spot_img
Home Blog Page 5476

ଜଗତସିଂହପୁର ଜିଲ୍ଲାରେ ୨୧୫ କୋଟି ଟଙ୍କାର ବିଭିନ୍ନ ଉନ୍ନୟନ ମୂଳକ ପ୍ରକଳ୍ପର ଶୁଭାରମ୍ଭ କଲେ ମୁଖ୍ୟମନ୍ତ୍ରୀ

ଭୁବନେଶ୍ୱର: ଜଗତସିଂହପୁର ହେଉଛି ଓଡିଶାର ବିକାଶର ମୁଖ୍ୟ ଦ୍ୱାର । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଜଗତସିଂହପୁର ଜିଲ୍ଲାରେ ୨୧୫ କୋଟି ଟଙ୍କାର ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଶୁଭାରମ୍ଭ କରିବା ଅବସରରେ ଏହା କହିଛନ୍ତି । ସେ ଆହୁରି କହିଛନ୍ତି ଯେ, ଜଗତସିଂହପୁର ଜିଲ୍ଲା ଓଡିଶାର ଏକ ଆଗୁଆ ଜିଲ୍ଲା । ଶିଳ୍ପ, କୃଷି ସବୁଥିରେ ଜଗତସିଂହପୁର ଜିଲ୍ଲାର ସୁନାମ ରହିଛି । ଜଗତସିଂହପୁର ଜିଲ୍ଲାରୁ ହିଁ ବିଜୁ ବାବୁ ଓଡିଶାର ବିକାଶ ଯାତ୍ରାର ଆରମ୍ଭ କରିଥିଲେ । ପାରାଦୀପ ବନ୍ଦର ଆଜି ଦେଶର ମୁଖ୍ୟ ବନ୍ଦର ମାନଙ୍କ ମଧ୍ୟରେ ସ୍ଥାନ ପାଇଛି । ଶିଳ୍ପ ନଗରୀ ଭାବରେ ମଧ୍ୟ ପାରାଦୀପର ଗୁରତ୍ୱ ବଢିଛି ।

ମୁଖ୍ୟମନ୍ତ୍ରୀ କହିଲେ ଯେ ଆଜିର ପ୍ରକଳ୍ପରେ ଶିକ୍ଷା, ସ୍ୱାସ୍ଥ୍ୟ, କୃଷି, ଯୋଗାଯୋଗ, ଜଳସେଚନ, ପର୍ଯ୍ୟଟନ ଆଦି ବିଭିନ୍ନ କ୍ଷେତ୍ରର ବିକାଶ ଉପରେ ଏଥିରେ ଗୁରୁତ୍ୱ ଦିଆଯାଇଛି। ଗାଁ ଠାରୁ ସହର ପର୍ଯ୍ୟନ୍ତ ସବୁ ଅଞ୍ଚଳର ବିକାଶ ଉପରେ ଗୁରୁତ୍ୱ ଦିଆଯାଇଛି ବୋଲି ସେ କହିଥିଲେ । କରୋନା ମହାମାରୀ ଉପରେ ଆଲୋକପାତ କରି ମୁଖ୍ୟମନ୍ତ୍ରୀ କହିଲେ ଯେ, ମହାମାରୀ ଯୋଗୁ ଗତ ଏକ ବର୍ଷରୁ ଅଧିକ ସମୟ ଧରି ଆମେ ସମସ୍ତେ ପ୍ରଭାବିତ ହୋଇଛେ । ବହୁ ଲୋକଙ୍କ ରୋଜଗାର ଉପରେ ପ୍ରଭାବ ପଡିଛି । ତେଣୁ ରାଜ୍ୟ ସରକାର ଗରିବ ଲୋକ, ଚାଷୀ, ଶ୍ରମିକ, ମା ସମସ୍ତଙ୍କ ପାଇଁ ୨୦୦୦ କୋଟିରୁ ଅଧିକ ଟଙ୍କାର ସହାୟତା ଯୋଗାଇ ଦେଇଛନ୍ତି ।

ଆଜି ଜଗତସିଂହପୁର ଜିଲ୍ଲାରେ ଲିକ୍ୟୁଡ୍ ଅକ୍ସିଜେନ୍ ପ୍ଳାଣ୍ଟ୍ ଉଦ୍‌ଘାଟିତ ହେଲା ବୋଲି ପ୍ରକାଶ କରି ସେ କହିଲେ ଯେ କୋଭିଡ ସମୟରେ ଓଡିଶା ଦେଶର ୧୭ଟି ରାଜ୍ୟକୁ ମେଡିକାଲ ଅକ୍‌ସିଜେନ ଯୋଗାଇ ଦେଇଥିଲା।

ମୁଖ୍ୟମନ୍ତ୍ରୀ କହିଥିଲେ ଯେ ସାଧାରଣ ଲୋକର ଖୁସି ମୋ ପାଇଁ ସବୁଠାରୁ ବଡ ସନ୍ତୋଷ । ଲୋକଙ୍କ ପାଇଁ ଆମେ କାମ କରୁଛୁ ଓ କରିଚାଲିବୁ । ସେ କୃଷକ ମାନଙ୍କ କଲ୍ୟାଣ ହେଉ ବା ମା’ ମାନଙ୍କ ସଶକ୍ତିକରଣ ବା କ୍ରୀଡା ପ୍ରତିଭାର ବିକାଶ – ଏ ସବୁ କାର୍ଯ୍ୟକ୍ରମର ଲକ୍ଷ୍ୟ ହେଉଛି ଓଡିଶା ପାଇଁ ଏକ ନୂଆ ପରିଚୟ ସୃଷ୍ଟି କରିବା । ଅନେକ କ୍ଷେତ୍ରରେ ଓଡିଶା ଆଜି ଅନ୍ୟ ମାନଙ୍କ ପାଇଁ ଆଦର୍ଶ ହୋଇପାରିଛି । ଏହି ଧାରାକୁ ଆମେ ସମସ୍ତେ ମିଶି ଆଗକୁ ନେବା ଓ ଓଡିଶାର ଗୌରବକୁ ନୂତନ ଶିଖରରେ ପହଞ୍ଚାଇବା ପାଇଁ ସେ ଆହ୍ୱାନ ଦେଇଥିଲେ ।

