ଭୁବନେଶ୍ୱର: ସ୍କୁଲରେ ଶିଶୁ ସଂକ୍ରମଣ ପ୍ରସଂଗରେ ପ୍ରତିକ୍ରିୟା ରଖିଛନ୍ତି ଗଣଶିକ୍ଷା ମନ୍ତ୍ରୀ ସମୀର ଦାଶ । କାମାକ୍ଷାନଗର ସରକାରୀ ସ୍କୁଲରେ ଜଣେ ଶିକ୍ଷକ ପଜିଟିଭ ବାହାରି ଥିଲେ । ହଷ୍ଟେଲ ପିଲାଙ୍କୁ ଟେଷ୍ଟ ପରେ ୧୪ ଜଣଙ୍କର ନମୁନା ପଜିଟିଭ୍ ଚିହ୍ନଟ ହୋଇଥିଲା । ପରେ ସେ ସ୍କୁଲକୁ ବନ୍ଦ କରାଯାଇଛି । ଗଣେଶ ପୂଜା ପରେ ୧୩ ତାରିଖରେ ସେ ସ୍କୁଲ ଖୋଲିବ । ବରଗଡ ଘରୋଇ ସ୍କୁଲରେ ମଧ୍ୟ ୨୧ ଜଣ ପିଲା ସଂକ୍ରମଣ ହୋଇଛନ୍ତି
ସେ ସ୍କୁଲ ମଧ୍ୟ ବନ୍ଦ କରିଦିଆଯାଇଛି । ତେବେ ଏ ନେଇ ଆତଙ୍କିତ ହେବାର ଆବଶ୍ୟକତା ନାହିଁ, କରୋନା କଟକଣା ମାନି ଶିକ୍ଷାଦାନ ଚାଲିଛି ।
ଯେଉଁଠି ସମସ୍ୟା ଆସୁଛି ସେଠି ପଦକ୍ଷେପ ନିଆଯାଉଛି । ପ୍ରଥମରୁ ଅଷ୍ଟମ ଶ୍ରେଣୀ ଖୋଲିବା ନେଇ କୌଣସି ନିଷ୍ପତ୍ତି ହୋଇନଥିବା କହିଛନ୍ତି ମନ୍ତ୍ରୀ ।
ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲଙ୍କ ବାପା ଗିରଫ
ରାୟପୁର: ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲଙ୍କ ବାପା ନନ୍ଦ କୁମାର ବାଘେଲଙ୍କୁ ପୋଲିସ ଗିରଫ କରିଛି । ବ୍ରାହ୍ମଣ ସମାଜ ବିରୋଧରେ ବିବାଦୀୟ ମନ୍ତବ୍ୟକୁ ନେଇ ରାୟପୁର ଡିଡି ନଗର ପୋଲିସ ଥାନାରେ ବାଘେଲଙ୍କ ବିରୋଧରେ ଅଭିଯୋଗ ହୋଇଥିଲା । ରାୟପୁର ପୋଲିସ ନନ୍ଦ କୁମାର ବାଘେଲଙ୍କୁ ଆଗ୍ରାରୁ ଗିରଫ କରିଛି ।
Chhattisgarh CM Bhupesh Baghel's father Nand Kumar Baghel who has been arrested over his alleged derogatory remarks against Brahmins is being produced before a court in Raipur. pic.twitter.com/i2GAJaF066
— ANI (@ANI) September 7, 2021
ଲକ୍ଷ୍ମୌରେ ନନ୍ଦ କୁମାର ବାଘେଲ ବିବାଦୀୟ ମନ୍ତବ୍ୟ ଦେଇଥିଲେ । ଟିପ୍ପଣୀକୁ ନେଇ ବ୍ରାହ୍ମଣ ସମାଜ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଏଫଆଇଆର୍ ରୁଜୁ ପରେ ବାଘେଲଙ୍କୁ ଗିରଫ ପାଇଁ ୟୁପି ଯାଇଥିଲା ରାୟପୁର ପୋଲିସର ସ୍ୱତନ୍ତ୍ର ଟିମ୍ । ଆଗ୍ରାରୁ ନନ୍ଦ କୁମାର ବାଘେଲଙ୍କୁ ଗିରଫ ପରେ ପୋଲିସ ତାଙ୍କୁ ଆଣି ରାୟପୁର କୋର୍ଟରେ ହାଜର କରିଛି ।
ଗିରଫଦାରୀ ପରେ ସେ କହିଛନ୍ତି, ମୁଁ ଏହା ବିରୋଧରେ ସୁପ୍ରିମକୋର୍ଟ ଯିବି । ରାୟପୁର କୋର୍ଟ ବାଘେଲଙ୍କୁ ୧୫ ଦିନ ଲାଗି ବିଚାର ବିଭାଗୀୟ ହାଜତକୁ ପଠାଇ ଦେଇଛନ୍ତି । ସେପ୍ଟେମ୍ବର ୨୧ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ । ତେବେ କୋର୍ଟରେ ହାଜର ବେଳେ ବାଘେଲ ଜାମିନ୍ ଆବେଦନ କରିନାହାଁନ୍ତି ।
ପୋଖରୀରେ ବୁଡ଼ି ବାପା-ଝିଅଙ୍କ ମୃତ୍ୟୁ
ନୂଆପଡ଼ା ଜିଲ୍ଲା ସଦର ମହକୁମା ସାଲେଭଟା ଗାଁରେ ଅଘଟଣ । ପୋଖରୀରେ ବୁଡ଼ି ବାପା ଓ ଝିଅଙ୍କ ମୃତ୍ୟୁ ଘଟିଛି । ଆଜି ଦିନ ସକାଳ ୧୧ଟା ବେଳେ ରୋହିତ ମାଝି ଓ ତାଙ୍କ ଝିଅ ଦେବକୀକୁ ଧରି ପୋଖରୀକୁ ଗାଧୋଇବା ପାଇଁ ଯାଇଥିଲେ । ହେଲେ ଗାଧୋଇବାବେଳେ ଝିଅ ଦେବକୀର ଗୋଡ଼ ଖସି ଯାଇଥିଲା । ଝିଅ ପାଣିରେ ବୁଡ଼ୁଥିବା ଦେଖି ରୋହିତ ଉଦ୍ଧାର କରିବାକୁ ଯାଇ ସେ ବି ପାଣିରେ ବୁଡ଼ି ଯାଇଥିଲେ । ଖବରପାଇ ସ୍ଥାନୀୟ ଲୋକେ ବାପା ଓ ଝିଅଙ୍କୁ ଉଦ୍ଧାର କରିଥିଲେ । ମାତ୍ର ସେତେବେଳକୁ ସେମାନଙ୍କ ପ୍ରାଣବାୟୁ ଉଡିଯାଇଥିଲା । ଏହି ଦୁଃଖଦ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକାର ଛାୟା ଖେଳିଯାଇଛି ।
ଏଥିସହିତ ପଢ଼ନ୍ତୁ: ଗୋଟିଏ ଅଟୋ ସହ ଜବତ ହେଲା ବିପୁଳ ପାରିମାଣର ନକଲି ଜର୍ଦ୍ଦା
