spot_img
Home Blog Page 5477

ବିଜେଡ଼ିର ବଡ଼ ନିଷ୍ପତ୍ତି; ନିର୍ବାଚନରେ ୨୭% ଓବିସି ପ୍ରାର୍ଥୀଙ୍କୁ ଟିକେଟ୍ ଦେବ ଦଳ

ଭୁବନେଶ୍ୱର: ପଛୁଆ ବର୍ଗଙ୍କୁ ପ୍ରାର୍ଥୀ କରିବ ବିଜୁ ଜନତା ଦଳ। ୨୭ ପ୍ରତିଶତ ପଛୁଆ ବର୍ଗ ପ୍ରାର୍ଥୀଙ୍କୁ ପଞ୍ଚାୟତ ଓ ଅନ୍ୟ ନିର୍ବାଚନରେ ଟିକଟ ଦେବ ଦଳ । ବିଜେଡି ସଭାପତି ନବୀନ ପଟ୍ଟନାୟକ ଏଭଳି ଐତିହାସିକ ନିଷ୍ପତ୍ତି ନେଇଛନ୍ତି । ଏନେଇ ଏକ ସାମ୍ବାଦିକ ସମ୍ମିଳନୀରେ ଦଳର ଦୁଇ ବରିଷ୍ଠ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଓ ଅରୁଣ ସାହୁ ସୂଚନା ଦେଇଛନ୍ତି।

ସୂଚନା ଅନୁଯାୟୀ, ଓବିସି ସଂଶୋଧନ ବିଲ ସଂସଦରେ ପାସ୍‌ ହୋଇଛି । ଏଣିକି ରାଜ୍ୟଗୁଡିକ ସାମାଜିକ ଏବଂ ଶିକ୍ଷାଗତ ପଛୁଆବର୍ଗ ବର୍ଗ ବା SEBC ତାଲିକା ପ୍ରସ୍ତୁତି ଆଗ ଭଳି କରିପାରିବେ। କେନ୍ଦ୍ରର ଓବିସି ତାଲିକା ଅନୁସାରେ ଅନ୍ୟାନ୍ୟ ପଛୁଆ ବର୍ଗର ପ୍ରାର୍ଥୀମାନେ କେନ୍ଦ୍ର ସରକାରଙ୍କ ଅଧୀନରେ ଥିବା ସରକାରୀ ଚାକିରି ଏବଂ ଶିକ୍ଷାନୁଷ୍ଠାନମାନଙ୍କରେ ନାମ ଲେଖାଇବାକୁ ସଂରକ୍ଷଣର ସୁବିଧା ପାଉଛନ୍ତି । ସେହିପରି ରାଜ୍ୟର SEBC ତାଲିକା ଅନୁସାରେ ସାମାଜିକ ଏବଂ ଶିକ୍ଷାଗତ ପଛୁଆ ବର୍ଗର ପ୍ରାର୍ଥୀମାନେ ରାଜ୍ୟସରକାରଙ୍କ ଅଧୀନରେ ଥିବା ସରକାରୀ ଚାକିରିରେ ସଂରକ୍ଷଣର ସୁବିଧା ପାଉଛନ୍ତି।

ରାଜ୍ୟ ପଛୁଆ ବର୍ଗ କମିଶନ ଆଇନ୍ ବଳରେ ରାଜ୍ୟ ସରକାର ରହିଁଲେ କୌଣସି ଯୋଗ୍ୟ ଜାତିକୁ SEBC ତାଲିକାରେ ଅନ୍ତର୍ଭୁକ୍ତ କରିପାରୁଛନ୍ତି । ଏପର୍ଯ୍ୟନ୍ତ ରାଜ୍ୟର ୨୦୯ ଜାତି ଓ ଉପଜାତି SEBC ତାଲିକାରେ ଅନ୍ତର୍ଭୁକ୍ତ ହୋଇଛନ୍ତି । ପୂର୍ବଭଳି ରାଜ୍ୟଗୁଡିକ SEBC ତାଲିକା ପ୍ରସ୍ତୁତ ପାଇଁ ସମ୍ବିଧାନ ସଂଶୋଧନରେ ବ୍ୟବସ୍ଥା ଥିବାରୁ ଲୋକସଭାରେ କୌଣସି ବିରୋଧ ଦଳ ଏହାକୁ ବିରୋଧ କରିନାହାନ୍ତି । ହେଲେ ସଂରକ୍ଷଣରେ ଥିବା ୫୦% ସୀମାକୁ ଉଠାଇବାକୁ ବିଜେଡି ସମେତ ସମସ୍ତ ବିରୋଧୀ ଦଳ କେନ୍ଦ୍ର ସରକାରଙ୍କ ପାଖରେ ପ୍ରସ୍ତାବ ରଖୁଛନ୍ତି। ସଂରକ୍ଷଣ ସୀମା ୫୦% ସୀମିତ ଥିବାରୁ SEBCଙ୍କୁ ମାତ୍ର 11.25 ପ୍ରତିଶତ ସଂରକ୍ଷଣ ମିଳୁଛି ।

