spot_img
Home Blog Page 5206

ଶାହଙ୍କ ଜମ୍ମୁ-କାଶ୍ମୀର ଗସ୍ତ ପୂର୍ବରୁ ଅଣକାଶ୍ମୀରଙ୍କ ଶବ ଉଦ୍ଧାର

ଶ୍ରୀନଗର: ଅମିତ ଶାହଙ୍କ ଗସ୍ତ ପୂର୍ବରୁ ଜମ୍ମୁ-କାଶ୍ମୀରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି। ଅକ୍ଟୋବର ୨୩ରୁ ୨୫ ତାରିଖ ମଧ୍ୟରେ ଗୃହମନ୍ତ୍ରୀ ଅମିତ ଶାହାଙ୍କ କାଶ୍ମୀର ଗସ୍ତ କାର୍ଯ୍ୟକ୍ରମ ରହିଛି । ଗତ କିଛିଦିନ ହେବ ଘାଟିରେ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧି ପାଇଥିବା ବେଳେ ବଡ଼ ଧରଣର ହମଲା ନେଇ ଯୋଜନା ହୋଇଥିବା ଜଣାପଡିଛି । ଦୀପାବଳି ପୂର୍ବରୁ ଜାମ୍ମୁ-କାଶ୍ମୀରରେ ପୁଲଓ୍ବାମା ଭଳି ହମଲା ଯୋଜନା କରିଥିବା ଗୁଇନ୍ଦା ସୂତ୍ରରୁ ସୂଚନା ମିଳିଛି । ଏହାକୁ ଦୃଷ୍ଟିରେ ରଖି ଜମ୍ମୁ-କାଶ୍ମୀରରେ ଅଧିକ ସୁରକ୍ଷାବଳ ନିୟୋଜିତ କରାଯାଇଛି ।

କେବଳ ଶ୍ରୀନଗରର ଅଞ୍ଚଳରେ ୨୦ରୁ ୨୫ଟି ଅଧିକ ପାରାମିଲିଟାରୀ ଫୋର୍ସ ନିୟୋଜିତ ହୋଇଛନ୍ତି। ସିଆରପିଏଫ ଡିଜି, NIAର ବରିଷ୍ଠ ଅଧିକାରୀଙ୍କ ସମେତ IB ଓ RAWର କାଉଣ୍ଟର ଟେରର ବରିଷ୍ଠ ଅଧିକାରୀମାନେ ଘାଟି ଅଞ୍ଚଳରେ ପହଞ୍ଚି ସ୍ଥିତି ଉପରେ ନଜର ରଖିଛନ୍ତି ।  ଗତ କିଛି ଦିନ ଧରି ଜାମ୍ମୁ-କାଶ୍ମୀରରେ ହିଂସା ଲାଗି ରାହିଛି। ସାଧାରଣ ଲୋକ ଓ ଅଣକାଶ୍ମୀର ଲୋକଙ୍କୁ ଟାର୍ଗେଟ୍ କରୁଛନ୍ତି ଆତଙ୍କବାଦୀ । ସେନାର କାର୍ଯ୍ୟାନୁଷ୍ଠାନରେ ଅନେକ ଆତଙ୍କବାଦୀଙ୍କ ମୃତ୍ୟୁ ହୋଇଛି।

ତେବେ ଅମିତ ଶାହଙ୍କ ଗସ୍ତ ପୂର୍ବରୁ ଅନନ୍ତନାଗର ଜଙ୍ଗଲମୁଣ୍ଡର ବିଲାଲ କଲୋନୀ ଅଞ୍ଚଳରୁ ଅଣ କାଶ୍ମୀରି ନାଗରିକଙ୍କ ମୃତଦେହ ମିଳିବା ପରେ ଆଲୋଡ଼ନ ସୃଷ୍ଟି ହୋଇଛି। ମୃତକଙ୍କ ଶରୀରରେ ଅନେକ ଆଘାତ ଚିହ୍ନ ରହିଥିବା ବେଳେ ମୃତଦେହକୁ ପୋଷ୍ଟମର୍ଟମ ପାଇଁ ପଠାଯାଇଛି।

ଆରଜେଡି ଟାର୍ଗେଟରେ କାହିଁକି ଭକ୍ତ ଚରଣ ଦାସ?

ପାଟଣା: ବିହାର ମହା ଗଠବନ୍ଧନରେ ALL IS NOT WELL। କଂଗ୍ରେସ ଓ ଆରଜେଡି ମଧ୍ୟରେ ଶୀତଳ ଯୁଦ୍ଧ ଆରମ୍ଭ ହୋଇଯାଇଛି। ଦୁଇ ଦଳ ବିଧାନସଭା ନିର୍ବାଚନ ପାଇଁ ଏକ ହୋଇ ଲଢିଥିବାବେଳେ ଉପନିର୍ବାଚନରେ ଉଭୟ ଉଭୟଙ୍କ ବିରୋଧରେ ପ୍ରାର୍ଥୀ ଦେଇଛନ୍ତି।

