ନନ୍ଦିଘୋଷବ୍ୟୁରୋ: ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼ ଅସୁସ୍ଥ । ଆଜି ସକାଳେ ମର୍ଣ୍ଣିଂ ୱାକ୍ରେ ଯାଇଥିବା ସମୟରେ ସେ ହଠାତ୍ ଅଚେତ ହୋଇପଡ଼ିଥିଲେ । କିଛି ସମୟ ପାଇଁ ସେ ଚେତାଶୂନ୍ୟ ହୋଇଯାଇଥିବାରୁ ତାଙ୍କୁ ତୁରନ୍ତ ନୂଆଦିଲ୍ଲୀ ସ୍ଥିତ AIIMS ହସ୍ପିଟାଲରେ ଭର୍ତ୍ତି କରାଯାଇଥିଲା ।
ସୂଚନା ଅନୁଯାଇ, ୭୫ ବର୍ଷୀୟ ଧନଖଡ଼ଙ୍କୁ ପ୍ରଥମେ ତାଙ୍କ ସହିତ ଥିବା ସୁରକ୍ଷାକର୍ମୀମାନେ PCR ଗାଡ଼ିରେ ଘରକୁ ନେଇଥିଲେ । ପରେ ILBS ମେଡିକାଲ ଟିମ୍ ଏବଂ AIIMSର ଡାକ୍ତରମାନେ ତାଙ୍କୁ ଚିକିତ୍ସା ସହାୟତା ଯୋଗାଇଥିଲେ । କିନ୍ତୁ ତାଙ୍କ ସ୍ୱାସ୍ଥ୍ୟାବସ୍ଥାକୁ ଦୃଷ୍ଟିରେ ରଖି ପରବର୍ତ୍ତୀ ସମୟରେ AIIMSକୁ ସ୍ଥାନାନ୍ତର କରାଯାଇଥିଲା ।
ସୂଚନାଯୋଗ୍ୟ ଯେ, ବର୍ତ୍ତମାନ ତାଙ୍କୁ AIIMSର କାର୍ଡିଓ-ନ୍ୟୁରୋ ସେଣ୍ଟରରେ ଭର୍ତ୍ତି କରାଯାଇଛି । କାର୍ଡିଓଲୋଜି ବିଭାଗର ଡାକ୍ତରମାନେ ତାଙ୍କର ସ୍ୱାସ୍ଥ୍ୟ ପରୀକ୍ଷା ସହ ଚିକିତ୍ସା ଜାରି ରଖିଛନ୍ତି । ତେବେ ବର୍ତ୍ତମାନ ତାଙ୍କ ସ୍ୱାସ୍ଥ୍ୟାବସ୍ଥା କିପରି ରହିଛି, ସେନେଇ ସ୍ପଷ୍ଟ ସୂଚନା ମିଳିନାହିଁ । ଏପର୍ଯ୍ୟନ୍ତ AIIMS କର୍ତ୍ତୃପକ୍ଷଙ୍କ ପକ୍ଷରୁ ମଧ୍ୟ କୌଣସି ଅଧିକାରିକ ବିବୃତ୍ତି ଜାରି ହୋଇନାହିଁ ।
ତେବେ ଏହା ପ୍ରଥମ ଘଟଣା ନୁହେଁ, ଯେତେବେଳେ ଜଗଦୀପ ଧନଖଡ଼ ଏଭଳି ସ୍ୱାସ୍ଥ୍ୟଜନିତ ସମସ୍ୟାର ସାମ୍ନା କରିଛନ୍ତି । ୨୦୨୫ ମାର୍ଚ୍ଚରେ ଛାତିରେ ଯନ୍ତ୍ରଣା ହେବା ପରେ ତାଙ୍କୁ AIIMSର କ୍ରିଟିକାଲ କେୟାର ୟୁନିଟ୍ରେ ଭର୍ତ୍ତି କରାଯାଇଥିଲା । ପରେ ତାଙ୍କର ଆଞ୍ଜିଓପ୍ଲାଷ୍ଟି ମଧ୍ୟ କରାଯାଇଥିଲା । ସେହିପରି ୨୦୨୫ ଜୁନ୍ରେ ନୈନିତାଲର କୁମାଉଁ ବିଶ୍ୱବିଦ୍ୟାଳୟର ସ୍ୱର୍ଣ୍ଣ ଜୟନ୍ତୀ ସମାରୋହରେ ଯୋଗଦେବା ସମୟରେ ମଧ୍ୟ ସେ ଅଚେତ ହୋଇପଡ଼ିଥିଲେ । ଚଳିତ ବର୍ଷ ଜାନୁଆରୀରେ ମଧ୍ୟ ଘରେ ଶୌଚାଳୟକୁ ଯିବା ସମୟରେ ଦୁଇଥର ଚେତାଶୂନ୍ୟ ହୋଇଥିବା ରିପୋର୍ଟ ହୋଇଥିଲା ।
ସୂଚନାଯୋଗ୍ୟ, ଜଗଦୀପ ଧନଖଡ଼ ଦେଶର ୧୪ତମ ଉପରାଷ୍ଟ୍ରପତି ଭାବେ ଅଗଷ୍ଟ ୨୦୨୨ରୁ ୨୧ ଜୁଲାଇ ୨୦୨୫ ପର୍ଯ୍ୟନ୍ତ ଦାୟିତ୍ୱ ତୁଲାଇଥିଲେ ଏବଂ ୨୧ ଜୁଲାଇ ୨୦୨୫ରେ ସେ ନିଜ ପଦରୁ ଇସ୍ତଫା ଦେଇଥିଲେ ।
