spot_img
Home Blog Page 5601

ମହଙ୍ଗା ମାଡ଼, ପୁଣି ବଢ଼ିଲା ଡିଜେଲ୍ ସହ ପେଟ୍ରୋଲ୍ ଦର

ନୂଆଦିଲ୍ଲୀ: ସାଧାରଣ ଲୋକର ପକେଟକୁ ମହଙ୍ଗା ମାଡ଼ । ପୁଣି ବଢ଼ିଲା ପେଟ୍ରୋଲ ଓ ଡିଜେଲ୍ ଦର । ଆଜି ପେଟ୍ରୋଲ ଲିଟର ପିଛା ୩୫ ପଇସା ବୃଦ୍ଧି ପାଇଥିବା ବେଳେ ଡିଜେଲ୍ ଲିଟର ପିଛା ୯ ପଇସା ମହଙ୍ଗା ହୋଇଛି । ଦିଲ୍ଲୀରେ ପେଟ୍ରୋଲ ଲିଟର ପିଛା ୧୦୦ ଟଙ୍କା ୫୬ ପଇସା ରହିଥିବା ବେଳେ ଡିଜେଲ ଦର ୮୯ ଟଙ୍କା ୬୨ ପଇସା ରହିଛି । ଦେଶର ସମସ୍ତ ବଡ଼ ସହରରେ ପେଟ୍ରୋଲ୍ ଦର ଶହେ ପାର୍ କରିଛି ।

Petrol And Disel Price Increaed Today

କୋଲକାତାରେ ପେଟ୍ରୋଲ୍ ଲିଟର ପିଛା ଦର ରହିଛି ୧୦୦ ଟଙ୍କା ୬୨ ପଇସା । ଚେନ୍ନାଇ ଓ ମୁମ୍ବାଇରେ ପୂର୍ବରୁ ପେଟ୍ରୋଲ୍ ଦର ସେଞ୍ଚୁରୀ ମାରି ସାରିଛି । ମୁମ୍ବାଇରେ ମେ ୨୯କୁ ପେଟ୍ରୋଲ ଲିଟର ପିଛା ଶହେ ଟଙ୍କା ପାର୍ କରିଥିବା ବେଳେ ଏବେ ଲିଟର ପିଛା ୧୦୬ ଟଙ୍କା ୫୯ ପଇସାରେ ବିକ୍ରି ହେଉଛି ।

କେଉଁ ସହରରେ କେତେ ଦର ?

ସହର ପେଟ୍ରୋଲ ଦର ଡିଜେଲ ଦର
ମୁମ୍ବାଇ ୧୦୬ ଟଙ୍କା ୫୯ ପଇସା ୯୭ ଟଙ୍କା ୧୮ ପଇସା
କୋଲକାତା ୧୦୦ ଟଙ୍କା ୬୨ ପଇସା ୯୨ ଟଙ୍କା ୬୫ ପଇସା
ଚେନ୍ନାଇ ୧୦୧ ଟଙ୍କା ୩୭ ପଇସା ୯୪ ଟଙ୍କା ୧୫ ପଇସା
ଭୋପାଳ ୧୦୮ ଟଙ୍କା ୮୮ ପଇସା ୯୮ ଟଙ୍କା ୪୦ ପଇସା
ବେଙ୍ଗଳୁରୁ ୧୦୩ ଟଙ୍କା ୯୩ ପଇସା ୯୪ ଟଙ୍କା ୯୯ ପଇସା
ପାଟଣା ୧୦୨ ଟଙ୍କା ୭୯ ପଇସା ୯୫ ଟଙ୍କା ୧୪ ପଇସା
ଚଣ୍ଡିଗଡ଼ ୯୬ ଟଙ୍କା ୭୦ ପଇସା ୮୯ ଟଙ୍କା ୨୫ ପଇସା
ଲକ୍ଷ୍ନୌ ୯୬ ଟଙ୍କା ୬୭ ପଇସା ୯୦ ଟଙ୍କା ୦୧ ପଇସା
ରାଞ୍ଚି ୯୫ ଟଙ୍କା ୭୦ ପଇସା ୯୪ ଟଙ୍କା ୫୮ ପଇସା
ଭୁବନେଶ୍ୱର ୧୦୧ ଟଙ୍କା ୩୭ ପଇସା ୯୭ ଟଙ୍କା ୬୭ ପଇସା

ଆଜି ୪ ଜିଲ୍ଲାରେ କୋଭିଡ୍ ଟିକାକରଣ ବନ୍ଦ

ଭୁବନେଶ୍ୱର: ଟିକା ସଂକଟ ଭିତରେ ଚାଲିଛି କୋଭିଡ୍ ଟିକାକରଣ ଆଜି ରାଜ୍ୟର ୪ ଜିଲ୍ଲାରେ କୋଭିଡ୍ ଟିକା ଦିଆଯିବ ନାହିଁ । ବଲାଙ୍ଗିର, ବାଲେଶ୍ୱର, ଢେଙ୍କାନାଳ ଓ ସୋନପୁର ଜିଲ୍ଲାରେ ଟିକାକରଣ ବନ୍ଦ ରହିଛି । ଆଜି ରାଜ୍ୟର ମାତ୍ର ୭୦୩ଟି କେନ୍ଦ୍ରରେ କୋଭିଡ୍ ଟିକାକରଣ ହେଉଛି ।

Covid Vaccination Stopped In 4 District

ଏବେ ରାଜ୍ୟ ପାଖରେ ୭ ତାରିଖ ସନ୍ଧ୍ୟା ସୁଦ୍ଧା କୋଭିସିଲ୍ଡର ୧ ଲକ୍ଷ ୯୦ ହଜାର ୩୮୦ ଡୋଜ୍ ରହିଛି । ସେହିଭଳି କୋଭାକ୍ସିନର ୨ ଲକ୍ଷ ୯୮ ହଜାର ୮୧୦ ଡୋଜ୍ ରହିଛି । ଏବେ ଭୁବନେଶ୍ୱର ସହ ଗଞ୍ଜାମରେ ଦିଆଯାଉଛି କୋଭାକ୍ସିନ୍ । ବାକି ଅନ୍ୟ ଜିଲ୍ଲାରେ କୋଭିସିଲ୍ଡ ଦିଆଯାଉଛି । ଆବଶ୍ୟକତା ଅନୁସାରେ କେନ୍ଦ୍ର କୋଭିସିଲ୍ଡ ଯୋଗାଣ କରୁନଥିବାରୁ ଅଧିକାଂଶ ସମୟରେ ଟିକାକରଣ ବନ୍ଦ ରହୁଛି ।

