ବାଲେଶ୍ୱର: ଏସିଏଫ୍ ସୌମ୍ୟରଞ୍ଜନ ମୃତ୍ୟୁ ମାମଲାରେ ପତ୍ନୀ ବିଦ୍ୟାଭାରତୀଙ୍କୁ ଘନ ଘନ ଜେରା କରୁଛି କ୍ରାଇମବ୍ରାଞ୍ଚ। ୨ଜଣ ମହିଳା ଅଫିସରଙ୍କ ସହ ୫ଜଣିଆ ଟିମ୍ କପ୍ତିପଦାରେ ପହଞ୍ଚି ଜେରା ଆରମ୍ଭ କରିଛନ୍ତି। ବିଦ୍ୟାଭାରତୀଙ୍କ ସହ ତାଙ୍କ ବାପା ମାଙ୍କୁ ମଧ୍ୟ ଜେରା କରୁଛି କ୍ରାଇମବ୍ରାଞ୍ଚ। ବିଦ୍ୟାଙ୍କୁ ଜେରା ପାଇଁ କ୍ରାଇମ ଏଗ୍‌ନଷ୍ଟ ଓମେନ ଶାଖାର ଦୁଇଜଣ ମହିଳା ଅଫିସର ରହିଛନ୍ତି।

ଗତକାଲି କ୍ରାଇମ୍‌ବ୍ରାଞ୍ଚର ୪ଜଣିଆ ଟିମ୍ ଖଇରାର ବେଗୁନିଆରେ ପହଞ୍ଚି ସୌମ୍ୟଙ୍କ ପରିବାରର ସଦସ୍ୟଙ୍କୁ ପଚରାଉଚରା କରିଥିଲା। କ୍ରାଇମବ୍ରାଞ୍ଚ ଡିଏସପି ଜ୍ଞାନରଞ୍ଜନ ମିଶ୍ରଙ୍କ ନେତୃତ୍ୱରେ ଟିମ୍ ସୌମ୍ୟଙ୍କ ବାପା, ମା, ମାମୁ ଓ ମାଇଁଙ୍କୁ କରିଥିଲା ପଚରାଉଚରା। ଦୀର୍ଘ ସାଢ଼େ ତିନି ଘଣ୍ଟାର ପଚରାଉଚରା ପରେ କିଛି ତଥ୍ୟ ହାସଲ କରିଛି କ୍ରାଇମ୍‌ବ୍ରାଞ୍ଚ ଟିମ୍। ବିଦ୍ୟାଭାରତୀ ଚାକିରି କରିବା ଓ ସୌମ୍ୟ କହିଥିବା କଥା, ଗୋଟି ଗୋଟି କରି କ୍ରାଇମବ୍ରାଞ୍ଚ ଆଗରେ କହିଛନ୍ତି ପରିବାର ଲୋକ।

ପାରାଦୀପ: ପାରାଦୀପ ବନ୍ଦର ନିଷିଦ୍ଧାଞ୍ଚଳରେ ବୁଲୁଛି ବାଘ। ଏଭଳି ଏକ ଭିଜୁଆଲ ଭାଇରାଲ ହେଉଥିବା ବେଳେ ଏହାକୁ ନେଇ ଶ୍ରମିକଙ୍କ ମଧ୍ୟରେ ଆତଙ୍କ ଖେଳିଯାଇଛି। ତେବେ ସିସିଟିଭିରେ କଏଦ ହୋଇଥିବା ଭିଜୁଆଲରେ ସ୍ପଷ୍ଟ ଜଣାପଡୁ ନାହିଁ ଏହା ବାଘ ନା ବଡ ଭୁଆଁ ବିଲେଇ। ଗତ ଦୁଇବର୍ଷ ତଳେ ଏହିଭଳି ଏକ ବିଲେଇର ଗଲ୍ଫ କୋର୍ସ ରାସ୍ତାରେ ଗାଡ଼ି ଧକ୍କାରେ ମୃତ୍ୟୁ ହୋଇଥିଲା।

