ସମ୍ବଲପୁର: ପୁଣି ଜନ୍ମ ନେଲେ ଯୋଡ଼ା ଶିଶୁ । ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଜନ୍ମ ନେଇଛନ୍ତି ଯୋଡା ଶିଶୁକନ୍ୟା । ରେଙ୍ଗାଲି ଅଞ୍ଚଳର ଦମ୍ପତ୍ତିଙ୍କର ଏଭଳି ଯୋଡା ଶିଶୁ ଜନ୍ମ ହୋଇଛନ୍ତି । ଯୋଡ଼ା ଶିଶୁକନ୍ୟା ଜନ୍ମରୁ ଆରମ୍ଭ ହୋଇଛି ଜୀବନ ଯନ୍ତ୍ରଣା । ସମ୍ବଲପୁର ଜିଲ୍ଲାରେ ଏହା ପ୍ରଥମ ଘଟଣା ହୋଇଥିବାବେଳେ ଏ ଦୃଶ୍ୟ ସମସ୍ତଙ୍କୁ ଆଶ୍ଚଯ୍ୟ କରିଛି । ଏହି ଶିଶୁ ଦୁଇଙ୍କର ମୁଣ୍ଡ ଅଲଗା ରହିଥିବା ବେଳେ ଛାତିରୁ ପେଟ ଲାଗି ରହିଛି । ଗତକାଲି ରାତିରେ ଯୋଡା ଶିଶୁ ଜନ୍ମ ହୋଇଥିବାବେଳେ ଉଭୟଙ୍କ ସ୍ୱାସ୍ଥ୍ୟବସ୍ଥା ଗୁରୁତର ରହିଛି । ତେବେ ଗୁରୁତର ଅବସ୍ଥାରେ ଏହି ଯୋଡା ଶିଶୁକନ୍ୟାଙ୍କୁ ବୁର୍ଲା ଡାକ୍ତରଖାନାକୁ ନିଆଯିବ ବୋଲି ସୂଚନା ମିଳିଛି ।
ଆଜି ଇସ୍ତଫା ଦେଇପାରନ୍ତି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍, ଜନତାଙ୍କ ସାମ୍ନାରେ ପଦ ଛାଡ଼ିବା ନେଇ ଚର୍ଚ୍ଚା
ଇସଲାମାବାଦ: ଆଜି ଇସ୍ତଫା ଦେଇପାରନ୍ତି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ । ଇସଲାମାବାଦରେ ସାର୍ବଜନିକ ରାଲିରେ ଜନତାଙ୍କ ସାମ୍ନାରେ ଇମ୍ରାନ ଇସ୍ତଫା ଦେବେ ବୋଲି ଚର୍ଚ୍ଚା ହେଉଛି । ଏହି ରାଲିରେ ଇମ୍ରାନଙ୍କ ଦଳ ପାକିସ୍ତାନ ତେହରିକ ଏ ଇନ୍ସାଫ ଜନତାଙ୍କ ସାମ୍ନାରେ ନିଜର ଶକ୍ତି ପ୍ରଦର୍ଶନ କରିବ । ବିରୋଧୀ ଇମ୍ରାନ ସରକାର ବିରୋଧରେ ଅନାସ୍ଥା ପ୍ରସ୍ତାବ ଆଣିବା ପରେ ବଳ ଦେଖାଇବାକୁ ଆଜି ପିଟିଆଇ ରାଲିର ଆୟୋଜନ କରିବ । ଦେଶ ଚଳାଇବା ପାଇଁ ଇମ୍ରାନ ଖାନ ବର୍ତ୍ତମାନ ଆର୍ଥିକ ଓ ସାମାଜିକ ଚ୍ୟାଲେଞ୍ଜର ସାମ୍ନା କରୁଛନ୍ତି ।
ଏହା ବାଦ୍ ବିରୋଧୀ ଦଳ ଇମ୍ରାନ ସରକାର ବିରୋଧରେ ଦୁର୍ନୀତି ଅଭିଯୋଗ ଆଣିଛନ୍ତି । ଯାହାକୁ ମୁକାବିଲା କରିବାରେ ବିଫଳ ହୋଇଛନ୍ତି ଇମ୍ରାନ । ଏପଟେ ନିଜ ଦଳର କିଛି ସଂସାଦ ଇମ୍ରାନଙ୍କ ବିରୋଧରେ ବିଦ୍ରୋହ କରିଥିବାରୁ ଇମ୍ରାନଙ୍କ ଆସନ ଟଳମଳ ହୋଇଛି । ଆଜି ଇସଲାମାବାଦରେ ଇମ୍ରାନ ଏକ ରାଲି କରିବେ ଓ ସମସ୍ତଙ୍କ ସାମ୍ନାରେ ଇସ୍ତଫା ଦେବେ । ଇମ୍ରାନଙ୍କ ଦଳ ପାଖରେ ବହୁମତ ନଥିବାରୁ ଅନ୍ୟ ଦଳ ସହ ମେଣ୍ଟ ଗଠନ କରି ସରକାର ଗଠନ କରିଥିଲା । କିନ୍ତୁ ଏବେ ଇମ୍ରାନଙ୍କ ଏହି ମେଣ୍ଟରେ ଫାଟ ସୃଷ୍ଟି ହୋଇଛି ।
IPL ଉଦଘାଟନୀ ମ୍ୟାଚ: ଚେନ୍ନାଇକୁ ହରାଇ କେକେଆର ବିଜୟୀ
