ଭୁବନେଶ୍ୱର: ଓଡ଼ିଶା ପୋଲିସର ଡିଏସପି ସ୍ତରରେ ବଡ଼ ଧରଣର ଅଦଳବଦଳ । ୧୧୩ଜଣ ପୋଲିସ ଅଧିକାରୀଙ୍କ ବଦଳି କରାଯାଇଛି ।
ଡିଏସପିରୁ ଏସଡିପିଓ ଭାବେ ୨୧ଜଣଙ୍କୁ ବଦଳି । ୮ଜଣ DSPଙ୍କୁ ପଦୋନ୍ନତି, SDPOରୁ ହୋଇଛନ୍ତି ଡେପୁଟି ଏସପି । ସେହିପରି ଜଣେ ଅଧିକାରୀଙ୍କ ନିଲମ୍ବନ ଆଦେଶ ପ୍ରତ୍ୟାହୃତ ହୋଇଛି ।
୨୧ଜଣଙ୍କୁ SDPO ଭାବେ ବଦଳି, ୮ଜଣ DSPଙ୍କୁ ପଦୋନ୍ନତି
ଶ୍ରୀଲଙ୍କାକୁ ୮ ୱିକେଟ୍ରେ ହରାଇଲା ଆଫଗାନିସ୍ତାନ
ଦୁବାଇ: ଏସିଆ କପ୍ କ୍ରିକେଟ୍ ପ୍ରଥମ ମ୍ୟାଚରେ ଆଫଗାନିସ୍ତାନର ଦମଦାର ପ୍ରଦର୍ଶନ । ଉଭୟ ବୋଲିଂ ଓ ବ୍ୟାଟିଂ ଦିଗରେ ଆଫଗାନିସ୍ତାନ ପ୍ରଶଂସନୀୟ ପ୍ରଦର୍ଶନ କରିଛି । ଶ୍ରୀଲଙ୍କାକୁ ୮ ୱିକେଟ୍ରେ ପରାସ୍ତ କରିଛି ଦଳ । ଦୁବାଇ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମ୍ରେ ଟସ୍ ଜିଣି ଆଫଗାନିସ୍ତାନ ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା । ଶ୍ରୀଲଙ୍କାକୁ ୧୦୫ ରନ୍ରେ ଅଲଆଉଟ କରଥିଲା ଆଫଗାନିସ୍ତାନ ।
ଶ୍ରୀଲଙ୍କା ଟିମ୍ ନିର୍ଦ୍ଧାରିତ ୧୯.୪ ଓଭରରେ ସମସ୍ତ ୱିକେଟ ହରାଇଥିଲା । ଆଫଗାନିସ୍ତାନକୁ ୧୦୬ ରନ୍ର ବିଜୟ ଲକ୍ଷ୍ୟ ମିଳିଥିଲା । ଆଫଗାନିସ୍ତାନ ୧୦ ଓଭର ଗୋଟିଏ ବଲରେ ୨ଟି ୱିକେଟ ହରାଇ ୧୦୬ ରନ୍ କରିଛି । ଆରମ୍ଭରୁ ହଜରତୁଲ୍ଲା ଯଯାଇ ଓ ରହମନତୁଲ୍ଲା ଗୁରବାଜ୍ ପ୍ରଥମ ୱିକେଟ ପାଇଁ ୮୩ ରନ୍ ଯୋଡ଼ି ଦଳର ସ୍କୋରକୁ ମଜବୁତ କରିଥିଲେ । ଗୁରବାଜ ୧୮ଟି ବଲ୍ ଖେଳି ୪୦ ରନ୍ କରିଥିଲେ । ଏଥିରେ ୩ଟି ଚୌକା ଓ ୪ଟି ଛକା ସାମିଲ ରହିଛି ।
କିଲିମଞ୍ଜାରୋ ଶିଖରରେ ଉଡିଲା ତ୍ରିରଙ୍ଗା, ପ୍ରଦର୍ଶିତ ହେଲା ରାଷ୍ଟ୍ରପତିଙ୍କ ଫଟୋ
