ଭୁବନେଶ୍ୱର: ଆଜିଠୁ ସ୍କୁଲରେ ପୁଣି ବାଜିବ ଘଣ୍ଟି । କୋଳାହଳରେ କମ୍ପିବ କ୍ୟାମ୍ପସ୍ । ଅଷ୍ଟମ ଶ୍ରେଣୀରୁ ଉର୍ଦ୍ଧ୍ବ ସମସ୍ତ ଶ୍ରେଣୀରେ ଆଜିଠୁ ଆରମ୍ଭ ହେବ ପାଠପଢା । ସେହିଭଳି ୧୪ ତାରିଖରୁ କେଜିରୁ ସପ୍ତମ ଯାଏ କ୍ଲାସ୍ ଖୋଲିବ । କୋଭିଡ କଟକଣା ଭିତରେ ଅଫଲାଇନରେ ଚାଲିବ କ୍ଲାସ୍ । ସକାଳ ୧୦ଟାରୁ ଅପରାହ୍ନ ୪ଟା ପର୍ଯ୍ୟନ୍ତ କ୍ଲାସ୍ ଚାଲିବ । ମଧ୍ୟାହ୍ନ ଭୋଜନରେ କେବଳ ଶୁଖିଲା ଖାଦ୍ୟ ଯୋଗାଇ ଦିଆଯିବ । ୧୪ ତାରିଖରୁ ପ୍ରଥମରୁ ଅଷ୍ଟମ ଶ୍ରେଣୀ ଯାଏଁ ସକାଳ ୧୦ଟାରୁ ଅପରାହ୍ନ ଗୋଟାଏ ପର୍ଯ୍ୟନ୍ତ ହେବ ପାଠପଢା । କ୍ଳାସରୁମ୍ ସାନିଟାଇଜ୍ ହେବା ସହ ଚେୟାର ଟେବୁଲ୍ ପ୍ରସ୍ତୁତ କରୁଛନ୍ତି ସ୍କୁଲ କର୍ତ୍ତୃପକ୍ଷ । ସଂକ୍ରମଣ କମୁଥିବାରୁ ଅଫଲାଇନ୍ ପରୀକ୍ଷା ପାଇଁ ପ୍ରସ୍ତୁତି ଆରମ୍ଭ ହୋଇଛି । ଦଶମ ଏବଂ କାଉନ୍ସିଲ ବୋର୍ଡକୁ ପ୍ରସ୍ତୁତ କରିବାକୁ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି । ସୁବିଧା ଦେଖି ପରୀକ୍ଷା ତାରିଖ ଘୋଷଣା କରିବାକୁ ଉଦ୍ୟମ ଆରମ୍ଭ କରିଛନ୍ତି ବୋର୍ଡ । ତେବେ ଦୀର୍ଘଦିନ ପରେ ସ୍କୁଲ ଖୋଲିବାକୁ ନେଇ ଛାତ୍ରଛାତ୍ରୀ ଉତ୍ସାହିତ ଅଛନ୍ତି ।
ବାହାଘର ସାରି ଫେରୁଥିବା ବେଳେ ବରଯାତ୍ରୀ ଗାଡ଼ି ଦୁର୍ଘଟଣା, ଜଣେ ମୃତ
ନୂଆପଡ଼ା: ବାହାଘର ସାରି ଫେରିବା ବେଳ ଦୁର୍ଘଟଣା । ବରଯାତ୍ରୀ ପିକଅପ୍ ଭ୍ୟାନ୍ ଓଲଟି ଜଣଙ୍କର ମୃତ୍ୟୁ ହୋଇଥିବା ବେଳେ ୯ ଜଣ ଗୁରୁତର ଆହାତ ହୋଇଛନ୍ତି । ନୂଆପଡ଼ା ଜିଲ୍ଲା ଖଡ଼ିଆଳ ଥାନା ନରସିଂହପୁର ନିକଟର ବରଯାତ୍ରୀ ଗାଡ଼ି ଭାରସାମ୍ୟ ହରାଇ ଓଲଟି ପଡ଼ିଥିଲା ।
ଘଟଣା ସ୍ଥଳରେ ୧୩ ବର୍ଷର ନାବାଳକର ମୃତ୍ୟୁ ହୋଇଛି । ଗୁରୁତର ଆହାତ ୯ ଜଣଙ୍କୁ ଖଡ଼ିଆଳ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି । ପିକଅପ୍ ଭ୍ୟାନଟିରେ ୩୫ରୁ ୪୦ ଜଣ ବରଯାତ୍ରୀ ଥିଲେ । ବାହାଘର ସାରି ବରଯାତ୍ରୀ ବଙ୍ଗୋମୁଣ୍ଡା ପାତଲପଡ଼ା ଫେରୁଥିବା ବେଳେ ଏହି ଦୁର୍ଘଟଣା ଘଟିଛି ।