କେବଳ ଏତିକି ନୁହେଁ ଏହି ଘଟଣାକୁ ନେଇ ବିବାଦ ବଢିଥିବାବେଳେ ବିସ୍ଫୋରକ ବୟାନ ଦେଇଛନ୍ତି ବିହାର କଂଗ୍ରେସ ପ୍ରଭାରୀ ଭକ୍ତ ଚରଣ ଦାସ। ଆଗାମୀ ଲୋକସଭା ନିର୍ବାଚନରେ କଂଗ୍ରେସ ସମସ୍ତ ୪୦ଟି ଆସନରେ ପ୍ରାର୍ଥୀ ଦେବ ବୋଲି କହିଛନ୍ତି ଭକ୍ତ। ଆରଜେଡି ମହା ଗଠବନ୍ଧନର ଧର୍ମ ପାଳନ କରୁନାହିଁ ବୋଲି କହିବାକୁ ପଛାଇ ନାହାଁନ୍ତି ଭକ୍ତ। ଏଣୁ କଂଗ୍ରେସ ଏକାକି ନିର୍ବାଚନ ଲଢିବ । ଏଥି ପାଇଁ କଂଗ୍ରେସ ସମ୍ପୂର୍ଣ୍ଣ ଭାବେ ସକ୍ଷମ ବୋଲି କହିଛନ୍ତି ଭକ୍ତ ଦାସ । ବିହାରରେ ବିଜେପି-ଜେଡୟୁ ମେଣ୍ଟ ସରକାର ଚାଲିଥିବାବେଳେ ବିରୋଧୀଙ୍କ ମେଳି ଭାଙ୍ଗିବାରେ ଲାଗିଛି।

ସେହିପରି କଂଗ୍ରେସରେ ଯୋଗଦେବା ପରେ ପ୍ରଥମ ଥର ପାଇଁ ବିହାରକୁ ଆସିଥିବା କହ୍ନେୟା କୁମାର ଆରଜେଡି ନେତାଙ୍କୁ ଟାର୍ଗେଟ୍ କରିଛନ୍ତି। ସେ କହିଛନ୍ତି- ‘‘ଯେଉଁମାନେ ବିଜେପି ସହିତ ଲଢିବାକୁ ଚାହୁଁଛନ୍ତି ସେମାନେ କଂଗ୍ରେସ ସହିତ ରହିବେ ଏବଂ ଯେଉଁମାନେ ଏହା କରିବାକୁ ଚାହୁଁନାହାଁନ୍ତି, ସେମାନେ କେବଳ କଥା କହିବେ। ଏହା ଅତ୍ୟନ୍ତ ଦୁଃଖର ବିଷୟ ଯେ ଜଣେ ଶିକ୍ଷିତ ବ୍ୟକ୍ତି ହୋଇ ସେ ଏଭଳି ଭାଷାର ପ୍ରୟୋଗ କରୁଛନ୍ତି’’।

ପୋଷ୍ୟ ସନ୍ତାନ ପ୍ରତି ବଢ଼ୁଛି ଆଗ୍ରହ: କନ୍ୟା ସନ୍ତାନକୁ ଅଧିକ ପୋଷ୍ୟ ଭାବେ ଗ୍ରହଣ କରୁଛନ୍ତି

ଭୁବନେଶ୍ୱର: ପୋଷ୍ୟ ସନ୍ତାନ ଗ୍ରହଣ ପ୍ରତି ବଢୁଛି ଆଗ୍ରହ । ଆଗରୁ କନ୍ୟା ସନ୍ତାନ ଅଲୋଡ଼ା କୁହାଯାଉଥିବା ବେଳେ ଏବେ କନ୍ୟା ସନ୍ତାନ କୁ ଅଧିକ ପୋଷ୍ୟ ଭାବେ ଗ୍ରହଣ କରାଯାଉଛି । ତେବେ ପୋଷ୍ୟ ସନ୍ତାନ ଗ୍ରହଣ କରିବାର କଣ ରହିଛି ନିୟମ ?

ଓଡ଼ିଶାରେ ପୋଷ୍ୟ ସନ୍ତାନ ପ୍ରତି ବଢୁଛି ଆଗ୍ରହ । ୩ ବର୍ଷରେ ୨୫୧ ପୁଅ ଓ ୩୧୬ ଝିଅ ପୋଷ୍ୟ । ‘କାରା’ ପୋର୍ଟାଲରେ ଦିନକୁ ଦିନ ଆସୁଛି ଅଧିକ ଆବେଦନ । ମା’ କଣ କେବେ ନିଷ୍ଠୁର ହୋଇ ପୁଅ ଝିଅ ମଧ୍ୟରେ ଫରକ କରିପାରେ ? ଜନ୍ମଦାତ୍ରୀ କଣ କେବେ ଲିଙ୍ଗଗତ ଅସମାନତା କୁ ଗୁରୁତ୍ୱ ଦିଏ ? ଏଭଳି କିଛି ଅସମାହିତ ପ୍ରଶ୍ନର ଉତ୍ତର ଦେବା ଲକ୍ଷ୍ୟରେ ଏବଂ କନ୍ୟା ରତ୍ନଙ୍କ ବିକାଶ ଦିଗରେ କାର୍ଯ୍ୟ କରୁଛନ୍ତି ରାଜ୍ୟ ସରକାର । ଯାହାର ପ୍ରତିଫଳନ ପୋଷ୍ୟ ସନ୍ତାନଙ୍କ କ୍ଷେତ୍ରରେ ଦେଖାଯାଇଛି । ପ୍ରତ୍ୟାଶି ପିତାମାତା ଅଧିକ ଶିଶୁ କନ୍ୟାଙ୍କୁ ପୋଷ୍ୟ ଭାବେ ଗ୍ରହଣ କରିବାକୁ ଆଗ୍ରହ ଦେଖାଉଥିବାରୁ ବିଭିନ୍ନ ମହଲରୁ ରାଜ୍ୟ ସରକାରଙ୍କ ପ୍ରୟାସକୁ ସ୍ୱାଗତ କରାଯାଇଛି ।

