spot_img
Home Blog Page 5489

ବଢ଼ୁଛି ପୋଲିସ ଓ ଆଇନଜୀବୀଙ୍କ ମଧ୍ୟରେ ବିବାଦ, ବନ୍ଦ ରହିବ ଢ଼େଙ୍କାନାଳ କୋର୍ଟ

ଢ଼େଙ୍କାନାଳ: ଆଜିଠୁ ବନ୍ଦ ରହିବ ଢେଙ୍କାନାଳ କୋର୍ଟ। ଓକିଲ ସଂଘ ଓ ପୋଲିସ ମଧ୍ୟରେ ବିବାଦ ଉଗ୍ରରୂପ ନେଇଥିବା ବେଳେ ଆଜି ଠାରୁ କୋର୍ଟ ବନ୍ଦ ରଖିବାକୁ ସଂଘ ନିଷ୍ପତ୍ତି ନେଇଛି। ଏଥିସହ ଟାଉନଥାନା ଆଇଆଇସିଙ୍କ ବିରୋଧରେ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ଦାବିପତ୍ର ଦେବ ସଂଘ। ବାଲେଶ୍ୱରରେ କାର୍ଯ୍ୟରତ ଆଇନଜୀବୀଙ୍କୁ ପୋଲିସ ମାଡ଼ ମାରିବା ଘଟଣାର ପ୍ରତିବାଦ କରି ଅଗଷ୍ଟ ୪ରେ ଢେଙ୍କାନାଳ ଜିଲ୍ଲାପାଳଙ୍କ ଅଫିସ ଘେରାଉ କରିଥିଲା ଓକିଲ ସଂଘ। ଏହି ସମୟରେ ସୁରକ୍ଷା ଦାୟିତ୍ୱରେ ଥିବା ପୋଲିସ କର୍ମଚାରୀଙ୍କ ସହ ଆଇନଜୀବୀଙ୍କ ଠେଲାପେଲା ହୋଇଥିଲା। ଏନେଇ ଟାଉନଥାନା ଆଇଆଇସି ନମିତା ନାୟକଙ୍କୁ ଓକିଲ ଦୁର୍ବ୍ୟବହାର ନେଇ ଏକ ମାମଲା ରୁଜ୍ଜୁ କରାଯାଇଥିଲା। ଯାହାକୁ ନେଇ ଓକିଲ ସଂଘ ତୀବ୍ର ପ୍ରତିକ୍ରିୟା ପ୍ରକାଶ କରିବା ସହ କୋର୍ଟ ବନ୍ଦ ରଖିବା ସହ ବିକ୍ଷୋଭ ପ୍ରଦର୍ଶନ କରିବାକୁ ନିଷ୍ପତ୍ତି ନେଇଛି।

ବିପଦ ହେବନି ତୃତୀୟ ଲହର, ଲୋକଙ୍କ ଶରୀରରେ ଅଧିକ ସୃଷ୍ଟି ହେଉଛି ରୋଗପ୍ରତିରୋଧକ ଶକ୍ତି

ଭୁବନେଶ୍ୱର: ରାଜ୍ୟରେ ଏତେଟା ପ୍ରଭାବ ପକାଇବ ନାହିଁ କରୋନାର ତୃତୀୟ ଲହର। କାରଣ, ଲୋକଙ୍କ ଶରୀରରେ ଅଧିକ ରୋଗ ପ୍ରତିରୋଧକ ଶକ୍ତି ସୃଷ୍ଟି ହେବାରେ ଲାଗିଛି। ବୟସ୍କଙ୍କ କ୍ଷେତ୍ରରେ ୮୨ ପ୍ରତିଶତ ଓ ଶିଶୁଙ୍କ କ୍ଷେତ୍ରରେ ୫୪ ପ୍ରତିଶତ ଆଣ୍ଟିବଡି ସୃଷ୍ଟି ହୋଇଛି। ଅଧିକାଂଶ ଲୋକଙ୍କ ଶରୀରରେ ହର୍ଡ ଇମ୍ୟୁନିଟି ସୃଷ୍ଟି ହୋଇଥିବାରୁ ରାଜ୍ୟକୁ ତୃତୀୟ ଲହର ଆସିବା ସମ୍ଭାବନା କମ୍ ରହିଛି। ଆଗାମୀ ୩ରୁ ୪ ମାସ ସଚେତନ ରହିଲେ ଆଉ ସଂକ୍ରମଣ ଆସିବ ନାହିଁ ବୋଲି ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି।

ଯଦି ତୃତୀୟ ଲହର ଆସେ ତେବେ ୧୫ ପ୍ରତିଶତ ଶିଶୁ ଆକ୍ରାନ୍ତ ହେବାର ଆଶଙ୍କା ରହିଛି। ଏଥିପାଇଁ ସ୍ୱାସ୍ଥ୍ୟ ଭିତ୍ତିଭୂମି, ମାନବ ସମ୍ବଳ ଓ ତାଲିମ ଉପରେ ଗୁରୁତ୍ୱ ଦେଇଛନ୍ତି ରାଜ୍ୟ ସରକାର। ଆଗଧାଡ଼ିର ଯୋଦ୍ଧା ଅଙ୍ଗନବାଡ଼ି ଓ ଆଶାକର୍ମୀଙ୍କୁ ତାଲିମ ଦିଆଯାଇଛି। ଏବେ ୬ଟି ବ୍ୟାଚରେ ଶିଶୁ ଚିକିତ୍ସକଙ୍କୁ ପ୍ରଶିକ୍ଷଣ ଦିଆଯାଉଛି। ସେପଟେ ଟିକାକରଣ ଉପରେ ଅଧିକରୁ ଅଧିକ ଫୋକସ୍ କରାଯାଉଛି। ବିଶେଷକରି ଗ୍ରାମାଞ୍ଚଳରେ ବ୍ୟାପକ ଟିକାକରଣ ପାଇଁ ଲକ୍ଷ୍ୟ ରଖିଛନ୍ତି ସରକାର।

