spot_img
Home Blog Page 5382

କରୋନାର ବିନାଶକାରୀ ପରିଣାମ, ଗ୍ରାମାଞ୍ଚଳରେ ୩୭ ପ୍ରତିଶତ ଛାତ୍ରଛାତ୍ରୀ ପଢ଼ାରୁ ବଞ୍ଚିତ

ନୂଆଦିଲ୍ଲୀ: ମହାମାରୀ କରୋନା ପାଇଁ ଦୀର୍ଘ ଦିନ ଧରି ବନ୍ଦ ରହିଛି ସ୍କୁଲ୍ । ଯାହାର ଭୟାବହ ବିନାଶକାରୀ ପରିଣାମ ସାମ୍ନାକୁ ଆସିଛି । ସର୍ଭେରୁ ଜଣାପଡ଼ିଛି, କରୋନା ପାଇଁ ଦେଶର ଗ୍ରାମାଞ୍ଚଳରେ ୩୭ ପ୍ରତିଶତ ପିଲା ପାଠପଢ଼ାରୁ ସମ୍ପୂର୍ଣ୍ଣ ବଞ୍ଚିତ ହୋଇଛନ୍ତି । ୪୮ ପ୍ରତିଶତ ପିଲା ଗୋଟିଏ ମଧ୍ୟ ଶବ୍ଦ ପଢ଼ିବାକୁ ଅକ୍ଷମ ।

ଦ ସ୍କୁଲ୍ ଚିଲଡ୍ରେନ୍ସ ଅନଲାଇନ୍ ଆଣ୍ଡ ଅଫଲାଇନ୍ ଲର୍ଣ୍ଣିଂସ୍ ପକ୍ଷରୁ ଏହି ସର୍ଭେ କରାଯାଇଥିଲା । ଲୁକଡ୍ ଆଉଟ୍: ଏମରଜେନ୍ସି ରିପୋର୍ଟ ଅନ୍ ସ୍କୁଲ୍ ଏଜୁକେସନ ଶୀର୍ଷକ ସର୍ଭେରେ ଦେଶର ପ୍ରାୟ ୧୪୦୦ ଛାତ୍ରଛାତ୍ରୀ ଭାଗ ନେଇଥିଲେ ।

ଆଉ ସର୍ଭେରୁ ମିଳିଥିବା ତଥ୍ୟ ସମସ୍ତଙ୍କ ପାଇଁ ସତର୍କ ଘଣ୍ଟି ଭଳି । ଗ୍ରାମାଞ୍ଚଳର ୨୮ ପ୍ରତିଶତ ଶିକ୍ଷାର୍ଥୀ ସର୍ଭେ ବେଳେ ପଢ଼ାପଢ଼ି କରୁଥିବାବେଳେ ୩୭ ପ୍ରତିଶତ ପାଠପଢ଼ାରୁ ସମ୍ପୂର୍ଣ୍ଣ ବଞ୍ଚିତ । ଆଉ ୫୦ ପ୍ରତିଶତ ପିଲା ଗୋଟିଏ ମଧ୍ୟ ବାକ୍ୟ ପଢ଼ିବାକୁ ସକ୍ଷମ ହୋଇ ନଥିଲେ ।

ସର୍ଭେ ଅନୁସାରେ, ସହରାଞ୍ଚଳରେ ୪୭ ପ୍ରତିଶତ ପିଲା ନିୟମିତ ପାଠ ପଢ଼ଥିବା ବେଳେ ୧୯ ପ୍ରତିଶତ ନିୟମିତ ପଢ଼ିବାକୁ ସକ୍ଷମ ନୁହଁନ୍ତି । ସେହିଭଳି ଗୋଟିଏ ଧାଡ଼ି ପଢ଼ିବାରେ ଅକ୍ଷମ ସହରାଞ୍ଚଳରେ ରହୁଥିବା ୪୨ ପ୍ରତିଶତ ଛାତ୍ରଛାତ୍ରୀ । ମହାମାରୀ ପାଇଁ ଦେଢ଼ବର୍ଷ ଧରି ଦେଶରେ ସ୍କୁଲ ବନ୍ଦ ରହିଛି । କୋଭିଡ୍ ସ୍ଥିତିରେ ସୁଧାର ଆସିବା ପରେ କେତେକ ରାଜ୍ୟ ସେପ୍ଟେମ୍ବରରେ ପର୍ଯ୍ୟାୟ ଭିତ୍ତିରେ ଶ୍ରେଣୀଗୃହ ପାଠପଢ଼ା ପୁଣି ଆରମ୍ଭ କରିଛନ୍ତି ।

ରିପୋର୍ଟ ଅନୁସାରେ, ସହରାଞ୍ଚଳରେ ନିୟମିତ ୨୪ ପ୍ରତିଶତ ପିଲା ଅନଲାଇନ୍ କ୍ଲାସ ଆଟେଣ୍ଡ କରୁଥିବା ବେଳେ ଗ୍ରାମାଞ୍ଚଳରେ ଏହା ମାତ୍ର ୮ ପ୍ରତିଶତ । ଦୁର୍ବଳ ଆର୍ଥିକ ସ୍ଥିତି, ନେଟୱର୍କ ସମସ୍ୟା ଏବଂ ସ୍ମାର୍ଟଫୋନ୍ ନଥିବା କାରଣରୁ ଅନଲାଇନ୍ ଶିକ୍ଷାରୁ ପିଲାମାନେ ବଞ୍ଚିତ ହୋଇଛନ୍ତି । ଗ୍ରାମାଞ୍ଚଳରେ ୫୦ ପ୍ରତିଶତ ପରିବାର ପାଖରେ ସ୍ମାର୍ଟଫୋନ୍ ନାହିଁ । ଆଉ ଆଦିବାସୀ ଓ ଦଳିତ ପରିବାର କ୍ଷେତ୍ରରେ ଏହା ଆହୁରି ଚିନ୍ତାଜନକ । ମାତ୍ର ୪ ପ୍ରତିଶତ ଏସସି, ଏସଟି ଛାତ୍ରଛାତ୍ରୀ ନିୟମିତ ଅନଲାଇନରେ ପାଠ ପଢ଼ୁଛନ୍ତି । ସେମାନଙ୍କ ମଧ୍ୟରୁ ୫୦ ପ୍ରତିଶତ ଗୋଟିଏ ଧାଡ଼ି ପଢ଼ିବାରେ ସକ୍ଷମ ।