Naveen Sanctioned 2 Crore For Covid Management In Bolangir Dist

ରାଜ୍ୟ ସରକାରଙ୍କ SEBC ଆଇନ୍ ୨୦୦୮ରେ ସାମାଜିକ ଏବଂ ଶିକ୍ଷାଗତ ଅନଗ୍ରସର ବର୍ଗ ପାଇଁ ୨୭% ସଂରକ୍ଷଣ ବ୍ୟବସ୍ଥା ରହିଛି । କିନ୍ତୁ, ବିଭିନ୍ନ ନ୍ୟାୟାଳୟର ଆଦେଶ ଦୃଷ୍ଟିରୁ ଉକ୍ତ ୨୭% ସଂରକ୍ଷଣ ବ୍ୟବସ୍ଥା କାର୍ଯ୍ୟକାରୀ ହୋଇପାରୁ ନାହିଁ । ଅନ୍ୟାନ୍ୟ ପଛୁଆ ବର୍ଗ ତଥା ସାମାଜିକ ଓ ଶିକ୍ଷାଗତ ପଛୁଆବର୍ଗଙ୍କ ସଠିକ୍ ପରିସଂଖ୍ୟାନ ଅଭାବରୁ ସର୍ବୋଚ୍ଚ ନ୍ୟାୟାଳୟ ସଂରକ୍ଷଣ ସୀମାକୁ ୫୦% ମଧ୍ୟରେ ସିମୀତ ରଖିବା ପାଇଁ ବାଧ୍ୟ କରୁଛନ୍ତି।

ତେଣୁ ପଛୁଆ ବର୍ଗଙ୍କର ସଂଖ୍ୟାର ସଠିକ୍ ଆକଳନ ପାଇଁ ଜାତିଭିତ୍ତିକ ଜନଗଣନା କରାଗଲେ ତାହାକୁ ଭିତ୍ତିକରି ୫୦%ରୁ ଅଧିକ ସଂରକ୍ଷଣ ବ୍ୟବସ୍ଥା କାର୍ଯ୍ୟକାରୀ କରିବାରେ ନ୍ୟାୟାଳୟ ମାନେ କୌଣସି ଅଙ୍କୁଶ ଲଗାଇ ପାରିବେ ନାହିଁ। ତେବେ ସରକାର କୌଣସି ଚୂଡ଼ାନ୍ତ ନିଷ୍ପରି ନେବା ପୂର୍ବରୁ ବିଜୁ ଜନତା ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ପଞ୍ଚାୟତିରାଜ ସଂସ୍କାର ଆଗାମୀ ତ୍ରିସ୍ତରୀୟ ନିର୍ବାଚନ ପାଇଁ SEBCଙ୍କ ପାଇଁ ଅତି କମ୍‌ରେ ୨୭% ଦଳୀୟ ପ୍ରାର୍ଥୀ ଘୋଷଣା କରିବା ପାଇଁ ଦଳ ନିଷ୍ପତ୍ତି ନେଇଛି। ଗତ ଲୋକସଭା ନିର୍ବାଚନରେ ୩୩ପ୍ରତିଶତ ମହିଳାଙ୍କୁ ପ୍ରାର୍ଥୀ କରିଥିଲା ଦଳ।

ଭାଙ୍ଗୁଛି ଆଫଗାନିସ୍ତାନ: ଆମେରିକା ବି ଡରିଲାଣି ତାଲିବାନଙ୍କୁ, ପଠାଇଲା ୪ହଜାର ସୈନିକ

କାବୁଲ: ଦିନକୁ ଦିନ ବିଗିଡ଼ି ଚାଲିଛି ଆଫଗାନିସ୍ତାନ ପରିସ୍ଥିତି। ନିର୍ବାଚିତ ସରକାର ଦେଶ ଉପରୁ ନିଜର ଅସ୍ତିତ୍ୱ ହରାଇ ଚାଲିଛନ୍ତି। ଆଫଗାନିସ୍ତାନର ସୈନ୍ୟମାନେ ଆଉ ତାଲିବାନ ସହ ଯୁଦ୍ଧ କରିବାକୁ ସମର୍ଥ ହେଉ ନାହାନ୍ତି। ପରିସ୍ଥିତି ଏପରି ହୋଇଛି ଯେ, ତାଲିବାନର ସଂଗଠିତ ଆକ୍ରମଣକୁ ଦେଖି ଆଫଗାନ ସେନା ଛତ୍ରଭଙ୍ଗ ଦେଉଛନ୍ତି।

