ଓଡ଼ିଶା ଧାନ କିଣୁଛି । ଚାଉଳ କରି ପୁଣି ଓଡ଼ିଶାକୁ ଚଢାଦରରେ ବିକୁଛି ଆନ୍ଧ୍ର। ଇନ୍ଧନ, ଖାଇବା ତେଲ, ଡାଲି ପରେ ଏବେ ଚାଉଳ ଉପରେ ମହଙ୍ଗା ମାଡ଼ । କିଲୋ ପିଛା ୧୫ ରୁ ୨୫ ଟଙ୍କା ବଢ଼ିଛି । ଏହା ମଧ୍ୟବିତ୍ତଙ୍କ ହାଣ୍ଡିଶାଳକୁ ସିଧା ମାଡ଼ କରୁଛି । ଗତ ମାସକ ମଧ୍ୟରେ ଚାଉଳ ଦରରେ ଏପରି ପରିବର୍ତ୍ତନ ଦେଖୁବାକୁ ମିଳିଛି । ବିଶେଷ କରି ଲଗ୍ଜରୀ, ଶ୍ୟାମା ମସୁରୀ ଚାଉଳ ପାଇଁ ବାହାର ରାଜ୍ୟ ଉପରେ ନିର୍ଭର କରୁଥିବା ବେଳେ ଏବେ ଦର ଶୁଣିଲେ ଚିନ୍ତା ସୃଷ୍ଟି ହେଉଥିବା ବ୍ୟବସାୟୀ କହିଛନ୍ତି। ବ୍ରହ୍ମପୁର ବଡ଼ବଜାରରେ ହୋଲ୍ସେଲ୍ ଚାଉଳ ବ୍ୟବସାୟୀ ହାତବାନ୍ଧି ବସିଛନ୍ତି । ସେପଟେ ଦର ଅଧିକା ରହିଥିପବାରୁ ମିଲରଙ୍କ ଠାରୁ ଚାଉଳ କିଣିବାକୁ ମଧ୍ୟ ବ୍ୟବସାୟୀ ପଛଘୁଞ୍ଚା ଦେଉଛନ୍ତି । ଭଲ ଚାଉଳ କିଲୋ ୫୦ରୁ ୬୦ ଟଙ୍କା ଭିତରେ ଥିଲା। ଏବେ ତାହା ୮୦ ଟଙ୍କା ହୋଇଥିବାରୁ ଚିନ୍ତା ବଢିଛି ।
ବଜାରରେ ଚାଉଳ ଦର ବସ୍ତା ପ୍ରତି ୩୦୦ ରୁ ୭୦୦ ଟଙ୍କା ପର୍ଯ୍ୟନ୍ତ ବଢ଼ିଛି । ମାସକ ତଳେ ବଜାରରେ ଲଗ୍ଜରୀ ଚାଉଳ ୧୫୫୦ ଟଙ୍କା ୨୬ କିଲୋଗ୍ରାମ ପ୍ରତି ରହିଥିେବା ବେଳେ ଏବେ ପ୍ରାୟ ୨୩୦୦ ଟଙ୍କା ହୋଇଛି । ଶ୍ୟାମା ମସୁରୀ ପ୍ୟାକେଟ୍ ୧୨୦୦ ଟଙ୍କାରୁ ବଢ଼ି ୧୬୦୦ ଟଙ୍କା ହୋଇଛି । ବଳରାମ, ଏଚ୍ଏମ୍ଟି ଚାଉଳ ୨୫ କେଜି ପ୍ରତି ୧୧୦୦ ଟଙ୍କା ରହିଥିଲା ଏବେ ପ୍ରାୟ ୧୪୦୦ ଟଙ୍କା ହୋଇଛି । ଖାଉଟି ଲଗ୍ଜରୀ ଓ ଶ୍ୟାମା ମସୁରୀ ଚାଉଳକୁ ବେଶୀ ପସନ୍ଦ କରୁଥିବା କହିଛନ୍ତି ବ୍ୟବସାୟୀ । ଟ୍ରାନ୍ସପୋର୍ଟ ଖର୍ଚ୍ଚ ସିଧା ଖାଉଟି ଉପରେ ପଡ଼ୁଛି । ଏବେ ନୂଆ ଫସଲକୁ ଅପେକ୍ଷା। ନୂଆ ଧାନ ଆସିଲେ ଦାମ୍ କମିବ ବୋଲି ଆଶା କରାଯାଇଛି ।