ରଥଯାତ୍ରା ପ୍ରସ୍ତୁତି ଓ ସୁରକ୍ଷା ବ୍ୟବସ୍ଥାର ସମୀକ୍ଷା କରିବେ ମୁଖ୍ୟମନ୍ତ୍ରୀ

ପୁରୀ: କିଭଳି ଚାଲିଛି ବିଶ୍ୱ ପ୍ରସିଦ୍ଧ ଘୋଷଯାତ୍ରାର ପ୍ରସ୍ତୁତି । କଣ ହୋଇଛି ବ୍ୟବସ୍ଥା ? ଆଜି ଏସବୁର ସମୀକ୍ଷା କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରଥଯାତ୍ରା ପ୍ରସ୍ତୁତି ଓ ସୁରକ୍ଷା ବ୍ୟବସ୍ଥାର ସମୀକ୍ଷା କରିବେ ମୁଖ୍ୟମନ୍ତ୍ରୀ । ଗତକାଲି ଭର୍ଚୁଆଲ ମାଧ୍ୟମରେ ଗଜପତି ମହାରାଜଙ୍କ ଅଧ୍ୟକ୍ଷତାରେ ବୈଠକ ବସିଥିଲେ । ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ସମେତ ଆଇନ୍‌ ବିଭାଗର ବରିଷ୍ଠ ଅଧିକାରୀ ଜିଲ୍ଲାପାଳ, ଏସ୍‌ପିଙ୍କ ସମେତ ଶ୍ରୀମନ୍ଦିର ବହୁ ଅଧିକାରୀ ଯୋଗ ଦେଇଥିଲେ ।

CM Naveen To Review Preparation Of Rath Yatra

ଘୋଷଯାତ୍ରାକୁ ଶୃଙ୍ଖଳିତ କରିବାକୁ ବୈଠକରେ ଆଲୋଚନା ହୋଇଛି । ଗତବର୍ଷ ଭଳି ଚଳିତ ବର୍ଷ କୋଭିଡ୍ କଟକଣାରେ ନବଦିନାତ୍ମକ ଯାତ୍ରା ସାରିବାକୁ ପ୍ରସ୍ତୁତ ରହିଛି ଜିଲ୍ଲା ଓ ଶ୍ରୀମନ୍ଦିର ପ୍ରଶାସନ । ଯାତ୍ରା ସମୟରେ ତିନୋଟି ପ୍ରସଙ୍ଗକୁ ଗୁରୁତ୍ୱ ଦିଆଯାଇଛି । ରଥଯାତ୍ରାରେ ନିୟୋଜିତ ସମସ୍ତ ସେବାୟତଙ୍କ କୋଭିଡ୍ ଟେଷ୍ଟ ହେବ । କୋଭିଡ୍ କଟକଣାର ଅନୁପାଳନ ସହ କେବଳ ସେବାୟତ ହିଁ ରଥ ଟାଣିବେ ବୋଲି ନିଷ୍ପତ୍ତି ହୋଇଛି । ସେହିପରି ସ୍ୱାସ୍ଥ୍ୟ ଓ ପାନୀୟ ଜଳ ବ୍ୟବସ୍ଥା ଉପରେ ବିଶେଷ ଧ୍ୟାନ ଦିଆଯାଇଛି ।

ଚିକିତ୍ସାଧୀନ ଅବସ୍ଥାରେ ହିମାଚଳ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀଙ୍କ ଦେହାନ୍ତ

ନୂଆଦିଲ୍ଲୀ: ହିମାଚଳ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ବୀରଭଦ୍ର ସିଂହଙ୍କ ପରଲୋକ ହୋଇଯାଇଛି । ଶିମଳାର ଇନ୍ଦିର ଗାନ୍ଧୀ ମେଡିକାଲ କଲେଜରେ ବୀରଭଦ୍ରଙ୍କ ମୃତ୍ୟୁ ହୋଇଛି । ବିଗତ ୩ ମାସରେ ୨ଥର କୋଭିଡରୁ ସୁସ୍ଥ ହେବା ପରେ ବୀରଭଦ୍ରଙ୍କୁ ଏପ୍ରିଲ ୨୩ରେ ଆଇଜିଏମସିଏଚରେ ଭର୍ତ୍ତି କରାଯାଇଥିଲା । ୮୭ ବର୍ଷୀଅ ବୀରଭଦ୍ର ସିଂହ ୬ ଥର ହିମାଚଳ ପ୍ରଦେଶର ମୁଖ୍ୟମନ୍ତ୍ରୀ ରହିଥିଲେ । ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓ ରାଜ୍ୟର ମୁଖ୍ୟମନ୍ତ୍ରୀ ଜୟରାମ ଠାକୁର ସୋମବାର ଅରକିର ବିଧାୟକ ବୀରଭଦ୍ର ସିଂହଙ୍କ ସ୍ୱାସ୍ଥ୍ୟାବସ୍ଥା ବୁଝିବା ପାଇଁ ମେଡିକାଲ ଯାଇଥିଲେ ।

Former Chief Minister Of Himachal Pradesh Virbhadra Singh Dies

ବୀରଭଦ୍ର ସିଂହ ୯ ଥର ବିଧାୟକ, ୫ ଥର ସାଂସଦ ହୋଇଥିଲେ । ସେ ୬ ଥର ହିମାଚଳ ପ୍ରଦେଶର ମୁଖ୍ୟମନ୍ତ୍ରୀ ରହିଥିଲେ । ଏବେ ସେ ସୋଲନ ଜିଲ୍ଲାର ଅରକିରୁ ବିଧାୟକ ଥିଲେ । ପ୍ରଥମଥର କରୋନା ସଂକ୍ରମିତ ହେବା ପରେ ତାଙ୍କୁ ଚଣ୍ଡିଗଡ଼ ସ୍ଥିତ ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା । କୋଭିଡରୁ ଠିକ୍ ହେବା ପରେ ଏପ୍ରିଲ ୩୦ରେ ଘରକୁ ଫେରିଥିଲେ । ତେବେ ଘର ପହଞ୍ଚିବାର କିଛିଘଣ୍ଟା ପରେ ନିଶ୍ୱାସ ନେବାରେ କଷ୍ଟ ଅନୁଭବ କରିଥିଲେ । ଫଳରେ ତାଙ୍କୁ ପୁଣିଥରେ ମେଡିକାଲରେ ଭର୍ତ୍ତି କରାଯାଇଥିଲା ।

ଚଳିତବର୍ଷ ଜାନୁଆରୀରେ ନିର୍ବାଚନ ରାଜନୀତିରୁ ସନ୍ୟାସ ନେଇ ଘୋଷଣା କରିଥିଲେ ବୀରଭଦ୍ର ସିଂହ । ସେ କହିଥିଲେ, ଆଗାମୀ ନିର୍ବାଚନ ଲଢ଼ିବେ ନାହିଁ । କିନ୍ତୁ ସେ କଂଗ୍ରସର ପ୍ରକୃତ ସୈନିକ ଥିଲେ, ସେଥଇପାଇଁ କଂଗ୍ରେସକୁ ମଜଭୁତ ଦଳ ଭାବେ ଦେଖିବାକୁ ଚାହୁଁଥିଲେ ।