ବିଧାନସଭାରେ ମ୍ୟୁନିସିପାଲ ଆଇନ ସଂଶୋଧନ ବିଲ୍ ୨୦୨୧ ପାରିତ: ପୌର ନିର୍ବାଚନ ବାଟ ଫିଟିଲା

ଭୁବନେଶ୍ୱର: ପୌର ନିର୍ବାଚନ ନେଇ ବାଟ ଫିଟିଲା । ବିଧାନସଭାରେ ମ୍ୟୁନିସିପାଲ ଆଇନ ସଂଶୋଧନ ବିଲ ୨୦୨୧ ପାରିତ ହେବା ପରେ ବାଟ ଫିଟିଛି । ବିଲ ଅନୁଯାୟୀ ଓଡ଼ିଶା ପୌର ବିଧି ସଂଶୋଧନ ବିଧେୟକରେ ଅନୁସୂଚିତ ଜାତି ଓ ଜନଜାତି ଏବଂ ପଛୁଆ ବର୍ଗଙ୍କ ପାଇଁ ସଂରକ୍ଷଣ ୫୦ପ୍ରତିଶତ ଭିତରେ ରହିବ । ଅର୍ଥାତ ସଂରକ୍ଷଣ ବ୍ୟବସ୍ଥା ୫୦ପ୍ରତିଶତ ଅତିକ୍ରମ କରିବ ନାହିଁ । ପଛୁଆ ବର୍ଗଙ୍କ ପାଇଁ ୨୭ ପ୍ରତିଶତ ଭିତରେ ସଂରକ୍ଷଣ ଵ୍ୟଵସ୍ଥା ରହିବ। ଏହି ସଂଶୋଧିତ ଆଇନ ଅନୁସାରେ ପ୍ରଥମେ ଅନୁସୂଚୀତ ଜାତି ଓ ଜନଜାତିଙ୍କୁ ଆବଶ୍ୟକ ସଂଖ୍ୟକ ଆସନ ସଂରକ୍ଷଣ ଦେବା ପରେ ଅବଶିଷ୍ଟ ଆସନ ପଛୁଆ ବର୍ଗଙ୍କ ପାଇଁ ସଂରକ୍ଷଣ ରଖାଯିବ । ଯାହାକି ୨୭ ପ୍ରତିଶତରୁ ଅଧିକ ହେବନାହିଁ ।

ଏଥିସହିତ ପଢ଼ନ୍ତୁ: କରୋନା ସଂକ୍ରମିତ ଚିହ୍ନଟ ହେବା ପରେ ୨ଟି ସ୍କୁଲ ବନ୍ଦ

 

ଗଞ୍ଜେଇ ଡେଲିଭରୀ ଅଭିଯୋଗରେ ଫୁଡ୍ ଡେଲିଭରି ବୟ ଗିରଫ : ସ୍ୱିଗିର ସ୍ପଷ୍ଟୀକରଣ,ଆମ ପାଇଁ କାମ କରନ୍ତି ନାହିଁ ଅଭିଯୁକ୍ତ

ରାଜଧାନୀରେ ଗଞ୍ଜେଇ କାରବାରର ନୂଆ ଟ୍ରେଣ୍ଡ । ସ୍ୱିଗି ବୟ  ଗଞ୍ଜେଇ ଡେଲିଭରୀ କରୁଥିବା ଅଭିଯୋଗ ହୋଇଛି । ଅଭିଯୁକ୍ତ ପ୍ରେମଚନ୍ଦ୍ର ନାୟକଙ୍କୁ ଗଂଜେଇ କାରବାର ଅଭିଯୋଗରେ ଭୁବନେଶ୍ୱର ଅବକାରୀ ମୋବାଇଲ ସ୍କ୍ୱାଡ୍ ଗିରଫ କରିଛି । ପ୍ରେମଚନ୍ଦ୍ର ଠାରୁ ୧୫ କେଜି ଗଞ୍ଜେଇ ଜବତ ହୋଇଛି । ଜବତ ଗଞ୍ଜେଇର ଆନୁମାନିକ ମୂଲ୍ୟ ୭୫ ହଜାର ଟଙ୍କା ହେବେ । ପ୍ରେମଚନ୍ଦ୍ର କେବେ ଠାରୁ ଗଞ୍ଜେଇ କାରବାର କରୁଥିଲା ତଦନ୍ତ କରୁଛି ଅବକାରୀ ମୋବାଇଲ ସ୍କାର୍ଡ ।

ଅନ୍ୟପକ୍ଷରେ ସ୍ୱିଗି ପକ୍ଷରୁ କୁହାଯାଇଛି ଯେ, ଅଭିଯୁକ୍ତ ପ୍ରେମଚନ୍ଦ୍ର ନାୟକ ସେମାନଙ୍କ ପାଇଁ କାମ କରନ୍ତି ନାହିଁ । ସ୍ୱିଗି ପକ୍ଷରୁ ଜାରି ପ୍ରେସ ବିଜ୍ଞପ୍ତିରେ କୁହାଯାଇଛି ଯେ, ଆମେ ଆମର ସମସ୍ତ ଦସ୍ତାବିଜ ଯାଞ୍ଚ ପରେ ନିଶ୍ଚିତ ଯେ, ଅଭିଯୁକ୍ତ ଜଣଙ୍କ ସ୍ୱିଗି ଡେଲିଭରି ପାର୍ଟନର ନୁହଁନ୍ତି କିମ୍ବା ଆମ ସହ କୌଣସି ଭାବେ ଜଡ଼ିତ ନୁହଁନ୍ତି । ତଥାପି, ଆମେ ଯାଞ୍ଚ କରୁଛୁ ଯେ, ତାଙ୍କଠାରୁ ମିଳିଥିବା ବ୍ୟାଗ ନକଲି ଅଥବା ବେଆଇନ ଭାବେ ପ୍ରାପ୍ତ କରାଯାଇଛି କି । ସ୍ୱିଗି ଏପରି କାର୍ଯ୍ୟକୁ ତୀବ୍ର ନିନ୍ଦା କରୁଛି ଏବଂ ପୋଲିସ ସହ ସମସ୍ତ ସହଯୋଗ କରୁଛି ।

