spot_img
Home Blog Page 5102

ପୁରୀ ଜିଲ୍ଲାରେ ଶିଥିଳ ପଡ଼ିଛି ଟିକାକରଣ ପ୍ରକ୍ରିୟା, ଟିକା ଅଛି ଲୋକେ ନେଉ ନାହାଁନ୍ତି

ପୁରୀ: ଜିଲ୍ଲାରେ ଶିଥିଳ ପଡିଛି ଟିକାକରଣ ପ୍ରକ୍ରିୟା । କରୋନା ଟିକା ନେବାକୁ ଆଗ୍ରହ ଦେଖାଉନାହାନ୍ତି ଲୋକେ । ଚିକାକରଣ ପକ୍ରିୟା ସବୁଠି ତ୍ୱରିତ ବେଗରେ ଚାଲିଥିବାବେଳେ ପୁରୀ ଭଳି ଜିଲ୍ଲାରେ ଧିମେଇଛି ପକ୍ରିୟା । ଫଳରେ ଏବେ ଯାଏ ଜିଲ୍ଲାରେ ମାତ୍ର 82 ପ୍ରତିଶତ ଲୋକ ପ୍ରଥମ ଡୋଜ୍ ନେଇଛନ୍ତି  । ସେହିପରି ଯଦି ଦ୍ୱିତୀୟ ଡୋଜ କଥା ଦେଖିବା ତେବେ ମାତ୍ର  54 ପ୍ରତିଶତ ଦ୍ବିତୀୟ ଡୋଜ୍ ଟିକା ନେଇଛନ୍ତି ।

ଟିକାକରଣ ପାଇଁ ପ୍ରଶାସନ ଯତ୍ନବାନ ଥିବା ସ୍ୱତେ ସାଧାରଣ ଲୋକଙ୍କ ମଧ୍ୟରେ ତତ୍ପରତା ନଥିବା ସ୍ପଷ୍ଟ ପ୍ରକାଶ ପାଉଛି  । ସେପଟେ ସାଧାରଣ ଲୋକଙ୍କ ଏଭଳି ଅବହେଳାକୁ ନେଇ ଚିନ୍ତା ପ୍ରକଟ କରିଛନ୍ତି ଜିଲ୍ଲାପାଳ ସମର୍ଥ ବର୍ମା । ଟିକାକରଣରେ ଜିଲ୍ଲାବାସୀ ସହଯୋଗ କରିବାକୁ ଭିଡିଓ ବାର୍ତ୍ତାରେ ଅପିଲ୍ କରିଛନ୍ତି ଜିଲ୍ଲାପାଳ । ଗାଁ- ଗାଁରେ ଟିକାକରଣ ଟିମ୍ ବୁଲି ଲୋକଙ୍କୁ ଟିକାକରଣ କରୁଛନ୍ତି । ଏଣୁ ସମସ୍ତେ ଗୁରୁତର ସହିତ ଏହି ପ୍ରକ୍ରିୟାରେ ସାମିଲ ହେବାକୁ ଅନୁରୋଧ କରିଛନ୍ତି ଜିଲ୍ଲାପାଳ ସମର୍ଥ ବର୍ମା ।

କଙ୍ଗନାଙ୍କୁ ପଦ୍ମଶ୍ରୀ ଫେରେଇବାକୁ କଂଗ୍ରେସର ଦାବି

ବଲିଉଡର କଣ୍ଟୋଭର୍ସି କୁଇନ କଙ୍ଗନା ରଣାୱତଙ୍କର ବିବାଦୀୟ ବୟାନ । ବୟାନକୁ ନେଇ ସମାଲୋଚନା ଘେରରେ କଙ୍ଗନା । ଗତକାଲି ବିଜେପି ସାଂସଦ ବରୁଣ ଗାନ୍ଧୀ କଙ୍ଗନାଙ୍କୁ ଦେଶଦ୍ରୋହୀ କହିଥିବା ବେଳେ ଆଜି ପୂର୍ବ କେନ୍ଦ୍ରୀୟ ମନ୍ତ୍ରୀ ଆନନ୍ଦ ଶର୍ମାଙ୍କ ଟାର୍ଗେଟରେ କଙ୍ଗନା ।  କଙ୍ଗନାଙ୍କ ବିବାଦୀୟ ବୟାନ ନେଇ ପଦ୍ମଶ୍ରୀ ଫେରେଇବାକୁ ଦାବି କଲା କଂଗ୍ରେସ ।

ସୂଚନା ଅନୁସାରେ, କିଛି ଦିନ ତଳେ ଏକ କାର୍ଯ୍ୟକ୍ରମରେ କଙ୍ଗନା କହିଥିଲେଯେ, “ରାଣୀ ଲକ୍ଷ୍ମୀବାଇ, ସାବରକର, ସୁଭାସ ଚନ୍ଦ୍ର ବୋଷଙ୍କ ଭଳି ସ୍ୱାଧୀନତା ସଂଗ୍ରାମୀ ଜାଣିଥିଲେଯେ ଦେଶରେ ସ୍ୱାଧୀନତା ଆଣିବା ପାଇଁ ଦେଶରେ ରକ୍ତ ବୋହିବା ନିଶ୍ଚିତ । କିନ୍ତୁ ଏହା ଜାଣିରଖ ହିନ୍ଦୁ-ହିନ୍ଦୁର ରକ୍ତ ବୁହାଇବା ଉଚିତ୍ ନୁହଁ । ସେ ସ୍ୱାଧୀନତା ପାଇଁ ଏ ତ୍ୟାଗ ଦେଇଥିଲେ ସତ । ମାତ୍ର ତାହା ସ୍ୱାଧୀନତା ନଥିଲା । ମୋ ମତରେ ତାହା ଭିକ ଥିଲା ।” ସେ ଏହା ମଧ୍ୟ କହିଥିଲେଯେ ଦେଶ ୨୦୧୪ ପରେ ଅର୍ଥାତ୍ ମୋଦିଙ୍କ ଆଗମନ ପରେ ହିଁ ସ୍ୱାଧୀନତା ପାଇଲା । କଙ୍ଗନାଙ୍କର ଏଭଳି ବିବାଦୀୟ ବୟାନକୁ ସୋସିଆଲ ମିଡିଆରେ ଟ୍ରୋଲ କରାଯାଉଛି ।