୫ ଅଭିଯୁକ୍ତଙ୍କୁ ଗିରଫ କଲା ସାଇବର ଥାନା ପୋଲିସ
ବାଲେଶ୍ୱର: ଜମତରା ଲିଙ୍କରେ ୫ ଜଣ ଗିରଫ । ବାଲେଶ୍ୱର ସାଇବର ଥାନା ପୋଲିସ ଏକ ଲୁଟ୍ ମାମଲାର ତଦନ୍ତ କରି ୫ ଜଣଙ୍କୁ ଗିରଫ କରିଛି । ନୀଳଗିରି ଅଞ୍ଚଳର ଜଣେ ମହିଳା ଲୁଟର ଶିକାର ହୋଇଥିଲେ । ମହିଳା ଜଣଙ୍କ ବ୍ୟାଙ୍କ କଷ୍ଟମର କେୟାର ନମ୍ବର ଗୁଗଲରେ ସର୍ଚ୍ଚ କରି କଲ୍ କରି ସାଇବର ଠକଙ୍କ ହାବୁଡ଼ରେ ପଡ଼ିଥିଲେ । ସାଇବର ଲୁଟେରା କୌଶଳକ୍ରମେ ମହିଳା ଜଣଙ୍କ ଠାରୁ ଓଟିପି ହାସଲ କରି ନେଇ ନେଟ୍ ବ୍ୟାଙ୍କିଂରେ ମୋବାଇଲ୍ ନମ୍ବର ବଦଳାଇ ଦେଇଥିଲେ ।
ଏହାପରେ ୧୨ ଲକ୍ଷ ୪୫ ହଜାର ଟଙ୍କା ଆକାଉଣ୍ଟରୁ ବିଭିନ୍ନ ଖାତାକୁ ଟ୍ରାନ୍ସଫର କରି ନେଇଥିଲେ । ଏନେଇ ଅଭିଯୋଗ ହେବା ପରେ ଖୋଳତାଡ଼ ଆରମ୍ଭ କରିଥିଲା ବାଲେଶ୍ୱର ସାଇବର ଥାନା ପୋଲିସ । ତଦନ୍ତରୁ ଜଣାପଡ଼ିଥିଲା ଏହି ଟଙ୍କା ବିଭିନ୍ନ ଆକାଉଣ୍ଟକୁ ଯାଇଛି । ସେଥିମଧ୍ୟରୁ ଗୋଟିଏ ଆକାଉଣ୍ଟ ସୁନ୍ଦରଗଡ଼ ଜିଲ୍ଲାର ରହିଛି । ପୋଲିସ ଉକ୍ତ ଆକାଉଣ୍ଟଧାରୀଙ୍କ ନିକଟରେ ପହଞ୍ଚିବା ପରେ ଜଣାପଡ଼ିଥିଲା ମହିଳାଙ୍କ ଆକାଉଣ୍ଟକୁ ତାଙ୍କ ସ୍ୱାମୀ ଅପରେଟ୍ କରୁଛନ୍ତି ।
ପୋଲିସ ତାଙ୍କ ସ୍ୱାମୀକୁ ଗିରଫ କରି ଗ୍ୟାଙ୍ଗ ବିଷୟରେ ସୂଚନା ପାଇଥିଲା । ଏବେ ଗ୍ୟାଙ୍ଗର ୫ ସଦସ୍ୟଙ୍କୁ ଗିରଫ କରାଯାଇଥିବା ବେଳେ ମୁଖ୍ୟ ଅଭିଯୁକ୍ତ ଫେରାର୍ ରହିଛି । ଗିରଫଙ୍କ ଘର କଲିକତା, ବିହାର, ଝାଡ଼ଖଣ୍ଡ, ମୁର୍ସିଦାବାଦ ଓ ସୁନ୍ଦରଗଡ଼ । ସେମାନଙ୍କ ଠାରୁ ୧ ଲକ୍ଷ ୬୯ ହଜାର ଟଙ୍କା, ୧୦ଟି ମୋବାଇଲ୍, ୩୯ଟି ସିମ୍ କାର୍ଡ ଜବତ କରାଯାଇଛି । ଏବେ ବି ତଦନ୍ତ ଜାରି ରହିଛି ।
ସ୍ପୁଟନିକର ସିଙ୍ଗଲ ଡୋଜ୍ କୋଭିଡ୍ ଟିକାକୁ DCGIର ଅନୁମତି
