ଭୁବନେଶ୍ବର: ରାଜ୍ୟରେ ବଢି ଚାଲିଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ଆଜିଠାରୁ ରାଜ୍ୟରେ ନାଇଟ୍ କର୍ଫ୍ୟୁ ଲାଗୁ ହେବାକୁ ଯାଉଛି । ବିଶେଷ କରି ଭୁବନେଶ୍ବରରେ ସଂକ୍ରମିତଙ୍କ ସଂଖ୍ୟା ଅଧିକ ରହିଥିବାରୁ ଗାଇଡଲାଇନ୍ ଜାରି କରିଛି ବିଏମସି । ବିମାନରେ ଭୁବନେଶ୍ବର ଆସୁଥିବା ସମସ୍ତ ଯାତ୍ରୀଙ୍କର ଆଜିଠୁ ଆରଟିପିସିଆର୍ ଟେଷ୍ଟ ବାଧ୍ୟତାମୂଳକ କରାଯାଇଛି । ବିଏମସି ପକ୍ଷରୁ ସମସ୍ତ ଯାତ୍ରୀଙ୍କ ଆରଟିପିସିଆର୍ ଟେଷ୍ଟ କରାଯିବ । ଯାତ୍ରୀମାନେ ଡବଲ ଡୋଜ ଟିକା ନେଇଥିଲେ ବା ନେଗେଟିଭ ରିପୋର୍ଟ ଥିଲେ ମଧ୍ୟ ସେମାନଙ୍କର ଆର୍ଟିପିସିଆର୍ ଟେଷ୍ଟ କରାଯିବ। ରିପୋର୍ଟ ଆସିବା ପର୍ଯ୍ୟନ୍ତ ଯାତ୍ରୀମାନେ ହୋମ୍ ଆଇସୋଲେସନରେ ରହିବେ । ଯଦି ରିପୋର୍ଟ ପଜିଟିଭ୍ ଆସେ, ତେବେ ପରବର୍ତ୍ତୀ ସମୟରେ ସମସ୍ତ ନିୟମ ମାନିବାକୁ କୁହାଯାଇଛି ।
ଆଜିଠୁ ଫେରିଲା କଟକଣା, ରାତି ୯ରୁ ସକାଳ ୫ ନାଇଟ୍ କର୍ଫ୍ୟୁ
ଭୁବନେଶ୍ବର: ଓମିକ୍ରନ୍ ସଂକ୍ରମଣ ବଢ଼ିବା ସହ ଫେରୁଛି କଟକଣା । ଆଜିଠୁ ରାଜ୍ୟରେ ଲାଗୁ ହୋଇଛି ନୂଆ କଟକଣା । ସକାଳ ୫ଟାରୁ ସମସ୍ତ ସହରାଞ୍ଚଳରେ ଲାଗୁ ହୋଇଛି ନୂଆ କଟକଣା । ଆଜିଠୁ ରାତି ୯ରୁ ସକାଳ ୫ଟା ଯାଏଁ ଲାଗିବ ନାଇଟ କର୍ଫ୍ୟୁ । ଏହି ସମୟରେ ଅତ୍ୟାବଶ୍ୟକ ସାମଗ୍ରୀ ମିଳିବ ବୋଲି ସ୍ପଷ୍ଟ କରିଛନ୍ତି ଏସଆରସି ।
ବିବାହ ଉତ୍ସବରେ ମାତ୍ର ୧୦୦ ଜଣଙ୍କୁ ଅନୁମତି । ୩୦ ଜଣ ବରଯାତ୍ରୀଙ୍କୁ ମଧ୍ୟ ଅନୁମତି ମିଳିଛି । ଅନ୍ତ୍ୟେଷ୍ଟି କାର୍ଯ୍ୟରେ ସର୍ବାଧିକ ୫୦ ଲୋକଙ୍କୁ ଅନୁମତି ଦିଆଯାଇଛି । ସାମାଜିକ ଓ ଧାର୍ମିକ କାର୍ଯ୍ୟକ୍ରମ ଉପରେ କଟକଣା ଲଗାଯାଇଛି । କୌଣସି ଶିକ୍ଷାନୁଷ୍ଠାନ ପିକ୍ନିକ୍ ଆୟୋଜନ କରିପାରିବେ ନାହିଁ । ହୋଟେଲ ଓ ରେଷ୍ଟୁରାଣ୍ଟ ୫୦ ପ୍ରତିଶତ ଗ୍ରାହକରେ ଚାଲିବ । ସିନେମା ହଲ ଓ ଥିଏଟର ୫୦ ପ୍ରତିଶତ କ୍ଷମତାରେ ଚାଲିବ । କୌଣସି ଶିକ୍ଷାନୁଷ୍ଠାନ ପିକ୍ନିକ୍ ଆୟୋଜନ କରିପାରିବେ ନାହିଁ । ୫୦ ଜଣ ଲୋକଙ୍କୁ ନେଇ ସୁଟିଂ ହେବ । ନନ୍ଦନକାନନ ଯିବା ପାଇଁ ହେଲେ ଅନ୍ଲାଇନ୍ ଟିକେଟ କାଟିବେ ପର୍ଯ୍ୟଟକ । କଟକଣାରେ ଇନଡୋର ଏବଂ ଆଉଟଡୋର ଫିଲ୍ମ ସୁଟିଂ ହୋଇପାରିବ । ମକର ସଂକ୍ରାନ୍ତି ପାଇଁ କେବଳ ନୀତି ହେବ । ଦୋକାନ କିମ୍ବା ମଲରେ ଭିଡ ଜମିଲେ ସଂପୃକ୍ତ ସଂସ୍ଥାର ମାଲିକ ଦାୟୀ ରହିବେ ବୋଲି ଏସଆରସି କହିଛନ୍ତି । ସେପଟେ ଆଜିଠୁ ୫୦ ପ୍ରତିଶତ କର୍ମଚାରୀରେ ଚାଲିବ ସରକାରୀ ଅଫିସ୍ । ଆବଶ୍ୟକୀୟ ସେବା ପାଇଁ ଥିବା କାର୍ଯ୍ୟାଳୟ କଟକଣାରୁ ମୁକ୍ତ ରହିବ । ଫାୟାର ଷ୍ଟେସନ, ପୋଲିସ, ନିର୍ବାଚନ କମିଶନଙ୍କ ଅଫିସ୍ କଟକଣାରୁ ମୁକ୍ତ ରହିବ । ଓପିଏସସି, ଓଏସଏସସି କାର୍ଯ୍ୟାଳୟ ୭୫ ପ୍ରତିଶତ କ୍ଷମତାରେ ଚାଲିବ । ଏହି କଟକଣା ଆସନ୍ତା ୩୧ ତାରିଖ ପର୍ଯ୍ୟନ୍ତ ଲାଗୁ ରହିବ । ସଂକ୍ରମଣ ଉପରମୁହାଁ ଥିବାରୁ କାମ ନଥିଲେ ଅଯଥା ଭିଡ ନକରିବାକୁ ପରାମର୍ଶ ଦିଆଯାଇଛି ।
ଉପାନ୍ତରେ ପହଁଚିବ 4G ସେବା, ତପସ୍ୱିନୀ ଏକ୍ସପ୍ରେସର ଅତ୍ୟାଧୁନିକ ବଗି ଶୁଭାରମ୍ଭ
ଭୁବନେଶ୍ୱର: ଉପାନ୍ତ ଅଞ୍ଚଳରେ 4G ସେବା ଯୋଗାଇ ଦେବାପାଇଁ ୩ ହଜାର ୨୦୦ କୋଟି ଟଙ୍କାର ପ୍ରକଳ୍ପ ଶୁଭାରମ୍ଭ କଲେ ଟେଲିଯୋଗାଯୋଗ ମନ୍ତ୍ରୀ ଅଶ୍ୱିନୀ ବୈଷ୍ଣବ। ଭୁବନେଶ୍ୱର ବିଏସଏନଏଲ୍ ଭବନରେ ଆୟୋଜିତ ସ୍ୱତନ୍ତ୍ର ଉତ୍ସବରେ ବିଏସଏନଏଲ୍ ଟାଓ୍ୱାର ପାଇଁ ପ୍ରକଳ୍ପ ର ଶୁଭାରମ୍ଭ କରିଛନ୍ତି ମନ୍ତ୍ରୀ । ଏହି ବ୍ୟବସ୍ଥା ମାଧ୍ୟମରେ ୩ ହଜାର ୯୩୩ ଗାଁକୁ ଯୋଡିବ ବିଏସଏନଏଲ୍ । ସାରା ଭାରତ ବର୍ଷରେ ମଞ୍ଜୁରୀ ହୋଇଥିବା ଗାଁ ମଧ୍ୟରୁ କେବଳ ଓଡିଶା ଅଧାରୁ ଅଧିକ ସ୍ଥାନିତ ହୋଇଛି ।
୧୦ ଟି ଜିଲ୍ଲା ପାଇଁ ୪G ଟାଓ୍ୱାର ମଞ୍ଜରୀ ହୋଇଛି । ଏହାସହ ୨୭୨ ନୂଆ ପୋଷ୍ଟ ଅଫିସ ଓଡିଶା ପାଇଁ ପ୍ରଧାନମନ୍ତ୍ରୀ ମଞ୍ଜୁର କରିଛନ୍ତି । ଏହା ଦ୍ୱାରା ଭାରତ ସରକାରଙ୍କ ଯୋଜନା ପୋଷ୍ଟ ଅଫିସ ମାଧ୍ୟମରେ ଜନସାଧାରଣ ପାଉଛନ୍ତି । ଏବେ ସୁଦ୍ଧା ରାଜ୍ୟରେ ଡାକଘର ମାଧ୍ୟମରେ ୯ ଲକ୍ଷ ସୁକନ୍ୟା ଯୋଜନା ଆକାଉଣ୍ଟ ଖୋଲିଛି । ଆଗକୁ ଡାକଘର ଦ୍ୱାରା ସମସ୍ତ କାର୍ଯ୍ୟ ହୋଇ ପାରିବ ବୋଲି ପ୍ରତିକ୍ରିୟା ଦେଇ କହିଛନ୍ତି ବିଭାଗୀୟ ମନ୍ତ୍ରୀ ।
ସେହିପରି ଅତ୍ୟାଧୁନିକ ବଗି ବିଶିଷ୍ଟ ପୁରୀ -ହାତିଆ ତପସ୍ୱିନୀ ଏକ୍ସପ୍ରେସର ଶୁଭାରମ୍ଭ କରିଛନ୍ତି ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ । ଭୁବନେଶ୍ୱର ରେଳ ଷ୍ଟେସନରେ ଅନୁଷ୍ଠିତ ସ୍ୱତନ୍ତ୍ର କାର୍ଯ୍ୟକ୍ରମରେ ମନ୍ତ୍ରୀ ପତାକା ଦେଖାଇ ଶୁଭାରମ୍ଭ କରିଛନ୍ତି । ଏହାଦ୍ବାରା ୧୨ ଟି ଜିଲ୍ଲାର ଯାତ୍ରୀ ରାଜଧାନୀ ଏକ୍ସପ୍ରେସ ଭଳି ସୁବିଧା ପାଇପାରିବେ । ଏହି ଅବସରରେ ମନ୍ତ୍ରୀ ସୂଚନା ଦେଇଛନ୍ତି ଯେ, ଖୋର୍ଦ୍ଧାରୁ ମହିପୁର କାମ ସରିଆସୁଛି । ମହିପୁରରୁ ନୂଆଗାଁ କାମ ଦୁଇ ମାସ ମଧ୍ୟରେ ଶେଷ ହେବ ।
ନୂଆଗାଁରୁ ଦଶପଲ୍ଲା ୮-୯ ମାସ ଲାଗିବ । ସେହିଭଳି ବଲାଙ୍ଗୀରରୁ ସୋନପୁର, ବୌଦ୍ଧ, ଚମ୍ପାପୁର ୧୩ -୧୪ ମାସ ମଧ୍ୟରେ ସରିବ ବୋଲି ମନ୍ତ୍ରୀ କହିଛନ୍ତି । ଭୁବନେଶ୍ୱର ଷ୍ଟେସନକୁ ଟିମ୍ ଆସି ସର୍ଭେ କରି ଫେରିଛି । ଦୁଇ ଦିନ ମଧ୍ୟରେ ପ୍ଳାନ ଆପ୍ରୁଭ ହେଲେ କାମ ଆରମ୍ଭ ହେବ । ସୁନ୍ଦରଗଡ ରୁ ତାଳଚେର ପାଇଁ କାମ ଖୁବଶୀଘ୍ର ଆରମ୍ଭ ହେବ ବୋଲି ପ୍ରତିକ୍ରିୟା ପ୍ରକାଶ କରିଛନ୍ତି ।