କଙ୍ଗନାଙ୍କର ଏହି ବୟାନକୁ ବରୁଣ ଗାନ୍ଧୀ ଟ୍ୱିଟ୍ କରି ଲେଖିଛନ୍ତି, କଙ୍ଗନା କେତେବେଳେ ଗାନ୍ଧୀ, ସୁଭାଷ ଚନ୍ଦ୍ର ବୋଷଙ୍କ ବଳିଦାନକୁ ଅପମାନ କରୁଛନ୍ତି ତ କେତେବେଳେ ହତ୍ୟାକାରୀଙ୍କୁ ସମ୍ମାନ ଦେଉଛନ୍ତି । ସ୍ୱାଧୀନତା ସଂଗ୍ରାମୀଙ୍କୁ ତିରସ୍କାର କରାଯାଉଛି । ଏଭଳି ମହିଳାଙ୍କୁ ପାଗଳ କୁହାଯିବ ନା ଦେଶଦ୍ରୋହୀ ?

ଏଥିସହ ଅକାଳି ଦଳର ବରିଷ୍ଠ ନେତା ମନଜିନ୍ଦର ସିଂ ସିର୍ସା ମଧ୍ୟ ତାଙ୍କୁ ଟ୍ୱିଟରରେ ସମାଲୋଚନା କରିଛନ୍ତି । ସେ କହିଛନ୍ତି, ମଣିକର୍ଣ୍ଣିକା ଭଳି ଲକ୍ଷ୍ମୀବାଇଙ୍କ ଚରିତ୍ରରେ ଅଭିନୟ କରିଥିବା ଅଭିନେତ୍ରୀ ସ୍ୱୀଧୀନତାକୁ ଭିକ ବୋଲି କହିବା ଉଚିତ୍ ନୁହେଁ । ଲକ୍ଷ ଲକ୍ଷ ସ୍ୱାଧୀନତା ସଂଗ୍ରାମୀଙ୍କ ସହୀଦରେ ମିଳିଥିବା ସ୍ୱାଧୀନତାକୁ ଭିକ ବୋଲି କହୁଥିବା କଙ୍ଗନା ବୋଧହୁଏ ଦେବାଳିଆ ।

 

 

ସେନାବାହିନୀରେ ମହିଳା ଅଫିସର ହେବେ ସ୍ଥାୟୀ କମିଶନ

ନୂଆଦିଲ୍ଲୀ: ସେନାବାହିନୀରେ ମହିଳା ଅଫିସରଙ୍କୁ ସ୍ଥାୟୀ କମିଶନ ନେଇ ପୁଣି ସରକାରଙ୍କ ବଡ ନିଷ୍ପତ୍ତି । ଆସନ୍ତା ୧୦ ଦିନ ମଧ୍ୟରେ ୧୧ ଜଣ ମହିଳା ଅଫିସରଙ୍କୁ ପର୍ମାନେଣ୍ଟ କମିଶନ ଦିଆଯିବ ବୋଲି ସୁପ୍ରିମ କୋର୍ଟ ନିକଟରେ କେନ୍ଦ୍ର ସରକାର ଦର୍ଶାଇଛନ୍ତି । ଯେଉଁ ମହିଳା ଅଫିସରମାନେ ପର୍ମାନେଣ୍ଟ କମିଶନ ଲାଗି କୋର୍ଟ ନିକଟରେ ଆବେଦନ କରିବାକୁ ଯାଉଛନ୍ତି ସେମାନଙ୍କୁ ଯୋଗ୍ୟତାଭିତ୍ତିରେ ଆସନ୍ତା ୩ ସପ୍ତାହ ମଧ୍ୟରେ ନିଯୁକ୍ତି ଦେବା ଲାଗି କେନ୍ଦ୍ର ସରକାରଙ୍କୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ।

ସେପଟେ ଯଦି ନିର୍ଦ୍ଦେଶ ପାଳନ ନ କରାଯାଏ ତେବେ ଏହାକୁ କୋର୍ଟଙ୍କ ଅବମାନନା ବୋଲି ବିଚାର କରାଯିବା ନେଇ ସର୍ବୋଚ୍ଚ ଅଦାଲତ ସତର୍କ କରିବା ପରେ ସରକାର ଏହି ପଦକ୍ଷେପ ନେଇଛନ୍ତି । ସେନାବାହିନୀରେ ୩୯ ମହିଳା ଅଫିସରଙ୍କୁ ପର୍ମାନେଣ୍ଟ କମିଶନ ଦେବା ଲାଗି ଗତ ଅକ୍ଟୋବର ୨୨ ତାରିଖରେ ସୁପ୍ରିମକୋର୍ଟ କେନ୍ଦ୍ରକୁ ନିର୍ଦ୍ଦେଶ ଦେଇଥିଲେ ।

ମମିତା ପ୍ରସଙ୍ଗରେ ଚାଲିଛି ଅପ୍ରାସଙ୍ଗିକ ରାଜନୀତି, ବିରୋଧ ନୁହେଁ ରାଜ୍ୟର ବିକାଶରେ ସାମିଲ ହେବାକୁ ଆହ୍ୱାନ

