ବଲାଙ୍ଗିର: ଭିଜିଲାନ୍ସ ଜାଲରେ ଥାନା ବାବୁ । ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ପୋଲିସ ଥାନା ଅଧିକାରୀ ବିନୋଦ ବିହାରୀ ନାୟକ ଭିଜିଲାନ୍ସ ଜାଲରେ ପଡ଼ିଛନ୍ତି । କାରରୁ ଲକ୍ଷାଧିକ ଟଙ୍କା ନେଇ ଘରକୁ ଯାଉଥିବା ବେଳେ ବିନୋଦ ବିହାରୀଙ୍କୁ ଧରିଛି ଭିଜିଲାନ୍ସ । ବିନୋଦଙ୍କ କାରରୁ ଭିଜିଲାନ୍ସ ୨ ଲକ୍ଷ ୬ ହଜାର ୨୨୦ ଟଙ୍କା ଜବତ କରିଛି । ଜବତ ଟଙ୍କା ବେଆଇନ୍ ଉପାୟରେ ଆୟ କରାଯାଇଥିବା ସନ୍ଦେହ କରୁଛି ଭିଜିଲାନ୍ସ । ଧରାପଡ଼ିବା ପରେ ଥାନାବାବୁ ଭିଜିଲାନ୍ସ ଆଗରେ ହାତ ଯୋଡ଼ି ବସିଥିବା ଦେଖା ଯାଉଛି ।
ବିନୋଦଙ୍କ ଠାରୁ ସମସ୍ତ ଟଙ୍କା ଜବତ କରାଯାଇଛି । ତେବେ ଜବତ ଟଙ୍କା ନେଇ କୌଣସି ସନ୍ତୋଷଜନକ ଉତ୍ତର ଦେଇ ପାରିନାହାଁନ୍ତି ବିନୋଦ ବିହାରୀ । ତାଙ୍କୁ ଅଟକ ରଖି ଭିଜିଲାନ୍ସ ପଚରାଉଚରା ଜାରି ରଖାଯାଇଛି । ଟଙ୍କା ସହ କାର ଜବତ କରିଛି ଭିଜିଲାନ୍ସ । ଏକକାଳୀନ ୪ଟି ସ୍ଥାନ ବଲାଙ୍ଗିର, ସମ୍ବଲପୁର ଓ ଦେବଗଡ଼ରେ ଭିଜିଲାନ୍ସ ଚଢ଼ାଉ ଜାରି ରଖିଛି । ବଲାଙ୍ଗିର ଭିଜିଲାନ୍ସ ଡିଏସପି ସଦାନନ୍ଦ ପାଣିଙ୍କ ନେତୃତ୍ୱରେ ଭିଜିଲାନ୍ସ ଟିମ୍ କାରରୁ ଟଙ୍କା ଜବତ କରିଛି ।
