ଭୁବନେଶ୍ୱର: ବହୁ ଚର୍ଚ୍ଚିତ ଭୁବନେଶ୍ୱର ମନୀଷ ଅନୁରାଗ ହତ୍ୟା ମାମଲା। ଆଜି ସରୁଛି ଗିରଫ ହୋଇଥିବା ୩ ଅଭିଯୁକ୍ତଙ୍କ ୪ ଦିନିଆ ରିମାଣ୍ଡର ଅବଧି। ରିମାଣ୍ଡରେ ୩ ଅଭିଯୁକ୍ତଙ୍କୁ ଜେରା କରୁଛି ପୋଲିସ। ମନୀଷଙ୍କୁ କେମିତି ହତ୍ୟା କଲେ ? କିଏ ପ୍ରଥମେ ମନୀଷକୁ ମାରିଲା ? ପୋଖରୀ ପାଖକୁ ମନୀଷକୁ ନେଇ ଗଲେ କେମିତି ? ମନୀଷଙ୍କ ମୋବାଇଲ ଏବେ କେଉଁଠି ? ଏ ସମସ୍ତ ଦିଗକୁ ନେଇ ଖୋଳତାଡ କରୁଛି ପୋଲିସ। ହେଲେ ଏବେ ବି ମନୀଷଙ୍କ ମୋବାଇଲ୍ ପାଖରେ ପହଞ୍ଚି ପାରିନି ପୋଲିସ। ପୋଖରୀ ଭିତରେ ମୋବାଇଲ୍ ପଡିଥିବା ସନ୍ଦେହ କରାଯାଉଛି। ପଟିଆରୁ ପାତ୍ରପଡା ଅଭିଯୁକ୍ତମାନେ ଯେଉଁ ସ୍ଥାନକୁ ଯାଇଥିଲେ, ସେ ସମସ୍ତ ସ୍ଥାନକୁ ଯାଇ ପ୍ରମାଣ ଯୋଗାଡ କରିଛି ପୋଲିସ। ଗତ ୯ ତାରିଖରେ ୩ଟି ବାରକୁ ଯାଇଥିଲେ ମନୀଷ, ଅମ୍ରିତ, ମୃତ୍ୟୁଞ୍ଜୟ ଓ ଦିନେଶ। ବାରରେ ୬୭ ହଜାର ଟଙ୍କା ଖର୍ଚ୍ଚ କରିଥିବା ଜେରା ବେଳେ ମାନିଛନ୍ତି ଅଭିଯୁକ୍ତ। ଗିରଫ ପୂର୍ବରୁ ବୟାନ ଏବେର ବୟାନକୁ ନେଇ ତଜର୍ମା କରୁଛି ପୋଲିସ। କୋର୍ଟରେ ହାଜର କରିବା ପୂର୍ବରୁ ପ୍ରମାଣ ଯୋଗାଡ କରିବାରେ ଲାଗିଛି ପୋଲିସ। ତେବେ ଆଜି କୋର୍ଟରେ ପୋଲିସ୍‌ ଆଉଥରେ ରିମାଣ୍ଡ ପାଇଁ ଆବେଦନ କରିପାରେ।

ଭବନେଶ୍ୱର: ଥଣ୍ଡାର ଆଗମନ ସହ ଦୁର୍ବଳ ହେଲା ଲଘୁଚାପ। ଆଜିଠୁ ରାଜ୍ୟରେ ଶୁଖିଲା ରହିବ ପାଗ। ରାଜଧାନୀରେ ଝାପ୍ସା କୁହୁଡ଼ି ସ୍ୱାଗତ କରିଛି ଧିମା ଧିମା ଥଣ୍ଡାକୁ। ଗତ ରାତିରେ ରାଜଧାନୀରେ କିଛି ମାତ୍ରାରେ କୁହୁଡ଼ିର ବଳୟ ଦେଖିବାକୁ ମିଳିଥିଲା। ଯାହା ଆଜି ସକାଳ ପର୍ଯ୍ୟନ୍ତ ମଧ୍ୟ କୁହୁଡ଼ିର ପ୍ରଭାବ ରହିଥିଲା। ଆଗକୁ ଅଧିକ ଶୀତ ପଡ଼ିବ ବୋଲି ମଧ୍ୟ ସୂଚନା ଦେଇଛି ପାଣିପାଗ ବିଭାଗ। ସେପଟେ ଫେରିଯାଉଛି ଦକ୍ଷିଣ ପଶ୍ଚିମ ମୌସୁମୀ ବାୟୁ। ଏହା ସହିତ ଲଘୁଚାପ ଦୁର୍ବଳ ହେବା ପରେ ଲାଗିରହିଥିବା ବର୍ଷାରେ ବିରାମ ଲାଗିଛି। ଆଜିଠୁ ରାଜ୍ୟରେ ଶୁଖିଲା ପାଗ ଦେଖାଦେଇଛି।