ଦୀପାବଳି ପୂର୍ବରୁ ୬ କୋଟି EPFO ସଦସ୍ୟଙ୍କୁ ମିଳିପାରେ ଉପହାର
ନୂଆଦିଲ୍ଲୀ: କର୍ମଚାରୀ ଭବିଷ୍ୟନିଧି ପାଣ୍ଠି (EPFO) ଦେବାକୁ ଯାଉଛି ଖୁସି ଖବର । ପାର୍ବଣ ପୂର୍ବରୁ ପିଏଫ୍ ଆକାଉଣ୍ଟଧାରୀଙ୍କ ଖାତାକୁ ୮.୫ ପ୍ରତିଶତ ଦରରେ ସୁଧ ମିଳିପାରେ । ଇପିଏଫ୍ ପ୍ରତ୍ୟେକ ଆର୍ଥିକ ବର୍ଷରେ ପିଏଫ୍ ଜମା ଉପରେ ସୁଧ ଘୋଷଣା କରେ । ଚଳିତ ଆର୍ଥିକ ବର୍ଷରେ ଇଫିଏଫ୍ ୮.୫ ପ୍ରତିଶତ ହାରରେ ସୁଧ ଦେବାକୁ ଘୋଷଣା କରିଛି ।
ଇପିଏଫର କେନ୍ଦ୍ରୀୟ ବୋର୍ଡ ସୁଧ ବୃଦ୍ଧିକୁ ଅନୁମୋଦନ କରିଛି । ଏବେ ଏହା ଅର୍ଥ ମନ୍ତ୍ରଣାଳୟର ମଞ୍ଜୁରୀ ଅପେକ୍ଷାରେ ରହିଛି । ରିପୋର୍ଟ ଅନୁସାରେ, ଦୀପାବଳି ପୂର୍ବରୁ ସରକାର କେନ୍ଦ୍ର କର୍ମଚାରୀଙ୍କୁ ମହଙ୍ଗା ଭତ୍ତା ମଧ୍ୟ ଦେବେ । ସରକାରୀ ଅଧିକାରୀ କହିଛନ୍ତି ଅର୍ଥ ମନ୍ତ୍ରଣାଳୟର ମଞ୍ଜୁରୀ କେବଳ ପ୍ରୋଟୋକଲ ପାଳନ । ଇଫିଏଫର ଅନୁମୋଦନ ବିନା ସୁଧ ହାର ଦିଆଯାଇ ପାରିବ ନାହିଁ ।
ଗତ ଆର୍ଥିକ ବର୍ଷରେ ଇପିଏଫ୍ ୭୦,୩୦୦ କୋଟି ଟଙ୍କା ଆୟ କରିଛି । ଯେଉଁଥିରେ ଇକ୍ୱିଟି ନିବେଶର ଏକ ଅଂଶ ବିକ୍ରିରୁ ୪୦୦୦ କୋଟି ଟଙ୍କା ମିଳିଛି । କରୋନା ମହାମାରୀ ପାଇଁ ଲକ୍ଷ ଲକ୍ଷ ଲୋକ ଆକାଉଣ୍ଟରୁ ଟଙ୍କା ଉଠାଇଛନ୍ତି । ଏବେ ଦୀପାବଳି ପୂର୍ବରୁ କର୍ମଚାରୀଙ୍କୁ ସୁଧ ଟଙ୍କା ମିଳିପାରେ ।
ଏମିତି ଦେଖାଯାଉଥିଲେ ଆଫଗାନିସ୍ତାନର ଏୟାର ହୋଷ୍ଟେସ, ଯାହା ଏବେ ଇତିହାସ
କାବୁଲ: କାବୁଲ ବିମାନ ବନ୍ଦରରେ ଆକ୍ରମଣ ପରେ ପୁଣିଥରେ, ଆଫଗାନିସ୍ତାନର ସରକାରୀ ବିମାନ କମ୍ପାନୀ ଏରିୟାନା କାବୁଲରୁ ଦେଶର ତିନୋଟି ସହରକୁ ବିମାନ ସେବା ଆରମ୍ଭ ଏହି ବିମାନଗୁଡ଼ିକରେ ବହୁତ ଭିଡ଼ ବି ହେଉଛି