ନୂଆଦିଲ୍ଲୀ: କରୋନାର ନୂଆ ଭାରିଆଣ୍ଟ ଓମିକ୍ରନ ମାମଲା ସାରା ବିଶ୍ୱରେ ଦିନକୁ ଦିନ ବୃଦ୍ଧି ପାଉଛି । ସର୍ବାଧିକ ଥର ମ୍ୟୁଟେସନ ହୋଇଥିବା କରୋନାର ଏହି ଷ୍ଟ୍ରେନକୁ ନେଇ ସାରା ବିଶ୍ବରେ ଆତଙ୍କ ଖେଳାଇଛି ଓମିକ୍ରନ୍ । ବିଶ୍ୱ ସ୍ୱାସ୍ଥ୍ୟ ସଂଗଠନ କରୋନାର ନୂଆ ଭାରିଆଣ୍ଟ ଓମିକ୍ରନକୁ ଭାରିଆଣ୍ଟ ଅଫ୍ କନର୍ସନ ବୋଲି ଘୋଷଣା କରିଛି । କରୋନାର ନୂଆ ଭାରିଆଣ୍ଟକୁ ନେଇ UK ସ୍ୱାସ୍ଥ୍ୟ ବିଶେଷଜ୍ଞଙ୍କ ଦ୍ୱାରା ହୋଇଥିବା ଏକ ଅଧ୍ୟୟନରୁ ଜଣା ପଡ଼ିଛି କି ଏହି ଭାରିଆଣ୍ଟ ଆଗାମୀ ଦିନରେ UK ପାଇଁ ଏକ ବଡ଼ ବିପଦ ଆଣିପାରେ ।
ବ୍ରିଟେନରେ ନୂଆ ଭାରିଆଣ୍ଟ ଅତି ଭୟଙ୍କର ସ୍ଥିତି ଆଣିପାରେ ବୋଲି ଆଶଙ୍କା କରିଛନ୍ତି ସ୍ବାସ୍ଥ୍ୟ ବିଶେଷଜ୍ଞ । ଆଗାମୀ କିଛି ମାସ ମଧ୍ୟରେ ଆକ୍ରାନ୍ତଙ୍କ ସଂଖ୍ୟା ବଢ଼ିବା ସହ ହସ୍ପିଟାଲରେ ଭର୍ତ୍ତି ହେବା ଆକ୍ରାନ୍ତଙ୍କ ସଂଖ୍ୟା ବି ବୃଦ୍ଧି ପାଇବ ବୋଲି ଲଣ୍ଡନ ସ୍କୁଲ ଅଫ୍ ହାଇଜିନ୍ ଆଣ୍ଡ ଟ୍ରପିକାଲ ମେଡିସିନ ପକ୍ଷରୁ କରାଯାଇଥିବା ଅଧ୍ୟୟନରୁ ଜଣା ପଡ଼ିଛି । ସ୍ଥିତି ବିଗିଡ଼ିବା ପୂର୍ବରୁ ଆବଶ୍ୟକ ପଦକ୍ଷେପ ଗ୍ରହଣ କରାନଗଲେ ଆସନ୍ତା ଏପ୍ରିଲ ସୁଦ୍ଧା ଓମିକ୍ରନ୍ ଭାରିଆଣ୍ଟ ମୃତକଙ୍କ ସଂଖ୍ୟା ୨୫ରୁ ୭୫ହଜାର ଛୁଇଁପାରେ ବୋଲି ଲଣ୍ଡନ ସ୍କୁଲ ଅଫ୍ ହାଇଜିନ୍ ଆଣ୍ଡ ଟ୍ରପିକାଲ ମେଡିସିନ ପକ୍ଷରୁ କରାଯାଇଥିବା ଏହି ଅଧ୍ୟୟନରୁ ଜଣାପଡ଼ିଛି ।
ଅନ୍ୟଦେଶ ତୁଳନାରେ ବ୍ରିଟେନରେ ଓମିକ୍ରନ ଭରିଆଣ୍ଟ ଅଧିକ ଲୋକଙ୍କୁ ସଂକ୍ରମିତ କରୁଛି । ବ୍ରିଟେନରେ ପ୍ରତିଦିନ ୬ ଶହରୁ ଉର୍ଦ୍ଧ୍ବ ଆକ୍ରାନ୍ତ ଚିହ୍ନଟ ହେଉଛନ୍ତି । ଏହି ଅଧ୍ୟୟନରୁ ଜଣା ପଡ଼ିଛି କି ଇଂଲଣ୍ଡରେ ଓମିକ୍ରନର B.1.1.1.529 କାରଣରୁ କରୋନା ମାମଲା ଦ୍ରୁତ ଗତିରେ ବୃଦ୍ଧି ପାଉଛି । ଯଦି ଏହାକୁ ନେଇ ଆବଶ୍ୟକ ପଦକ୍ଷେପ ଗ୍ରହଣ କରାନଯାଏ ତାହାଲେ ସ୍ଥିତି ବିଗିଡିପାରେ ବୋଲି ବିଶେଷଜ୍ଞମାନେ କହିଛନ୍ତି । ଦକ୍ଷିଣ ଆଫ୍ରିକା ଓ UKର ଡାଟା ଅନୁସାରେ ଏହି ଭାରିଆଣ୍ଟ ଛୋଟ ପିଲାଙ୍କ ପାଇଁ ଅଧିକ ବିପଦ ଆଣିପାରେ ।
ଏହି ନୂଆ ଭାରିଆଣ୍ଟ ଓମିକ୍ରନକୁ ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ ସାରା ବିଶ୍ୱକୁ ସତର୍କ କରାଇ ଦେଇଛି । ବିଶ୍ୱ ସ୍ୱାସ୍ଥ୍ୟ ସଂଗଠନ କହିଛି କି ନୂଆ ଭାରିଆଣ୍ଟ ଓମିକ୍ରନ ଦ୍ରୁତ ଗତିରେ ଲୋକମାନଙ୍କୁ ସଂକ୍ରମିତ କରୁଛି । ଏଥି ସହ ଟିକାର ପ୍ରଭାବକୁ ମଧ୍ୟ କମ୍ କରୁଛି କରୋନାର ନୂଆ ଭରିଆଣ୍ଟ ଓମିକ୍ରନ୍ ।