ନୂଆଦିଲ୍ଲୀ: କୋଭିଡ୍ ପାଇଁ ସିଙ୍ଗଲ୍ ଡୋଜ୍ । ଏଣିକି ଦେଶରେ ସିଙ୍ଗଲ୍ ଡୋଜ୍ କୋଭିଡ୍ ଟିକା ଦିଆଯିବ । ସ୍ପୁଟନିକ ଲାଇଟ୍ କୋଭିଡ୍-୧୯ ଟିକାର ଜରୁରୀକାଳୀନ ବ୍ୟବହାର ଲାଗି DCGI ଅନୁମତି ପ୍ରଦାନ କରିଛି । ଏନେଇ ଟ୍ୱିଟ୍ କରି ସୂଚନା ଦେଇଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡକ୍ଟର ମନସୁଖ ମାଣ୍ଡଭିୟା । ସେ କହିଛନ୍ତି, ଦେଶ କୋଭିଡ୍ ବିରୋଧୀ ଲଢ଼େଇରେ ନବମ ଟିକା ପାଇଛି ।
DCGI has granted emergency use permission to Single-dose Sputnik Light COVID-19 vaccine in India.
This is the 9th #COVID19 vaccine in the country.
This will further strengthen the nation's collective fight against the pandemic.
— Dr Mansukh Mandaviya (@mansukhmandviya) February 6, 2022
ଏଥିସହ ପଢ଼ନ୍ତୁ: ସିଙ୍ଗଲ ଡୋଜ୍ ଭ୍ୟାକ୍ସିନ୍ ‘ସ୍ପୁଟନିକ୍ ଲାଇଟ୍’କୁ ଋଷର ଅନୁମତି, ୮୦% ପ୍ରଭାବୀ ଦାବି
ପୂର୍ବରୁ ସ୍ପୁଟନିକ ଭି ଟିକାକୁ ଦେଶରେ ଜରୁରୀକାଳୀନ ବ୍ୟବହାର ଲାଗି ଅନୁମତି ମିଳି ସାରିଛି । ୨ ଡୋଜ୍ ବିଶିଷ୍ଟ ସ୍ପୁଟନିକ୍ ଭି ତୁଳନାରେ ସିଙ୍ଗଲ୍ ଡୋଜ୍ ବିଶିଷ୍ଟ ‘ସ୍ପୁଟନିକ ଲାଇଟ୍’ ଅଧିକ ପ୍ରଭାବୀ । ସ୍ପୁଟନିକ ଭି ୯୧.୬ ପ୍ରତିଶତ ପ୍ରଭାବୀ ହୋଇଥିବା ବେଳେ ‘ସ୍ପୁଟନିକ ଲାଇଟ୍’ ୭୯.୪ ପ୍ରତିଶତ ପ୍ରଭାବୀ ଥିବା କମ୍ପାନୀ ଦାବି କରିଛି ।
ହଜାରେ ତମ ଦିନିକିଆ କ୍ରିକେଟ୍ ମ୍ୟାଚକୁ ୬ ୱିକେଟରେ ଜିତିଲା ଭାରତ
ଅହମଦାବାଦ: ଦିନିକିଆରେ ଜିତ୍ । ୱେଷ୍ଟଇଣ୍ଡିଜ୍ ବିପକ୍ଷ ପ୍ରଥମ ଦିନିକିଆ ମ୍ୟାଚକୁ ଭାରତ ୬ ୱିକେଟରେ ଜିତି ନେଇଛି । ପ୍ରଥମେ ବ୍ୟାଟିଂ କରି ଭ୍ରମଣକାରୀ ଦଳ ୪୩.୫ ଓଭରରେ ସମସ୍ତ ୱିକେଟ୍ ହରାଇ ୧୭୬ ରନ୍ କରିଥିଲା । ଜବାବରେ ଭାରତ ମାତ୍ର ୨୮ ଓଭରରେ ୪ ୱିକେଟ୍ ହରାଇ ୧୭୮ ରନ୍ କରି ମ୍ୟାଚକୁ ଜିତି ନେଇଛି ।