ବହୁ ଦିନର ଅପେକ୍ଷା ପରେ ଶ୍ରଦ୍ଧାଳୁଙ୍କ ପାଇଁ ଖୋଲିଲା ଘଟଗାଁ ମା’ ତାରିଣୀଙ୍କ ମନ୍ଦିର

କେନ୍ଦୁଝର: ବହୁ ଦିନର ଅପେକ୍ଷା ପରେ ଆଜି ଖୋଲିଲା ଘଟଗାଁ ମା ତାରିଣୀ ମନ୍ଦିର। କଟକଣା ମଧ୍ୟ୍ୟରେ ମନ୍ଦିର ଖୋଲିବା ପାଇଁ ମନ୍ଦିର ପ୍ରଶାସନ ଓ ଜିଲ୍ଲା ପ୍ରଶାସନ ପକ୍ଷରୁ ମିଳିତ ଗାଇଡ ଲାଇନ ଜାରି କାରାଯାଇଛି। ମନ୍ଦିରକୁ ଯାଉଥିବା ସମସ୍ତ ଭକ୍ତ ମାସ୍କ ପରିଧାନ କରିବା ବାଧ୍ୟତାମୂଳକ କରାଯାଇଛି। ଦୁଇଟି ପର୍ଯ୍ୟାୟରେ ସାଧାରଣ ଦର୍ଶନ କରିବେ ଶ୍ରଦ୍ଧାଳୁ। ପ୍ରଥମେ ସକାଳ ୭ଟା ୩୦ରୁ ଆରମ୍ଭ ହୋଇ ମଧ୍ୟାହ୍ନ ୧୨ଟା ୩୦ ପର୍ପ୍ୟନ୍ତ। ଦ୍ୱିତୀୟଟି ଅପରାହ୍ନ ୪ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ମା ତାରିଣୀଙ୍କ ଦର୍ଶନ କରିବେ ଭକ୍ତ। ଦୂରତା ରକ୍ଷା କରି ବ୍ୟାରିକେଡ୍‌ରେ ଧାଡି ହୋଇ ପ୍ରବେଶ କରି ମୁଖଶାଳା ଦେଇ ମନ୍ଦିର ମଧ୍ୟକୁ ପ୍ରବେଶ କରିବେ ଶ୍ରଦ୍ଧାଳୁ। ମନ୍ଦିର ବେଢା ମଧ୍ୟରେ ୨୫ରୁ ୩୦ ଜଣ ଭକ୍ତ ଦର୍ଶନ କରିପାରିବେ। ମନ୍ଦିର ମଧ୍ୟରେ କୌଣସି ଭୋଗ ଲାଗି କରାଯିବ ନାହିଁ। କେବଳ ଭକ୍ତମାନେ ମା’ ଙ୍କ ଦର୍ଶନ କରିପାରିବେ।  ମନ୍ଦିରକୁ ୧୦ ବର୍ଷରୁ କମ୍ ବୟସର ପିଲା ପ୍ରବେଶ କରି ପାରିବେ ନାହିଁ।  କୌଣସି ଭକ୍ତଙ୍କୁ ଚୂଳ ସମର୍ପଣ କରିବା ନିମନ୍ତେ ପ୍ରବେଶ ଅନୁମତି ଦିଆଯିବ ନାହିଁ। ଦୈନନ୍ଦିନ ଅନ୍ନପ୍ରସାଦ ବିକ୍ରି କିମ୍ବା ଭୋଗ ପାର୍ସଲ ପରବର୍ତୀ ନିର୍ଦ୍ଦେଶାନାମା ପର୍ଯ୍ୟନ୍ତ ବନ୍ଦ ରହିବ। ଏହାସହ ଆସନ୍ତା ୧୬ ତାରିଖରେ ଶ୍ରାବଣ ମାସ ସୋମବାର ପଡ଼ୁଥିବାରୁ ମନ୍ଦିର ପରିଷରରେ ଥିବା ଶିବ ମନ୍ଦିରରେ ସାଧାରଣ ଦର୍ଶନ ବନ୍ଦ ରହିବ।

ପ୍ରଥମ ପର୍ଯ୍ୟାୟରେ ୩୨ ଟନ୍ କୋରାପୁଟ କଫି କିଣିଲା ଟାଟା କଫି: ଅଧିକ ଦାମ୍‌ରେ କଫି ବିିକି ଚାଷୀ ଖୁସ୍

ଜୟପୁର: ବିଶ୍ୱର ଦାମୀ କଫି ଲୁୱକ ନାଁ ଶୁଣିଥିବେ, ହେଲେ ଏବେ ଦିୱାନା କରିବ କୋରାଫୁଟ କଫି । ବିଶ୍ୱବଜାରରେ କୋରାପୁଟ କଫି ବିକିବ ଟାଟା । ପ୍ରଥମ ପର୍ଯ୍ୟାୟରେ କମ୍ପାନୀ ଚାଷୀଙ୍କଠାରୁ ୩୨ ଟନ କଫି କିଣିଛି । କୋରାପୁଟ କଫିର ଗୁଣାତ୍ମକ ମାନ ଉକୃଷ୍ଟ ଥିବାରୁ ବିଶ୍ୱ ବଜାରରେ ବେଶ ଚାହିଦା ରହିଛି । ହେଲେ ବଜାର ଅଭାବରୁ କଫି ଚାଷୀ ଉଚିତ ମୂଲ୍ୟ ପାଉନଥିଲେ । ଏବେ ରାଜ୍ୟ ସରକାରଙ୍କ ଉଦ୍ୟମ କ୍ରମେ ଟାଟାକୁ କଫି ମଞ୍ଜି ବିକ୍ରି କରି ଚାଷୀ ବେଶ ଉତ୍ସାହିତ ଅଛନ୍ତି ।

ସେପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଫି ଚାଷୀଙ୍କୁ ପ୍ରଶଂସା କରିବା ସହ ଏହା ଆଦିବାସୀଙ୍କ ଜୀବନ ଜୀବିକାକୁ ଉନ୍ନତ କରିବ ବୋଲି କହିଛନ୍ତି । ପରିଶ୍ରମକୁ ମିଳିଲା ଉଚିତ ମୂଲ୍ୟ । କୋରପୁଟ କଫି କିଣିଲା ଟାଟା କମ୍ପାନୀ । ଅନୁକୂଳ ପରିବେଶ, ଅର୍ଗାନିକ ପଦ୍ଧତିରେ ଚାଷ । ବିଶ୍ୱ ବଜାରରେ କରିବ କମାଲ । କୋରାପୁଟ କଫିର ଗୁଣବତ୍ତା ହିଁ ଟାଟା ଭଳି କମ୍ପାନୀକୁ ଆକୃଷ୍ଟ କରିଛି । ରାଜ୍ୟ ସରକାରଙ୍କ ଉଦ୍ୟମ କ୍ରମେ କୋରାପୁଟ କଫି ଚାଷୀଙ୍କ ଠାରୁ ପ୍ରଥମ ପର୍ଯ୍ୟାୟରେ ପ୍ରାୟ ୩୨ ଟନ କଫି କିଣି ଟାଟା । ପୂର୍ବରୁ ଦଲାଲ ମାନଙ୍କୁ କଫି ମଞ୍ଜି ମାତ୍ର ୨ଶହ ଟଙ୍କାରେ ବିକ୍ରି କରୁଥିଲେ ଚାଷୀ । ଏବେ ଟିଡିସିସିଓଏଲର ପ୍ରୟାସରେ କେଜି ପ୍ରତି ୨୩୦ ଟଙ୍କାରେ ଟାଟା କମ୍ପାନୀକୁ ବିକ୍ରି କରିଛନ୍ତି ।

Image

ତେବେ ପରିଶ୍ରମର ଉଚିତ ମୂଲ୍ୟ ପାଇଥିବାରୁ ଖୁସିବ୍ୟକ୍ତ କରିବା ସହ କଫି ଚାଷ ପାଇଁ ଏହା ଆଦିବାସୀଙ୍କୁ ଉତ୍ସାହିତ କରିବ ବୋଲି କହିଛନ୍ତି କଫି ଚାଷୀ । ସେପଟେ କୋରପୁଟ କଫି ପାଇଁ ଏବେ ବିଶ୍ୱବଜାରର ଦ୍ୱାରା ଉନ୍ମୁକ୍ତ ହୋଇଥିବାରୁ ମୁଖ୍ୟମନ୍ତ୍ରୀ ଶୁଭେଚ୍ଛା ଜଣାଇବା ସହ କସମପଦରର କଫି ଚାଷୀ ସୁଲୋଚନା ଖରାଙ୍କୁ ପ୍ରଂଶସା କରିଛନ୍ତି । କୋରପୁଟରେ କଫି ଉତ୍ପାଦନ ବଢାଇବାକୁ ଅତ୍ୟାଧୁନିକ ପ୍ରକ୍ରିୟାକରଣ ୟୁନିଟ ସ୍ଥାପନ ପାଇଁ ପ୍ରସ୍ତାବ ରହିଛି । ଟିଡିସିସିଓଏଲ ପକ୍ଷରୁ ୨ ଟନ କଫି ପ୍ରକ୍ରିୟାକରଣ କରାଯାଇ କୋରାପୁଟ କଫି ବ୍ରାଣ୍ଡ ନାଁରେ ବିକ୍ରିକରାଯାଇଛି । ଆଗକୁ କଫିର ବଜାରୀକରଣ ପାଇଁ ପ୍ରଶାସନ ପକ୍ଷରୁ ଉଦ୍ୟମ କରାଯାଉଥିବା କହିଛନ୍ତି ଜିଲ୍ଲାପାଳ । ସେପଟେ ରାଜ୍ୟ ସରକାରଙ୍କୁ ପକ୍ଷରୁ କଫି ଉତ୍ପାଦନକାରୀଙ୍କୁ ଦକ୍ଷତା ବୃଦ୍ଧି ତାଲିମ ଦିଆଯାଇଛି । ୨୦୨୧-୨୨ ବର୍ଷରେ ଅଧିକ ୮୦ ହେକ୍ଟର ଜମିରେ କଫି ଉତ୍ପାଦନ ପାଇଁ ଲକ୍ଷ୍ୟ ରହିଛି।  କୋରାପୁଟ ଜିଲ୍ଲାର ଶୀତଳ ଜଳବାୟୁ କଫି ଚାଷ ପାଇଁ ବେଶ ଅନୂକୁଳ । ହେଲେ ବଜାର ଅଭାବରୁ ଉତ୍ପାଦିତ କଫି କର୍ଣ୍ଣାଟକ ଓ ଆନ୍ଧ୍ରକୁ ରପ୍ତାନି ପରେ ସେଠାରେ ବ୍ରାଣ୍ଡିଂ ହୋଇ ବଜାରକୁ ଆସୁଥିଲା । ଏବେ କଫିଚାଷୀଙ୍କ ଖୁସିର ଦିନ ଆସିଛି । ପରିଶ୍ରମର ମୂଲ୍ୟ ମିଳିବା ସହ ସ୍ୱତନ୍ତ୍ର ପରିଚୟ ବି ସୃଷ୍ଟି ହୋଇଛି ।

ଏଥିସହିତ ପଢ଼ନ୍ତୁ: ଏଣକି ଟାଟା କମ୍ପାନୀ ବିକ୍ରି କରିିବ କୋରାପୁଟ କଫି: ବଜାୟ ରହିବ ସ୍ୱତନ୍ତ୍ରତା,ବଢ଼ିବ ଚାହିଦା

ଅଲିମ୍ପିକ୍ସ ପଦକ ବିଜେତାଙ୍କୁ ଦିଲ୍ଲୀରେ ବିପୁଳ ସ୍ୱାଗତ ସମ୍ୱର୍ଦ୍ଦନା: ଅନୁଭୂତି ବଖାଣିଲେ ଖେଳାଳି