ମୁମ୍ବାଇ: ଆଇପିଏଲର ଉଦଘାଟନୀ ମ୍ୟାଚରେ ଚେନ୍ନାଇକୁ ହରାଇ ବିଜୟ ଅଭିଯାନ ଆରମ୍ଭ କରିଛି କେକେରା । ଡିଫେଣ୍ଡିଂ ଚମ୍ପିଆନ ଚେନ୍ନାଇକୁ ୬ ଓ୍ବିକେଟରେ ହରାଇଛି କୋଲକାତା । ମହେନ୍ଦ୍ର ସିଂ ଧୋନୀଙ୍କ ଲଢୁଆ ଅର୍ଦ୍ଧଶତକ ବୃଥା ଯାଇଥିବା ବେଳେ କେକେଆର ପକ୍ଷରୁ ଆଜିଙ୍କ ରାହାଣେ ସର୍ବାଧିକ ୪୪ ରନ୍ କରି କୋଲକତା ବିଜୟରେ ନାୟକ ସାଜିଛନ୍ତି । ପ୍ରଥମ ବ୍ୟାଟିଂ କରି ଚେନ୍ନାଇ କରିଥିଲା ୧୩୧ ରନ୍ କରିଥିଲା । ୧୩୨ ରନର ବିଜୟ ଲକ୍ଷ୍ୟକୁ କେକେରା ୧୮.୩ ଓଭରରେ ବିଜୟ ହାସଲ କରି ନେଇଥିଲା ।
ରାହାଣେ 6 ଚୌକା ଓ ଗୋଟିଏ ଛକା ସହାୟତାରେ ୪୪ ରନ୍ କରିଥିଲେ । ଭେଙ୍କଟେଶ ଆୟର ୧୬ ବଲରୁ ୧୬ ରନ କରିଥିବା ବେଳେ ନିତିଶ ରାଣା ୨୧, ଅଧିନାୟକ ଶ୍ରୀୟାସ ଆୟର ୨୦, ଏସ. ବିଲ୍ଲିଂସ୍ ୨୫, ଏସ. ଜ୍ୟାକସନ୍ ଅପରାଜିତ ୩ ରନ୍ କରିଥିଲେ । ଚେନ୍ନାଇ ତରଫରୁ ବ୍ରାଭୋ ୩ଟି ଓ୍ବିକେଟ ନେଇଥିବା ବେଳେ ମିଚେଲ ଗୋଟିଏ ଓ୍ବିକେଟ ନେଇଥିଲେ ।
ଚେନ୍ନାଇ ପକ୍ଷରୁ ଧୋନି ସର୍ବାଧିକ ଅପରାଜିତ ୫୦ ରନ୍ କରିଥିବା ବେଳେ ରବିନ୍ ଉତ୍ଥାପ୍ପା ୨୮ ରନ୍, ରବୀନ୍ଦ୍ର ଜାଡ଼େଜା ଅପରାଜିତ ୨୬ ରନ୍, ଅମ୍ବାତି ରାୟୁଡୁ ୧୫ ରନ୍ କରିଥିଲେ । ସେହିଭଳି କେକେଆର୍ ପକ୍ଷରୁ ଉମେଶ ଯାଦବ ୨ଟି ୱିକେଟ୍ ନେଇଥିବା ବେଳେ ବରୁଣ ଓ ଆନ୍ଦ୍ରେ ରୁସଲେ ଗୋଟିଏ ଲେଖାଏ ୱିକେଟ୍ ନେଇଛନ୍ତି ।
ବିଜେଡି ମୁଖ୍ୟାଳୟରେ ବିଜୟ ଉତ୍ସବ
ଭୁବନେଶ୍ବର: ଭୁବନେଶ୍ବର ମହାନଗର ନିଗମର ନବନିର୍ବାଚିତ ମେୟର ସୁଲୋଚନା ଦାସ ଓ କର୍ପୋରେଟରଙ୍କୁ ନେଇ ବିଜେଡି ମୁଖ୍ୟାଳୟରେ ବିଜୟ ଉତ୍ସବ ପାଳନ କରାଯାଇଛି । ଭୁବନେଶ୍ବର ଜିଲ୍ଲା ବିଜେଡି ସଭାପତି ତଥା ଉତ୍ତର ଭୁବନେଶ୍ବର ବିଧାୟକ ସୁଶାନ୍ତ ରାଉତଙ୍କ ନେତୃତ୍ବରେ ବିରାଟ ପଟୁଆରରେ ଦଳୀୟ କାର୍ଯ୍ୟାଳୟରୁ ନବୀନ ନିବାସ ଯାଇଥିଲେ ମେୟର, କର୍ପୋରେଟର ଓ ସମର୍ଥକ । ସେଠାରେ ବିଜୟ ପାଇଁ ମୁଖ୍ୟମନ୍ତ୍ରୀ ତଥା ଦଳୀୟ ସଭାପତି ନବୀନ ପଟ୍ଟନାୟକଙ୍କୁ ଭେଟି ଧନ୍ୟବାଦ ଅର୍ପଣ କରିଥିଲେ । ଆଗାମୀ ଦିନରେ ଏକ ନମ୍ବର ସ୍ମାର୍ଟସିଟି ଭୁବନେଶ୍ବରକୁ ଆହୁରି ସବୁଜ, ସୁନ୍ଦର ଓ ବିକଶିତ କରିବାକୁ ଆହ୍ବାନ ଦେଇଛନ୍ତି ମୁଖ୍ୟମନ୍ତ୍ରୀ ।
ପୌର ନିର୍ବାଚନରେ ବିପୁଳ ବିଜୟ ପାଇଁ ମୁଖ୍ୟମନ୍ତ୍ରୀ ଦଳର ଅଗଣିତ କର୍ମୀଙ୍କ ସମର୍ପିତ ଉଦ୍ୟମକୁ ପ୍ରଶଂସା କରିବା ସହ ଏହା ଓଡ଼ିଶାବାସୀଙ୍କ ଆଶୀର୍ବାଦ ପାଇଁ ସମ୍ଭବ ହୋଇଥିବା ଟ୍ବିଟ କରିଛନ୍ତି । ଏହି ବିଜୟ ତୃଣମୂଳ ସ୍ତରରେ ଦଳ ପ୍ରତି ଓଡ଼ିଶାବାସୀଙ୍କ ଭଲ ପାଇବାକୁ ପ୍ରମାଣିତ କରୁଛି ବୋଲି ମୁଖ୍ୟମନ୍ତ୍ରୀ ଲେଖିଛନ୍ତି । ଏଥିସହ ରାଜ୍ୟର ବିକାଶ ଧାରାରେ ସାମିଲ ହେବାକୁ ସଭିଙ୍କୁ ସେ ଆହ୍ବାନ ଦେଇଛନ୍ତି ।
୩ ମେୟର ପଦ ବିଜେଡି କବଜାରେ: କେଉଁଠି କିଏ ଜିତିଲେ ଅଧ୍ୟକ୍ଷ ପଦ ?
