କାବୁଲ: ତାଲିବାନୀ ଶାସନକୁ ନେଇ ଚର୍ଚ୍ଚାରେ ଥିବା ଆଫଗାନିସ୍ତାନରେ ଏବେ ଖାଦ୍ୟ ସଂକଟ । ଅତ୍ୟଧିକ ଖାଦ୍ୟ ସଂକଟ ହେବାରୁ ଅଧାରୁ ଅଧିକ ଆଫଗାନବାସୀ ଏବେ ଭୋକରେ ଦିନ କାଟୁଛନ୍ତି । ସ୍ଥିତି ଏମିତି ଯେ ଖାଦ୍ୟ ପାଇଁ ଆଫଗାନୀବାସୀ ସେମାନଙ୍କ କିଡନୀ ଓ ଛୁଆକୁ ବିକ୍ରି କରୁଥିବା ଖବର ମଧ୍ୟ ସାମ୍ନାକୁ ଆସିଛି । ହେରାତ ସହରର ୨୦ କିଲୋମିଟର ଦୂରରେ ଥିବା ଏକ ଅଂଚଳରେ ଲୋକମାନେ ଅତି କଷ୍ଟରେ ଜୀବନ ବିତାଉଛନ୍ତି । ଘରେ ବିଜୁଳି ଓ ପାଣି ନଥିବାବେଳେ ଅସହ୍ୟ ଶୀତରେ ଲୋକମାନେ ସମୟ କାଟୁଛନ୍ତି । ଅନେକ ଲୋକଙ୍କ ଜୀବନ ଏବେ ଆଫଗାନିସ୍ତାନରେ ଦୁର୍ବିସହ ହୋଇପଡିଛି । ଅଗଷ୍ଟ ୧୫ ତାରିଖରେ ତାଲିବାନୀମାନେ ନିଜ କବଜାକୁ ନେବା ପରେ ଅନ୍ତର୍ଜାତୀୟ ସ୍ତରରୁ ଆଫଗାନିସ୍ତାନକୁ ମିଳୁଥିବା ଅନେକ ସାହାଯ୍ୟ ବନ୍ଦ ହୋଇଯାଇଥିଲା । ଯାହା ଫଳରେ ଏବେ ସେଠାକାର ଅଧିବାସୀଙ୍କ ଜୀବନ ଦୁର୍ବିସହ ହୋଇପଡିଛି ।
ପଞ୍ଜାବରେ ଖୁବଶୀଘ୍ର ଘୋଷଣା ହେବ ମୁଖ୍ୟମନ୍ତ୍ରୀ ଚେହେରା: ରାହୁଲ ଗାନ୍ଧୀ
ଚଣ୍ଡିଗଡ଼: ପଞ୍ଜାବ କଂଗ୍ରେସର ମୁଖ୍ୟମନ୍ତ୍ରୀ ଚେହେରା କିଏ । ଆସନ୍ତା ବିଧାନସଭା ନିର୍ବାଚନ ପୂର୍ବରୁ ବିରୋଧୀ ଏହି ପ୍ରଶ୍ନକୁ ନେଇ କଂଗ୍ରେସକୁ ଘେରିଛନ୍ତି । ରାହୁଲ ଗାନ୍ଧୀ ଗତକାଲି ପଞ୍ଜାବ ଯାଇଥିବାବେଳେ ଏହି ପ୍ରସଙ୍ଗ ପୁଣି ଥରେ ଜୋର ଧରିଛି । ତେବେ ଅତିଶୀଘ୍ର ଏନେଇ ଘୋଷଣା ହେବ ବୋଲି କହିଛନ୍ତି ରାହୁଲ ଗାନ୍ଧୀ । ମତଦାନ ପୂର୍ବରୁ ମୁଖ୍ୟମନ୍ତ୍ରୀ ପ୍ରାର୍ଥୀ କିଏ ତା’ର ନାଁ ଘୋଷଣା କରାଯିବ । ତାହା ପୂର୍ବରୁ ଦଳର ବରିଷ୍ଠ ନେତାଙ୍କ ସହ ଆଲୋଚନା କରାଯିବ ବୋଲି କହିଛନ୍ତି ରାହୁଲ । ବର୍ତ୍ତମାନ ମୁଖ୍ୟମନ୍ତ୍ରୀ ରେସରେ ସିଦ୍ଧୁ ଏବଂ ଚନ୍ନି ଥିବା ବେଳେ ମୁଖ୍ୟମନ୍ତ୍ରୀ ପ୍ରାର୍ଥୀ କିଏ ହେବ ତାକୁ ନେଇ ଚର୍ଚ୍ଚା ଜୋର ଲାଗି ରହିଛି । ଏପଟେ ସିଦ୍ଧୁ ମୁଖ୍ୟମନ୍ତ୍ରୀ ନାଁ ଘୋଷଣା କରିବାକୁ ରାହୁଲ ଗାନ୍ଧୀଙ୍କୁ ୧୦ ଦିନ ଅଲଟିମେଟମ ଦେଇଛନ୍ତି । ଏହାରି ଭିତରେ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାଁ ଘୋଷଣା କରିବାକୁ ଦାବି କରିଛନ୍ତି ବୋଲି ଚର୍ଚ୍ଚା ହେଉଛି । ଏଭଳି ସମୟରେ ସିଦ୍ଧୁଙ୍କୁ ଅସନ୍ତୁଷ୍ଟ ନକରିବା ପାଇଁ କଂଗ୍ରେସ ହାଇକମାଣ୍ଡ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାଁ ଘୋଷଣା କରିବେ ବୋଲି ଚର୍ଚ୍ଚା ହେଉଛି ।
ଦାଦନ ଶ୍ରମିକ ଉଦ୍ଧାର, ସର୍ଦ୍ଦାର ଫେରାର
କଣ୍ଟାବାଞ୍ଜି: କଣ୍ଟାବାଞ୍ଜି ରେଳ ଷ୍ଟେସନରୁ ୧୪ ଜଣ ଦାଦନ ଶ୍ରମିକ ଉଦ୍ଧାର ହୋଇଛନ୍ତି । ଏମାନଙ୍କୁ ବାହାରକୁ ଚାଲାଣ କରୁଥିବା ସର୍ଦ୍ଦାର ଘଟଣା ସ୍ଥଳରୁ ଫେରାର ହୋଇଯାଇଛି । ଉଦ୍ଧାର ଦାଦନ ଶ୍ରମିକମାନେ ଲାଠୋର ଓ ପାଟଣାଗଡ଼ ଥାନା ଅଞ୍ଚଳର ବିଛିଲିବାହାଲ ଏବଂ ଯୋଗିମୁଣ୍ଡା ଗାଁର । ଉଦ୍ଧାରଙ୍କ ମଧ୍ୟରେ ୪ ପୁରୁଷ, ୮ ମହିଳା ଓ ୨ ଜଣ ଛୋଟ ଛୁଆ ଅଛନ୍ତି ।
ଉଦ୍ଧାର ଶ୍ରମିକମାନଙ୍କ ପାଖରେ ରାଜ୍ୟ ବାହାରକୁ ଦାଦନ ଖଟି ଯିବାର କୌଣସି କାଗଜ ପତ୍ର ନଥିଲା । ଯାହା ଫଳରେ ବେଆଇନ ଭାବରେ ଚାଲାଣ ହେଉଥିବା ଜଣାପଡିଛି । ଦାଦନ ସର୍ଦ୍ଦାର କଣ୍ଟାବାଞ୍ଜି ଷ୍ଟେସନରୁ ରାତି ଟ୍ରେନ ଯୋଗେ ରାଜ୍ୟ ବାହାରକୁ ଚାଲାଣ କରିବାର ଥିଲା । ହେଲେ କଣ୍ଟାବାଞ୍ଜି ପୋଲିସ ପାଟ୍ରୋଲିଂ ହାବୁଡ଼ରେ ପଡି ଯାଇଥିଲେ ।
ଶୀତରେ ଥରହର ଓଡ଼ିଶା, ଆହୁରି କମିବ ତାପମାତ୍ରା
ଭୁବନେଶ୍ବର: ପ୍ରବଳ ଶୀତରେ ଥରୁଛି ଓଡ଼ିଶା । ରାଜ୍ୟକୁ ପ୍ରବେଶ କରୁଛି ଉତ୍ତରା-ପଶ୍ଚିମା ଥଣ୍ଡା-ଶୁଷ୍କ ବାୟୁ । ୪୮ ଘଣ୍ଟା ମଧ୍ୟରେ ୩ ରୁ ୪ ଡିଗ୍ରୀ ତଳକୁ ଖସିବ ରାତ୍ରି ତାପମାତ୍ରା । ଆଜିଠାରୁ ଆଭ୍ୟନ୍ତରୀଣ ଓଡ଼ିଶାରେ ଶୀତ ବଢିବ । ୩୦ ତାରିଖ ଯାଏଁ ରହିବ ପ୍ରଭାବ । ପାହାଡିଆ ଅଞ୍ଚଳ ସହ ଅନେକ ଆଭ୍ୟନ୍ତରୀଣ ଜିଲ୍ଲାରେ ରାତ୍ରି ତାପମାତ୍ରା ୧୦ ଡିଗ୍ରୀରୁ କମ୍ ରେକର୍ଡ ହେବା ସମ୍ଭାବନା ରହିଛି ।