ଅନେକ ସ୍ଥାନରେ ସୈନିକମାନେ ତାଲିବାନ ସହ ହାତ ମିଳାଇ ଆତଙ୍କବାଦୀ ହୋଇଯାଉଥିବା ନଜରକୁ ଆସିଛି। ଏପରି ମୁହୂର୍ତ୍ତରେ ଆଉ କାବୁଲ୍ ସୁରକ୍ଷିତ ନୁହେଁ ବୋଲି ସ୍ପଷ୍ଟ କରିସାରିଲାଣି ଯୁକ୍ତରାଷ୍ଟ୍ର ଆମେରିକା। ଏପରି କ୍ଷେତ୍ରରେ ଆଫଗାନିସ୍ତାନରେ ଥିବା ଆମେରିକାର ସୈନିକ ଏବଂ ନାଗରିକଙ୍କୁ ସୁରକ୍ଷିତ ଭାବେ ନିଜ ଦେଶକୁ ଫେରାଇ ଆଣିବା ଆମେରିକା ପାଇଁ ଏକ ଆହ୍ୱାନ ପାଲଟିଛି। ଏହି ମାସ ଶେଷ ସୁଦ୍ଧା ସୈନିକ ପ୍ରତ୍ୟାହାର ଶେଷ କରିବାକୁ ନିଷ୍ପତ୍ତି ନେଇଥିବା ଆମେରିକା ଆଫଗାନିସ୍ଥାନରେ ଥିବା ନିଜର ଦୂତାବାସରୁ କର୍ମଚାରୀ ଓ ସୈନିକଙ୍କୁ ପ୍ରତ୍ୟାହାର କରିବା ପାଇଁ ଆଜି ୪ ହଜାର ସୈନିକଙ୍କ ସମେତ ୩ ହଜାର ଜଳ ଜାହାଜ ପ୍ରେରଣ କରିଛି।

ଭାରତ ମଧ୍ୟ ଏହାର ଦୂତାବାସ ଚାଲୁ ରଖିଥିଲେ ମଧ୍ୟ ପ୍ଲାନ୍- ବି ପ୍ରସ୍ତୁତ ରଖିଛି। ଏଠାରେ ଥିବା ଦେଢ଼ ହଜାରରୁ ଅଧିକ ଅଧିବାସୀଙ୍କୁ ତୁରନ୍ତ ବିମାନ ଧରି ଭାରତ ଫେରିଯିବାକୁ ଆହ୍ୱାନ ଦେଇଛି ଭାରତ।

ସରକାର ଓ ବୈଦେଶିକ ଶକ୍ତିର ପ୍ରଭାବ କମିବା ହେତୁ ସୁନାମୀଠୁ ଦ୍ରୁତ ବେଗରେ ମାଡ଼ି ଚାଲିଚନ୍ତି ତାଲିବାନ ଆତଙ୍କୀ। ଏପରିକି ଶୁକ୍ରବାର ସନ୍ଧ୍ୟା ସୁଦ୍ଧା କାବୁଲ ସୀମା ବି ତାଲିବାନୀଙ୍କ ଅଧୀନସ୍ଥ ହୋଇପାରେ ବୋଲି ଆଶଙ୍କା ପ୍ରକାଶ ପାଇଛି। ସକାଳୁ ତାଲିମ ପ୍ରାପ୍ତ ତାଲିବାନ ଆତଙ୍କୀ ଆଫଗାନିସ୍ତାନର ଦ୍ବିତୀୟ ବୃହତ୍ତମ ସହର କାନ୍ଦାହାରକୁ ନିଜ କବଜାକୁ ନେଇଛନ୍ତି। କାନ୍ଦାହାର ଜେଲ ଭାଙ୍ଗି ରାଜନୀତିକ ବନ୍ଦୀଙ୍କୁ ମୁକ୍ତ କରିଛନ୍ତି। ଏହା ସହ ଗଜନୀ ସହର, ଲସ୍କରଗାହ ଓ ହେରାତ ସହରକୁ ମଧ୍ୟ ତାଲିବାନଙ୍କ କବ୍ଜାକୁ ଆସିଛି। ଗତ କିଛି ଦିନ ପୂର୍ବରୁ କାନ୍ଦାହାର ଜେଲ ଉପରେ ନଜର ପକାଇଥିଲେ ମଧ୍ୟ ସେଥିରେ ବିଫଳ ହୋଇଥିଲା ତାଲିବାନ । ହେଲେ ଏବେ ମିଶନରେ ସଫଳ ହୋଇଛି । ଯଦି ଏଭଳି ଭାବେ ତାଲିବାନ ଆତଙ୍କବାଦୀଙ୍କ ବର୍ବରତା ଜାରି ରୁହେ ଆସନ୍ତା ୯୦ ଦିନରୁ କମ୍ ସମୟ ମଧ୍ୟରେ ସମ୍ପୂର୍ଣ୍ଣ ଆଫଗାନିସ୍ତାନକୁ ତାଲିବାନ ନିଜ ଅକ୍ତିଆରକୁ ନେଇଯିବ ବୋଲି ପୂର୍ବାନୁମାନ କରିଛି ଆମେରିକାର ଗୁଇନ୍ଦା ସଂସ୍ଥା ।

ସେନା ଦୁର୍ବଳ ହେବାରୁ ଆଫଗାନିସ୍ତାନକୁ ଭାରତ ଦେଇଥିବା ଯୁଦ୍ଧ ବିମାନ MI-24କୁ ନିଜ ଅକ୍ତିଆରକୁ ନେଇଛି ତାଲିବାନ। ତାଲିବାନ ଆତଙ୍କୀ MI-24ଆଗରେ ଠିଆ ହୋଇ ଫଟୋ ସେୟାର କରିଛନ୍ତି । ୨୦୧୯ରେ ଭାରତ ଆଫଗାନିସ୍ତାନକୁ ଏହି ହେଲିକାପ୍ଟର ଗିଫ୍ଟ ଦେଇଥିଲା ।

