ନନ୍ଦିଘୋଷ ବ୍ୟୁରୋ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଆକୁଳ ନିବେଦନ । ଦେଶର ସୁପ୍ରିମକୋର୍ଟର ପ୍ରଧାନ ବିଚାରପତିଙ୍କୁ ଚିଠି ଲେଖି ନ୍ୟାୟ ମାଗିଛନ୍ତି ଇମ୍ରାନ। ଅତ୍ୟନ୍ତ ଭାବପ୍ରବଣ ହୋଇ ସେ ଲେଖଛନ୍ତି, ମତେ ଉପଯୁକ୍ତ ଚିକିତ୍ସା କରାଯାଉନି। ହୁଏତ, ମୁଁ ଜେଲରୁ ବାହାରି ନ ପାରେ। ହୃଦ୍ଘାତ କିମ୍ବା ବ୍ରେନ୍ ହାମରେଜ୍ରେ ମୋର ଜୀବନ ଚାଲିଯିବ ବୋଲି ସେ ଆଶଙ୍କା ପ୍ରକାଶ କରିଛନ୍ତି।
ସେ କହିଛନ୍ତି, ଡାହାଣ ଆଖିର ଦୃଷ୍ଟିଶକ୍ତି ୮୫ ପ୍ରତିଶତ ହ୍ରାସ ପାଇଛି। ନଭେମ୍ବର ୧୦ରେ ତାଙ୍କ ରକ୍ତଚାପ ୧୯୨-୧୯୩ରେ ପହଞ୍ଚିଥିଲା। ଡାକ୍ତରମାନେ ହୃଦ୍ଘାତ ଓ ମସ୍ତିଷ୍କରେ ରକ୍ତସ୍ରାବ ଆଶଙ୍କା ଥିବା ଚେତାବନୀ ଦେଇଛନ୍ତି। ପତ୍ନୀ ବୁଶ୍ରା ବିବିଙ୍କ ସ୍ୱାସ୍ଥ୍ୟ ମଧ୍ୟ ଖରାପ ହେଉଥିବା ସେ ଜଣାଇଛନ୍ତି। ଆଖିର ଅସ୍ତ୍ରୋପଚାର ପରେ ମଧ୍ୟ ତାଙ୍କ ଦୃଷ୍ଟିଶକ୍ତି ପ୍ରଭାବିତ ହୋଇଛି। ଇମ୍ରାନ୍ ଅଭିଯୋଗ କରିଛନ୍ତି ଯେ, ତାଙ୍କୁ ଦିନକୁ ୨୨ ଘଣ୍ଟା ପର୍ଯ୍ୟନ୍ତ ଏକାନ୍ତବାସରେ ରଖାଯାଉଛି। ପରିବାର, ଓକିଲ ଓ ପୁଅଙ୍କ ସହ କଥା ହେବାକୁ ମଧ୍ୟ ଅନୁମତି ମିଳୁନାହିଁ। କେବଳ ମନୋବଳ ଭାଙ୍ଗି ତାଙ୍କୁ ମାରି ଦେବାକୁ ଏହି ଷଡ଼ଯନ୍ତ୍ର ହୋଇଛି। ନଭେମ୍ବର ୨ ଓ ୧୧ରେ ତାଙ୍କ ଓକିଲ ସଲମାନ ସଫଦର ଜେଲ୍ରେ ସାକ୍ଷାତ କରିଥିଲେ। ଇମ୍ରାନ୍ଙ୍କ ନିର୍ଦ୍ଦେଶରେ ସେ ବିଚାରପତିଙ୍କ ନିକଟରେ ଚିଠି ପହଞ୍ଚାଇଛନ୍ତି। ଅଗଷ୍ଟ ୧୮ରେ ସୁପ୍ରିମକୋର୍ଟ ଇମ୍ରାନଙ୍କୁ ଶିଫା ଇଣ୍ଟରନ୍ୟାସନାଲ ହସ୍ପିଟାଲକୁ ସ୍ଥାନାନ୍ତର ଓ ଉପଯୁକ୍ତ ଚିକିତ୍ସା ପାଇଁ ନିର୍ଦ୍ଦେଶ ଦେଇଥିଲେ। କିନ୍ତୁ ଏହା ପାଳନ ହୋଇନଥିବା ଇମ୍ରାନ୍ ଅଭିଯୋଗ କରିଛନ୍ତି।
ପ୍ରକାଶଥାଉ କି, ୨୦୨୩ ଅଗଷ୍ଟ ୫ରୁ ଇମ୍ରାନ୍ ଜେଲ୍ରେ ଅଛନ୍ତି। ଅତ୍ୟନ୍ତ ଭାବପ୍ରବଣ ଭାଷାରେ ସେ ବିଚାରପତିଙ୍କୁ ଅପିଲ୍ କରି ଲେଖିଛନ୍ତି। ମତେ ନ୍ୟାୟ ଓ ଚିକିତ୍ସା ମିଳୁ। କାରଣ ଜୀବିତ ରହିଲେ ହିଁ ମୁଁ ନିର୍ଦ୍ଦୋଷ ବୋଲି ପ୍ରମାଣିତ କରିପାରିବି। ପୂର୍ବତନ ପ୍ରଧାନମନ୍ତ୍ରୀ କି ଗୋଟିଏ ଦଳର ମୁଖ୍ୟ ଭାବେ ନୁହେଁ, ବରଂ ଜଣେ ସାଧାରଣ ପାକିସ୍ତାନୀ ଯିଏ କ୍ରିକେଟରେ ଦେଶକୁ ଶିଖରରେ ପହଞ୍ଚାଇଥିଲା, ତାଙ୍କୁ ଉପଯୁକ୍ତ ନ୍ୟାୟ ମିଳୁ ବୋଲି ଚିଠିରେ ଇମ୍ରାନ ଉଲ୍ଲେଖ କରିଛନ୍ତି।