ନନ୍ଦିଘୋଷ ବ୍ୟୁରୋ: ଆଫ୍ରିକା ମହାଦେଶର ସର୍ବୋଚ୍ଚ ପର୍ବତ କିଲିମଞ୍ଜାରୋ ଶିଖରରେ ଉଡିଲା ତ୍ରିରଙ୍ଗା । ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପୂର୍ବତନ ରାଷ୍ଟ୍ରପତି ସ୍ୱର୍ଗତ ଅବଦୁଲ୍ଲ କଲାମଙ୍କ ଫଟୋ ମଧ୍ୟ ସର୍ବୋଚ୍ଚ ଶିଖରରେ ପ୍ରଦର୍ଶିତ କରିଛନ୍ତି ଓଡ଼ିଆ ପର୍ବାତରୋହୀ ନିଳାଚଳ ପରିଡ଼ା । ଯୁବ ପର୍ବତାରୋହୀ ନୀଳାଚଳ ପରିଡ଼ା କିଲିମଞ୍ଜାରୋରେ ପହଁଚି ଓଡ଼ିଶା ପାଇଁ ଆଣିଛନ୍ତି ଗୌରବ । ନିଳାଚଳଙ୍କ ନେତୃତରେ ୫ ଜଣ ପର୍ବତ ଆରୋହି କିଲିମଞ୍ଜାରୋ ଯାଇଛନ୍ତି । ୧୯ ହଜାର ୩୪୧ ଉଚ୍ଚତାରେ ୫୭୫ ଫୁଟର ଜାତୀୟ ପତାକା ଉଡ଼ାଇଛନ୍ତି ନିଳାଚଳ ଓ ତାଙ୍କ ଟିମ୍ ।
ଗୋ ଇଣ୍ଡିଆ ଆଡଭେଞ୍ଚର ଫାଉଣ୍ଡେସନ ପକ୍ଷରୁ ଓଡିଶାର ବରପୁତ୍ର ବିଜୁ ପଟ୍ଟନାୟକଙ୍କ ସମେତ କରୋନା ମହାମାରୀ ସମୟରେ ମୃତ୍ୟୁ ବରଣ କରିଥିବା ଭାରତୀୟ ସେନାର ଯବାନ, ଡାକ୍ତର, ନର୍ସ, ପୋଲିସ ଓ ସାମ୍ବାଦିକମାନଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା ।
କିଲିମଞ୍ଜାରୋରେ ପହଁଚିବା ସହ ପ୍ରଥମ ଥର ପାଇଁ ବିଶ୍ୱ ରେକର୍ଡ କରିଛନ୍ତି ନିଳାଚଳ ପରିଡ଼ା । ତାଙ୍କ ସହ ଚିନ୍ମୟ ସିଂହ, ଆଦିତ୍ୟ ଖାଡେଙ୍ଗା, ମିନତୀ ପୂର୍ତ୍ତି ଓ ଶ୍ରୀକାନ୍ତ ଖୁଣ୍ଟିଆ ମଧ୍ୟ ଗସ୍ତ କରିଥିଲେ । ଅଗଷ୍ଟ ୨୧ ତାରିଖରେ ସଫଳତାର ସହ ପହଁଚିଥିଲେ ନିଳାଚଳ । ସେଠାରେ ୫୭୫ ଫୁଟ ଲମ୍ବର ଜାତୀୟ ପତାକା ଉଡାଇଥିଲେ । ଏଥିସହ ଗଣମାଧ୍ୟମ ନନ୍ଦିଘୋଷ ଟିଭିର ଲୋଗୋକୁ ମଧ୍ୟ ସର୍ବୋଚ୍ଚ ଗିରିଶୃଙ୍ଗରେ ପ୍ରଦର୍ଶିତ କରିଥିଲେ ନିଳାଚଳ ।
ପରଲୋକରେ ଓଡ଼ିଆ ଫିଲ୍ମ ପ୍ରଯୋଜକ ରାଧାନାଥ ଭଟ୍ଟ
ଭୁବନେଶ୍ୱର: ପରଲୋକରେ ଓଡ଼ିଆ ଫିଲ୍ମ ପ୍ରଯୋଜକ ରାଧାନାଥ ଭଟ୍ଟ । ବଳିଦାନ, ସ୍ବପ୍ନ ସାଗର, ଡୋରା ପରି ପ୍ରସିଦ୍ଧ ଚଳଚିତ୍ରର ପ୍ରଯୋଜକ ଥିଲେ ରାଧାନାଥ । ସେ ମାସେରୁ ଅଧିକ ସମୟ ଧରି ଅସୁସ୍ଥ ଥିଲେ । ରକ୍ତହୀନତା ରୋଗରେ ପୀଡିତ ହୋଇ କଟକର ଏକ ଘରୋଇ ହସ୍ପିଟାଲରେ ଚିକତ୍ସିତ ହେଉଥିଲେ ।
