ନନ୍ଦିଘୋଷ ବ୍ୟୁରୋ: ଜାତୀୟ ରାଜପଥ ପାଲଟିଛି ମୃତ୍ୟୁ ପଥ । ବର୍ଷାରେ ଧୋଇ ହୋଇ ଯାଇଛି ରାସ୍ତା । ଖାଲଖମା ଯୋଗୁଁ ପ୍ରତିଦିନ ଘଟୁଛି ଦୁର୍ଘଟଣା । ରାସ୍ତା ଜାମ ଯୋଗୁଁ ଅତିଷ୍ଠ ଗାଡ଼ି ଚାଳକ ଓ ଯାତ୍ରୀ । କୋରାପୁଟ ଜିଲ୍ଲାରୁ ଆନ୍ଧ୍ର, ଛତିଶଗଡ ସମେତ ରାଜ୍ୟର ବିଭିନ୍ନ ଜିଲ୍ଲାକୁ ସଂଯୋଗ କରୁଛି ୨୬ ନମ୍ବର ଜାତୀୟ ରାଜପଥ । ଏହି ରାସ୍ତା ଦେଇ ପ୍ରତିଦିନ ଶହ ଶହ ଗାଡି ଯାତାୟତ କରୁଛନ୍ତି । ଜୟପୁର ଠାରୁ କୋରାପୁଟ ଘାଟି ରାସ୍ତା ବର୍ଷା ଯୋଗୁଁ ପ୍ରାୟ ୭ କିଲୋମିଟର ଶୋଚନୀୟ ହୋଇପଡିଛି । ଯାହାକୁ ନେଇ ସ୍ଥାନୀୟ ବାସିନ୍ଦାଙ୍କ ସମେତ ଜନ ପ୍ରତିନିଧି ମାନେ ଅସନ୍ତୋଷ ପ୍ରକାଶ କରିଛନ୍ତି । ଏହାସହ ରାସ୍ତାର ଦୁଇ ପାର୍ଶ୍ୱ ରେ ଗାଡି ଗୁଡିକ ଘଣ୍ଟା ଘଣ୍ଟା ଅପେକ୍ଷା କରି ରହିବା ସହ ଟ୍ରାଫିକ୍ ଜାମ ରହୁଛି । ଖାଲି ସେତିକି ନୁହେଁ ବହୁ ସମୟରେ ଆମ୍ବୁଲାନ୍ସ ମଧ୍ୟ ଯିବା କଷ୍ଟକର ହୋଇପଡୁଛି । ତୁରନ୍ତ ଜାତୀୟ ରାଜପଥର ଘାଟି ରାସ୍ତା ମରାମତି କରିବାକୁ ଦାବୀ କରିଛନ୍ତି ଜୟପୁର ସହରବାସୀ ।
ଜୟପୁର ଠାରୁ କୋରାପୁଟ ଜାତୀୟ ରାଜପଥକୁ ନେଇ ତିବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ସାଧାରଣ ଲୋକେ । ବାତ୍ଯା ପରବର୍ତ୍ତୀ ବର୍ଷାରେ ରାସ୍ତା ସଂପୁର୍ଣ୍ଣ ବିପଦପୂର୍ଣ ହୋଇଛି । ସ୍ଥାନେ ସ୍ଥାନେ ପିଚୁ ଉଠିବା ସହ ଖାଲ ସୃଷ୍ଟିହୋଇଛି । ବାରମ୍ବାର ଅଭିଯୋଗ ପରେ ଏହି ଘାଟି ରାସ୍ତାକୁ ତୁରନ୍ତ ମରାମତି କରାଯିବା ନେଇ ନିର୍ଦ୍ଦେଶ ଦେଇଛନ୍ତି କୋରାପୁଟ ଜିଲ୍ଲାପାଳ । ଘାଟି ରାସ୍ତା ଉଭୟ ପାର୍ଶ୍ୟକୁ ସଂପ୍ରସାରଣ କରିବା ସହିତ ଟ୍ରାଫିସ ସମସ୍ୟାର ସମାଧାନ କରାଯାଉଥିବା କହିଛନ୍ତି ଜିଲ୍ଲାପାଳ ।