ପୋଷ୍ୟ ସନ୍ତାନ ରୁପେ ଗ୍ରହଣ କରିବାକୁ ହେଲେ ପ୍ରଥମେ ‘କାରା’ ପୋର୍ଟାଲରେ ଆବେଦନ କରିବାକୁ ପଡିବ । ଏକ ପଞ୍ଜିକରଣ ନମ୍ବର ପାଇବା ପରେ କେଉଁ ସହରରୁ ସନ୍ତାନ ଗ୍ରହଣ କରିବେ ତାହା ଦର୍ଶାଇବେ । ନିଜର ଆୟ ସମ୍ପର୍କରେ ସ୍ପଷ୍ଟକ୍ତି ରଖିବା ପରେ ‘ Adoption agency ‘ ପିଲାଟିକୁ ହସ୍ତାନ୍ତର କରିବ । ଆଗାମୀଦିନରେ ଫୋଷ୍ଟର କେୟାର ବା ପାଳିତ ସନ୍ତାନ ପ୍ରଥାକୁ ଆପଣାଇବାକୁ ପିତା , ମାତାଙ୍କୁ ପରାମର୍ଶ ଦିଆଯାଇଛି । ସମାଜରେ ପ୍ରତେକଟି କ୍ଷେତ୍ରରେ ପକ୍ଷପାତିତାର ସାମ୍ନା କରୁଥିବା ଝିଅ ଟି ପ୍ରତି ଲୋକଙ୍କ ଭାବନା ପରିବର୍ତ୍ତନ ହୋଇଥିବା ଦେଖିବାକୁ ମିଳିଛି ।

ଚୀନକୁ ଜବାବ ଦେବାକୁ ପ୍ରସ୍ତୁତ ଭାରତ; LACରେ Pinaka ଓ Smerch ମୁତୟନ

ନୂଆଦିଲ୍ଲୀ: ଅରୁଣାଚଳ ପ୍ରଦେଶ ଏବଂ ଆସାମ ସୀମାର ଲାଇନ୍ ଅଫ୍ ଆକ୍ଟୁଆଲ୍ କଣ୍ଟ୍ରୋଲ୍ (LAC) ଠାରୁ ଦୂରରେ ଥିବା ସ୍ଥାନକୁ LACର ଡେପଥ୍ ଏରିଆ କୁହାଯାଏ । ଏଠାରେ ନିୟୋଜିତ ରକେଟ୍ ଲଞ୍ଚ ସିଷ୍ଟମ୍ ଶତ୍ରୁ କ୍ଷେତ୍ରର ଭିତର ଯାଏଁ ଷ୍ଟ୍ରାଇକ୍ କରିବା ସହ ସଠିକ୍ ନିଶାନା ଲଗାଇପାରେ।

ପୂର୍ବ ଲଦାଖର LAC ଉପରେ ଉତ୍ତେଜନା ମଧ୍ୟରେ ଭାରତ LAC ଉପରେ ପ୍ରସ୍ତୁତି ଜାରି ରଖିଛି | କେବଳ ଭାରତର ପ୍ରତିରକ୍ଷା ନୁହେଁ ବରଂ ଆକ୍ରମଣାତ୍ମକ ପ୍ରସ୍ତୁତି ମଧ୍ୟ ଚାଲିଛି। ପୂର୍ବାଞ୍ଚଳ ସେକ୍ଟରରେ ଭାରତୀୟ ସେନା ମଲ୍ଟିବାର୍ଲ ରକେଟ୍ ଲଞ୍ଚ ସିଷ୍ଟମ୍ SMERCH ଏବଂ ମଲ୍ଟି ରକେଟ୍ ଲଞ୍ଚ ସିଷ୍ଟମ୍ ପିନାକକୁ ନିୟୋଜିତ କରିଛି।

ପିନାକା ରକେଟ୍ ଲଞ୍ଚର୍ ସ୍ୱଦେଶୀ ଜ୍ଞାନ କୌଶଳରେ ନିର୍ମିତ। ଏକ ପିନାକ ବ୍ୟାଟେରୀରେ ୬ଟି ଫାୟାରିଂ ୟୁନିଟ୍ (ଲଞ୍ଚର୍) ଏବଂ ଏକ ଲଞ୍ଚରରେ ୧୨ଟି ଟ୍ୟୁବ୍ । ଆଉ ବ୍ୟାଟେରୀରେ ୭୨ ରକେଟ୍ ଏବଂ ଏହି ସମସ୍ତ ରକେଟ୍ ମାତ୍ର ସେକେଣ୍ଡରେ ଶତ୍ରୁ ଉପରେ ବର୍ଷିପାରେ । ପିନାକର ଏକାସାଙ୍ଗରେ 1000 x 800 ମିଟର କ୍ଷେତ୍ରକୁ ନଷ୍ଟ କରିବାର କ୍ଷମତା ରହିଛି ।

