spot_img

Latest Posts

ବିଲକିସ୍ ବାନୋ ମାମଲା: ୨ ଜଣଙ୍କୁ ୧୭ ବର୍ଷ ପରେ ଜାମିନ

ନନ୍ଦିଘୋଷ ବ୍ୟୁରୋ: ବହୁଚର୍ଚ୍ଚିତ ବିଲକିସ୍ ବାନୋ ମାମଲାରେ ୨ ଦୋଷୀ ସାବ୍ୟସ୍ତଙ୍କୁ ସୁପ୍ରିମକୋର୍ଟ ଜାମିନ ଦେଇଛନ୍ତି। ଦୀର୍ଘ ୧୭ ବର୍ଷ ଜେଲ୍‌ରେ ରହିବା ପରେ ଉଭୟଙ୍କୁ ଜାମିନ ମିଳିଛି।

ଅଭିଯୁକ୍ତ ବିପିନଚନ୍ଦ ଯୋଶୀ ଓ ପ୍ରଦୀପ ମୋଧିଆ ୧୭ ବର୍ଷରୁ ଅଧିକ ସମୟ ଜେଲ୍‌ରେ ଥିବାରୁ, ସେମାନଙ୍କ ଆବେଦନରେ ଆଇନଗତ ଓ ତଥ୍ୟଗତ ପ୍ରସଙ୍ଗ ରହିଥିବାରୁ ଏହାର ବିଚାର ଆବଶ୍ୟକ ବୋଲି କୋର୍ଟ କହିଛନ୍ତି।  ୨୦୧୭ ମେ’ରେ ବମ୍ଵେ ହାଇକୋର୍ଟ ଉଭୟଙ୍କ ଆଜୀବନ କାରାଦଣ୍ଡକୁ କାଏମ୍ ରଖିଥିଲେ। ଏହା ବିରୋଧରେ ସେମାନେ ସୁପ୍ରିମକୋର୍ଟକୁ ଯାଇଥିଲେ। ସେମାନଙ୍କ ଓକିଲ ଯୁକ୍ତି କରିଥିଲେ, ପୀଡ଼ିତା ନିଜ ପୋଲିସ ବୟାନରେ ଦୁଇ ଆବେଦନକାରୀଙ୍କ ନାମ ଉଲ୍ଲେଖ କରିନଥିଲେ। ଏପରିକି ଡାକ୍ତରୀ ପରୀକ୍ଷା ସମୟରେ ଡାକ୍ତରଙ୍କ ସମ୍ମୁଖରେ ରେକର୍ଡ କରାଯାଇଥିବା ବୟାନରେ ମଧ୍ୟ ସେମାନଙ୍କ ନାମ ନଥିଲା। ଏହି ଦୁଇ ଜଣଙ୍କ ବିରୋଧରେ କୌଣସି ପ୍ରତ୍ୟକ୍ଷ ଅପରାଧର ଅଭିଯୋଗ ନଥିଲା। ଘଟଣା ସମୟରେ ସେମାନେ ଉତ୍ତ୍ୟକ୍ତ ଜନତାଙ୍କ ଭିଡ଼ରେ ଉପସ୍ଥିତ ଥାଇପାରନ୍ତି ବୋଲି ଯାହା ପ୍ରମାଣ ରହିଛି। ମାମଲାରେ ମୋଟ ୧୧ ଜଣ ଦୋଷୀ ସାବ୍ୟସ୍ତ ହୋଇଛନ୍ତି। ୨୦୨୪ ଜାନୁଆରୀରେ ସୁପ୍ରିମକୋର୍ଟ ଏହି ୧୧ ଜଣଙ୍କ ଆଗୁଆ ମୁକ୍ତି ବା ରିମିସନ୍ ଆଦେଶକୁ ରଦ୍ଦ କରିଦେଇଥିଲେ। ରିମିସନ୍ ଆଧାରରେ ସେମାନଙ୍କୁ ଗୁଜରାଟ ସରକାର ଜେଲ୍‌ରୁ ମୁକ୍ତ କରିଥିଲେ। ଏହାକୁ ବିଲକିସ୍ ବାନୋ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ। ସୁପ୍ରିମକୋର୍ଟ କହିଥିଲେ ଯେ, ଏହି ମାମଲାରେ ଦୋଷୀମାନଙ୍କୁ ରିମିସନ୍ ପ୍ରଦାନ କରିବାର ଅଧିକାର ଗୁଜରାଟ ସରକାରଙ୍କର ନାହିଁ। ସମସ୍ତ ୧୧ ଜଣ ଦୋଷୀଙ୍କୁ ଦୁଇ ସପ୍ତାହ ମଧ୍ୟରେ ଜେଲ୍‌କୁ ଫେରି ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଥିଲେ। ନିର୍ଦ୍ଦେଶ ଅନୁସାରେ ସେମାନେ ଆତ୍ମସମର୍ପଣ କରିଥିଲେ।

ପ୍ରକାଶଥାଉ କି, ୨୦୦୨ ଗୁଜରାଟ ଦଙ୍ଗା ସମୟରେ ବିଲକିସ ବାନୋ ଗଣଦୁଷ୍କର୍ମର ଶିକାର ହୋଇଥିଲେ। ସେତେବେଳେ ସେ ଗର୍ଭବତୀ ଥିଲେ। ତାଙ୍କର ତିନି ବର୍ଷର ଝିଅଙ୍କ ସମେତ ପରିବାରର ସାତ ଜଣଙ୍କୁ ହତ୍ୟା କରାଯାଇଥିଲା।

Latest Posts

Don't Miss