ନୂଆଦିଲ୍ଲୀ: ଦରିଆ ପାରିରେ ଇତିହାସ ରଚି ଦିଲ୍ଲୀ ଫେରିଲେ ଭାରତୀୟ ଅଲିମ୍ପିଆନ । ସାଇନିଂ ଷ୍ଟାରଙ୍କୁ ରାଜଧାନୀ ଦିଲ୍ଲୀରେ ଶାନଦାର ସ୍ୱାଗତ । ଅଲିମ୍ପିକ୍ସ ହିରୋଙ୍କ ସ୍ୱାଗତ ପାଇଁ ଉତ୍ସବମୁଖର ହେଲା ଦିଲ୍ଲୀ ଏୟାରପୋର୍ଟ । ଅସମ୍ଭାଳ ଭିଡ଼ ଭିତରେ ଢୋଲ, ମହୁରୀ ବଜାଇ ଟୋକିଓ ହିରୋଙ୍କୁ ପାଛୋଟି ନେଲେ ରାଜଧାନୀବାସୀ । ସ୍ୱାଗତ କରିବାକୁ ଦିଲ୍ଲୀ ବିମାନବନ୍ଦର ବାହାରେ ଭବ୍ୟ ଆୟୋଜନ କରାଯାଇଥିଲା । ସ୍ୱର୍ଣ୍ଣ ପଦକ ବିଜେତା ନୀରଜ ଚୋପ୍ରା, ରୌପ୍ୟ ବିଜେତା ରବି ଦହିୟା ଓ ବ୍ରୋଞ୍ଜ ପଦକ ବିଜେତା ବଜରଙ୍ଗ ପୁନିଆଙ୍କୁ ସ୍ୱାଗତ କରାଯାଇଥିଲା । ସେହିପରି ବକ୍ସର ଲଭଲିନା ଓ ପୁରୁଷ ହକି ଟିମକୁ ବିମାନବନ୍ଦର ବାହାରେ ଗ୍ରାଣ୍ଡ ସ୍ୱାଗତ କରିଥିଲା ଦିଲ୍ଲୀ । ସମସ୍ତ ବିଜେତାଙ୍କୁ କେନ୍ଦ୍ର ସରକାରଙ୍କ ପକ୍ଷରୁ ସମ୍ବର୍ଦ୍ଧନା ଦିଆଯାଇଥିଲା । ମଞ୍ଚ ଉପରେ ଅଲିମ୍ପିକ୍ସ ଅଭିଜ୍ଞତା ବଖାଣିଥିଲେ ବିଜେତା । ଏହି ଅବସରରେ ଦେଶବାସୀ ଅଜସ୍ର ଭଲ ପାଇବା ଦେଇଥିବାରୁ ଧନ୍ୟବାଦ ଦେଇଥିଲେ ସମସ୍ତ ଖେଳାଳି । ସମାରୋହରେ କେନ୍ଦ୍ର କ୍ରୀଡ଼ାମନ୍ତ୍ରୀ ଅନୁରାଗ ଠାକୁର, ପୂର୍ବତନ କ୍ରୀଡା ମନ୍ତ୍ରୀ କିରଣ ରିଜୁଜୁ ସାମିଲ ହୋଇଥିଲେ । ଟୋକିଓ ଅଲିମ୍ପିକ୍ସରେ ୭ଟି ପଦକ ଜିତି ଇତିହାସ ରଚିଛି ଭାରତ । ଅଲିମ୍ପିକ୍ସରେ ଭାରତ ପାଇଁ ସ୍ୱର୍ଣ୍ଣ ଜିତି ଅଲିମ୍ପିକ୍ସ ଇତିହାସରେ ନୂତନ ଫର୍ଦ୍ଦ ଯୋଡ଼ିଛନ୍ତି ହରିୟାଣାର ନୀରଜ ଚୋପ୍ରା। ମଣିପୁରର ଆଇରନ୍ ଲେଡି ମୀରାବାଇ ଚାନୁ ଦେଶପାଇଁ ପ୍ରଥମ ରୌପ୍ୟ ଜିତିଛନ୍ତି । ରେସଲିଂରେ ରବି କୁମାର ଦହିୟା ଦେଶ ପାଇଁ ଦ୍ୱିତୀୟ ରୌପ୍ୟ ପଦକ ଜିତିଛନ୍ତି । ବକ୍ସିଂରେ ବ୍ରୋଞ୍ଜ ଜିତିଛନ୍ତି ଆସାମର ଲଭଲିନା । କୁସ୍ତିରେ ବଜରଙ୍ଗ ପୁନିଆ ବ୍ରୋଞ୍ଜ ଜିତିଥିବା ବେଳେ ହକିରେ ପୁରୁଷ ହକି ଟିମ୍ ବ୍ରୋଞ୍ଜ ପଦକ ଜିତିଛି । ୪୧ ବର୍ଷ ପରେ ମେଡାଲ୍ ଜିତି ଇତିହାସ ରଚିଛନ୍ତି ପୁରୁଷ ହକି ଦଳ। ଟିମ୍‌ ସେମିରେ ହାରିବା ପରେ ପ୍ଲେ-ଅଫରେ ବେଲଜିୟମକୁ ହରାଇଥିଲା। ସେହିପରି ବ୍ୟାଡ୍‌ମିଣ୍ଟନରେ ବ୍ରୋଞ୍ଜ ଜିତିଛନ୍ତି ହାଇଦ୍ରାବାଦର ପିଭି ସିନ୍ଧୁ । ଅଲିମ୍ପିକ୍ସର ପ୍ରଥମ ଦିବସରେ ଭାରତ ରୌପ୍ୟ ଜିତିଥିବା ବେଳେ ସ୍ୱର୍ଣ୍ଣ ଜିତି ଅଭିଯାନ ଶେଷ କରିଥିଲା ।

ଏଥିସହିତ ପଢ଼ନ୍ତୁ: ବିରାମ ନେଲା କ୍ରୀଡ଼ା ମହାକୁମ୍ଭ ଟୋକିଓ: ଆମେରିକାର ହାତେଇଲା ସର୍ବାଧିକ ପଦକ, ଶେଷରେ ଭାରତକୁ ସ୍ୱର୍ଣ୍ଣ

ପଛୁଆ ବର୍ଗ ତାଲିକା ପ୍ରସ୍ତୁତ କରିବା ନେଇ କ୍ଷମତା ପାଇବ ରାଜ୍ୟ: ବିଲ୍‌କୁ ମିଳିଛି ବିରୋଧୀଙ୍କ ସମର୍ଥନ