ପ୍ରଧାନମନ୍ତ୍ରୀଙ୍କ ସୁରକ୍ଷାକୁ ନେଇ ମୁଖ୍ୟମନ୍ତ୍ରୀଙ୍କ ପ୍ରତିକ୍ରିୟା, ପ୍ରଶଂସା କଲେ ଧର୍ମେନ୍ଦ୍ର
ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷା ବ୍ୟବସ୍ଥାକୁ ନେଇ ପଞ୍ଜାବରେ ଦେଖାଦେଇଥିବା ତ୍ରୁଟିକୁ ନେଇ ପ୍ରତିକ୍ରିୟା ରଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଧାନମନ୍ତ୍ରୀ ଜଣେ ବ୍ୟକ୍ତି ନୁହଁନ୍ତି ପ୍ରଧାନମନ୍ତ୍ରୀ ହେଉଛନ୍ତି ଏକ ଅନୁଷ୍ଠାନ । ପ୍ରତ୍ୟେକ ରାଜ୍ୟ ସରକାରଙ୍କ କର୍ତ୍ତବ୍ୟ ହେଉଛି ପ୍ରଧାନମନ୍ତ୍ରୀଙ୍କୁ ସମ୍ପୂର୍ଣ୍ଣ ସୁରକ୍ଷା ପ୍ରଦାନ କରିବା । ଏହି ସଂସ୍ଥାର ଗାରିମାକୁ ବଜାୟ ରଖିବା ପ୍ରତ୍ୟେକ ସରକାରଙ୍କ କାର୍ତ୍ତବ୍ୟ ବୋଲି ସାମାଜିକ ଗଣମାଧ୍ୟରେ ପ୍ରତିକ୍ରିୟା ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବାୀନ ପଟ୍ଟନାୟକ ।
The Prime Minister of India is an institution. It is the duty of every Government to provide foolproof security and safeguard the dignity of this institution. Anything contrary should be unacceptable in our democracy.
— Naveen Patnaik (@Naveen_Odisha) January 6, 2022
ସେହିପରି ମୁଖ୍ୟମନ୍ତ୍ରୀ କହିଛନ୍ତି ଆମର ଗଣତନ୍ତ୍ରରେ ଏହାର ବିପରୀତ ଘଟଣା ଘଟିବା ଗ୍ରହଣୀୟ ନୁହେଁ । ସୁରକ୍ଷା ବ୍ୟବସ୍ଥାକୁ ଢିଲା କରିବା ସ୍ୱିକାରଯୋଗ୍ୟ ନୁହେଁ ବୋଲି ମୁଖ୍ୟମନ୍ତ୍ରୀ କହିଛନ୍ତି । ସେପଟେ ନବୀନଙ୍କ ଏହି ଟୁଇଟକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉଚ୍ଚସିତ ପ୍ରଶଂସା କରିଛନ୍ତି । ମୁଖ୍ୟମନ୍ତ୍ରୀଙ୍କ ଟ୍ୱିଟକୁ ରିଟ୍ୱିଟ କରି ଧର୍ମେନ୍ଦ୍ର କହିଛନ୍ତି ଭାରତର ଗଣତନ୍ତ୍ର ଏମିତି କାର୍ଯ୍ୟ କରିବା ଉଚିତ୍ । ଆମର ବିଚାରଧାରାରେ ଭିନ୍ନତା ରହିଥାଇପାରେ । ମତାମତରେ ସମାନତା ନଥିଲେ ମଧ୍ୟ ପ୍ରଧାନମନ୍ତ୍ରୀଙ୍କ ସୁରକ୍ଷାକୁ ବିପଦରେ ପକାଇ ପାରିବା ନାହିଁ ।
This is how a democracy like in India should function.
We all can have differing ideologies,beliefs & opinions but that can be no ground to legitimise a breach in security for the Prime Minister.
