ଶ୍ରୀନଗର: ଜାମ୍ମୁ-କାଶ୍ମୀରରେ ଗତ କିଛି ଦିନ ଧରି ଲାଗି ରହିଛି ଅଶାନ୍ତି। ଆତଙ୍କବାଦୀମାନେ କେତେବେଳେ ଅନୁପ୍ରବେଶ କରିବା ପାଇଁ ଉଦ୍ୟମ କରୁଛନ୍ତି ତ ଆଉ କେତେବେଳେ ଅଶାନ୍ତି ସୃଷ୍ଟି କରୁଛନ୍ତି। ସାଧାରଣ ଲୋକଙ୍କୁ ଟାର୍ଗେଟ୍ କରୁଛନ୍ତି ଆତଙ୍କବାଦୀ। ଯାହାକୁ ନେଇ ଏବେ ଆକସନ୍ ମୋଡକୁ ଆସିଛନ୍ତି ଭାରତୀୟ ସେନା। ସୁରକ୍ଷାବଳର କଡା କାର୍ଯ୍ୟାନୁଷ୍ଠାନ ଫଳରେ ଗତ ସପ୍ତାହ ମଧ୍ୟରେ ଜାମ୍ମୁ-କାଶ୍ମୀରରେ ୯ ଜଣ ଆତଙ୍କବାଦୀଙ୍କୁ ଏନକାଉଣ୍ଟର କରାଯାଇଛି। ପ୍ରାଣ ହରାଇଥିବା ଏହି ୯ ଆତଙ୍କବାଦୀ ବିଭିନ୍ନ ଆତଙ୍କବାଦୀ ସଙ୍ଗଠନର ଟପ୍ ପୋଷ୍ଟରେ ଥିଲେ।

ହିଜୁବୁଲ୍ ମୁଜାହାଦ୍ଦିନ୍, ଜୈସ-ଇ-ମହମ୍ମଦ ଓ ଲକ୍ସର ଇ ତୋଇବା ଭଳି ଆତଙ୍କବାଦୀ ସଙ୍ଗଠନ ସହ ଯୋଡି ହୋଇଥିଲେ ଏହି ଆତଙ୍କବାଦୀମାନେ। ପଡୋଶୀ ରାଷ୍ଟ୍ର ପାକିସ୍ତାନ ଆତଙ୍କବାଦୀଙ୍କୁ ଲଗାତାର ଭାବେ ପ୍ରୋତ୍ସାହିତ କରୁଥିବାରୁ ସୀମାରେ ଏଭଳି ପରିସ୍ଥିତି ସୃଷ୍ଟି ହୋଇଥିବା କହିଛନ୍ତି ପୂର୍ବତନ ସେନା ଅଧିକାରୀ। ପାକିସ୍ତାନର ଏଭଳି କାର୍ଯ୍ୟକୁ କଡା ଭାଷାରେ ନିନ୍ଦା କରିଛନ୍ତି କେନ୍ଦ୍ରମନ୍ତ୍ରୀ ହରଦିପ ସିଂ ପୁରୀ।

ନୂଆଦିଲ୍ଲୀ: ଆସିଲା ନୂଆ ଗର୍ଭପାତ ନିୟମ। କେତେକ ବର୍ଗର ମହିଳାଙ୍କ ପାଇଁ ଗର୍ଭପାତ ଅବଧି ଗର୍ଭଧାରଣର ୨୦ରୁ ୨୪ ସପ୍ତାହକୁ ବୃଦ୍ଧି କରାଯାଇଛି। ମେଡିକାଲ ଟର୍ମିନେସନ ଅଫ ପ୍ରେଗନେନ୍ସି ସଂଶୋଧନ ନିୟମାବଳୀ ୨୦୨୧ ଅନୁସାରେ ଯେଉଁମାନେ ଯୌନ ହିଂସାର ଶିକାର ବା ଦୁଷ୍କର୍ମ ପୀଡ଼ିତା ହୋଇଥିବେ, ସେମାନଙ୍କ କ୍ଷେତ୍ରରେ ଏହି ନିୟମ ଲାଗୁହେବ। ଏହାସହ ନାବାଳିକା, ବିଧବା ଓ ଛାଡପତ୍ର ପାଇଥିବା ମହିଳା ଓ ଦିବ୍ୟାଙ୍ଗ ମହିଳାଙ୍କ କ୍ଷେତ୍ରରେ ବି ଏହା ପ୍ରଯୁଜ୍ୟ ହେବ। ସେହିପରି ମାନସିକ ବିକାରଗ୍ରସ୍ତ ମହିଳା, ମାନସିକ ବା ଶାରୀରିକ ତ୍ରୁଟିଯୁକ୍ତ ଭ୍ରୂଣ, ସରକାରଙ୍କ ଦ୍ୱାରା ଘୋଷିତ ବିପର୍ଯ୍ୟୟ ବା ଜରୁରୀକାଳୀନ ଅବସ୍ଥାରେ ଥିବା ମହିଳା ବି ୨୪ ସପ୍ତାହ ମଧ୍ୟରେ ଗର୍ଭପାତ କରିପାରିବେ।

