ନନ୍ଦିଘୋଷ ବ୍ୟୁରୋ: ବନ୍ଧା ପଡ଼ିଛି ଭତ୍ତା କାର୍ଡ । ଅର୍ଥ ଅଭାବରୁ ବନ୍ଧକ ଏକମାତ୍ର ସାହାରା । ବିଧବା ଭତ୍ତା କାର୍ଡ ଦେଇ ଆଣିଥିଲେ ୧୦ ହଜାର । ଏବେ ନା ମିଳୁଛି କାର୍ଡ ନା ମିଳୁଛି ଟଙ୍କା । ପାଞ୍ଚ ବର୍ଷ ତଳେ ସ୍ୱାମୀଙ୍କ ମୃତ୍ୟୁ ପରେ ତିନୋଟି ପୁଅ ଓ ଝିଅଙ୍କୁ ନେଇ ତାଙ୍କ ସଂସାର । ପରିବାର ଚଳାଇବାର ଏକମାତ୍ର ସାହାରା ଥିଲା ବିଧବା ଭତ୍ତା । ହେଲେ ଆର୍ଥିକ ଅନଟନ ଯୋଗୁଁ ଗାଁର ଜଣେ ମହିଳାଙ୍କ ନିକଟରେ ୧୦ ହଜାରରେ ନିଜ ଭତ୍ତା କାର୍ଡ ବନ୍ଧକ ରଖିଥିଲେ। ହେଲେ ତାଙ୍କ ଭତ୍ତା କାର୍ଡରୁ ଟଙ୍କା ଉଠାଣ ହେଉଥିବା ସେ ଅଭିଯୋଗ ଆଣିଛନ୍ତି । ୧୮ ମାସରେ ୧୮ ହଜାର ଟଙ୍କା ଉଠାଯାଇଛି। ଯାହା ତାଙ୍କ ବନ୍ଧକ ଟଙ୍କା ଠାରୁ ଅଧିକ। ତଥାପି ଏ ଯାଏଁ ତାଙ୍କୁ କାର୍ଡ ମିଳୁନି। ଯେଉଁ ମହିଳାଙ୍କ ନିକଟରେ କାର୍ଡ ବନ୍ଧକ ରଖିଥିଲେ, ତାଙ୍କ ମୃତ୍ୟୁ ପରେ ଏବେ ତାଙ୍କ ସମ୍ପର୍କୀୟମାନେ କାର୍ଡରୁ ଟଙ୍କା ଉଠାଉଥିବା କନକ ଅଭିଯୋଗ କରିଛନ୍ତି।
କାର୍ଡ ବନ୍ଧକ ରଖିଥିବା ମହିଳାଙ୍କ ମୃତ୍ୟୁ ପରେ ତାଙ୍କ ପରିବାର ଲୋକେ ଭତ୍ତା ଟଙ୍କା ଉଠାଉଥିଲେ ବୋଲି ମୈଦଲପୁର ସରପଞ୍ଚ କହିଛନ୍ତି। ତେବେ ଗତ ଅକ୍ଟୋବର ମାସରେ କାର୍ଡକୁ ଜବତ କରାଯାଇଥିବା ସହ ସେହି ମାସର ଭତ୍ତା ଟଙ୍କା ରଖାଯାଇଥିବା ସେ କହିଛନ୍ତି। ଏଠି ପ୍ରଶ୍ନ ଉଠୁଛି, ହିତାଧିକାରୀଙ୍କ ଅନୁପସ୍ଥିତିରେ ଟଙ୍କା ଉଠିଲା କିଭଳି ? ପରିଚୟ ଓ ଉପସ୍ଥିତି ଯାଞ୍ଚ ନକରି କେମିତି ଦିଆଗଲା ଟଙ୍କା ? ୧୮ ମାସ ଧରି କିଏ ଭତ୍ତା ଟଙ୍କା ଉଠାଉଥିଲା ? ଯଦି ସରପଞ୍ଚ ଜାଣିଥିଲେ, ତେବେ ଆଗରୁ କାର୍ଡ ଜବତ କରାଗଲା ନାହିଁ କାହିଁକି ? ସେପଟେ ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଥିବା ବିଡ଼ିଓ କହିଛନ୍ତି ।
