ଭୁବନେଶ୍ୱର: ଘୂର୍ଣ୍ଣିବଳୟ ପ୍ରଭାବରେ ଓଡ଼ିଶାର ବିଭିନ୍ନ ସ୍ଥାନରେ ବର୍ଷା ଲାଗିରହିଛି । ୨୪ ଘଣ୍ଟା ମଧ୍ୟରେ ଓଡିଶାର କିଛି ସ୍ଥାନରେ କମିବ ବର୍ଷାର ପରିମାଣ । ବିଶେଷ କରି ଉତ୍ତର ଓ ଆଭ୍ୟନ୍ତରୀଣ ଓଡିଶା ରେ ସ୍ୱଳ୍ପ ବର୍ଷା ହେବାର ସମ୍ଭାବନା ରହିଛି । ମୟୁରଭଞ୍ଜ, କେନ୍ଦୁଝର, ବୌଦ୍ଧ, କନ୍ଧମାଳ, ରାୟଗଡ଼ା ଓ କୋରପୁଟରେ ସ୍ୱଳ୍ପ ବର୍ଷା ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।

ସେପଟେ ଆସନ୍ତାକାଲିଠୁ କୁହୁଡ଼ି ଚାଦରରେ ଢାଙ୍କି ହୋଇ ରହିବ ଉତ୍ତର ଓ ଉପକୂଳ ଓଡିଶାର କିଛି ସ୍ଥାନ । ବାଲେଶ୍ୱର, ଭଦ୍ରକ, ଜଗତସିଂହପୁର, କେନ୍ଦ୍ରାପଡ଼ା, ଅନୁଗୁଳ, ଢେଙ୍କାନାଳ, ସୁନ୍ଦରଗଡ଼, ଝାରସୁଗୁଡ଼ା, କଳାହାଣ୍ଡି ଓ କନ୍ଧମାଳରେ ଘନ କୁହୁଡ଼ି ହେବାର ସମ୍ଭାବନା ରହିଛି । କଟକର କଣ୍ଟାପଡ଼ାରେ ସର୍ବାଧିକ ୧୦୨ ମିଲିମିଟର ବର୍ଷା ରେକର୍ଡ କରାଯାଇଛି । ଆସନ୍ତାକାଲିଠାରୁ ୪ଦିନ ଯାଏ ଶୁଖିଲା ରହିବ ପାଗ । ଏବଂ ରାଜ୍ୟରେ ତାପମାତ୍ରାରେ ୧ରୁ ୩ଡିଗ୍ରୀ ହ୍ର।ସ ପାଇବ ।

ଭୁବନେଶ୍ୱର: ସ୍ୱାଧୀକାର ଭଙ୍ଗ ନୋଟିସ୍ ଆଣିଲେ କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା । ବିଧାନସଭାରେ ବିଭ୍ରାନ୍ତିକର ତଥ୍ୟ ଦେଇଥିବା ଅଭିଯୋଗରେ କଂଗ୍ରେସ ବିଧାୟକ ଏହି ସ୍ୱାଧିକାରଭଙ୍ଗ ନୋଟିସ୍ ଦେଇଛନ୍ତି ।

ତୁରେଇକେଲା ବ୍ଲକରେ ଜଳ ଯୋଗାଣ ନେଇ ଭିନ୍ନ ଭିନ୍ନ ଉତ୍ତର ଦେଇଥିଲେ ଜଳସମ୍ପଦ ମନ୍ତ୍ରୀ । ନଭେମ୍ବର ମାସରେ ଏକ ପ୍ରଶ୍ନର ଉତ୍ତରରେ ମନ୍ତ୍ରୀ କହିଥିଲେ ଯେ, ତୁରେଇକେଲା ବ୍ଲକରେ ୨୭ ପ୍ରତିଶତ ଜମିକୁ ଜଳସେଚନ ସୁବିଧା ଦିଆଯାଇଛି । ପୁଣି ପରବର୍ତ୍ତି ସମୟରେ ମନ୍ତ୍ରୀ କହିଥିଲେ ୨୬.୯୩ ପ୍ରତିଶତ ଏବଂ ଏବେ କହୁଛନ୍ତି ୨୪ ପ୍ରତିଶତ ଜମି ଜଳସେଚିତ ହୋଇଛି । ତୁରେଇକେଲା ବ୍ଲକରେ ଆଦୌ ଜଳସେଚନ ସୁବିଧାନଥିବା ବେଳେ ମନ୍ତ୍ରୀ ଗୃହକୁ ବିଭ୍ରାନ୍ତିକର ତଥ୍ୟ ଦେଉଛନ୍ତି ବୋଲି ସାଲୁଜା ଅଭିଯୋଗ କରିଛନ୍ତି  ।

ମନ୍ତ୍ରୀଙ୍କ ଏଭଳି ଉତ୍ତରେ ଅସନ୍ତୋଷ ପ୍ରକାଶ କରି ସାଲୁଜା ତାଙ୍କ ବିରୋଧରେ ସ୍ୱାଧିକାରଭଙ୍ଗ ନୋଟିସ ଦେଇଛନ୍ତି । ବାଚସ୍ପତି ତାଙ୍କ ନୋଟିସକୁ ଅନୁଧ୍ୟାନ କରିବେ ବୋଲି କହିଛନ୍ତି ।