ଦ୍ୱିତୀୟ ମଲ୍ଟି ବ୍ୟାରେଲ୍ ରକେଟ୍ ଲଞ୍ଚ ସିଷ୍ଟମ୍ ହେଉଛି SMERCH | ଋଷର ସହଯୋଗରେ ଏହାକୁ ବିକଶିତ କରାଯାଇଛି | SMERCHର ଏକ ବ୍ୟାଟେରୀରେ ଚାରୋଟି ଲଞ୍ଚର୍ ରହିଛି । ଗୋଟିଏ ବ୍ୟାଟେରୀରେ ମୋଟ 48 ଟି ରକେଟ୍ ରହିଛି| ଏହି ୪୮ରକେଟକୁ ମାତ୍ର ୪୦ ସେକେଣ୍ଡରେ ନିକ୍ଷେପ କରାଯାଇପାରିବ | ଯାହା ଶତ୍ରୁର 1200 X 1200 ମିଟର ଅଞ୍ଚଳକୁ ବିନାଶ କରିବାର କ୍ଷମତା ରଖିଛି ।

ଆସନ୍ତା ଆଇପିଏଲ୍‌ରେ JSPL ଭେନ୍ୟୁ ହୋଇପାରେ ବାରବାଟୀ: ଆଶା ବ୍ୟକ୍ତ କଲେ ଓସିଏ ସମ୍ପାଦକ

0

କଟକ: ଏଣିକି ଆଇପିଏଲ୍‌ରେ ଖେଳିବେ ୧୦ ଦଳ । ଏନେଇ ମେଗା ଅକ୍ସନ ଅନୁଷ୍ଠିତ ହେବ । ଦୁଇଟି ନୂଆ ଦଳ ପାଇଁ ଗୌହାଟୀ, ରାଞ୍ଚି, କଟକ, ଅହମ୍ମଦାବାଦ, ଲକ୍ଷ୍ନୌ ଓ ଧର୍ମଶାଳାକୁ ନୂଆ ସହର ଭାବେ ବିଡ୍‌ ଆହ୍ୱାନ କରାଯାଇଥିଲା। ନୂଆ ଦଳ ପାଇଁ ବିଡ୍‌ର ମୂଳ ଦର ୨ହଜାର କୋଟି ଟଙ୍କା ରଖାଯାଇଥିଲା। ତେବେ ଯେଉଁ ସ˚ସ୍ଥା ବିଡ୍‌ ଦାଖଲ କରିବେ ସେମାନଙ୍କ ବାର୍ଷିକ ହାରାହାରି ଟର୍ଣ୍ଣଓଭର ୩ହଜାର କୋଟି ଥିବା ଆବଶ୍ୟକ। ଏଥିସହ ବିଡ୍‌ ଦାଖଲକାରୀଙ୍କ ବ୍ୟକ୍ତିଗତ ସମ୍ପତ୍ତି ଅନ୍ୟୂନ ୨୫୦୦ କୋଟି ଟଙ୍କା ହୋଇଥିବା ବାଧ୍ୟତାମୂଳକ ରହିଥିଲା। ତେବେ ବାର୍ଷିକ ଟର୍ଣ୍ଣଓଭର ଧାରା କ୍ଷେତ୍ରରେ କେତେକ ଆଗ୍ରହୀ ବିଡର‌୍‌ ଆପତ୍ତି ଉଠାଇଥିଲେ। ମାନଦଣ୍ତ ପୂରଣ କରିବା ପାଇଁ ଟର୍ଣ୍ଣଓଭର ମୂଲ୍ୟକୁ ହ୍ରାସ କରିବାକୁ ଅନୁରୋଧ ଆସିଥିଲା। ଯେଉଁଥିପାଇଁ ବିସିସିଆଇ ଏହାର ଟେଣ୍ତର ସର୍ତ୍ତରେ କିଛିଟା ପରିବର୍ତ୍ତନ କରିଥିଲା। ଏହାଫଳରେ ନବୀନ ଜିନ୍ଦଲଙ୍କ ସହ ଅନ୍ୟାନ୍ୟ ବିଡରମାନେ ଆଇପିଏଲ୍‌ ଦଳ ପାଇଁ ଆକୃଷ୍ଟ ହୋଇଥିବା କୁହାଯାଉଛି। ନବୀନ ଜିନ୍ଦଲଙ୍କ ବ୍ୟତୀତ କୋଟାକ ଗ୍ରୁପ୍‌, ଟୋରେଣ୍ଟ, ଆଦାନି ଗ୍ରୁପ୍‌ ଭଳି ବଡ଼ ବଡ଼ କମ୍ପାନିମାନେ ଆଇପିଏଲ୍‌ର ବିଭିନ୍ନ ଦଳ ପାଇଁ ଆଗ୍ରହ ଦେଖାଇଛନ୍ତି।

ଅପରପକ୍ଷରେ କଟକ ଟିମକୁ କେହିଁ କିଣିବାକୁ ଆଗ୍ରହ ପ୍ରକାଶ କରନ୍ତି ତେବେ ଓସିଏ ଏହାକୁ ସ୍ୱାଗତ କରିବା ସହ ସବୁ ସ୍ତରରେ ସାହାଯ୍ୟ ସହଯୋଗ କରିବ ବୋଲି ଓସିଏ ସମ୍ପାଦକ ସଞ୍ଜୟ ବେହେରା କହିଛନ୍ତି । ଏଥିସହିତ ବିଡିଂ ପାଇଁ ଶିଳ୍ପପତି ନବୀନ ଜିନ୍ଦଲ ଆଗ୍ରହ ପ୍ରକାଶ କରିଥିବା ବେଳେ ବାରବାଟୀକୁ ଭେନ୍ୟୁ କରିବାକୁ ଓସିଏ ପକ୍ଷରୁ ଅନୁରୋଧ କରାଯାଇଛି ।

ଅପରାଧୀଙ୍କ ବିରୋଧରେ ପୋଲିସ କାର୍ଯ୍ୟାନୁଷ୍ଠାନକୁ ବିଜେପିର ବିରୋଧ: ଥାନା ଘେରିଲେ, ଢେଲା ମାଡ଼ କଲେ

