ବ୍ରହ୍ମଗିରିରେ ସିରିଜ୍ ବୋମା ମାଡ଼
ବ୍ରହ୍ମଗିରି: ପୁରୀ ଜିଲ୍ଲା ବ୍ରହ୍ମଗିରି ଦଣ୍ଡୁଆସିପଡ଼ା ଗାଁରେ ଘନ ଘନ ବୋମା ଓ ଗୁଳିମାଡ଼ । ପୂର୍ବ ରାଜନୈତିକ ଶତ୍ରୁତାରୁ ଘଟିଛି ଏହି ହିଂସାକାଣ୍ଡ । ଦୁଇ ଗୋଷ୍ଠୀ ମଧ୍ୟରେ ୩୦ରୁ ଅଧିକ ବୋମାମାଡ଼ ସହ ୧୦ ରାଉଣ୍ଡ ଗୁଳି ମାଡ଼ ହୋଇଥିବା ଜଣାପଡିଛି ।
ପୂର୍ବରୁ ଫେବୃଆରୀ ୧୦ ତାରିଖରେ ଉଭୟ ଗୋଷ୍ଠୀ ମଧ୍ୟରେ ସଂଘର୍ଷ ଘଟି ୮ଜଣ ଗୁରୁତର ହୋଇଥିଲେ । ସେମାନଙ୍କ ମଧ୍ୟରୁ ପୋଲିସ ଉଭୟ ପଟୁ ୬ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ବ୍ରହ୍ମଗିରିରେ ନିର୍ବାଚନ ଶେଷ ପରେ ଫେବୃଆରୀ ୧୮ ତାରିଖରେ ଉଭୟ ୬ ଜଣ କୋର୍ଟରୁ ସର୍ତ୍ତ ମୂଳକ ଜାମିନ ଆସିଥିଲେ ।
ଫେବୃଆରୀ ୨୪ ରେ ପୁଣି ଉଭୟ ଗୋଷ୍ଠୀ ମଧ୍ୟରେ ପ୍ରାୟ ୪୦ ରୁ ଅଧିକ ବୋମା ମାଡ଼ କରାଯାଇଥିଲା । ପୋଲିସ ଗାଁରେ ଚଢ଼ାଉ କରି ଉଭୟ ପକ୍ଷର ୨୧ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ତେବେ ଆଜି ଅପରାହ୍ନରେ ପୁଣି ଘଟିଛି ଗୋଷ୍ଠୀ ସଂଘର୍ଷ ।
ହୋଲି ଖେଳ ପରେ ଗୋଟିଏ ଦଳର ଦୁଇ ଜଣ ଯୁବକ ଅନ୍ୟ ଗାଁରୁ ଚିକେନ କିଣି ଫେରିବା ବେଳେ ଅଚାନକ ଆକ୍ରମଣ କରିଥିଲେ ଅପରପକ୍ଷ । ଏହାକୁ ନେଇ ଉପୟ ପକ୍ଷଙ୍କ ମଧ୍ୟରେ ସୃଷ୍ଟି ହୋଇଥିଲା ମହାଭାରତ । ଦଣ୍ଡୁଆସିପଡ଼ା ପାଲଟିଥିଲା ରଣକ୍ଷେତ୍ର । ଗାଁ ମୁଣ୍ଡରେ ପୋଲିସ ପହଞ୍ଚି ଘଟଣାରେ ଅନୁଧ୍ୟାନ କରୁଥିବା ସୂଚନା ମିଳିଛି ।