ଭୁବନେଶ୍ବର: ପୌର ନିର୍ବାଚନରେ ବିପୁଳ ବିଜୟ ହାସଲ କରିଛି ବିଜେଡି । ୩ଟି ଯାକ ମହାନଗର ନିଗମ ଦଖଲ କରିଛି ବିଜେଡି । ଭୁବନେଶ୍ବରରେ ବିଜେଡି ମେୟର ପ୍ରାର୍ଥିନୀ ସୁଲୋଚନା ଦାସ ବିଜୟ ହୋଇ ପ୍ରଥମ ମହିଳା ମେୟର ହୋଇଛନ୍ତି । କଟକରେ ସୁବାସ ସିଂ ମେୟର ଭାବେ ନିର୍ବାଚିତ ହୋଇଛନ୍ତି । ବ୍ରହ୍ମପୁରରେ ସଂଘମିତ୍ରା ଦଳେଇ ବିଜେଡି ମେୟର ଭାବେ ବିଜୟୀ ହୋଇଛନ୍ତି ।
ସେହିପରି ୩୦ ଜିଲ୍ଲାର ୧୦୫ ପୌର ପରିଷଦରେ ବିଜେଡିକୁ ମିଳିଛି ବଡ ସଫଳତା । ୭୩ ଅଧ୍ୟକ୍ଷ ପଦରେ ବିଜେଡି ପ୍ରାର୍ଥୀ ବିଜୟୀ ହୋଇଥିବା ବେଳେ ବିଜେପି ୧୬, କଂଗ୍ରେସ ୭ ଓ ସ୍ବାଧୀନ ୯ଟି ପଦରେ ବାଜିମାତ କରିଛନ୍ତି ।
ଅନୁଗୁଳରେ ସମସ୍ତ ୩ ପୌର ପରିଷଦରେ ଅଧ୍ୟକ୍ଷ ପଦ ହାସଲ କରିଛି ବିଜେଡି । ବାଲେଶ୍ବରର ୫ ପରିଷଦରୁ ବିଜେଡି ୪ ଓ ବିଜେପି ଗୋଟିଏ ଅଧ୍ୟକ୍ଷ ପଦ ହାତେଇଛି । ବରଗଡ଼ର ୪ଟି ପରିଷଦରୁ ବିଜେଡି ୩ ଓ ସ୍ବାଧୀନ ଗୋଟିଏ ପଦ ହାସଲ କରିଛନ୍ତି । ଭଦ୍ରକର ୩ ଆସନରୁ ବିଜେଡି ୨ ଓ ସ୍ବାଧୀନ ଗୋଟିଏ ପଦବୀ ପାଇଛନ୍ତି । ବଲାଙ୍ଗୀରର ୫ ଆସନରୁ ବିଜେଡି ୩, ବିଜେପି ଗୋଟିଏ ଓ କଂଗ୍ରେସ ଗୋଟିଏ ଆସନ ପାଇଛନ୍ତି ।
ବୌଦ୍ଧର ଏକମାତ୍ର ଆସନ ଯାଇଛି ବିଜେଡି ହାତକୁ । କଟକର ୩ଟି ଆସନରୁ ୩ଟି ଯାକ ଆସନରେ ବିଜେଡିର ବିଜୟ ହୋଇଛି । ଦେବଗଡ଼ର ଏକମାତ୍ର ଆସନରେ ବିଜେଡି ବିଜୟୀ ହୋଇଛି । ଢେଙ୍କାନାଳର ୩ ଆସନରୁ ବିଜେଡି ୨ ଓ ବିଜେପି ଗୋଟିଏ ଆସନରେ ବିଜୟୀ ହୋଇଛନ୍ତି । ଗଜପତିର ୨ଟି ଯାକ ଆସନ ବିଜେଡି ଲାଭ କରିଛି । ଗଞ୍ଜାମର ୧୭ଆସନରୁ ବିଜେଡି ୧୨ଟି, ବିଜେପି ୨, କଂଗ୍ରେସ ୧ ଓ ସ୍ବାଧୀନ ୨ଟି ଆସନରେ ବିଜୟୀ ହୋଇଛନ୍ତି ।
ଜଗତସିଂହପୁରର ୨ଟି ଆସନରୁ ବିଜେଡି ଓ କଂଗ୍ରେସକୁ ଗୋଟିଏ ଲେଖାଁଏ ଆସନ ମିଳିଛି । ଯାଜପୁରର ୨ଟି ଆସନରୁ ୨ଟି ଯାକ ବିଜେଡି ହାତକୁ ଯାଇଛି । ଝାରସୁଗୁଡାର ୩ ଆସନରୁ ବିଜେଡି ୨ ଓ କଂଗ୍ରେସ ଗୋଟିଏ ଆସନ ପାଇଛନ୍ତି । କଳାହାଣ୍ଡିର ୪ଟି ଆସନରୁ ବିଜେଡି ୨ ଓ ବିଜେପି ୨ ଆସନ ପାଇଛନ୍ତି । କନ୍ଧମାଳର ୩ ଆସନରୁ ବିଜେଡିକୁ ୨ ଓ ବିଜେପିକୁ ଗୋଟିଏ ଆସନ ମିଳିଛି । କେନ୍ଦ୍ରାପଡ଼ାର ସମସ୍ତ ୨ଟି ଆସନ ବିଜେଡି ହାତକୁ ଯାଇଛି । କେନ୍ଦୁଝରର ୫ ଆସନରୁ ବିଜେଡି ୪ ଓ ବିଜେପି ଗୋଟିଏ ଆସନ ପାଇଛନ୍ତି । ଖୋର୍ଦ୍ଧାର ୪ଟି ଯାକ ଆସନରେ ବିଜେଡି ବିଜୟୀ ହୋଇଛି ।
କୋରାପୁଟର ୪ ଆସନରୁ ବିଜେଡିକୁ ୧, କଂଗ୍ରେସକୁ ୨ ଓ ସ୍ବାଧୀନଙ୍କୁ ଗୋଟିଏ ଆସନ ମିଳିଛି । ମାଲକାନଗିରିର ୨ ଆସନରୁ ବିଜେଡି ଓ ବିଜେପି ଗୋଟିଏ ଲେଖାଏଁ ଆସନରେ ବିଜୟୀ ହୋଇଛନ୍ତି । ମୟୂରଭଞ୍ଜର ୪ ଆସନରୁ ବିଜେଡି ୩ ଓ ବିଜେପି ଗୋଟିଏ ପାଇଛନ୍ତି । ନବରଙ୍ଗପୁରର ୨ ଆସନରୁ ବିଜେଡିକୁ ଗୋଟିଏ ଓ ବିଜେପିକୁ ଗୋଟିଏ ଆସନ ମିଳିଛି । ନୟାଗଡ଼ର ୪ ଆସନରୁ ବିଜେଡି ୨ ଓ ସ୍ବାଧୀନ ୨ଟିରେ ବିଜୟୀ ହୋଇଛନ୍ତି । ନୂଆପଡାର ୩ ଆସନରୁ ବିଜେପି ୧, କଂଗ୍ରେସ ୧ ଓ ସ୍ବାଧୀନ ୧ ଆସନ ପାଇଛନ୍ତି । ପୁରୀର ୩ ଆସନରୁ ବିଜେଡି ୩ଟିରେ ବିଜୟୀ ହୋଇଛି । ରାୟଗଡ଼ାର ୩ ଆସନରୁ ବିଜେଡି ୨ ଓ ସ୍ବାଧୀନ ଗୋଟିଏ ପାଇଛନ୍ତି । ସମ୍ବଲପୁରର ୨ ଆସନରୁ ବିଜେଡି ଓ ବିଜେପି ଗୋଟିଏ ଲେଖାଏଁ ଆସନରେ ବିଜୟୀ ହୋଇଛନ୍ତି । ସୁବର୍ଣ୍ଣପୁରର ସମସ୍ତ ୩ ଆସନରେ ବିଜେଡି ବିଜୟୀ ହୋଇଛି । ସୁନ୍ଦରଗଡ଼ ଜିଲ୍ଲାର ୩ ଆସନରୁ ବିଜେଡି ୨ ଓ ବିଜେପି ୧ ଆସନରେ ବିଜୟୀ ହୋଇଛି ।
ଶ୍ରୀଜିଉଙ୍କ ଦର୍ଶନ କଲେ ପାଣ୍ଡିଆନ ଏବଂ ପ୍ରଣବ
ପୁରୀ: ଶ୍ରୀକ୍ଷେତ୍ରରେ ଶ୍ରୀଜିଉଙ୍କୁ ଦର୍ଶନ କଲେ 5T ସଚିବ ଭି.କେ ପାଣ୍ଡିଆନ ଏବଂ ବିଜେଡି ସାଙ୍ଗଠନିକ ସମ୍ପାଦକ ତଥା ଯାଜପୁର ବିଧାୟକ ପ୍ରଣବ ପ୍ରକାଶ ଦାସ । ଉଭୟେ ଶ୍ରୀଜିଉଙ୍କ ଦର୍ଶନ କରିବା ପରେ ଶ୍ରୀମନ୍ଦିରରେ କିଛି ସମୟ ଅତିବାହିତ କରିଥିଲେ ।
ଫେରିବା ସମୟରେ 5T ସଚିବଙ୍କୁ ପୁରୀର କଳାକାର ଶାଶ୍ବତ ରଞ୍ଜନ ସାହୁ ଦିଆସିଲ କାଠିରେ ନିର୍ମିତ ଏକ ଓ୍ବାର୍ଲଡକପ୍ ପ୍ରଦାନ କରିଥିଲେ । 5T ସଚିବ ଏହି ଉପହାର ପାଇ ବେଶ ଖୁସିବ୍ୟକ୍ତ କରି ଶାଶ୍ବତଙ୍କୁ ପ୍ରଶଂସା କରିଥିଲେ ।