କଟକ: ନରସିଂହପୁର ଥାନା ଆଗରେ ବିଜେପି କର୍ମୀଙ୍କ ଲଙ୍କାକାଣ୍ଡ । ଅପରାଧୀଙ୍କ ବିରୋଧରେ ପୋଲିସ କାର୍ଯ୍ୟାନୁଷ୍ଠାନକୁ ବିରୋଧ କରି ପୋଲିସ ଉପରେ ଆକ୍ରମଣ କରିଛନ୍ତି ବିଜେପି କର୍ମୀ । ପୂର୍ବରୁ ନରସିଂହପୁର କୋର୍ଟ ପରିସରରେ ହୋଇଥିବା ଏକ ଗଣ୍ଡଗୋଳ ଘଟଣାରେ ପୋଲିସ ଗତକାଲି ରତାପାଟ ଗାଁର ତିନିଜଣଙ୍କୁ ଗିରଫ କରିଥିଲା। ପୋଲିସ କାର୍ଯ୍ୟାନୁଷ୍ଠାନକୁ ବିରୋଧ କରିଛନ୍ତି କିଛି ବିଜେପି କର୍ମୀ।

ଥାନା ଘେରାଉ କରିବା ସହ ଥାନା ଭିତରକୁ ଧସେଇ ପଶିବାକୁ ଉଦ୍ୟମ କରିଥିଲେ। କିଛି ମହିଳା ବିଜେପି କର୍ମୀ ଥାନା ଗେଟରେ ତାଲା ପକାଇ ଦେଇଥିଲେ । ଏପରିକି ସେମାନେ ପୋଲିସ ଉପରକୁ ଢେଲା ମାଡ କରିଥିଲେ । ଏଥିରେ ଜଣେ ମହିଳା ଗ୍ରାମରକ୍ଷୀ ଓ ଏକାଧିକ ପୋଲିସ କର୍ମଚାରୀ ଆହତ ହୋଇଛନ୍ତି । କାହାର ମୁଣ୍ଡରେ ତ କାହାର ଆଖି ଉପରେ ଗଭୀର ଆଘାତ ଲାଗିଛି। ଆକ୍ରମଣକାରୀଙ୍କୁ ଘଉଡାଇବାକୁ ପୋଲିସ ଲାଠି ଚାଳନା କରିବାକୁ ବାଧ୍ୟ ହୋଇଥିଲା।

ବିଜେପି କର୍ମୀଙ୍କ ଆକ୍ରମଣରେ ତିନି ଜଣ ପୋଲିସ କର୍ମଚାରୀ ଆହତ ହୋଇଥିବା ବେଳେ ଜଣେ ବିଜେପି କର୍ମୀ ଆହତ ହୋଇଥିଲେ। ସମସ୍ତ ଆହତ ନରସିଂହପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହୋଇଥିଲେ । ମହିଳା ଗ୍ରାମରକ୍ଷୀଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଚୋରି ଓ ସିନାଜୋରି ଭଳି ପୋଲିସ ଉପରେ ଆକ୍ରମଣ ପରେ ନିଜସ୍ୱ ଗୁଣ୍ଡାଗିରିକୁ ଲୁଚାଇବାକୁ ବିଜେପି କର୍ମୀ ରତାପାଟ ଛକ ଠାରେ ୬୫ ନମ୍ବର ରାଜ୍ୟ ରାଜପଥକୁ ଅବରୋଧ କରିଥିଲେ । ବିଜେପିର ଏଭଳି କାମକୁ ବିଭିନ୍ନ ମହଲରେ ନିନ୍ଦା କରାଯାଇଛି । ବିଜେପି ବରାବର ବିଭିନ୍ନ ଘଟଣାରେ ଆଇନକୁ ହାତକୁ ନେଉଥିବା ଉଦବେଗର ବିଷୟ ହୋଇଛି

କରୋନା ଟିକାକରଣ ଦିଗରେ ଆଉ ଏକ ମାଇଲଖୁଣ୍ଟ : ଏଯାବତ୍ ରାଜ୍ୟରେ ଦିଆଗଲାଣି ସାଢ଼େ ୩କୋଟି ଡୋଜ୍

ଭୁବନେଶ୍ୱର: କରୋନା ଟିକାକରଣ କ୍ଷେତ୍ରରେ ଆଉ ଏକ ମାଇଲଖୁଣ୍ଟ ଛୁଇଁଲା ଓଡ଼ିଶା । ରାଜ୍ୟରେ ଏଯାବତ୍ ମୋଟ ସାଢ଼େ ୩କୋଟି କରୋନା ଟିକାର ଡୋଜ୍  ଦିଆଯାଇସାରିଛି   । ଏ ନେଇ ଟ୍ୱିଟ୍ ଯୋଗେ ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ  । ଏଥିସହିତ ଟିକାକରଣ ଦିଗରେ ସ୍ୱାସ୍ଥ୍ୟକର୍ମୀଙ୍କ ନିଷ୍ଠା ଓ ପ୍ରତିଶ୍ରୁତିବଦ୍ଧତାକୁ ପ୍ରଶଂସା କରିଛନ୍ତି ମୁଖ୍ୟମନ୍ତ୍ରୀ । ରାଜ୍ୟରେ କରୋନା ସ୍ଥିତି ନିୟନ୍ତ୍ରଣାଧିନ ଥିବା ବେଳେ ପାର୍ବଣ ମାସ ଯୋଗୁଁ ସଂକ୍ରମଣ ବଢ଼ିବାର ଆଶଙ୍କା ରହିଛି । ଏଭଳି ସ୍ଥିତିରେ କରୋନା କଟକଣାର କଡ଼ା ପାଳନ ସହ ଟିକାକରଣ ବେଶ୍ ଜରୁରୀ ହୋଇପଡ଼ିଛି । ଏଭଳି ସ୍ଥିତିରେ ରାଜ୍ୟରେ ଚାଲିଥିବା ଦ୍ରୁତ ଟିକାକରଣ କରୋନା ମୁକାବିଲା ଦିଗରେ ରାଜ୍ୟକୁ ବେଶ୍ ସହାୟକ ହେବ ।