କାର୍ଯ୍ୟକ୍ରମରେ ଯୋଗ ଦେଇ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ ଓ ଜଳସମ୍ପଦ ବିକାଶ, ସୂଚନା ଓ ଲୋକସମ୍ପର୍କ ମନ୍ତ୍ରୀ ରଘୁନନ୍ଦନ ଦାସ ଜଗତସିଂହପୁରର ବିଭିନ୍ନ ପ୍ରକଳ୍ପ ପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଥିଲେ । ମୁଖ୍ୟମନ୍ତ୍ରୀଙ୍କର ଦୂରଦୃଷ୍ଟିସମ୍ପନ୍ନ ନେତୃତ୍ୱ ଯୋଗୁଁ ଆଜି ଓଡିଶା ମହିଳା ସଶକ୍ତିକରଣଠାରୁ ଆରମ୍ଭ କରି କ୍ରୀଡାର ବିକାଶ ପର୍ଯ୍ୟନ୍ତ ଏବଂ ବିଭିନ୍ନ କଲ୍ୟାଣ କାର୍ଯ୍ୟକ୍ରମ କ୍ଷେତ୍ରରେ ସାରା ଦେଶ ପାଇଁ ଆଦର୍ଶ ହୋଇପାରିଛି ବୋଲି ସେମାନେ କହିଥିଲେ ।

ଏଥିସହିତ ପଢ଼ନ୍ତୁ: ବରଗଡ଼ରେ ନିର୍ମାଣ ହେବ କ୍ୟାନସର କେୟାର ସେଣ୍ଟର

ଏହି କାର୍ଯ୍ୟକ୍ରମରେ ଜଗତସିଂହପୁର ସାଂସଦ ଡାକ୍ତର ରାଜଶ୍ରୀ ମଲ୍ଲିକ, ତିର୍ତ୍ତୋଲ ବିଧାୟକ ବିଜୟ ଶଙ୍କର ଦାସ, ପାରାଦୀପ ବିଧାୟକ ସମ୍ବିତ ରାଉତରାୟ ପ୍ରମୁଖ ସେମାନଙ୍କର ବକ୍ତବ୍ୟ ରଖି ଓଡିଶାର ସର୍ବାଙ୍ଗୀନ ଉନ୍ନତି ପାଇଁ ମୁଖ୍ୟମନ୍ତ୍ରୀଙ୍କ ପ୍ରତି କୃତଜ୍ଞତା ପ୍ରକାଶ କରିଥିଲେ । ମୁଖ୍ୟମନ୍ତ୍ରୀଙ୍କ ସଚିବ (୫ ଟି) ଭି.କେ. ପାଣ୍ଡିଆନ କାର୍ଯ୍ୟକ୍ରମ ସଞ୍ଚାଳନ କରିଥିଲେ ।

ଆଜିର କାର୍ଯ୍ୟକ୍ରମରେ ବିଜୁ ସେତୁ ଯୋଜନାରେ ବୋରିକିନା-ସୁଙ୍ଗୁଡା ରାସ୍ତାର ସ୍ଥାନୀୟ ନାଳ ଉପରେ ସେତୁ, ପାଇକା ନଦୀ ଉପରେ ଲଙ୍କାପଡାଠାରେ ଏକ ଉଚ୍ଚସ୍ତରୀୟ ସେତୁ, ମା ଶାରଳାଙ୍କ ମନ୍ଦିର ନିକଟରେ ମାର୍କେଟ କମ୍ପ୍ଲେକ୍ସ, ପାରାଦୀପ ସରକାରୀ ଶିଳ୍ପ ତାଲିମ ଅନୁଷ୍ଠାନ ଏବଂ ପାରାଦୀପ କୋଭିଡ ଚିକିତ୍ସାଳୟରେ ଚାପ ଅବଶୋଷଣ ପ୍ରଣାଳୀରେ ମେଡିକାଲ ଅକ୍ସିଜେନ ଉତ୍ପାଦନ ଓ ବଣ୍ଟନ ଆଦି ବିଭିନ୍ନ ପ୍ରକଳ୍ପ ଉଦ୍‌ଘାଟିତ ହେବା ସହିତ ଅନେକ ପ୍ରକଳ୍ପ ପାଇଁ ଭିତ୍ତି ପ୍ରସ୍ତର ରଖାଯାଇଥିଲା ।

ଏଥିସହିତ ପଢ଼ନ୍ତୁ: ବୁଣାକାରଙ୍କ ପାଇଁ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ପ୍ୟାକେଜ; ବିନା ସୁଧରେ ମିଳିବ ୫୦ ହଜାର ଟଙ୍କା ଯାଏଁ ଋଣ

