ଭୋପାଳ: ପୁଣି ବିବାଦରେ ଶ୍ୱେତା । ବିଗ୍ ବସ୍ ସିଜନ୍-୪ର ବିଜେତା ତଥା ଅଭିନେତ୍ରୀ ଶ୍ୱେତା ତିୱାରୀ ତାଙ୍କ ବୟାନକୁ ନେଇ ବିବାଦ ଘେରକୁ ଆସିଛନ୍ତି । ଭୋପାଳରେ ଏକ କାର୍ଯ୍ୟକ୍ରମରେ ଶ୍ୱେତା କହିଛନ୍ତି, ତାଙ୍କ ବ୍ରା ସାଇଜ୍ ଭଗବାନ ନିଅନ୍ତି । ଶ୍ୱେତାଙ୍କ ଏହି ବୟାନକୁ ମଧ୍ୟପ୍ରଦେଶରେ ନିଆଁ ଲାଗିଥିବା ବେଳେ ଏବେ ଦେଶବ୍ୟାପୀ ଉଠିଲାଣି ବିରୋଧର ସ୍ୱର । ଏପରିକି ମାମଲାର ତଦନ୍ତ କରି ୨୪ ଘଣ୍ଟା ମଧ୍ୟରେ ରିପୋର୍ଟ ଦେବାକୁ ମଧ୍ୟପ୍ରଦେଶ ଗୃହମନ୍ତ୍ରୀ ପୋଲିସ କମିଶନରଙ୍କୁ ନିର୍ଦ୍ଦେଶ ଦେଇଛନ୍ତି । ତେବେ ହସି ହସି କାହିଁକି ଏଭଳି କହିଲେ ଶ୍ୱେତା ?

ଫ୍ୟାସନ ସହ ଜଡ଼ିତ ଏକ ୱେବ୍ ସିରିଜର ପ୍ରସ୍ତୁତି ଓ ପ୍ରମୋସନ ବେଳେ ଜାନୁଆରୀ ୨୬ରେ ଏଭଳି ବୟାନ ଦେଇଛନ୍ତି ଶ୍ୱେତା । ମଞ୍ଚରେ ପଡକ୍ସନ୍ ଟିମ୍ ସହ ଶ୍ୱେତା ଥିଲେ । ଭୋପାଳର ଏକ ହୋଟଲରେ ୱେବ ସିରିଜ୍ ‘ଶୋ ଟପ୍ପର’ର ପ୍ରମୋସନ୍ ଚାଲିଥିଲା । ଏହାରି ଭିତରେ ଭଗବାନ ଓ ବ୍ରାକୁ ନେଇ ମଞ୍ଚରେ ଶ୍ୱେତା କହିଥିଲେ ଭଗବାନ ମୋ ବ୍ରାର ସାଇଜ୍ ନିଅନ୍ତି । ଯାହାକୁ ନେଇ ବିବାଦ ଉଗ୍ର ହେଉଥିବା ବେଳେ ସାମ୍ନାକୁ ଆସିଛି ଶ୍ୱେତା କହିଥିବା ‘ଭଗବାନ ଓ ବ୍ରା’ ସତ ।

ସୋସିଆଲ୍ ମିଡିଆରେ ଭାଇରାଲ୍ ହେଉଥିବା ଶ୍ୱେତାଙ୍କ ଭଗବାନ ହେଉଛନ୍ତି, ୱେବ୍ ସିରିଜରେ ତାଙ୍କ ସହ ଅଭିନେତା ସୌରଭ ରାଜ ଜୈନ୍ । ସିରିଜରେ ଏକ ରୋଲ୍ ହେଉଛି ବ୍ରା ଫିଟର । ଯେଉଁ ଭୂମିକାରେ ଅଛନ୍ତି ସୌରଭ ଜୈନ୍ । ପୂର୍ବରୁ ସୌରଭ ମହାଭାରତ ସିରିଏଲରେ ଶ୍ରୀକୃଷ୍ଣ ଭୂମିକାରେ ନଜର ଆସିଛନ୍ତି । ଏବେ ଶ୍ରୀକୃଷ୍ଣ ଚରିତ୍ରରୁ ସିଧା ବ୍ରା ଫିଟର ଭୂମିକାକୁ ନେଇ ମଞ୍ଚ ସଞ୍ଚାଳକ ପ୍ରଶ୍ନ କରିଥିଲେ । ଆଉ ଏହାରି ଭିତରେ ହସି ହସି ଶ୍ୱେତା କହିଥିଲେ ସିରିଜରେ ଭଗବାନ ମୋ ବ୍ରାର ସାଇଜ୍ ନେଉଛନ୍ତି । ଆଉ ଶ୍ୱେତାଙ୍କ ଏହି ବୟାନକୁ ଦେଶବ୍ୟାପୀ ବେଶ୍ ବିବାଦ ଦେଖିବାକୁ ମିଳିଛି ।

ହସ ମଜାକରେ ଶ୍ୱେତା ଦେଇଥିବା ଆପତ୍ତିଜନକ ମନ୍ତବ୍ୟକୁ ନେଇ ସୋସିଆଲ୍ ମିଡିଆରୁ ସମାଜ ସବୁଠି ପ୍ରତିବାଦର ସ୍ୱର ଉଠିଛି । ମଞ୍ଚରେ ଶ୍ୱେତାଙ୍କ ଏହି ବୟାନକୁ ମଜାକରେ ନିଆ ଯାଇଥିବା ବେଳେ ସୋସିଆଲ୍ ମିଡିଆ ଉଠୁଛି ପଡ଼ୁଛି । ଭିଡିଓ ଭାଇରାଲ୍ ହେବା ସହ ବିଭିନ୍ନ ସଂସ୍କୃତି ବଞ୍ଚାଅ ମଞ୍ଚ ଭୋପାଳରେ ଗୁରୁବାର ଶ୍ୱେତାଙ୍କ ଫୋଷ୍ଟର ଓ ଫଟୋ ଜାଳି ପ୍ରତିବାଦ କରିଛନ୍ତି ।

ପୂର୍ବରୁ ବ୍ୟକ୍ତିଗତ ଜୀବନକୁ ନେଇ ବେଶ୍ ଚର୍ଚ୍ଚାରେ ଅଛନ୍ତି ଶ୍ୱେତା ତିୱାରୀ । ପ୍ରଥମ ବିବାହ ବିବାଦ ପରେ ତଲାକ୍ ନେଇ ଶ୍ୱେତା ଦ୍ୱିତୀୟ ବିବାହ କରିଛନ୍ତି । ତେବେ ଦ୍ୱିତୀୟ ବିବାହ ବି ବିଚ୍ଛେଦ ରାସ୍ତା ଦେଇ ଗତି କରୁଛି । ପ୍ରଥମ ପତି ରାଜା ଚୌଧୁରୀଙ୍କ ଠାରୁ ଅଲଗା ହେବା ପରେ ଶ୍ୱେତା ଅଭିନେତା ଅଭିନବ କୋହଲିଙ୍କୁ ବାହା ହୋଇଥିଲେ । ଏବେ ପତି ଅଭିନବଙ୍କ ସହ ଏକାଠି ରହୁନାହାଁନ୍ତି ଶ୍ୱେତା ।