ଭୁବନେଶ୍ବର: ଆକାଶ ଛୁଆଁ ଅତ୍ୟାବଶ୍ୟକ ଦରଦାମ । ସର୍ବାଧିକ ବଢିଛି ପନିପରିବା ଦର । ଯେଉଁ ବଜେଟ୍ରେ ଦିନେ ବ୍ୟାଗ ଭର୍ତ୍ତି ପରିବା ମିଳୁଥୁଲା, ସେତିକି ଟଙ୍କାରେ ଏବେ ପନିପରିବା କୋଣକୁ ପାଉନି । ଆୟ ସୀମା ବଢୁ ନଥିବାବେଳେ ବ୍ୟୟ ଅନେକ ଗୁଣ ବଢ଼ିଯାଇଛି । ଖୁଚୁରା ମୁଦ୍ରାସ୍ଫୀତି ଭାରତୀୟ ରିଜର୍ଭ ବ୍ୟାଙ୍କ ଦ୍ବାରା ଧାର୍ଯ୍ୟ ସୀମାକୁ ପାର କରିଯାଇଛି । ଗତ ଅକ୍ଟୋବରରେ ଏହା ୬.୦୯ ପ୍ରତିଶତ ରହିଛି । ଗତ ୧୦ ମାସରେ କ୍ରମାଗତ ଭାବେ ଖୁଚୁରା ମୁଦ୍ରାସ୍ଫୀତି ୨.୭୪ ପ୍ରତିଶତରୁ ବଢି ୬.୦୯ ପ୍ରତିଶତରେ ପହଞ୍ଚିଛି । ଆରବିଆଇ ଦ୍ବାରା ଧାର୍ଯ୍ୟ ସୀମା ୪ରୁ ୬ ପ୍ରତିଶତଠାରୁ ଏହା ଅଧିକ ହୋଇଯାଇଛି । ଗତ ଦୁଇ ବର୍ଷ ମଧ୍ୟରେ ପ୍ରଥମ ଥର ପାଇଁ ଏପରି ହୋଇଛି । ପରିସଂଖ୍ୟାନ ମନ୍ତ୍ରଣାଳୟ ପକ୍ଷରୁ ଗୁରୁବାର ଜାରି ତଥ୍ୟରୁ ଏହି ସୂଚନା ମିଳିଛି । ଖାଦ୍ୟ ସାମଗ୍ରୀର ମୂଲ୍ୟ ସର୍ବାଧିକ ୮.୫୧ ପ୍ରତିଶତ ବଢିଛି । ପୋଷାକ, ଇନ୍ଧନ, ସ୍ବାସ୍ଥ୍ୟସେବା, ଘର, ଜଳ ଓ ବିଜୁଳି ଆଦିର ମୂଲ୍ୟ ବଢିଛି । ଖାଦ୍ୟ ସାମଗ୍ରୀକୁ ଦେଖିଲେ ଅକ୍ଟୋବରରେ କ୍ଷୀର, ଅଣ୍ଡା, ପିଆଜ, ରସୁଣ ସମେତ ଆଦି ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ମୂଲ୍ୟ ବଢିଛି । ଏହି ସମୟରେ ପିଆଜ ଦର ୧୧୬.୨୨ ପ୍ରତିଶତ, ରସୁଣ ୬୦.୭୪ ପ୍ରତିଶତ ଓ ଲେମ୍ବୁ ମୂଲ୍ୟ ବୃଦ୍ଧି ପାଇ ୪୭.୩୦ ପ୍ରତିଶତିରେ ପହଞ୍ଚି ଥିଲା । ଏଥିଯୋଗୁଁ ସମୀକ୍ଷାଧୀନ ଅବଧିରେ ଖାଦ୍ୟ ମୁଦ୍ରାସ୍ଫୀତି ୮.୯୪ ପ୍ରତିଶତରେ ପହଞ୍ଚି ଯାଇଛି । ଏହା ସେପ୍ଟେମ୍ବରରେ ୭. ୭୪ ପ୍ରତିଶତ ଥିଲା । ଅକ୍ଟୋବରରେ ସର୍ବାଧିକ ମୁଦ୍ରାସ୍ଫୀତି ରେକର୍ଡ କରିଥିବା ସାମଗ୍ରୀ ମଧ୍ୟରେ ରୁପା ଅଳଙ୍କାର ରହିଛି । ଏହାର ମୂଲ୍ୟ ୫୨.୩୯ ପ୍ରତିଶତ ବୃଦ୍ଧି ଘଟିଛି । ସେପଟେ ଯୋଗାଣ ମନ୍ତ୍ରୀଙ୍କ ସଫେଇ ଯେ ଅତ୍ୟାବଶକୀୟ ସାମଗ୍ରୀର ଦର ବଢିନି । ଯାହାକୁ ନେଇ ବିବାଦ ଘନେଇଛି ।…