Appreciate @Naveen_Odisha ji for his concern for PM Modi’s security. https://t.co/jQ3oPH41Mj
— Dharmendra Pradhan (@dpradhanbjp) January 6, 2022
ନବୀନଙ୍କ ଏପରି ପ୍ରତିକ୍ରିୟାକୁ ନେଇ କେନ୍ଦ୍ରମନ୍ତ୍ରୀ କହିଛନ୍ତି, ଏହା ସଭିଙ୍କ ପ୍ରେରଣା । ମୁଖ୍ୟମନ୍ତ୍ରୀଙ୍କ ମନ୍ତବ୍ୟ ଅନୁଶୀଳନ ଓ ଅନୁକରଣୀୟ । ପ୍ରଧାନମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥାକୁ ନେଇ ମୁଖ୍ୟମନ୍ତ୍ରୀ ଚିନ୍ତା ପ୍ରକଚଟ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟନାୟକ ଦେଶରେ ଜଣେ ନିରବ ନାୟକ ହବୋଲି ପୁଣି ଥରେ ପ୍ରମାଣିତ କରିଛନ୍ତି । ସର୍ବଦା ଗଣତନ୍ତ୍ରକୁ ସମ୍ମାନ ଦେଇ ଆସିଥିବା ନବୀନଙ୍କ ବିଚାର ପୁଣି ଥରେ ଦେଶବାସୀଙ୍କ ଆଗରେ ପ୍ରତିପାଦିତ ହୋଇଛି ।
ଏଣିକି ନିର୍ବାଚନରେ ସାଂସଦ ପ୍ରାର୍ଥୀ ଖର୍ଚ୍ଚ କରିପାରିବେ ୯୫ ଲକ୍ଷ
ନୂଆଦିଲ୍ଲୀ: ବଢିଲା ସାଂସଦ ଓ ବିଧାୟକଙ୍କ ଖର୍ଚ୍ଚ ସୀମା । ନିର୍ବାଚନ ଲଢିବାକୁ ପ୍ରାର୍ଥୀଙ୍କ ଖର୍ଚ୍ଚ ସୀମା ବୃଦ୍ଧି କରାଯାଇଛି । ଏଣିକି ନିର୍ବାଚନରେ ଆହୁରି ୨୫ ଲକ୍ଷ ଟଙ୍କା ଅଧିକ ଖର୍ଚ୍ଚ କରିପାରିବେ ସାଂସଦ ପ୍ରାର୍ଥୀ । ପୂର୍ବରୁ ସାଂସଦମାନେ ୭୦ ଲକ୍ଷ ଟଙ୍କା ଖର୍ଚ୍ଚ କରୁଥିବାବେଳେ ଏବେ ଏହାକୁ ୯୫ ଲକ୍ଷକୁ ବୃଦ୍ଧି କରାଯାଇଛି ।
ସେହିପରି ପୂର୍ବରୁ କେନ୍ଦ୍ର ଶାସିତ ଅଞ୍ଚଳର ସାଂସଦ ପ୍ରାର୍ଥୀଙ୍କ ଖର୍ଚ୍ଚ ୫୪ ଲକ୍ଷ ଟଙ୍କା ଥିବାବେଳେ ଏବେ ତାହାକୁ ବୃଦ୍ଧି ଘଟାଯାଇ ୭୦ ଲକ୍ଷ କରାଯାଇଛି । ବିଧାୟକ ପ୍ରାର୍ଥୀଙ୍କ ଖର୍ଚ୍ଚ ସୀମା ୨୮ ଲକ୍ଷରୁ ୪୦ ଲକ୍ଷକୁ ବୃଦ୍ଧି କରାଯାଇଛି । ଏ ନେଇ ଭାରତୀୟ ନିର୍ବାଚନ ଆୟୋଗଙ୍କ ପକ୍ଷରୁ ସୂଚନା ଦିଆଯାଇଛି ।
ଡିମ୍ପଲଙ୍କୁ ଶ୍ୱଶୁର ଘରେ ପ୍ରବେଶ କଲେ ପ୍ରଶାସନିକ ଅଧିକାରୀ
ବ୍ରହ୍ମପୁର: ବାଦ ବିବାଦ ପରେ ଶେଷରେ ଶ୍ୱଶୁର ଘରେ ପ୍ରବେଶ କଲେ ଡିମ୍ପଲ । ଦିନ ସମୟରେ ତପସ୍ୱିନୀ ଘରେ ରହିବା ପ୍ରସଙ୍ଗ ଠିକଠାକ୍ ଥିବାବେଳେ ଅପରାହ୍ମରେ ବିଗିଡିଯାଇଥିଲା ସ୍ଥିତି । କୋର୍ଟ କେବଳ ମାସିକ ୧୭ ହଜାର ଟଙ୍କା ପ୍ରଦାନ କରିଥିବାବେଳେ ଘରେ ରହିବା ନେଇ କୌଣସି ଅନୁମତି ନଥିବା କହିଥିଲେ ଡିମ୍ପଲଙ୍କ ଶ୍ୱଶୁର । ସେପଟେ ଗ୍ରୀଲରେ ତାଲା ପକାଇଦେଇଥିଲେ ପରିବାର ଲୋକେ । ଯାହା ଘଟଣାକୁ ପୁଣି ଏକ ଜଟିଳ ମୋଡରେ ପହଁଚାଇଦେଇଥିଲା । ଏନେଇ ପୁନଶ୍ଚ ପ୍ରଶାସନ ପାଖରେ ଅଭିଯୋଗ କରିଥିଲେ ତପସ୍ୱିନୀ ।