Former Chief Minister Of Himachal Pradesh Virbhadra Singh Dies

୨୦୦୯ରେ ମନମୋହନ ସିଂହଙ୍କ ସରକାରରେ ଇସ୍ପାତ ମନ୍ତ୍ରୀ ଥିଲେ ବୀରଭଦ୍ର ସିଂହ । ୧୯୮୩ରେ ପ୍ରଥମ ଥର ପାଇଁ ମୁଖ୍ୟମନ୍ତ୍ରୀ ହୋଇଥିଲା ବୀରଭଦ୍ର । ଏହାପରେ ୧୯୯୦ରେ ଦୁଇଥର ମୁଖ୍ୟମନ୍ତ୍ରୀ ହୋଇଥିଲେ । ପରେ ୧୯୯୩ରୁ ୧୯୯୮, ୨୦୦୩ରୁ ୨୦୦୭ ଏବଂ ୨୦୧୨ରୁ ୨୦୧୭ ପର୍ଯ୍ୟନ୍ତ ହିମାଚଳ ପ୍ରଦେଶର ମୁଖ୍ୟମନ୍ତ୍ରୀ ଥିଲେ ବୀରଭଦ୍ର ସିଂହ । ଏହି ବରିଷ୍ଠ ନେତାଙ୍କ ବିୟୋଗରେ ହିମାଚଳପ୍ରଦେଶ ରାଜନୀତିରେ ଏକ ଅପୂରଣୀୟ କ୍ଷତି ହୋଇଛି ।

ଅଶ୍ୱିନୀ ବୈଷ୍ଣବଙ୍କୁ ରେଳ ମନ୍ତ୍ରାଳୟ: ବଦଳିଲେ ପେଟ୍ରୋଲିୟମ୍ ବିଭାଗ ମନ୍ତ୍ରୀ

ନୂଆଦିଲ୍ଲୀ: ଆସିଲେ ନୂଆ, ଗଲେ ପୁରୁଣା। କିଛି ନୂଆ ଚେହେରା ମନ୍ତ୍ରୀ ଭାବେ ପଦ ଓ ଗୋପନୀୟତାର ଶପଥ ପାଠ କରିଥିବା ବେଳେ ପୁରୁଣା ମନ୍ତ୍ରୀଙ୍କ ବିଭାଗ ବଦଳି ହୋଇଛି । ନୂଆ କରି ମନ୍ତ୍ରିମଣ୍ଡଳରେ ସାମିଲ ହୋଇଥିବା ଅଶ୍ୱିନୀ ବୈଷ୍ଣବଙ୍କୁ ଗୁରୁତ୍ୱପୂର୍ଣ୍ଣ ରେଳ ମନ୍ତ୍ରାଳୟ ମିଳିଥିବା ବେଳେ ପେଟ୍ରୋଲିୟମ୍ ମନ୍ତ୍ରୀ ଥିବା ଧର୍ମେନ୍ଦ୍ର ପ୍ରଧାନଙ୍କୁ ଶିକ୍ଷା ମନ୍ତ୍ରୀ ଭାବେ ନିଯୁକ୍ତି ମିଳିଛି । ଅପରପକ୍ଷରେ ପୂର୍ବରୁ ବେସାମରିକ ବିମାନ ଚଳାଚଳ ମନ୍ତ୍ରୀ ଥିବା ହରଦୀପ ସିଂ ପୁରୀଙ୍କୁ ପେଟ୍ରୋଲିୟମ୍ ବିଭାଗ ମନ୍ତ୍ରୀ ଭାବେ ନିଯୁକ୍ତି ମିଳିଛି । ସେହିପରି କଂଗ୍ରେସ ଛାଡ଼ି ବିଜେପିରେ ଯୋଗଦେଇଥିବା ମଧ୍ୟପ୍ରଦେଶ ନେତା ଜ୍ୟୋତିରାଦିତ୍ୟ ସିନ୍ଧିଆଙ୍କୁ ବେସାମରିକ ବିମାନ ଚଳାଚଳ ମନ୍ତ୍ରାଳୟ ଦାୟିତ୍ୱ ମିଳିଛି । ସେହିଭଳି ଅନୁରାଗ ଠାକୁର- ସୂଚନା ଓ ପ୍ରସାରଣ, ଯୁବ ବ୍ୟାପାର ମନ୍ତ୍ରାଳୟ, ପୁରୁଷୋତ୍ତମ ରୁପାଲା-ମତ୍ସ୍ୟ ଓ ପଶୁ ସମ୍ପଦ, ପଶୁପତି ପାରସ-ଖାଦ୍ୟ ପ୍ରକ୍ରିୟାକରଣ, ମନସୁଖ ମାଣ୍ଡଭ୍ୟ-ସ୍ୱାସ୍ଥ୍ୟ ମନ୍ତ୍ରାଳୟ, ଭୂପେନ୍ଦ୍ର ସିଂହ ଯାଦବ- ଶ୍ରମ ଓ ପରିବେଶ ମନ୍ତ୍ରାଳୟ, ସ୍ମୃତି ଇରାନୀ- ମହିଳା ଓ ଶିଶୁ ବିକାଶ ମନ୍ତ୍ରୀ, ସର୍ବାନନ୍ଦ ସୋନଓ୍ୱାଲ ଆୟୁଷ ମନ୍ତ୍ରାଳୟ, ଜି.କିଷନ ରେଡ୍ଡୀ-ସଂସ୍କୃତି ଓ ପର୍ଯ୍ୟଟନ ବିଭାଗ, ଗିରିରାଜ ସିଂ- ଗ୍ରାମୀଣ ବିକାଶ,ପୀୟୁଷ ଗୋଏଲ- ବୟନ ଶିଳ୍ପ, ନାରାୟଣ ତାତୁ ରାଣେ- ଏମ୍‌ଏସ୍ଏମ୍‌ଇ ବିଭାଗ, ସର୍ବାନନ୍ଦ ସୋନଓ୍ୱାଲ – ସିପିଂ, ବନ୍ଦର ଓ ଆୟୁଷ ବିଭାଗ, ବୀରେନ୍ଦ୍ର କୁମାର- ସାମାଜିକ ନ୍ୟାୟ ଏବଂ ସଶକ୍ତିକରଣ, ରାମଚନ୍ଦ୍ର ପ୍ରସାଦ ସିଂହ-ଷ୍ଟିଲ୍ ମନ୍ତ୍ରୀ, କିରନ୍ ରିଜିଜ୍ଜୁ -ଆଇନ, ରାଜ କୁମାର ସିଂହ-ଶକ୍ତି, ବିଶ୍ୱେଶ୍ୱର ଟୁଡୁ- ଜଳଶକ୍ତି, ମୀନାକ୍ଷୀ ଲେଖି- ବୈଦେଶିକ ବ୍ୟାପାର, ମହେନ୍ଦ୍ର ନାଥ ପାଣ୍ଡେ- ଭାରି ଶିଳ୍ପ, ଅନୁପ୍ରିୟା ସିଂ ପଟେଲ- ବାଣିଜ୍ୟ ମନ୍ତ୍ରାଳୟ, ନୀତିଶ ପ୍ରମାଣିଳ- କ୍ରୀଡ଼ା ଓ ଯୁବ ବ୍ୟାପାର (ରାଷ୍ଟ୍ରମନ୍ତ୍ରୀ) ଦାୟିତ୍ୱ ପାଇଛନ୍ତି ।

