ନନ୍ଦିଘୋଷ ବ୍ୟୁରୋ: ଆସନ୍ତାକାଲି ଲଘୁଚାପ । ଦକ୍ଷିଣ ପୂର୍ବ ବଙ୍ଗୋପସାଗର ଓ ଏହାର ସଂଲଗ୍ନ ଦକ୍ଷିଣ ଆଣ୍ଡାମାନ ସାଗର ନିକଟବର୍ତ୍ତୀ ଅଞ୍ଚଳରେ ‘ଘୂର୍ଣ୍ଣିବଳୟ’ ସକ୍ରିୟ ରହିଛି । ଏହା ଅଧିକ ଘନୀଭୂତ ହୋଇ ଆସନ୍ତାକାଲି ଦକ୍ଷିଣ ପୂର୍ବ ବଙ୍ଗୋପସାଗର ନିକଟବର୍ତ୍ତୀ ଅଞ୍ଚଳରେ ‘ଲଘୁଚାପ କ୍ଷେତ୍ର’ ରେ ପରିଣତ ହେବ ।
ଏହା ସହ ୧୪ରେ ସୁଦୃଶ୍ୟ ଲଘୁଚାପ କ୍ଷେତ୍ର,୧୫ ରେ ଅବପାତ ଓ ୧୬ ରେ ଗଭୀର ଅବପାତରେ ପରିଣତ ହେବାର ସମ୍ଭାବନା ରହିଛି । ତେବେ ବଙ୍ଗୋପସାଗରରେ ଲଘୁଚାପ ଓ ଅବପାତ ସମ୍ଭାବନା ଥିଲେ ମଧ୍ୟ ଓଡ଼ିଶା ଉପରେ ଏହାର ବିଶେଷ ପ୍ରଭାବ ପଡ଼ିବ ନାହିଁ। ଆଗାମୀ ୭ ଦିନ ଯାଏଁ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବ। ବର୍ଷାର ସମ୍ଭାବନା ମଧ୍ୟ ନାହିଁ। ସପ୍ତାହର ଶେଷ ଆଡ଼କୁ କିଛି ସ୍ଥାନରେ ଆକାଶ ଆଂଶିକ ମେଘୁଆ ରହିପାରେ । ନଭେମ୍ବର ୧୫ ପରେ ଶୀତରେ ସାମାନ୍ୟ କମି ଆସିପାରେ ବୋଲି ପାଣିପାଗ କେନ୍ଦ୍ର ପକ୍ଷରୁ ଆକଳନ କରାଯାଇଛି ।
ତେବେ ଆଜି ନବରଙ୍ଗପୁରରେ ସର୍ବନିମ୍ନ ତାପମାତ୍ରା ୧୩.୫ ଡିଗ୍ରୀ ରେକର୍ଡ କରାଯାଇଥିବା ବେଳେ ଦାରିଙ୍ଗିବାଡି ଓ ଫୁଲବାଣୀରେ ତାପମାତ୍ର ୧୪ ଡିଗ୍ରୀ ରହିଛି । ହିଲ ଷ୍ଟେସନ୍ ସିମିଲଗୁଡ଼ାରେ ସର୍ବନିମ୍ନ ତାପମାତ୍ରା ୧୧.୧ ଡିଗ୍ରୀ ରେକର୍ଡ ହୋଇଛି । ଶୀତ ଯୋଗୁଁ କୋରାପୁଟରେ ଘନ କୁହୁଡ଼ି ସହ ଦୃଶ୍ୟମାନ କ୍ଷମତା ୫୦ ମିଟର ରହିଥିଲା । ଆଗାମୀ ୨-୩ ଦିନରେ ୨ରୁ ୪ ଡିଗ୍ରୀ ଯାଏଁ ପାରା ଖସିପାରେ ବୋଲି ଆକଳନ କରିଛି ପାଣିପାଗ କେନ୍ଦ୍ର । ଆଜି କଟକରେ ୧୮.୮ ଡିଗ୍ରୀ ଓ ଭୁବନେଶ୍ୱର ୨୦.୪ ଡିଗ୍ରୀ ତାପମାତ୍ରା ରହିଛି ।
ଆଗାମୀ ଦିନଗୁଡ଼ିକରେ ଟ୍ବିନ ସିଟିରେ ପାଗ ଶୁଖିଲା ରହିବ। ବର୍ଷାର ବିଶେଷ ସମ୍ଭାବନା ନଥିବା ବେଳେ ଆକାଶରେ ହାଲୁକା ମେଘ ଦେଖିବାକୁ ମିଳିପାରେ। ତେବେ ଆସନ୍ତା ୧୯ ତାରିଖରୁ ରାଜ୍ୟର କିଛି ଅଞ୍ଚଳରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ ବୋଲି ପାଣିପାଗ ବିଭାଗ ପକ୍ଷରୁ ଆକଳନ କରାଯାଇଛି।