ପ୍ରଥମ ଇନିଂସରେ ୩୬୪ରନ୍‌ରେ ଭାରତ ଅଲ୍‌ଆଉଟ: ଇଂଲଣ୍ଡର ବ୍ୟାଟିଂ ଜାରି

ଲଣ୍ଡନ: ଐତିହାସିକ ଲର୍ଡସ୍ ଗ୍ରାଉଣ୍ଡରେ ଖେଳାଯାଉଥିବା ଭାରତ- ଇଂଲଣ୍ଡ ଟେଷ୍ଟ ସିରିଜ୍ ଦ୍ୱିତୀୟ ମ୍ୟାଚ୍‌ ଭଲ ପ୍ରଦର୍ଶନ କରିଛି ଟିମ୍ ଇଣ୍ଡିଆ । ପ୍ରଥମ ଇଂନିସରେ ସମସ୍ତ ଓ୍ୱିକେଟ ହରାଇ ୩୬୪ ରନ୍ କରିବାରେ ସକ୍ଷମ ହୋଇଛି ଭ୍ରମଣକାରୀ ଦଳ । ଭାରତୀୟ ଟିମ୍ ମୋଟ ୧୨୧.୧ ଓଭର ବ୍ୟାଟିଂ କରି ଏହି ସ୍କୋର କରିଥିବା ବେଳେ ଦଳ ପକ୍ଷରୁ କେଏଲ୍ ରାହୁଲ ସର୍ବାଧିକ ୧୨୯ ରନ୍ କରିଛନ୍ତି ।

ଇଂଲଣ୍ଡ ଅଧିନାୟକ ଜୋଏ ରୁଟ୍ ଟସ୍ ଜିତି ଭାରତୀୟ ଦଳକୁ ପ୍ରଥମେ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ । ଦଳ ପକ୍ଷରୁ ମଇଦାନ ଓହ୍ଲାଇ ଥିବା ଦୁଇ ଓପନର ରୋହିତ  ଓ ରାହୁଲ ଭଲ ଆରମ୍ଭ କରି ଶତକୀୟ ଇନିଂସ ଖେଳିଥିଲେ । ଦଳୀୟ ସ୍କୋର ୧୨୬ ରନ୍ ହୋଇଥିବା ବେଳେ ୮୩ ରନ୍‌ର ବ୍ୟକ୍ତିଗତ ସ୍କୋରରେ ଜେମ୍ସ ଆଣ୍ଡ୍ରସନ୍ ବଲ୍‌ରେ କ୍ଳିନ୍ ବୋଲ୍ଡ ହୋଇଥଲେ । ଏହାପରେ ପୂଜାରା ରାହୁଲଙ୍କ ସାଥ୍‌ ଦେବା ପାଇଁ କ୍ରିଜକୁ ଆସିଥିଲେ। ହେଲେ ବିଶେଷ କିଛି କରି ପାରି ନଥିଲେ। ମାତ୍ର ୯ ରନ୍‌ କରି ପ୍ୟାଭିଲିଅନ୍‌ ଫେରିଥିଲେ ପୂଜରା। ଆଣ୍ଡରସନ୍‌ହିଁ ପୂଜାରାଙ୍କୁ ଆଉଟ୍‌ କରି ପ୍ୟାଭଲିଅନ୍‌ ପଠାଇଥିଲୋ।

ଏହାପରେ ଟିମ୍‌ ଇଣ୍ଡିଆ ଅଧିନାୟକ ବିରାଟ କୋହଲି ରାହୁଲଙ୍କ ସାଥ୍‌ ଦେଇଥିଲେ। ଦୁହେଁ ମିଶି ଦଳୀୟ ସ୍କୋରକୁ ୨୦୦ ପାର୍‌ କରାଇଥିଲେ। ଦଳୀୟ ସ୍କୋର ୨୬୭ ହେଇଥିବା ବେଳେ ଭାରତୀୟ ଦଳକୁ ଲାଗିଥିଲା ତୃତୀୟ ଝଟକା। ବିରାଟ ମାତ୍ର ୪୨ ରନ୍‌ କରି ରବିନସନଙ୍କ ଶିକାର ହୋଇଥିଲେ। ଏହାପରେ ରାହାଣେ ରାହୁଲଙ୍କ ସାଥ୍‌ ଦେବା ପାଇଁ କ୍ରିଜକୁ ଆସିଥିଲେ।  ପ୍ରଥମ ଦିନର ଖେଳ ଶେଷ ବେଳକୁ ଟିମ୍‌ ଇଣ୍ଡିଆ ୩ ଓ୍ୱିକେଟ ହରାଇ ୨୭୬ ରନ୍‌ ସ୍କୋର କରିଥିଲା।

ତେବେ ଦ୍ୱିତୀୟ ଦିନର ଖେଳ ଆରମ୍ଭ ବେଳକୁ ଟିମ୍ ଇଣ୍ଡିଆକୁ ଲାଗିଥିଲା ଡବଲ ଝଟକା । ମାତ୍ର ୪ରନ୍‌ରେ ୨ ଓ୍ୱିକେଟ ହରାଇଥିଲା ଦଳ । ଓପନିଂ ବ୍ୟାଟ୍ସମ୍ୟାନ୍ କେଏଲ୍ ରାହୁଲ ୧୨୯ ରନ୍‌ର ବ୍ୟକ୍ତିଗତ ସ୍କୋରରେ ରବିନସନ୍‌ଙ୍କ ଶିକାର ହୋଇଥିଲେ । ଏହା ପରେ ଅନ୍ୟ କୌଣସି ବ୍ୟାଟ୍ସମ୍ୟାନ୍ ସେଭଳି କୌଣସି ଭଲ ସ୍କୋର କରିପାରିନଥିବା ବେଳେ ରବିନ୍ଦ୍ର ଜାଡେଜା ଶେଷ ଆଡ଼କୁ ଲଢ଼ୁଆ ୪୦ ରନ୍ କରିଥିଲେ । ବର୍ତ୍ତମାନ ଖବର ଲେଖା ହେବା ବେଳକୁ ଇଂଲଣ୍ଡ ଦଳ ବିନା କୌଣସି ଓ୍ୱିକେଟ ହରାଇ ୧୪ ରନ୍ କରିବାରେ ସକ୍ଷମ ହୋଇଛି ।