ମିଳିଥିବା ସୂଚନା ମୁତାବକ ଆଜି ପ୍ରାୟ ଦିନ ଦୁଇଟା ବେଳେ ଶେଷ ନିଶ୍ବାସ ତ୍ୟାଗ କରିଛନ୍ତି । ରାଧାନାଥ ଭଟ୍ଟଙ୍କ ପରଲୋକରେ ଓଡ଼ିଆ ଚଳଚ୍ଚିତ୍ର ଜଗତରେ ଶୋକର ଛାୟା ଖେଳିଯାଇଛି । ବହୁ ବିଶିଷ୍ଟ ବ୍ୟକ୍ତି ଶୋକ ବ୍ୟକ୍ତ କରିଛନ୍ତି ।
SIଙ୍କ ଆତ୍ମହତ୍ୟା ଘଟଣା, IICଙ୍କ ନାମରେ ସଙ୍ଗୀନ ଅଭିଯୋଗ
ଟାଙ୍ଗୀ: ମହିଳା ଏସଆଇଙ୍କ ଆତ୍ମହତ୍ୟା ଘଟଣାରେ ଚାଞ୍ଚଲ୍ୟକର ପ୍ରତିକ୍ରିୟା ଦେଲେ ଏସଆଇଙ୍କ ଭାଇ । ଥାନା ଆଇଆଇସି ଦେଉଥିଲେ ମାନସିକ ନିର୍ଯାତନା । କଥା କଥାକେ ଗାଳିଗୁଲଜ କରୁଥିଲେ । ପ୍ରତିଦିନ ଏସଂପର୍କରେ ସ୍ବାଗତିକା କାନ୍ଦି କାନ୍ଦି ଘରକୁ ଫୋନ କରୁଥିଲେ ବୋଲି ତାଙ୍କ ଭାଇ କହିଛନ୍ତି ।
ଗତକାଲି ରାତିରେ ମଧ୍ୟ ଅନ୍ୟ କର୍ମଚାରୀଙ୍କ ସ୍ମୁଖରେ ଗାଳିଗୁଲଜ କରିବା ସହ ଥାନାରୁ ବାହାରିଯିବାକୁ କହିଥିଲେ ଆଇଆଇସି । ମୃତ ସ୍ବାଗତିକାଙ୍କ ଏହା ଥିଲା ପ୍ରଥମ ପୋଷ୍ଟିଂ । ପୋଲିସ ଟ୍ରେନିଂ ସାରି ଜି ଉଦୟଗିରୀ ଥାନାରେ କିଛି ମାସ ତଳେ କାର୍ଯ୍ୟରେ ଯୋଗଦେଇଥିଲେ । ଥାନାରୁ ନ୍ୟାୟ ମିଳିବ ନାହିଁ । କ୍ରାଇମବ୍ରାଞ୍ଚ ତଦନ୍ତରେ ସତ୍ୟ ପଦାକୁ ଆସିବ ବୋଲି କହିଛନ୍ତି ମୃତ ଏସଆଇଙ୍କ ଭାଇ ମୋନରଞ୍ଜନ ।
୩ ବରିଷ୍ଠ ଆଇଏଏସଙ୍କୁ ମିଳିଲା ଅତିରିକ୍ତ ଦାୟିତ୍ୱ
ଭୁବନେଶ୍ୱର: ୩ ବରିଷ୍ଠ ଆଇଏଏସଙ୍କୁ ମିଳିଲା ଅତିରିକ୍ତ ଦାୟିତ୍ୱ । ଦେଓରଂଜନ କୁମାର ସିଂଙ୍କୁ ଅବକାରୀ ବିଭାଗରେ ଅତିରିକ୍ତ ଦାୟିତ୍ୱ ମିଳିଛି । ଅବକାରୀ ବିଭାଗର ପ୍ରମୁଖ ସଚିବ ଭାବେ ଅତିରିକ୍ତ ଦାୟିତ୍ୱ ସମ୍ଭାଳିବେ ଦେଓରଞ୍ଜନ ।
ସେହିପରି ସୁଶୀଲ କୁମାର ଲୋହାନୀଙ୍କୁ ପଞ୍ଚାୟତିରାଜ ବିଭାଗରେ ଅତିରିକ୍ତ ଦାୟିତ୍ୱ ପ୍ରଦାନ କରାଯାଇଛି । ସଂଜୟ କୁମାର ସିଂଙ୍କୁ ବାଣିଜ୍ୟ କର କମିଶନର ଭାବେ ଅତିରିକ୍ତ ଦାୟିତ୍ୱ ପ୍ରଦାନ କରାଯାଇଛି । ଏନେଇ ସାଧାରଣ ପ୍ରଶାସନ ବିଭାଗ ପକ୍ଷରୁ ନିର୍ଦ୍ଦେଶନାମା ପ୍ରକାଶ ପାଇଛି ।
ନେହେରୁ ବଙ୍ଗଳାରେ ଆଶାକର୍ମୀଙ୍କୁ ଦୁଷ୍କର୍ମ !
