spot_img

Latest Posts

କାର୍‌କୁ ଧକ୍କା ଦେଲା ଟ୍ରଲର, ତ ଗୋଟିଏ ପରିବାରର ୭ ମୃତ

ନନ୍ଦିଘୋଷ ବ୍ୟୁରୋ: ଗୁଜରାଟର କଚ୍ଛ ଜିଲ୍ଲାରେ ଘଟିଛି ହୃଦୟବିଦାରକ ସଡ଼କ ଦୁର୍ଘଟଣା। ଭୁଜ-ଖାଭଡା ରାଜପଥର ଭେକାରିଆ ରଣ ନିକଟରେ ଏକ କାର୍‌କୁ ଦ୍ରୁତଗାମୀ ଟ୍ରଲର ଧକ୍କା ଦେବାରୁ ଗୋଟିଏ ପରିବାରର ୭ ଜଣଙ୍କ ଜୀବନ ଚାଲିଯାଇଛି। ମୃତକଙ୍କ ମଧ୍ୟରେ ଭାରତୀୟ ସେନାର ଗଡ଼ୱାଲ ରେଜିମେଣ୍ଟର ଯବାନ ସୌରଭ ସିଂହଙ୍କ ସମେତ ତିନି ଜଣ ଶିଶୁ ରହିଛନ୍ତି। ମୃତ ଶିଶୁଙ୍କ ମଧ୍ୟରେ ଅଢ଼େଇ ମାସର ଏକ କୋମଳମତି ଶିଶୁକନ୍ୟା ମଧ୍ୟ ଅଛି। ଏହି ଦୁର୍ଘଟଣାରେ ଉତ୍ତରାଖଣ୍ଡର ଏକ ପରିବାର ସମ୍ପୂର୍ଣ୍ଣ ଉଜୁଡ଼ି ଯାଇଛି।

ରିପୋର୍ଟ ଅନୁଯାୟୀ, ଗଡ଼ୱାଲ ରେଜିମେଣ୍ଟର ଯବାନ ସୌରଭ ସିଂହ ନିଜ ପରିବାର ସହ ଧୋର୍ଡୋରୁ ଭୁଜ ଫେରୁଥିଲେ। ଏହି ସମୟରେ ଭୁଜ-ଖାଭଡା ରାଜପଥର ଭେକାରିଆ ରଣ ନିକଟରେ ସେମାନଙ୍କ କାର୍‌ ସହ ଏକ ଦ୍ରୁତଗାମୀ ଟ୍ରଲରର ମୁହାଁମୁହିଁ ଧକ୍କା ହୋଇଥିଲା। ଧକ୍କା ଏତେ ଭୟଙ୍କର ଥିଲା ଯେ କାର୍‌ଟି ସମ୍ପୂର୍ଣ୍ଣ ଭାବେ ଚୁରମାର ହୋଇଯାଇଥିଲା। ଫଳରେ କାର୍‌ରେ ଥିବା ସମସ୍ତ ୭ ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ଗୋଟିଏ ପରିବାରର ତିନି ଜଣ ଶିଶୁଙ୍କ ମୃତ୍ୟୁ ଘଟଣାକୁ ଆହୁରି ହୃଦୟବିଦାରକ କରିଦେଇଛି।

ଦୁର୍ଘଟଣା ସମ୍ପର୍କରେ ଖବର ପାଇ କଚ୍ଛର ପୋଲିସ ଅଧୀକ୍ଷକ ବିକାଶ ସୁଣ୍ଡା ପୋଲିସ ଟିମ୍ ସହ ଘଟଣାସ୍ଥଳରେ ପହଞ୍ଚିଥିଲେ। ସେ ଉଦ୍ଧାର ଓ ରିଲିଫ୍ କାର୍ଯ୍ୟର ତଦାରଖ କରିଥିଲେ। ଅନ୍ୟପଟେ, ଜଣେ ସେନା ଯବାନଙ୍କ ସମେତ ତାଙ୍କ ପରିବାରର ୭ ଜଣଙ୍କ ମୃତ୍ୟୁ ଖବର ପାଇ ସେନାର ଅଧିକାରୀ ଓ କର୍ମଚାରୀମାନେ ମଧ୍ୟ ହସ୍ପିଟାଲରେ ପହଞ୍ଚିଥିଲେ।

ପୋଲିସ ମୃତଦେହଗୁଡ଼ିକୁ ନିଜ ହେପାଜତକୁ ନେଇ ଆବଶ୍ୟକ ଆଇନଗତ ପ୍ରକ୍ରିୟା ଆରମ୍ଭ କରିଛି। ଏହାସହ ଦୁର୍ଘଟଣା କେଉଁ ପରିସ୍ଥିତିରେ ଘଟିଲା ଏବଂ ଏଥିପାଇଁ କିଏ ଦାୟୀ, ସେନେଇ ତଦନ୍ତ ଜାରି ରହିଛି। ଏହି ଦୁର୍ଘଟଣା ଉତ୍ତରାଖଣ୍ଡର ମୃତକଙ୍କ ପରିବାର ଓ ସମ୍ପର୍କୀୟଙ୍କ ମଧ୍ୟରେ ଗଭୀର ଶୋକର ଛାୟା ଖେଳାଇ ଦେଇଛି।

 

Latest Posts

Don't Miss