ରାତି ପ୍ରାୟ ୯ଟା ପରେ ପ୍ରଶାସନିକ ଅଧିକାରୀ ବ୍ରହ୍ମାନଗର ଅଞ୍ଚଳରେ ପହଁଚିଥିଲେ । ଏହାପରେ SDPO, ସ୍ଥାନୀୟ ଆଇଆଇସି, ତହସିଲଦାର ଓ ପ୍ରୋଟେକ୍ସନ ଅଫିସର ପହଁଚି ଡିମ୍ପଲଙ୍କୁ ଘର ଭିତରକୁ ଯିବା ନେଇ ଅନୁମତି ଦେଇଥିଲେ । ତେବେ ଘରେ ତାଲା ପକାଇଥିବା ଡିମ୍ପଲଙ୍କ ଶ୍ୱଶୁର ଘର ତାଲା ଖୋଲିଥିଲେ । ଏବଂ ସ୍ଥାନୀୟ ପ୍ରଶାସନିକ ଅଧିକାରୀଙ୍କ ସହ ଡିମ୍ପଲ ଗୃହ ପ୍ରବେଶ କରିଥିଲେ ।
ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ଘରର ତାଲା ଖୋଲି ଡିମ୍ପଲଙ୍କୁ ଘରକୁ ନେଇଛନ୍ତି ଶ୍ୱଶୁର ପ୍ରମୋଦ ସାହୁ । ଏହି ସମୟରେ ଶ୍ୱଶୁରଙ୍କ ପାଦ ଛୁଇଁ ପ୍ରଣାମ କରିଛନ୍ତି ବୋହୂ । ସେପଟେ ନଡିଆ ବାଡାଇ ଘର ଭିତରେ ପ୍ରବେଶ କରିଛନ୍ତି ତପସ୍ୱିନୀ ଦାସ ଓରଫ ଡିମ୍ପଲ । ଏବେ ବାରଣ୍ଡାରୁ ଘର ଭିତରକୁ ଉଠିଛି ଡିମ୍ପଲଙ୍କ ପୁଟୁଳି । ଡିମ୍ପଲଙ୍କ ମାଆ ଘର ଭିତରେ ଝିଅର ଘର ସଜାଡୁଛନ୍ତି । ଗୃହ ପ୍ରବେଶ ପରେ ଡିମ୍ପଲଙ୍କ ପରିବାରରେ ଖେଳି ଯାଇଛି ଖୁସିର ଲହରି । ଡିମ୍ପଲ ସତ୍ୟରେ ଥିଲେ ଏବଂ ଆଜି ଜୟ ହୋଇଛି ବୋଲି ତାଙ୍କ ଓକିଲ କହିଛନ୍ତି ।
ସୁମିତଙ୍କ ଓକିଲଙ୍କ କହିବା ଅନୁଯାୟୀ ଘରେ ରହିବା ନେଇ କୋର୍ଟ କୌଣସି ନିର୍ଦ୍ଦେଶ ଦେଇନାହାନ୍ତି । `କୋର୍ଟ କେବଳ ଡିମ୍ପଲଙ୍କୁ ମାସିକ 17ହଜାର ଟଙ୍କା ଦେବାକୁ କହିଛନ୍ତି’ । ଏଣୁ ଘରେ ଡିମ୍ପଲଙ୍କୁ ରଖିବାକୁ ସୁମିତଙ୍କ ପରିବାର ବାଧ୍ୟ ନୁହଁନ୍ତି ବୋଲି ସୁମିତଙ୍କ ଓକିଲ କହିଛନ୍ତି । ଏହାପରେ ଡିମ୍ପଲଙ୍କ ପାଇଁ ଦୁଆର ବନ୍ଦ କରିଦେଇଥିଲେ ଶାଶୂ ଘର ଲୋକ । ଘର ଭିତରକୁ ଯାଇନପାରି ବାରଣ୍ଡାରେ କାନ୍ଦୁଛନ୍ତି ଡିମ୍ପଲ୍ । ସମସ୍ତେ ତାଙ୍କୁ ଠକୁଥିବା ଡିମ୍ପଲ କାନ୍ଦିକାନ୍ଦି କହିଥିଲେ ତପସ୍ୱିନୀ ।
ଓମିକ୍ରନରୁ ପିଛା ଛଡ଼ାଇପାରେ ରୋଷେଇ ଘରର ଏହି ୫ଟି ଜିନିଷ
ଦେଶରେ କରୋନା ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବଢ଼ିଚାଲିଥିବା ବେଳେ ଏବେ ଲୋକଙ୍କ ମୁଣ୍ଡ ଘାରିଲାଣି କରୋନାର ନୂଆ ଭାରିଆଣ୍ଟ୍ ଓମିକ୍ରନ୍ । ସେ ଡାକ୍ତୀର ଚିକିତ୍ସା ହେଉ କିମ୍ବା ଘରୋଇ । ଏସବୁରୁ ପିଛା ଛଡ଼ାଇବା ପାଇଁ ଲୋକେ ଭିନ୍ନ ଭିନ୍ନ ଉପାୟ ଅବଲମ୍ବନ କରୁଛନ୍ତି । ଗତ ଲକଡାଉନରେ କରୋନା ମହାମାରୀ ଖୁବ୍ ଶୀଘ୍ର ନିଜ କାୟା ବିସ୍ତାର କରିବା ଭଳି ବର୍ତ୍ତମାନ ଦେଶରେ ଓମିକ୍ରନ୍ ହୁ ହୁ ହୋଇ ବଢ଼ିଚାଲିଛି । ଏବେଠୁ ସତର୍କ ଅବଲମ୍ୱନ ନ କଲେ ଆଗକୁ ପରିସ୍ଥିତି ବିଗିଡ଼ିପାରେ ବୋଲି ବିଶେଷଜ୍ଞ ମତ ଦେଇଛନ୍ତି । ତେବେ ଏସବୁରୁ ନିସ୍ତାର ପାଇଁ ଆପଣଙ୍କୁ ମାତ୍ର କେତୋଟି ଜିନିଷ ଉପରେ ଧ୍ୟାନ ଦେବାକୁ ପଡ଼ିବ । ଶରୀରରେ ରୋଗପ୍ରତିରୋଧକ ବଢ଼ାଇବା ହିଁ ଏସବୁ ରୋଗକୁ ପ୍ରଶ୍ରୟ ନଦେବାର ଏକମାତ୍ର ଉପାୟ । ଏଥିପାଇଁ ଲୋକେ ମହଙ୍ଗା ଏନର୍ଜି ଡ୍ରିଙ୍କ୍ ସହ ଅନେକ ଦାମି ଔଷଧ ମଧ୍ୟ ଖାଉଛନ୍ତି । ମାତ୍ର ଏସବୁ ବ୍ୟତୀତ ରୋଷେଇଘରେ ଥିବା ମାତ୍ର କେତୋଟି ଘରୋଇ ଜିନିଷରେ ଆପଣ ନିଜର ରୋଗପ୍ରତିରୋଧକ ବଢ଼ାଇପାରିବେ ।
