spot_img
Home Blog Page 3124

କେମିତି ଥିଲା ପ୍ରାଚୀନ ଜନଜାତିଙ୍କ ଭାଷା, ଓଡ଼ିଶାରେ ଜାତୀୟ ଜାନଜାତି ଲେଖକ ସମ୍ମିଳନୀ

ଭୁବନେଶ୍ୱର: ଜନଜାତିଙ୍କ ଜୀବନ ଜୀବୀକା । ଜନଜାତିଙ୍କ ଚାଲିଚଳଣି । କେମିତି ଥିଲା ପ୍ରାଚୀନ ଜନଜାତିଙ୍କ ଭାଷା ? ସାହିତ୍ୟ, ସଂସ୍କୃତି ଓ ପରମ୍ପରା କେମିତି ଥିଲା ? କେଉଁ ଆଦିବାସୀ କେଉଁ ଭାଷାରେ କଥା ହେଉଥିଲେ ? ସେ ସବୁ ଭାଷାଲିପି ମହଜୁଦ୍ ଅଛି ତ ? ଯଦି ନାହିଁ ତେବେ ଆଗାମୀ ପିଢି କିଭଳି ନିଜର ଭାଷା ଜାଣିପାରିବେ ? ଏସବୁ ସମସ୍ୟାର ସମାଧାନ କରିବା ପାଇଁ କେନ୍ଦ୍ର ସାହିତ୍ୟ ଏକାଡେମୀ ଏବଂ ସୋଆ ପ୍ରାଚୀନ ପକ୍ଷରୁ ଆରମ୍ଭ ହୋଇଛି ଦୁଇ ଦିନିଆ କର୍ମଶାଳା । ଏହି କର୍ମଶାଳାରେ ୪୯ଟି ଜନଜାତି ଭାଷା ପାଇଁ କାର୍ଯ୍ୟକରୁଥିବା ୭୦ ଜଣ ବିଶିଷ୍ଟ ଲେଖକ ଯୋଗ ଦେଇଛନ୍ତି । ସମସ୍ତ ପ୍ରତିନିଧି ନିଜ ନିଜ ଜନଜାତିର ସାହିତ୍ୟ, ସଂସ୍କୃତି ଏବଂ ପରମ୍ପରା ଉପରେ ବକ୍ତବ୍ୟ ରଖିବେ । ଆଧୁନିକତାରେ ଦିନକୁ ଦିନ ହଜିଯାଉଥିବା ପ୍ରଚୀନ ଜନଜାତିଙ୍କ ଭାଷାକୁ ଉଜ୍ଜୀବିତ କରିବା ସହ ସଂରକ୍ଷଣ କରି ରଖିବା ଉଦ୍ଦେଶ୍ୟରେ କେନ୍ଦ୍ର ସାହିତ୍ୟ ଏକାଡେମୀ ଏବଂ ସୋଆ ପ୍ରାଚୀନର ମୁଖ୍ୟ ଉଦ୍ଦେଶ୍ୟ ବୋଲି କହିଛନ୍ତି ସୋଆ ପ୍ରାଚୀନ ମୁଖ୍ୟ ଡକ୍ଟର ଗାୟତ୍ରୀବାଳା ପଣ୍ଡା । ଯାହା ଆଗାମୀ ପିଢିଙ୍କୁ ଜାଣିବା ପାଇଁ ଉତ୍ସାହିତ କରିବ ।

ଓଡ଼ିଶାରେ ୬୨ଟି ଆଦିମ ଜନଜାତିଙ୍କ ବସତି ରହିଛି । କୋରାପୁଟ ଜିଲ୍ଲାରେ ସର୍ବାଧିକ ଜନଜାତି ରହିଛନ୍ତି । ସମସ୍ତଙ୍କର ଭାଷା, ସାହିତ୍ୟ ଏବଂ ସଂସ୍କୃତି ଭିନ୍ନଭିନ୍ନ । ତେଣୁ ଓଡ଼ିଶାରେ ସ୍ବତନ୍ତ୍ର ଭାବରେ ସେଣ୍ଟର ଫର ଓରାଲ ଆଣ୍ଡ ଟ୍ରାଇବାଲ୍ ଅଫିସ ଖୋଲିଛି । ଏହା ଖୁବ୍ ଶୀଘ୍ର କାର୍ଯ୍ୟକ୍ଷମ ହେବ ବୋଲି କହିଛନ୍ତି କେନ୍ଦ୍ର ସାହିତ୍ୟ ଏକାଡେମୀ ସଚିବ କେ ଶ୍ରୀନିବାସ ରାଓ । ଏହି କାର୍ଯ୍ୟାଳୟ ଓଡ଼ିଶା ସମେତ ପଶ୍ଚିମବଙ୍ଗ, ଛତିଶଗଡ, ଝାଡଖଣ୍ଡ ଭଳି ପଡୋଶୀ ରାଜ୍ୟରେ ଥିବା ଜନଜାତିଙ୍କ ପାଇଁ କାମ କରିବ । ତେବେ ଏଭଳି କର୍ମଶାଳା ଜନଜାତି ଲେଖକମାନଙ୍କୁ ବେଶ ଉତ୍ସାହିତ କରୁଛି ବୋଲି କହିଛନ୍ତି ଅରୁଣାଚଳ ଗୋଲୋ ଜନଜାତିଙ୍କ ପାଇଁ କାମ କରୁଥିବା ଲେଖିକା ଡକ୍ଟର ଜମିୟ ଜିନି । ଏବେ ବି ଗୋଲୋ ଜନଜାତି ରୋମାନ ଓ ହିନ୍ଦୀ ଭାଷାରେ ଲେଖୁଛନ୍ତି । ସେମାନଙ୍କର ସ୍କ୍ରିପ୍ଟ ନାହିଁ ବୋଲି କ୍ଷୋଭ ପ୍ରକାଶ କରିଛନ୍ତି ଜିନି । ତେଣୁ ଗୋଲୋରେ ଲେଖିବା ସମ୍ଭବ ହେଉନାହିଁ । ସରକାରଙ୍କ ଫୋକସ ହେଲେ ପୁଣି ଫେରିବ ଭାଷା ଲିପି । ପୂର୍ବ ପୁରୁଷ ଯେଉଁ ଭାଷା କହୁଥିଲେ ସେଗୁଡିକର ପୁନରୁଦ୍ଧାର ପାଇଁ ଚେଷ୍ଟା କରାଯାଉଛି ବୋଲି କହିଛନ୍ତି ଜିନି ।

