spot_img

Latest Posts

‘ଅର୍ଣ୍ଣବ’ର କ୍ଷତ ନଲିଭୁଣୁ ମାଡ଼ି ଆସୁଛି ଭୀଷଣ ବାତ୍ୟା ‘ଅକଭାନ୍‌’

ନନ୍ଦିଘୋଷବ୍ୟୁରୋ: ବାତ୍ୟା ‘ଅର୍ଣ୍ଣବ’ ଦେଇଥିବା ଦୁଃଖ ଓ ଯନ୍ତ୍ରଣା ଏଯାଏଁ ଲୋକଙ୍କ ମନରୁ ଲିଭିନାହିଁ । ଗାଁ ଦାଣ୍ଡରୁ ବାତ୍ୟାର ଚିହ୍ନ ନଲିଭୁଣୁ ଏବେ ପୁଣି ଏକ ବଡ଼ ବିପଦ ମାଡ଼ି ଆସୁଛି । ବଙ୍ଗୋପସାଗରରେ ସୃଷ୍ଟି ହୋଇଥିବା ଭୀଷଣ ବାତ୍ୟା ‘ଅକଭାନ୍‌’ (Cyclone Akvan)କୁ ନେଇ ଏବେ ଉପକୂଳ ଓଡ଼ିଶା ବିଶେଷକରି ଗଞ୍ଜାମ ଓ ପୁରୀ ଜିଲ୍ଲାବାସୀଙ୍କ ମନରେ ଛନକା ପଶିଛି ।

ବାତ୍ୟା ପ୍ରଭାବରେ ପ୍ରବଳ ବର୍ଷା ଓ କ୍ଷୟକ୍ଷତି ଆଶଙ୍କା କରି ଗଞ୍ଜାମ ଜିଲ୍ଲା ପ୍ରଶାସନ ଆଗୁଆ ସତର୍କତାମୂଳକ ପଦକ୍ଷେପ ଗ୍ରହଣ କରିଛି । ଆସିକା ଅଞ୍ଚଳର ନବରତ୍ନପୁର ଗାଁରେ ସ୍ଥାନାନ୍ତର ପ୍ରକ୍ରିୟା ଆରମ୍ଭ ହୋଇଯାଇଛି । ଗତ ବାତ୍ୟାରେ ଏହି ଗାଁର ୧୦ରୁ ଅଧିକ ଘର ସମ୍ପୂର୍ଣ୍ଣ ଭାଙ୍ଗିଯାଇଥିବା ବେଳେ ପୂରା ଗାଁ ଜଳମଗ୍ନ ହୋଇଥିଲା । ତେଣୁ ପୂର୍ବ ଅନୁଭୂତିରୁ ଶିକ୍ଷା ନେଇ ପ୍ରଶାସନ ଏଥର କୌଣସି ରିସ୍କ ନନେଇ ଲୋକଙ୍କୁ ନିକଟସ୍ଥ ପଞ୍ଚାୟତ କାର୍ଯ୍ୟାଳୟକୁ ସ୍ଥାନାନ୍ତର କରୁଛି ।

କେଉଁଠି ହେବ ଲ୍ୟାଣ୍ଡଫଲ୍? 
ଭାରତୀୟ ପାଣିପାଗ ବିଭାଗର ଅନୁସାରେ, ଭୀଷଣ ବାତ୍ୟା ‘ଅକଭାନ୍‌’ ଘଣ୍ଟାପ୍ରତି ୭ କିଲୋମିଟର ବେଗରେ ଉତ୍ତର-ଉତ୍ତରପଶ୍ଚିମ ଦିଗରେ ଗତି କରୁଛି । ସକାଳ ସାଢ଼େ ୮ଟା ସୁଦ୍ଧା ଏହା ଗୋପାଳପୁରଠାରୁ ୭୧୦ କିମି ଏବଂ ପୁରୀଠାରୁ ୭୭୦ କିମି ଦୂରରେ କେନ୍ଦ୍ରୀଭୂତ ରହିଥିଲା । ଆକଳନ ଅନୁଯାୟୀ, ନଭେମ୍ବର ୨୦ ତାରିଖ ମଧ୍ୟାହ୍ନ ସୁଦ୍ଧା ଏହା ଉତ୍ତର ଆନ୍ଧ୍ରପ୍ରଦେଶର ମଛଲିପଟନମ୍‌ରୁ ଦକ୍ଷିଣ ଓଡ଼ିଶାର ପୁରୀ ମଧ୍ୟରେ ସ୍ଥଳଭାଗ ଅତିକ୍ରମ କରିପାରେ ।