ଲୁପ୍ତ ହେବାକୁ ବସିଛି ଐତିହାସିକ ପାଇକଙ୍କ ସ୍ମୃତି

ଖୋର୍ଦ୍ଧା: ମାଟିରେ ମିଶିବ ଭାରତର ଶେଷ ସ୍ୱାଧୀନ ଦୁର୍ଗ । ରକ୍ଷଣାବେକ୍ଷଣ ଅଭାବରୁ ଲୁପ୍ତ ହେବାକୁ ବସିଛି ଖୋର୍ଦ୍ଧାର ଐତିହାସିକ ପାଇକଙ୍କ ସ୍ମୃତି । ଖୋଲା ଆକାଶ ତଳେ ପଡିଛି ସଂଗ୍ରାମୀଙ୍କ ପ୍ରତିମୂର୍ତ୍ତି । ଦେଶ ସ୍ୱାଧୀନ ହେବାକୁ ୭୫ ବର୍ଷ ବିତିଥିବାବେଳେ ଏହି ଐତିହାସିକ ଦୁର୍ଗର ଏପରି ଅବସ୍ଥା ଏବେ ସମସ୍ତଙ୍କୁ ବ୍ୟଥିତ କରିଛି ।

ବୀରଙ୍କ ମାଟି, ଖୋର୍ଦ୍ଧା ମାଟି । ଦେଶ ସ୍ୱାଧୀନରେ ରହିଛି ବିଶେଷ ଭୂମିକା । ବୀର ପାଇକଙ୍କ ପାଇଁ ଗର୍ବିତ ଦେଶ । ହେଲେ ସ୍ୱାଧୀନତାର ୭୫ ବର୍ଷ ବିତିଥିଲେ ସୁଦ୍ଧା ଏହାର ସ୍ମାରକୀ ଆଜି ଅବହେଳିତ । ରକ୍ଷଣାବେକ୍ଷଣ ଅଭାବରୁ ମାଟିରେ ମିଶିବାକୁ ବସିଲାଣି ଭାରତର ଶେଷ ସ୍ୱାଧୀନ ଦୁର୍ଗ, ଖୋର୍ଦ୍ଧା ଗଡ଼ । ଯାହାକୁ ରକ୍ଷା କରିବାକୁ ପ୍ରାଣବଳି ଦେଇଥିଲେ ବହୁ ସଂଗ୍ରାମୀ । ବକ୍ସି ଜଗବନ୍ଧୁ, ଜୟୀ ରାଜଗୁରୁ, କୃତିବାସ ପାଟ୍ଟଶାଣୀ, ମାଧବଚନ୍ଦ୍ର ରାଉତରାୟ, ପିଣ୍ଡିକି ବାହୁ ବଳେନ୍ଦ୍ରଙ୍କ ପରି ଅନେକ ପାଇକ ବୀରଙ୍କ ପ୍ରତିମୂର୍ତ୍ତି ଖୋଲା ଆକାଶ ତଳେ ପଡି ରହିଛି ।

୨୦୧୭ ପାଇକ ବିଦ୍ରୋହର ୨ଶହ ବର୍ଷ ପୂର୍ତ୍ତି ଏହି ଖୋର୍ଦ୍ଧା ମାଟିରୁ ପାଳିତ ହୋଇ ଦିଲ୍ଲୀ ପର୍ଯ୍ୟନ୍ତ ବ୍ୟାପିଥିଲା । ଭାରତର ରାଷ୍ଟ୍ରପତି ପାଇକ ସ୍ମାରକୀ ନିର୍ମାଣ ପାଇଁ ୨୦୧୯ ଡିସେମ୍ବର ୮ରେ ଭୂମିପୂଜା କରିଥିଲେ । ତେଣୁ ଖୁବଶୀଘ୍ର ଏହାକୁ ନିର୍ମାଣ କରି ଐତିହାସିକ ସ୍ମୃତିକୁ ଜୀବିତ ରଖିବାକୁ ଦାବି ହୋଇଛି ।