ୱେଷ୍ଟ ଇଣ୍ଡିଜ୍ ପକ୍ଷରୁ ହୋଲ୍ଡର ସର୍ବାଧିକ ୫୭ ରନ କରିଥିଲେ । ଦଳର ଅଧିନାୟକ ପୋଲାର୍ଡ ଶୂନ୍ ରନରେ ଚହଲଙ୍କ ବଲରେ ପ୍ୟାଭିଲିୟନ୍ ଫେରିଥିଲ । ହୋଲ୍ଡର ଓ ଫାବିଆନଙ୍କୁ ଛାଡ଼ିଦେଲେ ଦଳର ଅନ୍ୟ କୌଣସି ଖେଳାଳିଙ୍କ ବ୍ୟକ୍ତିଗତ ସ୍କୋର ୨୦ ରନ୍ ଡେଇଁ ନଥିଲା । ଦଳ ଆରମ୍ଭରୁ ବ୍ୟାଟିଂ ବିପର୍ଯ୍ୟୟ ସମ୍ମୁଖୀନ ହୋଇଥିଲା । ୨.୪ ଓଭରରେ ଓପନର ସାଇ ହୋପେ ଆଉଟ୍ ହୋଇଥିଲେ ।
ଭାରତ ପକ୍ଷରୁ ଚହଲ ସର୍ବାଧିକ ୪ଟି ୱିକେଟ୍ ନେଇଥିବା ବେଳେ ୱାଂଶିଟନ୍ ସୁନ୍ଦର ୩ଟି, ପ୍ରସିଦ୍ଧ କ୍ରୀଷ୍ଣା ୨ଟି, ସିରାଜ ଗୋଟିଏ ୱିକେଟ୍ ନେଇଥିଲେ । ରୋହିତ ଶର୍ମା ୫୧ ବଲରେ ୬୦ ରନ୍ କରିଥିଲେ । ପ୍ରଥମ ଦିନିକିଆ ଜିତି ଭାରତୀୟ ଦଳ ୩ ଟିକିଆ ଦିନିକିଆ ସିରିଜରେ ୧-୦ରେ ଆଗୁଆ ରହିଛି ।
ପଞ୍ଚଭୂତରେ ବିଲୀନ ହେଲେ ‘ସ୍ୱରର ସରସ୍ୱତୀ‘, ଭାଇ ଦେଲେ ମୁଖାଗ୍ନି
ମୁମ୍ବାଇ: ଭାରତ ରତ୍ନ ଲତା ମଙ୍ଗେସକରଙ୍କ ଅନ୍ତିମ ସଂସ୍କାର ସରିଛି । ମୁମ୍ବାଇ ସ୍ଥିତ ଶିବାଜୀ ପାର୍କରେ ରାଷ୍ଟ୍ରୀୟ ମର୍ଯ୍ୟାଦାରେ ଲତାଙ୍କ ଶେଷକୃତ୍ୟ ସମ୍ପନ୍ନ ହୋଇଛି । ଲତାଙ୍କୁ ତାଙ୍କ ଭାଇ ହୃଦୟନାଥ ଛଳଛଳ ଆଖିରେ ମୁଖାଗ୍ନି ଦେଇଛନ୍ତି । ହଜାର ହଜାର ସଂଖ୍ୟାରେ ଉପସ୍ଥିତ ପରିବାର ଲୋକ, ବଲିଉଡ୍ କଳାକାର, ବରିଷ୍ଠ ରାଜନେତା, କ୍ରୀଡ଼ାବିତ୍ ପ୍ରମୁଖ ଲତାଙ୍କୁ ଅନ୍ତିମ ବିଦାୟ ଦେଇଛନ୍ତି ।
Mortal Remains of singer Lata Mangeshkar consigned to flames with full state honours, at Shivaji Park, Mumbai pic.twitter.com/a7vYdVUQm1
— ANI (@ANI) February 6, 2022