ଏହି କର୍ମଶାଳାରେ ଗୌରାଙ୍ଗ ଚରଣ ଦାଶଙ୍କ ଦ୍ବାରା ଗଦ୍ୟରୂପାନ୍ତର ହୋଇଥିବା ସାରୋଳଦାସ ମହାଭାରତ ଆଦିପର୍ବ ପୁସ୍ତକକୁ ଲୋକାର୍ପଣ କରାଯାଇଥିଲା । ଅନ୍ୟମାନଙ୍କ ମଧ୍ୟରେ ପ୍ରଫେସର (ଡ.) ଜଗନ୍ନାଥ ଦାଶ, ବିଶିଷ୍ଟ ଲେଖକ ତଥା ସାହିତ୍ୟ ଏକାଡେମୀର ଓଡ଼ିଆ ଆଡଭାଇଜରୀ ବୋର୍ଡ ଆବାହକ ଡକ୍ଟର ଗୌରହରି ଦାସ, ସାହିତ୍ୟ ଏକାଡେମୀ ସାନ୍ତାଳୀ ଆଡଭାଇଜରୀ ବୋର୍ଡ ଆବାହକ ଚୈତନ୍ୟ ପ୍ରସାଦ ମାଝି, ସୋଆର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ପ୍ରମୁଖ ଯୋଗ ଦେଇଥିଲେ। ଉଦଘାଟନୀ ଉତ୍ସବରେ ସୋଆର ଅଧ୍ୟକ୍ଷ ପ୍ରଫେସର ମନୋଜ ରଂଜନ ନାଏକ, ଡ. ହରେକୃଷ୍ଣ ଶତପଥୀ, ଭାଷାବିତ ଦେବୀପ୍ରସନ୍ନ ପଟ୍ଟନାୟକ ପ୍ରମୁଖ ଯୋଗ ଦେଇଥିଲେ । ସୋଆ ବିଶ୍ବବିଦ୍ୟାଳୟର ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ କାର୍ଯ୍ୟକ୍ରମ ସଂଯୋଜନା କରିବା ସହ ଧନ୍ୟବାଦ ଅର୍ପଣ କରିଥିଲେ । ଦୁଇ ଦିନରେ ଲେଖକମାନଙ୍କ ଦ୍ବାରା ପ୍ୟାନେଲ ବିତର୍କ କାର୍ଯ୍ୟକ୍ରମ ମଧ୍ୟ ରହିଛି ।

ଜନଜାତିଙ୍କ ଜୀବିକାରେ ଆସିବ ସ୍ଥାୟିତ୍ବ, ଜଙ୍ଗଲ ଜମି ଉପରେ ଯୋଗ୍ୟ ବ୍ୟକ୍ତିଗତ ଓ ଗୋଷ୍ଠୀଗତ ଅଧିକାର ହେବ ସୁନିଶ୍ଟିତ

ଭୁବନେଶ୍ୱର: ଏଣିକି ଜଙ୍ଗଲ ଜମି ଉପରେ ସମସ୍ତ ଯୋଗ୍ୟ ବ୍ୟକ୍ତିଗତ ଓ ଗୋଷ୍ଠୀଗତ ଅଧିକାର ସୁନିଶ୍ଟିତ ହେବ । ଜନଜାତିମାନଙ୍କ ଜୀବିକାରେ ଆସିବ ସ୍ଥାୟିତ୍ବ । ଜନଜାତିଙ୍କ ବିକାଶରେ ସୃଷ୍ଟି ହେବ ନୂଆ ମାଇଲଷ୍ଟୋନ । ବିଶ୍ଵ ଦେଶଜ ଅଧିବାସୀ ଦିବସ ଅବସରରେ ମୋ ଜଙ୍ଗଲ ଜମି ଯୋଜନାର ଶୁଭାରମ୍ଭ କରି ଏହି ଆଶା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଜଙ୍ଗଲ ଜମି ଉପରେ ସମସ୍ତ ଯୋଗ୍ୟ ବ୍ୟକ୍ତିଗତ ଓ ଗୋଷ୍ଠୀଗତ ଅଧିକାରକୁ ସୁନିଶ୍ଟିତ କରିବା ଏହି ଯୋଜନାର ଲକ୍ଷ୍ୟ । ଏହାସହିତ ସମସ୍ତ ଉନ୍ନୟନମୂଳକ କାର୍ଯ୍ୟକ୍ରମଗୁଡିକୁ ଏହି ଯୋଜନା ସହିତ ଯୋଡି ଜନଜାତି ମାନଙ୍କ ଜୀବିକାରେ ସ୍ଥାୟିତ୍ବ ସୃଷ୍ଟି କରିବା ପାଇଁ ପଦକ୍ଷେପ ଗ୍ରହଣ କରାଯିବ । ସର୍ଭେ ହୋଇ ନ ଥିବା ଜଙ୍ଗଲ ଗାଁ ଗୁଡିକୁ ରାଜସ୍ବ ଗ୍ରାମର ମାନ୍ୟତା ପ୍ରଦାନ କରାଯିବ । ଏହି ଯୋଜନାରେ ସମସ୍ତ ଯୋଗ୍ୟ ହିତାଧିକାରୀମାନଙ୍କ ପାଖରେ ପହଞ୍ଚିବା ସରକାରଙ୍କ ଲକ୍ଷ୍ୟ ବୋଲି କହିଛନ୍ତି ମୁଖ୍ୟମନ୍ତ୍ରୀ । କେହି ଜଣେ ବି ଯୋଗ୍ୟ ବ୍ୟକ୍ତି ଯେପରି ବଞ୍ଚିତ ନ ହେବ, ତାକୁ ସୁନିଶ୍ଟିତ କରିବା ପାଇଁ ପଦକ୍ଷେପ ନିଆଯାଉଛି ବୋଲି ସେ କହିଛନ୍ତି । ଜଙ୍ଗଲ ସଂପଦର ନିରନ୍ତର ବିକାଶ ଦିଗରେ ଜନଜାତିମାନଙ୍କର ଅବଦାନକୁ ସ୍ବୀକୃତି ପ୍ରଦାନ କରିବା ଏହି ଯୋଜନାର ଲକ୍ଷ୍ୟ ।

