏହି ଟ୍ୱିଟରେ ଆହୁରି କହିଛନ୍ତି କି ମୋ ସମ୍ପର୍କରେ ଆସିଥିବା ସମସ୍ତ ଲୋକ ତୁରନ୍ତ କୋଭିଡ-୧୯ ଟେଷ୍ଟ କରିନିଅନ୍ତୁ ଏବଂ ଯେଉଁମାନେ କରୋନା ଭ୍ୟାକସିନ ନେଇ ନାହାନ୍ତି ସେମାନେ ତୁରନ୍ତ ଭ୍ୟାକସିନର ଉଭୟ ଡୋଜ ନିଅନ୍ତୁ ବୋଲି ମହେଶ ବାବୁ କହିଛନ୍ତି ।