ପୂର୍ବରୁ ମଧ୍ୟ ଏଭଳି ଭିନ୍ନ ଭିନ୍ନ ଉପାୟରେ ଗଞ୍ଜେଇ ଚାଲାଣ ହେଉଥିବା ନଜିର ରହିଛି । କୋରିୟରରେ ହେଉଥିଲା ଗଞ୍ଜେଇ ଚାଲାଣ । ଭୁବନେଶ୍ୱର ଲଜିଷ୍ଟିକ୍ ଓ ଟ୍ରାନ୍ସପୋର୍ଟ ସଂସ୍ଥା ମାଧ୍ୟମରେ ହୋଇଥାନ୍ତା ଗଞ୍ଜେଇ ଚାଲାଣ । ଭିଆରଏଲ କୋରିୟର ମାଧ୍ୟମରେ ଗଞ୍ଜେଇ ଭୁବନେଶ୍ଵରରୁ ଦିଲ୍ଲୀକୁ ଗଞ୍ଜେଇ ଚୋରା ଚାଲାଣ ବେଳେ ୨ ଜଣ ମାଫିଆ ଗିରଫ କରିଥିଲା କମିଶନରେଟ୍ ପୋଲିସ । କୋରିୟର ପ୍ୟାକେଟରୁ ୪୫ କେଜିର ଗଞ୍ଜେଇ ଜବତ ହୋଇଥିଲା ।

ଏଥିସହିତ ପଢ଼ନ୍ତୁ: ଜୟପୁରରେ ଜବତ ହେଲା ୧ ଟନ୍ ଗଞ୍ଜେଇ, ୨ଗିରଫ

 

ଧାର୍ମିକ ଅନୁଷ୍ଠାନ, ଡାକ୍ତରଖାନା, ଅଫିସ୍ ଓ ହାଟ ବଜାରରେ କୋଭିଡ୍ ନିୟମ କଡ଼ାକଡ଼ି ପାଇଁ ନିର୍ଦ୍ଦେଶ

ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି କୋଭିଡ ପରିସ୍ଥିତ ସମ୍ପର୍କରେ ସମୀକ୍ଷା କରିଛନ୍ତି । ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ଆମେରିକା ଠାରୁ ଆରମ୍ଭ କରି କେରଳ ପର୍ଯ୍ୟନ୍ତ ବିଭିନ୍ନ ସ୍ଥାନରେ କରୋନା ସଂକ୍ରମଣ ବଢ଼ିବା ଚିନ୍ତାଜନକ । ତେଣୁ ଏ ପରିସ୍ଥିତିରେ ଆମକୁ ସମ୍ଭାବ୍ୟ ତୃତୀୟ ଲହର ଠାରୁ ନିରାପଦ ରହିବାକୁ ହେଲେ, କୋଭିଡ୍ ନିୟମକୁ କଡ଼ାକଡ଼ି ଭାବରେ ପାଳନ କରିବାକୁ ହେବ । ଏଥିରେ ସାମାନ୍ୟ ଅବହେଳା ସମସ୍ତଙ୍କ ପାଇଁ ବିପଦର କାରଣ ହୋଇପାରେ ବୋଲି ମୁଖ୍ୟମନ୍ତ୍ରୀ ସତର୍କ କରାଇ ଦେଇଛନ୍ତି ।

କୋଭିଡ୍ ଆଚରଣବିଧି ହେଉଛି, କୋଭିଡ୍ ବିରୋଧରେ ଲଢିବା ପାଇଁ ସବୁଠାରୁ ଶକ୍ତିଶାଳୀ ଅସ୍ତ୍ର ବୋଲି ବର୍ଣ୍ଣନା କରି ମୁଖ୍ୟମନ୍ତ୍ରୀ କହିଛନ୍ତି, ଏହାର ଉପଯୁକ୍ତ ପାଳନ ସମସ୍ତଙ୍କ ପାଇଁ ଗୁରୁତ୍ବପୂର୍ଣ୍ଣ । ପିଲାମାନେ ଏପର୍ଯ୍ୟନ୍ତ ଟିକା ନେଇନାହାନ୍ତି । ତେଣୁ ସେମାନଙ୍କ ପାଇଁ ଆମକୁ ଅଧିକ ସତର୍କ ରହିବାକୁ ହେବ । କୋଭିଡ୍ ନିୟମ ପାଳନରେ ଅବହେଳା ଯଦି ଦୃଷ୍ଟିକୁ ଆସେ, ତେବେ ଅନୁଷ୍ଠାନର ମୁଖ୍ୟ ଦାୟୀ ରହିବେ ବୋଲି ମୁଖ୍ୟମନ୍ତ୍ରୀ ସତର୍କ କରାଇ ଦେଇଛନ୍ତି । ପ୍ରଶାସନ ଏଥିପାଇଁ ସ୍ବତନ୍ତ୍ର ଚିମ୍‌ ଗଠନ କରି ଶିକ୍ଷାନୁଷ୍ଠାନ ଗୁଡ଼ିକ ନିୟମିତ ଭାବରେ ଅଚାନକ ଯାଞ୍ଚ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

ସେହିପରି ହାଟ ବଜାର, ଧର୍ମାନୁଷ୍ଠାନ, ସ୍ୱାସ୍ଥ୍ୟ ପ୍ରତିଷ୍ଠାନ ଆଦି ଗୁଡ଼ିକ ଉପରେ ସତର୍କ ଦୃଷ୍ଟି ରଖିବା ସହିତ ସେଠାରେ କୋଭିଡ୍ ନିୟମ କଡ଼ାକଡ଼ି ପାଳନ ଉପରେ ପ୍ରଶାସନ ଦୃଷ୍ଟି ରଖିବା ଉପରେ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ସ୍ବାସ୍ଥ୍ୟକର୍ମୀ, ସ୍କୁଲ ଯାଉଥିବା ପିଲା, ଗର୍ଭବତୀ ମହିଳା, ସରକାରୀ କର୍ମଚାରୀ ଏବଂ ପୋଲିସ ଏହି ହାଇରିସ୍କ ଗ୍ରୁପ୍ର । ନିୟମିତ ଭାବରେ ଟେଷ୍ଟିଂ ଜାରି ରଖିବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତିଷ

ଏବେ କେତେକ କ୍ଷେତ୍ରରେ ସ୍ବାସ୍ଥ୍ୟକର୍ମୀଙ୍କ ଭିତରେ ସଂକ୍ରମଣ ନଜରକୁ ଆସୁଛି । ତେଣୁ ଉଭୟ ସରକାରୀ ଓ ବେସରକାରୀ କ୍ଷେତ୍ରରେ କାମ କରୁଥିବା ସ୍ୱାସ୍ଥ୍ୟକର୍ମୀ ଓ ନମୂନା ସଂଗ୍ରହ କରୁଥିବା ଟିମ୍‌ ମାନଙ୍କୁ କୋଭିଡ୍ ନିୟମ ସମ୍ପର୍କରେ ବାରମ୍ବାର ସଚେତନ କରିବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି । ଏହାସହିତ ଡେଲ୍ଟା ଭାରିଏଣ୍ଟ ଅଧିକ ସଂକ୍ରମଣ କରୁଥିବାରୁ ମାଇକ୍ରୋ କଣ୍ଟେନମେଣ୍ଟ ଜୋନ୍ କରି ନିରନ୍ତର ଦୃଷ୍ଟି ରଖିବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି ।

ଯୋଗାଣରେ ବୃଦ୍ଧି ଘଟିଥିବାରୁ ଟିକାକରଣରେ ମଧ୍ୟ ଉନ୍ନତି ଆସିଛି । ତେଣୁ ଯେପରି ସବୁ ଲୋକ ତାଙ୍କର ଦୁଇଟି ଯାକ ଡୋଜ୍ ନିଶ୍ଚିତ ନେବେ, ତାହା ସୁନିଶ୍ଚିତ କରିବା ପାଇଁ ମୁଖ୍ୟମନ୍ତ୍ରୀ ଜିଲ୍ଲାପାଳ ମାନଙ୍କୁ ନିର୍ଦ୍ଦେଶ ଦେଇଥିଲେ । ମୁଖ୍ୟମନ୍ତ୍ରୀ କହିଥିଲେ ଯେ ଆଗକୁ ପାର୍ବଣ ଋତୁ ଆସୁଛି । କେରଳରେ ଓନାମ୍‌ ପର୍ବ ପାଳନ ପରେ ପରେ ସଂକ୍ରମଣ ବୃଦ୍ଧିର ଉଦାହରଣ ଦେଇ ପାର୍ବଣ ସମୟରେ ସମସ୍ତଙ୍କୁ ଅଧିକ ସତର୍କ ରହିବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି । ପରିସ୍ଥିତିର ଗୁରୁତ୍ୱକୁ ଉପଲବ୍ଧି କରିବା ପାଇଁ ସମସ୍ତଙ୍କୁ ନିବେଦନ କରିଥିଲେ । ଏହାଦ୍ବାରା ଆମେ ଭବିଷ୍ୟତରେ ଲକଡାଉନକୁ ଏଡ଼ାଇ ପାରିବା ଏବଂ ଲୋକଙ୍କ ଆର୍ଥିକ ଅବସ୍ଥାରେ କ୍ଷତି ହେବ ନାହିଁ ।

ପାର୍ବଣ ଋତୁ ସମୟରେ ଆମର ଦାୟିତ୍ୱପୂର୍ଣ୍ଣ ବ୍ୟବହାର ହିଁ ତୃତୀୟ ଲହରକୁ ନିୟନ୍ତ୍ରଣ କରିବା ପାଇଁ ନିର୍ଣ୍ଣାୟକ ହେବ ବୋଲି ମତ ଦେଇ ମୁଖ୍ୟମନ୍ତ୍ରୀ ସମସ୍ତଙ୍କୁ ମାସ୍କ ପିନ୍ଧିବା, ହାତ ଧୋଇବା, ସାମାଜିକ ଦୂରତା ରକ୍ଷା କରିବା ଏବଂ ଭିଡକୁ ନ ଯିବା ପାଇଁ ଅନୁରୋଧ କରିଥିଲେ ।

ମୁଖ୍ୟମନ୍ତ୍ରୀ କହିଥିଲେ ଯେ ବର୍ତ୍ତମାନ ସାଧାରଣ ଲୋକଙ୍କ ସ୍ବାର୍ଥକୁ ଦୃଷ୍ଟିରେ ରଖି ଲକଡାଉନ୍ କୋହଳ କରାଯାଇଛି । କିନ୍ତୁ ତାର ଅର୍ଥ ନୁହେଁ ଯେ ଆମେ ନିୟମ ପାଳନରେ ଢିଲା କରିବା । ଯଦି ଆବଶ୍ୟକ ପଡ଼େ, ସାମୂହିକ ସ୍ୱାର୍ଥ ଦୃଷ୍ଟିରୁ ରାଜ୍ୟ ସରକାର ପୁଣି ଥରେ ଲକଡାଉନ୍ ପାଇଁ ବାଧ୍ୟ ହେବେ ବୋଲି ମୁଖ୍ୟମନ୍ତ୍ରୀ ସତର୍କ କରାଇଛନ୍ତି ।

ବୈଠକରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶର ଅନୁପାଳନ ଉପରେ ଗୁରୁତ୍ବ ଦେଇଥିଲେ । ସ୍ୱାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପି.କେ. ମହାପାତ୍ର ଏବଂ ବିଦ୍ୟାଳୟ ଓ ଗଣଶିକ୍ଷା ବିଭାଗର ପ୍ରମୁଖ ସଚିବ ସତ୍ୟବ୍ରତ ସାହୁ ବିଭାଗୀୟ କାର୍ଯ୍ୟକ୍ରମ ଉପରେ ଉପସ୍ଥାପନା ରଖିଥିଲେ ।