ରୋଷେଇ ଘରେ ଥିବା ଏହି ୫ଟି ଜିନିଷ ବିଷୟରେ ଜାଣନ୍ତୁ :-
ହଳଦୀ : ଘରେ ଘରେ ହଳଦୀ ଉପଲବ୍ଧ ଥିବାବେଳେ କେବଳ ରୋଷେଇରେ ନୁହଁ ହଳଦୀର ଅନେକ ଔଷଧୀୟ ଗୁଣ ଥିବା ସମସ୍ତେ ଜାଣନ୍ତି । ବିଶେଷଜ୍ଞଙ୍କ ମତରେ ହଳଦୀରେ ଆଣ୍ଟି ଇନଫ୍ଲାମେଟୋରି ଗୁଣ ରହିଥିବାରୁ ଏହା ଶରୀରରେ ରୋଗ ପ୍ରତିରୋଧକ ଶକ୍ତି ବଢ଼ାଇବାରେ ସହାୟ ହୁଏ । ହଳଦୀକୁ ଗରମ ପାଣି, କ୍ଷୀର କିମ୍ବା ଚା’ ସହ ସେବନ କରିପାରିବେ ।
ଡାଲଚିନି : ଭାରତରେ ମସଲା ଜାତୀୟ ଖାଦ୍ୟ ଲୋକେ ଅଧିକ ପସନ୍ଦ କରିଥାନ୍ତି । ମସଲା ମଧ୍ୟରୁ ଡାଲଚିନିରେ ଅନେକ ଔଷଧୀୟ ଗୁଣ ରହିଛି । ରୋଗପ୍ରତିରୋଧକ ଶକ୍ତି ବଢ଼ାଇବାରେ ଡାଲଚିନି ପ୍ରମୁଖ ଭୂମିକା ଗ୍ରହଣ କରେ । କରୋନା ମହାମାରୀ ପାଇଁ କାଢ଼ାରେ ଡାଲଚିନିର ପ୍ରୟୋଗ ଶରୀରରେ ରୋଗପ୍ରତିରୋଧକ ଶକ୍ତି ବଢ଼ାଇବାରେ ମୁଖ୍ୟ ସହାୟ ହୋଇଥାଏ ବୋଲି ଆୟୁଷ ମନ୍ତ୍ରାଳୟ ଭାରତ ସରକାର ପରାମର୍ଶ ଦେଇଥିଲେ । ଚା’, କାଢ଼ା କିମ୍ୱା ଖାଇବାରେ ଡାଲଚିନି ମିଶାଇ ଖାଇପାରିବେ ।
ଅଦା : ଅଦାରେ ଆଣ୍ଟି ବାୟୋଟିକ୍ ଏବଂ ଆଣ୍ଟି ଇନଫ୍ଲାମେଟୋରି ଗୁଣ ରହିଥାଏ । ଶରୀରରେ ରୋଗପ୍ରତିରୋଧକ ଶକ୍ତି ବଢ଼ାଇବାରେ ଅଦା ଅନେକ ମାତ୍ରାରେ ସହାୟ ହୁଏ । ମାତ୍ର ଆବଶ୍ୟକଠୁ ଅଧିକ ସେବନ କଲେ ଏହା ଶରୀରର ପ୍ରତି ବିପଦ ସୃଷ୍ଟି କରିପାରେ । କ୍ଷୀରରେ ଫୁଟାଇ ଏହାର ସେବନ କଲେ ଅଧିକ ଫଳପ୍ରଦ ହୋଇଥାଏ ଏଥିସହ ଏହାକୁ ଶୁଖାଇ ଏହାର ଗୁଣ୍ଡର ସେବନ କରିପାରିବେ । ଗ୍ରୀନ ଟିରେ ଏହାକୁ ଫୁଟାଇ ପିଇ ପାରିବେ ।
ପିପଳି : ପିପଳିରେ ବହୁ ଔଷଧୀୟ ଗୁଣ ରହିଥିବା ବେଳେ ଖାଇବାରେ ସ୍ୱାଦ ବଢ଼ାଇବା ପାଇଁ ଏହାକୁ ଅନେକ ଲୋକ ବ୍ୟବହାର କରିଥାନ୍ତି । ପିପଳି ଗୁଣ୍ଡକୁ ମହୁ, ଲୁଣ କିମ୍ୱା ମସଲା ଚା’ ସହ ଖାଇପାରିବେ । ଏଥିସହ ଏହାର ରସକୁ ସାଲାଡରେ ମଧ୍ୟ ବ୍ୟବହାର କରିପାରିବେ । ହଜମ ଶକ୍ତି ଏବଂ ରୋଗପ୍ରତିରୋଧକ ଶକ୍ତି ବଢ଼ାଇବାରେ ଏହା ସହାୟ ହୁଏ ।
ଅଁଳା : ଅଁଳା ଗୁଣ୍ଡରେ ଭିଟାମିନ୍-c ଭରପୁର ପରିମାଣରେ ରହିଥାଏ ଏବଂ ରୋଗପ୍ରତିରୋଧକ ଶକ୍ତି ବଢ଼ାଇବାରେ ଏହା ଅନେକ ସହାୟ ହୁଏ । ଅଁଳା ଆଚାର ବନାଇବା ସହ ଏହାର ଗୁଣ୍ଡ ଖାଇବାରେ ମିଶାଇ ଖାଇପାରିବେ ।
ପ୍ରଧାନମନ୍ତ୍ରୀ ପୂରା ଦେଶର, ତେଣୁ ଦୋଷୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନିଅ: ସୋନିଆ ଗାନ୍ଧୀ
