ନନ୍ଦିଘୋଷ ବ୍ୟୁରୋ : ଓଲିଉଡ୍ ଷ୍ଟାର ବାବୁଶାନ ମହାନ୍ତିଙ୍କ ଆଗାମୀ ଫିଲ୍ମ ‘ନବରୂପ’ର ଆନୁଷ୍ଠାନିକ ଘୋଷଣା ହୋଇଛି । ପୂର୍ବ ଫିଲ୍ମ ‘ବୋଉ ବଟୁ ଭୂତ’ର ସଫଳତା ପରେ ବାବୁଶାନ ଏହି ନୂଆ ସିନେମା ଜରିଆରେ ଦର୍ଶକଙ୍କ ସାମ୍ନାକୁ ଆସିବେ । ୨୦୨୭ରେ ଏହି ଫିଲ୍ମ ସିନେମା ହଲରେ ମୁକ୍ତିଲାଭ କରିବ ।
ପାନ୍ ଇଣ୍ଡିଆରେ ରିଲିଜ ହେବାକୁ ଯାଉଥିବା ଏହି ଫିଲ୍ମର କାହାଣୀ ଚିନ୍ମୟ ଦାସ ଲେଖିବା ସହ ନିର୍ଦ୍ଦେଶନା ଦାୟିତ୍ୱ ତୁଲାଇଛନ୍ତି । ଫିଲ୍ମରେ ବାବୁଶାନଙ୍କ ସହ ଅଭିନେତା ଆଶୁତୋଷ ରାଣା ଏବଂ ଅଭିନେତ୍ରୀ ଉଲ୍କା ଗୁପ୍ତାଙ୍କୁ ଦେଖିବାକୁ ପାଇବେ ଦର୍ଶକ ।
View this post on Instagram
‘ନବରୂପ’ ଏକକାଳୀନ ତିନୋଟି ଭାଷାରେ ମୁକ୍ତିଲାଭ କରିବ । ଓଡ଼ିଆ, ହିନ୍ଦୀ ଏବଂ ତେଲୁଗୁ ଭାଷାରେ ଫିଲ୍ମଟି ରିଲିଜ୍ ହେବାକୁ ଥିବାରୁ ଏହାର ପହଞ୍ଚ କେବଳ ଓଡ଼ିଶା କିମ୍ବା ଆଞ୍ଚଳିକ ସ୍ତରରେ ସୀମିତ ରହିବ ନାହିଁ ।
ଅନ୍ୟପଟେ, ଫିଲ୍ମର ବିଶ୍ୱବ୍ୟାପୀ ବଣ୍ଟନ ପାଇଁ କରଣ ଜୋହରଙ୍କ ଧର୍ମା ପ୍ରଡକ୍ସନ୍ସ ସହଭାଗୀ ହୋଇଛି । ବାବୁଶାନ ଫିଲ୍ମସ୍ ଏବଂ ପ୍ରିଲ୍ୟୁଡ୍ ନୋଭେଲ୍ ଭେଞ୍ଚର୍ସ ସହ ମିଶି ଧର୍ମା ପ୍ରଡକ୍ସନ୍ସ ଏହି ଫିଲ୍ମର ବିଶ୍ୱବ୍ୟାପୀ ବଣ୍ଟନ ଦାୟିତ୍ୱ ତୁଲାଇବ । ଏହି ସହଭାଗିତା ଓଡ଼ିଆ ସିନେମାକୁ ଜାତୀୟ ଓ ଅନ୍ତର୍ଜାତୀୟ ସ୍ତରରେ ନୂଆ ପରିଚୟ ଦେବା ସହ ଓଡ଼ିଆ ଚଳଚ୍ଚିତ୍ର ଜଗତ ପାଇଁ ଏକ ବଡ଼ ପଦକ୍ଷେପ ବୋଲି କୁହାଯାଉଛି ।