ପାରାଦୀପ: ପାରାଦୀପରେ ଆଶାକର୍ମୀଙ୍କୁ ଦୁଷ୍କର୍ମ ଅଭିଯୋଗ । ପାରାଦୀପ ଆଦର୍ଶ ଥାନାରେ ଏନେଇ ପୀଡ଼ିତା ଏତଲା ଦେଇଛନ୍ତି । ପୋଲିସ ପକ୍ଷରୁ ଘଟଣାସ୍ଥଳରେ ଡଗ୍ ସ୍କ୍ୱାଡ୍ ସହାୟତାରେ ତଦନ୍ତ ଆରମ୍ଭ ହୋଇଛି । ଏଭଳି ସଙ୍ଗୀନ ଅଭିଯୋଗକୁ ଗୁରୁତର ସହ ନେଇଛି ପୋଲିସ ।
ମିଳିଥିବା ସୂଚନା ମୁତାବକ ମୁଖ୍ୟ ଅଭିଯୁକ୍ତକୁ ଥାନାରେ ଅଟକ ରଖିଛି ପୋଲିସ । ଗତକାଲି ସନ୍ଧ୍ୟାରେ ଏକ ନାଲିରଙ୍ଗର କାରରେ ଆଶାକର୍ମୀଙ୍କୁ ଅପହରଣ କରି ନେହେରୁ ବଙ୍ଗଳା ଅଞ୍ଚଳରେ ଦୁଷ୍କର୍ମ କରିଥିବା ପୀଡ଼ିତା ଅଭିଯୋଗ କରିଛନ୍ତି । କାରରେ ୪ ଜଣ ଯୁବକ ଥିଲେ । ଜଣେ ଯୁବକକୁ ପୋଲିସ ଥାନାରେ ଅଟକ ରଖିଛି।
ଫ୍ଲିପକାର୍ଟକୁ ଜରିମାନା କଲେ କଟକ ଜିଲ୍ଲା ଖାଉଟି ଅଦାଲତ
କଟକ: ଗ୍ରାହକଙ୍କୁ ଠକିବା ଅଭିଯୋଗରେ ଫ୍ଲିପକାର୍ଟକୁ ଜରିମାନା କଲେ କଟକ ଜିଲ୍ଲା ଖାଉଟି ଅଦାଲତ । କଟକ ସିଡିଏର ସୀମାଞ୍ଚଳ ରଥ ୨୦୧୯ ନଭେମ୍ବର ୧୫ ତାରିଖରେ 7 ହଜାର 999 ଟଙ୍କାରେ ଏକ LED ଟିଭି କିଣିଥିଲେ । ଟିଭିଟି ଦୁଇମାସ ଚାଲିବା ପରେ ଖରାପ ହୋଇଯାଇଥିଲା ପରେ ମାମଲା କୋର୍ଟରେ ପହଁଚିଥିଲା ।
ଦୁଇ ବର୍ଷରୁ ଅଧିକ ସମୟ ମାମଲା କୋର୍ଟରେ ଚାଲିବା ପରେ ଗ୍ରାହକ ସୀମାଞ୍ଚଳ ରଥଙ୍କୁ ବାର୍ଷିକ 9 ପ୍ରତିଶତ ସୁଧରେ ମୋଟ 45 ହଜାର 159 ଟଙ୍କା ଦେବାପାଇଁ ଫ୍ଲିପକାର୍ଟକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଏଭଳି ଏକ ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି । କାରଣ ଏକ ବଡ଼ କମ୍ପାନୀକୁ ଜରିମାନା ଶୁଣାଇଛନ୍ତି କଟକ ଜିଲ୍ଲା ଖାଉଟି ଅଦାଲତ ।
ରବିବାର ଧ୍ବଂସ ହେବ ନଏଡା ସୁପରଟେକ ଟାଓ୍ବାର