ଏହାର ଆକାରକୁ ନେଇ ପ୍ରଥମେ ଏହାକୁ ସମସ୍ତେ ବାଘ ବୋଲି କହିଥିବା ବେଳେ ଏହା ଏକ ବଣ ଭୁଆଁ ବୋଲି ବନବିଭାଗ ସ୍ପଷ୍ଟ କରିଛି। ପାରାଦ୍ଵୀପର ଗଲ୍ଫ କୋର୍ସ ଓ ବନ୍ଦର ନିଷିଦ୍ଧାଞ୍ଚଳରେ ଘଞ୍ଚ ଜଙ୍ଗଲିଆ ସ୍ଥାନ ରହିଥିବାରୁ ଏବେବି ଏଠାରେ ପ୍ରଚୁର ବିଲୁଆ ଥିବା ବେଳେ ପୂର୍ବରୁ ହେଟାବାଘ ମଧ୍ୟ ଦେଖାଯାଇଥାନ୍ତି। ମାତ୍ର ସିସିଟିଭି ଫୁଟେଜରେ ଦେଖାଯାଉଥିବା ଜନ୍ତୁଟି ବହୁତ ବଡ଼ ଓ ଲମ୍ବା ଦେଖା ଯାଉଥିବାରୁ ଲୋକମାନେ ଏହାକୁ ଚିତାବାଘ ବୋଲି ଅନୁମାନ କରୁଛନ୍ତି।

କଟକ: ଭଙ୍ଗାଗଲା କଟକ କିଶନନଗରର ବହୁ ପୁରାତନ ରଟିଲୋ ପଞ୍ଚମୁଖୀ ହନୁମାନ ମନ୍ଦିର ଓ ତାର ପରିପାଟି। ସ୍ଥାନୀୟ ଜନସାଧରଣଙ୍କ ବହୁ ବିରୋଧ ଓ ଆଇନଗତ ଲଢେଇ ପରେ ଆଜି ଶେଷରେ ଜାତୀୟ ସବୁଜ ଟ୍ରିବୁନାଲଙ୍କ ନିର୍ଦ୍ଦେଶକୁ ପାଳନ କରି ଜିଲ୍ଲା ପ୍ରଶାସନ ମନ୍ଦିର ଭାଙ୍ଗିଛି। ଟ୍ରିବୁନାଲଙ୍କ ନିର୍ଦ୍ଦେଶ ଅନୁଯାୟୀ ମହାନଦୀ ପଠାରେ ବେଆଇନ ଜବରଦଖଲ ଥାଇ ମନ୍ଦିର ନିର୍ମାଣ ହୋଇଥିବାରୁ ନଦୀ ପଠାରେ ବନ୍ୟାଜଳ ନିଷ୍କାସନ ପାଇଁ ଏହାକୁ ଭଙ୍ଗାଯାଇଛି।

ପୂର୍ବରୁ ପ୍ରଶାସନ ଏହାକୁ ଭାଙ୍ଗିବାପାଇଁ ଆସିଥିଲେ ହେଲେ ସ୍ଥାନୀୟ ଲୋକେ ଏହାକୁ ବିରୋଧ କରିବା ସହ ଉଚ୍ଚ ନ୍ୟାୟାଳୟର ଦ୍ୱାରସ୍ଥ ହୋଇଥିଲେ। ତେବେ ଉଚ୍ଚ ନ୍ୟାୟାଳୟ ଶେଷରେ ସ୍ଥାନୀୟ ବାସିନ୍ଦାଙ୍କ ଅଭିଯୋଗ ଖାରଜ କରିଦେବା ପରେ ଶେଷରେ ମନ୍ଦିର ଭଙ୍ଗା ହେବା ନେଇ ସ୍ପଷ୍ଟ ହୋଇଥିଲା। ଏଥିପାଇଁ ଏହି ପୀଠ ଏବଂ ତାର ଆଖପାଖ ଗାଁର ଜନବସତି ଅଞ୍ଚଳରେ ୧୪୪ଧାରା ଜାରି କରି ବ୍ୟାପକ ପୋଲିସ ବ୍ୟବସ୍ଥା କରାଯାଇ ୪ଟି ଜେସିବି ଲଗାଇ ମନ୍ଦିର ଭଙ୍ଗାଯାଇଛି।

ଏହି କାର୍ଯ୍ୟରେ ସ୍ଥାନୀୟ ତହସିଲଦାର, ବିଡ଼ିଓ, ଜଳସେଚନ ଅଧିକାରୀଙ୍କ ସମେତ ଜିଲ୍ଲା ପୋଲିସର ଉଚ୍ଚ ଅଧିକାରୀ ମଧ୍ୟ ନିୟୋଜିତ ଥିଲେ। ତେବେ ମନ୍ଦିର ଭାଙ୍ଗିବାକୁ ନେଇ ସ୍ଥାନୀୟ ବାସିନ୍ଦା ଦୁଃଖ ପ୍ରକାଶ କରିଛନ୍ତି।