ଏଥିରୁ ବହୁତ ଯାତ୍ରୀ ତଲକୁ ଓହ୍ଲାଉଥିବା ଦେଖିବାକୁ ମିଳିଛି। ପାଇଲଟମାନେ ବି ବିମାନରୁ ଓହ୍ଲାଇଥିବାର ନଜର ଆସିଛନ୍ତି। ଯଦି କେହି ନଜର ଆସୁନାହାଁନ୍ତି ସେ ହେଉଛି କେବଳ ଏୟାର ହୋଷ୍ଟେସ୍ । ଯେଉଁମାନେ କିଛି ମାସ ପୂର୍ବରୁ ଏହି ବିମାନଗୁଡ଼ିକର ଏକ ଅତ୍ୟାବଶ୍ୟକ ଅଂଶ ଥିଲେ। ହେଲେ ବର୍ତ୍ତମାନ ଆଫଗାନିସ୍ତୈାନର ବିମାନରେ ଏମାନଙ୍କର ଚିହ୍ନ ବର୍ଣ୍ଣ ଦେଖିବାକୁ ମିଳୁନି।

ଆଫଗାନିସ୍ତାନର ଏୟାରଲାଇନ୍ସ ନିଜ ୱେବସାଇଟ୍ ମାଧ୍ୟମରେ ବିମାନ ସେବା ପୁନଃ ଆରମ୍ଭ ବିଷୟରେ ସୂଚନା ଦେଇଛି। ପାଇଲଟ ଏବଂ ମେଲ ଏୟାର ଆଟେଣ୍ଡାଣ୍ଟଙ୍କ ଗ୍ରୁପ୍ ଫଟୋ ମଧ୍ୟ ସାଇଟରେ ପୋଷ୍ଟ କରାଯାଇଛି, କିନ୍ତୁ ଏହି ଗ୍ରୁପ୍ ଫଟୋରେ କୌଣସି ବି ସ୍ଥାନରେ ଏୟାରହୋଷ୍ଟେସ୍ ନାହାନ୍ତି । ୱେବସାଇଟରୁ ଏୟାର ହୋଷ୍ଟେସଙ୍କ ସମସ୍ତ ଫଟୋକୁ ହଟାଇଦିଆଯାଇଛି।

ଆଫଗାନିସ୍ତାନ ତାଲିବାନ କବଜାକୁ ଆସିବା ପୂର୍ବରୁ ଏଠାକାର ସରକାରୀ ବିମାନରେ ଏୟାରହୋଷ୍ଟେସ ଏକ ମୁଖ୍ୟ ଅଂଶ ଥିଲେ। ଏମାନେ ସମସ୍ତ ଯାତ୍ରୀଙ୍କୁ ସ୍ୱାଗତ କରୁଥିଲେ। କିଛି ଦିନ ପୂର୍ବରୁ ସେମାନଙ୍କର ବେଶଭୂଷା ମଧ୍ୟ ବଦଳାଯାଇଥିଲା। ଅବଶ୍ୟ ଏହା ପୂର୍ବରୁ ଏମାଙ୍କ ପୋଷାକ ଅଲଗା ଥିଲା । କିନ୍ତୁ ତାଲିବାନ କବଜା କରିବା ପରେ ଏମାନଙ୍କ ପୋଷାକରେ ପରିବର୍ତ୍ତନ କରାଯାଇଥିଲା । ଏମିତିରେ ବି ତାଲିବାନୀ ଶାସନକୁ ଆସିବା ପରେ ବୋଧହୁଏ ବିମାନରେ ଆଉ ଏୟାରହୋଷ୍ଟେସଙ୍କୁ ଦେଖିବାକୁ ନମିଳିପାରେ।