IPL 2022: ଆରମ୍ଭ ମ୍ୟାଚରେ ଚେନ୍ନାଇକୁ ଝଟକା, କୋଲକାତା ଆଗରେ ୧୩୨ ରନ୍ ବିଜୟ ଲକ୍ଷ୍ୟ
ମୁମ୍ବାଇ: ଆଇପିଏଲର ୧୫ତମ ସଂସ୍କରଣ ଆଜିଠୁ ଆରମ୍ଭ ହୋଇଛି । ଉଦଘାଟନୀ ମ୍ୟାଚରଏ ଚେନ୍ନାଇ ସୁପର କିଙ୍ଗ୍ସ ଓ କୋଲକାତା ନାଇଟ୍ ରାଇଡର୍ସ ମଧ୍ୟରେ ୱାଙ୍ଖେଡ ଷ୍ଟାଡିୟମରେ ମୁକାବିଲା ଚାଲିଛି । ଟସ୍ ଜିତି କେକେଆର୍ ଫିଲ୍ଡିଂ କରୁଛି । ପ୍ରଥମଥର ପାଇଁ ରବୀନ୍ଦ୍ର ଜାଡ଼େଜାଙ୍କ ନେତୃତ୍ୱରେ କ୍ରିଜକୁ ଓହ୍ଲାଇଥିବା ସିଏସକେକୁ ପ୍ରଥମ ଓଭରରୁ ଝଟକା ଲାଗିଛି । ପ୍ରଥମ ମ୍ୟାଚର ପ୍ରଥମ ବଲ୍ ନୋ ବଲ୍ ପଡ଼ିଛି । ଆଉ ପ୍ରଥମ ଓଭରରେ ୱିକେଟ୍ ବି ଖସିଛି ।
କେକେଆର୍ ପକ୍ଷରୁ ପ୍ରଥମ ଓଭରରେ ଉମେଶ ଯାଦବ ବୋଲିଂ କରିଥିଲେ । ତାଙ୍କର ପ୍ରଥମ ବଲ୍ ନୋ ବଲ୍ ଥିଲା । କିନ୍ତୁ ଉମେଶ ପ୍ରଥମ ଓଭରରେ ହିଁ ଋତୁରାଜ ଗାଏକୱାଡ଼ଙ୍କୁ ଆଉଟ୍ କରି ପ୍ୟାଭିଲୟନ୍ ପଠାଇ ଦେଇଥିଲେ । ପ୍ରଥମ ଓଭରରେ ସିଏସକେ ଗୋଟିଏ ୱିକେଟ୍ ହରାଇ ମାତ୍ର ୩ ରନ୍ କରିଥିଲା । ଗୋଟିଏ ନୋ ବଲ୍, ୨ଟି ୱାଇଡ୍ ବଲରୁ ଦଳ ପ୍ରଥମ ଓଭରରେ ତିନି ରନ୍ ପାଇଥିଲା ।
ଆଇପିଏଲ୍ ଆରମ୍ଭର ଗୋଟିଏ ଦିନ ପୂର୍ବରୁ ସିଏସକେ ଅଧିନାୟକ ପଦ ଧୋନି ଛାଡ଼ିଥିଲେ । ଏଥିସହ ଦଳର ଅଧିନାୟକ ଦାୟିତ୍ୱ ଦେଇଥିଲେ ରବୀନ୍ଦ୍ର ଜାଡ଼େଜାଙ୍କୁ । ତେବେ ଆଇପିଏଲ୍ ଆରମ୍ଭ ମ୍ୟାଚରେ ଚେନ୍ନାଇର ଆରମ୍ଭ ସେତେଟା ଭଲ ନାହିଁ । ପ୍ରଥମ ଓଭରରେ ୱିକେଟ୍ ଯାଇଥିବା ବେଳେ ନିୟମିତ ବ୍ୟବଧ୍ୟାନରେ ୱିକେଟ୍ ଖସି ଚାଲିଥିଲା ।
ଚେନ୍ନାଇ ନିର୍ଦ୍ଧାରିତ ୨୦ ଓଭରରେ ୫ ୱିକେଟ୍ ହରାଇ ୧୩୧ ରନ୍ କରିବାରେ ସମର୍ଥନ ହୋଇଛି । କୋଲକାତା ଆଗରେ ୧୩୨ ରନର ବିଜୟ ଲକ୍ଷ୍ୟ ରହିଛି । ଚେନ୍ନାଇ ପକ୍ଷରୁ ଧୋନି ସର୍ବାଧିକ ଅପରାଜିତ ୫୦ ରନ୍ କରିଥିବା ବେଳେ ରବିନ୍ ଉତ୍ଥାପ୍ପା ୨୮ ରନ୍, ରବୀନ୍ଦ୍ର ଜାଡ଼େଜା ଅପରାଜିତ ୨୬ ରନ୍, ଅମ୍ବାତି ରାୟୁଡୁ ୧୫ ରନ୍ କରିଥିଲେ । ସେହିଭଳି କେକେଆର୍ ପକ୍ଷରୁ ଉମେଶ ଯାଦବ ୨ଟି ୱିକେଟ୍ ନେଇଥିବା ବେଳେ ବରୁଣ ଓ ଆନ୍ଦ୍ରେ ରୁସଲେ ଗୋଟିଏ ଲେଖାଏ ୱିକେଟ୍ ନେଇଛନ୍ତି ।
ବଢିବ ଚିନି ଦର !