ପୋଲିସ ମହାନିର୍ଦ୍ଦେଶକ ଅଭୟ ମଧ୍ୟ କୋଭିଡ୍ ନିୟମ ଅନୁପାଳନ ଉପରେ ପୋଲିସର ପଦକ୍ଷେପ ଉପରେ ସୂଚନା ଦେଇଥିଲେ । ବିଏମସି ଏବଂ ସିଏମସି କମିଶନର, ଦେବଗଡ଼ ଓ ପୁରୀର ଜିଲ୍ଲାପାଳମାନେ ସେମାନଙ୍କ ଅଞ୍ଚଳର ପରିସ୍ଥିତି ଉପରେ ସୂଚନା ଦେଇଥିଲେ । ମୁଖ୍ୟମନ୍ତ୍ରୀଙ୍କ ସଚିବ ୫-ଟି ଭି.କେ. ପାଣ୍ଡିଆନ କାର୍ଯ୍ୟକ୍ରମ ସଞ୍ଚାଳନ କରିଥିଲେ । ଉନ୍ନୟନ କମିଶନର ଓ ବିଭିନ୍ନ ବିଭାଗର ସଚିବମାନେ ଉପସ୍ଥିତ ଥିଲେ।

ଓୱେସିଙ୍କ ଅଯୋଧ୍ୟା ଗସ୍ତ ନେଇ ସନ୍ଥଙ୍କ ଧମକ, ‘ମର୍ଯ୍ୟାଦା ଲଂଘିଲେ ଗଳା କାଟି ଦେବୁ’

ଅଯୋଧ୍ୟା: ରାମଙ୍କ ନଗରୀରେ ପୁଣି ରାଜନୀତି ସରଗରମ । ୨୦୨୨ ଭୋଟ୍ ପୂର୍ବରୁ ନିର୍ବାଚନୀ ଅଭିଯାନ ଆରମ୍ଭ କରୁଥିବା ଏଆଇଏମ୍ଆଇଏମ୍ ମୁସଲିମ୍ ବହୁଳ ଅଞ୍ଚଳ ଋଦୌଲି ଉପରେ ନଜର ରଖିଛି । ଏଥିପାଇଁ ଦଳର ରାଷ୍ଟ୍ରୀୟ ଅଧ୍ୟକ୍ଷ ଅସଦୁଦ୍ଦିନ ଓୱେସି ଅଯୋଧ୍ୟା ପହଞ୍ଚିବେ । ଓୱେସି ଅଯୋଧ୍ୟା ଯାଉଥିବା ବେଳେ ସନ୍ଥ ଚେତାବନୀ ଦେଇଛନ୍ତି । ଯଦି ଓୱେସି ହିନ୍ଦୁ ଭାବନାକୁ କୌଣସି ପ୍ରକାରେ ଅପମାନ କରିବେ, ତାହାଲେ ଗଳା କାଟି ଦେବୁ । ଏହା ପୂର୍ବରୁ ଓୱେସି ସମ୍ମିଳନୀ ପାଇଁ ଲଗାଇଥିବା ପୋଷ୍ଟରରେ ଅଯୋଧ୍ୟା ସ୍ଥାନରେ ଫୈଜାବାଦ ଲେଖିଥିଲେ । ଯାହାକୁ ନେଇ ସନ୍ଥ ସମାଜ ଆପତ୍ତି ଉଠାଇଥିଲେ ।

ବୟାନକୁ ନେଇ ଚର୍ଚ୍ଚାରେ ରହୁଥିବା ଓୱେସିଙ୍କୁ ବାବ୍ରୀ ମସଜିଦ୍ ନାମ ମଧ୍ୟ ନନେବାକୁ ସନ୍ଥ ଚେତାବନୀ ଦେଇଛନ୍ତି । ଅଯୋଧ୍ୟା ତପସ୍ୱୀ ପୀଠର ପୀଠାଧିଶ ଜଗଦଗୁରୁ ପରମହଂସ ଆଚାର୍ଯ୍ୟ କହିଛନ୍ତି, କୌଣସି ପ୍ରକାରେ ଭଗବାନ ରାମ କିମ୍ବା ଅଯୋଧ୍ୟାକୁ ଅପମାନ କଲେ, ତାଙ୍କ ଗଳା କାଟି ଦେବୁ । ରାମ ମନ୍ଦିର ସମର୍ଥକ ଓ ମୁସଲିମ୍ ସମାଜର କାର୍ଯ୍ୟକର୍ତ୍ତା ଅନିସ ଖାନ କହିଛନ୍ତି, ଭଗବାନ ରାମଙ୍କୁ ନେଇ ଓୱେସି କୌଣସି ଉତ୍ତେଜନାପୂର୍ଣ୍ଣ ଭାଷଣ ଦେଲେ ଠିକ୍ ହେବ ନାହିଁ ।

ତପସ୍ୱୀ ପୀଠର ପୀଠାଧିଶ କହିଛନ୍ତି ସୁପ୍ରିମକୋର୍ଟଙ୍କ ଆଦେଶ ପରେ ମଧ୍ୟ ଓୱେସି ବାବ୍ରୀ ରାଗ ସୁଝାଇବାକୁ ଚାହିଁଲେ କିଛି ଠିକ୍ ହେବନି । ମର୍ଯ୍ୟାଦା ପୁରୁଷୋତ୍ତମ ଭଗବାନ ଶ୍ରୀରାମଙ୍କ ଧର୍ମ ନଗରୀ । ଏଠି ମର୍ଯ୍ୟାଦାଜନକ ଶବ୍ଦ ବ୍ୟବହାର କରନ୍ତୁ । ରାମଙ୍କ ବିଷୟରେ କୌଣସି ପ୍ରକାରେ ଉତ୍ତେଜନାପୂର୍ଣ୍ଣ ଭାଷଣ କିମ୍ବା କଦର୍ଥ ଶବ୍ଦ ବ୍ୟବାହର ଓୱେସିଙ୍କୁ ମହଙ୍ଗା ପଡ଼ିବ । ବାବରଙ୍କୁ ଆତଙ୍କବାଦୀ ଓ ଲୁଟେରା କହି ଅଯୋଧ୍ୟା ମାଟିରେ ତାଙ୍କ ନାଁ ନେବାକୁ ଧମକ ଦେଇଛନ୍ତି ସନ୍ଥ ।

