ନନ୍ଦିଘୋଷ ବ୍ୟୁରୋ: ଆଜି ୧୯ ବର୍ଷରୁ କମ୍ ଏସିଆ କପରେ ହାଇ ଭୋଲ୍ଟେଜ ଟକ୍କର । ୨୦୨୬ ଅଣ୍ଡର-୧୯ ଏସିଆ କପର ଫାଇନାଲରେ ମୁହାଁମୁହିଁ ହେବେ ଦୁଇ ଚିରପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ । ଓମାନର ଅଲ୍ ଆମେରାତ୍ କ୍ରିକେଟ୍ ଗ୍ରାଉଣ୍ଡରେ ଭାରତୀୟ ସମୟ ସକାଳ ୧୦ଟା ୩୦ ମିନିଟ୍ ରେ ଏହି ମହା ମୁକାବିଲା ଆରମ୍ଭ ହେବ ।
ସେମିଫାଇନାଲରେ ଆଫଗାନିସ୍ତାନକୁ ୮ ୱିକେଟ୍ ରେ ଏକତରଫା ଭାବେ ପରାସ୍ତ କରି ଲକ୍ଷ୍ୟ ରାୟଚନ୍ଦାନୀଙ୍କ ନେତୃତ୍ୱାଧୀନ ଭାରତୀୟ ଦଳ ଫାଇନାଲରେ ପ୍ରବେଶ କରିଛି । ଅନ୍ୟପଟେ ଡିଫେଣ୍ଡିଂ ଚାମ୍ପିୟନ୍ ପାକିସ୍ତାନ ପ୍ରଥମ ସେମିଫାଇନାଲରେ ବାଂଲାଦେଶକୁ ୯ ୱିକେଟ୍ ରେ ହରାଇ ଫାଇନାଲରେ ପହଞ୍ଚିଛି । ଏହି ଟୁର୍ଣ୍ଣାମେଣ୍ଟର ଗ୍ରୁପ୍ ପର୍ଯ୍ୟାୟରେ ପାକିସ୍ତାନ ଠାରୁ ଭାରତ ୩ ୱିକେଟ୍ ରେ ପରାସ୍ତ ହୋଇଥିଲା। ତେଣୁ ଆଜି ଫାଇନାଲ୍ ଜିତି ଲିଗ୍ ପରାଜୟର ପ୍ରତିଶୋଧ ନେବ ଭାରତ । ଏହା ସହ ୯ମ ଥର ପାଇଁ ଅଣ୍ଡର-୧୯ ଏସିଆ କପ୍ ହାତେଇବା ଲକ୍ଷ୍ୟରେ ପଡ଼ିଆକୁ ଓହ୍ଲାଇବ ଜୁନିୟର ଟିମ୍ ଇଣ୍ଡିଆ। ଭାରତୀୟ ଦଳର ବ୍ୟାଟିଂ ଭାର ଓପନର ଆର୍ଯ୍ୟବୀର ସେହୱାଗ, ଅଧିନାୟକ ଲକ୍ଷ୍ୟ ରାୟଚନ୍ଦାନୀ, ଅର୍ଜୁନ ରାଜପୁତ ଓ ୱିକେଟ୍ କିପର ଅନଭୟ ଦ୍ରାବିଡ଼ଙ୍କ ଉପରେ ରହିବ । ବିଶେଷ କରି ପୂର୍ବତନ କ୍ରିକେଟର ବୀରେନ୍ଦ୍ର ସେହୱାଗଙ୍କ ପୁଅ ଆର୍ଯ୍ୟବୀର ଦମଦାର ଫର୍ମରେ ଅଛନ୍ତି । ଟୁର୍ଣ୍ଣାମେଣ୍ଟରେ ଏପର୍ଯ୍ୟନ୍ତ ୩୦୩ ରନ୍ କରି ସର୍ବାଧିକ ରନ୍ ସଂଗ୍ରହକାରୀ ତାଲିକାର ଶୀର୍ଷରେ ରହିଛନ୍ତି ଆର୍ଯ୍ୟବୀର । ସେହିପରି ବୋଲିଂ ବିଭାଗରେ ଇଶାନ ସୁଦ୍, ମନଲ ଚୌହାନ ଓ ଅର୍ଜୁନ ରାଜପୁତଙ୍କ ଉପରେ ଦଳ ନିର୍ଭର କରିବ।