ନୂଆଦିଲ୍ଲୀ: ରାଜ୍ୟ ହାତକୁ ଆସିବ ପଛୁଆ ବର୍ଗ ତାଲିକା ପ୍ରସ୍ତୁତ କରିବା କ୍ଷମତା । ଲୋକସଭାରେ ଆଗତ ହୋଇଛି ଓବିସି ବିଲ୍  । ୭ ରାଜ୍ୟର ନିର୍ବାଚନ  ମୁଣ୍ଡ ଉପରେ ଥିବାବେଳେ ଓବିସି ବିଲ୍ ଗୃହୀତ କରିବା ଲାଗି ଜୋରଦାର କସରତ ଚାଲିଛି। ପେଗାସସ ମାମଲାରେ ସରକାରଙ୍କୁ ବିରୋଧ କରୁଥିବା ବିରୋଧୀ ଓବିସି ବିଲକୁ କିନ୍ତୁ ସମର୍ଥନ କରିଛନ୍ତି ।

କେନ୍ଦ୍ର କରୁଥିଲା ଏଣିକି ରାଜ୍ୟ କରିବ  । ରାଜ୍ୟ ହାତକୁ ଆସିବ ପଛୁଆ ବର୍ଗଙ୍କ ତାଲିକା ପ୍ରସ୍ତୁତ କରିବା କ୍ଷମତା । ସଂସଦ ଅଧିବେଶନର ଶେଷ ପର୍ଯ୍ୟାୟରେ ବିଲ୍ ପାଇଁ କସରତ । ଆଗକୁ ୭ ରାଜ୍ୟ ନିର୍ବାଚନ ଓ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ବିଲ୍‌କୁ ସମର୍ଥନ କରିଛନ୍ତି ୧୫ ବିରୋଧୀ ଦଳ । ମରାଠାଙ୍କ ଲାଗି ସଂରକ୍ଷଣ ସୁବିଧା ସୁପ୍ରିମକୋର୍ଟରେ ଖାରଜ ପରେ ବିଲ୍ ଆଣିବାକୁ ତତ୍ପର ହୋଇଥିଲା କେନ୍ଦ୍ର । ୧୨୭ତମ ସମ୍ବିଧାନ ସଂଶୋଧନ ବିଲ୍ ରାଷ୍ଟ୍ରପତିଙ୍କ ସ୍ବୀକୃତି ପାଇଲେ ରାଜ୍ୟମାନେ ତିଆରି କରିବେ ଓବିସି ତାଲିକା । ୧୦୨ତମ ସମ୍ବିଧାନ ସଂଶୋଧନ ଯୋଗୁ ଓବିସି ତାଲିକା ପ୍ରସ୍ତୁତ କରିବା କ୍ଷମତା ରାଜ୍ୟ ହାତରୁ ଚାଲିଯାଇଥିଲା । ଯଦି ରାଜ୍ୟଗୁଡିକର ତାଲିକା କରିବା କ୍ଷମତା ରହିବ ନାହିଁ ତେବେ ଦେଶରେ ୬୭୧ ଓବିସି ଜାତି ଏହି ସୁବିଧାରୁ ବଞ୍ଚିତ ହେବେ । ସେପଟେ ବିଲକୁ ସମର୍ଥନ କରିଛି ବିଜେଡି । ହେଲେ ରାଜ୍ୟ ତାର ସ୍ୱତନ୍ତ୍ର ପଛୁଆ ବର୍ଗଙ୍କ ଗଣନା କରିବ ବୋଲି ବିଜେଡି କହିଛି  ।

ତେବେ ଓବିସି ସଂରକ୍ଷଣରୁ ୫୦ ପ୍ରତିଶତ ସୀମାକୁ ହଟାଇବା ଲାଗି ଦାବି କରିଛି କଂଗ୍ରେସ । ଦଳ କହିଛି ସଂରକ୍ଷଣ ସୀମା ୫୦ପ୍ରତିଶତ ହଟାଇଲେ ରାଜ୍ୟ ବିଶେଷ ଲାଭବାନ ହେବ । ତେଣେ କଂଗ୍ରେସ ଏହି ଦାବିକୁ ଅଧିକ ଜୋର ଦେଲେ ଏହାକୁ ଅଣଦେଖା କରିବ ନାହିଁ ବିଜେପି ।

ଲୋକଙ୍କ ଶରୀରରେ ଅଧିକ ରୋଗ ପ୍ରତିରୋଧକ ଶକ୍ତି ସୃଷ୍ଟି କରିଛି ଟିକା: ଶିଶୁଙ୍କୁ ନେଇ କିଛି ଏଭଳି କହିଲେ ବିଶେଷଜ୍ଞ

ଭୁବନେଶ୍ୱର: ୩ ମାସ ସତର୍କ ରହିଲେ ଆସିବନି ତୃତୀୟ ଲହର । ଲୋକଙ୍କ ଶରୀରରେ ଅଧିକ ରୋଗ ପ୍ରତିରୋଧକ ଶକ୍ତି ସୃଷ୍ଟି ହୋଇଥିବାରୁ ତୃତୀୟ ଲହର ରାଜ୍ୟରେ ସେତେଟା ପ୍ରଭାବ ପକାଇବ ନାହିଁ । ଏଯାଏଁ ୧କୋଟି ୭୮ଲକ୍ଷ ଲୋକ ଟିକା ନେଇ ସାରିଥିବା ବେଳେ ଆଗକୁ ଗ୍ରାମାଞ୍ଚଳକୁ ଅଧିକ ଫୋକସ କରାଯିବ । ତେବେ ତୃତୀୟ ଲହରରେ ୧୫ ପ୍ରତିଶତ ଶିଶୁ ଆକ୍ରାନ୍ତ ହେବାର ଆଶଙ୍କା ରହିଛି ।