ଭୁବନେଶ୍ବର: ବେଲଗାମ ପେଟ୍ରୋଲ ଓ ଡିଜେଲ ଦର । ଯୁକ୍ରେନ ଯୁଦ୍ଧ ପାଇଁ ସୂର୍ଯ୍ୟମୁଖୀ ତେଲ, ଅଟା ଓ ଗହମ ଜାତୀୟ ଉତ୍ପାଦର ଦର ବି ଆକାଶଛୁଆଁ । ମହଙ୍ଗା ମାଡରେ ସଢୁଥିବା ଖାଉଟି ପାଇଁ ଏବେ ବେଡି ଉପରେ ଆହୁରି କୋରଡା ମାଡ ଦେବାକୁ ଯାଉଛି ଚିନି । ଦେଶରେ ଚିନିର କୃତ୍ରିମ ଅଭାବ ସୃଷ୍ଟି ହେବା ଆଶଙ୍କା ଉପୁଜିଛି । ବିଶ୍ବରେ ଏକ ନମ୍ବର ଚିନି ଉତ୍ପାଦନକାରୀ ରାଷ୍ଟ୍ର ବ୍ରାଜିଲରେ ମରୁଡି ପାଇଁ ଉତ୍ପାଦନ ବାଧାପ୍ରାପ୍ତ । ଭାରତ ଦ୍ବିତୀୟ ବୃହତ ଉତ୍ପାଦନକାରୀ ରାଷ୍ଟ୍ର । ଏହାର ଫାଇଦା ନେବା ପାଇଁ ବଡ଼ ବଡ଼ ରପ୍ତାନୀକାରୀ କମ୍ପାନୀମାନେ ଚିନି ହୋର୍ଡିଂ କରିବା ଆରମ୍ଭ କରିଦେଇଛନ୍ତି ।
ଚିନି ଅଭାବରୁ ଋଷ ଓ ଇଉରୋପରେ ଦର ହୁ ହୁ ହୋଇ ବଢ଼ି ଚାଲିଛି । ଚଳିତବର୍ଷ ଭାରତରେ ୩ କୋଟି ୧୦ ଲକ୍ଷ ଟନ୍ ଚିନି ଉତ୍ପାଦନ ହୋଇଛି । ମାସିକ ୨୩ ଲକ୍ଷ ଟନ୍ ହିସାବରେ ଦେଶରେ ବାର୍ଷିକ ଘରୋଇ ଚାହିଦା ପାଇଁ ୨ କୋଟି ୭୬ ଲକ୍ଷ ଟନ୍ ଆବଶ୍ୟକ । ଏବେ ଚିନି ଖୁଚୁରା ବଜାରରେ ୪୦ ଟଙ୍କାରେ ବିକ୍ରି ହେଉଛି । ଯୋଗାଣ ବି ସ୍ବାଭାବିକ ରହିଛି । କିନ୍ତୁ ଆଗକୁ ଭାରତ ସରକାର ରପ୍ତାନୀ ଉପରେ କଟକଣା ନ ଲଗାଇଲେ ଚିନିରେ ବଳକା ରାଷ୍ଟ୍ର ହୋଇ ବି ଭାରତରେ ଚିନିରେ ଘୋର ସଂକଟର ସାମନା କରିବାକୁ ପଡିପାରେ ।
ଓଡ଼ିଶାରେ ମାସିକ ୬୦ରୁ ୭୦ ହଜାର ଟନ୍ ଚିନି ଆବଶ୍ୟକ । ହିସାବ ଲଗାଇଲେ ବାର୍ଷିକ ରାଜ୍ୟର ଚିନି ଆବଶ୍ୟକତା ୫ ଲକ୍ଷ ଟନ୍ରୁ ସାଢ଼େ ୫ ଲକ୍ଷ ଟନ୍ । ରାଜ୍ୟର ଆସିକା ଓ ଢେଙ୍କାନାଳରେ ଥିବା ଦୁଇଟି ଚିନିକଳରୁ ବାର୍ଷିକ ମାତ୍ର ୩୦ ହଜାର ଟନ୍ ଚିନି ଉତ୍ପାଦନ ହେଉଛି । ଯାହାକି ଆବଶ୍ୟକତାର ମାତ୍ର ୬ ପ୍ରତିଶତ । ବାକି ୯୪ ପ୍ରତିଶତ ଚିନି ମହାରାଷ୍ଟ୍ର, ଉତ୍ତରପୂର୍ବ ଆନ୍ଧ୍ରପ୍ରଦେଶ ଓ ତାମିଲନାଡ଼ୁରୁ ଆମଦାନୀ କରି କେନ୍ଦ୍ର ସରକାର ଯୋଗାଇଥାନ୍ତି । ରାଜ୍ୟ କୃଷି ବିଭାଗର ତଥ୍ୟ ଅନୁଯାୟୀ ଆଖୁ ଚାଷୀଙ୍କୁ କ୍ବିଣ୍ଟାଲ ଆଖୁ ପିଛା ଏଫ୍ଆର୍ପି ଦର ହିସାବରେ ୨୭ ଟଙ୍କା ୫୦ ପଇସାରୁ ୨୮ ଟଙ୍କା ମିଳୁଛି । ଚିନି ରପ୍ତାନୀ ବୃଦ୍ଧି ପାଇଲେ ଆଖୁ ଚାଷୀମାନେ ଭଲ ଅର୍ଥ ପାଇବେ । କିନ୍ତୁ ଘରୋଇ ଚାହିଦା ପୂରଣ ନ କରି ରପ୍ତାନୀକୁ ଗୁରୁତ୍ବ ଦେଲେ ଦେଶରେ ଚିନି ଦର ହୁ ହୁ ହୋଇ ବଢ଼ିଯିବ ।