ରୁଚିକା ମାର୍କେଟ ମହାବୀର ବସ୍ତି ନିକଟରୁ ଯୁବତୀଙ୍କ ମୃତଦେହ ଉଦ୍ଧାର

ଭୁବନେଶ୍ୱର: ରାଜଧାନୀରେ ଯୁବତୀଙ୍କ ସନ୍ଦେହ ଜନକ ଅବସ୍ଥାରେ ମୃତଦେହ ଉଦ୍ଧାର । ବନ୍ଦ ଘରୁ ବାହାରିଲା ଯୁବତୀଙ୍କ ମୃତଦେହ । ବରମୁଣ୍ଡା ରୁଚିକା ମାର୍କେଟ ମହାବୀର ବସ୍ତି ନିକଟରେ ଘଟିଛି ଘଟଣା । ଘଟଣା ସ୍ଥଳରେ ଭରତପୁର ଥାନା ପୋଲିସ ପହଞ୍ଚି ଶବ ବ୍ୟାବଚ୍ଛେଦ କରିବା ପାଇଁ ନେଇଛି । ୧୦ ଦିନ ହେବ ଘର ଭଡ଼ା ନେଇ ସ୍ୱାମୀ ସ୍ତ୍ରୀ ରହୁଥିଲେ । ପ୍ରାୟ ପାଞ୍ଚ ଦିନ ହେବ ଘର ତାଲା ପଡ଼ିଥିଲା । ଆଜି ଅଧିକ ଦୁର୍ଗନ୍ଧ ହେବାରୁ ପୋଲିସକୁ ଜଣାଇ ଥିଲେ । ଭରତପୁର ପୋଲିସ ଓ ସାଇଣ୍ଟିଫିକ୍ ଟିମ ପହଞ୍ଚି ଶବକୁ ଉଦ୍ଧାର କରିଛି । ମୃତ ମହିଳା ଜଣଙ୍କର ବୟସ ପ୍ରାୟ ୧୯ ବର୍ଷ ହେବ। ଘଟଣା ସ୍ଥଳରୁ ସ୍ୱାମୀ ଫେରାର ଥିବା ଜଣାପଡ଼ିଛି ।

ଏଥିସହିତ ପଢ଼ନ୍ତୁ: ଟଳିଲା ସଂକଟ: ସିଂହ ସଫାରୀରୁ ଉଦ୍ଧାର ହେଲେ ପର୍ଯ୍ୟଟକ

ନାଗପୁରରୁ ମାତ୍ର ୧୪ ମାମଲା ଚିହ୍ନଟ, ତଥାପି ମନ୍ତ୍ରୀ କାହିଁକି କହିଲେ ତୃତୀୟ ଲହରର ଘୋଷଣା

ମୁମ୍ବାଇ: ମହାରାଷ୍ଟ ନାଗପୁରରେ ଅକ୍ଷୟ ଶକ୍ତି ମନ୍ତ୍ରୀ ନୀତିନ ରାଉତ କରୋନାର ତୃତୀୟ ପ୍ରବାହ ଆସୁଥିବା ନେଇ ଘୋଷଣା କରିଛନ୍ତି । ନାଗପୁର ସହରରେ ବିଗତ କିଛିଦିନ ହେଲା ଦୈନିକ କରୋନା ସଂକ୍ରମଣ ମାମଲା ୨ ଅଙ୍କରେ ରହୁଛି । ବିଗତ ୨୪ ଘଣ୍ଟାରେ ସହରରେ କରୋନାର ୧୪ଟି ମାମଲା ଆସିଛି । ସଂକ୍ରମିତ ଚିହ୍ନଟ ହେଉଥିବା ବେଳେ ଦୈନିକ ମୃତ୍ୟୁ ଶୂନ ରହିଛି ।

ଏଥିସହ ପଢ଼ନ୍ତୁ: ଦୁନିଆର ପ୍ରଥମ ଦେଶ ଭାବେ ୨ ବର୍ଷରୁ ଛୁଆଙ୍କୁ କରୋନା ଟିକା ଦେଲା କ୍ୟୁବା

ମନ୍ତ୍ରୀ ନୀତିନ ରାଉତ କହିଛନ୍ତି, ଆଜି ଲମ୍ବା ବ୍ୟବଧ୍ୟାନ ପରେ କରୋନା ସଂକ୍ରମିତଙ୍କ ସଂଖ୍ୟା ୨ ଗୁଣ ହୋଇଛି । ତୃତୀୟ ଲହର ଆସି ସାରିଛି । ଏହା ପୂର୍ବରୁ ମନ୍ତ୍ରୀ ଅଧିକାରୀଙ୍କ ସହ ସମୀକ୍ଷା ବୈଠକ କରି ସଂକ୍ରମଣ ରୋକିବା ପାଇଁ ଗାଇଡଲାଇନ୍ ଜାରି ପାଇଁ ସ୍ଥାନୀୟ ପ୍ରଶାସନକୁ କହିଥିଲେ ।

ସହରରେ ବଢ଼ୁଥିବା ସଂକ୍ରମଣକୁ ନେଇ ମନ୍ତ୍ରୀ ଚିନ୍ତାବ୍ୟକ୍ତ କରିଛନ୍ତି । ଦୈନିକ ମାମଲା ମାତ୍ର ୧୪ ଥିବାବେଳେ କାହିଁକି ସେ ତୃତୀୟ ଲହର ଆସିଥିବା ଘୋଷଣା କଲେ କହିଛନ୍ତି । ଦୁଇ ଡୋଜ୍ ଟିକା ନେଇଥିବା ବ୍ୟକ୍ତି ଓ ଛୁଆ ସଂକ୍ରମିତ ହେଉଛନ୍ତି । ଏଥିପାଇଁ ଆଶଙ୍କା ବଢ଼ୁଛି । ଦ୍ୱିତୀୟ ପ୍ରବାହ ମଧ୍ୟ ଏଭଳି ଆରମ୍ଭ ହୋଇଥିଲା ।