ଏଥିସହିତ ପଢ଼ନ୍ତୁ: ‘ରୁଟି’ ଥିଲା କୋଡ୍, ୧୮୫୭ରେ ଭାରତ ଏମିତି କରିଥିଲା ବିଦ୍ରୋହ

ବିଜେଡିରେ ଯୋଗଦେବା ନେଇ ଚର୍ଚ୍ଚା ସମ୍ପର୍କରେ କିଛି ଏଭଳି ପ୍ରତିକ୍ରିୟା ରଖିଲେ ପ୍ରଦୀପ

ପିସିସି କାର୍ଯ୍ୟକାରୀ ସଭାପତି ତଥା ପୂର୍ବତନ ସାଂସଦ ପ୍ରଦୀପ ମାଝୀ କଂଗ୍ରେସ ଛାଡିବା ନେଇ ଚର୍ଚ୍ଚା ଚାଲିଥିବା ବେଳେ ସେ ଏ ନେଇ ନନ୍ଦିଘୋଷ ଟିଭିକୁ ପ୍ରତିକ୍ରିୟା ଦେଇଛନ୍ତି । ସେ ଏଭଳି ପ୍ରଚାରକୁ ଖଣ୍ଡନ କରିବା ସହ ଆଗକୁ ପଞ୍ଚାୟତ ନିର୍ବାଚନ ଥିବାରୁ ଏସବୁ ଗୁଜବ ପ୍ରଚାର କରାଯାଉଥିବା କହିଛନ୍ତି । କଂଗ୍ରେସ ପାଇଁ ସେ କାମ କରୁଛନ୍ତି । ପଞ୍ଚାୟତ ନିର୍ବାଚନ ପାଇଁ କଳ ବଳ କୌଶଳ ଲଗାଇଛନ୍ତି । ସେ ହାତ ଛାଡିବାର ପ୍ରଶ୍ନ ଉଠୁନି ବୋଲି ପ୍ରଦୀପ କହିଛନ୍ତି । ୨୦୦୯-୨୦୧୪ ଯାଏଁ ସେ ନବରଙ୍ଗପୁରରର ସାଂସଦ ଭାବେ ନିର୍ବାଚିତ ହୋଇଥିଲେ । କଂଗ୍ରେସର ଜଣେ ଯୁବ ନେତା ଭାବେ ବେଶ ପରିଚିତ ପ୍ରଦୀପ । ସେପଟେ ପ୍ରଦୀପ ମାଝୀ ଅନ୍ୟଦଳରେ ମିଶିବା ନେଇ ଖବର ଆସୁଥିବା କହୁଛନ୍ତି କଂଗ୍ରେସର ବରିଷ୍ଠ ବିଧାୟକ ସୁର ରାଉତରାୟ । ୨୧ତାରିଖରେ କଂଗ୍ରେସ ଛାଡି ଅନ୍ୟ ଦଳରେ ମିଶିବେ ବୋଲି ମଧ୍ୟ ଚର୍ଚ୍ଚା ହେଉଛି । ଏନେଇ ବ୍ୟକ୍ତିଗତ ଭାବେ ପ୍ରଦୀପଙ୍କ ସହ ଆଲୋଚନା କରିବେ ବୋଲି ସୁର କହିଛନ୍ତି । କଂଗ୍ରେସ ଦଳ ଏକ ହିମାଳୟ , କିଏ ଦଳ ଛାଡିଲେ କି ଦଳକୁ ପ୍ରବେଶ କଲେ ଦଳ ଉପରେ କିଛି ପ୍ରଭାବ ପଡିବନାହିଁ ବୋଲି ସେ କହିଛନ୍ତି ।

ଏଥିସହିତ ପଢ଼ନ୍ତୁ: ବୁଣାକାରଙ୍କ ପାଇଁ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ପ୍ୟାକେଜ; ବିନା ସୁଧରେ ମିଳିବ ୫୦ ହଜାର ଟଙ୍କା ଯାଏଁ ଋଣ

 

ସାଉଥ୍‌ ଷ୍ଟାର ପ୍ରକାଶ ରାଜ୍‌ଙ୍କ ଅସ୍ତ୍ରୋପଚାର ସଫଳ

ହାଇଦ୍ରାବାଦ: ସାଉଥ୍‌ ଷ୍ଟାର ତଥା ବଲିଉଡର ଜଣାଶୁଣା ଅଭିନେତା ପ୍ରକାଶ ରାଜ୍‌ ଅସ୍ତ୍ରୋପଚାର ସଫଳ ହୋଇଛି । କାନ୍ଧରେ ସାମାନ୍ୟ ଫ୍ୟକ୍ଚର ଯୋଗୁଁ ସେ ହାଇଦ୍ରାବାଦ ସ୍ଥିତ ଏକ ହସ୍ପିଟାଲରେ ମଙ୍ଗଳବାର ଭର୍ତ୍ତି ହୋଇଥିବା ବେଳେ ଆଜି ତାଙ୍କ ଅସ୍ତ୍ରୋପଚାର ପୂରା ହୋଇଛି । ଅସ୍ତ୍ରୋପଚରା ପରେ ସେ ମେଡିକାଲ ବେଡ୍ ଉପରେ ବିଶ୍ରାମ ନେଉଥିବା ଏକ ଫଟୋ ସେୟାର କରିଛନ୍ତି ।

ଯେଉଁଥିରେ ସେ ଲେଖିଛନ୍ତି, ମୋର ହାତର ସର୍ଜରୀ ସଫଳ ହୋଇଛି  । ଡେଭିଲ୍ ଇଜ୍ ବ୍ୟାକ୍… ସଫଳ ସର୍ଜରୀ … ଧନ୍ୟବାଦ ପ୍ରିୟ ବନ୍ଧୁ ଡ. ଗୁରୁଭା ରେଡ୍ଡୀ ଏବଂ ଆପଣମାନଙ୍କ ପ୍ରାର୍ଥନା ପାଇଁ ସମସ୍ତଙ୍କୁ ଧନ୍ୟବାଦ । ମୁଁ ଖୁବ ଶୀଘ୍ର ପୁଣି କାମକୁ ଫେରିବି ବୋଲି ସେ ଉଲ୍ଲେଖ କରିଛନ୍ତି ।

ସୂଚନା ଯୋଗ୍ୟ ଯେ, ଖୁବଶୀଘ୍ର ପ୍ରକାଶ ରାଜ୍‌ଙ୍କୁ ଫିଲ୍ମ ‘ପାଦା’ରେ ଦେଖିବାକୁ ମିଳିବ । ସେ ଏହି ଫିଲ୍ମ ପୋଷ୍ଟରକୁ  ସୋସିଆଲ୍ ମିଡିଆରେ ସେୟାର କରିଥିବା ବେଳେ ଏହାର ଟିଜର୍ ଖୁବଶୀଘ୍ର ରିଲିଜ୍ ହେବ ବୋଲି କହିଛନ୍ତି । ସେ ଏହି ଇନ୍‌ଷ୍ଟାଗ୍ରାମ ପୋଷ୍ଟରେ ନିଜ ସାଥି କଳାକାରଙ୍କୁ ପ୍ରଶଂସା କରିବା ସହ ସେମାନଙ୍କ ସହ କାମ କରିବା ନେଇ ଖୁସି ବ୍ୟକ୍ତ କରିଛନ୍ତି

