ନନ୍ଦିଘୋଷବ୍ୟୁରୋ: ଆମେରିକାରେ ଚାକିରି କରିବା ସହ ଗ୍ରୀନ୍ କାର୍ଡ ପାଇବାକୁ ଆଶା ରଖିଥିବା ବିଦେଶୀ କର୍ମଚାରୀଙ୍କ ପାଇଁ ଆସିପାରେ ବଡ଼ ଝଟକା। ବିଦେଶୀ କର୍ମଚାରୀଙ୍କୁ ଗ୍ରୀନ୍ କାର୍ଡ ପାଇଁ ସ୍ପନ୍ସର କରୁଥିବା କମ୍ପାନୀଗୁଡ଼ିକ ପାଇଁ ନିଯୁକ୍ତି ପ୍ରକ୍ରିୟାକୁ ଅଧିକ କଡ଼ା କରିବାକୁ ଆମେରିକା ପ୍ରସ୍ତାବ ଦେଇଛି। ଏହାର ମୁଖ୍ୟ ଉଦ୍ଦେଶ୍ୟ ହେଉଛି, ବିଦେଶୀଙ୍କୁ ନିଯୁକ୍ତି ଦେବା ପୂର୍ବରୁ ଯୋଗ୍ୟ ଆମେରିକୀୟ ପ୍ରାର୍ଥୀଙ୍କୁ ପ୍ରଥମ ସୁଯୋଗ ଦେବା।
ଆମେରିକାର Department of Labor, PERM ଇମିଗ୍ରାଣ୍ଟ ଭିସା ପ୍ରକ୍ରିୟା ଅଧୀନରେ ଶ୍ରମ ବଜାର ପରୀକ୍ଷା ନିୟମରେ ବଡ଼ ପରିବର୍ତ୍ତନ ପାଇଁ ପ୍ରସ୍ତାବ ରଖିଛି। ପ୍ରାୟ ୨୦ ବର୍ଷ ପରେ ଏହି ନିୟମରେ ପ୍ରଥମ ଥର ପାଇଁ ବଡ଼ ସଂଶୋଧନ ହେବାକୁ ଯାଉଛି। ନୂଆ ପ୍ରସ୍ତାବ ଅନୁସାରେ, ବିଦେଶୀ ପ୍ରାର୍ଥୀଙ୍କୁ ସୁହାଇବା ଭଳି ଚାକିରି ବିଜ୍ଞାପନ ପ୍ରସ୍ତୁତ କରିବା ଉପରେ ରୋକ୍ ଲାଗିବ। ଏଥିସହ ଆମେରିକୀୟ ପ୍ରାର୍ଥୀଙ୍କୁ ନିଯୁକ୍ତି ଦେବା ପାଇଁ କମ୍ପାନୀଗୁଡ଼ିକ ପ୍ରକୃତରେ ଚେଷ୍ଟା କରିଥିବାର ପ୍ରମାଣ ଦେବାକୁ ପଡ଼ିବ।
୩୦ ନୁହେଁ, ୯୦ ଦିନ ଯାଏଁ ଦେବାକୁ ପଡ଼ିବ ବିଜ୍ଞାପନ!
ନୂଆ ପ୍ରସ୍ତାବ ଅନୁସାରେ, ବିଦେଶୀ କର୍ମଚାରୀଙ୍କୁ ଗ୍ରୀନ୍ କାର୍ଡ ପାଇଁ ସ୍ପନ୍ସର କରିବାକୁ ଚାହୁଁଥିବା କମ୍ପାନୀଗୁଡ଼ିକୁ ନିଯୁକ୍ତି ବିଜ୍ଞାପନ ପାଇଁ ସମାନ ନିୟମ ଅନୁସରଣ କରିବାକୁ ପଡ଼ିବ। ଅନ୍ୟ ସାଧାରଣ ନିଯୁକ୍ତି ପାଇଁ ଯେଉଁ ପ୍ରକ୍ରିୟା ଆପଣାଯାଉଛି, ବିଦେଶୀଙ୍କୁ ସ୍ପନ୍ସର କରାଯାଉଥିବା ପଦବୀ ପାଇଁ ମଧ୍ୟ ସେହି ପ୍ରକ୍ରିୟା ଆପଣାଇବାକୁ ହେବ। ଏଥିସହ ପାରମ୍ପରିକ ଖବରକାଗଜ ବିଜ୍ଞାପନ ବଦଳରେ ଡିଜିଟାଲ୍ ମାଧ୍ୟମକୁ ଅଧିକ ଗୁରୁତ୍ୱ ଦିଆଯିବ। କମ୍ପାନୀ ୱେବସାଇଟ୍, ଅନଲାଇନ୍ ଜବ୍ ପୋର୍ଟାଲ୍, ସୋସିଆଲ୍ ମିଡିଆ, ଜବ୍ ଫେୟାର୍ ଏବଂ କ୍ୟାମ୍ପସ୍ ନିଯୁକ୍ତି ଭଳି ମାଧ୍ୟମ ବ୍ୟବହାର କରିବାକୁ ପଡ଼ିପାରେ।
ସବୁଠାରୁ ବଡ଼ ପରିବର୍ତ୍ତନ ହେଉଛି, ଚାକିରି ବିଜ୍ଞାପନର ସର୍ବନିମ୍ନ ସମୟସୀମା ୩୦ ଦିନରୁ ବୃଦ୍ଧି ପାଇ ୯୦ କ୍ୟାଲେଣ୍ଡର ଦିନ ହୋଇପାରେ।
ଅର୍ଥାତ୍ ବିଦେଶୀ କର୍ମଚାରୀଙ୍କୁ ସ୍ପନ୍ସର କରିବା ପୂର୍ବରୁ ଆମେରିକୀୟ ପ୍ରାର୍ଥୀଙ୍କୁ ଖୋଜିବା ପାଇଁ କମ୍ପାନୀଗୁଡ଼ିକୁ ଅଧିକ ସମୟ ଦେବାକୁ ହେବ। ଏନେଇ ଆମେରିକାର ଶ୍ରମ ସଚିବ କିଥ୍ ସଣ୍ଡରଲିଙ୍ଗ କହିଛନ୍ତି, ଏହି ପ୍ରସ୍ତାବ ଦ୍ୱାରା ଅଧିକ ଦରମା ଓ ଉଚ୍ଚ ଦକ୍ଷତା ଆବଶ୍ୟକ କରୁଥିବା ଚାକିରିରେ ଆମେରିକୀୟ କର୍ମଚାରୀଙ୍କୁ ପ୍ରଥମ ସୁଯୋଗ ମିଳିବ।
ନୂଆ ନିୟମ ଲାଗୁ ହେଲେ ନର୍ସ, ଫିଜିକାଲ୍ ଥେରାପିଷ୍ଟ ଏବଂ ବିଜ୍ଞାନ କିମ୍ବା କଳା କ୍ଷେତ୍ରରେ ଅସାଧାରଣ ଦକ୍ଷତା ଆବଶ୍ୟକ କରୁଥିବା କିଛି ପଦବୀ ପାଇଁ ମଧ୍ୟ ନିଯୁକ୍ତି ପ୍ରକ୍ରିୟା କଡ଼ା ହୋଇପାରେ। ବର୍ତ୍ତମାନ ଏହି କିଛି ବର୍ଗର ନିଯୁକ୍ତି ପାଇଁ ନିର୍ଦ୍ଦିଷ୍ଟ ଶ୍ରମ ବଜାର ଯାଞ୍ଚରୁ ଛାଡ଼ ମିଳୁଛି। କିନ୍ତୁ ନୂଆ ପ୍ରସ୍ତାବରେ ଏହି ପ୍ରଶାସନିକ ଛାଡ଼କୁ ହଟାଇବାକୁ ଯୋଜନା ରହିଛି। ଫଳରେ ଏହି ପଦବୀଗୁଡ଼ିକ ପାଇଁ ମଧ୍ୟ ଯୋଗ୍ୟ ଆମେରିକୀୟ ପ୍ରାର୍ଥୀଙ୍କୁ ବିଚାରକୁ ନେବାକୁ ପଡ଼ିବ। ଯଦି ଉପଯୁକ୍ତ ଆମେରିକୀୟ ପ୍ରାର୍ଥୀ ନମିଳନ୍ତି, ତେବେ ହିଁ ବିଦେଶୀ କର୍ମଚାରୀଙ୍କୁ ସ୍ପନ୍ସର କରିବା ଦିଗରେ ଆଗକୁ ବଢ଼ିପାରିବେ ନିଯୁକ୍ତିଦାତା।
ଆମେରିକୀୟ କର୍ମଚାରୀଙ୍କୁ ମିଳିବ ସୁରକ୍ଷା!