 

ଏଥର ରାଜ୍ୟରୁ ସର୍ବାଧିକ ବିଜେପି ସାଂସଦ ନିର୍ବାଚିତ ହୋଇଥିଲେ ବି ମନ୍ତ୍ରିମଣ୍ଡଳରେ ଦେଖିବାକୁ ମିଳିନି ପ୍ରତିଫଳନ

ଭୁବନେଶ୍ୱର: ବିଜେପି ଫୋକସ୍‌ରେ ନାହିଁ ଓଡ଼ିଶା । ଏଥର ରାଜ୍ୟରୁ ସର୍ବାଧିକ ବିଜେପି ସାଂସଦ ନିର୍ବାଚିତ ହୋଇଥିଲେ, ହେଲେ ମନ୍ତ୍ରିମଣ୍ଡଳରେ ତାର ପ୍ରତିଫଳନ ଦେଖିବାକୁ ମିଳିଲାନି । ବାଲେଶ୍ୱର ସାଂସଦ ପ୍ରତାପ ଷଡ଼ଙ୍ଗୀ କ୍ୟାବିନେଟ୍‌ରୁ ବିଦା ହୋଇଥିବା ବେଳେ ମୟୁରଭଞ୍ଜ ସାଂସଦ ବିଶ୍ୱେଶ୍ୱର ଟୁଡୁ ଓ ଅଶ୍ୱିନୀ ବୈଷ୍ଣବଙ୍କୁ ମନ୍ତ୍ରୀ ପଦ ମିଳିଛି । ତେବେ ଓଡ଼ିଶା ରାଜନୈତିକ ପାଣିପାଗ ସହ ଅଶ୍ୱିନୀଙ୍କ ସମ୍ପର୍କ ନାହିଁ । ଶାସନକୁ ଆସିବା ବେଳେ ପୂର୍ବ ଭାରତକୁ ବିକାଶର ପରୀକ୍ଷାଗାର କରିବା ନେଇ ବିଜେପିର ପ୍ରତିଶ୍ରୁତି ପାଣିର ଗାର ହୋଇଛି । ପଶ୍ଚିମ ଓଡ଼ିଶାରୁ ଭଲ ପ୍ରତିନିଧିତ୍ୱ ସତ୍ତ୍ୱେ ମିଳିନି ସ୍ଥାନ ।

ମୋଦି ମନ୍ତ୍ରିମଣ୍ଡଳରେ ଓଡ଼ିଶାକୁ ଉପେକ୍ଷା । ପ୍ରତାପ ଷଡ଼ଙ୍ଗୀ ଆଉଟ୍‌, ବିଶ୍ୱେଶ୍ୱର ଇନ୍ । ଯାହା ଆଶା ଥିଲା, ମଉଳି ଯାଇଛି। ମତ୍ସ୍ୟ ପଶୁସମ୍ପଦ ସହ ଏମ୍ଏସ୍ଏମ୍ଇ ମନ୍ତ୍ରୀ ଥିବା ବାଲେଶ୍ୱର ସାଂସଦ ପ୍ରତାପ ଷଡଙ୍ଗୀଙ୍କ ପ୍ରଦର୍ଶନ ଭଲ ନଥିବାରୁ ସେ ବାଦ ପଡ଼ିଥିବା ଚର୍ଚ୍ଚା ହେଉଛି । ଏତେ ବଡ଼ ବିଭାଗର ସଠିକ୍ ନେତ୍ୱତ୍ୱ ନେବାରେ ବିଫଳ ହୋଇଛନ୍ତି ପ୍ରତାପ । ପ୍ରଥମ ଦଫାରେ ମନ୍ତ୍ରିମଣ୍ଡଳରେ ବିଗ୍‌ ଏଣ୍ଟ୍ରି ମାରିଥିବା ପ୍ରତାପ ପରେ ନିଜ ଭିନ୍ନ ଆଭିମୁଖ୍ୟ ନେଇ ଶୁଖିଲା ଚର୍ଚ୍ଚାରେ ରହିଥିଲେ । ପୁଣି କେତେବେଳେ ଗାଁସ୍ତରର ରାଜନୀତିରେ ଅଯଥା ମୁଣ୍ଡ ଖେଳାଇ ଅପବାଦ ମୁଣ୍ଡାଇଥିଲେ । ରାଜ୍ୟ ରାଜନୀତିରେ ବି ପ୍ରଭାବ ହରାଉଇଥିଲେ। ଏହା ସହ ବିଜେପି ହାତରେ ଥିବା ବାଲେଶ୍ୱର ବିଧାନସଭା ଉପନିର୍ବାଚନ ପରାଜୟ ପ୍ରତାପ ଷଡଙ୍ଗୀଙ୍କୁ ବ୍ୟାକ୍‌ଫୁଟ୍‌କୁ ଆଣିଥିଲା ।