ଏଥିସହିତ ପଢ଼ନ୍ତୁ: ଅଭିନେତା ପ୍ରକାଶ ରାଜ୍‌ଙ୍କ ଦୁର୍ଘଟଣା: ସର୍ଜରୀ ପାଇଁ ମେଡିକାଲରେ ଭର୍ତ୍ତି

ଆମ୍ୱୁଲାନ୍ସ-ଟ୍ୟାଙ୍କର ମୁହାଁମୁହିଁ ଧକ୍କା: ୪ ଜଣଙ୍କ ମୃତ୍ୟୁ

ଗୁଣୁପୁର: ଅମ୍ବାଦଳା ଥାନା ମଞ୍ଜୁରିକୁପା ନିକଟ ମୁଖ୍ୟରାସ୍ତା ଉପରେ ମର୍ମନ୍ତୁଦ ସଡ଼କ ଦୁର୍ଘଟଣା । ଘରୋଇ ଆମ୍ବୁଲାନ୍ସ୍ ଓ ଟ୍ୟାଙ୍କର ମୁହାଁମୁହିଁ ଧକ୍କା। ଘଟଣାସ୍ଥଳରେ ୪ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ସମସ୍ତ ମୃତକ ବଲାଙ୍ଗୀର ଜିଲ୍ଲାର । ଦୁର୍ଘଟଣାରେ ୨ଜଣ ଗୁରୁତର ଆହତ ହୋଇ ମୁନିଗୁଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଛନ୍ତି । ସମସ୍ତେ ବିଷମକଟକ ଖ୍ରୀଷ୍ଟିୟାନ ହସ୍ପିଟାଲରେ ଚିକିତ୍ସିତ ହୋଇ ନିଜ ଘରକୁ ଫେରୁଥିଲେ । ଟ୍ୟାଙ୍କରଟି ଝାରସୁଗୁଡାରୁ ଟିକିରି ଅଭିମୁଖେ ଆସୁଥିବା ବେଳେ ମୁହାଁମୁହିଁ ଧକ୍କା ହୋଇଛି । ମୃତକଙ୍କ ମଧ୍ୟରେ ଜଣେ ମହିଳା ତିନି ପୁରୁଷ ରହିଛନ୍ତି । ଘଟଣାସ୍ଥଳରେ ମୁନିଗୁଡା ଏସଡିପିଓ ଓ ଅମ୍ବାଦଳା ପୋଲିସ୍ ପହଞ୍ଚି ତଦନ୍ତ କରୁଛି ।

ଏଥିସହିତ ପଢ଼ନ୍ତୁ: କ୍ରାଇମବ୍ରାଞ୍ଚର STF କବଜାରେ ୩ ବ୍ରାଉନସୁଗାର ବେପାରୀ

ବରଗଡ଼ରେ ନିର୍ମାଣ ହେବ କ୍ୟାନସର କେୟାର ସେଣ୍ଟର

ବରଗଡ଼: ରାଜ୍ୟରେ ସୁଦୃଢ଼ ହେଉଛି ସ୍ୱାସ୍ଥ୍ୟ ସେବା ବ୍ୟବସ୍ଥା । ଏଥିସହିତ ଆଗକୁ ରାଜ୍ୟରେ ମିଳିବ G+୫ କ୍ୟାନସର ଚିକିତ୍ସା ।

ସୂଚନା ଅନୁଯାୟୀ, ବରଗଡ଼ରେ ନିର୍ମାଣ ହେବ କ୍ୟାନସର କେୟାର ସେଣ୍ଟର । ଏଥିପାଇଁ ୯୦କୋଟି ୨୭ଲକ୍ଷ ଟଙ୍କା ଖର୍ଚ୍ଚ ହେବ । G+୫ କର୍କଟ ସେବା କେନ୍ଦ୍ର ନିର୍ମାଣ ପାଇଁ ପ୍ରକ୍ରିୟା ଆରମ୍ଭ ହୋଇଛି । ଏଥିପାଇଁ ପ୍ରାଶାସନିକ ଅନୁମତି ମିଳିଥିବା ସୂଚନା ମିଲିଛି ।

ଏହି କ୍ୟାନସର କେୟାର ସେଣ୍ଟର ହେଲେ ବରଗଡ଼ ଓ ଆଖପାଖ ଅଞ୍ଚଳର ରୋଗୀ ସୁବିଧାରେ ଚିକିତ୍ସା ପାଇପାରିବେ।

 

ମୁମ୍ବାଇରେ ଡେଲଟା ପ୍ଲସ୍ ଭ୍ୟାରିଆଣ୍ଟରେ ଆକ୍ରାନ୍ତ ପ୍ରଥମ ରୋଗୀ ମୃତ

ମୁମ୍ବାଇ: ମୁମ୍ବାଇରେ ଡେଲଟା ପ୍ଲସ୍ ଭ୍ୟାରିଆଣ୍ଟରେ ଆକ୍ରାନ୍ତ ପ୍ରଥମ ରୋଗୀଙ୍କ ମୃତ୍ୟୁ ଘଟିଛି। ମୃତ ମହିଳାଙ୍କ ବୟସ ୬୩ ବର୍ଷ ବୋଲି ଜଣାପଡିଛି। ନିକଟରେ ଜେନମ ସିକ୍ବେନ୍ସି ରିପୋର୍ଟରେ ମହିଳା ଜଣଙ୍କ ଡେଲଟା ପ୍ଲସ୍ ଭ୍ୟାରିଆଣ୍ଟରେ ଆକ୍ରାନ୍ତ ହୋଇଥିବା ଜଣାପଡ଼ିଛି ।