୨୪ ଘଣ୍ଟା ଭିତରେ ୬ଟି ଜିଲ୍ଲା ଝାରସୁଗୁଡା, ବରଗଡ, ବଲାଙ୍ଗିର, ସୋନପୁର, ସୁନ୍ଦରଗଡ ଏବଂ କେନ୍ଦୁଝର ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ସେହିଭଳି ୩୦ ଓ ୩୧ ତାରିଖ ପାଇଁ ୧୦ଟି ଜିଲ୍ଲା ଝାରସୁଗୁଡା, ବରଗଡ, ବଲାଙ୍ଗିର, ସୋନପୁର, ସୁନ୍ଦରଗଡ, ସମ୍ବଲପୁର, ଅନୁଗୁଳ, ନୂଆପଡା, ଦେବଗଡ ଏବଂ କେନ୍ଦୁଝର ଜିଲ୍ଲାରେ ତୀବ୍ର ଶୀତ ଲହରୀ ପାଇଁ ୟେଲୋ ଆଲର୍ଟ ଜାରି କରାଯାଇଛି । ଆବଶ୍ୟକୀୟ ପଦକ୍ଷେପ ନେବାକୁ ସବୁ ଜିଲ୍ଲାପାଳଙ୍କୁ ନିର୍ଦ୍ଦେଶ ।
ଅଧରାତିରେ ଦେଶି ମଦ ଦୋକାନରେ ଦୁର୍ବୃତ୍ତଙ୍କ ଆକ୍ରମଣ
ସୋରୋ: ସରକାରୀ ଦେଶି ମଦ ଦୋକାନରେ ପଶି କର୍ମଚାରୀଙ୍କୁ ତେଲଙ୍ଗା କଟୁରୀରେ ଆକ୍ରମଣ । ବାଲେଶ୍ୱର ଜିଲ୍ଲା ସୋର ବରଫକଳ ଛକ ନିକଟରେ ଘଟିଛି ଅଘଟଣ । ଏଠାରେ ଥିବା ସରକାରୀ ଦେଶି ମଦ ଦୋକାନରେ କିଛି ଦୁର୍ବୃତ୍ତ ପଶି ମଦ ଦୋକାନ କର୍ମଚାରୀଙ୍କୁ ତେଲଙ୍ଗା କଟୁରୀରେ ଆକ୍ରମଣ କରିଛନ୍ତି । ଏହାସହ ଟଙ୍କା ଓ ମୋବାଇଲ ଛଡାଇ ନେବା ସହ ଦୋକାନରେ ଭଙ୍ଗାରୁଜା କରି ଫେରାର ହୋଇଯାଇଛନ୍ତି ।
ସେପଟେ ସ୍ଥାନୀୟ ଲୋକ ଆହାତ କର୍ମଚାରୀଙ୍କୁ ଉଦ୍ଧାର କରି ସୋର ଡାକ୍ତର ଖାନାରେ ଭର୍ତ୍ତି କରିଛନ୍ତି । କର୍ମଚାରୀ ଜଣକ ଅବସ୍ଥା ସଙ୍କଟାପନ୍ନ ହେବାରୁ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ସୋର ପୋଲିସ ପହଞ୍ଚି ଛାନଭିନ୍ ଆରମ୍ଭ କରିଛି । କେଉଁ କାରଣରୁ ଏହି ଆକ୍ରମଣ କରାଯାଇଛି ? ଏହା ପୂର୍ବ ସତ୍ରୁତା ନା କିଛି ନିର୍ଦ୍ଧିଷ୍ଟ କାରଣରୁ ତାହାର କାରଣ ଖୋଜୁଛି ପୋଲିସ ।
ଜାରି ରହିଛି ଭାରତୀୟ ସେୟାର ବଜାରରେ ଅସ୍ଥିରତା
