ନନ୍ଦିଘୋଷ ବ୍ୟୁରୋ: ବ୍ରିଟେନରେ ୭୦ ଜଣ ନାବାଳିକାଙ୍କୁ ସୋସିଆଲ ମିଡିଆରେ ଫସାଇ ଯୌନ ଶୋଷଣ ଓ ବ୍ଲାକମେଲ୍ କରିବା ଅଭିଯୋଗରେ ଜଣେ ୨୭ ବର୍ଷୀୟ ଭାରତୀୟ ବଂଶୋଦ୍ଭବ ଛାତ୍ରଙ୍କୁ ୩୦ ବର୍ଷ ଜେଲ୍ ଦଣ୍ଡ ହୋଇଛି। ଅଭିଯୁକ୍ତ ବିଲାଲ କାଜି ନିଜକୁ ୧୪ ବର୍ଷୀୟ ବ୍ରିଟିଶ ନାବାଳକ ବୋଲି ପରିଚୟ ଦେଇ ଅନଲାଇନ୍ରେ ନାବାଳିକାମାନଙ୍କ ସହ ବନ୍ଧୁତା କରୁଥିଲେ। ପରେ ପ୍ରେମର ଜାଲରେ ଫସାଇ ସେମାନଙ୍କ ବ୍ୟକ୍ତିଗତ ଫଟୋ ଓ ଭିଡିଓ ହାସଲ କରିବା ସହ ଏହାକୁ ନେଇ ବ୍ଲାକମେଲ୍ କରୁଥିଲେ। ଚେଷ୍ଟର ବିଶ୍ୱବିଦ୍ୟାଳୟରେ ପଢ଼ୁଥିବା ବିଲାଲଙ୍କୁ ନଭେମ୍ବର ୧୩ ତାରିଖରେ ଚେଷ୍ଟର କ୍ରାଉନ୍ କୋର୍ଟ ୩୭ଟି ଅପରାଧିକ ମାମଲାରେ ଦୋଷୀ ସାବ୍ୟସ୍ତ କରିଥିଲେ। ଏଥିରେ ନାବାଳକଙ୍କ ଅଶ୍ଳୀଳ ଚିତ୍ର ସୃଷ୍ଟି, ବ୍ଲାକମେଲ୍ ଏବଂ ନାବାଳିକାଙ୍କୁ ଯୌନ କାର୍ଯ୍ୟକଳାପ ପାଇଁ ବାଧ୍ୟ କରିବା ଭଳି ସଙ୍ଗିନ ଅଭିଯୋଗ ସାମିଲ ରହିଛି।
‘ରୀସ୍’ ନାମରେ ନକଲି ଆକାଉଣ୍ଟ ଖୋଲି କରୁଥିଲେ ଶିକାର
ବ୍ରିଟିଶ କର୍ତ୍ତୃପକ୍ଷଙ୍କ ସୂଚନା ଅନୁସାରେ, ବିଲାଲ ଅଗଷ୍ଟ ୨୦୨୧ରୁ ଅଗଷ୍ଟ ୨୦୨୫ ପର୍ଯ୍ୟନ୍ତ ଏହି ଅପରାଧ ଚଳାଇଥିଲେ। ସେ ସ୍ନାପଚ୍ୟାଟ୍, ରୋବଲକ୍ସ ଏବଂ ୱିଙ୍କ୍ ଭଳି ସୋସିଆଲ ମିଡିଆ ଓ ଗେମିଂ ପ୍ଲାଟଫର୍ମରେ ‘ରୀସ୍’ ନାମରେ ନକଲି ଆକାଉଣ୍ଟ ଖୋଲିଥିଲେ। ନିଜକୁ ଜଣେ ୧୪ ବର୍ଷୀୟ ଧଳା ବ୍ରିଟିଶ ବାଳକ ଭାବେ ପରିଚୟ ଦେବା ପାଇଁ ଅନ୍ୟ କିଶୋରଙ୍କ ଫଟୋ ବ୍ୟବହାର କରୁଥିଲେ। ନାବାଳିକାମାନଙ୍କ ସହ ବନ୍ଧୁତା କରିବା ପରେ ସେ ପ୍ରେମ ସମ୍ପର୍କର ବାହାନା କରି ବ୍ୟକ୍ତିଗତ ଫଟୋ ଓ ଭିଡିଓ ମାଗୁଥିଲେ। କେହି ମନା କଲେ ପ୍ରେମୀଯୁଗଳଙ୍କ ମଧ୍ୟରେ ଏଭଳି ଫଟୋ ଆଦାନପ୍ରଦାନ ସାଧାରଣ କଥା ବୋଲି କହି ସେମାନଙ୍କୁ ରାଜି କରାଉଥିଲେ। ପରେ ଉକ୍ତ ଫଟୋ ଓ ଭିଡିଓକୁ ପରିବାର ଓ ସାଙ୍ଗସାଥୀଙ୍କ ନିକଟରେ ପ୍ରକାଶ କରିଦେବାର ଧମକ ଦେଇ ନାବାଳିକାମାନଙ୍କୁ ବ୍ଲାକମେଲ୍ କରୁଥିଲେ। କେତେକ କ୍ଷେତ୍ରରେ ସେ ପୀଡ଼ିତାଙ୍କ ସୋସିଆଲ ମିଡିଆ ଆକାଉଣ୍ଟ ହ୍ୟାକ୍ କରି ସେମାନଙ୍କ ବନ୍ଧୁମାନଙ୍କୁ ଫଟୋ ପଠାଇଥିବା ମଧ୍ୟ ତଦନ୍ତରୁ ଜଣାପଡ଼ିଛି। ଏହାସହ ସ୍ନାପଚ୍ୟାଟ୍ ଜରିଆରେ କିଛି ଭିଡିଓ ଗୁପ୍ତ ଭାବେ ରେକର୍ଡ କରୁଥିଲେ।
୧୩ ବର୍ଷୀୟା ନାବାଳିକାଙ୍କ ଅଭିଯୋଗରୁ ଖୋଲିଲା ଗୁମର
୨୦୨୧ ନଭେମ୍ବରରେ ଜଣେ ୧୩ ବର୍ଷୀୟା ନାବାଳିକା ପୋଲିସରେ ଅଭିଯୋଗ କରିବା ପରେ ଏହି ଘଟଣାର ପର୍ଦ୍ଦାଫାସ ହୋଇଥିଲା। ନାବାଳିକା ଜଣକ ସ୍ନାପଚ୍ୟାଟ୍ରେ ନିଜ ବୟସର ଜଣେ ବାଳକ ଭାବି ବିଲାଲଙ୍କ ସହ ବନ୍ଧୁତା କରିଥିଲେ। କିନ୍ତୁ ପରେ ସେ ବ୍ୟକ୍ତିଗତ ଫଟୋ ମାଗିବା ସହ ଧମକ ଦେବା ଆରମ୍ଭ କରିଥିଲେ। ନାବାଳିକା ଜଣକ ମନା କରିବାରୁ ଅଭିଯୁକ୍ତ ତାଙ୍କୁ ଦୁର୍ବ୍ୟବହାର କରିବା ସହ ତାଙ୍କ ପାଖରେ ଥିବା ପୂର୍ବ ଫଟୋଗୁଡ଼ିକୁ ସାଙ୍ଗମାନଙ୍କୁ ପଠାଇଦେବାକୁ ଧମକ ଦେଇଥିଲେ। ଭୟରେ ନାବାଳିକା ତାଙ୍କ ଦାବି ପୂରଣ କରିଥିଲେ। ପରେ ଅଭିଯୁକ୍ତ ତାଙ୍କ ସ୍ନାପଚ୍ୟାଟ୍ ଆକାଉଣ୍ଟ ହ୍ୟାକ୍ କରି ସାଙ୍ଗମାନଙ୍କୁ ଫଟୋ ପଠାଇଥିଲେ।
୧୮୦ ସମ୍ଭାବ୍ୟ ପୀଡ଼ିତଙ୍କ ମଧ୍ୟରୁ ୭୦ ଜଣ ନାବାଳିକା ଚିହ୍ନଟ