ତେବେ ଦକ୍ଷିଣ ଓ ଆଭ୍ୟନ୍ତରୀଣ ଓଡ଼ିଶାର କିଛି ଜିଲ୍ଲାରେ ଘଡଘଡି ବିଜୁଳି ସହ ବର୍ଷା ହେବାର ସମ୍ଭାବନା ରହିଛି। କିନ୍ତୁ କୌଣସି ଜିଲ୍ଲାକୁ ସତର୍କତା ଜାରି କରାଯାଇ ନାହିଁ। ସେପଟେ ଆସନ୍ତା ୨୩ ତାରିଖ ମଧ୍ୟରେ ସଂପୂର୍ଣ୍ଣ ଓଡ଼ିଶାରୁ ମୌସୁମୀ ପ୍ରତ୍ୟାବର୍ତ୍ତନ କରିବ। ବର୍ତ୍ତମାନ ମୌସୁମୀର ପ୍ରତ୍ୟାବର୍ତ୍ତନ ଏବଂ ଲଘୁଚାପ ଦୁର୍ବଳ ହେଉଥିବା ବେଳେ ଆସନ୍ତା ୨୫ ତାରିଖ ପରେ ରାଜ୍ୟରେ ଶୀତ ଅନୁଭୁତ ହେବ ବୋଲି ଆକଳନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ନଭେମ୍ବର ମାସ ପହିଲାରୁ ସଂପୂର୍ଣ୍ଣ ଭାରେ ଦିନ ଏବଂ ରାତ୍ରୀର ତାପାମତ୍ରା କମିବା ସହିତ ଶୀତ ହେବାର ସମ୍ଭାବନା ଅଧିକ ରହିଛି।

ଗତ ୨୪ ଘଣ୍ଟା ମଧ୍ୟରେ ଗଞ୍ଜାମ ଜିଲ୍ଲା ମାଧବରିଦାରେ ୪୮.୮ ମିମି ବର୍ଷା ହୋଇଥିବା ବେଳେ ଢେଙ୍କାନାଳ ଜିଲ୍ଲା ହିନ୍ଦୋଳରେ ୪୦ ମିମି, ଜଗତ୍‌ସିଂହପୁର ଜିଲ୍ଲା ବାଲିକୁଦା ଓ ପାରାଦୀପରେ ୩୭ମିମି, ବୌଦ୍ଧ ଜିଲ୍ଲା କଣ୍ଟାମାଳରେ ୩୪ମିମି, ବାଲେଶ୍ୱର ଜିଲ୍ଲା ଜଳେଶ୍ୱରରେ ୩୩ ମିମି ବର୍ଷା ରେକର୍ଡ ହୋଇଛି।

ଭୁବନେଶ୍ୱର: କରୋନା ରାଜ୍ୟରେ ଶିକ୍ଷା ବ୍ୟବସ୍ଥା ଉପରେ ବହୁତ ପ୍ରଭାବ ପକାଇଛି। କରୋନା ସ୍କୁଲ କଲେଜ୍‌ ମାନଙ୍କରେ ପାଠପଢ଼ାକୁ ଅଧିକ ପ୍ରଭାବିତ କରିଛି। ତେବେ ରାଜ୍ୟରୁ କରୋନାର ପ୍ରଭାବ ଧିରେ ଧିରେ କମିବା ସହ ସ୍କୁଲ କଲେଜ୍‌ ମଧ୍ୟ ଖୋଲିବାରେ ଲାଗିଲାଣି। ଯେଉଁଥିପାଇଁ ଚଳଚଞ୍ଚଳ ହୋଇଛି କ୍ୟାମ୍ପସ, ଉତ୍ସାହିତ ଅଛନ୍ତି ଛାତ୍ରଛାତ୍ରୀ। ଅନଲାଇନ୍ ନୁହେଁ ଶ୍ରେଣୀ ଗୃହରେ ହେବ ପାଠପଢା। ଆଜିଠୁ ଶ୍ରେଣୀ ଗୃହରେ ବସି ପାଠ ପଢିବେ ଏକାଦଶ ଶ୍ରେଣୀ ଛାତ୍ରଛାତ୍ରୀ।

ଏଥିପାଇଁ କ୍ୟାମ୍ପସରେ ହୋଇଛି ବ୍ୟାପକ ପ୍ରସ୍ତୁତି। ଶ୍ରେଣୀଗୃହ ପାଠପଢ଼ା ପୂର୍ବରୁ ଗଣଶିକ୍ଷା ବିଭାଗ ଜାରି କରିଥିଲା ଗାଇଡଲାଇନ୍। ଗାଇଡଲାଇନ ଅନୁସାରେ ଦୂରରୁ ଆସୁଥିବା ପିଲାଙ୍କ ପାଇଁ ପ୍ରଥମ ଦିନ ଇଣ୍ଡକସନ ସେସନ କରାଯାଇଛି। ଏହି ସମୟରେ ପିଲାଙ୍କ ସହ ରହିବେ ଅଭିଭାବକ। କ୍ୟାମ୍ପସକୁ ସାନିଟାଇଜ୍ କରାଯିବା ସହତ ମାସ୍କ ଓ ସାନିଟାଇଜର ମାଧ୍ୟତାମୂଳକ କରାଯାଇଛି।