ରାଜ୍ୟରେ ଦିଆଗଲାଣି ୧କୋଟି ୭୮ଲକ୍ଷ ଡୋଜ୍‌ ଟିକା। ୧କୋଟି ୩୭ଲକ୍ଷ ପ୍ରଥମ ଡୋଜ ନେଇଥିବା ବେଳେ ୪୧ ଲକ୍ଷ ଦ୍ୱିତୀୟ ଡୋଜ ନେଇଛନ୍ତି । ସେହିପରି ୫୭ ହଜାର ଗର୍ଭବତୀଙ୍କୁ ଦିଆଯାଇଛି ଭ୍ୟାକସିନ୍‌ । ରାଜ୍ୟରେ ଲୋକଙ୍କ ଶରୀରରେ ୬୫ରୁ ୭୦ ପ୍ରତିଶତ ରୋଗ ପ୍ରତିରୋଧକ ଶକ୍ତି ସୃଷ୍ଟି ହୋଇଛି । ବୟସ୍କଙ୍କ କ୍ଷେତ୍ରରେ ୮୨ ପ୍ରତିଶତ ଓ ଶିଶୁଙ୍କ କ୍ଷେତ୍ରରେ ୫୪ ପ୍ରତିଶତ ଆଣ୍ଟିବଡି ସୃଷ୍ଟି ହୋଇଛି । ଅଧିକାଂଶ ଲୋକଙ୍କ ଶରୀରରେ ହର୍ଡ ଇମ୍ୟୁନିଟି ସୃଷ୍ଟି ହୋଇଥିବାରୁ ରାଜ୍ୟକୁ ତୃତୀୟ ଲହର ଆସିବା ସମ୍ଭାବନା ବହୁତ କମ୍‌ ରହିଛି। ଆଗାମୀ ୩ରୁ ୪ ମାସ ସଚେତନ ରହିଲେ ଆଉ ସଂକ୍ରମଣ ଆସିବ ନାହିଁ ବୋଲି ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି ।

ରାଜ୍ୟରେ ତୃତୀୟ ଲହର ସେତେଟା ପ୍ରଭାବ ପକାଇବ ନାହିଁ ବୋଲି ସ୍ୱାସ୍ଥ୍ୟ ବିଭାଗ ଆକଳନ କରିଛି। ଯଦି ତୃତୀୟ ଲହର ଆସେ ତେବେ ୧୫ ପ୍ରତିଶତ ଶିଶୁ ଆକ୍ରାନ୍ତ ହେବାର ଆଶଙ୍କା ରହିଛି। ଏଥିପାଇଁ ସ୍ୱାସ୍ଥ୍ୟ ଭିତ୍ତିଭୂମି, ମାନବ ସମ୍ବଳ ଓ ତାଲିମ ଉପରେ ଗୁରୁତ୍ୱ ଦେଇଛନ୍ତି ରାଜ୍ୟ ସରକାର। ଆଗଧାଡ଼ିର ଯୋଦ୍ଧା ଅଙ୍ଗନବାଡ଼ି ଓ ଆଶାକର୍ମୀଙ୍କୁ ତାଲିମ ଦିଆଯାଇଛି । ଏବେ ୬ଟି ବ୍ୟାଚରେ ଶିଶୁ ଚିକିତ୍ସକଙ୍କୁ ପ୍ରଶିକ୍ଷଣ ଦିଆଯାଉଛି। ଏଣିକି ହ୍ୱାଟସ୍‌ଆପ୍ ନମ୍ବର ଜରିଆରେ ଟିକାକରଣ ସାର୍ଟିଫିକେଟ ଡାଉନଲୋଡ କରିହେବ । ଏଥିଲାଗି ସରକାରଙ୍କ ପକ୍ଷରୁ ନମ୍ବର ଜାରି କରାଯାଇଛି। ଜାରି ହୋଇଥିବା ନମ୍ବରଟି ହେଉଛି- ୯୦୧୩୧୫୧୫୧୫ । ସେପଟେ ରାଜ୍ୟରେ ତଳମୁହାଁ କରୋନା। ଦ୍ୱିତୀୟ ଲହରରେ ପ୍ରଥମ ଥର ପାଇଁ ହଜାରେ ତଳକୁ ଖସିଛି ଦୈନିକ ସଂକ୍ରମଣ। ଦିନକରେ ୮୮୬ ପଜିଟିଭ ଚିହ୍ନଟ ହୋଇଥିବା ବେଳେ ୨୪ଘଣ୍ଟାରେ ସୁସ୍ଥ ହୋଇଛନ୍ତି ୧୪ଶହ ୬୩ ।

ଆସନ୍ତା ୨୩ରୁ ରାଜଧାନୀରେ ଭକ୍ତଙ୍କ ପାଇଁ ଖୋଲିବ ଧର୍ମାନୁଷ୍ଠାନ

ଭୁବନେଶ୍ୱର: ଭକ୍ତଙ୍କ ପାଇଁ ଖୁସି ଖବର । ଆସନ୍ତା ୨୩ରୁ ରାଜଧାନୀରେ ଭକ୍ତଙ୍କ ଦର୍ଶନ ଓ ପୂଜାର୍ଚ୍ଚନା ନେଇ ଖୋଲିବ ସମସ୍ତ ଧାର୍ମିକ ଅନୁଷ୍ଠାନ । ଏ ନେଇ ବିଏମ୍‌ସି ପକ୍ଷରୁ ଜାରି ହୋଇଛି ମାର୍ଗଦର୍ଶିକା । ତେବେ କୋଭିଡ ଗାଇଡଲାଇନ୍ ପାଳନକୁ ବାଧ୍ୟତାମୂଳକ କରାଯାଇଛି । ତେବେ ୨୩ ପରେ ଲିଙ୍ଗରାଜ ମନ୍ଦିର ଖୋଲିବା ନେଇ ମନ୍ଦିର ଟ୍ରଷ୍ଟ ବୋର୍ଡ ନେଇପାରିବେ ନିଷ୍ପତ୍ତି । ଏନେଇ ବିଭିନ୍ନ ଧର୍ମର ନେତୃବୃନ୍ଦଙ୍କ ସହ ଭର୍ଚୁଆଲରେ ହୋଇଥିଲା ଆଲୋଚନା। ସିଂହଦ୍ଵାର ଓ ଆଡକାଠ ଠାରୁ ଭକ୍ତଙ୍କ ଦର୍ଶନ ପାଇଁ ଅନୁମତି । ଭୋଗ ଲାଗିବା ଉପରେ ବି ରୋକ ଲଗାଯାଇଛି । ସାମାଜିକ ଦୂରତା ଓ ମାସ୍କ ବାଧ୍ୟତାମୂଳକ କରାଯାଇଛି । ୨୫ରୁ ଅଧିକ ଭକ୍ତଙ୍କ ଏକାଠି ଦର୍ଶନ ମନା। ଛେପ ପକାଇବା ଓ ଗୁଟଖା ଖାଇବା ଉପରେ ରୋକ ଲଗାଯାଇଛି ।ବରିଷ୍ଠ ନାଗରିକ, ଗର୍ଭବତୀ ମହିଳା, ୧୮ବର୍ଷରୁ କମ ବୟସ୍କ ଓ ଅନ୍ୟ ସମ୍ବେଦନଶୀଳ ବର୍ଗଙ୍କୁ ଧାର୍ମିକ ଅନୁଷ୍ଠନ ଯିବା ଉପରେ ବି କଟକଣା।

