ଖୋର୍ଦ୍ଧା : ବୋଇତରେ ସଚେତନତା ବାର୍ତ୍ତା । ସୋଲରେ ତିଆରି ହୋଇଛି ନିଆରା ବୋଇତ । ଏ ହେଉଛି ଖୋର୍ଦ୍ଧା ଜିଲ୍ଲା ସିକୋ ଅଞ୍ଚଳର ଦୃଶ୍ୟ । ନିଖୁଣ କାରୁକାର୍ଯ୍ୟ, ଆକର୍ଷଣୀୟ ସାଜସଜ୍ଜା ସାଙ୍ଗକୁ ଏଥିରେ ରହିଛି ସମାଜ ପାଇଁ ଏକ ବଡ଼ ସନ୍ଦେଶ । ନିଶା ନୁହେଁ, ନୂଆ ଜୀବନ । ନିଶାମୁକ୍ତ ହେଉ ଆମ ଭୁବନ । ଗଛ ଲଗାଅ, ଜୀବନ ବଞ୍ଚାଅ । ଏଭଳି ସ୍ଲୋଗାନ ମାଧ୍ୟମରେ ଲୋକଙ୍କୁ ସଚେତନ କରୁଛନ୍ତି ଶିଳ୍ପୀ କେଳୁଚରଣ ଦାସ । ନିଶା କବଳରେ ପଡ଼ି ଯୁବପିଢ଼ି ନିଜ ଭବିଷ୍ୟତ ନଷ୍ଟ କରୁଥିବା ଦେଖି ସେ ନିଜ କଳା ମାଧ୍ୟମରେ ଦେବାକୁ ଚାହିଁଛନ୍ତି ଏକ ସକାରାତ୍ମକ ବାର୍ତ୍ତା ।
କେଳୁଚରଣଙ୍କ ଏହି ପ୍ରୟାସକୁ ସ୍ୱାଗତ କରିଛନ୍ତି ସ୍ଥାନୀୟ ବାସିନ୍ଦା। କେବଳ ନିଶାମୁକ୍ତି ନୁହେଁ, ପରିବେଶ ସୁରକ୍ଷାର ବାର୍ତ୍ତା ମଧ୍ୟ ବାଣ୍ଟୁଛି ଏହି ବୋଇତ । ଗଛ ଲଗାଇବା, ପ୍ରକୃତିକୁ ସୁରକ୍ଷା ଦେବା ଭଳି ସନ୍ଦେଶ ଯୁବପିଢ଼ିଙ୍କୁ ଏକ ନୂଆ ଦିଗ ଦେଖାଉଛି । ପାରମ୍ପରିକ ବୋଇତ ଭସାଣକୁ ସମାଜ ସଂସ୍କାରର ମାଧ୍ୟମ କରିବାର ଏହି ଉଦ୍ୟମକୁ ବିଭିନ୍ନ ମହଲରୁ ପ୍ରଶଂସା କରାଯାଇଛି।