ମୁମ୍ବାଇ: ଭାରତୀୟ ସେୟାର ବଜାରରେ ଅସ୍ଥିରତା ଜାରି ରହିଛି । ଗତ ସପ୍ତାହରୁ ସେନସେକ୍ସରେ ଡାଉନଫଲ୍ ଜାରି ରହିଥିବା ବେଳେ ଆଜି ମାର୍କେଟ ଖୋଲିବା ମାତ୍ରେ ଖସିଥିଲା ସେନସେକ୍ସ ସୂଚକାଙ୍କ। ଭାରତୀୟ ଇକ୍ୟୁଟି ମାର୍କେଟରେ ହଲଚଲ ପରେ ନିବେଶକମନେ ଶଙ୍କାରେ ରହିଛନ୍ତି । ଆମେରିକାରେ ବର୍ଦ୍ଧିତ ମୁଦ୍ରାସ୍ପୀତିକୁ ଦେଖି ମାର୍ଚ୍ଚରେ ସୁଧ ହାର ବୃଦ୍ଧି କରିବାକୁ ସେଣ୍ଟ୍ରାଲ ବ୍ୟାଙ୍କ ନିଷ୍ପତ୍ତି ନେଇଛି । ଆମେରିକାର ଫେଡେରାଲ୍ ରିଜର୍ଭ ବୈଠକରେ ହୋଇଥିବା ନିଷ୍ପତ୍ତି ବିଶ୍ବର ସବୁ ମାର୍କେଟକୁ ପ୍ରଭାବିତ କରିଛି ।
ତେବେ ଗତ ୪ଦଶକରେ ଆମେରିକାରେ ଦରଦାମ ବୃଦ୍ଧି ରେକର୍ଡ ସ୍ତରରେ ପହଞ୍ଚିଛି । ଦରଦାମ୍ ବୃଦ୍ଧିକୁ କାବୁ କରିବାକୁ ୨୦୨୨ରେ ଫେଡେରାଲ ରିଜର୍ଭ ୪ଥର ସୁଧହାର ବଢ଼ାଇପାରେ । ଯାହାର ସିଧା ସିଧା ପ୍ରଭାବ ଭାରତୀୟ ଷ୍ଟକ୍ ମାର୍କେଟ ଉପରେ ପଡ଼ିଛି । ବିଦେଶୀ ନିବେଶକାରୀ ମାର୍କେଟରୁ ଟଙ୍କା ଉଠାଉଥିବାରୁ ଆଜି ୫୮୧ ପଏଣ୍ଟ ଖସି ୫୭ହଜାର ୨୭୬ରେ କ୍ଲୋଜ ହୋଇଛି ସେନସେକ୍ସ ।
ସେହିପରି ନିଫ୍ଟି ୧୬୭ ପଏଣ୍ଟ ଖସି ୧୭ହଜାର ୧୧୦ ପଏଣ୍ଟରେ କ୍ଲୋଜ୍ ହୋଇଛି । ନିଫଟିରେ ଡାଉନ ଫଲ୍ କରିଥିବା କମ୍ପାନୀଗୁଡ଼ିକ ମଧ୍ୟରେ ଟପରେ ରହିଛି HCL, ଟେକ୍ ମହିନ୍ଦ୍ରା, ଡ. ରେଡ୍ଡୀ ଲାବୋରେଟୋରୀ, TCS, ୱିପ୍ରୋ । ଅନ୍ୟପଟେ ୟୁକ୍ରେନରେ ଲାଗି ରହିଥିବା ଯୁଦ୍ଧସ୍ଥିତି ବଜାର ଉପରେ ପ୍ରଭାବ ପକାଇଛି । ଏହି ସଙ୍କଟ ପରେ କ୍ରୁଡ ଅଏଲ ବା ଅଶୋଧିକ ତୈଳ ଦର ରେକର୍ଡ ହାଇରେ ପହଞ୍ଚଛି । ଏବେ କ୍ରୁଡ ଅଏଲ ଦର ପ୍ରତି ବ୍ୟାରେଲ ୯୦ ଡଲାର ରହିଛି । ଯାହା ଗତ ୮ବର୍ଷରେ ସର୍ବାଧିକ ।
ସ୍ୱର୍ଗଦ୍ୱାରରେ ଅନ୍ୟ ଜିଲ୍ଲାର ଶବଦାହକୁ ଅନୁମତି
