ନନ୍ଦିଘୋଷ ବ୍ୟୁରୋ: ଏୟାର ଟ୍ରାଫିକ କଣ୍ଟ୍ରୋଲ, ଏଟିସି ଯୋଗାଯୋଗ ବ୍ୟବସ୍ଥାରେ ତ୍ରୁଟି ଯୋଗୁଁ ଆମେରିକାରେ ଚାରି ଘଣ୍ଟାରୁ ଅଧିକ ସମୟ ଧରି ବନ୍ଦ ରହିଥିଲା ବିମାନ ଉଡ଼ାଣ। ଏହି କଟକଣା ଯୋଗୁଁ ବିମାନ ଗୁଡ଼ିକୁ ଉଡ଼ାଣ ପାଇଁ ଅନୁମତି ମିଳିନଥିଲା। କିନ୍ତୁ ପୂର୍ବରୁ ଆକାଶରେ ଉଡ଼ୁଥିବା ବିମାନଗୁଡ଼ିକୁ ନିଜ ଗନ୍ତବ୍ୟସ୍ଥଳକୁ ଯିବାକୁ ଅନୁମତି ଦିଆଯାଇଥିଲା। ଶହ ଶହ ବିମାନକୁ ଅନ୍ୟ ବିମାନବନ୍ଦରକୁ ପଠାଯାଇଥିବାରୁ ହଜାର ହଜାର ଯାତ୍ରୀ ବିଭିନ୍ନ ବିମାନବନ୍ଦରରେ ଫସି ରହିଥିଲେ। ୧୧ ହଜାରରୁ ଅଧିକ ବିମାନ ଚଳାଚଳ ପ୍ରଭାବିତ ହୋଇଥିବା ବେଳେ ଲକ୍ଷାଧିକ ଯାତ୍ରୀ ହନ୍ତସନ୍ତ ହୋଇଥିଲେ ।
ଆମେରିକାର ହୋମଲ୍ୟାଣ୍ଡ ସିକ୍ୟୁରିଟି ସଚିବ ଏହି ବିଭ୍ରାଟ ପାଇଁ ପୁରୁଣା ଏୟାର ଟ୍ରାଫିକ୍ କଣ୍ଟ୍ରୋଲ୍ (ATC) ବ୍ୟବସ୍ଥା ଉପରେ ନୂଆ ପ୍ରଯୁକ୍ତିର ଅତ୍ୟଧିକ ଚାପକୁ ଦାୟୀ କରିଛନ୍ତି। ସାଇବର ଆକ୍ରମଣ ସମ୍ଭାବନାକୁ ମଧ୍ୟ ସେ ଅସ୍ଵୀକାର କରିଛନ୍ତି। ଏହି ଘଟଣାରେ ୧୧ ହଜାରରୁ ଅଧିକ ବିମାନ ପ୍ରଭାବିତ ହୋଇଥିବା ବେଳେ ହଜାର ହଜାର ଯାତ୍ରୀ ବିମାନବନ୍ଦରରେ ବହୁ ସମୟ ଧରି ଫସି ରହିଥିଲେ। ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ସୁରକ୍ଷା ଦୃଷ୍ଟିରୁ ଏହି ବିମାନ ଉଡ଼ାଣ ବନ୍ଦ ନେଇ ନିର୍ଦ୍ଦେଶ ଜାରି କରିଥିଲା। ଏହାକୁ ‘ଅସାଧାରଣ ପରିସ୍ଥିତି’ ବୋଲି ଦର୍ଶାଇଥିଲା। ଚାରି ଘଣ୍ଟାରୁ ଅଧିକ ସମୟ ଧରି ଏପରି ପରିସ୍ଥିତି ସୃଷ୍ଟି ହୋଇଥିଲା। ୪ ଘଣ୍ଟା ପରେ FAA ବିମାନ ଉଡ଼ାଣ ଉପରେ ଲାଗିଥିବା କଟକଣା ହଟାଇଥିଲା। ଭାରତୀୟ ସମୟ ଗତ ରାତି ୨ଟା ୨୪ ମିନିଟ୍ ରୁ ଜାରି ହୋଇଥିଲା ଏହି କଟକଣା । FAA କହିଛି ଯେ, କଟକଣା ହଟାଇବା ପରେ ବିମାନଗୁଡ଼ିକର ଉଡ଼ାଣ ପୁନର୍ବାର ଆରମ୍ଭ ହୋଇପାରିବ। ତେବେ ବିମାନ ଚଳାଚଳ ସ୍ୱାଭାବିକ ହେବାକୁ କିଛି ସମୟ ଲାଗିବ।
ଏପରିକି ଆମେରିକାରେ ଘରୋଇ ବିମାନ ଚଳାଚଳ ସହ ମାଲ ପରିବହନ ବ୍ୟବସ୍ଥା ମଧ୍ୟ ପ୍ରଭାବିତ ହୋଇଛି । ଯାତ୍ରୀଙ୍କ ଅସୁବିଧା ଦେଖି United ଓ Delta ଭଳି ବିମାନ କମ୍ପାନୀ ଟିକେଟ୍ ପୁନଃନିର୍ଦ୍ଧାରଣ ପାଇଁ ଅତିରିକ୍ତ ଶୁଳ୍କ ଛାଡ଼ ଭଳି ସୁବିଧା ଘୋଷଣା କରିଛନ୍ତି ।ଅନ୍ୟପଟେ, ଏହା ପଛରେ କୌଣସି ସାଇବର ଆକ୍ରମଣ କିମ୍ବା ଆତଙ୍କୀ ଷଡ଼ଯନ୍ତ୍ର ଥିବାର ପ୍ରମାଣ ମିଳିନଥିବା ଆମେରିକାର ହୋମଲ୍ୟାଣ୍ଡ ସିକ୍ୟୁରିଟି ସଚିବ ମାର୍କୱେନ୍ ମୁଲିନ୍ କହିଥିଲେ । ତେବେ ଯୋଗାଯୋଗ ବ୍ୟବସ୍ଥାରେ ଏଭଳି ବିଭ୍ରାଟ କାହିଁକି ଘଟିଲା, ତାହାର ତଦନ୍ତ ଜାରି ରହିଛି । ନୂଆ AI ଆଧାରିତ ଏୟାର ଟ୍ରାଫିକ୍ ବ୍ୟବସ୍ଥା ସହ ଏହାର କୌଣସି ସମ୍ପର୍କ ଅଛି କି ନାହିଁ, ତାହା ମଧ୍ୟ ଯାଞ୍ଚ କରାଯାଉଛି ।
