ନୂଆଦିଲ୍ଲୀ: ପ୍ରତିବର୍ଷ ଡିସେମ୍ବର ୪ ତାରିଖରେ ପାଳନ ହୁଏ ନୌସେନା ଦିବସ । ଆଜି ଶନିବାର ଦେଶବ୍ୟାପୀ ନୌସେନା ଦିବସ ପାଳନ କରାଯାଉଛି । ଆସନ୍ତୁ ଜାଣିବା ନୌସେନା ଦିବସର ଇତିହାସ ।
୧୯୭୧ ମସିହାରେ ଭାରତ-ପାକିସ୍ତାନ ମଧ୍ୟରେ ଯୁଦ୍ଧରେ କରାଚୀ ଉପରେ ଆକ୍ରମଣ କରିଥିଲା ଭାରତ । ଏହି ଅପରେସନର ନାଁ ‘ଅପରେସନ୍ ଟ୍ରାଇଡେଣ୍ଟ’ ଥିଲା । ଏହି ଅପରେସନ୍ ୪ ଡିସେମ୍ବରରେ ଆରମ୍ଭ ହୋଇଥିଲା । ଏଥିପାଇଁ ଭାରତୀୟ ନୌସେନା ଏହି ମିଶନର ସଫଳତାକୁ ନେଇ ନୌସେନା ଦିବସ ପାଳନ କରେ ।
ପ୍ରକୃତରେ, ୧୯୭୧ ଡିସେମ୍ବର ୩ରେ ଯୁଦ୍ଧ ଆରମ୍ଭ ହୋଇଥିଲା । ସେତେବେଳେ ପାକିସ୍ତାନ ଭାରତୀୟ ବାୟୁ ସୀମା ସହ ସୀମାବର୍ତ୍ତୀ ଅଞ୍ଚଳରେ ଆକ୍ରମଣ କରିଥିଲା । ପାକିସ୍ତାନକୁ ଜବାବ ଦେବା ପାଇଁ ନୌସେନା ପକ୍ଷରୁ ଆରମ୍ଭ ହୋଇଥିଲା ‘ଅପରେସନ୍ ଟ୍ରାଇଡେଣ୍ଟ’ । ଏହି ଅଭିଯାନରେ ପାକିସ୍ତାନର ନୌସେନା ମୁଖ୍ୟାଳୟକୁ ଟାର୍ଗେଟ୍ କରାଯାଇଥିଲା, ଯାହାକି କରାଚୀରେ ଥିଲା ।
ଭାରତୀୟ ନୌସେନା ପକ୍ଷରୁ ହୋଇଥିବା ଆକ୍ରମଣରେ ୩ଟି ବିଦ୍ୟୁତ କ୍ଲାସ୍ ମିସାଇଲ୍ ବୋଟ୍, ୨ଟି ଆଣ୍ଟି ସବମରିନ ଓ ଗୋଟିଏ ଟ୍ୟାଙ୍କର ସାମିଲ୍ ଥିଲା । ରାତି ସମୟରେ ପାକିସ୍ତାନ ଉପରେ ଆକ୍ରମଣ ପାଇଁ ଯୋଜନା କରିଥିଲା ଭାରତ । କାରଣ ସେତେବେଳେ ପାକିସ୍ତାନ ପାଖରେ ରାତିରେ ବୋମାମାଡ଼ କରିବାରେ ସକ୍ଷମ ବିମାନ ନଥିଲା । ଏହି ଯୁଦ୍ଧରେ ପାକିସ୍ତାନର ୫ ଜଣ ନୌସୈନିକ ମୃତ୍ୟୁବରଣ କରିଥିବା ବେଳେ ୭୦୦ରୁ ଅଧିକ ଆହାତ ହୋଇଥିଲେ । ଏହି ବିଜୟକୁ ନେଇ ଡିସେମ୍ବର ୪ ତାରିଖରେ ପାଳନ କରାଯାଏ ନୌସେନା ଦିବସ ।