ଭୁବନେଶ୍ୱର: ମମିତା ମେହେର ହତ୍ୟା ଘଟଣାକୁ ନେଇ ଓଡ଼ିଶା ଡେଭ୍‌ଲପମେଣ୍ଟ ଓ୍ବାଚ୍‌ ର ସାମ୍ବାଦିକ ସମ୍ମିଳନୀ  । ଏହି ମାମଲା ହେଉଛି ସ୍ପର୍ଶକାତର ପ୍ରସଙ୍ଗ । ଏଥିରେ ରାଜନୀତି ନକରି ସମସ୍ତେ ନ୍ୟାୟିକ ପ୍ରକ୍ରିୟାରେ ସମସ୍ତେ ସାମିଲ ହେବା ଦରକାର । ମମିତା ପ୍ରସଙ୍ଗରେ ବିରୋଧୀଙ୍କ ବନ୍ଦ ଓ ହରତାଳ ରାଜନୀତିକୁ ସମାଲୋଚନା କରିବା ସହିତ ବିରୋଧ ନୁହେଁ ବିକାଶରେ ସାମିଲ ହେବାକୁ ଆହ୍ବାନ ଦେଇଛି ଓଡ଼ିଶା ଡେଭ୍‌ଲପମେଣ୍ଟ ଓ୍ବାଚ୍‌ । ସାମ୍ବାଦିକ ସମ୍ମିଳନୀରେ ବିରୋଧୀଙ୍କ ହୀନ ରାଜନୀତି ଉପରେ ବର୍ଷିଛି ଓଡ଼ିଶା ଡେଭ୍‌ଲପମେଣ୍ଟ ଓ୍ବାଚ୍‌ । ରାଜ୍ୟର ବିକାଶ ଲାଗି ସମସ୍ତେ ଏକାଠି କାମ କରିବାର ଆବଶ୍ୟକତା ରହିଛି ।

ମମିତା ପ୍ରସଙ୍ଗରେ ଅଯଥା ରାଜନୀତି କରି ମୁଖ୍ୟ ପ୍ରସଙ୍ଗଗୁଡିକରୁ ବିରୋଧୀମାନେ ଦୂରେଇ ଯାଉଛନ୍ତି । ରାଜ୍ୟର ସମସ୍ତ ଲୋକ ମମିତା ହତ୍ୟାକାଣ୍ଡର ସତ ଜାଣିଛନ୍ତି । ଅଭିଯୁକ୍ତ ଗିରଫ ହୋଇସାରି ସତ ମାନିଥିବା ବେଳେ ତଦନ୍ତ ମଧ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ଖୁବ୍‌ କମ୍ ଦିନ ଭିତରେ ଏହାର ଚାର୍ଜସିଟ ଦାଖଲ ହେବ । ମାତ୍ର ମାମଲାକୁ ଅଧିକ ଜଟିଳ କରିବା ଲାଗି ଅଯଥା ରାଜନୀତି କରୁଛନ୍ତି ବିରୋଧୀ । ତଦନ୍ତକାରୀ ଅଧିକାରୀଙ୍କୁ ଲୋକ ନିଜ ମତ ଦେଇପାରିବେ । ସତ୍ୟପାଠ ଜରିଆରେ କୋର୍ଟରେ ମଧ୍ୟ ଦର୍ଶାଇପାରିବେ । ମାତ୍ର ତାହା ନକରି ସଭା, ଧାରଣା, ଶୋଭାଯାତ୍ରା କରି ଲୋକଙ୍କୁ ହଇରାଣ କରୁଛନ୍ତି ବିରୋଧୀ ଦଳ ।

କରୋନା ପାଇଁ ରୋଜଗାର ଉପରେ ଗୁରୁତର ପ୍ରଭାବ ପଡିଛି । ଏବେ ଜୀବନ ସ୍ବାଭାବିକ ହେଉଥିବାବେଳେ ବନ୍ଦ ଆନ୍ଦୋଳନ ଦ୍ବାରା ଲୋକମାନେ ପ୍ରଭାବିତ ହେଉଛନ୍ତି ।କଂଗ୍ରେସ ଦେଇଥିବା ବନ୍ଦ ଡାକରା ଅଯଥାର୍ଥ । ରାଜନୀତି ନକରି ଲୋକଙ୍କ ଜୀବନ ଯାତ୍ରା ଉପରେ ଗୁରୁତ୍ବ ଦେବା ଆବଶ୍ୟକ । ନ୍ୟାୟିକ ପ୍ରକ୍ରିୟାରେ ସମସ୍ତେ ସାମିଲ ହେବା ଦରକାର । ରାଜନୈତିକ ଦଳମାନେ ନାଗରିକଙ୍କ ନିକଟରେ ଦାୟିତ୍ବସମ୍ପନ୍ନ ହୁଅନ୍ତୁ । ତଥ୍ୟଭିତ୍ତିକ ଭାବେ ପୋଲିସ ମାମଲାର ତଦନ୍ତ କରୁଛି । ଏବଂ ଆଇନ ତାହା ବାଟରେ ଯାଉଛି । ବନ୍ଦ ଜରିଆରେ ଲୋକଙ୍କୁ ହରକତ କରାନଯାଉ ବୋଲି ଓଡ଼ିଶା ଡେଭ୍‌ଲପମେଣ୍ଟ ଓ୍ବାଚ୍‌ ତରଫରୁ କୁହାଯାଇଛି ।

ନେଟଫ୍ଲିକ୍ସ ନାରେ ଲୁଟିଲେ ଶହେ କୋଟି

ନେଟଫ୍ଲିକ୍ସ ନାରେ ଲୁଟ୍ କଲେ ୧ ଶହ କୋଟି । ନେଟଫ୍ଲିକ୍ସରେ ଚଳଚ୍ଚିତ୍ର ବନାଇବା ପ୍ରଲୋଭନ ଦେଖାଇ ଜଣେ ଆମେରିକା ବ୍ୟକ୍ତି ଶହେ କୋଟି ଟଙ୍କା ଲୁଟ୍ କରିଛି । ଏହି ଠକାମି ମାମଲାରେ ତାକୁ ୮ ବର୍ଷର କାରାଦଣ୍ଡ ମିଳିଛି । ଉକ୍ତ ବ୍ୟକ୍ତି ଜଣକ ହେଉଛନ୍ତି ୪୩ ବର୍ଷୀୟ ଏଡମ୍ ଜାଇନର୍ । ଯିଏ ନେଟ୍ ଫ୍ଲିକ୍ସରେ ଫିଲ୍ମ ରିଲିଜ୍ କରିବା ନାରେ ଏତେ ଟଙ୍କାର ଠକେଇ କରିଛି ।