ପାଠ ପଢିଲା ବେଳେ ପିଲାମାନଙ୍କ ମଧ୍ୟରେ ସାମାଜିକ ଦୂରତା ଅବଲମ୍ବନ କରାଯିବ। ନଭେମ୍ବର ପହିଲାରୁ ପିଲାମାନ ୟୁନିଫର୍ମରେ ଆସିବେ। ଛାତ୍ରଛାତ୍ରୀଙ୍କୁ ଅସ୍ଥାୟୀ ପରିଚୟପତ୍ର ପ୍ରଦାନ କରାଯିବ। ଏଥିସହ ଛାତ୍ରଛାତ୍ରୀଙ୍କୁ ପିଡିଏଫ ଫର୍ମରେ ପୁସ୍ତକ ଯୋଗାଇ ଦିଆଯିବ। ସବୁଠି କୋଭିଡ ନିୟମକୁ କଡ଼ାକଡ଼ି ଭାବେ ପାଳନ କରାଯିବ। ସେପଟେ ଆସନ୍ତା ୨୫ରୁ ଖୋଲିବ ଅଷ୍ଟମ ଶ୍ରେଣୀ।

ପୁରୀ: ଝାପ୍ସା କୁହୁଡ଼ିର ଆଗମନ। ବର୍ଷା ପରେ ଧିରେ ଧିରେ ପାଦ ଥାପୁଛି ଥଣ୍ଡା। ଏହା ସହ ଆଜିଠୁ ଆରମ୍ଭ ହୋଇଛି ପବିତ୍ର କାର୍ତ୍ତିକ ବ୍ରତ। ହିନ୍ଦୁଧର୍ମରେ ସବୁଠାରୁ ପବିତ୍ର ଏବଂ ଧର୍ମର ମାସ ହେଉଛି କାର୍ତ୍ତିକ ମାସ। ଆଜିଠୁ ଏକ ମାସ ଧରି ବ୍ରତ ପାଳିବେ ହବିଷ୍ୟାଳି। କାର୍ତ୍ତିକ ମାସ ନେଇ ଆଜିଠାରୁ ଶ୍ରୀମନ୍ଦିରରେ ସ୍ୱତନ୍ତ୍ର ନୀତିକାନ୍ତି ଅନୁଷ୍ଠିତ ହେବ। ରାଜ୍ୟର ବିଭିନ୍ନ ଧର୍ମାନୁଷ୍ଠାନ ମାନଙ୍କରେ ମଧ୍ୟ ଲୋକଙ୍କ ଗହଳି ଲାଗିବ। ତେବେ କାର୍ତ୍ତିକା ମାସ ଧର୍ମର ମାସ ହୋଇଥିବାରୁ ଏହି ମାସରେ ଆମିସ ଭୋଜନ ମଧ୍ୟ ଲୋକେ କରିନଥାନ୍ତି।

ପ୍ରତିବର୍ଷ ଏହି ମାସରେ ପୁରୀରେ ଭକ୍ତଙ୍କର ଭିଡ ଜମୁଥିବାବେଳେ ଚଳିତବର୍ଷ କରୋନା ପାଇଁ ସବୁ ଫିକା ପଡିଛି। ପୂର୍ବବର୍ଷ ଭଳି ଏଥର ମଧ୍ୟ କଟକଣାରେ କାର୍ତ୍ତିକ ବ୍ରତ ପାଳନ କରାଯିବ। ଏଥିପାଇଁ ଜାରି ହୋଇଛି ଗାଇଡଲାଇନ୍। ହବିଷ୍ୟାଳିମାନେ ପୁରୀ ନଆସି ଘରେ ରହି ପାଳିବେ କାର୍ତ୍ତିକ ବ୍ରତ। ମଠବାଡି, ହୋଟେଲ, ଲଜିଂରେ ହବିଷ୍ୟାଳିଙ୍କୁ ରହିବାକୁ ଅନୁମତି ମିଳିବ ନାହିଁ।

ଶ୍ରୀମନ୍ଦିରରେ ଭକ୍ତଙ୍କ ପ୍ରବଳ ଭିଡ ଆଶଙ୍କାକୁ ଦୃଷ୍ଟିରେ ରଖି ଶୃଙ୍ଖଳିତ ଦର୍ଶନ ବ୍ୟବସ୍ଥା କରାଯାଉଛି। ଭକ୍ତମାନେ କୋଭିଡ କଟକଣା ମାନି ଡବଲ ଡୋଜ କରୋନା ଟିକା ସାର୍ଟିଫିକେଟ କିମ୍ବା ୯୬ ଘଣ୍ଟା ପୂର୍ବର କୋଭିଡ ଆରଟିପିସିଆର ନେଗେଟିଭ ରିପୋର୍ଟ କିଓସ୍କୋରେ ଦେଖାଇ ଦର୍ଶନ କରିପାରିବେ। ସେହିଭଳି ଲିଙ୍ଗରାଜ ମନ୍ଦିରକୁ ହବିଷ୍ୟାଳିମାନେ ନ ଆସିବା ପାଇଁ କୁହାଯାଇଛି। ଏ ନେଇ ଗାଇଡଲାଇନ ଜାରି କରିଛି ବିଏମସି।