ଆମେରିକାରେ ନିକଟରେ ଚାକିରି ହରାଇଥିବା କର୍ମଚାରୀଙ୍କ ସୁରକ୍ଷା ପାଇଁ ମଧ୍ୟ ନୂଆ ପ୍ରସ୍ତାବରେ ବ୍ୟବସ୍ଥା ରହିଛି। ଶ୍ରମ ପ୍ରମାଣପତ୍ର ଏବଂ ଇମିଗ୍ରାଣ୍ଟ ପିଟିସନ୍ ପ୍ରକ୍ରିୟା ଚାଲିଥିବା ସମୟରେ ଯୋଗ୍ୟ ଛଟେଇ ହୋଇଥିବା ଆମେରିକୀୟ କର୍ମଚାରୀଙ୍କୁ ମଧ୍ୟ ବିଚାରକୁ ନେବାକୁ ପଡ଼ିବ କମ୍ପାନୀଗୁଡ଼ିକୁ। ଏହାସହ ଗତ ଦୁଇ ବର୍ଷ ମଧ୍ୟରେ ଆମେରିକୀୟ କର୍ମଚାରୀଙ୍କୁ ଛଟେଇ କରିଥିବା କିଛି ନିଯୁକ୍ତିଦାତା ସମାନ କିମ୍ବା ଏହା ସହ ଜଡ଼ିତ ପଦବୀ ପାଇଁ ସ୍ଥାୟୀ ଶ୍ରମ ପ୍ରମାଣପତ୍ର ଆବେଦନ କରିବାରୁ ବାରଣ ହୋଇପାରନ୍ତି। ଏହାଦ୍ୱାରା କମ୍ପାନୀଗୁଡ଼ିକ ନିଜ ଆମେରିକୀୟ କର୍ମଚାରୀଙ୍କୁ ଛଟେଇ କରି ସେହି ସ୍ଥାନରେ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେବାର ସମ୍ଭାବନା କମିବ।
PERM ଲେବର୍ ସାର୍ଟିଫିକେସନ୍ ହେଉଛି ଆମେରିକାରେ ଚାକିରି ଆଧାରିତ ଗ୍ରୀନ୍ କାର୍ଡ ପାଇଁ ଅଧିକାଂଶ ନିଯୁକ୍ତିଦାତାଙ୍କ ପ୍ରଥମ ପଦକ୍ଷେପ। ଏହି ପ୍ରକ୍ରିୟାରେ କମ୍ପାନୀକୁ ପ୍ରମାଣ କରିବାକୁ ପଡ଼େ ଯେ, ଉକ୍ତ ଚାକିରି ପାଇଁ କୌଣସି ଯୋଗ୍ୟ, ଇଚ୍ଛୁକ ଏବଂ ଉପଲବ୍ଧ ଆମେରିକୀୟ ପ୍ରାର୍ଥୀ ମିଳୁନାହାନ୍ତି। ଏହାପରେ ବିଦେଶୀ କର୍ମଚାରୀଙ୍କୁ ସ୍ଥାୟୀ ବାସିନ୍ଦା ମାନ୍ୟତା ବା ଗ୍ରୀନ୍ କାର୍ଡ ପାଇଁ ସ୍ପନ୍ସର କରାଯାଇପାରେ।
ଆମେରିକାର ଶ୍ରମ ବିଭାଗ କହିଛି ଯେ, ବର୍ତ୍ତମାନର ନିଯୁକ୍ତି ନିୟମ ଆଜିର ଡିଜିଟାଲ୍ ଯୁଗର ନିଯୁକ୍ତି ପ୍ରକ୍ରିୟା ସହ ତାଳ ଦେଇପାରୁନାହିଁ। କିଛି କମ୍ପାନୀ ବିଦେଶୀ କର୍ମଚାରୀଙ୍କ ପାଇଁ ଅଲଗା ନିଯୁକ୍ତି ପ୍ରକ୍ରିୟା ଏବଂ ସାଧାରଣ ନିଯୁକ୍ତି ପାଇଁ ଅଲଗା ପ୍ରକ୍ରିୟା ଆପଣାଉଥିବା ନେଇ ମଧ୍ୟ ଚିନ୍ତା ପ୍ରକାଶ କରିଛି ବିଭାଗ। ତେଣୁ ଏହି ପରିବର୍ତ୍ତନ ଦ୍ୱାରା ନିଯୁକ୍ତି ପ୍ରକ୍ରିୟା ଅଧିକ ସ୍ୱଚ୍ଛ ହେବା ସହ ଆମେରିକୀୟ କର୍ମଚାରୀଙ୍କୁ ପ୍ରାଥମିକତା ମିଳିବ ବୋଲି ଆଶା ରଖିଛି ଶ୍ରମ ବିଭାଗ।