ରିପୋର୍ଟ ଅନୁସାରେ, ଏଡମ୍ ଜାଇନର୍ କାଲିଫର୍ଣ୍ଣିଆ ବାସିନ୍ଦା । ନେଟ୍ ଫ୍ଲିକ୍ସରେ ଚଳଚ୍ଚିତ୍ର କରାଇଦେବା ଆଶା ଦେଖାଇ ନିବେଶକଙ୍କଠୁ ୧୪ ମିଲିୟନ ଡଲାର ଠକିଥିଲା । ଯାହାର ଭାରତୀୟ ମୂଲ୍ୟ ଶହେ କୋଟିରୁ ଅଧିକ । ଏଥିପାଇଁ ତାକୁ ୯୭ ମାସର କାରାଦଣ୍ଡ ମିଳିଛି । କେବଳ ଏତିକି ନୁହେଁ ନିବେଶକଙ୍କଠୁ ଠକିଥିବା ସମସ୍ତ ଟଙ୍କା ଫେରସ୍ତ ଦେବା ପାଇଁ ମଧ୍ୟ କୋର୍ଟ ନିର୍ଦ୍ଦେଶ ଦେଇଛି ।

ନିବେଶକଙ୍କଠୁ ଏସିଆଇ ନିବେଶ ଫର୍ମ ଭରିଥିବା ବେଳେ ଏହାର ଉପଯୋଗ ସେ ‘ଲିଜେଣ୍ଡ’ ନାମକ ଏକ ଚଳଚ୍ଚିତ୍ରରେ କରିବ ବୋଲି ଜାଇନର୍ ଲୋକଙ୍କୁ ଭଣ୍ଡେଇ ଥିଲା । ଏଥିସହ ଏହି ଚଳଚ୍ଚିତ୍ରରେ ଡେଭି କ୍ରାକେଟ୍, ଜନ୍ ହେନରୀ, କେଲାମିଟ୍ ଜେନ୍, ପଲ୍ ବ୍ୟାନିୟନ ସହିତ ଅନେକ ଆମେରିକୀୟ ଚଳଚ୍ଚିତ୍ର ତାରକା ଅଭିନୟ କରୁଛନ୍ତି ବୋଲି ମିଛ ପ୍ରତିଶ୍ରୁତି ଦେଇଥିଲା ।

କଂଗ୍ରେସର ୬ ଘଣ୍ଟିଆ ହରତାଳକୁ ବିଜେଡିର ସମାଲୋଚନା

ଭୁବନେଶ୍ୱର: କଂଗ୍ରେସର ୬ ଘଣ୍ଟିଆ ହରତାଳକୁ ନେଇ ଦଳକୁ ତୀବ୍ର ସମାଲୋଚନା କରିଛି ବିଜୁ ଜନତା ଦଳ। କଂଗ୍ରେସର ହରତାଳକୁ ନିଷ୍ଠୁରତା ବୋଲି ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି। ମମିତାଙ୍କୁ ନେଇ ରାଜନୀତି ନକରିବାକୁ ମମିତାଙ୍କ ବାପା ହାତ ଯୋଡି ସମସ୍ତଙ୍କୁ ଅନୁରୋଧ କରିଥିଲେ । ରାଜନେତାମାନେ ତାଙ୍କ ଘରକୁ ବାରମ୍ବାର ନଯିବାକୁ ମଧ୍ୟ ଅନୁରୋଧ କରିଥିଲେ।

ସ୍ପର୍ଶକାତର ଘଟଣାରେ ପରିବାର ପ୍ରତି ସମବେଦନା ରହିବା ଆବଶ୍ୟକ। କିନ୍ତୁ ପୀଡ଼ିତାଙ୍କ ବାପାଙ୍କ ପ୍ରତି ସମବେଦନା ବଦଳରେ ଶସ୍ତା ରାଜନୀତି କରୁଛନ୍ତି ବିରୋଧୀ। ହରତାଳରେ କଂଗ୍ରେସ କର୍ମୀ ଓ ନେତାମାନେ ମଧ୍ୟ ସାମିଲ ହୋଇନାହାନ୍ତି। ଏଥିରୁ କଂଗ୍ରେସ ଶିକ୍ଷା ଲାଭ ନକରି ସ୍ପର୍ଶକାତର ପ୍ରସଙ୍ଗରେ ରାଜନୀତି କଲେ ରାଜ୍ୟରେ ତାଙ୍କ ଦଳର ସ୍ଥିତି ଶେଷ ହୋଇଯିବ ବୋଲି ବିଜେଡି କହିଛି।

ଓଡିଶା କଂଗ୍ରେସ ବିଜେପି ଦ୍ବାରା ପ୍ରାୟୋଜିତ ହୋଇ ହରତାଳ କରିଥିଲେ। ଓଡିଶାରେ ବିଜେପିର ବି ଟିମ ହୋଇଛି ରାଜ୍ୟ କଂଗ୍ରେସ। ଏହି ବିଫଳତା ବିଜେପି ଓ କଂଗ୍ରେସ ପାଇଁ ସ୍ପଷ୍ଟ ସଙ୍କେତ ଦେଇଛି ବୋଲି କହିଛି ବିଜେଡି।  ଓଡିଶା କଂଗ୍ରେସ କିନ୍ତୁ ରାଜ୍ୟ ସ୍ବାର୍ଥ ସମ୍ପର୍କିତ ପ୍ରସଙ୍ଗରେ ନିରବ ରହୁଛି । ଆଜିର ବିଫଳତାରୁ ଓଡିଶା କଂଗ୍ରେସ ଅପ୍ରାସଙ୍ଗିକ ହୋଇପଡ଼ିଥିବା ପ୍ରତିପାଦିତ ହେଉଛି । ଏହାସହ କଂଗ୍ରେସରେ ଗୋଷ୍ଠୀ କନ୍ଦଳ ଥିବା ମଧ୍ୟ ପ୍ରମାଣିତ ହୋଇଛି ।