ସେପେଟ ଓଡ଼ିଶା ବିଜେପିର ପାଓ୍ୱାର ହାଉସ୍‌ କୁହାଯାଉଥିବା ପଶ୍ଚିମ ଓଡ଼ିଶା ବି ପୁଣି ଥରେ ନିରାଶ ହୋଇଛି । ୪ଥରର ସାଂସଦ ସଙ୍ଗୀତା ସିଂହଦେଓ, ପୂର୍ବତନ ମନ୍ତ୍ରୀ ଜୁଏଲ ଓରାମ, ବରିଷ୍ଠ ନେତା ସୁରେଶ ପୂଜାରୀଙ୍କ ଭଳି ଅଭିଜ୍ଞ ନେତାଙ୍କୁ ଭରସା କରିପାରିନାହାନ୍ତି ପ୍ରଧାନମନ୍ତ୍ରୀ ଏବଂ ବିଜେପି ଥିଙ୍କ ଟ୍ୟାଙ୍କ। ପଶ୍ଚିମ ଓଡ଼ିଶା ଏଥର ବି ମନ୍ତ୍ରୀ ଶୂନ୍ୟ । ପ୍ରଥମ ଥର ପାଇଁ ଓଡ଼ିଶାରୁ ସର୍ବାଧିକ ୮ଜଣ ସାଂସଦ ନିର୍ବାଚିତ ହୋଇଥିଲେ ବି କେବଳ ଜଣେ ମନ୍ତ୍ରୀ ହୋଇଛନ୍ତି । ରାଜ୍ୟସଭା ସାଂସଦ ଧର୍ମେନ୍ଦ୍ର ପ୍ରଧାନ ଯଦିଓ ଓଡ଼ିଆ, ହେଲେ ସେ ମଧ୍ୟପ୍ରଦେଶ ତାଙ୍କ ପାଇଁ ଗୁରୁତ୍ୱପୂର୍ଣ୍ଣ । ସେହିପରି ସାଂସଦ ଅଶ୍ୱିନୀ ବୈଷ୍ଣବ ଓଡ଼ିଶା କୋଟାରୁ ରାଜ୍ୟସଭା ଯାଇଥିଲେ ମଧ୍ୟ ମନ ପ୍ରାଣ ରାଜସ୍ଥାନରେ । ବିଶ୍ୱେଶ୍ୱରଙ୍କୁ ମନ୍ତ୍ରୀ କରି ଗୋଟେ ଗୁଳିରେ ତିନି ଶିକାର କରିବାକୁ ପ୍ରୟାସ ହୋଇଛି । ଆଦିବାସୀ ବର୍ଗକୁ ପ୍ରତିନିଧିତ୍ୱ କରୁଥିବା ବିଶ୍ୱେଶ୍ୱର ଜଣେ ଇଂଜିନିୟର ସାଙ୍ଗକୁ ଜାତୀୟ ସମ୍ପାଦକ ଦାୟିତ୍ୱ ତୁଲାଉଛନ୍ତି । ପୁଣି ଓଡ଼ିଶା-ପଶ୍ଚିମବଙ୍ଗ-ଝାଡ଼ଖଣ୍ଡ ସୀମାକୁ ପ୍ରତିନିଧିତ୍ୱ କରୁଛନ୍ତି । ଏସବୁକୁ ଆଲୋଚନା କଲେ, ଗୋଟିଏ କଥା ସ୍ପଷ୍ଟ, ବିଜେପିର ଫୋକସ ତାଲିକାରେ ଓଡ଼ିଶା ନାହିଁ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୃଢ଼ ନେତୃତ୍ୱ ଯୋଗୁଁ ଓଡ଼ିଶାରେ ବିଜେପି ରାଜନୈତିକ ଭବିଷ୍ୟତ ନାହିଁ, ଏକଥା ବିଜେପି ହାଇକମାଣ୍ଡ ବୁଝି ସାରିଲେଣି। ଅନେକ ପ୍ରୟାସ ପରେ ବି ଲୋକଙ୍କ ବିଶ୍ୱାସ ଜିତିବାରେ ବିଫଳ ହୋଇଛି ବିଜେପି । ସେଥିପାଇଁ ଏବେ ଓଡ଼ିଶା ଉପରୁ ଫୋକସ୍‌ ହଟାଉଥିବା ମନ୍ତ୍ରିମଣ୍ଡଳରୁ ସ୍ପଷ୍ଟ ହୋଇଛି ।

ଜନଜାତି ପରିବାରକୁ ୫ ହଜାର ଲେଖାଏଁ ଆର୍ଥିକ ସହାୟତା ପ୍ରଦାନ: ୬୦ ହଜାର ଏସ୍‌ସି ଓ ଏସ୍‌ଟି ପିଲା ପାଇଲେ ୩ ମାସର ଛାତ୍ର ବୃତ୍ତି

ଭୁବନେଶ୍ୱର: ଆଦିମ ଜନଜାତି ପରିବାରକୁ ମୁଖ୍ୟମନ୍ତ୍ରୀଙ୍କ ଆର୍ଥିକ ସହାୟତା । ୫ ହଜାର ଟଙ୍କା ଲେଖାଏଁ ଆର୍ଥିକ ସହାୟତା ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କୋଭିଡର ଦ୍ଵିତୀୟ ଲହରୀରେ ଏହି ଆଦିମ ଜନଜାତି ପରିବାରମାନଙ୍କୁ ଆର୍ଥିକ ସୁରକ୍ଷା ଦେବା ପାଇଁ ଏହି ସହାୟତା ପ୍ରଦାନ କରାଯାଇଛି । ବ୍ୟାଙ୍କ ଆକାଉଣ୍ଟକୁ ଏହି ସହାୟତା ରାଶି ପ୍ରଦାନ କରାଯାଇଛି ।

          ଏହି ଅବସରରେ ଉଦବୋଧନ ଦେଇ ମୁଖ୍ୟମନ୍ତ୍ରୀ କହିଛନ୍ତି, ”ମୁଁ  ଜାଣେ କାରୋନା ରୋଗ ଯୋଗୁଁ ଗରିବ ଲୋକଙ୍କ ରୋଜଗାର ଉପରେ ବହୁତ ପ୍ରଭାବ ପଢିଛି । ଆପଣମାନଙ୍କ ରୋଜଗାର ଉପରେ ମଧ୍ୟ ବହୁତ ପ୍ରଭାବ ପଡିଛି । ଏ ବିପଦ ସମୟରେ ଆପଣମାନେ ଏକା ନୁହନ୍ତି । ଆପଣଙ୍କ ସାଥିରେ ସରକାର ଅଛନ୍ତି । ଆପଣଙ୍କ କଲ୍ୟାଣ ପାଇଁ ସରକାର କାମ କରୁଛନ୍ତି ।’ ସୂଚନାଯୋଗ୍ୟ ଯେ ରାଜ୍ୟରେ ସମୁଦାୟ ୧୬୭୯ଟି ପିଭିଜିଟି ଗାଁ ରହିଛି । କୋଭିଡ ସମୟରେ ରାଜ୍ୟ ସରକାର ମାସ୍କ ସାନିଟାଇଜର ଓ ସାବୁନ ବଣ୍ଟନ ସହିତ ସଙ୍ଗରୋଧ କେନ୍ଦ୍ର ଏବଂ ଟିକାକରଣକୁ ପ୍ରାଥମିକତା ଦେଇ କୋଭିଡ ପରିଚାଳନା କରୁଛନ୍ତି । ପିଭିଜିଟି ଜନଜାତିଙ୍କ ମଧ୍ୟରୁ ୩୧୪ଜଣ କୋଭିଡ ପୀଡ଼ିତ ହୋଇଥିଲେ ମଧ୍ୟ ଗୋଟିଏ ବି ଜୀବନ ହାନୀ ହୋଇନାହିଁ ବୋଲି ଜଣାପଡିଛି । PVGT ଗାଁମାନଙ୍କରେ 18 ଟି ଆମ୍ୱୁଲାନ୍ସ ପ୍ରଦାନ ସହିତ କୋଭିଡ ପରିଚାଳନାକୁ ଅଧିକ ତ୍ୱରାନ୍ୱିତ  କରାଯାଇଛି ।