୨୧ ଜୁଲାଇରେ ମହିଳା ଜଣକ କରୋନା ସଂକ୍ରମିତ ହୋଇଥିଲେ । ପରେ ୨୭ ଜୁଲାଇରେ ସଂକ୍ରମିତ ମହିଳାଙ୍କ ମୃତ୍ୟୁ ହୋଇଥିବା ନେଇ ବ୍ରିହାନ ମୁମ୍ବାଇ ମ୍ୟୁନିସିପାଲ କର୍ପୋରେସନ ପକ୍ଷରୁ ସୂଚନା ଦିଆଯାଇଛି। ମହିଳାଙ୍କ ପରିବାରର ୬ ସଦସ୍ୟ ଏବେ ବି କରୋନା ସଂକ୍ରମିତ ଅଛନ୍ତି। ସେମାନଙ୍କ ମଧ୍ୟରୁ ୨ଜଣ ଡେଲଟା ଭ୍ୟାରିଆଣ୍ଟରେ ସଂକ୍ରମିତ ଥିବା ରିପୋର୍ଟ ଆସିଥିବା ବେଳେ ଅନ୍ୟ ୪ଜଣଙ୍କ ଜେନମ ସିକ୍ବେନ୍ସି ରିପୋର୍ଟକୁ ଅପେକ୍ଷା କରାଯାଇଛି ।

Corona Lambda Variant Is More Dangerous Than Delta Malaysia Warns

ଏବେସୁଦ୍ଧା ମହାରାଷ୍ଟ୍ରରେ ଡେଲଟା ପ୍ଲସ୍ ଆକ୍ରାନ୍ତ ୨ଜଣଙ୍କ ମୃତ୍ୟୁ ହୋଇଥିବା ବିଏମସି ରିପୋର୍ଟ ଦେଇଛି । ପୂର୍ବରୁ ୮୦ବର୍ଷୀୟା ବୃଦ୍ଧାଙ୍କର ମୃତ୍ୟୁ ହୋଇଥିଲା । ରାଜ୍ୟରେ ଡେଲଟା ପ୍ଲସ ଆକ୍ରାନ୍ତ ୬୫ ଜଣ ଚିହ୍ନଟ ହୋଇଛନ୍ତି । ସେମାନଙ୍କ ମଧ୍ୟରୁ ୧୧ ଜଣ ମୁମ୍ବାଇର ।

ସମ୍ଭାବ୍ୟ ତୃତୀୟ ଲହର ପାଇଁ ଜିଲ୍ଲା ସ୍ତରୀୟ ଟାସ୍କଫୋର୍ସ ଗଠନ: ଡିଏମଇଟି ନିର୍ଦ୍ଦେଶକ

ଭୁବନେଶ୍ୱର: କରୋନାର ସମ୍ଭାବ୍ୟ ତୃତୀୟ ଲହରକୁ ନେଇ ରାଜ୍ୟ ସରକାରଙ୍କ ପକ୍ଷରୁ ବ୍ୟାପକ ପ୍ରସ୍ତୁତି ଜାରି ରହିଛି। କେନ୍ଦ୍ର ଗାଇଡ଼ଲାଇନ ଅନୁସାରେ ସଂକ୍ରମିତ ଶିଶୁଙ୍କ ଲାଗି ୬୦୦ ବେଡ଼ ଆବଶ୍ୟକ ପଡିପାରେ। କିନ୍ତୁ ୩୦୦୦ ବେଡ଼ ପ୍ରସ୍ତୁତ କରୁଛନ୍ତି ରାଜ୍ୟ ସରକାର। କେବଳ ୬୧୦ ରହିଛି ଆଇସିୟୁ ଓ ଏଚଡ଼ିୟୁ ବେଡ୍‌।

ଆବଶ୍ୟକସ୍ଥଳେ ଶିଶୁଙ୍କ ପାଇଁ ସ୍ୱତନ୍ତ୍ର କୋଭିଡ ହସ୍ପିଟାଲ ବି କରାଯିବ । କେଉଁ ସ୍ଥାନରେ କରାଯିବ ସେ ନେଇ କେ୍‌ସ ଲୋଡ଼ ସ୍ଥିତି ଦେଖି ଆବଶ୍ୟକ ସ୍ଥଳେ ନିଷ୍ପତି ହେବ ବୋଲି ଡିଏମଇଟି ନିର୍ଦ୍ଦେଶକ ସିବିକେ ମହାନ୍ତି କହିଛନ୍ତି । ମୁକାବିଲା ନେଇ ରାଜ୍ୟସ୍ତରୀୟ ଟାସ୍କଫୋର୍ସ ଗଠନ କରାଯାଇଥିବା ବେଳେ ଜିଲ୍ଲା ସ୍ତରୀୟ ଟାସ୍କଫୋର୍ସ ଗଠନ କରାଯାଇଛି ।

Corona Lambda Variant Is More Dangerous Than Delta Malaysia Warns

ଏହି କମିଟି ଜିଲ୍ଲା ସ୍ତରରେ ସ୍ଥିତି ସମୀକ୍ଷା କରି ରିପୋର୍ଟ ପ୍ରଦାନ କରିବ । ପ୍ରସ୍ତୁତି କଣ ଚାଲିଛି, କେମିତି ପ୍ରସ୍ତୁତି ତ୍ୱରାନ୍ୱିତ ହେବ, କଣ ଆବଶ୍ୟକ ସେ ନେଇ କମିଟି ରିପୋର୍ଟ ଦେଲେ ସରକାର ପ୍ରସ୍ତୁତ ହେବେ । ଯଦି କୌଣସି ଲକ୍ଷଣ ଥିବା ଶିଶୁମାନେ ହସ୍ପିଟାଲରେ ଆଡ଼ମିଟ୍‌ ହୁଅନ୍ତି ସେମାନଙ୍କର ଆରଟିପିସିଆର ଟେଷ୍ଟ କରାଯିବ ।

ବୁଣାକାରଙ୍କ ପାଇଁ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ପ୍ୟାକେଜ; ବିନା ସୁଧରେ ମିଳିବ ୫୦ ହଜାର ଟଙ୍କା ଯାଏଁ ଋଣ