ନୂଆଦିଲ୍ଲୀ: ପଞ୍ଜାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷା ବ୍ୟବସ୍ଥାରେ ତ୍ରୁଟିକୁ ନେଇ ରାଜନୀତି ସରଗରମ ହୋଇଛି । ଗୋଟିଏ ପଟେ ସୁରକ୍ଷା ବ୍ୟବସ୍ଥାରେ ତ୍ରୁଟିକୁ ନେଇ ପଞ୍ଜାବ ସରକାରଙ୍କୁ ଟାର୍ଗେଟ କରୁଛି ବିଜେପି । ଅନ୍ୟପଟେ ସୁରକ୍ଷା ବ୍ୟବସ୍ଥାରେ କୌଣସି ତ୍ରୁଟି ହୋଇନଥିବା କହିଛନ୍ତି ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ୍ ସିଂ ଚନ୍ନି । ଏସବୁ ମଧ୍ୟରେ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନିଙ୍କ ସହ କଥା ହୋଇଛନ୍ତି କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀ । ମୋଦିଙ୍କ ସୁରକ୍ଷାରେ ଥିବା ତ୍ରୁଟି ଘଟଣାରେ କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀ ପଞ୍ଜାବ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି ।
ସୋନିଆ ଗାନ୍ଧୀ କହିଛନ୍ତି ଯେ, ପ୍ରଧାନମନ୍ତ୍ରୀ ପୂରା ଦେଶର ତେଣୁ ପ୍ରଧାନମନ୍ତ୍ରୀଙ୍କ ସୁରକ୍ଷା ମାମଲାର ପୂରା ଧ୍ୟାନ ରଖିବା ଆବଶ୍ୟକ । ଯିଏ ବି ଏହି ଘଟଣାରେ ଦୋଷୀ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବା ଆବଶ୍ୟକ । ପ୍ରଧାନମନ୍ତ୍ରୀଙ୍କ ସୁରକ୍ଷା ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯିବା ଆବଶ୍ୟକ । କାରଣ ପ୍ରଧାନମନ୍ତ୍ରୀ ହେଉଛନ୍ତି ପୂରା ଦେଶର ତେଣୁ ତାଙ୍କର ସୁରକ୍ଷା ବ୍ୟବସ୍ଥା କଡାକଡି ହେବା ଉଚିତ ବୋଲି କହିଛନ୍ତି ସୋନିଆ ଗାନ୍ଧୀ । ସୋନିଆ ଗାନ୍ଧୀଙ୍କୁ ପଞ୍ଜାବ ମୁଖ୍ୟମନ୍ତ୍ରୀ ଚନ୍ନି ପୂରା ଘଟଣାକ୍ରମ ବାବଦରେ ସୂଚନା ଦେବା ସହ ଏହାର ଯାଞ୍ଚ ପାଇଁ ଉଚ୍ଚସ୍ତରୀୟ କମିଟି ଗଠନ କରାଯାଇଥିବା ସେ କହିଛନ୍ତି ।
ତେବେ ଏହି ଘଟଣାରେ ପଞ୍ଜାବ ମୁଖ୍ୟମନ୍ତ୍ରୀ ଚନ୍ନି ପୂର୍ବରୁ କହିଥିଲେ କି, ଏହା ଏକ ଛୋଟ ଘଟଣା କିନ୍ତୁ ଜାଣିଶୁଣି ଏହାକୁ ବଡ କରାଯାଉଛି ଏବଂ ବିବାଦ ଭିତରକୁ ଟଣାଯାଉଛି ବୋଲି ଚନ୍ନି କହିଥିଲେ । ପ୍ରଧାନମନ୍ତ୍ରୀଙ୍କ ସୁରକ୍ଷାରେ କୌଣସି ବିପଦ ନଥିଲା । ପ୍ରକୃତରେ ବିଜେପିର ଏହି ସଭାରେ ଅଧିକ ଲୋକ ନଥିଲେ । ତେଣୁ ସେହି ଘଟଣାରୁ ଧ୍ୟାନ ହଟାଇବା ପାଇଁ ଏହି ଘଟଣାକୁ ଅଧିକ ବିବାଦୀୟ କରାଯାଉଛି ବୋଲି କହିଛନ୍ତି ପଞ୍ଜାବ ମୁଖ୍ୟମନ୍ତ୍ରୀ ଚନ୍ନି ।
ନିର୍ଦ୍ଧାରିତ ସମୟରେ ହେବ ୟୁପିଏସସି ମେନ୍ସ ପରୀକ୍ଷା