ଏଭଳି ଶୋଚନୀୟ ପରିସ୍ଥିତିରେ ଆଫଗାନୀଙ୍କ ଅବସ୍ଥା କଥା କହିଲେ ନ ସରେ । ବୁଧବାର କାବୁଲର ଏକ ପାର୍କରେ ଶରଣ ନେଇଛନ୍ତି ଏକାଧିକ ପରିବାର । ସେଠାରେ ଶିବିରରେ ରହିଥିବା ଶରଣାର୍ଥୀଙ୍କ କହିବା ହେଉଛି ପ୍ରାୟ ୬ରୁ ୭ ଦିନ ପର୍ଯ୍ୟନ୍ତ ଚାଲିଥିବା ଲଢେଇ ଝଗଡ଼ା ମଧ୍ୟରେ ଏମାନେ ସେଠାରେ ବନ୍ଧା ପଡ଼ିଥିଲେ । ପିଇବା ପାଇଁ ନିଜ ପାଇଁ ଚା ପ୍ରସ୍ତୁତ କରିବା ପାଇଁ ମଧ୍ୟ ସେମାନଙ୍କୁ ଅନୁମତି ନଥିଲା । ସମସ୍ୟା ଏତେ ଥିଲାଯେ, ଶବ୍ଦରେ ମଧ୍ୟ ପ୍ରକାଶ କରି ହେବନି । ଯେମିତି ସେମିତି ହେଉ ସେଠାରୁ ଚାଲିଆସି ଜୀବନ ବଞ୍ଚାଇଥିବା କହିଛନ୍ତି ଜଣେ ଆଫଗାନ ମହିଳା ।

ତାଲିବାନରେ କ୍ରୁର ଶାସନକୁ ସହି ନ ପରି କୁନ୍ଦୁଜ, ତଖର ଓ ବଗଲାନରୁ ଅଧକରୁ ଅଧିକ ଲୋକ ମଙ୍ଗଳବାର କାବୁଲର ଏକ ପାର୍କରେ ଡେରା ପକାଇଥିବା ଭିଡ଼ିଓରେ ଦେଖବାକୁ ମିଳିଛି । ପୁରୁଷଙ୍କ ଠାରୁ ଆରମ୍ଭ କରି ମହିଳା ଏବଂ ଛୋଟ ପିଲାଙ୍କ ପର୍ଯ୍ୟନ୍ତ ଶିବିରରେ ସମସ୍ତଙ୍କୁ ଦେଖିବାକୁ ମିଳିଛି । ସହରରେ ଥିବା ଘର ଗୁଡ଼ିକରେ ଲୋକ ନୁହଁନ୍ତି ବରଂ ଅସ୍ତ୍ର ଶସ୍ତ୍ର ଭରପୂର ହେବାରେ ଲାଗିଛି । ନାଗରିକଙ୍କ ମୌଳିକ ଆବଶ୍ୟକତା ଯେମିତି ଏବେ ସ୍ୱପ୍ନ ପ୍ରାୟ।

କ୍ରାଇମବ୍ରାଞ୍ଚର STF କବଜାରେ ୩ ବ୍ରାଉନସୁଗାର ବେପାରୀ

ଭୁବନେଶ୍ୱର: କ୍ରାଇମବ୍ରାଞ୍ଚ ଏସଟିଏଫ୍ କବଜାରେ ୩ ବ୍ରାଉନସୁଗାର ବେପାରୀ ଧରା ପଡିଥିବା ବେଳେ ବିପୁଳ ପରିମାଣର ବ୍ରାଉନସୁଗାର ଜବତ କରାଯାଇଛି।

ରିପୋର୍ଟ ଅନୁଯାୟୀ, ଖୋର୍ଦ୍ଧାରୁ ପାଖାପାଖି ୧ କେଜି ୩୨ ଗ୍ରାମ ଓଜନର ବ୍ରାଉନ ସୁଗାର ଜବତ କରାଯାଇଛି। ଜବତ ବ୍ରାଉନ ସୁଗାରର ଆନୁମାନିକ ମୂଲ୍ୟ ୧ କୋଟି ୩୨ ଲକ୍ଷ ଟଙ୍କା ହେବ। ୨୦୨୦ ମସିହା ଅପେକ୍ଷା ଚଳିତ ବର୍ଷ ଅଧିକ ବ୍ରାଉନ ସୁଗାର ଜବତ କରାଯିବ ବୋଲି କହିଛନ୍ତି ଡିଜିପି ଅଭୟ। ଏପରିକି ସେ ଏସଟିଏଫ୍ ଓ କମିଶନରେଟ ପୋଲିସକୁ ପ୍ରଶଂସା କରିଛନ୍ତି। ଗତ ଏକ ବର୍ଷରେ ୩୬ କେଜି ବ୍ରାଉନ ସୁଗାର ଓ ୭୪ କୁଇଣ୍ଟାଲ ୩୮ କେଜି ଗଞ୍ଜେଇ ଜବତ ହୋଇଥିବା ବେଳେ ଶହେରୁ ଅଧିକ ବେପାରୀ ଗିରଫ ହୋଇଛନ୍ତି।