ତେବେ କଳିଙ୍ଗପଟନମ୍ ଓ ଗୋପାଳପୁର ନିକଟରେ ବାତ୍ୟା ସ୍ଥଳଭାଗ ଛୁଇଁବାର ଅଧିକ ସମ୍ଭାବନା ଥିବା ଆଇଏମ୍‌ଡି ଡିଜି ସୂଚନା ଦେଇଛନ୍ତି । ଲ୍ୟାଣ୍ଡଫଲ୍ ବେଳେ ପବନର ବେଗ ଘଣ୍ଟାପ୍ରତି ୯୦ରୁ ୧୦୦ କିମି ଏବଂ ଝଟକା ପବନ ୧୧୦ କିମି ପର୍ଯ୍ୟନ୍ତ ରହିପାରେ । ତେବେ ବାତ୍ୟା ପ୍ରଭାବରେ ୧୮ ତାରିଖରୁ ବର୍ଷା ଆରମ୍ଭ ହୋଇ ୧୯ ଓ ୨୦ ତାରିଖରେ ଓଡ଼ିଶାର ବିଭିନ୍ନ ସ୍ଥାନରେ ଅତି ପ୍ରବଳରୁ ଅତି ଭୀଷଣ ବର୍ଷା ହୋଇପାରେ । ୧୯ ତାରିଖରୁ ଉପକୂଳ ଓଡ଼ିଶାରେ ୭୦ରୁ ୮୦ କିମି ବେଗରେ ଝଟକା ପବନ ବହିବାର ସମ୍ଭାବନା ରହିଛି । ଏହାରି ମଧ୍ୟରେ ଅସ୍ତରଙ୍ଗ ଉପକୂଳରେ ପାଗ ବଦଳିବା ସହ ସମୁଦ୍ର ଅଶାନ୍ତ ହୋଇପଡ଼ିଛି ଏବଂ ୪୦ରୁ ୫୦ କିମି ବେଗରେ ପବନ ବହୁଛି । ଏହାକୁ ଦୃଷ୍ଟିରେ ରଖି ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ଯିବାକୁ  ବାରଣ କରାଯାଇଛି ।

କେବଳ ପବନ କି ବର୍ଷା ନୁହେଁ, ସମୁଦ୍ର ଜୁଆର ମଧ୍ୟ ଚିନ୍ତା ବଢ଼ାଇଛି । ଲ୍ୟାଣ୍ଡଫଲ୍ ସମୟରେ ଆନ୍ଧ୍ରପ୍ରଦେଶ ସମେତ ଓଡ଼ିଶାର ଗଞ୍ଜାମ, ଖୋର୍ଦ୍ଧା ଓ ପୁରୀ ଜିଲ୍ଲାର ତଳିଆ ଅଞ୍ଚଳରେ ୦.୫ରୁ ୧.୨ ମିଟର ପର୍ଯ୍ୟନ୍ତ ଉଚ୍ଚ ଜୁଆର ମାଡ଼ି ଆସିବାର ଆଶଙ୍କା ରହିଛି । ଫଳରେ ସମୁଦ୍ରକୂଳିଆ ଗାଁଗୁଡ଼ିକ ଜଳମଗ୍ନ ହେବା ନେଇ ପ୍ରଶାସନ ପକ୍ଷରୁ ହାଇଆଲର୍ଟ ଜାରି କରାଯାଇଛି ।

ତେବେ ‘ଅକଭାନ୍‌’ର ସମ୍ଭାବ୍ୟ ଗତିପଥ ଉପକୂଳବାସୀଙ୍କୁ ପୁରୁଣା ବାତ୍ୟାର ଭୟାବହତା ମନେ ପକାଇ ଦେଇଛି । ୨୦୧୩ରେ ଗୋପାଳପୁର ନିକଟରେ ‘ଫାଇଲିନ୍’, ୨୦୧୮ରେ ପଲାସା ନିକଟରେ ‘ତିତ୍‌ଲି’ ଏବଂ ୨୦୧୯ରେ ପୁରୀରେ ‘ଫନି’ ଯେଉଁ ତାଣ୍ଡବ ରଚିଥିଲା, ତାହା ଆଜି ବି ଲୋକଙ୍କ ମନରେ ତାଜା ହୋଇ ରହିଛି । ନିକଟରେ ‘ଅର୍ଣ୍ଣବ’ର କ୍ଷତି ସହିଥିବା ଗଞ୍ଜାମବାସୀ ଏବେ ପୁଣି ବନ୍ୟା ଓ ବାତ୍ୟା ଆଶଙ୍କାରେ ଦିନ କାଟୁଛନ୍ତି ।

ପୂର୍ବ ବାତ୍ୟାଗୁଡ଼ିକରୁ ଅଭିଜ୍ଞତା ନେଇ ରାଜ୍ୟ ସରକାର ଏଥର ବ୍ୟାପକ ପ୍ରସ୍ତୁତି କରିଛନ୍ତି । ଆଗୁଆ ସ୍ଥାନାନ୍ତର, ବାତ୍ୟା ଆଶ୍ରୟସ୍ଥଳୀ ପ୍ରସ୍ତୁତ ରଖିବା ସହ ରିଲିଫ୍ ଓ ଉଦ୍ଧାର କାର୍ଯ୍ୟ ପାଇଁ ଟିମ୍‌ଗୁଡ଼ିକୁ ସଜାଗ ରଖାଯାଇଛି । ବାତ୍ୟାର ଗତିପଥ ଉପରେ ତୀକ୍ଷ୍ଣ ନଜର ରଖାଯାଇଥିବା ବେଳେ ଅଯଥା ଭୟଭୀତ ନହୋଇ ପ୍ରଶାସନର ନିର୍ଦ୍ଦେଶ ମାନିବାକୁ ଉପକୂଳବାସୀଙ୍କୁ ଅପିଲ୍ କରାଯାଇଛି ।

Latest Posts

Don't Miss