ଚଳିତ ବର୍ଷ ସଂସଦରେ ଗୃହିତ ନିୟମ ବର୍ତ୍ତମାନ କାର୍ଯ୍ୟକାରୀ ହୋଇଛି। ପ୍ରଚଳିତ ନିୟମ ଅନୁସାରେ ଯଦି ଜଣେ ମହିଳା ଗର୍ଭଧାରଣର ୧୨ ସପ୍ତାହ ମଧ୍ୟରେ ଗର୍ଭପାତ କରିବାକୁ ଚାହୁଁଥିବେ, ତେବେ ସେମାନଙ୍କୁ ଜଣେ ଡାକ୍ତରଙ୍କ ଅନୁମତି ଆଣିବାକୁ ପଡୁଛି। ଯଦି ଜଣେ ମହିଳା ଗର୍ଭଧାରଣର ୧୨ରୁ ୨୦ ସପ୍ତାହ ମଧ୍ୟରେ ଗର୍ଭପାତ କରିବାକୁ ଚାହୁଁଥିବେ, ତେବେ ୨ ଜଣ ଡାକ୍ତରଙ୍କ ଅନୁମତି ଆଣିବାକୁ ପଡୁଛି । ନୂଆ ନିୟମ ଅନୁସାରେ, ଗର୍ଭଧାରଣର ୨୪ ସପ୍ତାହ ମଧ୍ୟରେ ଗର୍ଭପାତ କରିବା କ୍ଷେତ୍ରରେ ରାଜ୍ୟସ୍ତରୀୟ ମେଡିକାଲ ବୋର୍ଡ ଅନୁମତି ଦେବେ।

ଗର୍ଭପାତ ସଂକ୍ରାନ୍ତ ସମସ୍ତ ତଥ୍ୟ ଓ ରିପୋର୍ଟକୁ ସମୀକ୍ଷା କରିବା ପରେ ମେଡିକାଲ ବୋର୍ଡ ଏହାକୁ ଅନୁମତି ଦେବେ ବା ଅଗ୍ରାହ୍ୟ କରିପାରିବେ। ନିଷ୍ପତ୍ତି ଲାଗି ବୋର୍ଡ ୫ ଦିନ ସମୟ ନେବେ। ଯଦି ଗର୍ଭପାତକୁ ଅନୁମତି ଦିଆଯାଏ, ତେବେ ସମସ୍ତ ସତର୍କତା ରକ୍ଷା ଉପରେ ବୋର୍ଡ ଗୁରୁତ୍ୱ ଦେବ। ଏହି ନୂଆ ନିୟମକୁ ସ୍ୱାଗତ କରିଛନ୍ତି ପପୁଲେସନ ଫାଉଣ୍ଡେସନ ଅଫ ଇଣ୍ଡିଆର କାର୍ଯ୍ୟନିର୍ବାହୀ ନିର୍ଦ୍ଦେଶକ ପୁନମ ମୁଟ୍ରେଜା। ସେହିପରି ଏହି ନିୟମକୁ ଅନ୍ୟାନ୍ୟ ବିଶେଷଜ୍ଞ ବି ସ୍ୱାଗତ କରିଛନ୍ତି।

ନୂଆଦିଲ୍ଲୀ: ସୁକେଶ ଚନ୍ଦ୍ରଶେଖର ହାୱାଲା କାରବାରରେ ବଲିଉଡର ଅନେକ ସେଲିବ୍ରିଟି ଫସିବାରେ ଲାଗିଛନ୍ତି। ଅଭିନେତ୍ରୀ ଜ୍ୟାକଲିନ୍ ଫର୍ଣ୍ଣାଡିସଙ୍କ ପରେ ଏବେ ଏହି ମାମଲାରେ ନୋରା ଫତେହିଙ୍କୁ ଜେରା କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)।