ଲତାଙ୍କ ଦେହାନ୍ତ ପରେ ତାଙ୍କ ମରଶରୀରକୁ ମୁମ୍ବାଇ ପ୍ରଭୁକୁଞ୍ଜ ବାସଭବନକୁ ନିଆ ଯାଇଥିଲା । ତାପରେ ପାର୍ଥିବ ଶରୀରକୁ ଶୋଭାଯାତ୍ରାରେ ଶିବାଜୀ ପାର୍କ ନିଆଯାଇ ଅନ୍ତିମ ସଂସ୍କାର କରାଯାଇଛି । ସେଠାରେ ପ୍ରଧାନମନ୍ତ୍ରୀ ମୋଦିଙ୍କ ସମେତ ବହୁ ଫିଲ୍ମ କଳାକାର, କ୍ରୀଡ଼ାବିତ୍, ରାଜନେତା ଲତା ଦିଦିଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ । ଶିବାଜୀ ପାର୍କରେ ଦ୍ୱିତୀୟ ବ୍ୟକ୍ତି ଭାବେ ଲତାଙ୍କ ଅନ୍ତିମ ସଂସ୍କାର ହୋଇଛି । ଏହା ପୂର୍ବରୁ ଶିବାଜୀ ପାର୍କରେ କେବଳ ବାଲାସାହେବ ଠାକରେଙ୍କ ଶେଷକୃତ୍ୟ କରାଯାଇଥିଲା ।
୭ ଦଶନ୍ଧିର ଲମ୍ବା କ୍ୟାରିୟରରେ ଲତା ମଙ୍ଗେସକର ପ୍ରାୟ ୩୦ ହଜାର ଗୀତ ଗାଇଥିଲେ । ଦେଶ ସହ ବିଦେଶରେ ବି ଲତାଙ୍କ ସ୍ୱର ସମସ୍ତଙ୍କୁ ଟାଣୁଥିଲା । ପ୍ରାୟ ୩୬ଟି ଭାଷାରେ ଲତା କଣ୍ଠଦାନ କରିଥିଲେ । ଗତ ଏକ ମାସ ଧରି ଲତା ମେଡିକାଲରେ ଆଡମିଟ୍ ହୋଇଥିଲେ । ଲତାଙ୍କ ମୃତ୍ୟୁ ସହ ଦେଶବ୍ଯାପୀ ଶୋକର ଛାୟା ଖେଳି ଯାଇଛି । ବିବାହ ନକରି ଲତା ପରିବାର ପାଇଁ ନିଜ ଜୀବନକୁ ସମର୍ପି ଦେଇଥିଲେ ।
ରାଷ୍ଟ୍ରୀୟ ମର୍ଯ୍ୟାଦା ସହ ହେବ ପଣ୍ଡିତ ହୋତାଙ୍କ ମରଶରୀରର ଶେଷକୃତ୍ୟ
ଭୁବନେଶ୍ୱର: ପାରମ୍ପରିକ ଓଡ଼ିଶୀ ସଙ୍ଗୀତ କଣ୍ଠଶିଳ୍ପୀ ଦାମୋଦର ହୋତାଙ୍କ ପରଲୋକରେ ମୁଖ୍ୟମନ୍ତ୍ରୀ ଶୋକ ପ୍ରକାଶ କରିଛନ୍ତି । ମୁଖ୍ୟମନ୍ତ୍ରୀ ଶୋକ ପ୍ରକାଶ କରିବା ସହ ଦାମୋଦରଙ୍କ ପାର୍ଥିବ ଶରୀରର ଶେଷକୃତ୍ୟ ରାଷ୍ଟ୍ରୀୟ ମର୍ଯ୍ୟାଦା ସହ କରାଯିବ ବୋଲି ଘୋଷଣା କରିଛନ୍ତି । ଶାସ୍ତ୍ରୀୟ ସଙ୍ଗୀତ କ୍ଷେତ୍ରରେ ତାଙ୍କ ଅବଦାନକୁ ଆଗାମୀ ପିଢ଼ି ମନେ ରଖିବ ବୋଲି କହଛନ୍ତି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ ଶୋକସନ୍ତପ୍ତ ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି ।