ଏହି ଫଟୋଟି ଆଫଗାନିସ୍ତାନର କ୍ୟାମ ଏୟାରଲାଇନ୍ସର ଫଟୋ । କୁହାଯାଏ ଏହି ଏୟାରଲାଇନ୍ସ ବେଶି ମହିଳାଙ୍କ ସହିତ ହିଁ କାମ କରେ । କ୍ୟାମରେ ପାକାପାଖି ୧୦୬ ଜଣ ମହିଳା କାମ କରିଥିୱଲେ । ଯେଉଁଥିରେ ୪୬ ଜଣ ଏୟାରହୋଷ୍ଟେସ ଥିଲେ । ଓ ଅନ୍ୟମାନେ ପାଇଲଟ, ମ୍ୟାନେଜର ଓ ଅନ୍ୟାନ୍ୟ ପଦରେ କାର୍ଯ୍ୟରତ ଥିଲେ। ଏହି ଫଟୋଟି ଗତ ମାର୍ଚ୍ଚ ମାସର ଯେବେ ଏବି ବିମାନ କାବୁଲରୁ ହେରାତକୁ ଯାତ୍ରା କରିଥିଲା । ଆଉ ଏହି ଉଡାଣର ବିଶେଷତ୍ତ୍ୱ ଏହା ଥିଲା ଯେ ଏଥିରେ ପାଇଲଟଠୁ ଆରମ୍ଭ କରି ଆେମ୍ଟାଣ୍ଟ ସମସ୍ତେ ମହିଳା ହିଁ ଥିଲେ ।

ଆଉ ଏହି ଫଟୋ ହେଉଛି ଆଫଗାନିସ୍ତାନର ଏକ ଘରୋଇ ବିମାନ ସୈଫିର ଏକ ବିଜ୍ଞାପନ, ଯେଉଁଥିରେ ଜଣେ ପୁରୁଷ ଆଟେଣ୍ଟାଣ୍ଟଙ୍କ ସହ ଜଣେ ଏୟାରହୋଷ୍ଟେସ ବି ନଜର ଆସୁଛନ୍ତି। ଏହି ବିଜ୍ଞାପନ ମାଧ୍ୟମରେ ଲୋକଙ୍କୁ ବିମାନଯାତ୍ରା କରିବାକୁ ନିବେଦନ କରାଯାଏ। ଏହି ବିମାନର ଏୟାରହୋଷ୍ଟେସ୍ ସବୁଠାରୁ ଗ୍ଲାମରସ୍ କୁହାଯାଉଥିଲା। ତେବେ ବର୍ତ୍ତମାନ ଏହି ଘରୋଇ ବିମାନ ବନ୍ଦ ରହିଛି। ଏହି ବିମାନ କମ୍ପାନୀ ସୁନ୍ଦର ଏବଂ ଗ୍ଲାମରସ୍ ଏୟାରହୋଷ୍ଟେସଙ୍କୁ ନିୟୋଜିତ କରିବା ସହ, ତାଙ୍କର ପୋଷାକ ବି ବେଶ୍ ଗ୍ଲାମରସ ରଖିଥଲେ। ଏୟାରହୋଷ୍ଟେସଙ୍କ ଗାଢ଼ ନୀଳ ରଙ୍ଗର ପୋଷାକ ବହୁତ ଆକର୍ଷଣୀୟ ଏବଂ ସ୍ମାର୍ଟ ଥିଲା ହେଲେ ବର୍ତ୍ତମାନ ଏସବୁ କେବଳ ଅତୀତର କାହାଣୀ ହୋଇ ରହିଯାଇଛି । କାରଣ ବର୍ତ୍ତମାନ ଏଠି ଏମାନଙ୍କର ଚିହ୍ନବର୍ଣ୍ଣ ବି ଦେଖିବାକୁ ମିଳୁନି ।

ଆଫଗାନିସ୍ତାନରେ ସରକାରୀ ବିମାନ ସେବା ଏରିୟାନାର ଆରମ୍ଭ ୧୯୫୫ରେ ଆରମ୍ଭ ହୋଇଥିଲା । ଆଉ ଏ ହେଉଛି ୬୦ ଦଶକର ଫଟୋ ଯେଉଁଥିରେ ମହିଳା ପାଇଲଟ ଓ ଏୟାରହୋଷ୍ଟେସଙ୍କୁ ଦେକଇବାକୁ ମିଳୁଛି ।

ତବେ ବର୍ତ୍ତମାନ ବୋଧହୁଏ ଆଫଗାନିସ୍ତାନରେ କୋଣସି ବି ବିମାନରେ ଆଉ ମହିଳା କର୍ମଚାରୀଙ୍କୁ ଦେଖିବାକୁ ମିଳିବନାହିଁ । କାରଣ ତାଲିବାନ ନିଜର ପ୍ରଥମ କାର୍ଯ୍ୟକାଳ (୧୯୯୬-୨୦୦୧)ରେ ମହିଳାଙ୍କ ସ୍ୱାଧିନତା ଓ ଅଧିକାର ଛଡ଼େଇନେଥିଲା, ଆଉ ଯିଏ ନିୟମ ମାନୁନଥିଲା ତାକୁ ହ୍ତ୍ୟା କରାଯାଉଥିଲା। ଆଉ ଏବେ ମଧ୍ୟ ସେମାନେ ନିଜର ଏହି ବର୍ବରତା ଜାରି ରଖିଛନ୍ତି ।