ପ୍ରତ୍ୟେକ ଗୋଷ୍ଠୀ ବିଜେପି ଦ୍ବାରା ଭିନ୍ନ ଭିନ୍ନ ଭାବେ ପ୍ରାୟୋଜିତ ହେଉଛନ୍ତି । କୌଣସି ଗୋଷ୍ଠୀ ପୀଡ଼ିତାଙ୍କୁ ନ୍ୟାୟ ଦେବା ପାଇଁ ଚିନ୍ତା କରୁନାହାନ୍ତି । ଖାଲି ସେତିକି ନୁହେଁ, ବିଜେପି ଓ କଂଗ୍ରେସ ମଧ୍ୟରେ ହୋଇଛି ଅଘୋଷିତ ମେଣ୍ଟ । ଆଗାମୀ ଦିନରେ ରାଜ୍ୟବାସୀ କଂଗ୍ରେସକୁ ଉଚିତ ଜବାବ ଦେବେ ବୋଲି ସସ୍ମିତ ପାତ୍ର କହିଛନ୍ତି। ଓଡିଶା କଂଗ୍ରେସର ହରତାଳ ଅତ୍ୟନ୍ତ ହାସ୍ୟାସ୍ପଦ । ପଞ୍ଚାୟତ ନିର୍ବାଚନ ଯାଏଁ କଂଗ୍ରେସ ଓ ବିଜେପି ଏଭଳି ରାଜନୀତି କରୁଥିବେ । ଶସ୍ତା ରାଜନୀତି କରି ପୀଡିତାଙ୍କ ପରିବାରକୁ ଯନ୍ତ୍ରଣା ଦିଅନ୍ତୁ ନାହିଁ ବୋଲି ବିଜେଡି କହିଛି । କୁନ୍ଦୁଲି ଓ ଇତିଶ୍ରୀ ଘଟଣାରେ ମଧ୍ୟ ବିରୋଧୀ ଏଭଳି ରାଜନୀତି କରିଥିଲେ । ସତ ପଦାକୁ ଆସିଲା, ବିରୋଧୀଙ୍କୁ ରାଜ୍ୟବାସୀ ପ୍ରତ୍ୟାଖ୍ୟାନ କରିଥିଲେ । ରାଜ୍ୟବାସୀ ନବୀନ ପଟ୍ଟନାୟକଙ୍କ ସହ ଥିଲେ ଓ ରହିବେ । ହୀନ ରାଜନୀତିରୁ ଦୂରେଇ ରୁହନ୍ତୁ, ନଚେତ୍ ରାଜ୍ୟବାସୀ ସଂପୂର୍ଣ୍ଣ ପ୍ରତ୍ୟାଖ୍ୟାନ କରିବେ ବୋଲି ପ୍ରେସମିଟରେ ବିଜେଡି ପକ୍ଷରୁ କୁହାଯାଇଛି।

କରୋନା ବିପକ୍ଷରେ କୋଭାକ୍ସିନ ୭୭.୮ ପ୍ରତିଶତ ଫଳପ୍ରଦ: ଲାନସେଟ୍ ଅଧ୍ୟୟନ

ନୂଆଦିଲ୍ଲୀ: ବିଶ୍ୱ ସ୍ୱାସ୍ଥ୍ୟ ସଂଗଠନ ଜରୁରୀ କାଳୀନ ବ୍ୟବହାର ପାଇଁ ଅନୁମତି ଦେବା ପରେ ମେଡିକାଲ ଜର୍ନାଲ ଲାନସେଟ କହିଛି ଯେ ଭାରତରେ ପ୍ରସ୍ତୁତ ଟିକା କୋଭାକ୍ସିନ କୋଭିଡ-୧୯ ବିରୋଧରେ ୭୭.୮ ପ୍ରତିଶତ ପ୍ରଭାବଶାଳୀ । ଏହାର ପ୍ରାଥମିକ ବିଶ୍ଲେଷଣରେ କରୋନା ଭାଇରସର ବିପଦଜ୍ଜନକ ଡେଲଟା ଭ୍ୟାରିୟଣ୍ଟ ବିରୋଧରେ ଏହା ୬୫.୨ ପ୍ରତିଶତ ପ୍ରଭାବଶାଳୀ । କୋଭାକ୍ସିନର ତୃତୀୟ ପର୍ଯାୟ ନୈଦାନିକ ପରୀକ୍ଷଣ ପରେ ଏହାର ନିରାପତ୍ତା ଏବଂ ଫଳପ୍ରଦତା ଉପରେ ସଂଗୃହିତ ତଥ୍ୟାବଳୀ ସମୀକ୍ଷା କରାଯାଇ ତାହାକୁ ଲାନସେଟରେ ପ୍ରକାଶ କରାଯାଇଛି । ଦି ଲାନସେଟ ଶୁକ୍ରବାର ଉକ୍ତ ଅଧ୍ୟୟନରେ ପ୍ରକାଶିତ ହେବା ପରେ ଭାରତ ବାୟୋଟେକ ବିବୃତି ଦେଇ କହିଛି କି କୋଭିଡ-୧୯ ବିପକ୍ଷରେ କୋଭାକ୍ସିନ ଫଳପ୍ରଦ ହୋଇପାରେ ବୋଲି କରାଯାଇଥିବା ଅନୁଶଳୀନକୁ ଦି ଲାନସେଟ ପିୟର ରିଭ୍ୟୁ ସୁନିଶ୍ଚିତ କରିଛି । କୋଭାକ୍ସିନ ହେଉଛି ଏକମାତ୍ର ଟିକା ଯାହାକୁ ତୃତୀୟ ପର୍ଯ୍ୟାୟ ପରୀକ୍ଷଣ ବେଳେ ଡେଲଟା ଭ୍ୟାରିୟଣ୍ଟ ବିପକ୍ଷରେ ପ୍ରୟୋଗ କରାଯାଇଥିଲା । ଡେଲଟା ଭ୍ୟାରିୟଣ୍ଟ ବିପକ୍ଷରେ ଏହା ୬୫.୨ ପ୍ରତିଶତ ଫଳପ୍ରଦ ବୋଲି ଜଣାପଡ଼ିଛି । ୧୩୦ଟି କୋଭିଡ-୧୯ ସଂକ୍ରମଣ ମାମଲାରେ ଟିକାର ଫଳପ୍ରଦତା ବିଶ୍ଲେଷଣ କରାଯାଇଥିଲା ।