ତଦନ୍ତ ସମୟରେ ପୋଲିସ ବିଲାଲଙ୍କ ଇଲେକ୍ଟ୍ରୋନିକ୍ ଉପକରଣରୁ ମିଳିଥିବା ତଥ୍ୟ ଆଧାରରେ ୧୮୦ ଜଣ ସମ୍ଭାବ୍ୟ ପୀଡ଼ିତଙ୍କୁ ଚିହ୍ନଟ କରିଥିଲା। ସେମାନଙ୍କ ମଧ୍ୟରୁ ୭୦ ଜଣ ନାବାଳିକା ଥିବା ଜଣାପଡ଼ିଥିଲା। ଏହି ଝିଅମାନଙ୍କ ବୟସ ୧୧ରୁ ୧୭ ବର୍ଷ ମଧ୍ୟରେ ଥିଲା। ସେମାନେ ବ୍ରିଟେନର ୪୫ଟି ପୋଲିସ ଅଞ୍ଚଳ ମଧ୍ୟରୁ ୨୮ଟି ଅଞ୍ଚଳରେ ରହୁଥିଲେ।
ହିଥ୍ରୋ ବିମାନବନ୍ଦରରୁ ଗିରଫ, ୩୦ ବର୍ଷ ଜେଲ୍ ଦଣ୍ଡ
ପୋଲିସ ୨୦୨୩ ଜୁଲାଇ ୨୧ ତାରିଖରେ ହିଥ୍ରୋ ବିମାନବନ୍ଦରରୁ ବିଲାଲଙ୍କୁ ଗିରଫ କରିଥିଲା। ସେ ପୂର୍ବରୁ ବ୍ରିଟେନ ଛାଡ଼ି ଚାଲିଯାଇଥିବା ବେଳେ ଫେରିବା ସମୟରେ ଧରାପଡ଼ିଥିଲେ। ନଭେମ୍ବର ୧୩ ତାରିଖରେ ଦଣ୍ଡ ଘୋଷଣା କରି ବିଚାରପତି ଷ୍ଟିଫେନ୍ ଏଭରେଟ୍ କହିଥିଲେ ଯେ, ବିଲାଲ ସୋସିଆଲ ମିଡିଆର ଅପବ୍ୟବହାର କରି ନିରୀହ ଶିଶୁମାନଙ୍କୁ ଟାର୍ଗେଟ୍ କରିଥିଲେ। ଏପରିକି ସେମାନଙ୍କ ନିଜ ଘରେ ମଧ୍ୟ ସୁରକ୍ଷାର ଭାବନାକୁ ନଷ୍ଟ କରିଦେଇଥିଲେ। ବିଚାରପତି ତାଙ୍କୁ ଅତ୍ୟନ୍ତ ବିପଜ୍ଜନକ ବ୍ୟକ୍ତି ବୋଲି ଅଭିହିତ କରିଥିଲେ। ଏହି ଅପରାଧ ପାଇଁ ବିଲାଲଙ୍କୁ ୩୦ ବର୍ଷ ଜେଲ୍ ଦଣ୍ଡ ମିଳିଛି। ଅତି କମରେ ୨୦ ବର୍ଷ ଜେଲ୍ରେ ରହିବା ପରେ ସେ ପାରୋଲ୍ ପାଇଁ ବିଚାରଯୋଗ୍ୟ ହେବେ। ଏହାସହ ତାଙ୍କୁ ଜୀବନବ୍ୟାପୀ ଯୌନ ଅପରାଧୀଙ୍କ ପଞ୍ଜିକାରରେ ରହିବାକୁ ପଡ଼ିବ। ଜେଲ୍ରୁ ମୁକ୍ତ ହେବା ପରେ ମଧ୍ୟ ଆଠ ବର୍ଷ ପର୍ଯ୍ୟନ୍ତ ତାଙ୍କ ଉପରେ ନଜର ରଖାଯିବ ଏବଂ ବିଭିନ୍ନ ଆଇନଗତ କଟକଣା ଲାଗୁ ହେବ।
