ନନ୍ଦିଘୋଷ ବ୍ୟୁରୋ: ୩୫ ବର୍ଷ ପରେ ଗଞ୍ଜାମ ଦେଖିଲା ଭୟାନକ ବନ୍ୟା। ଭାସିଗଲା ପକ୍କା ଘର। ଏକର ଏକର ଜମିରେ ଉଜୁଡିଗଲା ଚାଷ। ବନ୍ୟାରେ ଡୁବିଲା ଗାଁ ଠାରୁ ସହର। ଗଞ୍ଜାମ ଜିଲ୍ଲାରେ ବନ୍ୟାର ବିଭୀଷିକାକୁ ୧୫ ଦିନ ବିତିଲାଣି। ହେଲେ ଏବେ ବି ଅଣ୍ଟା ସଳଖୀ ପାରିନାହାନ୍ତି ପ୍ରଭାବିତ। ରିଲିଫ ପାଇଁ ସରକାର ଘୋଷଣା କରିଛନ୍ତି ସତ, କିନ୍ତୁ ଲୋକଙ୍କ ପାଖରେ ଏଯାଏଁ ପହଞ୍ଚିନି ସହାୟତା। କେଉଁଠି ଚାଉଳ ମୁଠାଏ ତ ଆଉ କେଉଁଠି ଗାଁରେ ରନ୍ଧା ଖାଦ୍ୟକୁ ଅନାଇଛନ୍ତି ବନ୍ୟାରେ ସବୁ କିଛି ହରାଇଥିବା ଲୋକେ। ଆସିକା ଅଞ୍ଚଳର ସବୁଠୁ ଅଧିକ କ୍ଷତିଗ୍ରସ୍ତ ହୋଇଥିବା ନବରତ୍ନପୁର ଗାଁରେ ଏବେ ବି ଲୋକେ ଘର ବାହାରେ ଅଛନ୍ତି। ମିଳିନି ପାଲ ଖଣ୍ଡେ କି ସରକାରୀ ସହାୟତା। ପ୍ରଶାସନ ରିଲିଫ ଦେବାରେ ଅବହେଳା କରିଛି ବୋଲି ଲୋକେ ଅଭିଯୋଗ କରିଛନ୍ତି। ପୁରୁଷୋତ୍ତମପୁର ଅଞ୍ଚଳରେ ମଧ୍ୟ ସମାନ ଅବସ୍ଥା। ୧୫ ଦିନ ହେଲା ସରକାରୀ ସହାୟତାକୁ ଅନାଇ ବସିଛନ୍ତି ବିପନ୍ନ। କିନ୍ତୁ ସ୍ଥାନୀୟ ବାବୁଙ୍କ ଦେଖା ଦର୍ଶନ ମିଳୁନି।
ଏପଟେ ଗଞ୍ଜାମ ବନ୍ୟାକୁ ନେଇ ଥମୁନି ରାଜନୀତି। ଗଞ୍ଜାମ ବନ୍ୟା ମନୁଷ୍ୟକୃତ ବୋଲି ବିରୋଧୀ ଅଭିଯୋଗ କରୁଥିବା ବେଳେ, ରାଜସ୍ବ ମନ୍ତ୍ରୀ ଏହାକୁ ଖଣ୍ଡନ କରିଛନ୍ତି। ଏତେ ସବୁ ପରେ ବି ବିପନ୍ନଙ୍କ ପାଖରେ ରିଲିଫ ଓ ଆର୍ଥିକ ସହାୟତା ପହଞ୍ଚାଇବାରେ ସରକାର ବିଫଳ ବୋଲି ଅଭିଯୋଗ କରିଛନ୍ତି ଉଭୟ ବିଜେଡି ଓ କଂଗ୍ରେସ। ରାଜ୍ୟରେ ହୃଦୟ ହୀନ ସରକାର ଚାଲିଛି ବୋଲି କହିଛନ୍ତି ପିସିସି ସଭାପତି ଭକ୍ତ ଦାସ। ବିଜେଡି ମଧ୍ୟ ରିଲିଫ ଦେବାରେ ବିଫଳ ହୋଇଥିବା ସରକାରୀ କଳ ଓ ଦଳକୁ ସମାଲୋଚନା କରିଛି।
ଡ୍ୟାମ ପରିଚାଳନାରେ ତ୍ରୁଟି, ଆଗୁଆ ସୂଚନା ଦେବାରେ ବିଫଳ ସାଙ୍ଗକୁ ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରିବାରେ ସରକାର ଅସମର୍ଥ ବୋଲି ଅଭିଯୋଗ କରିଛନ୍ତି ବିରୋଧୀ। ଏହା ସହିତ ରିଲିଫ ଓ ଆର୍ଥିକ ସହାୟତା ଦେବାରେ ସରକାରଙ୍କ ବିଫଳତା ସାମ୍ନାକୁ ଆସିଲାଣି।