ଏଥିସହିତ ପଢ଼ନ୍ତୁ: Cabinet Decision: ୮୯ ଗୋଟି ବହୁମୁଖୀ ଇନଡୋର ଷ୍ଟାଡିୟମ ନିର୍ମାଣକୁ ମଞ୍ଜୁରୀ

ଉତ୍ତର ଭୁବନେଶ୍ୱରରେ ନିର୍ମାଣ ହେବ ଇନ୍‌ଡୋର ଷ୍ଟାଡିୟମ୍: ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଲେ ବିଧାୟକ ସୁଶାନ୍ତ ରାଉତ

ଭୁବନେଶ୍ୱର: ରାଜ୍ୟ କ୍ୟାବିନେଟ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟରେ କ୍ରୀଡା ଉପରେ ଅଧିକ ଗୁରୁତ୍ୱ ଦେଇଛନ୍ତି । ରାଜ୍ୟରେ ୮୯ ଇନ୍‌ଡୋର ଷ୍ଟାଡ଼ିୟମ ନିର୍ମାଣ ପ୍ରସ୍ତାବକୁ ଅନୁମୋଦନ କରିଛି କ୍ୟାବିନେଟ । ଏଥି ପାଇଁ ୬୯୩.୩୫ କୋଟି ବ୍ୟୟ ବରାଦ କରାଯାଇଛି । ଯାହା ୧୮ ମାସ ମଧ୍ୟରେ ସଂପୂର୍ଣ୍ଣ କରାଯିବ । ସେହିପରି ଭୁବନେଶ୍ୱର ଉତ୍ତର ନିର୍ବାଚନ ମଣ୍ଡଳୀରେ ମଧ୍ୟ ୯ କୋଟି ୫୫ ଲକ୍ଷ ବ୍ୟୟରେ ଏକ ଇନଡୋର ଷ୍ଟାଡିଅମ ନିର୍ମାଣ କରାଯିବ । ତେବେ ଏହି ଷ୍ଟାଡିଅମ ନିର୍ମାଣ ହେବା ଦ୍ୱାରା ରାଜ୍ୟରୁ ବହୁ ପ୍ରତିଭାବାନ କ୍ରୀଡ଼ାବିତ ବାହାରିବେ ବୋଲି ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ ରାଉତ ଏକ ସାମ୍ବାଦିକ ସମିଳନୀରେ କହିଛନ୍ତି । ସେହିପରି ଏଭଳି ଇନ୍‌ଡୋର ଷ୍ଟାଡିୟମ୍ ଉତ୍ତର ଭୁବନେଶ୍ୱରରେ ନିର୍ମାଣ ହେବାକୁ ଯାଉଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି ଯୁବ କ୍ରୀଡାବିତ୍ ।

ଏଥିସହିତ ପଢ଼ନ୍ତୁ: Cabinet Decision: ୮୯ ଗୋଟି ବହୁମୁଖୀ ଇନଡୋର ଷ୍ଟାଡିୟମ ନିର୍ମାଣକୁ ମଞ୍ଜୁରୀ

୧୬ ପ୍ରସ୍ତାବକୁ କ୍ୟାବିନେଟ୍‌ ମଞ୍ଜୁରୀ: ଅପର ଇନ୍ଦ୍ରାବତୀ ଦକ୍ଷିଣ ପାର୍ଶ୍ୱ କେନାଲର ପୁନରୁଦ୍ଧାରକୁ ଅନୁମୋଦନ

ଭୁବନେଶ୍ୱର: ରାଜ୍ୟ କ୍ୟାବିନେଟରେ ୧୬ଟି ପ୍ରସ୍ତାବକୁ ମଞ୍ଜୁରୀ ମିଳିଛି । ସେଥିରୁ ୮୯ଟି ବହୁମୁଖୀ ଇଣ୍ଡୋର ଷ୍ଟାଡିୟମକୁ ବ୍ୟତୀତ ଅନ୍ୟ ୧୫ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ମଧ୍ୟ ମଞ୍ଜୁରୀ ଦେଇଛି ରାଜ୍ୟ କ୍ୟାବିନେଟ୍ ।