ସେହିପରି ସାଲିଆ ସାହିରୁ ୬ ହଜାର ଲିଟର ପୋଚ୍‌ ଓ ୫ ଶହ ଲିଟର ଦେଶୀ ମଦ ଜବତ କରାଯାଇଥିବା ସୂଚନା ମିଳିଛି। ଅବକାରୀ ସ୍କ୍ୱାଡ୍‌ ଓ ଭୁବନେଶ୍ୱର ନୟାପଲ୍ଲୀ ଥାନାର ମିଳିତ ଉଦ୍ୟମରେ ଚଢ଼ାଉ କରାଯାଇଥିବା ଜଣାପଡିଛି। ତେବେ ଏହି ଘଟଣାରେ ୮ଟି କେସ ରୁଜୁ ହେବା ସହ ୮ ଜଣଙ୍କୁ ଗିରଫ କରିଛି ପୋଲିସ।

ଅପରପକ୍ଷେ ଚଢ଼ାଉକୁ ଆହୁରି ବ୍ୟାପକ କରିବାକୁ ଅବକାରୀ ବିଭାଗ ନିଷ୍ପତ୍ତି ନେଇଥିବା ଜଣାପଡିଛି।

ଟିକାକରଣରେ ମାଇଲଖୁଣ୍ଟ, ଭୁବନେଶ୍ୱରରେ ଦିଆଗଲାଣି ୨୦ ଲକ୍ଷ ଭ୍ୟାକସିନ୍

ଭୁବନେଶ୍ୱର: ଭୁବନେଶ୍ୱରରେ ଦିଆଗଲଣି ୨୦ଲକ୍ଷ ଭ୍ୟାକସିନ୍ । ଟିକାକରଣରେ ଆଉ ଏକ ମାଇଲଖୁଣ୍ଟ ଅତିକ୍ରମ କରିଛି ବିଏମସି । ରାଜଧାନୀରେ ଗତକାଲି ୯ଟା ସୁଦ୍ଧା ମୋଟ ୨୦ ଲକ୍ଷ ୪ ହଜାର ୪୨୮ ଡୋଜ ଟିକା ଦିଆଯାଇଛି।

ସେଥି ମଧ୍ୟରୁ ୧୧ ଲକ୍ଷ ୧୯ ହଜାର ୬୨୮ ଜଣ ପ୍ରଥମ ଡୋଜ୍ ନେଇଥିବା ବେଳେ ୮ ଲକ୍ଷ ୮୪ ହଜାର ୯୪୬ ଜଣ ଉଭୟ ଡୋଜ ଟିକା ନେଇ ସାରିଥିବା ସୂଚନା ମିଳିଛି।

ଭାରତୀୟ ଷ୍ଟକ ମାର୍କେଟରେ ରେକର୍ଡ, ୫୫ ହଜାର ପାର୍ କଲା ସୂଚକାଙ୍କ

ମୁମ୍ବାଇ: ଆଜି ସେନସେକ୍ସ ଛୁଇଁଛି ୫୫ ହଜାର ଛୁଇଁଛି । ଯାହା ଫଳରେ ଷ୍ଟକ ମାର୍କେଟରେ ଉତ୍ସାହ ଦେଖିବାକୁ ମିଳିଛି। ସେପଟେ ନିଫ୍ଟି ବି ପାର୍ ହୋଇଛି ୧୬ ହଜାର ୪୦୦ ।

ବିଏସଇ ଓ ନିଫ୍ଟିରେ ଏହି ଉଲ୍ଲେଖନୀୟ ବୃଦ୍ଧି ଯୋଗୁ ନିବେଶକଙ୍କ ମଧ୍ୟରେ ଉତ୍ସାହ ଖେଳିଛି । ଆଜି ଷ୍ଟକମାର୍କେଟ ଖୋଲିବା ମାତ୍ରେ ବଡ ବଡ କମ୍ପାନୀଙ୍କ ସେୟାର କିଣାବିକା ଜୋର ଧରିଥିଲା । ଜାତୀୟ ପରିସଂଖ୍ୟାନ କାର୍ଯ୍ୟାଳୟରୁ ମିଳିଥିବା ତଥ୍ୟ ଅନୁସାରେ ଜଗତ ଜୁନରେ ଖୁଚୁରା ମୁଦ୍ରାସ୍ଫୀତି ୬.୨୬ ପ୍ରତିଶତ ଥିବାବେଳେ ଜୁଲାଇରେ ଏହି ହାର ୫.୫୯ ପ୍ରତିଶତକୁ ଖସିଥିଲା ।

ଏହାର ଫଳସ୍ୱରୂପ ଷ୍ଟକ ବଜାରରେ ସୂଚକାଙ୍କ ବୃଦ୍ଧି ପରିଲକ୍ଷିତ ହୋଇଛି । କରୋନା ସଂକଟ ସତ୍ୱେ ଷ୍ଟକ ମାର୍କେଟର ଏହି ଅଭିବୃଦ୍ଧି ଅର୍ଥନୀତି ଲାଗି ଶୁଭ ସୂଚନା ପ୍ରଦାନ କରିଛି । ଆଜି ବିଭିନ୍ନ ବ୍ୟାଙ୍କ ସମେତ ଷ୍ଟିଲ, ମେଡିସିନ, ମୋବାଇଲ ସେବାପ୍ରଦାନକାରୀ କମ୍ପାନୀଙ୍କ ସେୟାର ଅଧିକ କିଣାବିକା ହୋଇଥିବା ସୂଚନା ମିଳିଛି ।