ଭୁବନେଶ୍ୱର: ସ୍କୁଲ ଫି ଛାଡ଼ି ଦେବାକୁ କହି ଦୁଷ୍କର୍ମର ଅଭିଯୋଗ । ଶିକ୍ଷାରେରେ କଳଙ୍କ ଲଗାଇଲେ ସ୍କୁଲର ସମ୍ପାଦକ । ୬ ମାସ ଧରି କରି ଚାଲିଥିଲେ ଦୁଷ୍କର୍ମ । ସାନ ଭାଇର ସ୍କୁଲ ଫି ଛାଡ କରିବା ବାହାନାରେ ଜଣେ ଯୁବତୀଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି ।

ରାଉରକେଲା ସହରର ବନ୍ଧମୁଣ୍ଡା ଥାନାରେ ଅଭିଯୋଗ ହୋଇଛି । ସ୍କୁଲର ସମ୍ପାଦକ  ନିଜ କାର୍ଯାଳୟ ଭିତରେ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ସେପଟେ ବନ୍ଧମୁଣ୍ଡା ଥାନାରେ ଅଭିଯୋଗ ହେବା ପରେ ପୋଲିସ ଅଭିଯୁକ୍ତ ସମ୍ପାଦକ ଵିଭୁଢି କୁମାର ଗୁପ୍ତାଙ୍କୁ ଗିରଫ କରି ଘଟଣାର ତଦନ୍ତ ଆରମ୍ଭ କରିଛନ୍ତି ।

ଆଜି ପିଡିତା ଓ ଅଭିଯୁକ୍ତଙ୍କ ଡାକ୍ତରୀ ମାଇନା କରାଯିବ ବୋଲି ବନ୍ଧମୁଣ୍ଡା ଥାନା ପୋଲିସ ପକ୍ଷରୁ ସୂଚନା ଦିଆଯାଇଛି। ଅଭିଯୁକ୍ତକୁ ବନ୍ଧମୁଣ୍ଡା ଥାନାରେ ଅଟକ ରଖାଯାଇ ପୋଲିସ ପକ୍ଷରୁ ପଚରା ଉଚରା କରାଯାଉଛି ।

ରାଉରକେଲା: ରାଉରକେଲାରେ ଆଉ ଏକ ଅଭାବନୀୟ ଘଟଣା ଘଟିଛି । ଯୋଡ଼ି ହୋଇଛି ଆଉ ଏକ ଦୁଷ୍କର୍ମର କଳା ଫର୍ଦ୍ଦ ଚୋରି କରିବାକୁ ଆସି ମହିଳାଙ୍କୁ ଗଣଦୁଷ୍କର୍ମ କରିଛନ୍ତି ଦୁର୍ବୃତ୍ତ ।

ରାଉରକେଲା ବ୍ରାହ୍ମଣୀ ତରଙ୍ଗ ଥାନା ଅଞ୍ଚଳରେ ଏଭଳି ଅଭିଯୋଗ ଆସିଛି। ଗତ ରବିବାର ରାତିରେ ୭ଜଣ ଚୋର କ୍ରସରରୁ ଚୋରି କରିବା ପାଇଁ ଆସିଥିଲେ। ତେବେ ସେଠାରେ ସେମାନେ ମହିଳାଙ୍କୁ ଗଣ ଦୁଷ୍କର୍ମ କରିଥିବା ଅଭିଯୋଗ ହୋଇଛି।

ଏହାସହ ୭ଟି ମୋଟର ଚୋରି କରିନେଇଛନ୍ତି। ଅଭିଯୋଗ ହେବା ପରେ ବ୍ରାହ୍ମଣୀ ତରଙ୍ଗ ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଛି।

ବ୍ରହ୍ମପୁର: ଗୋଟିଏ ଘରୁ ତିନି ଜଣଙ୍କ ମୃତଦେହ ଉଦ୍ଧାର। ପାଲିଆ ଛତ୍ରପୁର ମଝି ସାହି ଗାଁରୁ ମୃତଦେହ ଉଦ୍ଧାର ହୋଇଛି। ବନ୍ଦ ଘରୁ ବାପା, ମା ଓ ଝିଅର ମୃତଦେହ ଉଦ୍ଧାର ହୋଇଛି ।

ସ୍ତ୍ରୀ ଓ ଝିଅକୁ ହତ୍ୟା ପରେ ସ୍ୱାମୀ ଆତ୍ମହତ୍ୟା କରିଥିବା ଜଣାପଡିଛି। ଝୁଲନ୍ତା ଅବସ୍ଥାରେ ସ୍ୱାମୀର ମୃତଦେହ ଜବତ କରାଯାଇଛି । ଘଟଣାସ୍ଥଳରେ ଗଞ୍ଜାମ ଏସ୍‌ପି, ସାଇଣ୍ଟିଫିକ୍‌ ଟିମ୍‌ ପହଞ୍ଚି ତଦନ୍ତ କରୁଛି।