ନୂଆଦିଲ୍ଲୀ: ଧ୍ବଂସ ହେବ ନଏଡା ସୁପରଟେକ ଟାଓ୍ବାର । ଅପରାହ୍ଣ ସାଢେ ୨ଟାରେ ହେବ ବିସ୍ଫୋରଣ । କେଇକ୍ଷଣିରେ ମାଟିରେ ମିଶିବ ୪୦ ମହଲା ବିଶିଷ୍ଟ ଟାଓ୍ବାର । ପ୍ରାୟ ୧୦ ବର୍ଷର ବିବାଦ ପରେ ମାତ୍ର ୧୦ ସେକେଣ୍ଡରେ ଧୂଳିସାତ ହେବ ଟାଓ୍ବାର । ଏଥିଲାଗି ସମସ୍ତ ପ୍ରସ୍ତୁତି ଶେଷ ହୋଇଛି । ଗତବର୍ଷ ଅଗଷ୍ଟରେ ସୁପରଟେକର ଟୁଇନ ଟାଓ୍ବାରକୁ ଧ୍ବଂସ କରିଦେବା ଲାଗି ନିର୍ଦ୍ଦେଶ ଦେଇଥିଲେ ସୁପ୍ରିମ କୋର୍ଟ । ଏହି ୧୦୦ ମିଟର ଟାଓ୍ବାରର ଧ୍ବଂସ ଲାଗି ବଟନ ଦବାଇବେ ବ୍ଲାଷ୍ଟର ୪୯ ବର୍ଷ ବୟସ୍କ ଚେତନ ଦତ୍ତ । ହରିଆଣା ହିସାରର ଚେତନ କହିଛନ୍ତି ତାଙ୍କର ଦୀର୍ଘ ଦିନର ସ୍ବପ୍ନ ପୂରଣ ହେବ ।
ଧ୍ବଂସ କାର୍ଯ୍ୟ ସମ୍ପନ୍ନ କରିବାକୁ ଯାଉଥିବା ଏଡିଫାଇସ ଇଞ୍ଜିନିୟରିଂର ଅନୁରୋଧ କ୍ରମେ ଚେତନ ଏହି ବଟନ ଦବାଇବେ । ଗତ ୧୦ ଦିନ ଧରି ଚେତନ ଓ ତାଙ୍କ ଟିମ୍ ଟୁଇନ ଟାଓ୍ବାରର ବିଭିନ୍ନ ସ୍ଥାନରେ ବିସ୍ଫୋରକ ରଖିଆସୁଛନ୍ତି । ଦିଲ୍ଲୀର ଐତିହ୍ୟ କୁତବ ମିନାର ସହ ଉଚ୍ଚତାରେ ସମାନ ଥିବା ସୁପରଟେକ ଟାଓ୍ବାର ନଏଡାର ୯୩-ଏ ସେକ୍ଟରରେ ନିର୍ମିତ ହୋଇଥିଲା । ବିସ୍ଫୋରଣ ଲାଗି ବ୍ୟବହୃତ ହେବ ପ୍ରାୟ ୩ ହଜାର ୭୦୦ କେଜି ବିସ୍ଫୋରକ । ରବିବାର ଦିନ ସ୍ଥାନାନ୍ତରିତ ହେବେ ୫ ହଜାର ବାସିନ୍ଦା ।
ଧ୍ବଂସ ବେଳେ କୋଠାରୁ କୌଣସି ଖଣ୍ଡ ପଦାକୁ ଫିଙ୍ଗି ହେବ ନାହିଁ । କେବଳ କିଛି ଧୂଳି ଉଡିବ ବୋଲି କୁହାଯାଇଛି । ଟାଓ୍ବାର ନିକଟରେ ଥିବା ଏମାରଲଡ କୋର୍ଟ, ଏଟିଏସ ଭିଲେଜ ବାସିନ୍ଦାଙ୍କୁ ସ୍ଥାନାନ୍ତର କରାଯିବ । ପ୍ରାୟ ୨ ହଜାର ୭୦୦ ଯାନ, ପ୍ରାୟ ୨୦୦ ଗୃହପାଳିତ ପ୍ରାଣୀଙ୍କୁ ବି ଅନ୍ୟସ୍ଥାନକୁ ନିଆଯିବ । ୫୦୦ ମିଟର ଯାଏ ଏକ୍ସକ୍ଲୁସନ ଜୋନ ପ୍ରତିଷ୍ଠା ହେବ । ବିସ୍ଫୋରଣ ପରେ ପ୍ରାୟ ୮୦ ହଜାର ଟନ୍ ଧ୍ବଂସାବଶେଷ ସୃଷ୍ଟି ହେବ । ସେପଟେ ସେହି ଅଞ୍ଚଳରେ ସତର୍କ ସୂଚନା ମଧ୍ୟ ଜାରି କରାଯାଇଛି ।