ସୂଚନା ଯୋଗ୍ୟ, ଗତ ୨୪ ଘଣ୍ଟା ମଧ୍ୟରେ ୫୫୬ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ଏହାକୁ ମିଶାଇ ରାଜ୍ୟରେ ମୋଟ୍ କରୋନା ସଂକ୍ରମିତଙ୍କ ସଂଖ୍ୟା ୧୦୩୫୯୭୩ ରେ ପହଞ୍ଚିଛି । ତେବେ ହ୍ନଟ ହୋଇଥିବା ସଂକ୍ରମିତଙ୍କ ମଧ୍ୟରୁ ୩୨୪ ଜଣ କ୍ୱାରେଣ୍ଟାଇନ୍‌ରୁ ହୋଇଥିବା ବେଳେ ୩୨୨ ଜଣ ଲୋକାଲ୍‌ କେସ୍‌ ରହିଛନ୍ତି । ସେହିପରି ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରେ ୧୮ ବର୍ଷରୁ କମ୍‌ ବୟସର ୮୭ ଜଣ ପଜିଟିଭ ରହିଛନ୍ତି।

ଡାକ ବାକ୍ସ ଅଛି ଡାକ ନାହିଁ: ଅଲୋଡ଼ା ହୋଇପଡ଼ିରହିଛି ୧୭୦ ବର୍ଷ ପୁରୁଣା ପୋଷ୍ଟ ବକ୍ସ

ଆସିକା: ହଜିବାକୁ ବସିଲାଣି ଡାକବାକ୍ସ । ଚିଠି ମାଧ୍ୟମରେ ଭାବର ଆଦାନପ୍ରଦାନ କମୁଥିବାରୁ ଅବହେଳିତ ଅବସ୍ଥାରେ ପଡିଛି ଡାକବାକ୍ସ । ଦିନଥିଲା ପୋଷ୍ଟ ବକ୍ସ ଉପରେ ନିର୍ଭର କରୁଥିଲେ ଲୋକେ । ସମ୍ପର୍କ ମଧ୍ୟରେ ଦୂରତା କମାଇବା ପରେ ସହଯୋଗ କରୁଥିଲା । ହେଲେ ଏବେ ଆଧୁନିକତା ପାଇଁ ଏହା ଡାକଘର କାନ୍ଥରେ ଭଙ୍ଗା ଦଦରା ଅବସ୍ଥାରେ ଝୁଲୁଛି ।

ଆଧୁନିକତାରେ ଅଲୋଡ଼ା ଡାକବାକ୍ସ । କମିଛି ଚିଠିର ଆଦାନପ୍ରଦାନ । ଦଦରା ଅବସ୍ଥାରେ ଝୁଲୁଛି ଟିଣବାକ୍ସ । ଅଫ୍‌ଲାଇନ୍ ଉପରେ ଭାରିପଡ଼ିଛି ଅନଲାଇନ । ବଳି ପଡ଼ିଯାଇଛି ଚିଠି, ସମ୍ପର୍କରେ ଦୂରତା କମାଇଛି ଇଣ୍ଟରନେଟ୍ । ଟେଲିଫୋନ, ମୋବାଇଲ, ଇ-ମେଲ୍ ଯୋଗେ କ୍ଷଣିକରେ କଥାବାର୍ତ୍ତା ସହ ଭାବର ଆଦାନ ପ୍ରଦାନ ହେଇପାରୁଛି । ଫଳରେ ଦୀର୍ଘ ବର୍ଷ ଧରି ଚିଠି ଦିଆ ନିଆର ମାଧ୍ୟମରେ ପାଲଟିଥିବା ଡାକବାକ୍ସ ଅଲୋଡା ଦଦରା ହୋଇ ପଡିରହିଛି । ସତେ ଯେପରି ଅତୀତକୁ ମନେ ପକାଇ ସେ ଡାକଘର କାନ୍ଥରେ କାନ୍ଦୁଛି ।

ପ୍ରାୟ ୧୭୦ ବର୍ଷର ପରୁତନ ପରଚୟ ହଜାଇଛି ଡାକବାକ୍ସ । ଗଞ୍ଜାମ ଜିଲ୍ଲା ବିଭିନ୍ନ ସ୍ଥାନରେ ପୋଷ୍ଟ ବକ୍ସ ସବୁ ନଷ୍ଟ ହେବାକୁ ବସିଲାଣି । ବ୍ୟବହାର ହେଉନଥିବାରୁ କିଛି ସ୍ଥାନରେ ପୋତି ହୋଇଗଲାଣି । କେବଳ ସରକାରୀ ଚିଠିପତ୍ରକୁ ଝାଡିଦେଲେ ଆଉ ସେଭଳି କାମରେ ଆସୁନଥିବା ଡାକ କର୍ମଚାରୀ କହିଛନ୍ତି । ଆଧୁନିକତା ଭିତରେ ପୁରାତନକୁ ଭୁଲି ଯାଉଛନ୍ତି ଲୋକେ । ଏହା ଉପରେ ସଚେତନ ହେଲେ ଦିନ ଆସିବ ସ୍ମୃତି ହୋଇ ରହିଯିବ ଡାକବାକ୍ସ ।