ଲାନସେଟ୍ ଦ୍ୱାରା ଜାରି ହୋଇଥିବା ବୟାନରେ କୁହାଯାଇଛି ଯେ, ନିଷ୍କ୍ରିୟ ଭାଇରସ୍ ଟେକନିକ୍ ବ୍ୟବହାର କରୁଥିବା କୋଭାକ୍ସିନର ଦୁଇ ଡୋଜ୍ ଦିଆଯିବାର ଦୁଇ ସପ୍ତାହ ପରେ ଏକ ଶକ୍ତିଶାଳୀ ଆଣ୍ଟିବଡି ପ୍ରକ୍ରିୟା ଆରମ୍ଭ ହୋଇଥାଏ । ପରୀକ୍ଷା ସମୟରେ ଟିକା ସହ ଜଡ଼ିତ ମୃତ୍ୟୁର ଗମ୍ଭୀର ଗୁରୁତର ମାମଲାର ରିପୋର୍ଟ ହୋଇନାହିଁ ବୋଲି ଏହି ପତ୍ରିକାରେ ଦର୍ଶାଯାଇଛି । ଭାରତରେ ନଭେମ୍ବର ୨୦୨୦ ରୁ ମେ ୨୦୨୧ ପର୍ଯ୍ୟନ୍ତ ଚାଲିଥିବା ଏହି ପରୀକ୍ଷଣରେ ୧୮-୯୭ ବୟସ ବର୍ଗରେ ୨୪ ହଜାର ୪୧୯ ଅଂଶଗ୍ରହଣ କରିଥିଲେ ।

ଭୁବନେଶ୍ୱର କ୍ଳବ ପରିସରରେ ମହାନ ସାହିତ୍ୟିକ ଦସ୍ତୋଭସ୍କିଙ୍କ ଦ୍ୱିଶତବାର୍ଷିକ ଜୟନ୍ତୀ ପାଳନ

ଭୁବନେଶ୍ୱର: ଭୁବନେଶ୍ୱର କ୍ଳବର ସାହିତ୍ୟିକ ଓ ସାଂସ୍କୃତିକ ସଂଗଠନ ସୁକୃତ୍‌ରେ ମଣିଷ ଇତିହାସର ଅନ୍ୟତମ ଶ୍ରେଷ୍ଠ ସାହିତ୍ୟକାର ଫିଓଡର ମିଖାଇଲୋଭିଚ୍ ଦସ୍ତୋଭସ୍କିଙ୍କ ଦ୍ୱିଶତବାର୍ଷିକ ଜୟନ୍ତୀ ୧୧.୧୧.୨୧ ତାରିଖରେ ପାଳିତ ହୋଇଯାଇଛି । ସାହିତ୍ୟକାର ହିସାବରେ ତାଙ୍କ ପ୍ରତିଷ୍ଠା ଏଭଳି ଯେ, କାଫ୍‌କା ଓ କାମ୍ୟୁସ୍‌ଙ୍କ ଭଳି ସ୍ଥିତିବାଦୀଙ୍କ ଠାରୁ ଆରମ୍ଭ କରି ବାସ୍ତବତାବାଦୀ ଲରେନ୍‌ସ୍ ଓ ହେମିଙ୍ଗୱେଙ୍କ ପର୍ଯ୍ୟନ୍ତ ଓ ଫ୍ରେଡେରିକ୍ ନୀଚାଙ୍କ ଭଳି ମହାନ୍ ଦାର୍ଶନିକ ଓ ଆଇନ୍‌ଷ୍ଟାଇନ୍‌ଙ୍କ ଭଳି ବିଖ୍ୟାତ ବୈଜ୍ଞାନିକ ତାଙ୍କୁ ଆପଣାର ଗୁରୁ ହିସାବରେ ଗ୍ରହଣ କରିଛନ୍ତି ।

ଆମ ସମୟର ନୋବେଲ୍ ବିଜେତା ଔପନ୍ୟାସିକ କୁଜିଏ ଓ ମନସ୍ତତ୍ତ୍ୱବିଦ୍‌ ଜୋର୍ଡାନ୍ ପିଟରସନ୍ ମଧ୍ୟ ତାଙ୍କୁ ପ୍ରେରଣାର ଉତ୍ସ ବୋଲି ମନେ କରିଛନ୍ତି । ପିକାସୋଙ୍କୁ ଯେପରି ଆଧୁନିକ ଚିତ୍ରକଳାର ଜନକ ବୋଲି ମନେ କରାଯାଇଥାଏ ଠିକ୍ ସେହିପରି ଦସ୍ତୋଭସ୍କିଙ୍କୁ ଆଧୁନିକ ଉପନ୍ୟାସ ସାହିତ୍ୟର ଜନକର ମାନ୍ୟତା ଦିଆଯାଇଥାଏ । ମଣିଷର ଚରିତ୍ର ସମ୍ପର୍କରେ ଗଭୀର ମନସ୍ତାତ୍ତ୍ୱିକ ଅନୁଶୀଳନ, ଜୀବନ ଓ ତହିଁରେ ମଣିଷର ସ୍ଥିତି ସଂପର୍କରେ ଦାର୍ଶନିକ ଅବବୋଧ ମାଧ୍ୟମରେ ସିଏ ଉପନ୍ୟାସ କଳାର ଏକ
ନୂତନ ଦିଗନ୍ତ ଉଦ୍‌ଭାବନ କରିଛନ୍ତି ।