ଭୁବନେଶ୍ୱର: କୋଭିଡ ସମୟରେ ବୁଣାକାରଙ୍କ ପାଇଁ ସ୍ୱତନ୍ତ୍ର ପ୍ୟାକେଜ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ। ଯେଉଁ ପ୍ୟାକେଜ ଅଧିନରେ ୩୦୦୦ ବୁଣାକାର ପରିବାରକୁ ପ୍ରାଥମିକତା ଭିତ୍ତିରେ ଗୃହ ସହ କର୍ମଶାଳା ଯୋଗାଇ ଦିଆଯିବ। ଏ ପର୍ଯ୍ୟନ୍ତ ୧୧,୬୯୫ଟି ଗୃହ ସହ କର୍ମଶାଳା ବୁଣାକାର ପରିବାରକୁ ଯୋଗାଇ ଦିଆଯାଇଛି।

ସୂଚନା ଅନୁଯାୟୀ, ବର୍ତ୍ତମାନ ରାଜ୍ୟର ଲକ୍ଷାଧିକ ଲୋକ ହସ୍ତତନ୍ତ ଉପରେ ନିର୍ଭର କରନ୍ତି। କିନ୍ତୁ ମହାମାରୀ କୋଭିଡ ପରିପ୍ରେକ୍ଷୀରେ ଗତ ଦୁଇ ବର୍ଷରେ ହସ୍ତତନ୍ତ ବ୍ୟବସାୟ ଗଭୀର ଭାବରେ ପ୍ରଭାବିତ ହୋଇଛି ଏବଂ ଆମର ହଜାର ହଜାର ବୁଣାକାର ମାନଙ୍କ ରୋଜଗାରରେ ମଧ୍ୟ ହ୍ରାସ ଘଟିଛି। ଯାହା ସେମାନଙ୍କ ପାଇଁ ସହାୟକ ହେବ ।

ଆହୁରି ମଧ୍ୟ ବୁଣାକାର ମାନଙ୍କ ଆଖି ଉପରେ ଯେପରି ବିଶେଷ ଚାପ ନ ପଡିବ ଏବଂ ସେମାନେ ଦୀର୍ଘ ସମୟ କାମ କରିପାରିବେ, ସେଥିପାଇଁ ସେମାନଙ୍କୁ ଏହି ଯୋଜନାରେ ବିଜୁଳି ଆଲୁଅ ଓ ବିଜୁଳି ପଙ୍ଖା ଯୋଗାଇ ଦିଆଯିବ। ସମସ୍ତ ଯୋଗ୍ୟ ବୁଣାକାର ପରିବାରକୁ ଅଗ୍ରାଧିକାର ଭିତ୍ତିରେ ବାସଗୃହ ଯୋଗାଇ ଦେବା ପାଇଁ ନିଷ୍ପତ୍ତି ନିଆଯାଇଛି ।

ପଞ୍ଚାୟତ ରାଜ ବିଭାଗର ଗାଇଡଲାଇନ ଅନୁସାରେ ଏଥିପାଇଁ ହିତାଧିକାରୀ ଚୟନ କରାଯିବ। ସେହିଭଳି ଏହି ପ୍ୟାକେଜରେ କଂକ୍ରିଟ ହୋଇନଥିବା ୧୫,୦୦୦ ଲୁମ ପିଟ କୁ ପର୍ଯ୍ୟାୟକମେ ଆଗାମୀ ତିନି ବର୍ଷରେ କଂକ୍ରିଟ କରାଯିବ । ପ୍ରତି ଲୁମ ପିଟ କଂକ୍ରିଟ ପାଇଁ ୭୦୦୦ ଟଙ୍କା ଲେଖାଏ ଖର୍ଚ୍ଚ କରାଯିବ। ଏବେ ସୁଦ୍ଧା ରାଜ୍ୟର ୩୧,୩୪୨ଟି ଲୁମ ପିଟ ମଧ୍ୟରୁ ୧୫,୦୭୧ଟି ଲୁମ ପିଟକୁ କଂକ୍ରିଟ କରାଯାଇଛି ।

ଏହି ପ୍ୟାକେଜରେ ବୁଣାକାର ମାନେ ଯେପରି ସୁବିଧାରେ ଋଣ ପାଇ ପାରିବେ ତା ଉପରେ ଗୁରୁତ୍ୱ ଦିଆଯାଇଛି। ବୁଣାକାର ମାନଙ୍କର ଉତ୍ପାଦନ ସାମଗ୍ରୀ ରଖିବା ନିମନ୍ତେ ବିଭିନ୍ନ ଗୋଷ୍ଠୀ ଭିତ୍ତିଭୂମି ଯଥା ସିଏଫସି, ଗୋଦାମ ଓ ବିକ୍ରୟ କେନ୍ଦ୍ର ଆଦି ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଜରିଆରେ କରାଯିବ। ବୁଣାକାର ମାନଙ୍କୁ ପଚାଶ ହଜାର ଟଙ୍କା ପର୍ଯ୍ୟନ୍ତ ଋଣ ବିନା ସୁଧରେ ଯୋଗାଇ ଦେବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।ରାଜ୍ୟରେ କୃଷି ପରେ ହସ୍ତତନ୍ତ ହିଁ ଗ୍ରାମାଞ୍ଚଳରେ ସର୍ବାଧିକ ଲୋକଙ୍କୁ ନିଯୁକ୍ତି ଯୋଗାଇଥାଏ ବୋଲି ମୁଖ୍ୟମନ୍ତ୍ରୀ କହିବା ସହ ବର୍ତ୍ତମାନ ରାଜ୍ୟର ଲକ୍ଷାଧିକ ଲୋକ ହସ୍ତତନ୍ତ ଉପରେ ନିର୍ଭର କରନ୍ତି ।