ନନ୍ଦିଘୋଷ ବ୍ୟୁରୋ : ୱେଲିଂଟନ୍ର ବେସିନ୍ ରିଜର୍ଭ ପଡ଼ିଆରେ ଚାଲିଥିବା ପ୍ରଥମ ଟେଷ୍ଟ ମ୍ୟାଚ୍ରେ ନ୍ୟୁଜିଲ୍ୟାଣ୍ଡ ବିପକ୍ଷରେ ଭାରତ ନିଜର ସ୍ଥିତିକୁ ମଜବୁତ କରିଛି। ଚତୁର୍ଥ ଦିନର ଖେଳରେ ଭାରତୀୟ ବ୍ୟାଟରଙ୍କ ଦମ୍ଦାର ପ୍ରଦର୍ଶନ ବଳରେ ଦଳ ପ୍ରଥମ ଇନିଂସରେ ୭୨୦ ରନ୍ର ବିଶାଳ ସ୍କୋର ଛିଡ଼ା କରିଛି । ନ୍ୟୁଜିଲ୍ୟାଣ୍ଡର ପ୍ରଥମ ଇନିଂସ ସ୍କୋର ୩୬୮ ରନ୍ ଜବାବରେ, ଭାରତ ୯ ୱିକେଟ୍ ହରାଇ ୭୨୦ ରନ୍ କରି ପାଳି ଘୋଷଣା କରିଛି। ଏହା ନ୍ୟୁଜିଲ୍ୟାଣ୍ଡ ମାଟିରେ କୌଣସି ଦଳର ସର୍ବାଧିକ ଟେଷ୍ଟ ସ୍କୋର। ଋଷଭ ପନ୍ତ ଆକ୍ରମଣାତ୍ମକ ବ୍ୟାଟିଂ କରି ୧୨୮ ରନ୍ର ଏକ ଶତକୀୟ ଇନିଂସ ଖେଳିଛନ୍ତି। ଧ୍ରୁବ ଜୁରେଲ୍ ୭୮ ରନ୍ ଏବଂ ଅଂଶୁଲ କମ୍ବୋଜ ୩୮ ରନ୍ କରି ଦଳୀୟ ସ୍କୋରକୁ ଆଗକୁ ନେଇଥିଲେ। ପୂର୍ବରୁ କେ.ଏଲ୍ ରାହୁଲ ୧୩୬, ଶୁଭମନ ଗିଲ୍ ୯୮, ଯଶସ୍ୱୀ ଜୟସ୍ୱାଲ ୮୫ ଏବଂ ଦେବଦତ୍ତ ପାଡିକଲ ୮୦ ରନ୍ର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ଦ୍ୱିତୀୟ ଇନିଂସ ଆରମ୍ଭ କରିଥିବା ଘରୋଇ ଦଳକୁ ପ୍ରଥମ ଓଭରରେ ହିଁ ଝଟକା ଲାଗିଥିଲା ଜସପ୍ରୀତ ବୁମରା ଅଧିନାୟକ ଟମ୍ ଲାଥାମଙ୍କୁ ଖାତା ଖୋଲିବା ପୂର୍ବରୁ ପ୍ୟାଭିଲିୟନ୍ ପଠାଇ ଦେଇଛନ୍ତି।