Plymouth Firing: ଗୁଳିମାଡ଼ରେ ଆକ୍ରମଣକାରୀ ସହ ୬ ମୃତ

ଲଣ୍ଡନ: ଇଂଲଣ୍ଡର ପୁଲୱାମାଉଥ ସହରରେ ହୋଇଥିବା ଗୁଳିମାଡ଼ରେ ୬ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ବ୍ରିଟିଶ ଗୃହ ସଚିବଙ୍କ ସୂଚନା ଅନୁଯାୟୀ, ଦକ୍ଷିଣ ପଶ୍ଚିମ ଇଂଲଣ୍ଡର ପୁଲୱାମାଉଥରେ ଅଚାନକ ଗୁଳିମାଡ଼ ହୋଇଥିଲା, ଯେଉଁଥିରେ ଜଣେ ସନ୍ଦିଗ୍ଧ ଆକ୍ରମଣକାରୀଙ୍କ ସମେତ ଦୁଇ ମହିଳା ଏବଂ ତିନି ଜଣଙ୍କର ମୃତ୍ୟୁ ଘଟିଛି।

ପୋଲିସର ସୂଚନାନୁସାରେ, ଦକ୍ଷିଣ-ପଶ୍ଚିମ ଇଂଲଣ୍ଡର ଏକ ଅଞ୍ଚଳରେ ଜଣେ ବ୍ୟକ୍ତି ଅଚାନକ ଗୁଳିଚାଳନା କରିଥିଲା। ଏହି ଘଟଣାର ଠିକ୍ ପରେ ପରେ ପୋଲିସ ପରିସ୍ଥିତିକୁ ନିୟନ୍ତ୍ରଣାଧୀନ କରିବାରେ ସଫଳ ହୋଇଥିଲା ।

ଏହି ଗୁଳି ମାଡ଼ ଘଟଣା ଆତଙ୍କବାଦୀଙ୍କ ସହ ଜଡିତ କି ନୁହେଁ, ସେନେଇ ତଦନ୍ତ କରାଯିବ। ଏହି ଗୁଳି ମାଡ଼ରେ ଆକ୍ରମଣକାରୀଙ୍କ ସମେତ ଦୁଇ ମହିଳା ଏବଂ ଦୁଇ ଜଣ ପୁରୁଷଙ୍କର ମୃତ୍ୟୁ ଘଟିଥିବା ବେଳେ ଅନ୍ୟଜଣେ ଡାକ୍ତରଖାନାରେ ମୃତ୍ୟୁ ବରଣ କରିଥିବା ନେଇ ପୋଲିସ ସୁତ୍ରରୁ ପ୍ରକାଶ । ତେବେ ଏହି ଘଟଣା ପଛର କାରଣ କ’ଣ, ସେନେଇ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

ବ୍ରିଟେନର ଗୃହ ସଚିବ ପ୍ରୀତି ପଟେଲ ଏହି ଘଟଣାକୁ ଆଶ୍ଚର୍ଯ୍ୟଜନକ ବୋଲି କହିଛନ୍ତି । ଏଥିସହିତ ସେ ପୀଡ଼ିତ ମାନଙ୍କ ପ୍ରତି ଗଭୀର ସମବେଦନା ଜଣାଇଛନ୍ତି ।

ଦେଶରେ ଦିନକରେ ୪୦ ହଜାର ୧୨୦ କରୋନା ସଂକ୍ରମିତ ଚିହ୍ନଟ, ୫୮୫ ମୃତ

ନୂଆଦିଲ୍ଲୀ: ଦେଶରେ ଧିରେ ଧିରେ କରୋନା ସଂକ୍ରଣ କମିବାରେ ଲାଗିଛି। ଦେଶରେ ଦିନକରେ ୪୦ ହଜାର ୧୨୦ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଏନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି ।

ଗତ ୨୪ ଘଣ୍ଟାରେ ୪୨ ହଜାର ୨୯୫ ଆକ୍ରାନ୍ତ ସୁସ୍ଥ ହୋଇଥିବା ବେଳେ ୫୮୫ ଜଣଙ୍କ ଜୀବନ ନେଇଛି କିଲର କରୋନା। ଦେଶର ମୋଟ୍ ସଂକ୍ରମିତଙ୍କ ସଂଖ୍ୟା ୩ କୋଟି ୨୧ ଲକ୍ଷ ୧୭ ହଜାର ୮୨୬। ମୋଟ୍ ସୁସ୍ଥ ହେଲେଣି ୩ କୋଟି ୧୩ ଲକ୍ଷ ୦୨ ହଜାର ୩୪୫। ମୋଟ୍ ମୃତ୍ୟୁ ସଂଖ୍ୟା ୪ ଲକ୍ଷ ୩୦ ହଜାର ୨୫୪ ରହିଛି।