କ୍ଳବ୍‌ର ଆମନ୍ତ୍ରଣ ରକ୍ଷାକରି ସର୍ବଶ୍ରୀ ହରପ୍ରସାଦ ଦାସ, ପ୍ରଫେସର ଯତୀନ୍ଦ୍ର କେ ନାୟକ, ପ୍ରଫେସର ଦୀପ୍ତି ପଟ୍ଟନାୟକ, ଶ୍ୟାମ ପ୍ରସାଦ ଚୌଧୁରୀ ଓ ସଂଗ୍ରାମ ଜେନାଙ୍କ ଭଳି ବିଶିଷ୍ଟ ସାହିତ୍ୟିକମାନେ ଦସ୍ତୋଭସ୍କିଙ୍କ ଉପନ୍ୟାସଗୁଡ଼ିକର ନିର୍ବାଚିତ ଅଂଶ କ୍ଳବ୍‌ର ମେମ୍ବର ଓ ଦସ୍ତୋଭସ୍କି ଆମୋଦୀ ସହରର ସୁଧୀମଣ୍ଡଳୀଙ୍କୁ ପଢ଼ି ଶୁଣାଇଥିଲେ ।

ପଶ୍ଚିମବଙ୍ଗ ନିର୍ବାଚନରେ ବିଜେପି ଖର୍ଚ୍ଚ କରିଛି ୧୫୧ କୋଟି

ନୂଆଦିଲ୍ଲୀ: ଚଳିତ ବର୍ଷ ଭାରତର ୫ଟି ରାଜ୍ୟରେ ବିଧାନସଭା ନିର୍ବାଚନ ଅଦୁଷ୍ଠିତ ହୋଇଥିଲା । ଏହି ସମସ୍ତ ରାଜ୍ୟରେ ଭାରତୀୟ ଜନତା ପାର୍ଟି ସମସ୍ତ ରାଜ୍ୟରେ ନିର୍ବାଚନ ଲଢ଼ିଥିଲା । ଭାରତୀୟ ଜନତା ପାର୍ଟି ଆସାମ, ପୁଡୁଚେରୀ, ତାମିଲନାଡୁ, ପଶ୍ଚିମବଙ୍ଗ ଓ କେରଳରେ ହୋଇଥିବା ବିଧାନସଭା ନିର୍ବାଚନରେ ୨୫୨ କୋଟି ଟଙ୍କା କରିଛି । ତେବେ ଏହି ୨୫୨ କୋଟି ମଧ୍ୟରୁ କେବଳ ପଶ୍ଚିମବଙ୍ଗରେ ଖାଲି ୬୦ ପ୍ରତିଶତ ଖର୍ଚ୍ଚ କରିଛି ।

ଭାରତୀୟ ଜନତା ପାର୍ଟି ନିର୍ବାଚନ ଆୟୋଗକୁ ନିର୍ବାଚନରେ ହୋଇଥିବା ଖର୍ଚ୍ଚର ସବିଶେଷ ବିବରଣୀ ପ୍ରଦାନ କରିଛି । ଦେଇଥିବା ବିବରଣୀ ଅନୁସାରେ ଏହି ୫ଟି ରାଜ୍ୟରେ ନିର୍ବାଚନରେ ଭାରତୀୟ ଜନତା ପାର୍ଟି ୨୫୨ କୋଟି ୨ଲକ୍ଷ ୭୧ ହଜାର ୭୫୩ ଟଙ୍କା ଖର୍ଚ୍ଚ କରିଛି । ଏହି ମୋଟ ଟଙ୍କାରୁ ୪୩.୮୧ କୋଟି ଟଙ୍କା ଆସାମ ନିର୍ବାଚନରେ ୪.୭୯ କୋଟି ପୁଡୁଚେରୀ ବିଧାନସଭା ନିର୍ବାଚନରେ ଖର୍ଚ୍ଚ କରିଛି । ତାମିଲନାଡୁ ଚଳିତ ନିର୍ବାଚନରେ ଡିଏମକେ ତା’ର ଚିର ପ୍ରତିଦ୍ବନ୍ଦୀ ଏଆଇଡିଏମକେଠାରୁ ସରକାର ଛଡାଇ ଆଣିଥିଲା । ବିଜେପି ତାମିଲନାଡୁରେ ନିର୍ବାଚନ ପ୍ରଚାର ପାଇଁ ୨୨.୯୭ କୋଟି ଖର୍ଚ୍ଚ କରିଥିଲା । କିନ୍ତୁ ସେଠାରେ ବିଜେପି ମାତ୍ର ୨.୬ ପ୍ରତିଶତ ଭୋଟ ପାଇଥିଲେ । କେରଳରେ ଏବେ ଏଲଡିଏଫ ସରକାରରେ ରହିଛି । ତେବେ କେରଳରେ ଭାରତୀୟ ଜନତା ପାର୍ଟି ୨୯.୨୪ କୋଟି ଟଙ୍କା ଖର୍ଚ୍ଚ କରିଥିଲା ।

ତେବେ ଚଳିତ ବର୍ଷ ବିଜେପି ପାଇଁ ଅଗ୍ନି ପରୀକ୍ଷା ଥିଲା । ସେଠାରେ ବିଜେପି ମମତା ବାନାର୍ଜୀଙ୍କ ତୃଣ ମୂଳ କଂଗ୍ରେସ ବିପକ୍ଷରେ ବିଜେପି ପୂରା ସମସ୍ତ ଶକ୍ତି ଲଗାଇଥିଲା । ସେଠାରେ ବିଜେପି ନିର୍ବାଚନ ପ୍ରଚାର ପାଇଁ ୧୫୧ କୋଟି ଟଙ୍କା ଖର୍ଚ୍ଚ କରିଥିଲା । ଯାହା ୫ଟି ରାଜ୍ୟରେ ବିଧାନସଭା ନିର୍ବାଚନର ଟଙ୍କା ଭିତରୁ ଅଧାରୁ ଅଧିକ ଟଙ୍କା । ଭାରତୀୟ ଜନତା ପାର୍ଟି ପଶ୍ଚିମବଙ୍ଗରେ ୨୦୦ରୁ ଅଧିକ ସିଟ୍ ଜିତିବ ବୋଲି ଲକ୍ଷ୍ୟ ରଖିଥିଲା । କିନ୍ତୁ ପଶ୍ଚିମବଙ୍ଗରେ ମାତ୍ର ୭୭ଟି ସିଟ୍‌ ଜିତିଥିଲା ।  ତେବେ ତୃଣମୂଳ କଂଗ୍ରେସ ପଶ୍ଚିମବଙ୍ଗରେ ଭାରତୀୟ ଜନତା ପାର୍ଟିଠାରୁ ଅଧିକ ଟଙ୍କା ଖର୍ଚ୍ଚ କରିଥିଲା । ନିର୍ବାଚନ ଆୟୋଗକୁ ଦେଇଥିବା ବିବରଣୀରେ ତୃଣମୂଳ କଂଗ୍ରେସ ଦେଇଥିବା ବିବରଣୀ ଅନୁସାରେ ୧୫୪.୨୮ କୋଟି ଟଙ୍କା ଖର୍ଚ୍ଚ କରିଥିଲା । ଯାହା ବିଜେପି ଖର୍ଚ୍ଚରୁ ଅଧିକ ଥିଲା ।