ବିଶିଷ୍ଟ ହିନ୍ଦୁସ୍ଥାନୀ ଶାସ୍ତ୍ରୀୟ ସଙ୍ଗୀତଜ୍ଞ ଗୁରୁ ତଥା ପଣ୍ଡିତ ଦାମୋଦର ହୋତାଙ୍କ ଦେହାନ୍ତ ବିଷୟରେ ଜାଣି ମୁଁ ଦୁଃଖିତ। ଉଡ୍ରପଦ୍ଧତ୍ତୀୟ ସଙ୍ଗୀତର ଗବେଷଣା ଓ ପ୍ରଚାର ପ୍ରସାର କ୍ଷେତ୍ରରେ ନିଜ ଅବଦାନ ପାଇଁ ସେ ସର୍ବଦା ସ୍ମରଣୀୟ ରହିବେ। ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାର ପ୍ରତି ମୋର ସମବେଦନା ଜଣାଉଛି।
— Naveen Patnaik (@Naveen_Odisha) February 6, 2022
ପଣ୍ଡିତ ହୋତା ୧୯୩୫ ମସିହା କାର୍ତ୍ତିକ ଶୁକ୍ଳ ତ୍ରୟୋଦଶୀ ତିଥିରେ ପୁରୀଠାରେ ଜନ୍ମଗ୍ରହଣ କରିଥିଲେ । ତାଙ୍କ ପିତା ଗୋପୀନାଥ ହୋତା ଗୌଡ଼ବାଡ଼ ସାହି ଅଡ଼ଙ୍ଗତିଆଡ଼ି ଯାଗାର ସଭ୍ୟ, ମଲ୍ଲଯୋଦ୍ଧା, ଗାୟକ ଓ ମର୍ଦ୍ଦଳବାଦକ ଥିଲେ । ମାତାଙ୍କ ନାମ ଦଣ୍ଡିମଣି ଦେବୀ । ଶୈଶବ ଅବସ୍ଥାରୁ ସେ ନିଜ ପିତାଙ୍କ ସୁମଧୁର କଣ୍ଠରୁ ଯାଗା ଆଖଡ଼ାରେ ପ୍ରଚଳିତ ଓଡ଼ିଶୀ ସଙ୍ଗୀତ ଶୁଣି ଶୁଣି ଶିକ୍ଷା କରିଥିଲେ । ପରବର୍ତ୍ତୀ ସମୟରେ ସିଂହାରୀ ଶ୍ୟାମସୁନ୍ଦର କରଙ୍କ ଶିଷ୍ୟ ପଣ୍ଡିତ ନୃସିଂହନାଥ ଖୁଣ୍ଟିଆଙ୍କ ଠାରୁ ସେ ଉଡ୍ରପଦ୍ଧତି ଆଧାରିତ ଶାସ୍ତ୍ରୀୟ ଓଡ଼ିଶୀ ସଙ୍ଗୀତ ଓ ହିନ୍ଦୁସ୍ତାନୀ ସଙ୍ଗୀତ ଶିକ୍ଷା କରିଥିଲେ । ଗୁରୁ କାଶୀନାଥ ମୁଦୁଲିଙ୍କ ଠାରୁ ସେ ମର୍ଦ୍ଦଳ ଓ ତବଲାବାଦନ ଶିଖିଥିଲେ ।
ରାତିରୁ ପଡ଼ିବ ଘନ କୁହୁଡ଼ି, କମିବ ଶୀତ
ଭୁବନେଶ୍ୱର: କମିବ ଶୀତ, ପଡ଼ିବ ଘନ କୁହୁଡ଼ି । ରାଜ୍ୟରେ ଶୀତର ପ୍ରଭାବ କମିବ । ପ୍ରବଳ ଶୀତ ନେଇ ୭ ତାରିଖ ସକାଳ ୮ଟା ୩୦ ଯାଏ ଝାରସୁଗୁଡ଼ା, ସୁନ୍ଦରଗଡ଼, କେନ୍ଦୁଝର, ଅନୁଗୁଳ, ସୋନପୁର, ବଲାଙ୍ଗିର ଓ କଳାହାଣ୍ଡି ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ଆଗାମୀ ୨ ଦିନ ଯାଏ ରାତି ତାପମାତ୍ରାରେ ବିଶେଷ ପରିବର୍ତ୍ତନ ହେବ ନାହିଁ । ପରେ ତାପମାତ୍ରା ୩ରୁ ୫ ଡିଗ୍ରୀ ସେଲସିୟସ୍ ଯାଏ ଆସ୍ତେ ଆସ୍ତେ ବୃଦ୍ଧି ପାଇବ ।
#Warning for Day-1 to Day-3