ଜଳବାୟୁ ପରିବର୍ତ୍ତନ ଓ ଜନଜାତିମାନଙ୍କ ଅର୍ଥନୀତି ଓ ଜୀବିକାରେ ସ୍ଥାୟିତ୍ବ ଆଣିବାରେ ମଧ୍ୟ ଏହା ସହାୟକ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଜଙ୍ଗଲ ଜମି ଅଧିକାର ପ୍ରଦାନରେ ଓଡିଶା ଏକ ଆଗୁଆ ରାଜ୍ୟ । ଏପର୍ଯ୍ୟନ୍ତ ୪ ଲକ୍ଷ ୫୦ ହଜାର ଜନଜାତି ଓ ବନବାସୀ ପରିବାରକୁ ଜଙ୍ଗଲ ଜମି ଉପରେ ସତ୍ତ୍ବ ପ୍ରଦାନ କରାଯାଇଛି । ସେହିପରି ୪ ହଜାରରୁ ଅଧିକ ଗ୍ରାମସଭାକୁ ଗୋଷ୍ଠୀ ଅଧିକାର ଦିଆଯାଇଛି  । ଏହାସହିତ ସର୍ଭେ ହୋଇ ନଥିବା ଜଙ୍ଗଲ ଗାଁ ଗୁଡିକୁ ମଧ୍ୟ ରାଜସ୍ବ ଗ୍ରାମର ମାନ୍ୟତା ଦେବା ପାଇଁ ପ୍ରକ୍ରିୟା ଜାରି ରହିଛି । ୨୦୦୦ ମସିହାରେ ସରକାରର ପ୍ରଥମ ଗୁରୁତ୍ବପୂର୍ଣ୍ଣ ନିଷ୍ପତ୍ତି ଥିଲା ପଞ୍ଚାୟତମାନଙ୍କୁ ଲଘୁ ବନଜାତ ଦ୍ରବ୍ୟର ସଂଗ୍ରହ ଅଧିକାର ପ୍ରଦାନ ।

ଆଜି ଏ ଦିଗରେ ଅନେକ କାମ ହୋଇଛି । ଜନଜାତିମାନଙ୍କ ଶିକ୍ଷା, ସ୍ବାସ୍ଥ୍ୟ ଏବଂ ବିଭିନ୍ନ କ୍ଷେତ୍ରରେ ଉନ୍ନତି ହେବା ସହିତ ସେମାନେ ବିଭିନ୍ନ କ୍ଷେତ୍ରରେ ପ୍ରତିଷ୍ଠା ମଧ୍ୟ ଅର୍ଜନ କରିପାରିଛନ୍ତି । ଏହି ଅବସରରେ ମୟୂରଭଞ୍ଜର କପୁର ମାର୍ଣ୍ଡି, କନ୍ଧମାଳର ନରେନ୍ଦ୍ର ମଲ୍ଲିକ ଓ ରାୟଗଡାର ସୁରେଶ ଚନ୍ଦ୍ର ୱାଡାକା ପ୍ରମୁଖ ୩ ଜଣ ହିତାଧିକାରୀ ଭିଡିଓ କନ୍ଫରେନ୍ସିଂ ଜରିଆରେ ଯୋଡି ହୋଇ ମୁଖ୍ୟମନ୍ତ୍ରୀଙ୍କୁ ସେମାନଙ୍କ ଅଭିଜ୍ଞତା ବର୍ଣ୍ଣନା କରିଥିଲେ ।

ଅତି ଆପଦଗ୍ରସ୍ତ ଆଦିବାସୀ ଗୋଷ୍ଠୀଙ୍କ ପାଇଁ ପ୍ରଶ୍ନ, ସାମଗ୍ରିକ ବିକାଶ ଲାଗି କ’ଣ ପଦକ୍ଷେପ ନେଇଛି କେନ୍ଦ୍ର ?

ନୂଆଦିଲ୍ଲୀ: ଅତି ଆପଦଗ୍ରସ୍ତ ଆଦିବାସୀ ଗୋଷ୍ଠୀ ବା ପିଭିଟିଜିଙ୍କ ସାମଗ୍ରିକ ବିକାଶ ଲାଗି କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରାଳୟ ବିଭିନ୍ନ ପଦକ୍ଷେପ ନେଇଛି । ସେମାନଙ୍କ ମଧ୍ୟରେ ରହିଛନ୍ତି ଓଡ଼ିଶାର ବିଭିନ୍ନ ଆଦିବାସୀ ଗୋଷ୍ଠୀ । ମନ୍ତ୍ରାଳୟ ପକ୍ଷରୁ ପିଭିଟିଜିଙ୍କ ବିକାଶ ଲାଗି ବିଶେଷ ପଦକ୍ଷେପ ନିଆଯାଉଛି ବୋଲି କହିଛନ୍ତି କେନ୍ଦ୍ର ଆଦିବାସୀ ବ୍ୟାପାର ରାଷ୍ଟ୍ରମନ୍ତ୍ରୀ ବିଶ୍ୱେଶ୍ବର ଟୁଡୁ । ଅତି ଆପଦଗ୍ରସ୍ତ ଆଦିବାସୀ ଗୋଷ୍ଠୀଙ୍କୁ ସହାୟତା ଲାଗି କୌଣସି ନୀତି ରହିଛି କି ? ଏଥିଲାଗି ପାଣ୍ଠିର ସବିଶେଷ ବିବରଣୀ ସମ୍ପର୍କରେ ଉଲ୍ଲେଖ କରିବା ସଂକ୍ରାନ୍ତ ସାଂସଦ ମାନସ ରଞ୍ଜନ ମଙ୍ଗରାଜ, ପ୍ରଶାନ୍ତ ନନ୍ଦ ଓ ସୁଲତା ଦେଓଙ୍କ କେତେକ ପ୍ରଶ୍ନର ଉତ୍ତରରେ ମନ୍ତ୍ରୀ ଟୁଡୁ କହିଛନ୍ତି- ପିଭିଟିଜିଙ୍କ ସାମଗ୍ରିକ ସାମାଜିକ ଅର୍ଥନୈତିକ ବିକାଶ ଓ କଲ୍ୟାଣ ନିମନ୍ତେ ଧ୍ୟାନ ଦିଆଯାଉଛି ଏବଂ ଓଡ଼ିଶା ସମେତ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ସରକାରଙ୍କୁ ପାଣ୍ଠି ଯୋଗାଇ ଦିଆଯାଉଛି । ଶିକ୍ଷା, ଗୃହ ନିର୍ମାଣ, ଜମି ବିକାଶ, କୃଷି ବିକାଶ, ପ୍ରାଣୀ ସମ୍ପଦ, ଲିଙ୍କ୍ ରୋଡ୍ ନିର୍ମାଣ, ଆଲୋକ ଲାଗି ଅଣପାରମ୍ପରିକ ଶକ୍ତି ଉତ୍ସ ପ୍ରତିଷ୍ଠା, ସଂସ୍କୃତି ଓ ପାରମ୍ପରିକତାର ସଂରକ୍ଷଣ ସଂକ୍ରାନ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ସରକାରଙ୍କ ପ୍ରସ୍ତାବ ଅନୁସାରେ ଚିହ୍ନଟ ହୋଇଥିବା ୭୫ଟି ପିଭିଟିଜି ଗୋଷ୍ଠୀଙ୍କୁ ସହାୟତା ଯୋଗାଇ ଦିଆଯାଉଛି ।