ପୁରୀ: ସ୍ୱର୍ଗଦ୍ୱାରରୁ ହଟିଲା କଟକଣା । କରୋନା ସଂକ୍ରମଣକୁ ଦୃଷ୍ଟିରେ ରଖି ପୁରୀ ଜିଲ୍ଲା ବ୍ୟତିତ ଅନ୍ୟ ଜିଲ୍ଲାର ଶବଦାହ ପାଇଁ କଟକଣା ଜାରି କରିଥିଲା ପୁରୀ ପ୍ରଶାସନ । କେବଳ ପୁରୀ ଜିଲ୍ଲାର ଶବ ସତ୍କାର ପାଇଁ ଅନୁମତି ଦିଆଯାଇଥିଲା । ତେବେ ରାଜ୍ୟରେ ସଂକ୍ରମଣ ହ୍ରାସ ପାଇବା ପରେ ଏହି କଟକଣାକୁ ହଟାଇ ଦିଆଯାଇଛି । ଏବେ ଅଣ କୋଭିଡ ମୃତଦେହକୁ ସ୍ୱର୍ଗଦ୍ୱାରରେ ସତ୍କାର କରାଯାଇ ପାରିବ । ତେବେ କରୋନାରେ ମୃତ୍ୟୁ ହୋଇଥିବା ଶବକୁ ସ୍ୱର୍ଗଦ୍ୱାର ନ ଆଣିବାକୁ ପ୍ରଶାସନ ପକ୍ଷରୁ କୁହାଯାଇଛି । ଏନେଇ ସୂଚନା ଦେଇଛନ୍ତି ଜିଲ୍ଲାପାଳ ସମର୍ଥ ବର୍ମା ।
ତେବେ କୋଭିଡ ନୀୟମାବଳି ଅନୁପାଳନ ପୂର୍ବକ ସର୍ବାଧିକ ୧୦ ଜଣଙ୍କ ଉପସ୍ଥିତିରେ ଶବ ସତ୍କାର କରାଯିବ । ଜିଲ୍ଲାରେ କରୋନା ସଂକ୍ରମଣକୁ ଦେଖି ଗତମାସ ୧୦ ତାରିଖ ଠାରୁ ଶ୍ରୀମନ୍ଦିର ବନ୍ଦ ପାଇଁ ପ୍ରଶାସନ ନିଷ୍ପତ୍ତି ନେବା ସହ ସ୍ବର୍ଗଦ୍ବାରରେ ବାହାର ଜିଲ୍ଲାର ଶବଦାହ ଉପରେ କଟକଣା ଲାଗିଥିଲା । ସ୍ଥିତିକୁ ଦେଖି ପରବର୍ତ୍ତୀ ସମୟରେ ନିଷ୍ପତ୍ତି ନିଆଯିବ ବୋଲି କୁହାଯାଇଥିଲା । ତେବେ ରାଜ୍ୟରେ କରୋନା ସଂକ୍ରମଣ ହାର ଲଗାତର କମୁଥିବାରୁ ସ୍ୱର୍ଗଦ୍ୱାରରୁ ଜାରି ହୋଇଥିବା କଟକଣାକୁ ହଟାଇ ଦିଆଯାଇଛି ।
ଟାଟା ହାତକୁ ଗଲା ଏୟାର ଇଣ୍ଡିଆର ମାଲିକାନା, ୨୮ରୁ ଭିନ୍ନ ଅନ୍ଦାଜରେ ୱେଲକମ୍ ଆନାଉସମେଣ୍ଟ
ନୂଆଦିଲ୍ଲୀ: ଶେଷରେ ଟାଟା ହାତକୁ ଯାଇଛି ଏୟାର ଇଣ୍ଡିଆର ମାଲିକାନା। ଟାଟା ସନ୍ସର ଚେୟାରମ୍ୟାନ ଏନ୍ ଚନ୍ଦ୍ରଶେଖର ପ୍ରଧାନମନ୍ତ୍ରୀଙ୍କୁ ଭେଟିବା ପରେ ଅଧିଗ୍ରହଣ ପ୍ରକ୍ରିୟା ଶେଷ ହୋଇଛି। ଏୟାର ଇଣ୍ଡିଆକୁ ଫେରିପାଇ ଟାଟା ଗ୍ରୁପ ବହୁତ ଖୁସି ଅନୁଭବ କରୁଛି ବୋଲି କହିଛନ୍ତି ଏନ ଚନ୍ଦ୍ରଶେଖର।
ଏୟାର ଇଣ୍ଡିଆକୁ ଟାଟା ନିଜ ହାତକୁ ନେବା ପରେ ବିମାନର କକପିଟ୍ କ୍ରୁ ମେମ୍ବରଙ୍କ ପାଇଁ ନୂଆ ସର୍କୁଲାର ଜାରି କରାଯାଇଛି। ବିମାନ ଭିତରେ ପାଇଲଟ୍ ଏବଂ କ୍ୟାବିନ କ୍ରୁ ସଦସ୍ୟଙ୍କ ଦ୍ୱାରା ୱେଲକମ୍ ଆନାଉସମେଣ୍ଟ ଶୖେଳୀରେ ମଧ୍ୟ ପରିବର୍ତ୍ତନ କରାଯାଇଛି । ଫଳରେ ବିମାନ ଭିତରେ ଜାନୁଆରୀ ୨୮ରୁ ଏକ ନୂଆ ଅନ୍ଦାଜ ତଥା ଶୖେଳୀରେ ଆନାଉସମେଣ୍ଟ ଶୁଣିବାକୁ ମିଳିବ ।