ଏଥିସହିତ ପଢ଼ନ୍ତୁ: ମନୀଷ ଅନୁରାଗ ହତ୍ୟା ମାମଲା: ବଦଳିଲେ ତମାଣ୍ଡୋ ଥାନା ଅଧିକାରୀ

ଜେଲରେ ଆଳତୀ କରୁଛନ୍ତି ଆର୍ୟନ,ଏବେ ଜାମିନ୍ ପାଇଁ ଭଗବାନ ଭରସା

ମୁମ୍ବାଇ: ମୁମ୍ବାଇ ଡ୍ରଗ୍ସ ମାମଲାରେ ୧୯ ଦିନ ଧରି ଆର୍ଥର ଜେଲରେ ରହୁଛନ୍ତି କିଙ୍ଗ ଖାନଙ୍କ ପୁଅ ଆର୍ୟନ ଖାନ୍ । ସେ ଜେଲରେ ରହିବା ପରଠାରୁ ନଖାଇ ନପିଇ ଏକାକୀ ବସୁଥିବା ଖବର ମିଳୁଥିଲା । ହେଲେ ଏବେ ଦିନଚର୍ଯ୍ୟାରେ କିଛି କିଛି ପରିବର୍ତ୍ତନ ହେଉଥିବା ସୂଚନା ମିଳିଛି ।

ଜେଲ୍ କର୍ତ୍ତୃପକ୍ଷଙ୍କ ସୂଚନାନୁସାରେ ଆର୍ୟନ ଏବେ ଜେଲରେ ଥିବା ମନ୍ଦିରରେ ପ୍ରତିଦିନ ସନ୍ଧ୍ୟା ୭ଟା ଆଳତୀରେ ସାମିଲ ହେଉଛନ୍ତି । ଖାଲି ଏତିକି ନୁହେଁ ଆଳତୀ ସମାପ୍ତ ହେବା ଯାଏଁ ସେଠାରେ ରହୁଛନ୍ତି ମଧ୍ୟ।

 

ପୁଅକୁ ଭେଟ କରିବା ପାଇଁ ଗତ ଗୁରୁବାର ଦିନ କିଙ୍ଗ ଖାନ୍ ଶାହରୁଖ ଆର୍ଥର ଜେଲ୍ ଯାଇଥିଲେ । ସେଠାରେ ସେ ପ୍ରାୟ ୧୮ମିନିଟ୍ ରହିବା ସହିତ ଇଣ୍ଟରକମରେ ଆର୍ୟନଙ୍କ ସହ ୧୦ମି. କଥାବାର୍ତ୍ତା ହୋଇଥିଲେ । ସାକ୍ଷାତ କରିବା ପରେ ଭିଜିଟର୍ ରୁମରେ କାନ୍ଦିବାକୁ ଲାଗିଥିଲେ ଆର୍ୟନ । ଆଉ ଜଣେ କଏଦୀ ତାଙ୍କୁ ସାନ୍ତ୍ୱନା ଦେଇଥିଲା ବେଳେ କେହି କେହି ବିଲ୍ ମିଳିଯିବ ବୋଲି ଆଶ୍ୱସନା ଦେଇଥିଲେ । ଯାହାପରେ ତାଙ୍କୁ ବାରାକ କୁ ନିଆଯାଇଥିଲା ।

ଆର୍ୟନ ବାରାକ୍ କୁ ଯିବା ପରେ ଗୋଟିଏ କୋଣରେ ଚୁପଚାପ୍ ବସିଥିଲେ । ଆଉ କଏଦୀ ମାନେ ପଚାରି ଥିବା କିଛି ପ୍ରଶ୍ନ ଉତ୍ତର ମୁଣ୍ଡ ହଲାଇ ଦେଇଥିଲା । ଏପରିକି ବାପାଙ୍କୁ ସାକ୍ଷାତ କରି ଯିବାପରେ ସେ କିଛି ଖାଇନଥିବା ସୁତ୍ରରୁ ପ୍ରକାଶ ।

 

 

 