ଏହା ସହ ଷଷ୍ଠରୁ ଦ୍ୱାଦଶ ଶ୍ରେଣୀର ଏସଟି ଛାତ୍ରଛାତ୍ରୀଙ୍କ ଲାଗି ଏକଲବ୍ୟ ମଡେଲ ଆବାସିକ ବିଦ୍ୟାଳୟ ଯୋଜନା ବା ଇଏମଆରଏସ କାର୍ଯ୍ୟକାରୀ ହୋଇଛି । ପିଭିଟିଜି ଛାତ୍ରଛାତ୍ରୀଙ୍କ ଲାଗି ଇଏମଆରଏସରେ ୫ ପ୍ରତିଶତ ସ୍ଥାନ ସଂରକ୍ଷିତ ରହିଛି । ସେହିପରି ନ୍ୟାସନାଲ ଫେଲୋସିପରେ ପିଭିଟିଜି ଛାତ୍ରଛାତ୍ରୀଙ୍କ ଲାଗି ୭୫୦ ସ୍ଲଟରୁ ୨୫ଟି ସ୍ଲଟ ସଂରକ୍ଷିତ ରହିଛି । ପିଭିଟିଜି ବର୍ଗଙ୍କ ସାମାଜିକ ଅର୍ଥନୈତିକ ଅବସ୍ଥାର ଉନ୍ନତି ଲାଗି ୨୦୨୩-୨୪ ବଜେଟରେ ପ୍ରଧାନମନ୍ତ୍ରୀ ପିଭିଟିଜି ବିକାଶ ମିଶନ ଘୋଷିତ ହୋଇଛି । ଏଥିରେ ସେମାନଙ୍କ ଗୃହ, ସ୍ବଚ୍ଛ ପାନୀୟ ଜଳ, ପରିମଳ, ଶିକ୍ଷା, ସ୍ବାସ୍ଥ୍ୟ, ପୁଷ୍ଟିକର ଖାଦ୍ୟ, ସଡକ, ଟେଲିକମ୍ ଯୋଗାଯୋଗ, ସହନଶୀଳ ଜୀବନ ବିକାଶ ସମ୍ଭବ ହେବ ।

ରାହୁଲଙ୍କ ଭାଷଣ ପରେ ଜବାବ ଦେଲେ ଅମିତ ଶାହ, ପରିବାରବାଦ ଓ ତୁଷ୍ଟିକରଣର ରାଜନୀତି କରେ କଂଗ୍ରେସ

ନୂଆଦିଲ୍ଲୀ: ମଣିପୁର ହିଂସା ଆଜିର ନୁହେଁ, ଏହା ପଛରେ ଷଡ଼ଯନ୍ତ୍ରକୁ ବୁଝିବାର ଆବଶ୍ୟକତା ରହିଛି । ଗତ ୫ ବର୍ଷ ଭିତରେ ମଣିପୁରରେ ହିଂସା ଅନେକ ମାତ୍ରାରେ ନିୟନ୍ତ୍ରଣରେ ଥିଲା । କିନ୍ତୁ ଗୋଟିଏ ସାମାନ୍ୟ ଘଟଣାକୁ ନେଇ ଦୁଇ ସମ୍ପ୍ରଦାୟ ମଧ୍ୟରେ ବିବାଦ ଉଗ୍ର ରୂପ ନେଇଥିଲା । କିନ୍ତୁ ବିରୋଧୀ ଏହାକୁ ନେଇ ରାଜନୀତି କରିବାକୁ ପଛାଇ ନାହାନ୍ତି । ସଂସଦରେ ରାହୁଲ ଗାନ୍ଧୀଙ୍କ ବିତର୍କ ପରେ ଏପରି ବିବୃତି ରଖିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ଯାହାକୁ ସଂସଦରେ ବିରୋଧୀ ହୋହଲ୍ଲା କରିବା ସହ କେନ୍ଦ୍ର ସରକାର ନିଜ ଦୋଷକୁ ବିରୋଧୀଙ୍କ ଉପରେ ଲଦିବାକୁ ଚେଷ୍ଟା କରୁଛନ୍ତି । ମଣିପୁରରେ ହିଂସା ହେବା ପରଠାରୁ ସମାଧାନ ପାଇଁ ଅନେକ ପ୍ରୟାସ କରାଯାଇଛି । ସ୍ବାଧୀନତା ପରଠାରୁ ମଣିପୁରରେ ହିଂସା ହୋଇଥିବା ବେଳେ କେବେ ବି ପ୍ରଧାନମନ୍ତ୍ରୀ ଗୃହରେ ବୟାନ ଦେଇନାହାନ୍ତି । କିନ୍ତୁ ଏବେ ପ୍ରଧାନମନ୍ତ୍ରୀଙ୍କ ବୟାନ ଦାବି କରି ଗୃହ ଠପ୍‌ କରିବାକୁ ଚେଷ୍ଟା କରିଛନ୍ତି ବିରୋଧୀ ।