ଗୋଟିଏ ଅଟୋ ସହ ଜବତ ହେଲା ବିପୁଳ ପାରିମାଣର ନକଲି ଜର୍ଦ୍ଦା
ଭଦ୍ରକ: ଭଦ୍ରକରୁ ବିପୁଳ ପାରିମାଣର ନକଲି ଜର୍ଦ୍ଦା ଜବତ। ଅଟୋ ସହ ଦେଢ଼ କୁଇଣ୍ଟାଲ ନକଲି ଜର୍ଦ୍ଦା ଜବତକଲା ପୁରୁଣା ବଜାର ପୋଲିସ। ସୂଚନା ମୁତାବକ, ଗୋଟିଏ ଅଟୋରେ ଭଦ୍ରକର ଲାହାପଟି ଅଞ୍ଚଳରୁ ଯାଜପୁରକୁ ନକଲି ଜର୍ଦ୍ଦା ଚାଲାଣ ହେଉଥିଲା। ଏନେଇ ବିଶେଷ ସୂତ୍ରରୁ ଖବର ପାଇଥିଲା ପୋଲିସ।

ଫଳରେ ଅଟୋକୁ ଯାଞ୍ଚ କରିବା ସହ ସେଥିରୁ ଦେଢ଼ କୁଇଣ୍ଟାଲରୁ ଅଧିକ ଜର୍ଦ୍ଦା ଜବତ କରିଛି। ଘଟରାରେ ଜଣେ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି ପୋଲିସ। ତେବେ ଏହି ଘଟଣାରେ ଆଉ କାର ସମ୍ପୃକ୍ତି ରହିଛି ସେ ନେଇ ଅଧିକ ତଦନ୍ତ ଚଳାଇଥିବା ପୋଲିସ କହିଛି।
ଘୁଞ୍ଚିଲା ଆସନ୍ତା ୧୩ ତାରିଖରେ ହେବାକୁଥିବା ପେଗାସସ୍ ମାମଲାର ଶୁଣାଣି
ନୂଆଦିଲ୍ଲୀ: ଘୁଞ୍ଚିଲା ପେଗାସସ୍ ସ୍ପାଏଓ୍ୱେର ମାମଲାର ଶୁଣାଣି। ଆସନ୍ତା ୧୩ ତାରିଖରେ ସୁପ୍ରିମକୋର୍ଟରେ ମାମଲାର ଶୁଣାଣି ହେବାକୁ ଥିବା ବେଳେ ଏହାକୁ ଘୁଞ୍ଚାଇ ଦିଆଯାଇଛି। ଏହି ମାମଲାର ଉତ୍ତର ରଖିବାକୁ ଅଧିକ ସମୟ ମାଗିଥିଲେ କେନ୍ଦ୍ର ସରକାର। ପ୍ରଧାନ ବିଚାରପତିଙ୍କ ନେତୃତ୍ୱରେ ଗଠିତ ଖଣ୍ଡପୀଠ କେନ୍ଦ୍ରର ଅନୁରୋଧକୁ ସ୍ୱୀକାର କରିବା ସହ ଶୁଣାଣି ତାରିଖ ଘୁଞ୍ଚାଇଛନ୍ତି। ୧୭ ଅଗଷ୍ଟରେ ମାମଲାର ଶୁଣାଣି ବେଳେ କେନ୍ଦ୍ର ପକ୍ଷରୁ ୨ପୃଷ୍ଠାର ସଂକ୍ଷୀପ୍ତ ଉତ୍ତର ରଖାଯାଇଥିଲା। ମାମଲାର ଯାଞ୍ଚ ପାଇଁ ବିଶେଷଜ୍ଞ କମିଟି ଗଠନ ପାଇଁ କେନ୍ଦ୍ର ପ୍ରସ୍ତାବ ଦେଇଥିଲା। ତେବେ ମାମଲାର ଯାଞ୍ଚ କରି ଉତ୍ତର ରଖିବାକୁ ପରାମର୍ଶ ଦେଇଥିଲେ ଉଚ୍ଚତମ ନ୍ୟାୟାଳୟ। କେନ୍ଦ୍ର ପକ୍ଷରୁ ସତ୍ୟପାଠ ଦାଖଲ କରାଯିବା ପରେ ସୁପ୍ରିମକୋର୍ଟ ଏ ମାମଲାର ଶୁଣାଣି କରିବେ।
ରାଜ୍ୟରେ ହ୍ରାସ ପାଇନି ହାତୀ ଓ ବାଘ ସଂଖ୍ୟା: ମନ୍ତ୍ରୀ
ଭୁବନେଶ୍ୱର: ଦେଶରେ ହାତୀ ଓ ବ୍ୟାଘ୍ର ସଂଖ୍ୟା ବଢ଼ୁଥିବା ବେଳେ ରାଜ୍ୟରେ ହ୍ରାସ ପାଉଛି କି ? ବିଧାୟକ ପ୍ରଫୁଲ୍ଲ ସାମଲ ପଚରାଥିବା ଏ ସମ୍ପର୍କିତ ପ୍ରଶ୍ନର ଉତ୍ତର ରଖିଛନ୍ତି ଜଙ୍ଗଲ ଓ ପରିବେଶ ମନ୍ତ୍ରୀ । ମନ୍ତ୍ରୀ କହିଛନ୍ତି, ଦେଶରେ ହାତୀ ଓ ବାଘ ସଂଖ୍ୟା ବଢ଼ୁଥିବା ବେଳେ ରାଜ୍ୟରେ ହ୍ରାସ ପାଉଥିବା କଥା ସତ୍ୟ ନୁହେଁ । ୨୦୧୨ ମସିହା ହାତୀ ଗଣନା ଅନୁସାରେ ରାଜ୍ୟରେ ୧୯୩୦ଟି ହାତୀ ଥିଲେ । ୨୦୧୫ ମସିହାରେ ୧୯୫୪ଟି ହାତୀ ଏବଂ ୨୦୧୭ ମସିହାରେ ୧୯୭୬ଟି ହାତୀ ଥିବା ଗଣନା କରାଯାଇଛି ।
ଅର୍ଥାତ୍ ରାଜ୍ୟରେ ପ୍ରତିବର୍ଷ ହାତୀଙ୍କ ସଂଖ୍ୟା ବୃଦ୍ଧି ପାଇଛି । ସେହିଭଳି ବ୍ୟାଘ୍ର ସଂଖ୍ୟାର ଆକଳନ ପ୍ରତି ଚାରିବର୍ଷରେ ଥରେ ଏନଟିସିଏ ଓ ଭାରତୀୟ ବନ୍ୟଜୀବ ସଂସ୍ଥାନ ମିଳିତ ଭାବେ କରିଥାନ୍ତି । ୨୦୧୮ ମସିହାରେ ରାଜ୍ୟରେ ବ୍ୟାଘ୍ର ସଂଖ୍ୟାର ଆକଳନ କରାଯାଇଥିଲା । ରାଜ୍ୟରେ ୨୮ଟି ବାଘ ଥିବା ଆକଳନ କରିଥିଲା ଏନଟିସିଏ ।
୨୦୧୪ରେ ମଧ୍ୟ ଓଡ଼ିଶାରେ ୨୮ଟି ବାଘ ଥିବା ଆକଳନ ହୋଇଥିଲା । ଅର୍ଥାତ୍ ରାଜ୍ୟରେ ବାଘଙ୍କ ସଂଖ୍ୟା ସ୍ଥିର ରହିଛି । ୨୦୧୮ ରିପୋର୍ଟରେ ଏକ ବର୍ଷରୁ ଅଧିକ ବୟସ୍କ ବାଘଙ୍କୁ ସାମିଲ୍ କରାଯାଇଥିଲା । ଶିମିଳିପାଳରେ କ୍ୟାମେରା ଟ୍ରାପ୍ ଦ୍ୱାରା ସଂଗୃହିତ ୨ଟି ବାଘ ଛୁଆଙ୍କୁ ଗଣନା ରିପୋର୍ଟରେ ସ୍ଥାନ ଦିଆଯାଇନାହିଁ ।