  •  ଅପର ଇନ୍ଦ୍ରାବତୀ ଦକ୍ଷିଣ ପାର୍ଶ୍ୱ କେନାଲର ପୁନରୁଦ୍ଧାର କରାଯିବ । ଏଥିପାଇଁ ୧୪୮ କୋଟି ୧୨ ଲକ୍ଷ ୬୫ ହଜାର ୮୯୪ ଦଶମିକ ୩୦କୋଟି ଟଙ୍କା ଖର୍ଚ୍ଚ କରାଯିବ ।
  •  ଓଡ଼ିଶା ଅର୍ଥସେବା କ୍ୟାଡରର ପୁନର୍ଗଠନ । ପଦବୀ ସଂଖ୍ୟା ୯୧୨ରୁ ୧ହଜାର ୧୬କୁ ବୃଦ୍ଧି ପ୍ରସ୍ତାବକୁ ମଞ୍ଜୁରୀ ।
  •  ଓଡ଼ିଶା ଅଗ୍ନିଶମ ସେବା A ଓ B ବର୍ଗ ଅଧିକାରୀମାନଙ୍କୁ ନିଯୁକ୍ତି ଓ ଚାକିରି ସର୍ତ୍ତାବଳୀ ।
  •  ଓଡ଼ିଶା ଦ୍ରବ୍ୟ ଓ ସେବାକର ଅଧିନିୟମ ୨୦୧୭କୁ ସଂଶୋଧନ ।
  •  ଅଞ୍ଜନ କୁମାର ମାଣିକଙ୍କୁ ଓଡ଼ିଶା ଲୋକସେବା ଆୟୋଗର ସଦସ୍ୟ ଭାବେ ନିଯୁକ୍ତି ଦିଆଯାଇଛି ।
  • ଓଡ଼ିଶା କାରିଗର କିମ୍ବା ସୁଧାର ଅମଲା ସେବା ନିୟମାବଳୀ-୨୦୨୧ ପ୍ରଣୟନ କରାଯାଇଛି । ଯାହାଦ୍ୱାରା କନିଷ୍ଠ କିରାଣି ତଥା ଟାଇପିଷ୍ଟ, କନିଷ୍ଠ ହିସାବ ରକ୍ଷକ, ବରିଷ୍ଠ କିରାଣି ତଥା ହିସାବ ରକ୍ଷକ ନିଯୁକ୍ତି ପଦ୍ଧତି ଏବଂ ସେବା ଚାକିରି ଓ ପଦୋନ୍ନତିର ବ୍ୟବସ୍ଥା କରାଯାଇଛି ।
  • ଓଡ଼ିଶା ଘରୋଇ ସୁରକ୍ଷା ଏଜେନ୍ସି-୨୦୨୧ର ସଂଶୋଧନ । ଏଣିକି ଅନଲାଇନରେ ଓ ଅଫଲାଇନ ମାଧ୍ୟମରେ ଘରୋଇ ସୁରକ୍ଷା ଏଜେନ୍ସି ଲାଇସେନସ୍ ଓ ଡାଟାବେସ୍ ଆବେଦନ କରିପାରିବେ ।
  • ଓଡ଼ିଶା ଶ୍ରମ ସେବା ସର୍ତ୍ତାବଳୀ ନିୟମାବଳୀ ୨୦୧୯ରେ ସଂଶୋଧନ । ଏହାଦ୍ୱାରା ଖାଲି ପଡ଼ିଥିବା ଜିଲ୍ଳା ଶ୍ରମ ଅଧିକାରୀ ପଦ ପୂରଣ ହୋଇପାରିବ ।
  • ସମ୍ବଲପୁର ଆଇଆଇଏମ୍ ସ୍ଥାୟୀ କ୍ୟାମ୍ପସ୍ ପାଇଁ ରାଜ୍ୟ ସରକାର ଜମି ଯୋଗାଇବେ । ଆଉ ୧୮ ଦଶମିକ ୨୩ଏକର ଜମି ଯୋଗାଇବାକୁ କ୍ୟାବିନେଟ୍ ନିଷ୍ପତ୍ତି ନେଇଛି ।
  • ବାଗ୍‌ଚୀ ଶ୍ରୀଶଙ୍କର କ୍ୟାନସର ସେଣ୍ଟର ପାଇଁ ଷ୍ଟାମ୍ପ ଡ୍ୟୁଟି ଛାଡ଼ କରାଯିବ । 2 କୋଟି 96 ଲକ୍ଷ ଟଙ୍କା ଛାଡ଼ କରାଯିବ ବୋଲି କ୍ୟାବିନେଟ ବୈଠକରେ ନିଷ୍ପତ୍ତି ।
  •  ଶ୍ରୀମନ୍ଦିର ପରିକଳ୍ପନା ପ୍ରକଳ୍ପରୁ କ୍ୟାବିନେଟର ମୋହର । ୧୮ମାସରେ ସମ୍ପୂର୍ଣ୍ଣ ହେବ କାର୍ଯ୍ୟ । ପ୍ରୋଜେକ୍ଟ ପାଇଁ ବ୍ୟୟବରାଦ ହୋଇଛି ୩୩୧ କୋଟିରୁ ଊର୍ଦ୍ଧ୍ବ ଟଙ୍କା ।
  • ଓଡ଼ିଶା ରାଜ୍ୟ ଖାଦ୍ୟ ପରୀକ୍ଷଣ ବିଜ୍ଞାନଗାର ନିଯୁକ୍ତି ଏବଂ ସେବା ସର୍ତ୍ତାବଳୀ ନିୟମ ସଂଶୋଧନ -୨୦୨୧ ପ୍ରସ୍ତାବ ଆଗତ ।
  •  ଓଡ଼ିଶା ଅଗ୍ନିଶମ ସେବାର ସି’ ବର୍ଗର ଅଧିକାରୀମାନଙ୍କ ନିଯୁକ୍ତି ସର୍ତ୍ତାବଳୀ-୨୦୨୧, ଓଡ଼ିଶା ଅଗ୍ନିଶମ ସେବା ଅଧିନିୟମ ୧୯୯୩ ଧାରା ୨୬-୨-(ସି) ଅନୁଯାୟୀ ପ୍ରସ୍ତୁତି କରାଯାଇଛି ।
  •  ବାଗଚୀ ଶ୍ରୀକର୍କଟ କେନ୍ଦ୍ର ଓ ଗବେଷଣା ପ୍ରତିଷ୍ଠାନ ଏବଂ ବାଗଚୀ କରୁଣାଶ୍ରୟ ପାଲିଏଟିଭ ସେବାକେନ୍ଦ୍ର ଭୁବନେଶ୍ୱରଠାରେ ପ୍ରତିଷ୍ଠା ହେବ । ଏହି ଦୁଇ ପ୍ରତିଷ୍ଠାନ ପାଇଁ ଜମି ଯୋଗାଇବେ ରାଜ୍ୟ ସରକାର ।

ଏଥିସହିତ ପଢ଼ନ୍ତୁ: Cabinet Decision: ୮୯ ଗୋଟି ବହୁମୁଖୀ ଇନଡୋର ଷ୍ଟାଡିୟମ ନିର୍ମାଣକୁ ମଞ୍ଜୁରୀ