ଅର୍ଥନୈତିକ ଅଭିବୃଦ୍ଧିକୁ ପ୍ରୋତ୍ସାହନ ଦେବା ସହ ଅର୍ଥନୈତିକ ସ୍ଥିରତା ବଜାୟ ରଖିବା ଲକ୍ଷ୍ୟରେ ଆରବିଆଇ ଏହି ସୀମା ମଧ୍ୟରେ ମୁଦ୍ରାସ୍ଫୀତି ନିୟନ୍ତ୍ରଣରେ ରଖିବାକୁ ଚେଷ୍ଟା କରେ । ସୁଧ ହାର ବଢ଼ିଲେ ଗୃହ ଋଣ, କାର ଋଣ ଓ ଅନ୍ୟ ସବୁ ରଣ ମହଙ୍ଗା ହୋଇପାରେ । ଏହାଦ୍ବାରା ଲୋକେ ଋଣ ନେବା ଓ ଖର୍ଚ୍ଚ ଉପରେ ଲଗାମ ଲଗାଇବେ । ତେବେ ସୁଧ ହାର ବଢ଼ାଇବା ନିଷ୍ପରି ଆରବିଆଇ ପାଇଁ ସହଜ ହେବନାହିଁ, କାରଣ ଏହାଦ୍ଵାରା ରଣ ନେଉଥିବା ଲୋକଙ୍କ ଉପରେ ବୋଝ ବଢ଼ିବ । ଏହା ପୂର୍ବରୁ ଗତ ଅକ୍ଟୋବର ୭ରେ ମୁଦ୍ରାନୀତି କମିଟି ବୈଠକରେ ସର୍ବସମ୍ମତି କ୍ରମେ ରେପୋ ରେଟ୍ରେ ୨୫ ବେସିସ୍ ପଏଣ୍ଟ ବୃଦ୍ଧିକରି ଏହାକୁ ୫.୫ ପ୍ରତିଶତ କରିଥିଲା । ଏହାକୁ ନେଇ ଆଇବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା କହିଥିଲେ ଯେ ଉପରୋକ୍ତ ମୂଲ୍ୟ ସୂଚକାଙ୍କ ଆଧାରିତ ମୁଦ୍ରାସ୍ପୀତି ଜୁଲାଇରେ ୪.୫ ପ୍ରତିଶତ ଥିବାବେଳେ ଅଗଷ୍ଟରେ ଏହା ୪.୮ ପ୍ରତିଶତକୁ ବୃଦ୍ଧି ପାଇଥିଲା I ଖାଦ୍ୟ ଓ ରନ୍ଧନ କ୍ଷେତ୍ରରେ ଦରବୃଦ୍ଧି ଏହାର ମୁଖ୍ୟ କାରଣ । ତେବେ ବୈଦେଶିକ ସ୍ତରରେ ତୈଳ ଦର କମିଥିବାବେଳେ ପରିବହନ ଖର୍ଚ୍ଚ କମୁ ନଥିବାରୁ, ସ୍ଥିତି ଆହୁରି ସଙ୍ଗୀନ ହେବାରେ ଲାଗିଛି । …
ଚିନି ଓ ପିଆଜ ଭଳି ସାମଗ୍ରୀର ଦରରେ ଉଲ୍ଲେଖନୀୟ ବୃଦ୍ଧି ଘଟିଛି । ଅଗଷ୍ଟରେ ଇନ୍ଧନ ମୁଦ୍ରାସ୍ଫୀତି ବୃଦ୍ଧିର ପ୍ରଭାବ ଏହା ଉପରେ ପଡ଼ିଛି ବୋଲି କୁହାଯାଉଛି। ଆଗାମୀ କିଛି ମାସରେ ମୁଦ୍ରାସ୍ଫୀତି ଉପରେ ଯୋଗାଣ କ୍ଷେତ୍ରରୁ ଚାପ ଜାରି ରହିବାର ସମ୍ଭାବନା ରହିଛି । ଦୁର୍ବଳ ମୌସୁମୀ ବର୍ଷା, ଏଲନିନୋ ପ୍ରଭାବ ଓ ଶକ୍ତି ସମେତ ଅନ୍ୟାନ୍ୟ ସାମଗ୍ରୀର ଉଚ୍ଚ ଦର ଏହାର ପ୍ରମୁଖ କାରଣ। ସମସ୍ତ ଦିଗକୁ ବିଚାରକୁ ନେଇ ଆଇବିଆଇ ୨୦୨୬-୨୭ ଆର୍ଥିକ ବର୍ଷ ପାଇଁ ଖୁଚୁରା ମୁଦ୍ରାସ୍ଫୀତି ୫୨ ପ୍ରତିଶତ ରହିବ ବୋଲି ଆକଳନ କରିଛି ।