ଦେଶର ଉତ୍ତରପୂର୍ବ ଅଞ୍ଚଳକୁ କେନ୍ଦ୍ର ସରକାର ସବୁବେଳେ ଫୋକସରେ ରଖିଛନ୍ତି ବୋଲି ଅମିତ ଶାହ କହିଛନ୍ତି । ମଣିପୁର ଭିଡିଓ ଭାଇରାଲ ପଛରେ ଷଡ଼ଯନ୍ତ୍ର ହୋଇଛି ବୋଲି ଅମିତ ଶାହ କହିଛନ୍ତି । ମୁଖ୍ୟମନ୍ତ୍ରୀ ଏନ୍ ବିରେନ ସିଂଙ୍କୁ କାହିଁକି ହଟାଗଲା ନାହିଁ ବୋଲି ପ୍ରଶ୍ନରେ ଅମିତ ଶାହ କହିଛନ୍ତି ଯେ, ରାଜ୍ୟ ସରକାର ଶାନ୍ତି ପାଇଁ ଅନେକ ପ୍ରୟାସ କରିଛନ୍ତି । ମୁଖ୍ୟମନ୍ତ୍ରୀଙ୍କୁ ସେତେବେଳେ ହଟାଯାଏ ଯେତେବେଳେ ରାଜ୍ୟ ସରକାର ବିଫଳ ହୁଅନ୍ତି । କିନ୍ତୁ ବିରେନ ସିଂ ଅନବରତ ପ୍ରୟାସ କରୁଛନ୍ତି । ଦେଶରେ ଗତ ୯ ବର୍ଷରେ ଅନେକ ବିକାଶ କରିଛନ୍ତି ସରକାର । ଜାମ୍ମୁ କାଶ୍ମୀରରେ ଆତଙ୍କୀ ଗତିବିଧିଠୁ ଆରମ୍ଭ କରି ଦେଶର ବିଭିନ୍ନ ଅଞ୍ଚଳରେ ଥିବା ନକ୍ସଲ ହିଂସାକୁ ବନ୍ଦ କରାଯାଇପାରିଛି । ଓଡ଼ିଶା ଆଜି ମାଓ ଉପଦ୍ରବ ମୁକ୍ତ ହୋଇପାରିଛି । ଦେଶର ଜନତା କେନ୍ଦ୍ର ସରକାରଙ୍କ ଉପରେ ଭରସା ରଖିଥିବା ବେଳେ ବିରୋଧୀଙ୍କ ମଧ୍ୟରେ ଏହି ଭରସା ନାହିଁ । ଏହି ଅନାସ୍ଥା ପ୍ରସ୍ତାବ ଲୋକଙ୍କ ମଧ୍ୟରେ ଭ୍ରମ ଧାରଣା ସୃଷ୍ଟି କରିବା ପାଇଁ ଅଣାଯାଇଛି । ଲୋକଙ୍କୁ ଭୁଆଁ ବୁଲାଇବା ପାଇଁ କାମ କରୁଛନ୍ତି ବିରୋଧୀ । କରୋନା ସମୟରେ ସରକାରଙ୍କ ସୁଚିନ୍ତିତ ଯୋଜନା ଯୋଗୁଁ କରୋନାକୁ ଆମେ ସଫଳ ମୁକାବିଲା କରିପାରିଲେ ବୋଲି ଅମିତ ଶାହ କହିଛନ୍ତି । ଟିକାକରଣରେ ମଧ୍ୟ ସଫଳତା ମିଳିଛି ।

ବନ୍ଧୁକ କାରବାର ରୋକିବାକୁ କମିଶନରେଟ ପୋଲିସର ବ୍ଲୁ ପ୍ରିଣ୍ଟ, ବେଆଇନ ବନ୍ଧୁକ ଧରିଲେ ଏନକାଉଣ୍ଟର ନିର୍ଦ୍ଦେଶ

ଭୁବନେଶ୍ୱର: ବେଆଇନ ବନ୍ଧୁକ ଧରିଲେ ଏନକାଉଣ୍ଟର ନିର୍ଦ୍ଦେଶ । ହତିଆର ଜବାବ୍ ଗୁଳିରେ ଦେବ ଟିମ୍ ପ୍ରତୀକ । କ୍ରାଇମ ମିଟିଂରେ କାର୍ବାଇନ କାରବାର ନେଇ ଚର୍ଚ୍ଚ । ବନ୍ଧୁକ ଚାଲାଣ ରୋକିବା ପାଇଁ ଖୁବଶୀଘ୍ର ସ୍ପେଶାଲ ଅପରେସନ । ଅତ୍ୟାଧୁନିକ ୯ MM କାର୍ବାଇନ, ଅଟୋମେଟିକ ବନ୍ଧୁକ ଓ ମାଗାଜିନ । ଖଣି ମୋରମ ଲୁଟ, ଗୋ ଚାଲାଣ, ହତ୍ୟା, ଅପହରଣ ସହ ଜଡିତ ୪ କୁଖ୍ୟାତ ଅପରାଧୀଙ୍କଠାରୁ ଏଭଳି ମାରଣାସ୍ତ୍ର ଜବତ କରିଛି ଭୁବନେଶ୍ବର ସ୍ପେଶାଲ ସ୍କ୍ବାଡ । ମାଫିଆ ପ୍ରକାଶ ରାଉତରାୟର ଘର, କ୍ରସର ୟୁନିଟ, ଫାର୍ମ ହାଉସରେ ଚଢ଼ାଉ କରି ନଗଦ ୧୯ ଲକ୍ଷ ଟଙ୍କା ଜବତ କରାଯାଇଛି । ହେଲେ ଏଠାରେ ପ୍ରଶ୍ନ ଉଠୁଛି ନିଷିଦ୍ଧ କାର୍ବାଇନ ଅପରାଧୀଙ୍କ ହାତକୁ ଆସୁଛି କେଉଁଠୁ ? ନୟାଗଡ଼ ଅସ୍ତ୍ରାଗାର ଲୁଟ ବେଳର ଏହି ବନ୍ଧୁକ ନୁହେଁ ତ ? ବନ୍ଧୁକରେ କୌଣସି ମାର୍କ ନଥିବା ବେଳେ SFSlର ରିପୋର୍ଟ ସତ ପଦାକୁ ଆଣିପାରିବ ବୋଲି କହିଛନ୍ତି ଡିସିପି ।

ବନ୍ଧୁକ ଡିଲରେ ଲଗାମ ଲଗାଇବା ପାଇଁ ୨୦୧୪ ମସିହାରେ ଆରମ୍ଭ ହୋଇଥିଲା ଅପରେସନ ବ୍ଲାକ ସ୍ମୋକ୍ । କୁଇକ ଆକ୍ସନ ଟିମ୍ ଏହାର ତଦନ୍ତ ଭାର ନେବା ସହ ସେହିବର୍ଷ ୯୩ଟି ମାଉଜର ଓ ୨୪୯ଟି ଅଫୁଟା ଗୁଳି ଜବତ କରିଥିଲା । ୨୦୧୫ରେ ୧୧୩ଟି ମାମଲା ରୁଜୁ କରାଯିବା ସହ ୬୩ଟି ମାଉଜର ସହ ୧୬୨ଟି ଅଫୁଟା ଗୁଳି ଜବତ ହୋଇଥିଲା । ୨୦୧୬ରେ ୧୨୨ଟି ମାମଲା ରୁଜୁ ହେବା ସହ ୮୯ ଟି ମାଉଜର ଓ ୨୧୨ଟି ଅଫୁଟା ଗୁଳି ଜବତ ହୋଇଥିଲା । ତେବେ ୩ ବର୍ଷରେ ୩୭୮ ଜଣଙ୍କୁ ଗିରଫ କରି ଅପରାଧୀଙ୍କ ମନରେ ଛନକା ପୁରାଇଥିବା କ୍ୟୁଏଟିର ଏହି ଅପରେସନ ନୂଆ ରୂପରେ ଆରମ୍ଭ ହେବ ବୋଲି କମିଶନରେଟ ପୋଲିସ ସୂତ୍ରରୁ ଜଣାପଡ଼ିଛି । ଗିରଫ ୪ ଅଭିଯୁକ୍ତ ସଞ୍ଜୟ ଖୁଣ୍ଟିଆ, ବଟ ପାଣି, ପ୍ରକାଶ ରାଉତରାୟ ଓ ଶିବ ନାଲିକୁ ଖୁବଶୀଘ୍ର ରିମାଣ୍ଡରେ ଆଣି ଗ୍ୟାଙ୍ଗ ୱାର ଓ ଗନ ଡିଲ ସମ୍ପର୍କରେ ଖୋଳତାଡ଼ କରିବ ଟିମ୍ ପ୍ରତୀକ ।