ED ଅଫିସରେ ନୋରା ଫତେହି

ମିଳୁଥିବା ସୂଚନା ଅନୁସାରେ ନୋରା ଗୁରୁବାର ଦିନ ଇଡି ଅଫିସରେ ପହଂଚିଛନ୍ତି। ନୋରାଙ୍କୁ ଏହି ମାମଲାରେ ପଚରା ଉଚରା ପାଇଁ ଇଡି ନୋଟିସ ଜାରି କରିଥିଲା। ନୋରାଙ୍କୁ ଇଡି ମନି ଲଣ୍ଡ୍ରିଂ ନେଇ ପଚରା ଉଚୁରା କରିବ। କୁହାଯାଉଛି ଯେ, ସୁକେଶ ଚନ୍ଦ୍ରଶେଖର ହାୱାଲା ମାମଲାରେ ଜ୍ୟାକଲିନଙ୍କୁ ଫସାଇବାକୁ ଉଦ୍ୟମ କରିଥିଲା। ଏନେଇ ଆଗରୁ ଜ୍ୟାକଲିନଙ୍କୁ ଇଡି ଜେରା କରି ସାରିଛି।

ନୋରାଙ୍କୁ ପଚରା ଉଚରା ଚାଲିଥିବା ବେଳେ ଆସନ୍ତାକାଲି (ଶୁକ୍ରବାର) ଦିନ ଜ୍ୟାକଲିନଙ୍କୁ ପୁଣିଥରେ ଜେରା କରିବା ଇଡି। ଏମଟିଏନଏଲ ସ୍ଥିତ ଇଡି ଅଫିସରେ ଶୁକ୍ରବାର ହାଜର ହେବାକୁ ଜ୍ୟାକଲିନଙ୍କୁ କୁହାଯାଇଛି।

PMLA ଆକ୍ଟ ଅନ୍ତର୍ଗତରେ ଜ୍ୟାକଲିନଙ୍କୁ ପଚରା ଉଚରା କରାଯିବ ବୋଲି ଇଡି ସୂତ୍ରରୁ ପ୍ରକାଶ। ତଦନ୍ତ ଏଜେନ୍ସି ଏହା ଜାଣିବାକୁ ଚାହୁଁଛନ୍ତି ଯେ, ସୁକେଶଙ୍କ ସହିତ ଜ୍ୟାକଲିନ୍ କେଉଁଭଳି ଭାବେ ଅର୍ଥ କାରବାର କରିଥିଲେ କି କୌଣସି ଅର୍ଥ କାରବାର ହୋଇଥିଲା କି ନାହିଁ।

ପୁରା ମାମଲା କ’ଣ ?

ଏହି ମାମଲା ଆରମ୍ଭ ୨ଶହ କୋଟି ଟଙ୍କାର ଦାଦାବଟି ଆଦୟ ତଦନ୍ତରୁ ହୋଇଥିଲା। ଜେଲରେ ଥିବା ସୁକେଶ ଜଣେ ବ୍ୟବସାୟୀଙ୍କ ପତ୍ନୀଙ୍କଠାରୁ ୨ ଶହ କୋଟି ଟଙ୍କା ଆଦାୟ କରିଥିଲା। ପରେ ଏହି ମାମଲାରେ ସୁକେଶର ପତ୍ନୀଙ୍କ ହାତ ଥିବା ଜଣା ପଡିଥିଲା।ସୁକେଶର ପତ୍ନୀ ଲିନା ପାଲ ସହଯୋଗରେ ଫୋର୍ଟିସର ପୂର୍ବତନ ମାଲିକ ଶିବିନ୍ଦର ମୋହନ ସିଂହଙ୍କ ପତ୍ନୀ ଆଦିତି ସିଂହଙ୍କୁ ୨ ଶହ କୋଟି ଟଙ୍କା ଠକିଥିଲା।

ପରେ ଏହି ମନି ଲଣ୍ଡ୍ରିଂ ମାମଲାରେ ଜ୍ୟାକଲିନଙ୍କ ନାମ ଆସିଥିଲା। ଜ୍ୟାକଲିନଙ୍କୁ ମଧ୍ୟ ସୁକେଶ ଫସାଇଥିବା ଜଣା ପଡିଥିଲା। ସୁକେଶ ଜେଲ ଭିତରୁ ଛଦ୍ମ ନାମରେ ଜ୍ୟାକଲିନଙ୍କୁ ଫୋନ୍ କରୁଥିବା ଜଣା ପଡିଥିଲା।