                    ଅପରପକ୍ଷରେ ୬୦,୦୦୦ ଏସ୍‌ସି ଓ ଏସ୍‌ଟି ଛାତ୍ରଛାତ୍ରୀଙ୍କୁ ଏପ୍ରିଲ, ମେ ଓ ଜୁନ ଏ ତିନି ମାସ ପାଇଁ  ଏକକାଳୀନ ପ୍ରାକ ମାଟ୍ରିକ ଛାତ୍ରବୃତ୍ତି ଦିଆଗଲା । ଏହା ପିଲାଙ୍କ ବାପା- ମା’ଙ୍କ ବ୍ୟାଙ୍କ ଖାତାରେ ଜମା ହୋଇଛି । ଝିଅମାନଙ୍କ ପାଇଁ ୨୪୦୦ ଟଙ୍କା ଓ ପୁଅ ମାନଙ୍କ ପାଇଁ ୨୨୫୦ ଟଙ୍କା ଦିଆଗଲା । ସମୁଦାୟ ୫ ଲକ୍ଷରୁ ଅଧିକ ଛାତ୍ରଛାତ୍ରୀ ଏହି ସୁବିଧା ପାଇବେ । ସୂଚନାଯୋଗ୍ୟ ଯେ ଗତବର୍ଷ ମଧ୍ୟ କୋଭିଡ ଯୋଗୁଁ ଆଗୁଆ ଛାତ୍ରବୃତ୍ତି ପ୍ରଦାନ କରାଯାଇଥିଲା ।

ଏଥିସହିତ ପଢ଼ନ୍ତୁ: ’ରାଜ୍ୟର ୧୦ ଜିଲ୍ଲାରେ ପଜିଟିଭିଟି ହାର ୧ ପ୍ରତିଶତରୁ କମ୍ ରହିଛି: ଶିଶୁଙ୍କ ପାଇଁ ୩ ହଜାର ସ୍ୱତନ୍ତ୍ର ବେଡ୍ ବ୍ୟବସ୍ଥା’

ମୋଦି ମନ୍ତ୍ରିମଣ୍ଡଳ ସମ୍ପ୍ରସାରଣ: ଜାଣନ୍ତୁ କିଏ ଗଲେ କିଏ ଆସିଲେ

ନୂଆଦିଲ୍ଲୀ: ବୁଧବାର ମୋଦି ସରକାରଙ୍କ ଦ୍ୱିତୀୟ ପାଳିରେ ପ୍ରଥମ ମନ୍ତ୍ରିମଣ୍ଡଳ ଅଦଳବଦଳ ହୋଇଛି ।  ଏଥିରେ ୧୦ଜଣଙ୍କୁ ପ୍ରମୋଶନ ମିଳିଥିବା ବେଳେ ୩୩ ନୂଆ ମୁହଁ ସାମିଲ ହୋଇଛନ୍ତି । ସନ୍ଧ୍ୟା ୬ଟାରେ ରାଷ୍ଟ୍ରପତି ଭବନରେ ଅନୁଷ୍ଠିତ ଏହି ଶପଥ ଗ୍ରହଣ କାର୍ଯ୍ୟକ୍ରମରେ ନାରାୟଣ ତାତୁ ରାଣେ ପ୍ରଥମେ କ୍ୟାବିନେଟ୍ ମନ୍ତ୍ରି ଭାବେ ଶପଥ ଗ୍ରହଣ କରିଥିଲେ । ସେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଥିଲେ । ତାଙ୍କ ପଛକୁ ଆସାମର ପୂର୍ବତନ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନଓ୍ୱାଲ କେନ୍ଦ୍ର ମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । ତାଙ୍କ ପରେ ଡ. ବିରେନ୍ଦ୍ର କୁମାର, କଂଗ୍ରେସ ଛାଡ଼ି ବିଜେପିରେ ଯୋଗଦେଇଥିବା ମଧ୍ୟପ୍ରଦେଶ ରାଜନେତା ଜ୍ୟୋତିରାଦିତ୍ୟା ମାଧବରାଓ ସିନ୍ଧିଆ, ଜେଡିୟୁ ସାଂସଦ ରାମଚନ୍ଦ୍ର ପ୍ରତାପ ସିଂ, ଓଡ଼ିଶାରୁ ରାଜ୍ୟସଭାକୁ ନିର୍ବାଚିତ ହୋଇଥିବା ପୂର୍ବତନ ପ୍ରଶାସନିକ ଅଧିକାରୀ ଅଶ୍ୱିନୀ ବୈଷ୍ଣବ, ବିହାର ଏଲ୍‌ଜେପି ନେତା ପଶୁପତି କୁମାର ପାରସ୍ , କିରନ୍ ରିଜିଜୁ, ପୂର୍ବତନ ପ୍ରଶାସକ ରାଜ୍ କୁମାର ସିଂହ, ହରଦୀପ ସିଂହ ପୁରୀ, ମନସୁଖ ଲକ୍ଷ୍ମୀଭାଇ ମାଣ୍ଡଭିଆ, ରାଜସ୍ଥାନରୁ ରାଜ୍ୟସଭା ସାଂସଦ ହୋଇଥିବା ଭୂପେନ୍ଦ୍ର ଯାଦବ, ରାଜ୍ୟସଭା ସଦସ୍ୟ ପୁରୁଷୋତ୍ତମ ରୂପାଲା, ସିକନ୍ଦରାବାଦରୁ ବିଜେପି ସାଂସଦ ହୋଇଥିବା ଗଙ୍ଗାପୁରମ୍ କ୍ରିଷନ୍ ରେଡ୍ଡୀ, ଅନୁରାଗ ଠାକୁର, ଉତ୍ତରପ୍ରଦେଶରୁ ବିଜେପି ସାଂସଦ ହୋଇଥିବା ପଙ୍କଜ ଚୌଧୁରୀ, ଉତ୍ତରପ୍ରଦେଶ ସାଂସଦ ଅନୁପ୍ରିୟା ପଟେଲ, ପ୍ରଫେସର ସତ୍ୟପାଲ ସିଂହ ବାଘେଲ, ରାଜୀବ ଚନ୍ଦ୍ର ଶେଖର, ଉତ୍ତରପ୍ରଦେଶ ସାଂସଦ ଭାନୁପ୍ରତାପ ସିଂହ ବର୍ମା, ସୁରଟରୁ ସାଂସଦ ହୋଇଥିବା ଦର୍ଶନା ବିକ୍ରମ ଜରଦୋଶ, ନୂଆଦିଲ୍ଲୀ ସାଂସଦ ମୀନାକ୍ଷୀ ଲେଖି, ଝାଡ଼ଖଣ୍ଡ ଲୋକସଭା ସାଂସଦ ଅନ୍ନପୂର୍ଣ୍ଣା ବେଦୀ, କର୍ଣ୍ଣାଟକ ଚନ୍ଦ୍ରଗୁନା ସାଂସଦ ଏ. ନାରାୟଣସ୍ୱାମୀ, ଉତ୍ତରାଖଣ୍ଡ ବିଜେପି ଅଧ୍ୟକ୍ଷ ଅଜୟ ଭଟ୍ଟ, ଉତ୍ତରପ୍ରଦେଶ ରାଜ୍ୟସଭା ସାଂସଦ ବି.ଏଲ୍ ବର୍ମା, ଭଗବନ୍ତ ଖୁବା, କପିଲ ପାଟିଲ, ତ୍ରିପୁରାର ପ୍ରତିମା ଭୌମିକ, ଡ. ସୁବାଷ ସରକାର, ମହାରାଷ୍ଟ୍ରର ପରିଚିତ ଡାକ୍ତର ଭାଗଓ୍ୱତ, ମଣିପୁର ସାଂସଦ ରାଜକୁମାର, ମହାରାଷ୍ଟ୍ର ସାଂସଦ ଡ.ଭାରତ ପ୍ରବୀଣ ପ୍ରଭାର, ମୟୂରଭଞ୍ଜ ସାଂସଦ ବିଶ୍ୱେଶ୍ୱର ଟୁଡୁ, ସାନ୍ତନୁ ଠାକୁର, ଗୁଜୁରାଟ ସାଂସଦ ଡ. ମୁଞ୍ଜପାରା ମହେନ୍ଦ୍ର ଭାଇ, ପଶ୍ଚିମବଙ୍ଗ ବିଜେପି ସାଂସଦ ଜନ୍ ବାର୍ଲା, ତାମିଲନାଡୁର ଡ. ଏଲ୍‌ ମୁର୍ଗନ, ନୀତିଶ ପାରମାଣିକ,    ଶପଥ ଗ୍ରହଣ କରିଛନ୍ତି । ସମସ୍ତଙ୍କୁ ମହାମହିମ ରାଷ୍ଟ୍ରପତି ରାମନାଥ କୋବିନ୍ଦ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି ।

’ରାଜ୍ୟର ୧୦ ଜିଲ୍ଲାରେ ପଜିଟିଭିଟି ହାର ୧ ପ୍ରତିଶତରୁ କମ୍ ରହିଛି: ଶିଶୁଙ୍କ ପାଇଁ ୩ ହଜାର ସ୍ୱତନ୍ତ୍ର ବେଡ୍ ବ୍ୟବସ୍ଥା’

ଭୁବନେଶ୍ୱର: ରାଜ୍ୟରେ କରୋନା ସ୍ଥିତି ଏବଂ ଏହାର ମୁକାବିଲା ସମ୍ପର୍କରେ ସୂଚନା ଦେଇଛନ୍ତି ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ଶାସନ ସଚିବ ପ୍ରଦୀପ୍ତ ମହାପାତ୍ର । ସେ କହିଛନ୍ତି,  ବର୍ତ୍ତମାନ ରାଜ୍ୟରେ ୨୮ ହଜାର ୧୫ ମାମଲା ସକ୍ରିୟ ରହିଛି । ଯେଉଁଥିରୁ ୮୦ ପ୍ରତିଶତ ସଂକ୍ରମିତ ସଂଘରୋଧ ହୋଇରହିଛନ୍ତି  । ବର୍ତ୍ତମାନ ୩.୪୯ ପ୍ରତିଶତ ପଜିଟିଭିଟି ରିପୋର୍ଟ ରହିଛି । ପୂର୍ବରୁ ୧୫.୪୭ ପ୍ରତିଶତ ପଜିଟିଭିଟି ହାର ରହୁଥିଲା ତାହା ଏବେ କମିବାରେ ଲାଗିଛି । ୩୦ ଜିଲ୍ଲାରୁ ୧୦ ଜିଲ୍ଲାରେ କୋଭିଡ ପଜିଟିଭିଟି ହାର ୧ ପ୍ରତିଶତରୁ କମ୍ ରହିଛି । ପାଖାପାଖି ୨୪ ଜିଲ୍ଲାରେ ପଜିଟିିଭିଟି ହାର ୫ ପ୍ରତିଶତ ତଳେ ରହିଥିବା ବେଳେ ଆଉ ୬ଟି ଜିଲ୍ଲାରେ ପଜିଟିଭିଟି ହାର ୫ପ୍ରତିଶତରୁ ସାମାନ୍ୟ ଉପରେ ରହିଛି । ସ୍ଥିତି ଆଗକୁ ଆହୁରି ସୁଧୁରିଯିବ ବୋଲି କହିଛନ୍ତି ଶ୍ରୀ ମହାପାତ୍ର ।

ଅପରପକ୍ଷରେ ରାଜ୍ୟରେ କରୋନା ରୋଗୀଙ୍କ ନିମନ୍ତେ ଉପଲବ୍ଧ ବେଡ୍ ସଂଖ୍ୟା ନେଇ ସେ କହିଛନ୍ତି ଯେ, ରାଜ୍ୟରେ ପାଖାପାଖି ୯୦ ପ୍ରତିଶତ ବେଡ୍‌ ଖାଲି ରହିଛି । ଜେନେରାଲ୍ ବେଡ୍‌ରେ ୧୩ ପ୍ରତିଶତ ରୋଗୀ ଚିକିତ୍ସିତ ହେଉଥିବା ବେଳେ ୬୦ ପ୍ରତିଶତ କ୍ରିଟିକାଲ  ବେଡ୍  ଖାଲି ରହିଛି । ରୋଗୀଙ୍କ ସଂଖ୍ୟା ବର୍ତ୍ତମାନ ବହୁତ କମ୍ ରହଛି । ତେବେ ଏହା ସତ୍ତ୍ୱେ ଆମେ ତୃତୀୟ ପ୍ରବାହ ନେଇ ସମ୍ପୂର୍ଣ୍ଣ ପ୍ରସ୍ତୁତ ରହିଛୁ । ସମ୍ପ୍ରତ ରାଜ୍ୟରେ ୧୪୦ ବ୍ଳାକ୍ ଫଙ୍ଗସ୍ ରୋଗୀ ରହିଛନ୍ତି । ସେମାନଙ୍କ ମଧ୍ୟରୁ ୨୦ ଜଣଙ୍କ ମୃତ୍ୟୁ ହୋଇଥିବା ବେଳେ ୨୧ ଜଣ ସମ୍ପୂର୍ଣ୍ଣ ସୁସ୍ଥ ହୋଇଗଲେଣି । ଏ ଲାଗି ମଧ୍ୟ ସବୁ ଜିଲ୍ଲା ହସ୍ପିଟାଲ, ବଡ଼ ବଡ଼ ମେଡିକାଲ କଲେଜ ହସ୍ପିଟାଲ ଓ ଘରୋଇ ହସ୍ପିଟାଲରେ ଚିକିତ୍ସା ବ୍ୟବସ୍ଥା କରାଯାଇଛି । ୧୫ଶହରୁ ୧୬ଶହ ଭାଏଲ ରହିଛ ।  ଏଥିସହିତ ଶିଶୁମାନଙ୍କ ପାଇଁ ମଧ୍ୟ ସ୍ୱତନ୍ତ୍ର ପ୍ରସ୍ତୁତି କରାଯାଇଛି । ପ୍ରାୟ ୩ହଜାର ସ୍ୱତନ୍ତ୍ର ବେଡର ବନ୍ଦୋବସ୍ତ କରାଯାଇଛି । ସେଥିରୁ ୬ଶହ ଆଇସିୟୁ ବେଡ୍ ରହିଛି ।