ସାଇବର ଠକଙ୍କ ନୂଆ ଚାଲ କୋରିୟର ସ୍କାମ, ଭୁବନେଶ୍ବରର ଜଣେ ମହିଳା ଠକେଇର ହେଲେ ଶିକାର

ଭୁବନେଶ୍ୱର: ସାଇବର ଠକଙ୍କ ନୂଆ ଚାଲ କୋରିୟର ସ୍କାମ୍ । କ୍ରାଇମବ୍ରାଞ୍ଚ ନାଁରେ ଠକ କରୁଛି କଲ୍ । ପାର୍ସଲରେ ଆସିଛି ଡ୍ରଗ୍ସ । ମାମଲା ରଫା ଦଫା ପାଇଁ ଟଙ୍କା ଦରକାର । ଠକେଇର ଶିକାର ହେଲେ ମହିଳା । ଠକ ନେଇଗଲା ୮ ଲକ୍ଷ ଟଙ୍କା । ମହିଳା ଜଣଙ୍କ ଗିରଫ ଭୟରେ ୬ଟି ପର୍ଯ୍ୟାୟରେ ୮ ଲକ୍ଷ ଟଙ୍କା ଠକକୁ ଦେଇ ଦେଇଛନ୍ତି । ଠକେଇ ଶିକାର ହେବା ଜାଣିବା ପରେ ସାଇବର ଥାନାରେ ଅଭିଯୋଗ କରିଛନ୍ତି ମହିଳା । ବର୍ତ୍ତମାନ ସୁଦ୍ଧା ସାଇବର ଥାନାରେ ୩ଟି ମାମଲା ରୁଜୁ ହୋଇଛି । ଏହାକୁ ନେଇ ଡିସିପି ଲୋକଙ୍କୁ ସଚେତନ କରିଛନ୍ତି  । ଏବେ ଠକମାନେ କୋରିୟର ନାଁରେ କଲ କରୁଛନ୍ତି । କଷ୍ଟମ କିମ୍ବା କୌଣସି ଜାଗାରେ ପାର୍ସଲ ଅଟକି ରହିଛି । ବେଆଇନ ପାର୍ସଲକୁ ପୋଲିସ ଜବତ କରିଛି । ପାର୍ସଲ ରିଲିଜ କରିବାକୁ ହେଲେ ଟଙ୍କା ପଠାଅ । ଲୋଙ୍କ ମାନେ ବି ଭୟରେ ବ୍ୟାଙ୍କ ଡିଟେଲ୍ସ ଦେଇ ଦେଉଛନ୍ତି । ଯାହା ଫଳରେ ଆକାଉଣ୍ଟ ଖାଲି ହୋଇ ଯାଉଛି । ଏଭଳି କଲ୍‌ ଆସିଲେ ଦୂରେଇ ରୁହନ୍ତୁ । ଯଦି ଠକେଇର ଶିକାର ହେଉଛନ୍ତି ତାହାହେଲେ ୧୯୩୦ ହେଲ୍ପ ଲାଇନକୁ କଲ କରି ଆକାଉଣ୍ଟ ବ୍ଳକ କରିବାକୁ ଡିସିପି ଅପିଲ କରିଛନ୍ତି ।

ଏବେ କୋରିୟର ନୁହେଁ ହୋଟେଲ ନାମରେ ଫେକ୍ ଓ୍ବେବସାଇଟ, ଟ୍ରାଭେଲ ଟୁର୍, ଇନଫରମେସନ, ଓଟିପି ସ୍କାମ୍, ନ୍ୟୁଡ୍‌ କଲ ଧରଣର ଠକେଇ ହେଉଛି । ଭୁବନେଶ୍ବରରେ ସାଇବର ଠକେଇ ଗ୍ରାଫ୍ ବଢୁଥିବାରୁ କ୍ରାଇମ୍ ରୋକିବା ନେଇ ଗତ ବର୍ଷ ସାଇବର ପାଠଶାଳା ଅଭିଯାନ କରିଛି ପୋଲିସ । ଏବେ ସୁଦ୍ଧା ୫୦ରୁ ଅଧିକ ବିଭିନ୍ନ ସ୍କୁଲ, କଲେଜରେ ସଚେତନତା କରିଛି ପୋଲିସ । ଆଜି ହାଇଟେକ୍ ମେଡିକାଲ କଲେଜରେ ପ୍ରାୟ ୭୦୦ ଜଣ ଏମବିବିଏସ ଛାତ୍ରଛାତ୍ରୀଙ୍କୁ ନେଇ ସାଇବର ପାଠଶାଳା କରିଥିଲା ପୋଲିସ । ଚଳିତ ବର୍ଷ ୭ ମାସରେ ୧୦ କୋଟି ଟଙ୍କା ଠକେଇ ନେଇ ଭୁବନେଶ୍ବର ସାଇବର ଥାନାରେ ଅଭିଯୋଗ ହୋଇଛି । ପ୍ରାୟ ୫୦ ଲକ୍ଷ ଟଙ୍କା ଠକଙ୍କ ଠାରୁ ଫେରେଇ ଆଣିବା ବେଳେ ୮୦ ଲକ୍ଷ ଟଙ୍କା ବ୍ଳକ୍ କରିଛି ସାଇବର ଥାନା ପୋଲିସ ।