ସଙ୍କଟରେ ସୋରେନ ସରକାର, ରାଜ୍ୟପାଳଙ୍କ ନିଷ୍ପତ୍ତିକୁ ଅପେକ୍ଷା
ରାଞ୍ଚି: ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଭାଗ୍ୟ ସୂତାଖିଅରେ ଝୁଲୁଥିବାବେଳେ ରାଜ୍ୟପାଳଙ୍କ ନିଷ୍ପତ୍ତିକୁ ଅପେକ୍ଷା । ଆଜି ସୋରେନଙ୍କ ବାସଭବନରେ ଅନୁଷ୍ଠିତ ହୋଇଛି ବୈଠକ । ଉଭୟ ଜେଏମଏମ ଓ କଂଗ୍ରେସର ବିଧାୟକମାନେ ଛତିଶଗଡ଼ ଚାଲିଯିବା ନେଇ ସୂଚନା ମିଳିଛି । ଏପରିକି ପ୍ରାୟ ସମସ୍ତ ବିଧାୟକ ନିଜ ନିଜର ଜିନିଷପତ୍ର ସୁଟକେଶ୍ ଆଣିଥିବା ଦେଖାଯାଇଛି ।
ସରକାରରେ ସଙ୍କଟ କାଳରେ ବିଧାୟକମାନେ ଦଳୀୟ ଶୃଙ୍ଖଳା ଭଙ୍ଗ କରିବା ଆଶଙ୍କା ଥିବାରୁ ସେମାନଙ୍କୁ ଛତିଶଗଡ଼ ନିଆଯିବ । ୮୧ ଆସନ ବିଶିଷ୍ଟ ବିଧାନସଭାରେ ମହାଗଠବନ୍ଧନ ସରକାରରେ ଜେଏମଏମର ୩୦, କଂଗ୍ରେସ ୧୯, ଆରଜେଡିର ଜଣେ, ଏନସିପିର ଜଣେ, ସିପିଆଇଏମଏଲର ଜଣେ ବିଧାୟକ ଅଛନ୍ତି । ସେହିପରି ଏନଡିଏରେ ବିଜେପିର ୨୬, ଅଜସୁର ୨ ବିଧାୟକ ଅଛନ୍ତି ।
ଗତକାଲି ସୋରେନଙ୍କ ବାସଭବନରେ ଆୟୋଜିତ ବୈଠକରେ ଉଭୟ ଜେଏମଏମ ଓ କଂଗ୍ରେସ ବିଧାୟକମାନେ ଯୋଗଦେଇ ସ୍ଥିତି ସମୀକ୍ଷା କରିଥିଲେ । ତେଣେ ଯଦି ହେମନ୍ତ ଇସ୍ତଫା ଦିଅନ୍ତି ତେବେ ପତ୍ନୀ କଳ୍ପନା ହୋଇପାରନ୍ତି ପରବର୍ତ୍ତୀ ମୁଖ୍ୟମନ୍ତ୍ରୀ । ଏନେଇ ଚାଲିଛି କଳ୍ପନାଜଳ୍ପନା । ମୟୂରଭଞ୍ଜରେ ଜନ୍ମିତ କଳ୍ପନା ୨୦୦୬ ଫେବ୍ରୁଆରୀ ୭ରେ ହେମନ୍ତଙ୍କୁ ବିବାହ କରିଥିଲେ । ଯଦି ସେ ମୁଖ୍ୟମନ୍ତ୍ରୀ ହୁଅନ୍ତି ତେବେ ନାଳା, ଜାରମୁଣ୍ଡି କିମ୍ବା ଦୁମ୍ରିରୁ ପ୍ରାର୍ଥୀ ହୋଇ ନିର୍ବାଚନ ଲଢିବା ନେଇ ଚର୍ଚ୍ଚା ଚାଲିଛି ।