ଟଳିଲା ସଂକଟ: ସିଂହ ସଫାରୀରୁ ଉଦ୍ଧାର ହେଲେ ପର୍ଯ୍ୟଟକ

0

ମେଣ୍ଢାଶାଳ: ଟଳିଲା ସଙ୍କଟ । ଉଦ୍ଧାର ହେଲେ ପର୍ଯ୍ୟଟକ । ନନ୍ଦନକାନନ ପ୍ରାଣୀ ଉଦ୍ୟାନର ସିଂହ ସଫାରୀରେ ଫସି ରହିଥିଲା ସଫାରୀ ବସ । ଆଜି ମଧ୍ୟାହ୍ନରେ ପର୍ଯ୍ୟଟକମାନେ ସଫାରୀ ବୁଲିବା ସମୟରେ ସିଂହ ସଫାରୀରେ କାଦୁଆ ରାସ୍ତା ଯୋଗୁ ବସଟି ଦବି ଯାଇଥିଲା । ସିଂହ ସଫାରୀରେ ସିଂହମାନେ ମୁକ୍ତ ବିଚରଣ କରୁଥିବାରୁ ପର୍ଯ୍ୟଟକମାନେ ଆତଙ୍କିତ ହୋଇଯାଇଥିଲେ । ପଯ୍ୟଟକଙ୍କୁ ଉଦ୍ଧାର କରିବା ପାଇଁ ଲାଗିଥିଲା ପ୍ରାୟ ୩ ଘଣ୍ଟାର ସମୟ । ସଫାରୀରେ ଥିବା ୩ଟି ସିଂହଙ୍କୁ ଫିଡିଙ୍ଗ ଚାମ୍ବର ନିଆଯାଇ ପଯ୍ୟଟକଙ୍କୁ ଉଦ୍ଧାର କରାଯାଇଥିଲା । ସୁରକ୍ଷିତ ଭାବେ ସିଂହ ସଫାରୀରୁ ଉଦ୍ଧାର ହୋଇଛନ୍ତି ସମସ୍ତ ପଯ୍ୟଟକ । ।

ସୂଚନା ଯୋଗ୍ୟ ଯେ, ଦିନ ୧୨ ଘଣ୍ଟିକା ସମୟରେ ସିଂହ ସଫାରୀରେ ୨ଟି ବସ୍‌କୁ ଘେରିଥିଲେ ୨ଟି ସିଂହ । ବସ୍‌ରେ ୩୩ ଜଣ ପର୍ଯ୍ୟଟକ ଥିଲେ। ସଫାରୀ ଭିତରେ ରାସ୍ତାରେ ବସ୍ ଦବି ଯାଇଥିଲା। ଏହି ସମୟରେ ୨ଟି ସିଂହ ସଫାରୀ ବସ୍‌କୁ ଘେରି ଯାଇଥିଲେ। ତେବେ ଜଣେ ଗାଇଡ୍‌ଙ୍କ ଉପସ୍ଥିତ ବୁଦ୍ଧି ଯୋଗୁଁ ଏକ ବଡ଼ ଅଘଟଣ ବର୍ତ୍ତି ଯାଇଛି । ସମସ୍ତ ପର୍ଯ୍ୟଟକ ସୁରକ୍ଷିତ ଅଛନ୍ତି । ସିଂହମାନଙ୍କୁ ଫିଡିଂ ଚାମ୍ବରକୁ ନିଆଯାଇ ଆଉ ଏକ ବସ୍ ଯୋଗେ ସମସ୍ତ ପର୍ଯ୍ୟଟକଙ୍କୁ ଉଦ୍ଧାର କରାଯାଇଛି।

ଏଥିସହିତ ପଢ଼ନ୍ତୁ: ଟ୍ରଲିର ତିନି ଚକରେ ଅଟକି ଯାଇଛି ୩ ଅନାଥ ଶିଶୁଙ୍କ ଭାଗ୍ୟ, ଶିକ୍ଷା ପାଇଁ ଅର୍ଥ ସାଜିଛି ବାଧକ

ଦୁନିଆର ପ୍ରଥମ ଦେଶ ଭାବେ ୨ ବର୍ଷରୁ ଛୁଆଙ୍କୁ କରୋନା ଟିକା ଦେଲା କ୍ୟୁବା

ନୂଆଦିଲ୍ଲୀ: ଛୁଆଙ୍କୁ କରୋନା ଟିକା ଦେବା ନେଇ ଦୁନିଆ ବ୍ୟାପୀ ଏବେ ଅଧ୍ୟୟନ କିମ୍ବା ପରୀକ୍ଷଣ ଜାରି ରହିଛି । ଭ୍ୟାକ୍ସିନକୁ ଛୁଆଙ୍କ ରୋଗ ପ୍ରତିଶେଧକ କ୍ଷମତା ଉପରେ ପରୀକ୍ଷଣ କରି ସେମାନଙ୍କ ଲାଗି ସୁରକ୍ଷିତ କରାଯାଉଛି । ବଡ଼ ବଡ଼ ରାଷ୍ଟ୍ର ଛୁଆଙ୍କ ଟିକାକରଣ ଆରମ୍ଭ କରିନଥିବା ବେଳେ କ୍ୟୁବା ନେଇଛି ବଡ଼ ପଦକ୍ଷେପ । ପୂର୍ବରୁ କ୍ୟୁବାରେ ୧୨ ବର୍ଷରୁ ଅଧିକ ବୟସର ଛୁଆଙ୍କୁ କରୋନା ଟିକା ଦିଆଯାଇଥିଲା । ଏବେ ୨ ବର୍ଷ ବୟସରୁ ଅଧିକ ଛୁଆଙ୍କୁ ଟିକାକରଣ ଆରମ୍ଭ ହୋଇଛି । ୨ ବର୍ଷର ଛୁଆଙ୍କୁ କରୋନା ଟିକା ଦେବାରେ କ୍ୟୁବା ଦୁନିଆରେ ପ୍ରଥମ ।