ମମିତା ମାନିନଥିଲେ ଗୋବିନ୍ଦଙ୍କ କଥା, ଏଣୁ ତଣ୍ଟି ଚିପି ମାରିଦେଇଥିଲେ

ଧର୍ମଗଡ଼: ମମିତା ମେହେରଙ୍କୁ କେମିତି କରାଯାଇଥିଲା ହତ୍ୟା । କ୍ରାଇମ୍ ସ୍ପଟରେ ଡେମୋ ଦେଖାଇଲା ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ। ଉତ୍ତରାଞ୍ଚଳ ଡିଆଇଜି ଓ ବଲାଙ୍ଗୀର ଏସପିଙ୍କ ଉପସ୍ଥିତିରେ କ୍ରାଇମ୍‌ ସିନ୍‌ ରିକ୍ରିଏଟ୍‌ କରାଯାଇଛି। ଭୋର ୪ଟା ୧୫ ମିନିଟ ସମୟରେ କ୍ରାଇମସ୍ପଟକୁ ନେଇ ସିନ୍‌ ରିକ୍ରିଏସନ କରିଛି ପୋଲିସ । ସାଇଣ୍ଟିଫିକ ଟିମ, ଟେକନିକାଲ ଟିମ, ଭିଡ଼ିଓ ଗ୍ରାଫି ଟିମ ସହ ପୋଲିସର କଡାସୁରକ୍ଷା ବ୍ୟବସ୍ଥା ଭିତରେ ସିନ୍‌ ରିକ୍ରିଏସନ କରାଯାଇଛି । ଡେମୋ ବେଳେ ଗୋବିନ୍ଦ ଘଟଣା ଦିନର ସବୁ ସତ ବଖାଣିଛି ପୋଲିସ ଆଗରେ । ଇଜ୍ଜତ ଚାଲିଯିବା ଭୟରେ ମମିତାକୁ ଯୋଜନାବଦ୍ଧ ଭାବେ ହତ୍ୟା କରିଥିଲା ଗୋବିନ୍ଦ । ସିନ୍‌ ରିକ୍ରିଏସନ ସମୟରେ DIGଙ୍କ ଆଗରେ କହିଛି ଗୋବିନ୍ଦ । ଘଟଣା ନେଇ ଅନୁତପ୍ତ ହେବା ସହ ଗୋବିନ୍ଦ କହିଛି, ସବୁ ସପ୍ନ ବୃଥା ହୋଇଯାଇଛି, ଦୀର୍ଘ ଦିନ ଧରି କଠିନ ପରିଶ୍ରମ କରି ସ୍କୁଲ ଖୋଲିଥିଲି । ଗୋଟିଏ ଭୁଲ ନିଷ୍ପତ୍ତିରେ ସବୁ ଛାରଖାର ହୋଇଯାଇଛି ।

ମମିତାକୁ ଭବାନୀପାଟନା ସହରକୁ ନେଇ ନୂଆ ଡ୍ରେସ୍‌ କିଣିଦେଇଥିଲା ଗୋବିନ୍ଦ । ଫେରିଲା ବେଳେ ଗାଡି ଭିତରେ ତାର ଅନୈତିକ ଭିଡିଓ ବାହାରେ ପ୍ରଘଟ ନକରିବା ପାଇଁ ଅନୁରୋଧ କରିଥିଲା । ମମିତା ମଧ୍ୟ ଗୋବିନ୍ଦର ଅନୁରୋଧକୁ ମାନିଯାଇଥିଲେ ହେଲେ, ଗୋବିନ୍ଦ ମମିତାକୁ ବିଶ୍ୱାସକୁ ନେଇନଥିଲା । ମାଣିକେଶ୍ୱରୀ ମନ୍ଦିର ନେଇ ଶପଥ ପାଠ କରିବାକୁ କହିଥିଲା, ସେଥିରେ ମମିତା ରାଜି ହୋଇନଥିଲେ । ବାରମ୍ବାର ଅନୁରୋଧ ପରେ ବି ମମିତା ମନ୍ଦିରରେ ଶପଥ ପାଠ କରିବାକୁ ରାଜିନହେବାରୁ ମମିତାକୁ ରାସ୍ତାରୁ ହଟାଇବା ପାଇଁ ଯୋଜନା କରିଥିଲା ଗୋବିନ୍ଦ । ରାସ୍ତାରେ ସୁଯୋଗ ଦେଖି ତଣ୍ଟି ଚିପି ହତ୍ୟା କରିଥିଲା ବୋଲି, ଡେମୋ ସମୟରେ କହିଛି ଗୋବିନ୍ଦ । ସହଯୋଗୀ ରଧେଶ୍ୟାମ ଚଣ୍ଡୀ କିପରି ସହଯୋଗ କରିଥିଲେ ତାହା ମଧ୍ୟ ବଖାଣିଛି ଅଭିଯୁକ୍ତ । ପରେ ମହାଲିଙ୍ଗରୁ ହତ୍ୟାକାଣ୍ଡ ଘଟିଥିବା ସ୍ଥାନ କୁଡସୁଡକୁ ନେଇଥିଲା ପୋଲିସ । ସେଠାରେ କିପରି ମମିତାର ମୃତଦେହକୁ କାରରେ ନେଇ ଘର ପଛପଟେ ଲୁଚାଇଥିଲା ଓ ସନ୍ଧ୍ୟା ପରେ ଗାତରେ ନିଆଁ ଲଗାଇ ପୋଡ଼ି ଦେଇଥିଲା ସେ ସବୁ ବଖାଣିଛି ଅଭିଯୁକ୍ତ । ୫ ଦିନିଆ ରିମାଣ୍ଡରେ ଥିବା ଗୋବିନ୍ଦ ପୋଲିସ ଆଗରେ ପୁରା ଘଟଣାର ଗୋଟିଏ ପରେ ଗୋଟିଏ ରାଜ୍‌ ଖୋଲୁଛି। ଆଜି ତୃତୀୟ ଦିନରେ ବି ଗୋବିନ୍ଦକୁ ମାରାଥନ ଜେରା କରୁଛି ପୋଲିସ । ସେପଟେ ରାଜ୍ୟ ମହିଳା କମିଶନ ଅଧ୍ୟକ୍ଷା ମିନତୀ ବେହେରା ବଲାଙ୍ଗୀର ଜିଲ୍ଲା ଏସପିଙ୍କ କାର୍ଯ୍ୟାଳୟରେ ପହଞ୍ଚିଛନ୍ତି ।