ସମ୍ବଲପୁରରେ ଡେଙ୍ଗୁ ଭୟ, ଜିଲ୍ଲାରେ ପାଞ୍ଚଟି ଡେଙ୍ଗୁ ରୋଗୀ ଚିହ୍ନଟ

ସମ୍ବଲପୁର: ସମ୍ବଲପୁରରେ ଡେଙ୍ଗୁ ଭୟ । ଜିଲ୍ଲାରେ ପାଞ୍ଚଟି ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । ଆଗକୁ ଟେଷ୍ଟିଂ ବଢ଼ିଲେ ଡେଙ୍ଗୁ ରୋଗୀଙ୍କ ସଂଖ୍ୟା ବଢ଼ିପାରେ ବୋଲି ଅନୁମାନ କରାଯାଉଛି । ତେବେ ଡେଙ୍ଗୁ ରୋଗୀ ସଂଖ୍ୟା ବଢ଼ିବାକୁ ନେଇ ମହାନଗର ନିଗମକୁ ଦାୟୀ କରିଛନ୍ତି ସମ୍ବଲପୁରବାସୀ । ସହର ସାରା ଯୁଆଡ଼େ ଦେଖିବେ କୁଢ଼ କୁଢ଼ ଆବର୍ଜନା ପଡ଼ିରହୁଥିବା ଅଭିଯୋଗ ହୋଇଛି । ସହରରେ ସଚେତନତା କି ଡେଙ୍ଗୁ ନିରାକରଣ ପାଇଁ ପଦକ୍ଷେପ ନିଆଯାଉନଥିବା ଅଭିଯୋଗ ହୋଇଛି । ସମ୍ବଲପୁର ସହରାଞ୍ଚଳରୁ ଚିହ୍ନଟ ରୋଗୀଙ୍କ ମଧ୍ୟରୁ ତିନିଜଣଙ୍କୁ ବୁର୍ଲା ସ୍ଥାନାନ୍ତର କରାଯାଇଥିବା ବେଳେ ଦୁଇଜଣ ଘରେ ରହି ଚିକିତ୍ସିତ ହେଉଛନ୍ତି । ଯେଉଁ ଅଞ୍ଚଳରେ ରୋଗୀ ବାହାରିଛନ୍ତି ସେ ଅଞ୍ଚଳରେ ଆହୁରି ଟେଷ୍ଟିଂ ବଢିଲେ ଡେଙ୍ଗୁ ରୋଗୀ ସଂଖ୍ୟା ବଢିପାରେ ବୋଲି ଡାକ୍ତର କହିଛନ୍ତି । ସେପଟେ ଡେଙ୍ଗୁ ମୁକାବିଲା ପାଇଁ ସ୍ବାର୍ଥ ବିଭାଗ ପ୍ରସ୍ତୁତ ଥିବା ଜଣାପଡିଛି ।

ଆସିକାର ମନମୋହୁଛି ଗାଁ ମଶାଣୀ, ସବୁଜ ପରିବେଶ ଭିତରେ ହେଉଛି ଶବ ଦାହ

ଆସିକା: ପ୍ରବେଶ ପଥରେ ମହାଦେବଙ୍କ ମୂର୍ତ୍ତି । ଗେଟ୍ ଦେଇ ଭିତରକୁ ଗଲେ ଦେଖିବେ ସୁନ୍ଦର ସବୁଜ ପରିବେଶ । ବସିବା ପାଇଁ ପରିସ୍କାର ସ୍ଥାନ, ଶୌଚାଳୟ ସହ ଚଲା ବୁଲା କରିବାକୁ ପକ୍କା ରାସ୍ତା । ଏସବୁ ଚିତ୍ର ଦେଖି ଆପଣ ଏହାକୁ ଏକ ପାର୍କ ଭାବିପାରନ୍ତି । କିନ୍ତୁ ଏହା ଏକ ମଶାଣୀ । ରାଜ୍ୟ ସରକାରଙ୍କ ସହାୟତାରେ ଗଞ୍ଜାମ ଜିଲ୍ଲା ଆସିକା ବିଜ୍ଞାପିତ ଅଞ୍ଚଳ ପରିଷଦ ୮ ନମ୍ବର ଓ୍ବାର୍ଡରେ ନିର୍ମାଣ ହୋଇଛି ଆଦର୍ଶ ମଶାଣୀ ।

ରାଜ୍ୟ ସରକାର ଓ ଜିଲ୍ଲା ପ୍ରଶାସନର ସହଯୋଗରେ ନିର୍ମାଣ ହୋଇଥିବା ଏହି ମଶାଣୀ ପାଇଁ ଖର୍ଚ୍ଚ ହୋଇଛି ୬୪ ଲକ୍ଷ ୪୭ ହଜାର ଟଙ୍କା । ସ୍ବଚ୍ଛତା ଓ ପରିଚ୍ଛନତାର ବ୍ୟବସ୍ଥା ପାଇଁ ଏହା ଲୋକଙ୍କୁ ଆକର୍ଶିତ କରୁଛି । ଶବ ଦାହ କରିବା ପରେ ଆରାମରେ କିଛି ସମୟ ବସି ସମୟ ବିତାପାରୁଛନ୍ତି ସମ୍ପର୍କୀୟ । ଯୁବଗୋଷ୍ଠୀ ସାଙ୍ଗସାଥୀଙ୍କ ସହ ଆସି ଏଠାରେ ବସାଉଠା କରିବା ସହ ସେଲଫି ମଧ୍ୟ ନେଉଛନ୍ତି । ଆଦର୍ଶ ମଶାଣୀ ପାଇଁ ଶବ ଦାହରେ ସମସ୍ୟା ହେଉନଥିବାରୁ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି ଅଞ୍ଚଳବାସୀ । ଆଦର୍ଶ ମଶାଣୀ ଦ୍ବାରା ଶବ ଦାହ ଚିନ୍ତା ଦୂର ହୋଇଛି । ଏଥିସହ ବୁଲାବୁଲି ସାଙ୍ଗକୁ ଆଦର୍ଶ ମଶାଣିରେ ଗପସପର ଆସର ଜମୁଛି ।

 

ସିଲେଇ ଶିଖି ସ୍ବାବଲମ୍ବୀ ସ୍ବୟଂ ସହାୟକ ଗୋଷ୍ଠୀ ମହିଳା, ୪ଟି ସିଲେଇ ମେସିନରେ ତିଆରି କରୁଛନ୍ତି ସମସ୍ତ ସାମଗ୍ରୀ

କଳାହାଣ୍ଡି: କଳାହାଣ୍ଡି ଜିଲ୍ଲାର ବେହେରା ଗାଁ । ୬ ମହିଳା ସ୍ଵୟଂ ସହାୟକ ଗୋଷ୍ଠୀକୁ ନେଇ ଏଠାରେ ଗଠନ ହୋଇଛି ଦଣ୍ଡପାଟ ପ୍ରଡୁସର୍ ଗ୍ରୁପ୍ । ପ୍ରାୟ ଶତାଧିକ ମହିଳା ଏହି ଗ୍ରୁପ୍ ସହ ଜଡିତ । ସିଲେଇ ଶିକ୍ଷା କରି କପଡାରେ ସୁନ୍ଦର ସୁନ୍ଦର ପୋଷାକ ବ୍ୟାଗ୍ ସାଙ୍ଗକୁ ଏମ୍ରୋଡରୀ କରି ତାକୁ ବିକ୍ରି କରୁଛନ୍ତି । ସେଥିରୁ ଯାହା ରୋଜଗାର ସେଥିରେ ଚଳୁଛି ପରିବାର । କିନ୍ତୁ କାମ କରିବା ପାଇଁ  ମାତ୍ର ଗୋଟିଏ ଘର ଥିବାରୁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ମହିଳା ।