Day-4 & Day-5: No Warning pic.twitter.com/0IzElYZ1Sz— Meteorological Centre, Bhubaneswar (@mcbbsr) February 6, 2022
ଶୀତ ପ୍ରଭାବ କମିବାକୁ ଥିବାବେଳେ ରାଜ୍ୟର ବିଭିନ୍ନ ଜିଲ୍ଲାରେ ୯ ତାରିଖ ଯାଏ ଘନ କୁହୁଡ଼ି ଲାଗି ରହିବ । ଏନେଇ ସ୍ୱତନ୍ତ୍ର ରିଲିଫ୍ କମିଶନର ସତର୍କ କରାଇଛନ୍ତି । ୮ ତାରିଖ ପାଇଁ ଘନ କୁହୁଡ଼ି ନେଇ ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ଅନୁଗୁଳ ଓ ଢେଙ୍କାନାଳ ଜିଲ୍ଲାକୁ ୟେଲୋ ୱାର୍ଣ୍ଣିଂ ଦିଆଯାଇଛି ।
ସେହିଭଳି ୯ ତାରିଖ ପାଇଁ ୧୨ ଜିଲ୍ଲାକୁ ଘନ କୁହୁଡ଼ି ପାଇଁ ୟେଲୋ ୱାର୍ଣ୍ଣିଂ ରହିଛି । ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି, କନ୍ଧମାଳ ଜିଲ୍ଲାକୁ ସତର୍କ କରାଯାଇଛି ।
କୋଳରେ ଧରିଥିବା ଏହି ଛୁଆର ମୃତ୍ୟୁ ଖବର ଶୁଣି ଭାଙ୍ଗି ପଡ଼ିଥିଲେ ଲତା, ଚିହ୍ନିଲେ କିଏ ?
ନୂଆଦିଲ୍ଲୀ: ଲତା ନାହାନ୍ତି, ତାଙ୍କ କଥା ଅଛି । ୯୨ ବର୍ଷ ବୟସରେ ଆରପାରିକୁ ଚାଲି ଯାଇଛନ୍ତି କୋକିଳକଣ୍ଠୀ ଲତା ମଙ୍ଗେସକର । ତାଙ୍କ ମୃତ୍ୟୁ ପରେ ତାଙ୍କ ସହ ଜଡ଼ିତ ଅନେକ ଫଟୋ ସୋସିଆଲ୍ ମିଡିଆରେ ଭାଇରାଲ୍ ହେଉଛି । ଲତାଙ୍କୁ ମନେ ପକାଇ କିଏ ଫଟୋ ପୋଷ୍ଟ କରୁଛି ତ ଆଉ କିଏ ପୁରୁଣା ସ୍ମୃତି ସାଉଣ୍ଟୁଛି । ଏସବୁ ଭିତରେ ଲତା ଏକ ଛୁଆକୁ କୋଳରେ ଧରିଥିବା ଫଟୋ ସମସ୍ତଙ୍କୁ ଦୃଷ୍ଟି ଆକର୍ଷଣ କରୁଛି ।
ତେବେ ଲତା କୋଳରେ ଧରିଥିବା ଏ ଛୁଆ କିଏ ? ଫଟୋରେ ଥିବା ଏ ଛୁଆଟି ହେଉଛି ବଲିଉଡର ଜଣେ ଜଣାଶୁଣା କଳାକାର । ତେବେ ଦୁଃଖର କଥା ସିଏ ମଧ୍ୟ ଏ ଦୁନିଆରେ ନାହାନ୍ତି । ଫଟୋରେ ଥିବା ଛୁଆ ହେଉଛନ୍ତି ଋଷି କପୁର । ଲତା ଯେତେବେଳେ ୬୭ ବର୍ଷୀୟ ଋଷ କପୁରଙ୍କ ମୃତ୍ୟୁ ଖବର ଶୁଣିଲେ ତ ଭାଙ୍ଗି ପଡ଼ିଥିଲେ । ଋଷି କପୁର, ଲତା ମଙ୍ଗେସକରଙ୍କ ବେଶ୍ ପ୍ରିୟ ଥିଲେ ।