ମୁମ୍ବାଇ ଡ୍ରଗ୍ସ ମାମଲା: ଏନସିବିର ଭିଜିଲାନ୍ସ ଟିମକୁ ତଦନ୍ତରେ ସହଯୋଗ କରୁନି ମୁମ୍ବାଇ ପୋଲିସ୍

ମୁମ୍ବାଇ: ଏନସିବିର ଜୋନାଲ ନିର୍ଦ୍ଦେଶକ ସମୀର ଓ୍ୱାଙ୍ଖଡେଙ୍କ ବିରୋଧରେ ତଦନ୍ତ ଲାଗି ସହଯୋଗ କରାଯାଉନାହିଁ । ଆର୍ଯ୍ୟନ ଖାନଙ୍କ ଗିରଫଦାରୀ ମାମଲାରେ ମୁଖ୍ୟ ସାକ୍ଷୀ କିରଣ ଗୋସାଭିଙ୍କୁ ଜେରା ଲାଗି ସୁଯୋଗ ଦିଆଯାଉ ନଥିବାବେଳେ ଏନେଇ ମୁମ୍ବାଇ ପୋଲିସ ବି ସହଯୋଗ କରୁନାହିଁ । ଫଳରେ ଓ୍ୱାଙ୍ଖଡେଙ୍କ ବିରୋଧରେ ଏନସିବିର ଭିଜିଲାନ୍ସ ତଦନ୍ତକାରୀ ଟିମ୍ ସମସ୍ୟାର ସମ୍ମୁଖୀନ ହୋଇଛି । ଗୋସାଭିଙ୍କ ବଡିଗାର୍ଡ ପ୍ରଭାକର ସାଇଲ ଅଭିଯୋଗ କରିଥିଲେ ଯେ, ଆର୍ଯ୍ୟନଙ୍କ ମୁକ୍ତି ଲାଗି ୨୫ କୋଟି ଟଙ୍କାର ଡିଲ୍ ନେଇ ଗୋସାଭି ଆଲୋଚନା କରିଥିଲେ । ଏହି ଟଙ୍କାରୁ ୮ କୋଟି ଟଙ୍କା ଓ୍ୱାଙ୍ଖଡେଙ୍କୁ ଦେବା ବିଷୟରେ ଗୋସାଭି କଥା ହୋଇଥିବା ସେ ଶୁଣିଥିଲେ । ପ୍ରଭାକରଙ୍କ ଏହି ବୟାନ ଚାଞ୍ଚଲ୍ୟ ସୃଷ୍ଟି କରିଥିଲା ଏବଂ ଗୋସାଭିଙ୍କ ଭୂମିକାକୁ ନେଇ ସନ୍ଦେହ ପ୍ରକାଶ ପାଇଥିଲା ।

ପୁଣେରୁ ଗିରଫ ହୋଇଥିବା ଗୋସାଭିଙ୍କୁ ଜେରା କରିବା ଲାଗି ଭିଜିଲାନ୍ସ ଟିମ୍ ବାରମ୍ବାର ଉଦ୍ୟମ କରୁଥିଲେ ବି ଏହା କରାଇ ଦିଆଯାଉନାହିଁ । ଏନସିବିର ଭିଜିଲାନ୍ସ ଟିମର ବିଭିନ୍ନ ଅନୁରୋଧକୁ ମୁମ୍ବାଇ ପୋଲିସ ଗ୍ରହଣ କରୁନାହିଁ । ଏପରିକି ସିସିଟିଭି ଫୁଟେଜକୁ ହସ୍ତାନ୍ତର ମଧ୍ୟ କରାଯାଉନାହିଁ । ଗତ ସୋମବାର ଏନସିବିର ଉପମହାନିର୍ଦ୍ଦେଶକ ଜ୍ଞାନେଶ୍ୱର ସିଂହଙ୍କ ନେତୃତ୍ବରେ ଏକ ଉଚ୍ଚସ୍ତରୀୟ ଭିଜିଲାନ୍ସ ଟିମ୍ ମୁମ୍ବାଇ ଆସିଥିଲେ । ମାତ୍ର ବର୍ତ୍ତମାନ ସୁଦ୍ଧା ତଦନ୍ତ ପ୍ରକ୍ରିୟାରେ ବିଶେଷ ଅଗ୍ରଗତି ହୋଇପାରିନାହିଁ । ଏହି ଟିମକୁ ବିଶେଷ ତଥ୍ୟ ଦିଆଯାଉ ନଥିବାବେଳେ ପ୍ରଥମେ ଅନଲାଇନ ସାଇଟ ଗୁଡିକରେ ଖବର ଦିଆଯାଉଛି ବୋଲି ଟିମ୍ ଅଭିଯୋଗ କରିଛି । ସେପଟେ ଜାଲ୍ ଜାତିଗତ ପ୍ରମାଣପତ୍ର ପ୍ରସଙ୍ଗରେ ମୁମ୍ବାଇ ପୋଲିସ ସମୀର ଓ୍ୱାଙ୍ଖଡେଙ୍କୁ ଜେରା କରିଛି । ମୁମ୍ବାଇ ପୋଲିସର ଜଣେ ସହକାରୀ କମିଶନରଙ୍କ ନିକଟରେ ସେ ନିଜର ସମସ୍ତ ଦସ୍ତାବିଜ ଦାଖଲ କରିଛନ୍ତି ।