Air India's new circular for cockpit crew welcome announcements: "Dear guests, welcome aboard this historic flight, which marks a special event. Today, Air India officially becomes a part of Tata Group again, after seven decades. Welcome to the future of Air India." pic.twitter.com/GsiXy07I1V
— ANI (@ANI) January 27, 2022
ଏହାସହ ଏୟାର ଇଣ୍ଡିଆ ଏୟାରଲାଇନକୁ ବିଶ୍ୱସ୍ତରୀୟ କରିବାକୁ ଚେଷ୍ଟା କରାଯିବ ବୋଲି ଚନ୍ଦ୍ରଶେଖର କହିଛନ୍ତି । ଅଫିସିଆଲ ହସ୍ତାନ୍ତର ପୂର୍ବରୁ ଏନ ଚନ୍ଦ୍ରଶେଖର ପ୍ରଧାନମନ୍ତ୍ରୀଙ୍କୁ ଭେଟିଥିଲେ। ଏୟାର ଇଣ୍ଡିଆରୁ ଅଂଶଧନ ପ୍ରତ୍ୟାହାର ଆଜି ସଫଳତାପୂର୍ବକ ସମାପ୍ତ ହୋଇଛି । ଏହାସହ ଏୟାର ଇଣ୍ଡିଆର ଶତ ପ୍ରତିଶତ ଅଂଶକୁ ମେସର୍ସ ଟୋଲସ୍ ପ୍ରାଇଭେଟ ଲିମିଟେଡକୁ ହସ୍ତାନ୍ତର କରାଯାଇଛି ।
Excited to take off with you! 😊 #AirIndiaOnBoard https://t.co/t1HEGKTwlE
— Tata Group (@TataCompanies) January 27, 2022
ସୂଚନାଯୋଗ୍ୟ, ଏୟାର ଇଣ୍ଡିଆକୁ ବିକ୍ରି କରାଯିବ ବୋଲି ସରକାର ଘୋଷଣା କରିବା ପରେ ଗତବର୍ଷ ଅକ୍ଟୋବର ୮ ତାରିଖରେ ଟାଟା ଗ୍ରୁପ ଏହାକୁ କିଣିବା ଲାଗି ଆଗ୍ରହ ପ୍ରକାଶ କରିଥିଲା। ସ୍ପାଇସ ଜେଟ ପ୍ରମୋଟର ଏୟାର ଇଣ୍ଡିଆ ଲାଗି ୧୫ ହଜାର ୧୦୦ କୋଟି ଟଙ୍କା ନିଲାମ ଧାର୍ଯ୍ୟ କରିଥିବାବେଳେ ଟାଟା ଗ୍ରୁପ ୧୮ ହଜାର କୋଟି ଟଙ୍କା ନିଲାମ ଧାର୍ଯ୍ୟ କରିଥିଲା।
ଦେବଗଡରେ ବିଜେପି ଦି-ଫାଳ, ରାଣୀ ବଖାଣିଲେ ଗୁମର..