ବର୍ତ୍ତମାନର ସ୍ଥିତିକୁ ଦେଖି କେନ୍ଦ୍ର ବାଣିଜ୍ୟ ମନ୍ତ୍ରାଳୟ ଏବର୍ଷ ଚିନି ରପ୍ତାନୀ ୮୦ ଲକ୍ଷ ଟନ୍ ଭିତରେ ସୀମିତ ରଖିବାକୁ ନିର୍ଦ୍ଦେଶ ଦେଇଛି । କିନ୍ତୁ ଏବେ ସୁଦ୍ଧା ଭାରତରୁ ୭୫ ଲକ୍ଷ ଟନ୍ ଚିନି ରପ୍ତାନୀ ହୋଇ ସାରିଲାଣି । ରପ୍ତାନୀକାରୀମାନେ କେନ୍ଦ୍ର ସରକାରଙ୍କ ଏହି ନିୟମକୁ କେତେଦୂର ପାଳନ କରିବେ ସେ ନେଇ ଆଶଙ୍କା ପ୍ରକାଶ ପାଇଛି ।
‘ସିଷ୍ଟମ ସହିତ ରୁହନ୍ତୁ, ଚୋରଙ୍କ ସହିତ ଭୁଆଁ ବିରାଡ଼ି ହୁଅନ୍ତୁ ନାହିଁ’
ଭୁବନେଶ୍ବର: ଧାନ କିଣାକୁ ନେଇ ବିଧାନସଭାରେ ଆଜି ବିରୋଧୀଙ୍କ ଅସନ୍ତୋଷ ଦେଖିବାକୁ ମିଳିଥିଲା । କଂଗ୍ରେସ ଆଗତ ମୁଲତବି ପ୍ରସ୍ତାବର ଉତ୍ତର ଦେଇ ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଥିଲେ, ସିଷ୍ଟମ ସହିତ ରୁହନ୍ତୁ, ଚୋରଙ୍କ ସହିତ ଭୁଆଁ ବିରାଡ଼ି ହୁଅନ୍ତୁ ନାହିଁ ।
କଂଗ୍ରେସ ପକ୍ଷରୁ ଆଗତ ମୁଲତବି ପ୍ରସ୍ତାବ ଆଲୋଚନାରେ ଭାଗ ନେଇ କଂଗ୍ରେସ ଏବଂ ବିଜେପି ବିଧାୟକ ଅସନ୍ତୋଷ ପ୍ରକାଶ କରିଥିଲେ । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ପ୍ରଶ୍ନ କରିଥିଲେ, ସବୁ ମଣ୍ଡିରେ କାହିଁକି ସିସିଟିଭି ଲାଗିପାରିଲା ନାହିଁ ? ନିୟମ ଉଲ୍ଲଂଘନ କାହିଁକି ହେଉଛି ? ପୂର୍ବରୁ ଚାଲିଥିବା ବ୍ୟବସ୍ଥା କାହିଁକି ଅକାମୀ ହେଲା ? ଚାଷୀ ବଞ୍ଚିବେ କେମିତି ?
ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ ଅଭିଯୋଗ କରିଥିଲେ ଯେ ଟୋକନ ସମସ୍ୟା ପାଇଁ ଶହଶହ ଚାଷୀ ହନ୍ତସନ୍ତ ହେଉଛନ୍ତି । ଟୋକନ ପାଇ ମଧ ଚାଷୀ ଧାନ ବିକି ପାରୁନାହାନ୍ତି । ମଣ୍ଡିରେ କଟନି ଛଟନି କରାଯାଉଛି । ଅସାଧୁ ମିଲର ଫାଇଦା ନେଉଛନ୍ତି । ଆଦର୍ଶ ମଣ୍ଡି ହୋଇପାରୁନାହିଁ ।
ଯାହାର ଉତ୍ତର ଦେଇଥିଲେ ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ । ସେ କହିଥିଲେ, ଟେକ୍ନୋଲୋଜି ବ୍ୟବହାର କରି ଧାନ ଜମି ସର୍ଭେ କରାଯାଇଛି । ୧ ଲକ୍ଷ ୮ ହଜାର ଅଧିକ ଚାଷୀ ନୂତନ ଭାବେ ପଞ୍ଜୀକୃତ ହୋଇଛନ୍ତି । ୯୧ ଜଣ ସୋସାଇଟି ସେକ୍ରେଟାରୀଙ୍କୁ ନିଲମ୍ବନ କରାଯାଇଛି । ଏହାସହ ବିରୋଧୀଙ୍କୁ ମନ୍ତ୍ରୀ ଆହ୍ବାନ ଦେଇଥିଲେ ଯେ ସିଷ୍ଟମ ସହିତ ରୁହନ୍ତୁ, ଚୋରଙ୍କ ସହିତ ଭୁଆଁ ବିରାଡ଼ି ହୁଅନ୍ତୁ ନାହିଁ । ସରକାର ଭୂତଚାଷୀଙ୍କୁ ଚିହ୍ନଟ କରି ରାଜ୍ୟ ରାଜକୋଷର ୧୦୯ କୋଟି ଟଙ୍କା ସଞ୍ଚୟ କରିପାରିଛନ୍ତି ।
ସ୍ତ୍ରୀକୁ ଦେଖିବାକୁ ଜଳପଥରେ ୨ ହଜାର କିଲୋମିଟର ଯାତ୍ରା
