ଭୁବନେଶ୍ବର: ମମିତା ମର୍ଡର ଓ ମିଷ୍ଟ୍ରି । ଦିନ ବଢୁଛି, ସତ ଖୋଲୁଛି । ରିମାଣ୍ଡରେ ଥିବା ମୁଖ୍ୟ ଅଭିଯୁକ୍ତ ଗୋବିନ୍ଦ ଗୁମର ଖୋଲୁଥିବା ବେଳେ, ଏବେ ଗୋବିନ୍ଦର ଡ୍ରାଇଭର ରାଧେ ମୁହଁରେ ମହାଖୁଲାସା । ମୁହାଁମୁହିଁ ଜେରା ବେଳେ ମିଳିମିଶି ମମିତାଙ୍କୁ ହତ୍ୟା ସହ ମୃତଦେହ ପୋତିଥିବା ମାନିଛି ରାଧେ । ଗିରଫ ପରେ ରାଧେକୁ କୋର୍ଟଚାଲାଣ କରାଯାଇଥିବା ବେଳେ, ଜାମିନ ଖାରଜ ହେବାରୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ଅନ୍ୟପଟେ ମମିତା ହତ୍ୟା ମାମଲାର ବିଚାର ଫାଷ୍ଟଟ୍ରାକ କୋର୍ଟରେ କରାଯିବ ବୋଲି ବଲାଙ୍ଗିର ପୋଲିସ ମୁଖ୍ୟଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଉତ୍ତରାଞ୍ଚଳ ଡିଆଇଜି ଡ଼ା ଦୀପକ କୁମାର ।
ଅଟକ ଜେସିବି ଡ୍ରାଇଭର ପୁଷ୍କର ଭୋଇ, କଲେଜର ରାତ୍ରି ଜଗୁଆଳି ଗୁପ୍ତେଶ୍ବର ତାଣ୍ଡିକୁ ପଚରାଉଚୁରା ପରେ ଛାଡିଛି ପୋଲିସ । ଉଭୟଙ୍କୁ ମାମଲାରେ ରାଜସାକ୍ଷୀ କରିଛି ପୋଲିସ । ଅନ୍ୟପଟେ ଦାୟିତ୍ବରେ ଅବହେଳା ପାଇଁ କେ. ଗାଁ ଥାନା ଅଧିକାରୀ ଡମୁ ପରଜାଙ୍କୁ ନିଲମ୍ବନ କରିଛନ୍ତି କଳାହାଣ୍ଡି ଏସପି ।
ରାଧେ ଖୋଲିଲା ଗୋବିନ୍ଦର ଗୁମର । ସାମନାକୁ ଆସିବ କାଳ ରାତିର ସତ । କେମିତି ମମିତାଙ୍କୁ ହତ୍ୟା କରାଯାଇଥିଲା ? କେମିତି ପୋତାଗଲା ? ଆଉ କିଏ କିଏ ସହଯୋଗୀ ଥିଲେ କି ? ଖୁବଶୀଘ୍ର ପୂରା ଘଟଣାର ହେବ ଖୁଲାସା । ୫ ଦିନିଆ ରିମାଣ୍ଡରେ ଥିବା ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ, ସତ ଉଗାରୁଥିବା ବେଳେ, ଏବେ ଗିରଫ ହୋଇଛି ଗୋବିନ୍ଦର ଖାସମଖାସ ଡ୍ରାଇଭର ରାଧେଶ୍ୟାମ ଚଣ୍ଡୀ । ରାଧେକୁ ଗିରଫ ପରେ ବଙ୍ଗୋମୁଣ୍ଡା ଜେଏମଏଫସି କୋର୍ଟକୁ ଚାଲାଣ କରିଛି ବଲାଙ୍ଗିର ପୋଲିସ । ଗତ ୮ ତାରିଖ ରାତିରେ ଗୋବିନ୍ଦ ସହ ରାଧେ ଥିବା ବେଳେ ମାଲିକ-ଡ୍ରାଇଭର ମିଳିମିଶି ହତ୍ୟା ସହ ପୋତିଥିଲେ ମୃତଦେହ । ଉଭୟଙ୍କୁ ମୁହାଁମୁହିଁ ଜେରା ବେଳେ ଘଟଣାକୁ ସ୍ବୀକାର କରିଛି ରାଧେ ।
କାରରେ ମର୍ଡର ପ୍ଲଟ ତିଆରି କରିଥିଲା ଗୋବିନ୍ଦ । ଡ୍ରାଇଭର ସହାୟତାରେ ମାଟିତଳେ ରହସ୍ୟକୁ ସମାଧି ଦେବାକୁ ଫୁଲ ପ୍ରୁଫ ପ୍ଲାନ କରିଥିଲା ।ଦୁଇ ପ୍ରମୁଖ ଅଭିଯୁକ୍ତ ଗିରଫ ପରେ ଏବେ ଗ୍ରାଉଣ୍ଡ ଜିରୋରେ ତନଘନା କରିଛନ୍ତି ଡିଆଇଜି ଓ ଏସପି । କଲେଜର ଲେଡିଜ ହଷ୍ଟେଲରୁ ମହାଲିଙ୍ଗ ମିନି ଷ୍ଟାଡିୟମ ଯାଏଁ ସବୁର ସତ ଖୋଜିଛନ୍ତି ଦୁଇ ଟପ୍ ଅଫିସର । ମମିତାଙ୍କୁ ପୋତା ଯାଇଥିବା ମହାଲିଙ୍ଗ ମିନି ଷ୍ଟାଡିୟମ ବୁଲି ସରଜମିନ ତଦନ୍ତ ବେଳେ ପୋଲିସ ହାତରେ ଲାଗିଛି ଦୁଇଟି ପୋଡ଼ା ସମଗ୍ରୀ । ମମିତାଙ୍କୁ ହତ୍ୟା କରାଯାଇଥିବା ଗାତରୁ ପୋଡ଼ା ଯାଇଥିବା ମୋବାଇଲ ମିଳିଥିବା ଚର୍ଚ୍ଚା ହେଉଛି ।
ପରକୀୟା ପ୍ରୀତି ସଂପର୍କରେ ଜାଣି ଦେଇଥିବାରୁ ମମିତାଙ୍କୁ ହତ୍ୟା କରିଥିଲା ଗୋବିନ୍ଦ ସାହୁ । ମମିତାଙ୍କୁ ହତ୍ୟା କରି ସବୁ ଦିନ ପାଇଁ ରାସ୍ତାରୁ ହଟାଇବାକୁ ଗୋବିନ୍ଦ କରିଥିଲା ସାଂଘାତିକ ପ୍ଲାନ୍ । ୮ ତାରିଖରେ ଭବାନୀପାଟଣାରୁ କେ. ଗାଁ ଫେରୁଥିବା ବେଳେ, କାରରେ ହିଁ ମମିତାଙ୍କୁ ହତ୍ୟା କରିଥିଲା ଗୋବିନ୍ଦ ।