ଦେବଗଡ: ଜିଲ୍ଲା ବାସୀଙ୍କୁ ସବୁବେଳେ ଧୋକା ଦେଇ ଆସୁଛନ୍ତି ବିଜେପି ଜନପ୍ରତିନିଧି । ପ୍ରତି ସମୟରେ ଲୋକଙ୍କୁ ଠକି ଚାଲିଛନ୍ତି । ବିଭିନ୍ନ ପ୍ରତିଶ୍ରୁତି ଦେଇ ପ୍ରତାରଣା କରୁଛନ୍ତି ବୋଲି ଅଭିଯୋଗ ଆଣିଛନ୍ତି ସମ୍ବଲପୁର ଲୋକସଭା ସାଂସଦ ନୀତେଶ ଗଙ୍ଗଦେବଙ୍କ ପତ୍ନୀ ରାଣୀ ଅରୁନ୍ଧତୀ ଦେବୀ । ଗତ 25 ତାରିଖ ଦିନ ଦେବଗଡ଼ ଜିଲ୍ଲା ପରିଷଦ ପୂର୍ବତନ ଅଧ୍ୟକ୍ଷ ରଞ୍ଜିତ ପଟେଲ ଓ ତାଙ୍କ ଧର୍ମପତ୍ନୀ ସୁଧାମୟୀ ପଟେଲ, ରାଣୀ ଅରୁନ୍ଧତୀଙ୍କ ବିରୋଧରେ ଦେବଗଡ଼ ଥାନାରେ ମାମଲା ରୁଜୁ କରିଥିଲେ ।
ରାଣୀ ଅରୁନ୍ଧତୀ ନିଜ ସମର୍ଥକଙ୍କ ଦ୍ୱାରା ସେମାନଙ୍କ କୁଶ ପୁତ୍ତଳିକା ଦାହ କରି ଜନସାଧାରଣଙ୍କୁ ତାଙ୍କ ବିରୁଦ୍ଧରେ ଉସୁକାଇବା, ସୋସିଆଲ ମିଡ଼ିଆରେ ଚରିତ୍ର ସଂହାର କରିବା ଯୋଗୁ ଉଭୟଙ୍କ ଜୀବନ ପ୍ରତି ବିପଦ ଥିବା ଏତଲାରେ ଦର୍ଶାଇଥିଲେ । ଏହି ଘଟଣା ପରେ ପ୍ରଥମ ଥର ପାଇଁ ରାଣୀ ଅରୁନ୍ଧତୀ ନିଜ ପ୍ରତିକ୍ରିୟା ରଖିଛନ୍ତି । ସେ ଯେଉଁ ମାନଙ୍କ ପାଇଁ ପ୍ରଚାର କରି ନିର୍ବାଚନ ଜିତାଇଥିଲେ ସେମାନେ ବିଶ୍ୱାସଘାତ କରି ଲୋକଙ୍କ ପାଇଁ କାମ କରିବା ପରିବର୍ତ୍ତେ ଦୁର୍ନୀତିରେ ଲିପ୍ତ ଥିବା ଅଭିଯୋଗ ଆଣିଛନ୍ତି ।
ପୂର୍ବତନ ଜିଲ୍ଲା ପରିଷଦ ପଟେଲ ଦମ୍ପତି ସେମାନଙ୍କ ଅଞ୍ଚଳର ଲୋକଙ୍କ ଟେଲି ଯୋଗାଯୋଗ ସମସ୍ୟା ପାଇଁ କୌଣସି ପଦକ୍ଷେପ ନେବା ପରିବର୍ତ୍ତେ ସେମାନଙ୍କ ଠାରୁ ଦୁରେଇ ରହିଛନ୍ତି । ଲୋକେ ଯେତେବେଳେ ମୋ ପାଖକୁ ଆସିଲେ ମୁଁ ଲୋକଙ୍କ ସହ ରହିଲି । ମୋତେ କେବଳ ଫୁଟବଲ, କ୍ରିକେଟ ମ୍ୟାଚ ଉଦଘାଟନରେ ଲଗାଇ ସେମାନେ ଦୁର୍ନୀତିରେ ବୁଡି ରହିଥିଲେ । ସେମାନଙ୍କୁ ବିଶ୍ୱାସ କରିବା ମୋ ଭୁଲ ଥିଲା ବୋଲି କହିଛନ୍ତି ରାଣୀ ଅରୁନ୍ଧତୀ ଦେବୀ ।
