ବାଲେଶ୍ୱର: ଡାହାଣୀ ସନ୍ଦେହରେ ମହିଳା ଥିଲେ ନଜରବନ୍ଦୀ । ହତ୍ୟା ପାଇଁ କରାଯାଇଥିଲା ଯୋଜନା । ବାଲେଶ୍ବର ଜିଲା ନୀଳଗିରିସ୍ଥିତ କୁଲଡ଼ିହା ଅଭୟାରଣ୍ୟ ଭିତରର ଏହି ଘଟଣା ପୂରା ଅଞ୍ଚଳରେ ଆତଙ୍କ ସୃଷ୍ଟି କରିଛି । ୭ଦିନ ତଳେ ଅଭୟାରଣ୍ୟ ଭିତରେ ଥିବା ଗାଁର କାନ୍ଦ୍ରା ଭକ୍ତାଙ୍କ ୩ବର୍ଷର ଶିଶୁକନ୍ୟାଟି ଜ୍ବରରେ ପୀଡ଼ିତ ହୋଇଥିଲା । ଏହି ସମ୍ପ୍ରଦାୟର ଲୋକମାନେ ଡାକ୍ତରଙ୍କ ବଦଳରେ ଗୁଣିଆକୁ ବେଶି ବିଶ୍ୱାସ କରନ୍ତି ।
ଏଥିପାଇଁ କାନ୍ଦ୍ରା ଭକ୍ତା ନିଜ ଶିଶୁକନ୍ୟାକୁ ଜଣେ ଗୁଣିଆକୁ ଦେଖାଇ ଥିଲେ । ହେଲେ କିଛି ସମୟ ପରେ ଶିଶୁଟିର ମୃତ୍ୟୁ ହୋଇଥିଲା । ଶିଶୁଟିକୁ ଗୁଣି ହୋଇଥିବା ଗୁଣିଆ କହିଥିଲା । ଏନେଇ ଗ୍ରାମବାସୀ ସେହି ଗାଁର ମହିଳା ତୁଳସୀ ନାଇକଙ୍କୁ ଡାହାଣୀ ବୋଲି ସନ୍ଦେହ କରି ତାଙ୍କୁ ନଜରବନ୍ଦୀ କରି ରଖିଥିଲେ । ସମ୍ପୃକ୍ତ ଶିଶୁକନ୍ୟାର ଶୁଦ୍ଧିକ୍ରିୟା ଦିନ ମହିଳାଙ୍କୁ ହତ୍ୟା ଯୋଜନା କରାଯାଇଥିଲା । ମହିଳାଙ୍କ ଘର ଚାରିପଟେ ଗାଁ ଲୋକେ ଫେରି ମାରୁଥିଲେ । ମହିଳା ଜଣକ ଭୟଭୀତ ଅବସ୍ଥାରେ ନିଜ କୁଡ଼ିଆ ହିଁ ରହିଥିଲେ ।
ସାତ ଦିନ ହେବ ଘରୁ ବାହାରକୁ ବାହାରି ପାରୁନଥିଲେ । ନୀଳଗିରି ଉପଖଣ୍ଡ ପୁଲିସ ଅଧିକାରୀ ଘଟଣା ସମ୍ପର୍କରେ ଖବର ପାଇ ବରହମପୁର ଥାନା ଅଧିକାରୀଙ୍କୁ ଏନେଇ ସୂଚନା ଦେଇଥିଲେ । ବରହମପୁର ପୁଲିସ ଚେମଚଟା ଗାଁରେ ପହଞ୍ଚି ମହିଳାଙ୍କୁ ଉଦ୍ଧାର କରିଥିଲା । ମହିଳାଙ୍କୁ ମୟୂରଭଞ୍ଜ ଜିଲ୍ଲାର କପ୍ତିପଦା ଥାନାକୁ ହସ୍ତାନ୍ତର କରାଯିବା ପରେ ଉଦଳା ସ୍ବଧାର ଗୃହକୁ ସ୍ଥାନାନ୍ତରିତ କରାଯାଇଥିବା ସୂଚନା ରହିଛି ।