ଏଥିସହିତ ପଢ଼ନ୍ତୁ: ମୋଦି ମନ୍ତ୍ରିମଣ୍ଡଳ ସମ୍ପ୍ରସାରଣ : ୧୦ଙ୍କୁ ପ୍ରମୋଶନ, ୩୩ ନୂଆ ମୁହଁ

ମୋଦି କ୍ୟାବିନେଟ୍ ସମ୍ପ୍ରସାରଣ ପୂର୍ବରୁ ଇସ୍ତଫା ଦେଲେ ରବିଶଙ୍କର, ପ୍ରକାଶ ଜାଭଡେକର

ନୂଆଦିଲ୍ଲୀ: ମୋଦି ମନ୍ତ୍ରିମଣ୍ଡଳର ସମ୍ପ୍ରସାରଣର ମାତ୍ର କିଛି ସମୟ ପୂର୍ବରୁ ଆସିଛି ବଡ଼ ଖବର । କେନ୍ଦ୍ର ଆଇନ ମନ୍ତ୍ରୀ ରବିଶଙ୍କର ପ୍ରସାଦ ନିଜ ପଦରୁ ଇସ୍ତଫା ଦେଇଛନ୍ତି । ତାଙ୍କ ସହିତ ଇସ୍ତଫା ଦେଇଥିବା ଅନ୍ୟ ବରିଷ୍ଠ ମନ୍ତ୍ରୀ ହେଉଛନ୍ତି ପ୍ରକାଶ ଜାଭଡେକର । କୁହାଯାଉଛି ଯେ, ୨୦୨୪ ସାଧାରଣ ନିର୍ବାଚନ ଓ ଆଗାମୀ ବର୍ଷ ହେବାକୁ ଯାଉଥିବା ୫ ରାଜ୍ୟ ବିଧାନସଭା ନିର୍ବାଚନ ବେଳେ ସଂଗଠନକୁ ଅଧିକ ମଜବୁତ କରିବା ପାଇଁ ଦଳ ଏହି ଦୁଇ ନେତାଙ୍କ ସେବ ଚାହୁଁଛି । ତେବେ ସେମାନଙ୍କ ଇସ୍ତଫାର ପ୍ରକୃତ କାରଣ ଏପର୍ଯ୍ୟନ୍ତ ଜଣା ପଡିନାହିଁ ।
ସୂଚନାଯୋଗ୍ୟ ଯେ, ଆଜି ଦିନ ସାର ରାଜନୈତିକ ଗତିବିଧି ତୀବ୍ର ଥିଲା । ମନ୍ତ୍ରିମଣ୍ଡଳ ସମ୍ପ୍ରସାରଣ ଖବର ଭିତରେ କିଛି ମନ୍ତ୍ରୀଙ୍କ ଇସ୍ତଫା ଖବର ମଧ୍ୟ ଆସିବାରେ ଲାଗିଥିଲା । ଇସ୍ତଫା ଦେଇଥିବା ମନ୍ତ୍ରୀଙ୍କ ମଧ୍ୟରେ ଅଛନ୍ତି ଓଡ଼ିଶାର ପ୍ରତାପ ଚନ୍ଦ୍ର ଷଡ଼ଙ୍ଗୀ । ଷଡ଼ଙ୍ଗୀଙ୍କ ବ୍ୟତିତ ମାନବ ସମ୍ବଳ ବିକାଶ ମନ୍ତ୍ରୀ ଡ. ରମେଶ ପୋଖରିଆଲ୍,କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ଓ ବାବୁଲ ସୁପ୍ରିଓ ।
ବାବୁଲ ସୁପ୍ରିଓ ଇସ୍ତଫା ଦେବା ପରେ ଫେସବୁକରେ ଏବାବଦରେ ଘୋଷଣା କରିଥିଲେ । ଫେସବୁକ ପୋଷ୍ଟରୁ ଜଣା ପଡୁଛି ଯେ, ବାବୁଲ ସୁପ୍ରିୟୋ ଇସ୍ତଫାକୁ ନେଇ ଖୁସି ନାହାନ୍ତି । ସେ ନିଜ ପୋଷ୍ଟରେ ଲେଖିଥିଲେ ଯେ, ମୋତେ ଇସ୍ତଫା ଦେବା ପାଇଁ କୁହାଯାଇଥିଲା ଓ ମୁଁ ଦେଲି । ବିନା ନିଆଁରେ ଧୂଆଁ ଉଠେ ନାହଁ । ମୋ ଇସ୍ତଫା ଖବର ବାବଦରେ ଜାଣିବା ପାଇଁ ଅନେକ ସାମ୍ବାଦିକ ବନ୍ଧୁ ମୋତେ କଲ କରୁଥିଲେ । ସେମାନଙ୍କୁ ମୁଁ ଏହି ପୋଷ୍ଟ୍ ଦ୍ୱାରା ସୂଚନା ଦେଉଛି । ସୂଚନାଯୋଗ୍ୟ ଯେ, ମୋଦିଙ୍କ ମନ୍ତ୍ରିମଣ୍ଡଳରେ  ୩୩ ନୂଆ ମୁହଁ ସାମିଲ ହେବାକୁ ଯାଉଛନ୍ତି । ଅନ୍ୟପକ୍ଷରେ ୧୦ ଜଣ ମନ୍ତ୍ରୀଙ୍କର ପ୍ରମୋଶନ ହୋଇଛି ।