ନନ୍ଦିଘୋଷ ବ୍ୟୁରୋ: ବାତ୍ୟା ଅର୍ଣ୍ଣବ ଉଜାଡ଼ିଦେଲା ଧାନ ଫସଲ। ସମ୍ବଲପୁର ଜିଲ୍ଲା କୁଚିଣ୍ଡା ଉପଖଣ୍ଡରେ ଅନେକ ଚାଷୀଙ୍କ ଧାନ ଫସଲ ନଷ୍ଟ ହୋଇଥିବା ଅଭିଯୋଗ ହୋଇଛି। ଅଦିନିଆ ବର୍ଷା ଓ ପବନରେ ଜମିରେ ଅମଳ ପୂର୍ବରୁ ଧାନ କେଣ୍ଡା ତଳେ ପଡ଼ି ବର୍ଷା ପାଣିରେ ନଷ୍ଟ ହେବା ସହ ଧାନ ଗଜା ହୋଇଥିବାରୁ ଚାଷୀଙ୍କ ମୁଣ୍ଡରେ ଚଡ଼କ ପଡ଼ିଛି।
ସୂଚନା ଅନୁଯାୟୀ, ସମ୍ବଲପୁର ଜିଲ୍ଲା କୁଚିଣ୍ଡା ଉପଖଣ୍ଡର ୮୦% ଲୋକ ଚାଷ ଉପରେ ନିର୍ଭର କରିଥାନ୍ତି। ଚଳିତ ବର୍ଷ ଖରିଫ ଋତୁରେ କୁଚିଣ୍ଡା ବ୍ଲକ ପାରୁଆଭାଡ଼ି ପଞ୍ଚାୟତର ପତ୍ରାପାଲି, ପଣ୍ଡରିକଟା, ରାମ ତିଲେଇମାଲ, ପାରୁଆଭାଡ଼ି ଗାଁର ଚାଷୀମାନେ ଧାର କରଜ କରି ଧାନ ଚାଷ କରିଥିଲେ। ହେଲେ ଅମଳର କିଛି ଦିନ ପୂର୍ବରୁ ଚାଷୀଙ୍କ ସ୍ୱପ୍ନକୁ ଧୂଳିସାତ୍ କରିଛି ବାତ୍ୟା ଅର୍ଣ୍ଣବ। ପବନ ଓ ଅଦିନିଆ ବର୍ଷା ଯୋଗୁଁ ଜମିରେ ଧାନ କେଣ୍ଡା ତଳେ ପଡ଼ି ନଷ୍ଟ ହେବା ସହ ଧାନ ଗଜା ହୋଇଯାଇଥିବା ଅଭିଯୋଗ ହୋଇଛି। ନଷ୍ଟ ହୋଇଥିବା ଧାନ କେଣ୍ଡା ହାତରେ ଧରି ଜିଲ୍ଲା କୃଷି ଅଧିକାରୀ ଓ ତହସିଲଦାରଙ୍କ ଦ୍ୱାରସ୍ଥ ହୋଇଛନ୍ତି କ୍ଷତିଗ୍ରସ୍ତ ଚାଷୀ। ତୁରନ୍ତ ଫସଲ କ୍ଷୟକ୍ଷତିର ଆକଳନ କରି କ୍ଷତିପୂରଣ ପ୍ରଦାନ କରିବାକୁ ଦାବି ହୋଇଛି ।
ସେପଟେ ଖୁବଶୀଘ୍ର କ୍ଷୟକ୍ଷତିର ଆକଳନ କରାଯାଇ ସରକାରଙ୍କୁ ତଥ୍ୟ ପ୍ରଦାନ କରାଯିବ ବୋଲି କୁଚିଣ୍ଡା କୃଷି ଜିଲ୍ଲା ଅଧିକାରୀ କହିଛନ୍ତି। ଧାନ ଫସଲ ନଷ୍ଟ ହୋଇଥିବା ନେଇ ସ୍ବୀକାର କରିବା ସହ ଏନେଇ ଜିଲ୍ଲାପାଳଙ୍କୁ ରିପୋର୍ଟ ଦିଆଯାଇଛି ବୋଲି ତହସିଲଦାର କହିଛନ୍ତି। ତେବେ କ୍ଷତିଗ୍ରସ୍ତ ଚାଷୀଙ୍କୁ କେବେ କ୍ଷତିପୂରଣ ମିଳୁଛି, ତାହା ଦେଖିବାକୁ ବାକି ରହିଲା।