ମିଡିଆ ରିପୋର୍ଟ ଅନୁସାରେ, ଏବେ କ୍ୟୁବାରେ ଲୋକଙ୍କୁ ୨ ପ୍ରକାରର କରୋନା ଟିକା ଦିଆଯାଉଛି । ଅବଦଲା ଓ ସୋବେରନା ଟିକା କ୍ୟୁବାରେ ଦିଆଯାଉଛି । ଛୁଆଙ୍କ ଉପରେ ମଧ୍ୟ ଏହି ଟିକାର ମେଡିକାଲ ପରୀକ୍ଷଣ ସରିଛି । ତେବେ ଏହି ୨ ଟିକା ବିଶ୍ୱ ସ୍ୱାସ୍ଥ୍ୟ ସଂଗଠନ ଏ ପର୍ଯ୍ୟନ୍ତ ଅନୁମତି ଦେଇ ନାହିଁ ।

କ୍ୟୁବାରେ ସେପ୍ଟେମ୍ବର ୩ରୁ ୧୨ ବର୍ଷରୁ ଅଧିକ ବୟସ୍କ ଛୁଆଙ୍କୁ ଟିକା ଦେବା ଆରମ୍ଭ ହୋଇଥିଲା । ଏହାପରେ ସୋମବାର ୨ରୁ ୧୧ ବର୍ଷ ବୟସ୍କ ଛୁଆଙ୍କୁ ଟିକା ଦିଆଯାଉଛି । ଏବେ ଦୁନିଆରେ ଛୁଆଙ୍କୁ ଟିକା ଦେବା ନେଇ ପରୀକ୍ଷଣ ଚାଲିଛି । ଚୀନ, ୟୁଏଇ ଓ ଭେନଜୁଏଲା ଭଳି ଦେଶ ଛୁଆଙ୍କୁ କରୋନା ଟିକା ଦେବା ନେଇ ଘୋଷଣା କରି ଥିବାବେଳ ଟିକାକରଣ ଆରମ୍ଭ ହୋଇନାହିଁ । ଭାରତରେ ମଧ୍ୟ ୧୨ ବର୍ଷରୁ ଊର୍ଦ୍ଧ୍ୱ ଛୁଆଙ୍କୁ ଟିକା ଦେବା ନେଇ ପ୍ରସ୍ତୁତି ଆରମ୍ଭ ହୋଇଛି । ଏଥିପାଇଁ ଜାଇଡସ୍ କ୍ୟାଡିଲାର କରୋନା ଟିକାକୁ ଜରୁରୀକାଳୀନ ବ୍ୟବହାର ଅନୁମତି ମିଳିଛି ।

ବିଧାନସଭାରେ ଆଗତ ହେଲା ଓଡ଼ିଶା ପଞ୍ଚାୟତ ଆଇନ ସଂଶୋଧନ ବିଲ୍-୨୦୨୧, ସଂରକ୍ଷିତ ରହିବ ୫୦ପ୍ରତିଶତ ସିଟ୍‌

ଭୁବନେଶ୍ୱର: ପଞ୍ଚାୟତ ନିର୍ବାଚନ ପାଇଁ ଆଉ ପାଦେ ଆଗେଇଲେ ରାଜ୍ୟ ସରକାର । ବିଧାନସଭାରେ ଆଗତ ହୋଇଛି ଓଡିଶା ପଞ୍ଚାୟତ ଆଇନ ସଂଶୋଧନ ବିଲ୍‌-୨୦୨୧। ବିଲ୍‌ ଅନୁସାରେ ଅନୁସୂଚିତ ଜାତି ଓ ଜନଜାତି ଏବଂ ପଛୁଆ ବର୍ଗଙ୍କ ପାଇଁ ସଂରକ୍ଷଣ ୫୦ ପ୍ରତିଶତ ଭିତରେ ରହିବ। ଅର୍ଥାତ ସଂରକ୍ଷଣ ବ୍ୟବସ୍ଥା ୫୦ ପ୍ରତିଶତ ଅତିକ୍ରମ କରିବ ନାହିଁ । ପଛୁଆ ବର୍ଗଙ୍କ ପାଇଁ ୨୭ ପ୍ରତିଶତ ଭିତରେ ସଂରକ୍ଷଣ ଵ୍ୟଵସ୍ଥା ରହିବ। ପଛୁଆ ବର୍ଗଙ୍କ ସଂରକ୍ଷଣ ବ୍ୟବସ୍ଥାରେ ଯାହା ଲାଗୁ ହେବ ତାହା ପ୍ରାଧିକୃତ ଅଧିକାରୀ କାର୍ଯ୍ୟକାରୀ କରିବେ। ତ୍ରିସ୍ତରୀୟ ପଞ୍ଚାୟତରାଜ ବ୍ୟବସ୍ଥାରେ ଏସ୍‌ସି, ଏସ୍‌ଟିଙ୍କ ପାଇଁ ଆବଶ୍ୟକ ସଂଖ୍ୟକ ଆସନ ସଂରକ୍ଷଣ ହେବା ପରେ ଅବଶିଷ୍ଟ ଆସନଗୁଡିକ ପଛୁଆ ବର୍ଗଙ୍କ ଲାଗି ସଂରକ୍ଷଣ କରାଯିବ। କିନ୍ତୁ ତାହା ୨୭ ଭିତରେ ରହିବ। ଯେଉଁଠି ପେଶା ଆଇନ କାର୍ଯ୍ୟକାରୀ ହେଉଛି କିମ୍ବା ସିଡ୍ୟୁଲ ଏରିଆରେ ୫୦ ପ୍ରତିଶତ ସଂରକ୍ଷଣ ବ୍ୟବସ୍ଥା ଲାଗୁ ହେବନାହିଁ। ଏ ବିଲ୍‌ ବିଧାନସଭାରେ ପାରିତ ହେଲେ ପଞ୍ଚାୟତ ନିର୍ବାଚନ ପାଇଁ ବାଟ ଫିଟିବ। ଅନ୍ୟପକ୍ଷରେ ଓଡ଼ିଶା ପୌର ବିଧି ସଂଶୋଧନ ବିଧେୟକ ଗତକାଲି ଗୃହରେ ଉପସ୍ଥାପିତ ହୋଇଛି ।

ଏଥିସହିତ ପଢ଼ନ୍ତୁ: ୨ଟି ଗାଁ ପାଇଁ ଶିମିଳିପାଳକୁ ମିଳୁନି ପୂର୍ଣ୍ଣାଙ୍ଗ ଜାତୀୟ ଉଦ୍ୟାନ ମାନ୍ୟତା