ତେବେ ଦେଶରେ କରୋନା ଆକ୍ଟିଭ କେସ୍ ୩ ଲକ୍ଷ ୮୫ ହଜାର ୨୨୭ ଜଣ ରହିଛନ୍ତି। ସେହିପରି ଦେଶରେ ମୋଟ୍ ଭ୍ୟାକ୍ସିନେସନ ୫୨ କୋଟି ୯୫ ଲକ୍ଷ ୮୨ ହଜାର ୯୫୬ରେ ପହଞ୍ଚିଛି । ଗତ ୨୪ ଘଣ୍ଟାରେ ୫୭ ଲକ୍ଷ ୩୧ ହଜାର ୫୭୪ ଜଣଙ୍କୁ ଟିକାକରଣ କରାଯାଇଛି।

ରାଜ୍ୟରେ ଆଉ ୧୧୯୩ ଜଣ କରୋନା ସଂକ୍ରମିତ ଚିହ୍ନଟ

ଭୁବନେଶ୍ୱର: ରାଜ୍ୟରେ ଆଉ ୧ ହଜାର ୧୯୩ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ୨୮ ଜିଲ୍ଲା ଓ ଷ୍ଟେଟପୁଲରୁ ସଂକ୍ରମିତ ଚିହ୍ନଟ ହୋଇଥିବା ବେଳେ କିଛି ଜିଲ୍ଲାରେ ୫ ତଳେ ରହିଛି ଦୈନିକ ସଂକ୍ରମଣ।

Corona Lambda Variant Is More Dangerous Than Delta Malaysia Warns

ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗର ରିପୋର୍ଟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ କ୍ୱାରେଣ୍ଟାଇନ୍‌ରୁ ୬୯୫, ଲୋକାଲ କେସ୍ ୪୯୮ ଚିହ୍ନଟ ହୋଇଛି । ୨୪ ଘଣ୍ଟାରେ ସୁସ୍ଥ ହୋଇଛନ୍ତି ୧ ହଜାର ୧୭୭। ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରୁ ଖୋର୍ଦ୍ଧାରୁ ସର୍ବାଧିକ ୪୨୫ ଜଣ ଥିବା ବେଳେ, କଟକରୁ ୧୬୧ ଓ ଷ୍ଟେଟ୍ ପୁଲରୁ ୯୬ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ସେହିପରି ବାଲେଶ୍ବରରୁ ୬୯ ଜଣ ଥିବା ବେଳେ, ଜଗତସିଂହପୁରରୁ ୫୬, ଯାଜପୁରରୁ ୫୦, ଅନୁଗୁଳରୁ ୪୯, ନୟାଗଡ଼ରୁ ୩୯, ପୁରୀରୁ ୩୪, ଢେଙ୍କାନାଳରୁ ୩୧, କେନ୍ଦ୍ରାପଡ଼ାରୁ ୨୯, ମୟୂରଭଞ୍ଜରୁ ୨୨, କେନ୍ଦୁଝରରୁ ୨୦, ଭଦ୍ରକରୁ ୧୫ ଜଣ ଆକ୍ରାନ୍ତ ଅଛନ୍ତି । ସେହିପରି ଗଞ୍ଜାମରୁ ୧୩ ଜଣ ଥିବା ବେଳେ, ସମ୍ବଲପୁରରୁ ୧୧, ଝାରସୁଗୁଡ଼ା, ସୁନ୍ଦରଗଡ଼ ଓ ବରଗଡ଼ରୁ ୧୦ ଜଣ ଲେଖାଏଁ, ବଲାଙ୍ଗୀର ଓ ରାୟଗଡ଼ାରୁ ୯ ଜଣ ଲେଖାଏଁ, ଦେବଗଡ଼ରୁ ୫, କନ୍ଧମାଳ, କୋରାପୁଟରୁ ୪ ଜଣ ଲେଖାଏଁ, ମାଲକାନଗିରି ଓ ବୌଦ୍ଧରୁ ୩ ଜଣ ଲେଖାଏଁ, ଗଜପତି, ନବରଙ୍ଗପୁର ଓ ନୂଆପଡ଼ାରୁ ୨ ଜଣ ଲେଖାଏଁ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ତେବେ ଏଯାବତ୍ ରାଜ୍ୟରେ ମୋଟ୍ ସଂକ୍ରମିତଙ୍କ ସଂଖ୍ୟା ୯ ଲକ୍ଷ ୯୨ ହଜାର ୩୭୫ରେ ପହଞ୍ଚିଛି । ସେହିପରି ଆକ୍ଟିଭ କେସ୍ ୧୦ ହଜାର ୮୦୯  ରହିଥିବା ବେଳେ ମୋଟ୍ ସୁସ୍ଥ ହେଲେଣି ୯ ଲକ୍ଷ ୭୪ ହଜାର ୭୫୬।

ମାନସିକ ଭାରସାମ୍ୟ ହରାଇଥିବା ବ୍ୟକ୍ତିଙ୍କ ବୟାନ କୋର୍ଟରେ କାଏମ ରହିବ: ସୁପ୍ରିମକୋର୍ଟ

ନୂଆଦିଲ୍ଲୀ: ଏଣିକି ମାନସିକ ଭାରସାମ୍ୟ ହରାଇଥିବା ବ୍ୟକ୍ତିଙ୍କ ବୟାନ ମଧ୍ୟ କୋର୍ଟରେ କାଏମ ରହିବ । ଏକ ମାମଲାର ଶୁଣାଣି କରି ଏଭଳି ରାୟ ଦେଇଛନ୍ତି ସୁପ୍ରିମକୋର୍ଟ ।