ନୂଆଦିଲ୍ଲୀ: ପ୍ରେମରେ ପଡ଼ିଲେ ଚାନ୍ଦ ବି ତୋଳି ଆଣିବାକୁ କଥା ଦେଇଦିଏ ପ୍ରେମିକ । ଯଦିଓ ଏହା ଅସମ୍ଭବ ତଥାପି ସମସ୍ତେ କହି ଦିଅନ୍ତି । ପ୍ରେମରେ ଅନେକ ଏମିତି କଥା ଦିଅନ୍ତୁ ଯାହା କରି ଦେଖାଇବା ସମ୍ଭବ ନୁହେଁ । କିନ୍ତୁ ଜଣେ ଯୁବକ ଏମିତି କିଛି କରିଛନ୍ତି ଯାହା ଜାଣିଲେ ଆପଣ ବି ଆଶ୍ଚର୍ଯ୍ୟ ହୋଇଯିବେ । ଭିଏତନାମର ଜଣେ ଯୁବକ ତାଙ୍କ ସ୍ତ୍ରୀକୁ ଭେଟିବା ପାଇଁ ୨ ହଜାର କିଲୋମିଟର ଯିବା ଆରମ୍ଭ କରିଥିଲେ । ଯଦିଓ ପହଞ୍ଚି ପାରିଲେ ନାହିଁ ତଥାପି ତାଙ୍କ ଉଦ୍ୟମକୁ ଲୋକ ତାରିଫ୍ କରୁଛନ୍ତି ।
ଖବର ଅନୁସାରେ, ମାର୍ଚ୍ଚ ୨୩ରେ ଏକ ସିପର କ୍ୟାପଟେନ୍ ଥାଇଲାଣ୍ଡର ନୌସେନାକୁ ଖବର ଦେଇଥିଲେ କି କୂଳରୁ ପ୍ରାୟ ୮୦ କିଲୋମିଟର ଦୂରରେ ଜଣେ ଯୁବକ ମିଳିଛନ୍ତି । ଯୁବକ ଜଣଙ୍କ ଏକ ରବର ବୋଟରେ ଥାଇଲାଣ୍ଡରୁ ଭାରତକୁ ଯାଉଛନ୍ତି । ଏହାପରେ ଯେତେବେଳେ ନୌସେନା ସନ୍ଧାନ ଆରମ୍ଭ କରିଥିଲା ତ ଯୁବକଙ୍କ ପାଖରୁ ଅଳ୍ପ ପିଇବା ପାଣି ସହ କିଛି ଇନଷ୍ଟାଣ୍ଟ ନୁଡୁଲ୍ସ ମିଳିଥିଲା ।
ନୌସେନା ଅଧିକ ପଚରାଉଚରା କରିବା ବେଳେ ଯୁବକ କିଛି କହି ପାରି ନଥିଲେ । କାରଣ ତାଙ୍କୁ ଥାଇ ଭାଷା ଆସୁ ନଥିଲା । ସେ ଭିଏତନାମ ଭାଷା କହୁଥିଲେ । ଯୁବକ ଜଣଙ୍କୁ ନୌସେନା ସାଙ୍ଗରେ ନେଇଯିବା ସହ ଇଣ୍ଟରପ୍ରେଟର ଜରିଆରେ କଥା ହେବାକୁ ଚେଷ୍ଟା କରିଥିଲେ । ଏହାପରେ ସାମ୍ନାକୁ ଆସିଥିଲା ପ୍ରକୃତ କାହାଣୀ । ୩୭ ବର୍ଷୀୟ ଯୁବକ ଜଣଙ୍କ ନାଁ ହୋ ହୁଆଙ୍ଗ ହଙ୍ଗ । ସେ କହିଥିଲେ ତାଙ୍କ ସ୍ତ୍ରୀ ମୁମ୍ବାଇରେ ମହାମାରୀ କରୋନା ପରଠାରୁ ଫସି ରହିଛନ୍ତି । ସେ ତାଙ୍କୁ ଭେଟି ପାରୁନାହାନ୍ତି । ଆଉ ପତ୍ନୀଙ୍କୁ ଭେଟିବାକୁ ବ୍ୟାକୁଳ ହୋ ହୁଆଙ୍ଗ ଜଳପଥରେ ଯାତ୍ରା ଆରମ୍ଭ କରିଥିଲେ ।
ମାର୍ଚ୍ଚ ୨ରେ ହୋ ଚି ମିନ୍ହ ସିଟିରୁ ବ୍ୟାଂକକୁ ବିମାନରେ ଆସିଥିଲେ । ଏହାପରେ ବିମାନରେ ମୁମ୍ବାଇ ଯାଇ ପାରିବେ ଭାବିଥିଲେ । କିନ୍ତୁ ଭିସା ମିଳିଲା ନାହିଁ । ସେତେବେଳେ ହୋ ସେଠାରୁ ପଟ୍ଟାୟା ପଳାଇ ଯାଏ ନୀଳ ରଙ୍ଗର ଏକ ବୋଟ୍ କିଣିଥିଲେ । ସେଥିରେ ମାର୍ଚ୍ଚ ୫ରେ ଯାତ୍ରା ଆରମ୍ଭ କରିଥିଲେ । ଭାବିଥିଲେ ନାଆରେ ଭାରତ ମହାସାଗର ଦେଇ ମୁମ୍ବାଇ କୂଳରେ ପହଞ୍ଚିବେ ।
୧୮ ଦିନ ସମୁଦ୍ରରେ କାଟିବା ପରେ କେବଳ ୮୦ କିଲୋମିଟର ଯାତ୍ରା କରିଥିଲେ । ସେହି ଗତିରେ ଯାତ୍ରା କରିଥିଲେ ମୁମ୍ବାଇ ପହଞ୍ଚିବାକୁ ତାଙ୍କୁ ୬୨୫ ଦିନ ଲାଗିଥାନ୍ତା । ବ୍ୟକ୍ତିଙ୍କ ଠାରୁ ଏସବୁ ଶୁଣିବା ପରେ ନୌସେନା ଥାଇଲାଣ୍ଡରେ ରହିବାକୁ ତାଙ୍କୁ ମାଗଣା ଘର ଦେବା ସହ ସ୍ତ୍ରୀଙ୍କୁ ଭେଟିବାର ବ୍ୟବସ୍ଥା କରୁଥିବା ଜଣାପଡ଼ିଛି ।