ଋଷ କପୁରଙ୍କ ମୃତ୍ୟୁ ପରେ ଲତା ମଙ୍ଗେସକର ତାଙ୍କ ସୋସିଆଲ୍ ମିଡିଆ ଆକାଉଣ୍ଟରେ ଏହି ଫଟୋ ପୋଷ୍ଟ କରିଥିଲେ । ଆଉ ଫଟୋ ସହ ଲେଖିଥିଲେ, ସେ ଶବ୍ଦହୀନ ହୋଇ ପଡ଼ିଛନ୍ତି । ଯନ୍ତ୍ରଣା ଜଣାଇବାକୁ ତାଙ୍କ ପାଖରେ ଶବ୍ଦ ନଥିବା ଲେଖିଥିଲେ ଲତା ।
ଚରଣଜିତ୍ ସିଂହ ଚନ୍ନି ପଞ୍ଜାବ କଂଗ୍ରେସର ମୁଖ୍ଯମନ୍ତ୍ରୀ ଚେହେରା
ନୂଆଦିଲ୍ଲୀ: ଚନ୍ନିଙ୍କୁ ଚେହେରା କରି ପଞ୍ଜାବ ନିର୍ବାଚନ ଲଢ଼ିବ କଂଗ୍ରେସ । ଆଜି ରାହୁଲ ଗାନ୍ଧୀ ଚରଣଜିତ୍ ସିଂହ ଚନ୍ନିଙ୍କୁ ପଞ୍ଜାବ କଂଗ୍ରେସର ମୁଖ୍ୟମନ୍ତ୍ରୀ ଚେହେରା ଘୋଷଣା କରିଛନ୍ତି । ଭର୍ଚୁଆଲ୍ ପ୍ରଚାର ବେଳେ ଏ ଘୋଷଣା କରିଛନ୍ତି ରାହୁଲ ଗାନ୍ଧୀ । ଏହା ମୋର ନିଷ୍ପତ୍ତି ନୁହେଁ ବରଂ ପଞ୍ଜାବବାସୀଙ୍କର ବୋଲି କହିଛନ୍ତି ରାହୁଲ । ରାହୁଲଙ୍କ ଏ ଘୋଷଣା ବେଳେ ଲୁଧିଆନା ଭର୍ଚୁଆଲ ରାଲିରେ ରାହୁଲ ଗାନ୍ଧୀଙ୍କ ନବଜୋତ ସିଂହ ସିଦ୍ଧୁ, ଚରଣଜିତ୍ ସିଂହ ଚନ୍ନି ଓ ସୁନୀଲ ଜାଖଡ଼ ଉପସ୍ଥିତ ଥିଲେ ।
ମୁଖ୍ୟମନ୍ତ୍ରୀ ଚେହେରା ଘୋଷଣା ପରେ ଚନ୍ନି କହିଛନ୍ତି, ପଞ୍ଜାବ ଲୋକଙ୍କ ପାଇଁ ନା ଶୋଇବି, ନା ଶୋଇବାକୁ ଦେବି । କେବଳ ମୁଁ ମାଧ୍ୟମ ହେବି । ପଞ୍ଜାବ ପାଇଁ ନବଜୋତ ସିଂହ ସିଦ୍ଧୁ ଯାହା କରିବାକୁ ଚାହିଁବେ କରିପାରିବେ । ସୁନୀଲ ଜାଖଡ଼ ଯାହା ଚାହିଁବେ କରିପାରିବେ । ଆମେ ସମସ୍ତେ ମିଶିକରି ପଞ୍ଜାବକୁ ଆଗକୁ ନେଇଯିବୁ ।
ମଞ୍ଚରେ ନବଜୋତ ସିଂହ ସିଦ୍ଧୁଙ୍କୁ କୁଣ୍ଢେଇ ପକାଇଥିଲେ ଚନ୍ନି । ସିଦ୍ଧୁ କହିଥିଲେ, ରାହୁଲ ଗାନ୍ଧୀ ଜଣେ ଦଳିତ, ଗରିବଙ୍କୁ ମୁଖ୍ୟମନ୍ତ୍ରୀ କରନ୍ତି । ବିଜେପି ମୋତେ ନେଇ ପ୍ରଚାର କରେ । କିନ୍ତୁ ରାହୁଲ ଗାନ୍ଧୀ ୪ ବର୍ଷ ମଧ୍ୟରେ ମୋତେ କଂଗ୍ରେସର ରାଜ୍ୟ ଅଧ୍ୟକ୍ଷ ପଦ ଦେଇଛନ୍ତି । ମୋତେ କିଛି ଲୋଡ଼ା ନାହିଁ । କଂଗ୍ରେସ ଓ ପଞ୍ଜାବର ବିକାଶ ଲୋଡ଼ା ।