ସୂଚନା ଅନୁଯାୟୀ, ଉତ୍ତରାଖଣ୍ଡର ଜଣେ ମହିଳା ଦୁଷ୍କର୍ମ ଘଟଣାକୁ ନେଇ ବୟାନ ଦେଇଥିଲେ। ସେ ଅନେକ କଥା ଭୁଲି ଯାଇଥିବା ବେଳେ ସେ ୭୦ ପ୍ରତିଶତ ଭିନ୍ନକ୍ଷମ ଥିବା ଜଣାପଡିଥିଲା। ଏଭଳି ସ୍ଥଳେ ତାଙ୍କ ବୟାନକୁ ଗ୍ରହଣ କରାଯାଇପାରିବ ନାହିଁ ବୋଲି ପ୍ରତିପକ୍ଷ ଓକିଲ ଯୁକ୍ତି ବାଢିଥିବା ବେଳେ ସୁପ୍ରିମକୋର୍ଟ ଦେଇଛନ୍ତି ଏହି ଗୁରୁତ୍ୱପୂର୍ଣ୍ଣ ରାୟ।

ଏଭଳି ଘଟଣାରେ ମାନସିକ ଭାରସାମ୍ୟ ହରାଇଥିବା ବ୍ୟକ୍ତିଙ୍କର ବୟାନ ବି କୋର୍ଟରେ ଗ୍ରହଣ କରାଯିବ ବୋଲି ବିଚାରପତି କହିଛନ୍ତି । ୨୦୧୫ ସେପ୍ଟେମ୍ବରରେ ପୀଡିତା ଦୁଷ୍କର୍ମର ଶୀକାର ହୋଇଥିଲେ । ଘଟଣାରେ ପୂର୍ବରୁ ଅଭିଯୁକ୍ତକୁ ୧୦ ବର୍ଷ ଜେଲଦଣ୍ଡ ହୋଇଥିବା ବେଳେ ରାୟକୁ ଚ୍ୟାଲେଞ୍ଜ କରି ଅଭିଯୁକ୍ତ କୋର୍ଟରେ ଆବେଦନ କରିଥିଲେ ।

ତେବେ ଏହି ମାମଲାର ଶୁଣାଣି ବେଳେ ମହାତ୍ମା ଗାନ୍ଧୀ ଓ ଲାଲବାହାଦୁର ଶାସ୍ତ୍ରୀଙ୍କ ଫଟୋ ଦେଖି ଚିହ୍ନିବା ପାଇଁ ପୀଡିତାଙ୍କ କୁହାଯାଇଥିଲା । ଯାହା ଫଳରେ  ତାଙ୍କର ମାନସିକ କ୍ଷମତାକୁ ପରୀକ୍ଷା କରାଯାଇଥିଲା ।

କାଲି ପ୍ରକାଶ ପାଇବ +୨ କଳା ରେଜଲ୍ଟ

ଭୁବନେଶ୍ୱର: ଆସନ୍ତାକାଲି ପ୍ରକାଶ ପାଇବ ଯୁକ୍ତ ଦୁଇ କଳା ରେଜଲ୍ଟ। କଳା ସହିତ ଧନ୍ଦା ମୂଳକ ପରୀକ୍ଷା ଫଳ ମଧ୍ୟ ପ୍ରକାଶିତ ହେବ ବୋଲି ଗଣଶିକ୍ଷା ବିଭାଗ ତରଫରୁ ସୂଚନା ମିଳିଛି । କଳା ଓ ଧନ୍ଦାମୂଳକ ବିଭାଗରେ ରାଜ୍ୟର ମୋଟ ୨ ଲକ୍ଷ ୨୧ ହଜାର ୮୬୭ଜଣ ଛାତ୍ରଛାତ୍ରୀ ପରୀକ୍ଷା ଦେଇଛନ୍ତି ।

ତେବେ ପୂର୍ବରୁ ଗତ ଜୁଲାଇ ୩୧ରେ ବିଜ୍ଞାନ ଓ ବାଣିଜ୍ୟ ଫଳ ପ୍ରକାଶ ପାଇଥିଲା। ଦୁଇ ସପ୍ତାହ ମଧ୍ୟରେ କଳା ଫଳ ପ୍ରକାଶ ହେବ ବୋଲି ବିଭାଗ ପକ୍ଷରୁ ଦର୍ଶାଯାଇଥିଲା । ଚଳିତ ବର୍ଷ ବିଜ୍ଞାନ ଓ ବାଣିଜ୍ୟରେ ରେକର୍ଡ ପାସ ହାର ହୋଇଛି ।

ସେହିପରି ବିଜ୍ଞାନରେ ୯୯.୮୮ ପ୍ରତିଶତ ପିଲା ପାସ କରିଥିବା ବେଳେ ବାଣିଜ୍ୟରେ ୯୯.୫୯ ପ୍ରତିଶତ ଛାତ୍ରଛାତ୍ରୀ ପାସ୍ କରିଥିଲେ । କରୋନା ପାଇଁ ବିନା ପରୀକ୍ଷାରେ ଏଥର ରେଜଲ୍ଟ ପ୍ରକାଶ ପାଇଛି।