ନନ୍ଦିଘୋଷ ବ୍ୟୁରୋ: ଆଜିଠୁ ଭାରତ ଗସ୍ତରେ ଆସୁଛନ୍ତି ବ୍ରିଟେନର ଯୁବରାଜ ପ୍ରିନ୍ସ ୱିଲିୟମ୍ ଓ ପ୍ରିନ୍ସେସ୍ କେଟ୍ ମିଡଲଟନ୍। ଉଭୟେ ତିନି ଦିନିଆ ଗସ୍ତରେ ଆସୁଛନ୍ତି। ଆଜି ମୁମ୍ଵାଇରେ ପହଞ୍ଚିବେ। ମୁମ୍ବାଇରେ ହେବାକୁ ଥିବା ବିଶ୍ୱର ପ୍ରତିଷ୍ଠିତ ପରିବେଶ ପୁରସ୍କାର ‘ଆର୍ଥସଟ୍ ପ୍ରାଇଜ୍’ ସମାରୋହରେ ଯୋଗ ଦେବେ ରାଜଦମ୍ପତ୍ତି। ପ୍ରିନ୍ସ ୱିଲିୟମ୍ ନଭେମ୍ବର ୧୬ରୁ ୧୮ ତାରିଖ ଯାଏଁ ମୁମ୍ବାଇରେ ରହିବେ। କର୍କଟ ରୋଗର ଚିକିତ୍ସା ଓ ସୁସ୍ଥ ହେବା ପରେ ଏହା ଉଭୟଙ୍କ ପ୍ରଥମ ମିଳିତ ବିଦେଶ ଗସ୍ତ ହେବ। ଏହା ପୂର୍ବରୁ ୨୦୧୬ରେ ଉଭୟ ଏକାଠି ଭାରତ ଗସ୍ତରେ ଆସିଥିଲେ। ଦୀର୍ଘ ୧୦ ବର୍ଷ ପରେ ପୁଣି ଥରେ ଏହି ରାଜ ଦମ୍ପତି ଭାରତ ଆସୁଛନ୍ତି। ପାଞ୍ଚଟି ବର୍ଗରେ ମୋଟ ୧୫ ଜଣ ଫାଇନାଲିଷ୍ଟଙ୍କୁ ଏହି ପୁରସ୍କାର ପାଇଁ ଚୟନ କରାଯାଇଛି। ସେଗୁଡ଼ିକ ହେଲା ପ୍ରକୃତିର ସୁରକ୍ଷା ଓ ପୁନରୁଦ୍ଧାର, ବାୟୁ ପ୍ରଦୂଷଣ ନିୟନ୍ତ୍ରଣ, ସମୁଦ୍ରର ପୁନରୁଦ୍ଧାର, ବର୍ଜ୍ୟମୁକ୍ତ ବିଶ୍ୱ ନିର୍ମାଣ ଏବଂ ଜଳବାୟୁ ପରିବର୍ତ୍ତନର ସମାଧାନ। ପ୍ରତ୍ୟେକ ବର୍ଗରୁ ଜଣେ ଲେଖାଏଁ ମୋଟ ପାଞ୍ଚ ଜଣ ବିଜେତାଙ୍କ ନାମ ଘୋଷଣା କରାଯିବ।
ବ୍ରିଟିଶ୍ ସଙ୍ଗୀତ ବ୍ୟାଣ୍ଡ ‘ଟେକ୍ ଦ୍ୟାଟ୍’ ପ୍ରଥମଥର ପାଇଁ ଭାରତରେ ପ୍ରଦର୍ଶନ କରିବ। ପରିବେଶ ସୁରକ୍ଷା, ସ୍ୱଚ୍ଛ ଶକ୍ତି, ନୂତନ ଜ୍ଞାନକୌଶଳ, ବର୍ଜ୍ୟବସ୍ତୁ ହ୍ରାସ ଏବଂ ପ୍ରକୃତିର ପୁନରୁଦ୍ଧାର କ୍ଷେତ୍ରରେ ବିଶ୍ୱସ୍ତରୀୟ ଉଦ୍ଭାବନକୁ ପ୍ରୋତ୍ସାହନ ଦେବା ଏହି ପୁରସ୍କାରର ମୁଖ୍ୟ ଉଦ୍ଦେଶ୍ୟ। ଭାରତରେ ପ୍ରଥମଥର ପାଇଁ ଏହି ସମାରୋହ ଆୟୋଜିତ ହେଉଛି। ଆର୍ଥସଟ୍ ଫାଇନାଲିଷ୍ଟ ଓ ବିଜେତାଙ୍କ ମଧ୍ୟରୁ ଅନ୍ୟ ଯେକୌଣସି ଦେଶ ତୁଳନାରେ ଭାରତରୁ ସର୍ବାଧିକ ପ୍ରତିନିଧିତ୍ୱ ରହିଛି। ଚଳିତ ବର୍ଷ ଭାରତରୁ ମହିଳା ହାଉସିଂ ଟ୍ରଷ୍ଟ ଏବଂ ମହିନ୍ଦ୍ରା ଲାଷ୍ଟ ମାଇଲ୍ ମୋବିଲିଟି ଫାଇନାଲିଷ୍ଟ ଭାବେ ମନୋନୀତ ହୋଇଛନ୍ତି। ପ୍ରିନ୍ସ ୱିଲିୟମ୍ ୨୦୨୦ରେ ଏହି ପୁରସ୍କାରର ଶୁଭାରମ୍ଭ କରିଥିଲେ। ଏହା ପ୍ରଥମେ ରୟାଲ୍ ଫାଉଣ୍ଡେସନ୍ ଅଧୀନରେ କାର୍ଯ୍ୟ କରୁଥିଲା ଏବଂ ପରେ ଏକ ସ୍ୱାଧୀନ ସଂଗଠନରେ ପରିଣତ ହୋଇଥିଲା। ଆଗାମୀ ଏକ ଦଶନ୍ଧି ମଧ୍ୟରେ ପୃଥିବୀକୁ ପରିବେଶଗତ ବିପଦରୁ ସୁରକ୍ଷା ଦେବା ଏବଂ ନୂତନ ସମାଧାନ ଖୋଜିବା ଏହାର ମୁଖ୍ୟ ଲକ୍ଷ୍ୟ।