୪ଟି ସିଲେଇ ମେସିନ ଏବଂ ଗୋଟେ ଘରେ କାମ କରୁଛନ୍ତି ମହିଳା । ଅଧିକ ମହିଳାଙ୍କୁ ସିଲେଇ ଶିଖେଇବା ପାଇଁ ଶିକ୍ଷକ ଥିବା ବେଳେ ରହିଛି ଘରର ଅଭାବ । ଦୁଇ ଜଣ ସିଲେଇ ଶିକ୍ଷକ ଯାହା ଯେତିକି ସମ୍ଭବ ସିଲେଇ ଶିଖାଉଛନ୍ତି । ପର୍ଯ୍ୟାପ୍ତ ଘର ନଥିବାରୁ ଅନେକ ମହିଳା ଶିଲେଇ କାର୍ଯ୍ୟ ଶିଖିବାରୁ ବଞ୍ଚିତ ରହିଛନ୍ତି । ଏନେଇ ଘରଟିଏ ଯୋଗାଇଦେବାକୁ ଅନୁରୋଧ କରିଛନ୍ତି ଏସଏଚଜି ମହିଳାମାନେ । ରାଜ୍ୟ ସରକାର ମିଶନ ଶକ୍ତି ଜରିଆରେ ଅନେକ ମହିଳାଙ୍କୁ ସ୍ବାବଲମ୍ବୀ କରିଛନ୍ତି । ବେହେରା ଗାଁରେ ସରକାର ସିଲେଇ ମେସିନ୍ ସହ ଘର ଯୋଗାଇଦେଲେ ଆହୁରି ଅଧିକ ମହିଳା ରୋଜଗାରକ୍ଷମ ହୋଇପାରିବେ ।

ପୁରୁଷୋତ୍ତମପୁରର ଋଷିକୂଲ୍ୟା ନଦୀ ଉପରେ ନିର୍ମାଣ ହେଲା ସେତୁ, ଉପକୃତ ହେବେ ୧୦ଟି ପଞ୍ଚାୟତର ଲୋକ

ଗଞ୍ଜାମ: ପୂରଣ ହେଲା ଦୀର୍ଘ ବର୍ଷର ଦାବି । ଋଷିକୂଲ୍ୟା ନଦୀ ଉପରେ ନିର୍ମାଣ ହେଲା ସେତୁ । ଏଣିକି ଆଉ ଡଙ୍ଗା ନୁହେଁ କି ସହର ବୁଲିବାକୁ ପଡ଼ିବନି । ଗଞ୍ଜାମ ଜିଲ୍ଲାର ମାଆ ତାରାତାରିଣୀ ପୀଠକୁ ଯିବାକୁ ହେଲେ ଏହି ସେତୁ ହିଁ ସାଜିବ ବଡ଼ ମାଧ୍ୟମ । ପୁରୁଷୋତ୍ତମପୁର ହାଣ୍ଡିଘରରୁ ତାରାତାରିଣୀ ପୀଠକୁ  ସମ୍ପର୍କର ସେତୁ ସାଜିଛି ବିଜୁ ସେତୁ । ମୋଟ ୨୩ କୋଟି ଟଙ୍କା ବ୍ୟୟ ଅଟକଳ ରହିଥିବା ବେଳେ ବର୍ତ୍ତମାନ ସୁଦ୍ଧା ୧୬ କୋଟି ଟଙ୍କା ଖର୍ଚ୍ଚ ହୋଇସାରିଛି । ସେତୁର ଲମ୍ବ ୩୬୭ ମିଟର ରହିଥିବା ବେଳେ ଏହା ପୁରୁଷୋତ୍ତମପୁରର ସବୁଠାର ଅଧିକ ଲମ୍ବା ସେତୁ ବୋଲି କହିଛନ୍ତି ଗ୍ରାମ୍ୟ ଉନ୍ନୟନ ବିଭାଗର ଅଧିକ୍ଷଣ ଯନ୍ତ୍ରୀ । ସେତୁକୁ ସଂଯୋଗ କରୁଥିବା ରାସ୍ତା କାର୍ଯ୍ୟ ଚାଲୁ ରହିଥିବା ବେଳେ ଅକ୍ଟୋବର ମାସ ଶେଷ ସୁଦ୍ଧା ସମସ୍ତ କାର୍ଯ୍ୟ ଶେଷ ହେବ ।

ଭୁବନେଶ୍ବର, କଟକ ସହ ବିଭିନ୍ନ ଜିଲ୍ଲାରୁ ମା’ ତାରାତାରିଣୀଙ୍କ ଦର୍ଶନ ପାଇଁ ଆସୁଥିବା ଭକ୍ତମାନେ ଏହି ସେତୁ ଦେଇ ମାଆଙ୍କ ନିକଟକୁ କମ୍ ସମୟ ମଧ୍ୟରେ ଯାଇପାରିବେ । ଦୀର୍ଘ ବର୍ଷର ଦାବି ରାଜ୍ୟ ସରକାର ଶୁଣିଥିବା ଯୋଗୁଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ୧୦ଟି ପଞ୍ଚାୟତର ଗ୍ରାମବାସୀ ।

ହାଣ୍ଡିଘର, ଆଛୁଲି, ପ୍ରତାପୁର ଭଳି ପ୍ରାୟ ୧୦ଟି ପଞ୍ଚାୟତର ଲୋକ ତାରାତାରିଣୀ ଯିବାକୁ ହେଲେ ସହର ବୁଲିବାକୁ ପଡ଼ୁଥିଲା । ବେଳେ ବେଳେ ଋଷିକୁଲ୍ୟା ନଦୀ ପାର ହୋଇ ଯିବାକୁ ମଧ୍ୟ ପଡ଼ୁଥିଲା । ଏବେ ବିଜୁ ସେତୁ ଯୋଜନାରେ ଋଷିକୂଲ୍ୟା ସେତୁ ନିର୍ମାଣ ହେବା ପରେ ଦୀର୍ଘ ବର୍ଷର ସମସ୍ୟାର ସମାଧାନ ହୋଇଛି । ଗତ ୨୦୧୯ ମସିହାରେ ସେତୁର କାର୍ଯ୍ୟ ଆରମ୍ଭ ହୋଇଥିବା ବେଳେ ସଠିକ ସମୟରେ କାର୍ଯ୍ୟ ଶେଷ ହୋଇଥିବାରୁ ଖୁସି ପ୍ରକାଶ କରିଛନ୍ତି ଅଞ୍ଚଳ ବାସୀ ।