ଛାତ୍ରନେତାଙ୍କ ହାତରେ ରହିବ ଡିଜିଟାଲ ଅସ୍ତ୍ର, ପଞ୍ଚାୟତ ବୈତରଣୀ ପାର ହେବ ବିଜେଡି
ଭୁବନେଶ୍ୱର: ଡିଜିଟାଲ କ୍ୟାମ୍ପେନିଂ ପାଇଁ ବିଜେଡିର ଫୋକସ । ଡିଜିଟାଲ କ୍ୟାମ୍ପେନର ମୁଖ୍ୟ ପୁରୋଧା ସାଜିବା ପାଇଁ ବିଜୁ ଛାତ୍ର ଜନତା ଦଳର ପ୍ରତେକ କର୍ମୀଙ୍କୁ ଆହ୍ୱାନ । ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଗୁରୁବାର ବିଜୁ ଛାତ୍ର ଜନତା ଦଳ ପକ୍ଷରୁ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ବିଜୁ ଜନତା ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଅଧ୍ୟକ୍ଷତାରେ ଭର୍ଚୁଆଲ୍ ପ୍ଲାଟଫର୍ମ ମାଧ୍ୟମରେ ଏହି ବୈଠକ ଅନୁଷ୍ଠିତ ହୋଇଥିଲା ।
ମୁଖ୍ୟମନ୍ତ୍ରୀଙ୍କ ଓଡ଼ିଶା ବିକାଶର କାର୍ଯ୍ୟଧାରାକୁ ପଞ୍ଚାୟତ ସ୍ତରରେ ପହଞ୍ଚାଇବା ସହ ଆଗାମୀ ପଞ୍ଚାୟତ ନିର୍ବାଚନରେ ବିଜୁ ଜନତା ଦଳର ବିପୁଳ ବିଜୟ ନେଇ କାର୍ଯ୍ୟପନ୍ଥା ସ୍ଥିର କରାଯାଇଛି । କାର୍ଯ୍ୟକ୍ରମରେ ବିଜୁ ଛାତ୍ର ଜନତା ଦଳର ପ୍ରତେକ କର୍ମୀ ମୁଖ୍ୟମନ୍ତ୍ରୀ ନେତୃତ୍ୱରେ ସଶକ୍ତ ଓ ଆଧୁନିକ ଓଡ଼ିଶା ଗଠନ କରିବା ଦିଗରେ ସଦା ସର୍ବଦା କର୍ଯ୍ୟକରିବାକୁ ପରାମର୍ଶ ଦେଇଥିଲେ ପ୍ରଣବ ।
ବିଜୁ ଜନତା ଦଳର ରାଜ୍ୟ ସାଧାରଣ ସମ୍ପାଦକ ପ୍ରଣବ ବଳବନ୍ତରାୟ,ବିଜୁ ଛାତ୍ର ଜନତା ଦଳର ରାଜ୍ୟ ସଭାପତି ଦେବୀ ରଞ୍ଜନ ତ୍ରିପାଠୀ ପ୍ରମୁଖ ଏହି ଭର୍ଚୁଆଲ୍ ବୈଠକରେ ସାମିଲ ହୋଇଥିଲେ । ବିଜୁ ଛାତ୍ର ଜନତା ଦଳର ସମସ୍ତ ଜିଲ୍ଲା ସଭାପତି, ରାଜ୍ୟ କର୍ମକର୍ତ୍ତା ଓ ସମସ୍ତ ବ୍ଲକ୍, ମୁନସିପାଲଟି ଏବଂ ଏନ୍ଏସି ସଭାପତି ମଧ୍ୟ ଭର୍ଚ୍ଚଆଲ ବୈଠକରେ ଉପସ୍ଥିତ ଥିଲେ ।