ଭୁବନେଶ୍ୱର: ମୌସୁମି ଅଧିବେଶନରେ ବାରମ୍ବାର ହଟ୍ଟଗୋଳ ପରେ ପ୍ରତିକ୍ରିୟା ରଖିଛନ୍ତି ସରକାରୀ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ। ସେ କହିଛନ୍ତି ଲୋକଙ୍କ ପ୍ରସଙ୍ଗରୁ ବିଜେପି ଦୂରେଇ ଯାଉଛି। ଯେଉଁ ପ୍ରସଙ୍ଗକୁ ଗୃହରେ ଆଲୋଚନା କରିବା କଥା ସେଥିରୁ ନିବୃତ ରହୁଛି ବିଜେପି। କେବଳ ୨ଟି ଅପରାଧିକ ମାମଲା ପ୍ରସଙ୍ଗ ଉଠାଇ  ବିଧାନସଭାକୁ ଅଚଳ କରୁଛି ବୋଲି ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ଅଭିଯୋଗ କରିଛନ୍ତି। ସେ ଆହୁରି ମଧ୍ୟ କହିଛନ୍ତି, ଆତ୍ମ ପ୍ରଚାର ପାଇଁ ବିଜେପି ଏପରି କରୁଛି। ଓଡ଼ିଶାବାସୀଙ୍କ ପାଇଁ ସେମାନଙ୍କର କିଛି ଦାୟିତ୍ୱ ନାହିଁ। କୋଭିଡ୍‌, ଚାଷୀ, ଧାନ ଆଦି ଅନେକ ପ୍ରସଙ୍ଗ ଗୃହରେ ଆଲୋଚନା ହେବା କଥା। ହେଲେ ତାହା କରାଇ ଦେଉନି ବିଜେପି।

ବିଜେପିର ଦୁଇଟି ଆଭିମୁଖ୍ୟ ରହୁଛି, କେନ୍ଦ୍ରରେ ଗୋଟିଏ, ରାଜ୍ୟରେ ଗୋଟିଏ। ଅନେକ ସାଂସଦ ଓ ମନ୍ତ୍ରୀଙ୍କ ନାଁରେ ମାମଲା ହେଉଛି। ସେକଥା ବିଜେପି ବିଧାୟକ ଉଠାଉ ନାହାନ୍ତି। ସଂସଦ ଚାଲିବା ପାଇଁ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ବିରୋଧୀଙ୍କୁ ଅନୁରୋଧ କରୁଥିବା ବେଳ ବିଜେପି ଏଠାରେ ବିଧାନସଭା ଚଳାଇ ଦେଉ ନାହିଁ। ମୋଦି ଓ ଶାହାଙ୍କ ନୀତିରେ ବିଜେପି ବିଧାୟକ ଚାଲୁ ନାହାନ୍ତି ବୋଲି ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି।

ସଂସଦ ଚାଲିବା ପାଇଁ ଉପରାଷ୍ଟ୍ରପତି କାନ୍ଦି ପକାଇଥିଲେ। ହେଲେ ସେ କଥା ବିଜେପି ବିଧାୟକ ଭୁଲି ଯାଉଛନ୍ତି। ରାଜ୍ୟ ବିଜେପି କେଉଁ ନୀତିରେ ଯାଉଛି ବୋଲି ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ପ୍ରଶ୍ନ କରିଛନ୍ତି। ସେପଟେ ବରିଷ୍ଠ ସାମ୍ବାଦିକ ପ୍ରସନ୍ନ ମହାନ୍ତି କହିଛନ୍ତି ମୌସୁମି ଅଧିବେଶନ ହେଉଛି ଏକ ସ୍ୱଳ୍କକାଳୀନ ଅଧିବେଶନ। ତେଣୁ ଏହି ଗୃହ ଠିକ୍‌ ଭାବରେ ଚାଲିବା ପାଇଁ ସାରା ଓଡ଼ିଶାର ଜନସାଧାରଣ ଚାହିଁ ବସିଛନ୍ତି। ସେଥିପାଇଁ ଗୃହକୁ ବାରମ୍ବାର ହଟ୍ଟଗୋଳରେ ବନ୍ଦ ନକରି ଭଲସେ ଚାଲିବାକୁ ଦିଆଯାଉ ବୋଲି ସେ କହିଛନ୍ତି।