spot_img

Latest Posts

ପୁଣି ବୁଡ଼ିବ କି ଗଞ୍ଜାମ?

ନନ୍ଦିଘୋଷ ବ୍ୟୂରୋ: ୨୯ ଅକ୍ଟୋବର, ୨୦୨୬ । ସୁ ସୁ ହୋଇ ମାଡ଼ି ଆସିଲା ପାଣି । ବୁଡ଼ିଲା ଚାଷ, ବାସ । ଉପୁଡ଼ିଲା ଗଛ । ନିମିଷକେ ଜଳମଗ୍ନ ହୋଇଗଲା ଗାଁ ଦାଣ୍ଡ । ବାତ୍ୟା ଅର୍ଣ୍ଣବ ଜନିତ ବନ୍ୟାର ଦୁଃଖ ଏବେବି ଭୁଲି ପାରିନାହାନ୍ତି ଗଞ୍ଜାମବାସୀ । ମୁଣ୍ଡ ଗୁଞ୍ଜିବାକୁ ଘର ଖଣ୍ଡେ ନାହିଁ । ରାସ୍ତାଘାଟର ଅବସ୍ଥା ସୁଧୁରିନି । ଏଭଳି ସ୍ଥିତିରେ ପୁଣି ସମ୍ଭାବ୍ୟ ବାତ୍ୟା ଲୋକଙ୍କ ମନରେ ଛନକା ଭରିଲାଣି । ପୁଣି ବୁଡ଼ିବ କି ଗଞ୍ଜାମ ? ଯାହାକୁ ନେଇ ଆତଙ୍କିତ ଲୋକେ । ଗତ ଋଷିକୂଲ୍ୟା ନଦୀରେ ଆସିଥିବା ବନ୍ୟାରେ ଆସିକା, ଧରାକୋଟ, ପୁରୁଷୋତ୍ତମପୁର, ସୋରାଡ଼ାରେ ହୋଇଛି ବ୍ୟାପକ କ୍ଷତି । ବିଶେଷ କରି ଆସିକା ବ୍ଲକର ନବରତ୍ନପୁର ଓ ଧରାକୋଟ ବ୍ଲକର ଜାହାଡା ଗାଁର ୨୦ରୁ ଉର୍ଦ୍ଧ୍ଵ ଘର ଭାଙ୍ଗିବା ସହ କେତେକ ଘର ମାଟିରେ ମିଶି ଯାଇଛି । ଏପର୍ଯ୍ୟନ୍ତ ଅନେକ ସ୍ଥାନରେ ହୋଇନି ଘାଇ ମରାମତି । ଭଗ୍ନ ଜାନିବିଲି ଆନିକଟର ସ୍ଥିତି ସୁଧୁରିନାହିଁ । ଏଭଳି ସ୍ଥିତିରେ ପୁଣି ପ୍ରବଳ ବର୍ଷା ହେଲେ ଆଉ ଏକ ବନ୍ୟାର ଆଶଙ୍କାକୁ ଏଡ଼ାଇ ଦିଆଯାଇ ନପାରେ।

ପ୍ରଳୟଙ୍କରୀ ବନ୍ୟାକୁ ବିତିଲାଣି ୧୯ ଦିନ । ଏବେବି ଅନେକ ସ୍ଥାନରେ ଘାଇ ମୁକୁଳା ପଡ଼ିଛି । କେଉଁଠି ମରାମତି ଚାଲିଛି ତ କେଉଁଠି ଏଯାଏଁ ହୋଇନି । ଯଦିଓ ପ୍ରଶାସନ ପକ୍ଷରୁ ରାସ୍ତାଘାଟର ମରାମତି କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି । ତଥାପି ନଦୀ ଓ କେନାଲର ଭଙ୍ଗା ହିଡ଼ ନଦୀକୂଳିଆ ଓ ବିପନ୍ନଙ୍କ ଚିନ୍ତା ବଢାଇଛି । ସମ୍ଭାବ୍ୟ ବାତ୍ୟା ଓ ପ୍ରବଳ ବର୍ଷାକୁ ନଜରରେ ରଖି ଜିଲ୍ଲା ପ୍ରଶାସନ ପକ୍ଷରୁ ଘନଘନ ବୈଠକ ହେଉଛି । ନଦୀକୂଳିଆ ଓ ତଳିଆ ଅଞ୍ଚଳର ଲୋକଙ୍କୁ ଡାକବାଜି ଯନ୍ତ୍ର ସାହାଯ୍ୟରେ ସତର୍କ କରାଯାଉଛି । ଆବଶ୍ୟକ ପଡ଼ିଲେ ସୁରକ୍ଷିତ ସ୍ଥାନକୁ ଚାଲିଯିବାକୁ ସଚେତନ କରାଯାଉଛି ।

Latest Posts

Don't Miss