ନୂଆଦିଲ୍ଲୀ: ଘୁଞ୍ଚିବନି ୟୁପିଏସସି ମେନ୍ସ ପରୀକ୍ଷା । ନିର୍ଦ୍ଧାରିତ ସମୟରେ ପରୀକ୍ଷା ଅନୁଷ୍ଠିତ ହେବ ବୋଲି ଆଜି ଦିଲ୍ଲୀ ହାଇକୋର୍ଟ କହିଛନ୍ତି । ୟୁପିଏସସି ମେନ୍ସ ପରୀକ୍ଷା ଜାନୁଆରୀ ୭ରୁ ୧୬ ପର୍ଯ୍ୟନ୍ତ ଅନୁଷ୍ଠିତ ହେବ । କରୋନା ଆକ୍ରାନ୍ତଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇବା ପରେ ଏହି ପରୀକ୍ଷା ସ୍ଥଗିତ ରଖିବାକୁ ଦାବି କରାଯାଉଥିଲା । ତେବେ ଏହି ମାମଲାରେ ଦିଲ୍ଳୀ ହାଇକୋର୍ଟ ଶୁଣାଣି କରି କହିଛନ୍ତି କି ୟୁପିଏସସି ମେନ୍ସ ପରୀକ୍ଷା ନିର୍ଦ୍ଧାରିତ ସମୟରେ ଅନୁଷ୍ଠିତ ହେବ । ଦିଲ୍ଲୀ ହାଇକୋର୍ଟ ନିର୍ଣ୍ଣୟ ନେଇଛି କି ସେ ଏହି ମାମଲାରେ ହସ୍ତକ୍ଷେପ କରିବେ ନାହିଁ ।
ୟୁପିଏସସି ପକ୍ଷରୁ ଥିବା ଓକିଲ କୌଶିକ ପରୀକ୍ଷା ସ୍ଥଗିତ ରଖିବା ଆବେଦନକୁ ବିରୋଧ କରିଥିଲେ। ସେ କହିଥିଲେ, “ଦ୍ୱିତୀୟ ଲହର ସମୟରେ ମଧ୍ୟ ସୁପ୍ରିମକୋର୍ଟ ଏଭଳି ଏକ ଆବେଦନକୁ ଖାରଜ କରିଥିଲେ। ୩ବର୍ଷ ହେଲାଣି ମହାମାରୀ ସହ ଆମେ ଲଢ଼ୁଥିବା ବେଳେ ଏଭଳି ପ୍ରତି ଥର ପରୀକ୍ଷା ସ୍ଥଗିତ ରଖିବା ଉଚିତ ନୁହେଁ। ଆମକୁ ସତର୍କ ରହି ପୂର୍ବ ଭଳି କାମ କରିବାକୁ ହେବ ବୋଲି କହିଥିଲେ କୌଶିକ । ସେ ଆହୁରି କହିଥିଲା କି ଏହି ପରୀକ୍ଷା ଅକ୍ଟୋବର/ନଭେମ୍ବର ହେବାର ଥିଲା । କିନ୍ତୁ ଆମେ ଏହି ପରୀକ୍ଷାକୁ ଜାନୁଆରୀ କରିବାକୁ ନିଷ୍ପତ୍ତି ନେଇଛୁ । ଯଦି ଏଥିରେ ଆଉ କିଛି ଦିନ ବିଳମ୍ବ ହୁଏ ତେବେ UPSC ସମ୍ବିଧାନ ଦ୍ୱାରା ଦିଆଯାଇଥିବା କାର୍ଯ୍ୟଗୁଡିକର ପରିଚାଳନା କରିବାକୁ ସକ୍ଷମ ହେବ ନାହିଁ ବୋଲି ସେ କହିଥିଲେ ।
ଓପିଟିସିଏଲରେ ରାଜ୍ୟ ସରକାରଙ୍କ ମେଗା ନିଯୁକ୍ତି
ଭୁବନେଶ୍ୱର: ଓପିଟିସିଏଲରେ ରାଜ୍ୟ ସରକାରଙ୍କ ମେଗା ନିଯୁକ୍ତି । ୬୦ ଜଣ ମ୍ୟାନେଜମେଣ୍ଟ ଟ୍ରେନି ଏବଂ ୧୭୫ ଜଣ ଜୁନିୟର ଟେକନିସିଆନଙ୍କୁ ନିଯୁକ୍ତି ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଜ୍ୟରେ ଶକ୍ତି କ୍ଷେତ୍ରରେ ବ୍ୟାପକ ପରିବର୍ତ୍ତନ ହେବାକୁ ଯାଉଛି । ଶକ୍ତି କ୍ଷେତ୍ରର ବିକାଶ ପାଇଁ ରାଜ୍ୟ ସରକାର ପ୍ରୟାସ ଜାରି ରଖିଛନ୍ତି । ଲୋକଙ୍କୁ ଯେପରି ୨୪ ଘଣ୍ଟା ବିଦ୍ୟୁତ ସେବା ମିଳିବ ସେଥିପାଇଁ ବ୍ୟବସ୍ଥା କରାଯାଉଛି ।
ଏହି ଅବସରରେ ନବନିଯୁକ୍ତ କର୍ମଚାରୀଙ୍କୁ କାର୍ଯ୍ୟଶୈଳୀ ନେଇ ଅନେକ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ । ଶକ୍ତି କ୍ଷେତ୍ରରେ ରାଜ୍ୟ ସରକାରଙ୍କ ସୁଚିନ୍ତିତ ଯୋଜନା ଯୋଗୁ ଆଜି ଓଡ଼ିଶା ବିଦ୍ୟୁତ ବଳକା ରାଜ୍ୟ ପାଲଟିଛି । ରାଜ୍ୟରେ ୯୯ଟି ୩୩ କେଭି ସବଷ୍ଟେସନ ନିର୍ମାଣ ପାଇଁ ନିକଟରେ ୧୮୦୦ କୋଟି ଟଙ୍କାର ପ୍ରକଳ୍ପକୁ ମଞ୍ଜୁରୀ ଦିଆଯାଇଛି । ୨୦୧୦ ପରଠାରୁ ଓପିଟିସିଏଲରେ ୨ ହଜାରରୁ ଅଧିକ ଯୁବକ ଯୁବତୀଙ୍କୁ ରୋଜଗାର ମିଳିଛି ।